|
كتب الكاتب الفاتح جبرا المتوفرة بمعرض الدوحة
|
|
 Re: نهب وشروع في القتل في العمارات في وضح النهار ؟! (Re: omer osman)
|
بعد ان امضيت عام كامل وعدة اشهر بالقسم الشرقي الخرطوم نقلت الى القسم الاوسط الخرطوم (الجنوبي سابقاً) ومنه الى قسم العمارات
الذي يتبع له حسب التوزيع الجغرافي لدوائر الاختصاص. كنت في غاية السعادة لهذه النقلية لانها اخرجتني من القسم الشرقي العجيب و
غريب في مشاكله والجرائم التى كانت تقع فيه بحكم ان دائرة اختصاصه كبيرة جداً وعامرة بمناطق السكن العشوائي ، بعكس الاوسط الخرطوم
الذي يبدو هادئاً نسبياً ودائرة اختصاصه تضم مناطق تعتبر من ارقي احياء العاصمة الخرطوم 1 و 2 و3 وحي الزهور والعمارات ... الخ وبه
منطقة سكن عشوائي واحدة اسمها (بانتيو) واشهر مناطقها منطقة (ارفع صدرك) والاخيرة هذه تتميز بنشاط الدعارة التى تتم في خيم من
الشولات بحجم العنقريب فقط !!!
| |
 
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
أول يوم لي في القسم الاوسط له قصة تستحق ان تروي لانها تتعلق بقيادتي لفصيلة فض شغب حدث في منطقة الديم نتيجة واقعة
لاتزال متدوالة بين الناس سنعود لها مرة اخري انشاء الله. المهم تسلمت أمر تحركي من رئاسة القسم الى العمارات بعد عدة ايام
امضيتها في التعرف على الزملاء الذين لم تجمعني بهم الظروف من قبل وتضاعفت سعادتي كوني سااعمل في قسم العمارات الراقي والهاديء
مشكلته الوحيدة انه يوم ان تحدث فيه حادثة بتجيب هواء تقيل جداً وعاااادي البلاغ بجيك بي تلفون من رئاسة الشرطة امشوا بيت السفير
الفلاني او سفارة دولة كذا ، بحكم ان 90% من السفارات ومنازل السفراء الاجانب والمنظمات الاجنبية تقع في حي العمارات ، كما تضم دائرة
اختصاصه منازل وزراء ورؤساء سابقين (عبود) ومدراء عامين للشرطة وقادة كبار للجيش واطباء وفنانين مشهورين.
| |
|
|
|
|
|
|
|
|
 Re: نهب وشروع في القتل في العمارات في وضح النهار ؟! (Re: محمد عمر جبريل)
|
Quote: المكان : الخرطوم قسم شرطة العمارات.
الزمان : صيف عام 1990م |
** جنابو ودعثمان.
** مساءك خير وربنا يكتب سلامة إبنك..
** إنت عارف بالعنوان المُثير دا ( نهب وشروع في القتل في العمارات في وضح النهار ؟!) لو التاريخ الفوق دا خليتو الى أن تصل الى الحادثه التى تود الحديث عنها..
** عينيك ماتشوف إلا النور ,, لانو إنت مُصنف بأنك المُتحدث الرسمى بإسم الشرطه ومُحاميها ,, كنت حاتشوف مُداخلات تُصنف بالفرز الاول من الهجوم الضاغط والذى نفتقده فى فرق القُمه وليس القِمه..
## متربعين وصامتين وفى إنتظار الحكِى..
(ودام الود بيننا)
(ابو محمد فؤاد)
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: mayada kamal)
|
Quote: شنو العنوان المثير للقلق دا
اول مرة ما اتفق مع اطروحاتك
الجماعة عادوك ولا شنو!!!!!!!!!!!!!
ياخي انا اتخلعت بالعنوان دا
قلت تاني المات منو |
ميادة تحياتي
انا ذاتي ما كنت متفق مع نفسي في العنوان المثير ده لكن غلب الرأي الفني على الرأي الموضوعي فلنجاح البوست اعتقدت ان الامر
يحتاج الى جرعة من الاثارة ، وحاولت تصحيح الاوضاع منذ المداخلة الاولي بالاشارة الى ان الامر ذكريات شرطي متقاعد كي لايسترسل الناس
دون علم منهم.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
وقفنا عند انتقالي الى قسم العمارات والحديث عن ملامح دائرة اختصاص القسم وتميزها بالهدوء ونوعية السكان فيها ، مبني قسم
العمارات يقع في شارع 1 العمارات ويفتح في الناصية على شارع 1 وشارع محمد نجيب المبني صغير وجميل وبه حديقة جميلة يرعاها
عم عبدالنبي الجنايني وهذا الرجل حاصل على وسام الشجاعة من قبل في احداث 55 بجنوب السودان وبعد كبر اصبح هو الجنايني المسؤول
عن حديقة القسم ، بحكم ان دائرة اختصاص القسم ليست كبيرة فالقوة البشرية قليلة 2 ضباط ومجموعة من افراد الخدمة والمباحث والادارة
والسجلات ....... الخ في السابق كانت قوة القسم كبيرة لانها تضم الافراد الذين يقومون بحراسة السفارات ..... الخ وعندما انشئت وحدة
المنشئات رفع هذا العبء بافراده من كاهل القسم ، رئيس القسم كان المرحوم الرائدالطيب ابشر الذي تدرج من الصف حتى وصل رتبة الرائد
وعند التحاقي بالقسم كان في رتبة النقيب ، المرحوم الطيب ابشر موسوعة في شغل البوليس كعادة كل المترقين من الصف يمزج هذه المعرفة
بحسن التعامل والحكمة وحب الخير وحب العطاء فهو يعطيك بغير طلب من علمه وخبرته وكثيرا ما كنت استمتع في اوقات الفراغ بالجلوس
اليه وهو يحكي عن ذكريات البوليس التى لا تنتهي.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
لم يكن هناك ضباط في القسم بخلافي وعم الطيب ابشر وانا برتبة الملازم من بعدي طوالي عمنا الصول بشير صول الادارة ومجموعة الافراد
العاملين في الادارة والسجلات والبلاغات ومخزن السلاح ومخزن المعروضات .......... الخ والحمد لله كان كل افراد القسم على درجة عالية
من الاحترافية والتهذيب والانضباط ، اما قسم المباحث فكان هو العمود الفقري للقسم ويضم فطاحلة واصحاب خبرة طويلة امثال عمنا
موسي محمد موسي وعم عمر وعم جمال ومن الشباب عمر جلة وكمال كانوا يعملون دون كلل او ملل يمتلكون شبكة من المصادر مكنتنا من
تسديد العديد من البلاغات من سرقة عربات الى التزوير او الجريمة التى نحن بصددها.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
بحكم اني اسكن على بعد 3 شوارع من القسم فقد كنت احضر مبكراً جداً ولدي برنامج صباحي معتاد يبدأ بالدخول والقاء التحية على
المناوبين البايتين من امبارح في البلاغات والمباحث والاستماع الى تقرير شفاهي صغير عن الاحوال ثم كباية القهوة وقراة دفتر الاحوال
