دكتور عمر القراي و(التشتشة)

Quote: ول ابا السنوسي..حبابك يا صديقي كتر خيرك على اشراكنا في محن ناس امسودان ، و كتر خير صديقنا عبد الله ادريس الذي كفانا بعض الكلام ، فالفكرة وقعت ليهو و حاول اعادة الأمور الى نصابها..فالأخ السنوسي و اكثر من مرة يعتب على الدكتور العجلة و عدم التحقق من الأمور.. اما بقية النخب المكابرة ساكت.. فنقول.. ما كتبه دكتور عمر القراي يدخل في باب التنحيل الواحد ده ، و فيهو اشارة و اضمارات غير كريمة لأنها تنطوي على احتقار و استعلاء كبير.. و بالطريقة دي.. ممكن بكل اطمئنان نقول أنو استاذنا دكتور عمر القراي سقط مرتين: مرة كرجل محكم و موثق الكتابة (يعني مؤرخ محترم) ينقل الأمور من مصادرها المعترف بيها ، و سقوطه انتهى به الى أمر الكتابة عن مصادر الشمارات والقوالات (كلام القهاوي كما قال اخونا عبد الله ادريس).. ومرة ثانية سقط دكتور عمر القراي كجمهوري محترم ، لأن ادعاء الجمهوريين انهم ينحدرون من فكر انساني لا يفرق بين الناس بالشبهات أو بالحقائق الموثقة حتى..و الأنكي أن مرجعية الدكتور الجمهورية تقوم على فكر ديني بين ، و الفكر الديني ده قائم على القران الذي يحفظه حميدتي ..ولا السادة الجمهوريين عندهم قرآن تاني؟.. تلك المرجعية تدعي انها كونية و تخاطب الإنسان أينما كان و كيفما كان..يعني اممية زيها و زي الفكر الشيوعي.. فحكاية الخيار و الفقوس دي الجابها شنو؟.. و يبدو انو المرجعية دي الدكتور ما شغال بيها كتير و نسى تعاليمها و ادبياتها التي تمجد الأخوة الإنسانية..فالرجل يمارس احتقار و تعالي على مواطن سوداني (غض النظر عن اختلافنا او اتفاقنا معاهو فهو سوداني).. فالدكتور ابتدر عبارته بشطط و كدنا ان نرى الغيظ الذي سوى ليهو ام ظريطة (عبرة تسد الحلق حنقا و غبنا يا سارة عيسى..!!) يكسو ملامح وجهه و روحه ، فهو مفجوع أنو حميدتي الناس عاملة ليهو توم و شمار اكتر من القائد الأول لقوات الدعم السريع (الجنجويد/المراحيل..الخ)..و كانما الدكتور يرى أن الأبهة اولى بيها زولو القائد الأول..و هذا تناقض عجيب.. العساكر عساكر يا القراي سواءا كانوا من غشفروا ولا الطينة ولا حجر العسل ولا تقاطع هيا ذاتو.. كلهم ام الكـــلب بعشوم.. فليه انتا زعلان عشان تهميش بعضهم البعض؟.. اما الأنكى فهو تجريد الناس من المواطنة..و عبارة القراي (فعرفنا) ما هي عبارة عادية..و انما هي عبارة فيها احتقار و تعالي على الخلق..فالمعرفة تختلف عن العلم ، لأن المعرفة تتعلق بالشي في عضمو (ذاتو) و العلم يتعلق بصفات الشي.. فلو قال علمنا كان ممكن يتخارج من اللوم بان مجرد العلم بالحاجة لا يعني انو ممكن تتشكل خلاصات عنها ، لكن المعرفة بالحاجة فده معناتو تيقن اكثر..و العبارة كلها كان يمكن ان يتجاهلها الدكتور..و حتى اللحظة حذفها لا يؤثر من سياق الكلام ، و طالما الأمر كده فان ذكرها مقصود لذاتو.. عشان كده قلنا الدكتور قاعد يمارس التنحيل الواحد ده..و دي عوجة كبيرة خلاص..!! السادة الجمهوريين شكلهم ماشين على الإنحدار كما حدث لأتباع دكتور جون قرنق.. فقرنق بشر و عمل على انزال فكر السودان الجديد كواقع ، و بعد مات حدثت الردة الأخلاقية فاصبحت الناس تتكاتل على اساس الأثنية و القبلية (دينكا ضد نوير) كما يحدث في دولة جنوب السودان . و الجمهوريين الأستاذ يعمل و يبشر بفكر انساني فيرتد ابناؤه اخلاقيا و يشربوا من عكر السقوط لمرحلة تجريد الناس من صفة المواطنة، و يا ليتو كان تجريد مؤسس.. فهو تجريد قايم على الشمارات و الكضب الأبلق ..!! في واحد من ناس قطيع الشمال ، قاعد يكتب باسم مستعار (يوسف بشاري) من نافذ الفيس بووك.. كل دقيقة و التانية شابك اخونا ول ابا بريمة تشادي و ارجع تشاد و شنو كده ما عارف.. فهل نستبعد يوما ما انو دكتور القراي يقول بريمة تشادي؟.. المافي شنو..!! اخونا هيثم غالي.. الدكتور قال ليك كان قاعد يجمع في الأخبار (نظام بوليس سري عدييل) فشنو يا ابوي مافي طريقة نسوي من الفسيخ شربات..!! على الدكتور الإعتذار عن هذا الشطط..و على الجمهوريين الإعتذار بدل المكابرة ساكت..!! كبر