منو البيتش شمس باكر ... تظاهر ناس او اضرابها

.



في دبابة .. في دبابة
** ** ** **

في دبابة .. في دبابة

مساويكك في دبابة

أباريقك في دبابة

و مشاويرك في دبابة

تنوم و تحس في دبابة

و عاد لي متين في دبابة

تظل معزول عن الدنيا

و مَقطِّع بينك أسبابا

ولا تاخد خبار أهلك

و لا أخبارك في زول جابا

رويدك لا يغرنك

نعيم الفيها و أطيابا

يسارك كلما طول

موايدك جفت أبوابا

نهارك و إنت ماك فلاح

تنوم و هجير وتَّابة

و من النسمة التهب بالليل

بقت عينيك هوابة

في دبابة

مصاقر حالك التبدي

و تراعي عليهو جلابة

تمارض وضع ينصاقط

فروع ضبلاني من غابة

تعوِّر مركب التاريخ

تعصلج دفتو التّابة

صلاحو الطيبة ما هبت

بلا حبّانا و أحبابا

يا عايق الشعب يا قافل

يا عمرك في دبابة

بلاك يا سيدي الغافل

عن الأيام و دولابة

منو الفي الدنيا ما فاكر

شوارع الثورة جيّابة

شنو البتش شمس باكر

تظاهر ناسا و إضرابا

و مجرد فرض يا قاصر

و إرادة الشعب غلابة

إذا سديت دروب الأرض

وإنطامنت علي أبوابة

فكيف تضمن سماء الخرطوم

سماها الماها كضابة

في دبابة .






.