ودفاتر البلاغات ........ الخ وعندما يصل عم الطيب اقدمه له تقرير عن مادار ليلة امس وصباح اليوم وتبدأ دوامة العمل اليومي
مراجعة البلاغات بطرف المتحرين وحقيقة لم يكونوا يحوجوني لمراقبة لصيقة فكلهم على قدر عالي من المسئولية عادل الشايقي وسليمان
واخرين خذلتني الذاكرة عن ايراد اسمائهم. ثم تتابع مع عم نصرالدين تحويل المتهمين الذين لديهم جلسات في المحكمة في الاوسط وقد
لايصدق البعض ان عم نصرالدين اذا لم يجد سيارة وهو الامر الغالب يمكنه ان يقود 5 الى 6 متهمين سيراً على الاقدام الى الاوسط الخرطوم
دون كلبشات او خلافه وفي بعض الاحيان حتى دون مسدس ولا ادري الى الان السر في عدم فرار اى واحد منهم بالطبع هم في العادة من اصحاب
البلاغات الخفيفة سكر مشاجرة ...... الخ
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
يوم الحادث بدأ مثله ومثل اى يوم من ايامي في قسم العمارات عمل روتيني وتنتابني حالة من الملل حيث لاتوجد بلاغات كبيرة نعمل
عليها وتصبح الساعات طويلة في انتظار انتهاء الدوام الرسمي لمغادرة القسم لايقطعها الا اكواب الشاي والقهوة التى نشربها بلا
مزاج بس قلة شغلة ، قد تكون محظوظ في يوم مثل هذا ان يمر عليك (......) وهو شخصية مشهورة جداً في العمارات وهو راجل كبير يعني
قول بتاع 45 - 50 سنة ومن اسرة معروفة لكنه يعاني من مرض نفسي وليس عقلي والمشكلة في السودان انهم كلهم مجانين في عرف الناس
المهم هذا الرجل لدينا معاه طرائف ونوادر عجيبة ومشكلته انه يقمص دائماً او ينتحل شخصيات هامة مما يوقعه في العديد من المشاكل
التى كنا دائماً ما نحلها ودياً بعدين يمتاز بالهندام والاناقة بشكل ملفت ومن يراه يتحدث لا يظن انه به خلل ما. مرة في ايام حرب
تحرير الكويت كنا مكلفين بحراسة السفارة السعودية والقوة بقيادة عقيد وكان حديث عهد بالقسم الاوسط واثناء وقوفنا امام السفارة
حضر صاحبنا وهو في زي بلدي كامل وقف حيانا وعلى الفور ترجل العقيد من سيارته وبادله التحية وصاحبنا دخل في الدور طوالي اهاااا
الموقف شنو وقواتكم كيف ......؟؟؟؟ والعقيد يرد باهتمام وانا ميت من الضحك ولم ينسي صاحبنا وهو يغادر ان يوصي العقيد بضرورة
الانتباه واليقظة .... الخ والعقيد يهز رأسه بالموافقة وانشاء الله ، بعد ان ضمنت ان صاحبنا تواري عن الانظار قلت ليهو ياسعادتك
ده منو ؟ رد العقيد والله ماعرفتو بالضبط لكن تعرف العمارات دي كلها قادة ووزراء سابقين فبكون منهم عشان كده انا احترمتو جداً !!
وانا بضحك قالت ليهو ياسعادتك ده (...........) المجنون انت مابتعرفو وهاج العقيد ماج وطلب القبض عليهو .... ياسعادتك عااااي
والراجل ده ببرلم اى زول بشتغل في اختصاص الاوسط لحدي ما يتعرف عليهو كويس. اما قصة صاحبنا ده مع يوسف عبدالفتاح نائب والي
الخرطوم وقتها فتحتاج الى بوست براهو .
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
ونحن في الملل داك وفي حوالي الساعة 1 ظهراً دخلت امرأة حبشية الى القسم يرافقها عدد من الناس وهي في حالة ذعر رهيب وتبكي
بهستريا وتبدو وكانها خارجة من عراك عنيف خرجت من المكتب اثر سماعي للاصوات العالية والبكاء ... ياجماعة انشاء الله خير في
شنو الزولة دي ماله ؟؟؟ كدي تعالوا جوه اقعدي ....... ياعبدالله جيب موية ؟ واخذت تشرب من الكوب والماء يتساقط منها ويبلل
ملابسها ..... اها ياخالة في شنو ؟؟ الجماعة كتلونا يازولة كتلوك شنو ما انتي حية قدامنا لا انا كويسة لكن الراجل الكبير
بكون مات !!!!!! ياجماعة دي مصيبة شنو الوقعنا فيها دي ؟ طيب يا الناس الجايين مع المراة دي في زول فاهم حاجة ؟ والله نحن
كنا مارين ولقينا المرأه دي بتكورك وفي راجل كبير جماعة تانيين ركبوه تاكسي وماعارفنهم مشو وين وجبناها ليكم هنا ؟؟؟؟
رمضان كريم ...... نمشي نفطر ونجي نشوف الحاصل شنو ؟؟؟
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: على محمد على بشير)
|
الاخوان الاعزاء
سامي عتباني
حمد فتح الرحمن
احمد ابراهيم
على محمد على
تحياتي ...... والله ياجماعة التأخير من ظروف السودان امبارح عندنا قريبنا اتوفي قبل الفطور بي شوية ولحدي ما سترنا الجثمان
بعد صلاة العشا كان الوكت راح ، ياعلي بنتمها قبل كورة الهلال يمكن لو حصل قدر الله نزوغ لينا كم يوم من المنبر ......
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
اخر حاجة وقفنا هنا
Quote: ياجماعة دي مصيبة شنو الوقعنا فيها دي ؟ طيب يا الناس الجايين مع المراة دي في زول فاهم حاجة ؟ والله نحن
كنا مارين ولقينا المرأه دي بتكورك وفي راجل كبير جماعة تانيين ركبوه تاكسي وماعارفنهم مشو وين وجبناها ليكم هنا ؟؟؟؟
|
طيب عندنا مبلغة مجهولة حتى الان عن بلاغ مجهول عن كمية من الطلاسم ، المهم قلنا كدي اول حاجة نطلع للمرأة دي اورنيك 8 نوديها
بيهو المستشفي وبالفعل تم ارسالها مع احد المتحرين مع توصيته بان يتم فحصها وعلاجها حتى تهدا ونقدر ناخد منها كلمتين ، طيب
ياجماعة انتو لقيتو المرأة دي وين ؟ ودونا محل ما لقيتوها عسي نقدر نفهم حاجة ..... مشينا معاهم انا واتنين من ناس المباحث
ودونا في ميدان صغير في العمارات حوله مجموعة من البيوت قالوا نحن لقيناها بتكورك في الميدان ده لكن ما عارفين طلعت من ياتو
بيت ....... طيب خلاص ياجماعة مشكورين بس ادونا اسماكم بالكامل وعنواينكم وتعالوا لينا في القسم بعدين العصر ... طبعا في السودان
اكبر مصدر للمعلومات هم بتاعين الدكاكين وشفنا دكان صغير في الميدان مشينا عليهو أول ما شافنا جايين عليهو مرق من وراء البنك وجا
علينا ....... ازيكم اهلا ..... جيتوا عشان ناس عم (دانيال) الاسم كودي وكذلك باقي الاسماء التي سترد في القصة عدا اسماء الشرطة
والنيابة والقاضي.
