|
Re: ... (Re: خضر حسين خليل)
|
Quote: بكل تأكيد فالحزن (الواقع غلاب) وناساً (محرومة من الفرحة من حقها تبكي بحرية) |
حالتكم تحنن كنت عاوز اقترح ليكم العرس الاحتل جزء كبير من ذاكرة وطنية فريدة تسمى " اغاني البنات " لكن طالعتني : ووب عليّ البكى ما بجيبوا ليّ
طالعتني دي ما الكلمة الفصحى . . . انا زول بطانة . . . طالعتنى بفهم سودانوي خالص . . . و لقطتني كمان و لقطت منها خيبة أمل جديدة
Quote: ففي صحف الغد ربما نقرأ اعلاناً عن رجل فصيلة دمه O +ve يود بيع كليته ربما لرسوم تعليم ابن او علاج ام او قوت زوجة |
شايف جيلنا محسود ؟ ليكم حق فيا سادتي انا من جيل الشحادين زي ما قال سعادتو و فرزت هي عيشتا مننا و الله يا اماني سنة 81 فضلة خير سعادة المستشار كان عندنا تلفزيون اربعة وعشرين بوصة ملون بي ضلفتين و عندو اربعة كرعين بقيف عليهن براه في الحوش - آي و الله تلفزيون ، ما دولاب و لا حمار في دولاب و لاحمار ماركتو ناشونال ؟ - و عشان تآمنوا و تصدقوني كمان جابوني فيهو انا و كبسون ( كبسور ) صاحبي . و لو ما كبسون كان راحت اللحظة التاريخية دي سدى و بدون توثيق . قعدت اكورك دا كبسون دا كبسون . . . جاتني خبتة في داقوسي . . . طيب الجمبو دا منو ؟ طبعاً ما عرفتو لاني ما شفت نفسي قبل كدا . . . ما تجي يا امجد تقول لي دا ما تاريخ ؟! تاريخ السجم و الرماد يا فردة طلعونا من المدرسة نستقبل اب عاج لما جى يفتتح كوبري كوستي الجديد وكتها . . . حكمة الله لي اسي اسمو " كوبري كوستي الجديد " كوبري كوستي ربط البلااااااد من سواكن للمجلد . . . بلحن هندي . . . تحديداً لحن اغنية الحصاد . . . حليلا كوستي . . . شفتها في اكتوبر الفات و كأنها مدينة خارجة من حرب تواً و حليلو قبلوا الحساب 16 سنة + عمالة و ارتهان و ترحيل فلاشا + القاب مضروبة ( الامام + المشير + القائد + اب عاج ) ناقص سفاح نقسم الحاصل الجبري على كوبري و قاعة صداقة و سلسلة كتب ( النهج الاسلامي . . . لماذا و كيف و اين " هنا و لا في البلد ؟ " و لزوموا شنو ذاتو ؟ ) + شريعة طبقها كويس ( ما يعادل " سفطها " الخليجية ) وقعد فيها الامام معلي بيها الكرسي . . . ( احكام شريعة جزائية + محاكم عدالة ناجزة - روح الشريعة ) . . . و كُشيب ظريف المدينة يسخر من حالو و حالنا بعد جلدوه 40 سوط حد السكر طالب بقسيمة عشان ما يلاقيه عسكري تاني يقوم ينجلد بنفس السكرة . . . انا مدين ككوستي ذاتها لكشيب هذا و لحكاوية التي تتداولها المدينة بقدرة البقاء و الصمود و العصيان ليهو حق يطالب بالقسيمة لانو حكى : انو في واحد كان جاري لما سالوه قال الحكومة قررت تقطع من اي زول عندو 3 اضنين اضان واحدة لما سالوه طيب انت عندك 2 بس قال ليهم الناس دي بتقطع اول بعدين بحسبوا ! و كان طلعن اتنين ذاتو ما بعتذروا ليك . . . اسي المعادلة دي نتيجتها كم ؟ سلبية و لا ايجابية ؟ و لا حبية زي ما كان بقول الرشيد بدوي عبيد . . . ياااهـ . . . ذكرتوني كاس العالم 82 في اسبانيا . . . اه ما ذكرتوني اي حاجة . . . هو اصلاً ماحضرتو شهادتي ح تبقى شهادة زور ساي . . . شاهد مشافش حاقة . . . عشان تحضر مباراة الساعة 10 مساء كان لازم تبيع الدافوري العصر عشان تلقى ليك موقع كويس في صف العيش للعشاء و لما ترجع مهدود تعرف النتيجة الصباح حتى تفهم الحاصل شنو ؟
ابوكم مين ؟ قشيري . . . اي و الله الاولاد المتمردين كانو بقولوها كدا . . . و ينجوا بفعلتهم بسبب الجوطة . . . نحن جيل الهتاف و كان الضجيج حليفنا التاريخي يا عمك لقيناالقبلنا بهتفوا ! . . . قمنا لمينا متعوس هتافنا على خائب رجاء امانيهم . . . و بقينا كلنا نزعق و علينا الهتاف : داون داون يو اس ايه . . . و المصحفين شغالين داون داون يونس بيه . . . شغب و شقاوة و عدم عرفة ساي برئين كنا ياخ لن يحكمنا البنك الدولي . . . و الوكت داك تلفزيونا لسه ما جاب " ريا و سكينة " عشان كدا سقطت سكينة من الهتاف جهاز الامن جهاز فاشيستي . . . و كبسون يسألني فاشيستي يعني شنو ؟ التقول عارف ريا و سكينة ديل منن و لا سبب شغفن بالدهب و غنائم الغافلين ؟ و التقول بعرف يونس بيه دا منو ذاتو ؟ انهروا ليك : يا معلم فاشيستي يعني ( كعب ) . . . دوس ياخ مع الناس دي ساي . . . جهاز الامن جهاز فاشيستي الناس دي كان زعلانة شديد عشان كدا انا كنت مصدقهم و انا ذاتو كنت زهجان من صفوف العيش و مدافرتها و معاه غبينة انها ضيعت علي متعة كاس العالم و شاعرهم كان بقول : فال البخونك ويزدريك يا ويلوا من غضبك عليهو و الهتاف صاخب : لن ترتاح يا سفاح الكلام دا زي الايام دي سنة 85 ذات مارس ماسك كتف ابريل . . . اعظم شعب و اعظم جيل الليلة !!! انا بره . . . دا زعمهم هم . . . مساهمتي في الثورة دي ما اتعدت ترديد الهتاف مع الجماعة في غير اوقات الدافوري ( هاتف بارت تايمر يعني او في اوقات الفراغ ) و الهتاف ذاتو مرات مصحّف او كما تقتضي الشقاوة و دائماً الصخب و الضجيج كان حليفاً لنا حتى لما حمونا نشارك في ثورة الاصابع البنفسجية في 1986 قالو ايه ؟ ما كملنا السن القانونية . . . كيف الكلام دا . . . ياخ انا شدة ما كنت كبير لما ابوي مات ذاتو . . . لكن تقول شنو ؟ منطق مافي ... ديالكتيك تك . . . اكلونا حنك بس . . . و اسي كمان الجاية دي ذاتا قالوا مغتربين ؟!! آي ما بقينا سقط متاع ساي بعد ما البترول طلع . . . ناكرين قريشاتنا القاسموا فيها و ليداتنا و ضرائب قسمت ضهرنا . . .
