كيف خرجت لبني من السودان ؟!

Quote: ياخ دي فكرة بيض .. ادوني فرصة تانية امخمخ لي فكرة

كان بيمشي مطار الخرطوم كل يوم بيحدد الاتجاهات والافتراضات الممكن يدخل بيها طيارة مسافرة لي اي مكان حتى ولو كانت ماشة الجنوب وقتها .. المهم بس إنو يطير ..
يجيني يديني التقرير اليومي .. وما بيعفيني لو كنت صاحي أو نايم .. التقرير اليومي عن حركة الطيران والاتجاهات .. ويقول لي الليلة مشيت ليك بي الجهة بتاعت امتداد ناصر المسافة بي هناك للمدرج بعيدة وباب الطيارات بيكون مقبل على الناحية التانية .. اقوليهو اوكي جرب من تجاه الجريف غريب .. يجيني تاني يوم يقولي .. هناك حركة العربات كتيرة القاطعة الظلط وممكن اتنقش من اي عربية بتاعت شرطة .. المهم جرب الاحتمالات كلها بي كل زواياها وأنا كنت ما جادي فاكرو بيهظر .. المهم نجض امورو .. بقت المشكلة عندو انو قروش مافيشة .. خمسة وتعسين واربعة وتسعين وستة وتسعين قروش ماف .. جيت لقيتو جايب ليهو بتاعين حطب من وين ما عارف .. باع ليهم شجرة النيم الفي البيت لو تأخرت خمسة دقايق كان الشجرة راحت فيها وهي شجرة اكبر من جدو ..
المهم عملت معاهو مشكلة .. وطرشقت ليهو الخطة بتاعت السفر بالطريقة دي ..
فيما بعد .. قدر يسافر دولة عربية .. ومنها لفلف جهات كتيرة جدا .. تهريب معاناة .. مافيا .. اشياء خرافية ما بتتناسب مع عمرو خالص .. الآن مستقر في احدى الدول الأوروبية ووضعو مستقر خالص .. لكن المؤسف إنو قال لي السودان دا تاني لو رسموهو لي في خريطة ما بجيهو راجع ..