اخيرا عرفنا معلومة يازول عم دانيال ده منو والحاصل شنو ؟ عم دانيال ده الراجل القبطي العجوز وده بيتو واشار الى بيت طابقين
يبدو وكأنه مهجور لكن باب الشارع فاتح ، طيب يازول الحصل شنو ؟؟ والله انا واخوي قاعدين في الدكان وبنبايع في زباين ده عاوز فول
وده عاوز جبنة ..... يازول فول شنو وجبنة شنو انت حتكي لينا قصة حياتك ورينا سريع في شنو ؟ ياجنابو اصبر المهم سمعنا كورايك
ولمن طلعنا شفنا تلاتة تنفار جارين ولفو بالشارع داك وماقدرنا نجري وراهم وجرينا على بيت عم دانيال لاقتنا (فكرتي) الحبشية جاريه
لي بره ومفهمنا منها حاجة دخلنا لقينا عم دانيال بين الحياة والموت عبدالباقي اخوي جري بيهو المستشفي ومعاهو اولاد من الحلة بي
عربية تاكسي كانت واقفه جنب الفرن والحبشية جرت في الميدان ولاقوها الناس الجو معاكم قبل شوية ومشت معاهم.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
شوية شوية بقت تظهر لينا معالم القضية المجني عليهم هم عم دانيال القبطي والحبشية فكرتي المتهمين تلاتة مجهولين مكان الحادث
بيت عم دانيال ، طيب يافتح الرحمن ماتكونوا دخلتوا لخبتوا علينا مكان الحادث ؟ لالا ياجنابو نحن بنعرف الحاجات كويس دي وعندنا
اولادناكتار من الحلة في البوليس وانا ذاتي اشتغلت في المطافيء قبل ده بس شهرين وشردته ...
دخلنا البيت ورغم انه كان في زمن ما وكأنه قصر لكنه الان في حالة بائسة وزي المهجور في حوش صغير دلفنا بعده الى صالة كبيرة
تفتح فيها غرف مغلقة والمطبخ مفتوح وباب الحمام مفتوح وفي احد اركان الصالة سرير خشبي كبير واثار العراك باينة عليه ، ياكمال
بتاع المباحث ارجع القسم خليهم يضربوا لي ناس المعامل الجنائية والبصمة ...... خليهم يجو وانتظرنا انا وعمر جلة بتاع المباحث
التاني ، تعال يافتح الرحمن كدي احكي لينا عن عمك دانيال ده ، لكن ياجنابو دكاني فاضي ممكن نمشي علي الدكان .. جدا عمر خليك بره
قدام الباب ومشيت معاهو على الدكان ..... مشكور ماقصر فتح قزازة بارد وبدأ يحكي طبعا انا بعد ما خليت المطافي ... يافتح الرحمن
كدي قصة المطافي دي ارخيها شوية ... اي جدا جدا المهم ياجنابو طبعا الدكان ده بتاع عبدالباقي اخوي ولمن شردته من المطافي ...
عاينت ليهو وسكته واصل واصل يافتح الرحمن مافي مشكلة نحن ورانا حاجة ........ المهم ابوي نادي عبدالباقي اخوي وقال ليهو لازم
تشرك اخوك ده معاك في المحل وبت عمو الخاطبة ليهو مية سنة دي ما بتنتظرو بالطريقة دي ......
ياخي القصة دي احلوت خالص الظاهر ح تجيب ليها قصص غرامية !! لكن فتح الرحمن ما محظوظ ماقدر يكمل قصته لانو عبدالباقي ظهر قدام
الدكان وقلنا نشوف منو عم دانيال حصل عليهو شنو وهو وين اسه ؟؟؟؟
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
اها ياعبدالباقي الحاصل شنو ؟؟ اول حاجة معليش ياجنابو فتح الرحمن بكون عمل ليك صداع والله انا ذاتي مغلبني ومرات اقول ارجعه
الحلة كان من ابو ي........ مافي مشكلة ياعبدالباقي عمك دانيال ده مات والا حي ..... ؟ لالا الحمد لله عم دانيال شديد ماعندوا عوجة
ربنا لطف بيهو لانو راجل طيب انا خليتو مع اولاد الحلة في مستوصف النيل لكن الدكتور قال يخليهو في المراقبة 24 ساعة.
عم دانيال ده منو وقصتو شنو ؟؟ ياسلام ياجنابو والله عم دانيال ده راجل طيب بس مسكين مرته ماتت السنة الفاتت وبقي قاعد مع الحبشية
المسكينة دي اصلها معاهم من زمااااان طيب اولاده وينو ؟؟ اصلوا ياجنابو زي ما نت عارف الناس ديل من ماجا الترابي مسك البلد دي
كلهم طفشوا واولاده مابعرف غايتو في واحدة من بلاد الخواجات ديل لكن عم دانيال ومرتو قالوا عاوزين يموتوا في السودان ابو يمشوا
معا اولادهم. بعدين في كلام تحت تحت انو عم دانيال عندوا كنز والا قروش كتيرة في بطن البيت ده عشان كده هو ما عاوز يسافر يخلي
قروشه دي ، القال ليك الكلام ده منو ؟؟ والله ياجنابو الكلامه ده بنسمعو لكن ماشفنا قروشه الكتيرة دي ....... طيب بيأكل وبشرب من
وين ؟؟ الشقة الفوق دي ساكن فيها واحد خواجة وبديهو ايجار كويس بعدين هو ماعندوا مصاريف كتيرة واكلو بسيط جدا هو والحبشية دي
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
حضر تيم المعامل الجنائية وفنيي البصمة ورفع الاثار وقمنا بتفتيش مكان الحادث بعد تصويره فوتغرافيا وعبر الفيديو وكانت
خلاصةالتفتيش رفع اثار بعض البصمات بعض نقاط الدم من ارضية الصالة ونحن نهم بالخروج لفت انتباهي زرار يبدو عليه زرار قميص علقت
به بعض الخيوط واقع اسفل طاولة بعيد من مكان العراك داخل الصالة توقفت وناديت فني المعامل تعال شيل الزرار ده ختو في كيس تحريز
، عاين لي عين بتاعة استغراب لكن نفذ ما طلبته منه ولسان حالو يقول الملازم ده ماعندوا شغلة الا وشنو ؟
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
كل معلومات نسمعها كانت تساهم في رسم صورة اوضح للقضية على الاقل مبدئياً من حيث دوافع ارتكاب الجريمة ، طلبت من عبدالباقي وفتح
الرحمن موافاتنا في القسم لتدوين اقولهم بشكل رسمي في يومية التحري وذهبت الى المستوصف للوقوف على حال العم دانيال ، في المستوصف
قابلت الطبيب قبل ان ادخل الى المجني وسألته عن الحالة الصحية للعم دانيال قال شوف هو اسه كويس ومافي حاجة ظاهرة طبعا هو تعرض
لمحاولة خنق عنيفة وربنا ستر لانو مع كبر سنه كان ممكن يروح فيها وزي دخل في اغماءة خفيفة ومرق منها لكن نحن اقل حاجة بنخليهو
معانا 24 ساعة ، ولو سمحت ياجنابو ممكن تدخل تشوفه لكن ما تعملو معاهو اى تحقيق اسه لحدي مايقدر يتمساك ويتجاوز الصدمة والخلعة
بتاعة الحادث ، فعلا دخلت ورأيته ممد على السرير ومستيقظ سلمت عليه حمد لله على السلامة ياعم دانيال رد على بصوت واهن انا تمام يابني
فكرتي كيف قلت ليهو 100% قال لي انا اصلو قربت اموت لكن ما عاوز اموت كده عاوز اموت في هدوء ... وجرت دمعة في خده جعلتني افكر في
ان اقلدو وابكي معه لكني اثرت التماسك امامه وقلت ليهو ياعم دانيال ليك علي تعيش في هدوء انشاء الله ويومين تلاتة الكلاب ديل تلقاهم في
السجن وماتشيل هم اصلوا ..............