و كان برضو عندنا شجرة ليمون كبيرة بترمي في راس البرندة . . . الليمون الاصفر الكبار طعموا ما اتزيف الا بعد 89 و في 2003 ذات عودة بعد ما تشالبتنا المنافي لقيتم قطعوها يوسعوا الحوش بعد ما البنات عرسن . . . حليلوا قبلوا بقى ما في طعم ليمون من الاساس . . . اقول ليكم حاجة اناحاكيتكم كمايوي اها انتو يا انقاذيين وينو عرضحالكم ؟ كان عندكم مظاهرات زينا ؟ و برضوا عملتوا هتافات ؟ و يا ريت واحد عالم نفس و دواخل ( مصارين و كرشة ؤ كدا ) يشرح لينا سايكولوجيا الكوليرا البتمسك المتظاهرين ديل . . . ياخ في 92 في تأبين اجمل الشهداء " طارق زهري باشا " كان شعار التأبين " مقتل طارق مقتل أمة " اتحور لـ " مقتل طالب مقتل أمة " و في السوق العربي بانضمام فصيل الشماشة المصادم اكتسب الهتاف حمرة عين " تكتل طالب نكتل امك "
شحاد كامل الدسم و ما بندم
|
|
|
|
|
|
|
العنوان |
الكاتب |
Date |
احباطــــات جيــل ..!! | Amjed | 03-13-09, 11:57 AM |
Re: احباطــــات جيــل ..!! | Salahaldeen Nadir | 03-13-09, 01:11 PM |
Re: احباطــــات جيــل ..!! | محمد الجيلى | 03-13-09, 01:23 PM |
Re: احباطــــات جيــل ..!! | الوليد محمد الامين | 03-13-09, 02:43 PM |
Re: احباطــــات جيــل ..!! | Amjed | 03-13-09, 04:24 PM |
كفاك ياعيوني ما تبكي | Suad I. Ahmed | 03-13-09, 07:06 PM |
Re: كفاك ياعيوني ما تبكي | Amjed | 03-13-09, 09:40 PM |
Re: احباطــــات جيــل ..!! | مزن ابوعبيدة النيل | 03-13-09, 08:03 PM |
Re: احباطــــات جيــل ..!! | Amjed | 03-13-09, 09:57 PM |
Re: احباطــــات جيــل ..!! | Amjed | 03-14-09, 01:06 PM |
Re: احباطــــات جيــل ..!! | قيقراوي | 03-14-09, 11:01 PM |
Re: احباطــــات جيــل ..!! | Amjed | 03-15-09, 12:37 PM |
Re: احباطــــات جيــل ..!! | Ishraga Mustafa | 03-15-09, 12:57 PM |
Re: احباطــــات جيــل ..!! | باسط المكي | 03-15-09, 02:12 PM |
جيل إحباطات | ombadda | 03-15-09, 02:55 PM |
Re: جيل إحباطات | Amjed | 03-15-09, 09:59 PM |
Re: جيل إحباطات | Amjed | 03-15-09, 10:11 PM |
Re: جيل إحباطات | Amjed | 03-15-09, 10:15 PM |
Re: جيل إحباطات | Amjed | 03-15-09, 10:19 PM |
Re: جيل إحباطات | قيقراوي | 03-17-09, 09:49 PM |
Re: جيل إحباطات | Amjed | 03-17-09, 10:26 PM |
Re: جيل إحباطات | قيقراوي | 03-17-09, 11:33 PM |
Re: جيل إحباطات | قيقراوي | 03-17-09, 11:38 PM |
Re: جيل إحباطات | قيقراوي | 03-17-09, 11:41 PM |
Re: جيل إحباطات | قيقراوي | 03-17-09, 11:51 PM |
Re: جيل إحباطات | قيقراوي | 03-17-09, 11:59 PM |
Re: جيل إحباطات | حمور زيادة | 03-18-09, 00:19 AM |
Re: جيل إحباطات | Amjed | 03-18-09, 01:05 AM |
Re: جيل إحباطات | Salma Daoud | 03-18-09, 01:30 AM |
Re: جيل إحباطات | Ibrahim Algrefwi | 03-18-09, 01:21 AM |
Re: جيل إحباطات | Amjed | 03-18-09, 01:50 AM |
Re: جيل إحباطات | Amjed | 03-18-09, 02:06 AM |
Re: جيل إحباطات | Amjed | 03-18-09, 12:42 PM |
Re: جيل إحباطات | باسط المكي | 03-18-09, 01:01 PM |
زيارات... | Amjed | 03-18-09, 07:54 PM |
Re: زيارات... | Amjed | 03-18-09, 08:08 PM |
Re: زيارات... | Salma Daoud | 03-18-09, 11:11 PM |
Re: زيارات... | Ishraga Mustafa | 03-18-09, 11:25 PM |
... | Amjed | 03-21-09, 12:26 PM |
Re: ... | Amany Elamin | 03-21-09, 01:37 PM |
Re: ... | خضر حسين خليل | 03-21-09, 01:48 PM |
Re: ... | dardiri satti | 03-21-09, 03:08 PM |
Re: ... | قيقراوي | 03-21-09, 06:50 PM |
... | Amjed | 03-22-09, 01:18 PM |
|
|
|