حقوق الإنسان ..(الكوز) - الجزء الثاني

Quote: سلامات يا ود البشرى اي انسان عندو حقوق .. حتى المجرمين عندهم حقوق تحفظ ليهم انسانيتهم .. والحقوق دي محفوظة بالقوانيين .. وعلى الرغم من انو القوانيين دي بتبدو لبعض الناس (حسب الظروف) امثل من مايجب الا انو هي حقيقة بتحفظ النظام والتوازن على ظهر هذا الكوكب .. واعتقد انو في ناس كتار جدا مابيقدروا يتحملو مثالية القوانيين دي بعد تحصل ليهم حاجة من شخص ما فمابيحفظو ليهو حقوقو وده السبب البيخلي ناس صالحين جدا يخشو السجن ! ( قريت كتاب ذكريات من منزل الاموات لدويستوفيسكي ؟ ) اجابة على سؤالك هل للكوز حقوق .. عن نفسي بشوف انو من المثالية المتعبة حقا انو يكون لاي زول مابيحفظ حقوق الاخرين حقوق ! رغم ايماني باهمية حفظ حقوق الجميع لان الحقوق مثل حبات العقد اذا سقطت واحدة انفرط العقد كله نعم للكوز حقوق وهي مهمة صعبة جدا على الاخرين حفظ حقوق الكوز .. اتذكر هنا بوست حيدر الزين الذي يطالب الناس ادانة دقة الترابي زي مابيدينو العنف على اي انسان !! وادهشتني فعلا مداخلات ناس كتار وهم يرددون بمثالية آلية بان ضرب شيخ عجوز ليس من الاخلاق !! اتخييل بس الترابي كللللو اختزلوهو في مجرد شيخ عجوز !! بالله عليك الله دي ماياها المثالية المتعبة ذااتها ؟! وعندي سؤال ياخي ... هل خلافنا مع الكيزان مجرد خلاف سياسي ؟؟ يعني هل عااادي كده بعيدا عن السياسة بنقدر نتعامل مع الكيزان ؟؟ عن نفسي ومن فترة طويلة فشلت تماما في الاحساس باي نوع من الود تجاه الكيزان .. حتى اقربائي منهم والانا عارف كويس انهم مثلا مابيسرقو او يعذبوا زول ولكن مع ذلك ماقادر ابدا اخلق معاهم او اشعر تجاههم باي نوع من الود .. ولا قادر اقوم بواجباتي الاجتماعية معاهم نعم للكيزان حقوق لكنني انا عن نفسي اشعر بصعوبة شديدة في منحهم حقوقهم هذه .. واغلب الظن انني ساسلبهم حقوقهم هذه ان استطعت الى ذلك سبيلا .. فانا لست ملاكا ولا نبيا .. وارجو ان يغفر لي الله هذا التجاوز ولكنه قسمي في ما لا املك تحياتي يا ود البشرى ومعليش المداخلة شكلها غير مرتب