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
غادرت الغرفة وعفاريت الدنيا كلها تتنطط امامي بالله دي رجالة تخنق ليك مرأة وزول عجوز زي ده يعني سرقة وعدم رجالة لكن كان ما
قبضتكم يا ......... اضحكوا علي. رجعت القسم وجدت فكرتي قد رجعت من المستشفي وحالتها ممتازة وجاء تقرير الطبيب محاولة خنق تركت
اثار وخدوش سطحية على الرقبة وحالتها الراهنة جيدة ما لم تحدث مضاعفات ، وعلمت من المتحري بانها رفضت البقاء في المستشفي وتريد
ان تذهب لتبقي بجانب عم دانيال .
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
طيب يافكرتي بنخليك تمشي تشوفي عم دانيال بسس ناخد منك كلمتين ورينا الحاصل شنو ؟؟؟ نحن كنا قاعدين في البيت انا في المطبخ
وعم دانيال بعد مافطر رقد في السرير فجأة حسيت بصوت رجلين بتاعة ناس جوه داخلين استغربت ومرقت على البرنده اشوف ده منو ؟ لقيت
تلاتة انفار حبش واول ما شافوني واحد هجم علي وواحد هجم على عم دانيال والتالت كان بقول وين القروش القروش وين ورونا القروش وين
والا بنكتلكم انا كانت عاوزه اكورك قفل لي خشمي والزول داك قفل خشم عم دانيال والتالت بقي يفتش زي المجنون وفتح الصندوق الكبير
في الصالة ما لقي حاجة حاول يفتح الاوضة ماقدر قام قال للزول المعا عم دانيال شيل الزول ده بكون القروش تحت السرير والزول داك
حاول يشيل عم دانيال وبقي يقاوم قام خنقو وانا ضربت الزول المعاي واتفكيت منو لكن قبضني تاني وخنقني وانا قلت خلاص انا بموت وشوية
فك رقبتي وانا خفته سكته ساكت لقو في السرير تحت المخدة شوية قروش وتاني انا اديتم شوية قروش حقتي انا من دولاب المطبخ بعد ما شالوا
القروش بقو يقولوا لي بعض نخليهم والا نكتلم المعا عم دانيال خنق عم دانيال شديد وانا تاني اتفكيت وبقيت اكورك ضربوني ووقعت في
الواطة وانا حاولت امسك واحد جريته من قميصو بس فلت مني وجري وانا جريت الشارع وبقيت اكورك.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
طيب يافكرتي الناس ديل كلهم حبش ؟ ايوه. بتعرفيهم ؟ لا اول مرة اشوفهم. عرفتي اسم اى واحد منهم ؟ لا. اذا شفتيهم تاني بتعرفيهم ؟
الزول الخنقني انا ما شفت وشو كويس لكن الزول الخنق عم دانيال انا شفتو كويس والتالت ما متاكدة من شكلو.
اخدنا منه مواصفات عامة للتلاتة وكانو لابسين شنو ....... الخ وخليناها تمشي تلحق عم دانيال. قعدنا انا وعم الطيب ابشر نقيم في
الحاصل ده ووصلنا لي انو نحن نفتح بلاغ بتاع نهب وشروع في القتل. في الاقسام عادة لانحبذ فتح بلاغ تحت مواد مثيرة للرأي العام و
قيادة الشرطة الا اذا كنا مضطرين والوقائع لاتحتمل خلاف ذلك ، المهم البلاغ اتفتح وعم الطيب قال لي البلاغ ده هواء تقيل وتمسكو انت
بي نفسك ما تديهو للمتحرين واسه اكتب تقرير نرسله رئاسة الاوسط الخرطوم وبالليل ينزل البلاغ في يومية الحوادث.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
تاني يوم قامت الدنيا ولم تقعد رئاسة القسم على الخط ومباحث الكمندانية ومباحث الولاية والمباحث المركزية والناس دي واقفة
قرون قرون وصمد عم الطيب امام كل المحاولات بسحب البلاغ من قسم العمارات لتولي التحري فيهو بواسطة مباحث الولاية او المركزية
وطلب مدير مباحث الولاية اللواء محمد الحسن عبده ان يقابله المتحري باوراق البلاغ اكفهرت الدنيا في وشي لمن بلغوني لانو اللواء
ده اشتهر عنه بانو شاطر وساخر وصعب المهم اتوكلت على الحي الذي لايموت ومشيت رئاسة المديرية محل مجلس الوزراء الحالي واى زول
يعرف انو انا خاشي لمقابلة اللواء ينظر لي نظرة تعاطف وتضامن مما زاد مخاوفي في رائد وقتها عميد حالياً سعادتو عبدالعزيز عوض
تطوع بالدخول معاي للتخفيف من وقوع الصدمة وكده ...... اول ما دخلنا عبدالعزيز قال ليهو ده الملازم المتحري في البلاغ ياسعادتك
رفع رأسه من الورق عاين لي من فوق لي تحت قال ليهو ده ؟ مالقيتو شافع اصغر من ده ؟ ياعبدالعزيز انتو بتلعبو والاشنو ؟ عبدالعزيز
زاتو بقي في تولة ..... ياسعادتك الولد ده (شوف قبيل كان الملازم) ولد كويس وهو اول الدفعة .... انت جيت الكلية دي من الابتدائي
والاشنو ؟ ما رديت ..... شوف الموية بكضب الغطاس انا ما بعرف اول الدفعة من طيش الدفعة انا عاوز الناس ديل في مكتبي بكرة مفهوم
اول مرة اتكلم قلت ليهو ياسعادتك بكرة مابقدر لكن اديني تلاتة يوم ...... قال لي لو قلت لي كويس كنت شلت البلاغ منك امشي اشتغل
ربنا يوفقك.
(( واحد من المشاكل الكانت ملازمة لي دائئماً انو شكلي كان يبدو صغيراً جداً ويمكن نعمة من رب العالمين وكان فيها حافز لي للاجادة
واثبات الذات))
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
Quote: وليم اندريا شخصياً رمضان كريم ياخي اسمك ده بذكرنا زمن جميل خلاص زمن فرق الجاز وكرة السلة فرقة البلوستارز وجاز العقارب
وجاز الديوم ........ |
جنابو عمر سلامات ورمضان كريم,,
ياخ إنتو شباب فنان إنت ومعاك جنابو الطيب,,, وأبوعلوة صاحبى بتاع نيويورك ونيو لوك داك وآخرين كثرٌ,,,
البوليس دا كان لامى شباب صفوة,,
لكن مصائب تمشى على الأرض,,
مع ذكرياتك الحلوة الفوق دي ما تنسى عبود والنادى الأمريكى والألمانى ما بينهما,,تلك البقاع الجميلة,,,ومراتع الصبا,,
سرد جميل,,,
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: osama dahab)
|
Quote: جنابو عمر
سلامات
رمضان كريم
قلت لى اللواء قال الموية بكضب الغطاس
ياربى قاصد انه من غير الناطقين بها ؟
والا من الناطقين بغيرها؟
جاوب.................... |
اسامة دهب تحياتي
انت عارف انا هنا كتبتها من غير قصد جات بالغلط لكن من اسم دهب ده الراجل ده هو حلفاوي من اندكم اصلو مافي زول بسمي دهب غير
الحلفاويين.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: أيمن الطيب)
|
Quote: جنابو عمر سلامات ورمضان كريم,,
ياخ إنتو شباب فنان إنت ومعاك جنابو الطيب,,, وأبوعلوة صاحبى بتاع نيويورك ونيو لوك داك وآخرين كثرٌ,,,
البوليس دا كان لامى شباب صفوة,,
لكن مصائب تمشى على الأرض,,
مع ذكرياتك الحلوة الفوق دي ما تنسى عبود والنادى الأمريكى والألمانى ما بينهما,,تلك البقاع الجميلة,,,ومراتع الصبا,,
سرد جميل,,, |
شكرا ليك يا ايمن وتحياتي ورمضان كريم
ايام لاتنسي نحن كنا صغار نسبياً لكن الشلاقة في ايام النوادي الكاثوليكي والايطالي والعربي والسوري ونادي الخليج فيهو سينما كل
يوم ثلاثاء والا الخميس مابتذكر وسينما البلو نايل وكلزيوم وسينما غرب والنيلين وسينما جنوب ...........
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
عدت الى القسم بعد انا قابلت اللواء واداني توجيهات كتيرة وكلف الرائد عبدالعزيز بموافاته بتقرير يومي عن البلاغ ، كلمت عمك
الطيب بالحصل وطوالي نادي تيم المباحث كله بقيادة العم الصول موسي محمد موسي الرجل الموسوعة في المباحث والنظافة والهندام
حيث يهتم بنظافته وهندامه بشكل ملفت للنظر ملابسه ليست غالية فالراجل على قدر حاله لكنها دائماً متناسقة ونظيفة ومكوية بعناية
ولايرتدي الى القميص نص كم ، وهو من مدرسة عظماء المباحث ناس الصول موسي دار موسي في القسم الشرقي والصول مامون تاور في الشمالي
والصول مامون في الشمالي ........ الخ وهي مدرسة قائمة على نبذ العنف في التعامل مع المتهمين ولايحملون سلاح ابداً كعادة افراد
المباحث ويمتازون بذاكرة حديدية وشبكة مصادر رهيبة وطولت بال وسعة صدر مبالغ فيها.
المرحوم العم الطيب ابشر قال شوفوا ياجماعة انا راهنت عليكم فما تخذلوني نحن بنفتش في تلاتة حبش بالتركيز على مناطق سكن الحبش
في الخرطوم في الديم والجريف عشان كده حتنقسموا لي مجموعتين واحدة بقيادة الملازم عمر ودي تمشي الجريف لانو عمر كان شغال في الشرقي
وممكن يستعين بي مباحث الشرقي برضو والتانية بيقادة موسي ودي تمشي الديم وانت ياعمر من اسه امشي غير الكاكي ده والبس ملكي وتعال.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
البحث عن الابرة في كومة القش هذا هو عنوان المهمة التى خرجنا اليها كيف تلقي ليك زول انت ما بتعرف اسمو ولا شكلو والحبش الى
حد كبير بتشابهو !!! في البلاغات الذي دي ما تقوم تلف في الشوارع وتسأل منو الزول لكن الشغل بتم عن طريقة ارتياد بعض اماكن
تجمعات الحبش لاصطياد معلومة وتحريك المصادر من نفس الجنسية يعني بالواضح بتفتش لي شمارات عن موضوع البلاغ ، ما خلينا قهوة وماقعدنا
فيها ولابيت زغني ولابيت احرار حيث وبرغم التوجه الحضاري كانت لاتزال هناك بقايا بيوت لم تغلق ابوابها نقعد بالليل والنهار ونخلي
واحد بايت في بيت الاحرار ونلتقي كل يوم في الصباح الباكر في القسم لتبادل المعلومات وداهمنا بيوت كتيرة بالغلط جرياً وراء معلومة
مختلقة من مصدر وقبضنا عدد من الناس وفكيناهم والايام تمضي ولاجديد.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
موسي محمد موسي المنقذ ده عنوان المرحلة واحدة من مشاكل الشغل في الوكت داك ما كان في موبايلات واجهزة الوكي توكي قليلة عمنا
موسي في اخر نهار اليوم السابع يعني ذي العصر كده جاني في البيت اول ما طلعت ليهو بره استبشرت خير لانو شفت عيونه بتلمع بنظرات
النصر ...... اها خير ياعم موسي ... مبروك ياجنابو بقي عندنا اسم (برهي) الحمد لله ....... طبعا انت عارف مني الحبشية صاحبتي
بتاع الديم .... اي بعرفه مش المرأة الكبيرة السمحة ديك ..... ايوه والله ياجنابو انت بس ماشفتها في شبابه نار بس ... طبعا اسه
عملت ليها محل زغني وشوية بنات معاها في البيت قبيل مشيت فطرت معاها والكلام جاب الكلام قالت واحدة من البنات المعاها في البيت
عندها صاحبه اسمو (برهي) اليومين دي كتر الجية ومعاهو قروش لكن الزول ده رسام وما اظنو زول بتاع مشاكل والا سرقة .... طيب ياعم
موسي انت رأيك شنو ؟؟؟ رأي انو نلبت للزول ده جنب بيت مني طيب ح نعرفو كيف .. ؟ مني وصفتو لي كويس ..... لكن ياموسي انت نص الحبش
ديل بعرفوك ......... لالا انا بخلي عمر جلة وعمر الصعيدي يلبتو ليهو ......... طيب انت عارف نحن نرخي مشي الجريف ونركز كلنا في
الديم وبرضو العمارات يمكن الحبش ده شغالين ليهم في بيت والا شركة في العمارات.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
الشرك قبض عنوان المرحلة دي ....... يومين تلاتة قبض شرك ناس عمر وعمر وجابو برهي القسم ، زول هادي شديد مع حبة وجاهة وشكلو
اصلوا ما بوحي بانو مجرم ، بدأ التحقيق ..... وبدا مسلسل الانكار ثم مزيد من الانكار ...... طيب كدي نجيب الحبشية فكرتي ونعمل
طابور شخصية (طابور الشخصية بتكون عادة من 8 اشخاص بقدر الامكان يكونوا بشبهو المتهم وبتعمل تلاتة مرات في كل مرة بتغير مكان
المتهم في الطابور ومطلوب من الشاهد في كل مرة التعرف على المتهم) فكرتي جات ترجف من مجرد فكرة انها ح تقابل واحد من المتهمين
وبعد جهد جهيد اقتنعت تفتش الطابور تمشي عليهم وتقعد تعاين في الواطة ........ يازولة الكلام ده مابنفع كده ........ تلتلة مبالغ
فيها والنتيجة قالت مافي ماعرفت زول في الناس ديل ............. احباط رهيب.
المتهم اذا الشاهد ما مرقو في الطابور بكتسب ثقة في نفسو وقوة رأس ومزيد من الانكار ........ طيب والعمل قلت لي عم موسي
والله ياجنابو كدي نصبر شوية ياعم موسي الزول ده يمكن ما هو او ما كان مع الجماعة ديل حتى لمن فتشنا محل ساكن ما لقينا حاجة
والا نقوم نشتغل مع الزول ده شغل البوليس الاعتيادي يمكن يجيب نتيجة ......... حيرة وصمت.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
اها ياجماعة الزول ده ال 24 ساعة بتاعتنا في التوقيف في الحراسة كملت وتمديد النيابة بكرة بنتهي وكان مافي جديد بكرة وكيل
النيابة بفك الزول ده اصلوا شايف استاذ ......... محامي الحبش حايم من امبارح محلق للقضية دي ، اقول ليكم حاجة كدي جيبوا
الزول ده من الحراسة في المكتب الوراء ، جابوهو ..... جيبوا الحبال ........ اقعد الحبل ده ... علق الحبل فوق مع المروحة
وانا بعاين ليهو بالجنبة وهو ببلعق في ريقو .... الناس ديل دايرين يسو شنو ؟؟؟ جاهزين ياجماعة جاهزين ... اها يابرهي عندك
وصية ........ قعد في الواطة انا ما عملت حاجة ديل الجماعة ديل غشوني انا زول رسام ان ما بكتل زول ....... الكلام ده كان زمان
يابرهي الموضوع انتهي ........ القبطي مات والمرأة ماتت ....... لكن لو حكيت لينا القصة كلها ممكن نكلم مولانا عشان يخفف عليك
طيب ياجنابو بحكي ليكم .......... قوم اقعد في الكرسي ده اها الحاصل شنو ؟؟؟؟؟؟؟؟؟؟
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
وقفة قصيرة قبل ان يهاجمنا ناشطي حقوق الانسان ........ والله العظيم ياجماعة ما كنا بنستلذ بمثل هذه الاساليب ابداً ولا بنسعي ليها
لكن لمن تشوف معاناة الضحية او المجني عليه ويبدأ امل القصاص من المتهم يتلاشي وتبدو الفرصة سانحة امامه للافلات من العقاب بجريمته
تضطر للبحث عن وسائل للضغط عليه ونلجاء اكثر شيء للتخويف والايهام دون القيام بافعال مادية او التعذيب مع الشخص المتهم ونستغفر الله
العظيم ونتوب اليه على كل حال.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
برهي يحكي القصة ....... جاني (مكنن) وهو صاحبي من زمان ومعاهو واحد تاني اسمو (سلمون) شايفو كتير قبل كده لكن مابعرفوا
مكنن قال لي في واحد قبطي عجوز في العمارات عندوا قروش كتيرة وما معاهو زول في البيت الا خدامة حبشية هي زاته عجوزة ونحن
عاوزين نمشي نسرق الزول ده ..... يامكنن انا زول مسكين ورسام ومابحب المشاكل ..... ماتخاف مافي مشكلة بتحصل وانت اسه الرسم
ده بتلقي منو حاجة ..... انت عارف يامكنن انا مقدم هحرة لى كندا خليني ياخي ....... سلمون يامكنن زول ده خليهو ده زول خواف
ساكت ...... انا قلت ليهو انا ماخواف وبمشي معاكم لكن ما نكتل لينا زول نسرق ونشرد بس. اتفقنا على كده ومشينا انا ومكنن وسلمون
لقينا باب الشارع فاتح دخلنا وهم قالوا لي نحن بنمسك الناس انت فتش القروش قلت ليهم خلاص كويس ..... دخلنا الصالة جوه العجوز كان
راقد طوالي سلمون مشي عليهو ولمن المرأة جات مكنن مشي عليها وحصل شكل وجوطة وكواريك سلمون قال نتكتل الناس ديل وانا كنت خايف
وبفتش بسرعة لقيت قروش في سرير الراجل العجوز والحبشية ادتني باقي القروش وجرينا طلعنا ونحن ماعارفين اذا كان العجوز والحبشية
ماتو والا لا. طيب وين مكنن وسلمون ......... بعد ماجرينا قسمنا القروش وماكانت كتيرة وكل زول مشي براهو وتاني انا ماشفتهم ...
انا ما عارف هم ساكنين وين لكن مكنن شغال في العمارات في سفارة بنضف ليهم ويعمل شاي وسلمون ماعارفو شغال وين.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
طيب حسب اقوال برهي مكنن شغال في سفارة في العمارات لكن سفارة وين والا في ياتو شارع هو ماعارف وانو ساكن في جبرة
لكن مابعرف وين ؟؟؟؟؟؟؟
كل ما تتخيل انك اقتربت من القبض على مكنن تكتشف انك لازلت تبحث عن ابرة في كومة قش صحيح الكومة صغرت شوية وبقت محصورة
في العمارات وجبرة ........ من النادر ان يسكن الحبش في جبرة ودي يمكن تساعد شوية ، المهم رجعنا تاني للمربع الاول بتاع
الشغل الميداني وجمع المعلومات لغاية ما عرفنا من مصدر ان مكنن شغال في شارع (......) في العمارات لكن المصدر ماقدر يحدد
السفارة الشغال فيها مكنن ....... طيب الشارع ده فيهو 3 سفارات يارب يكون في ياتو واحدة ؟؟؟
طبعا كان في فريق تاني بفتش عن سلمون وجات معلومات متضاربة انو مشي القضارف ومعلومة تانية انو لسه حايم في الخرطوم المشكلة
انو برهي مابعرف اى حاجة عن سلمون عشان كده ماكان مفيد بالنسبة لينا لكن من بعض الاوصاف الشخصية لي سلمون ركز افراد المباحث
في واحد كان مقبوض عندنا قبل فترة في بلاغ بتاع بيع ويسكي في شارع 15 ومعروف عنو انو زول عنيف وفقري جداً.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
القبض على سلمون
مسكنا في خيط الجماعة بتاعين الويسكي في شارع 15 وبعد كم يوم قبضنا اتنين منهم بالثابتة ومعاهم المعروضات .... شوفوا
نحن ح نفتح ليكم بلاغ وتمشوا السجن الا اذا وريتونا سلمون وين ؟؟؟ يعني صفقة عديل المخارجة قصاد ترشدونا على سلمون
وبعد لت وعجن ولف ودوران شعروا انهم احسن ليهم يتخارجوا ........ بالليل بعد الساعة 12 داهمنا بيت احرار قالوا سلمون
بكون نايم فيهو ...... هرج ومرج وكواريك وزول داير ينط بالحيطة اتمسك من رجلو والواطة وعيونك ماتشوف الا النور مليون
شلوت وكف ... وسلمون استسلم تماماً ....... اه يا .............
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: صلاح عبدالحليم)
|
Quote: سيادتو عمر
متابعين والغصه تطعن فى الحلق ...
كيف ولماذا ابعدتم او ابتعدتم عن الشرطه
.
.
متابعه وحسره |
الاخ صلاح عبدالحليم رمضان كريم وعاطر التحايا
والله ياصلاح اخوي بعدنا عن الشرطة بمحض ارادتنا في مايشبه ابغض الحلال مرت ظروف بالشرطة لم تكن هي الشرطة التى احببناها
واقترنا بها لذا اثرنا الابتعاد ...... ومافي القلب في القلب.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
من الوهلة الاولي وضح انو سلمون ما ناوي يجيبه على البر وزول متمرس على القبض والتحقيق ، تاني يوم استدعينا فكرتي قلنا ليها
قبض الزول التاني الخنق عم دانيال حسب كلام برهي وانتي قلتي شفتيهو كويس صاح ؟ ايوه صاح طيب عليك الله يافكرتي شدي حيلك وماتقعدي
تعملي حركات المرة الفاتت ...........
وقفنا الطابور جات فكرتي عاينت للاول التاني التالت ...... وطقت الثكلي والبكاء الهستيري وجري عاوزه تمرق من القسم ... الحق الحق
جبناها راجعة ....... كدي اقعدي استهدي بالله ......... مالك ؟ وهي بترجف ايوه ده هو الزول نمرة تالتة ده. طيب كويس يافكرتي لازم
نعيد الشغلة دي مرتين تاني ........... لا لا خلوني ..... مابنفع كده الشغلة دي بتبوظ لازم تلاتة مرات عشان القانون قال كده. وفي كل
مرة كان السناريو يتكرر وبقدرة قادر تمينا الطابور تلاتة مرات واتعرفت عليهو في المرات التلاتة رغم تغيير موقعه وقميصه.
وبعد ده كلو صاحبنا ناكر وقال لا بعرف برهي ولابعرف مكنن ولاسمع بيهم.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
عملنا مواجهة بين برهي وسلمون لم يستطيع خلالها برهي مجارة سلمون المتمرس على الكذب والانكار لكننا كنا متأكدين بانه الرأس
المدبر بشهادة فكرتي وبرهي ، اهمية اعتراف سلمون تكمن في انه سيوصلنا بسرعة الى المتهم التالت مكنن فهو الذي يعرفه حسب كلام
برهي ، بعض المتهمين يجبروك على احترامهم وبعضهم يجبروك على احتقارهم والتعامل معهم بشدة وغلظة وسلمون كان من هذا النوع
ودواءه في راقد عندنا ........... عشان كده كان لازم يمشي الصيدلية وياخد الفيها النصيب من دواء قوة الرأس لمعتادي الاجرام
........ والحمد لله العلاج جاب نتيجة سريعة.
اايوه كنت معاهم ايوه انا الخططت للقصة دي كلها مكنن شغال في السفارة ال ....... شارع ..... ايوه ساكن جبرة مربع ........
بس طولت ما مشيت ليهو في البيت مابقدر اعرفه اسه ساهل ..... طيب ما كان من الاول يا .......
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
اتعرف مكان عمل مكنن ونصبنا ليهو كماين في طول الشارع وفي حوالي الساعة 7ص جا صاحبنا ماشي على السفارة بمجرد ما تخطي
زولنا الفي اول الشارع شعر بانو في حاجة ما عادية وطوالي جري شديد عاوز يخش جوه السفارة ..... بتاع المباحث التاني كان واقف
في الجهة المقابلة لباب السفارة شاف مكنن جاي جاري وجري حاول يقطع عليهو الطريق مكنن زاغ منو وبقي اقرب لباب السفارة الذي كان
مفتوح نص ضلفة باعتبار ان الصباح تكثر فيه حركة عمال النظافة .. الخ مكنن يقترب جدا من الباب وكمال شرطي المباحث يطارده ويمسك به
من قميصه لكن مكنن يسحبه ويدخل رجله وجزء من جسمه داخل مبني السفارة الخط الفاصل ما بين رجله الشمال داخل السفارة ورجله اليمين
خارج السفارة كان يشكل الفارق ما بين التمتع بحصانة مقر السفارة او مواجهة مصيره خارجها بالطبع هو لايملك حصانة في شخصه لكنه يعلم
اننا لن نتمكن من مطاردته داخل السفارة لذا كان يقاتل في كمال بشراسة وضيق الباب ما كان يتيح لنا مساندة كمال في سحبه للخارج
الشرطي بالزي الرسمي الذي يحر س السفارة وقف على الحياد بعد ان عرف هويتنا ولايريد ان يورط نفسه في مشكلة دبلوماسية.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
خش خش معاهو جوه ياكمال وخليك ماسكو ..... عاين لي كمال بطرف عيونو ياربي الملازم ده جادي ..... كمال خش ماتضيع الوكت دخل كمال
ومكنن تلاتة اربعة خطوات ودخلنا انا وعمر جلة وكمال ممسك بمكنن من نصه وشلناهو شيل جرينا بيهو بره ...... طبعا الكويس انو طاقم
السفارة ما كان وصل وموجودين بعض السودانيين السواقين .... الخ لكن بلاشك طاقم السفارة حياخد خبر والموضوع ما بعدي ساكت.
مشينا بيهو القسم ودخل معانا في نفس افلام سلمون لكن بدرجة اقلة ....... وبعد شوية جانا سوداني شغال في السفارة ال ....... وقال
عاوز يعرف الحاصل شنو لانو السيد السفير زعلان وناوي يصعد الموضوع بطريقة رسمية وان الموضوع ده ح يعمل ازمة دبلوماسية بين السودان
ودولة ........... حكينا ليهو الموضوع من طقطق للسلام عليكم واتخيلت انو حيتعاطف ويمكن يدمع لكن يبدو ان كثرة التعامل الدبلوماسي
اكسبته مايكفي من البرود ويقول لي انا شخصيا ما مقتنع بانو تصرفكم ده مبرر ولابد من اتخاذ اجراء ..........
بعد الاحترام والكلام المعسول في الاول عشان نخلي الموضوع يمشي قلت ليهو طيب انا اجيك من الاخر والله العملية العملوها الجماعة ديل
لو عمله سفيرك ابوبدلة ده انا كنت جيت جريتو من كرفتتو وجبتو القسم انت يازول ماعندك شغلة والا شنو ؟ قوم فرتق.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
ربك رب الخير جا داخل عمك الطيب ابشر رئيس القسم وسريع عرف الحاصل وبحكنة الناس الكبار احتوي كل زعل مندوب السفارة واسهب
في الاشادة بيهو وبحقهم في الشكوي كما اسهب في تقريعي ولومي على موقفي المتهور وانه لامانع لديه من كتابة اعتذار مكتوب من
مدير عام الشرطة عن هذا التجاوز .......... وجاب الكلام نتيجة وطلع صاحبنا منفوش زي الديك وعدت الازمة بسلام.
مكنن ده طبعا هو اكان خانق فكرتي وهي من اول يوم قالت ما شافتو عشان كده قالنا مافي داعي نجيبه ونعذبه ساكت ، طبعا كان لابد من
تفتيش بيت مكنن في جبرة ومشينا فتشنا البيت وهو عبارة عن نص بيت والاوضة فيها سرير متهالك ودولاب اكثر تهالكاً منه وجرايد انجليزية
ومجلات مجدعة وجزم وشباشب ..... وقمصان نوم وملابس داخلية نسائية وهو غير متزوج لكن يبدو انه زير نساء ... قلبنا كل الحاجات دي
ونحن بنفتش على قروش او اى حاجة تربطه بمسرح الجريمة ......... ونحن طالعين من الغرفة شفت كرتونة صغيرة فيها مجلات وورق وقميص
واحد قاعدة في الركن ....... مشيت عليها ورفعت القميص ولو سألتني قلت لي في اللحظة ديك كنت بتتمني شنو ؟؟ قطع شك ما بقول ليك
خزنة كنت ح اقول ليك القي في القميص ده زرارة مقطوعة.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: سيف الدين عوض)
|
[QUOTE]ربك رب الخير جا داخل عمك الطيب ابشر رئيس القسم وسريع عرف الحاصل وبحكنة الناس الكبار احتوي كل زعل مندوب السفارة [/QUOTE]
عزيزى /عمر محمدعثمان
البوست شيق بالسرد الغير متكلف الغريبة لم الحظه فى الايام السابقة الا بعد مداخلتك على دفتر احوال ضابط الشرطة المناوب .
جمعتنى بالملازم حينها الطيب ابش وبصحبته الملازم اميرة (53) بالدرجة الاولى والتى تشرفت برئاستها فى 1988م وانا برتبة الملازم اول .
فكل الذكريات والاسماء لدينا فيها شجون _ واصل وماتفاصل
ونحن متابعين
بالمناسبة اتصلت بك بالامس فى موضوع احر - ولكن لم ترد لعل المانع خير
ودبرى
| |
|
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
يا ما انت كريم يارب القميص ناقص زرارة وواضح انها اتقطعت نتيجة لحركة عنيفة ، قمنا بتحريز القميص ورجعنا للقسم
تقرير المعامل الجنائية عن مكان الحادث والمعروضات المحرزة اولاً بالنسبة لنقاط الدم هي للمجني عليه العم دانيال ويبدو
انه تعرض لنزف خفيف من الانف ، البصمات اغلبها غير واضحة ماعدا بصمة واحدة للمتهم سلمون اما الزرارة المقطوعة فهي تتطابق
مع باقي الزرار في القميص المحرز وباقي الخيط الموجود فيها يطابق الخيط في الزراير الموجودة في القميص.
ساعدتنا تقارير المعامل في تثبيت اعترافات المتهمين التى سجلت قضائياً وتبقي لنا إحالة المتهمين الى المحاكمة ، حاول محامي
المتهمين الافراج عنهم بالضمانة الا ان التخوف من هروبهم جعلنا نوصي للنيابة بعدم الموافقة على اطلاق سراحهم والعمل على تحديد
جلسة سريعة لهم.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
علاقة الشرطة بالمتهمين في مثل هذه القضايا تبدأ دائماً مشحونة بالتحفز والعدائية والغضب لا تلبث ان تتحول الى علاقة انسانية
بكل معانيها دون تفريط في حقوق المجني عليهم ، برهي اكتر المتهمين هدوء راجل فنان اثناء فترة وجوده معنا بحراسة العمارات
طلب السماح له بورق ابيض وقلم رصاص وبالفعل وفرنا له المطلوب وكان يتحفنا بلوحات بقلم الرصاص غاية في الجمال لدرجة اني
قمت بوضع ثلاثة منها في براويز صغيرة بمكتبي في القسم ، صديقته الحسناء جداً والتى بسببها تكشفت كل خيوط هذه الجريمة كانت
تزوره يومياً في القسم لتحضر له طعام الغداء وكنت اسمح له بالجلوس معاها في الحديقة الصغيرة ، اما مكنن وسلمون فلم يكن هناك
اى شخص يزورهم الا في مرات نادرة جداً وظلت علاقتي بسلمون متوترة على الدوام لانه بطبعه شخص عدائي جداً حتى داخل الحراسة كان يثير
القلاقل والمشاكل.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
عدة جلسات استغرقها نظر القضية برئاسة مولانا محمود قابلته قبل شهر تقريباً لايزال يذكر القضية ويعتز بحكمه الذي اصدره
حيث تم تأييده في الاستئناف والمحكمة العليا ويقول لي الفضل يرجع ليك شغلك كان نضيف قلت ليهو يامولانا ده شغل العساكر
المساكين ديل اسه انت وين وانا وين وهم لايزالون في نفس القسم وبالكتير يكونوا لقو ليهم شريط ولا شريطين.
المهم المحكمة بعد تقديم كل الادلة وشهادة الشهود والاعترافات وسماع دفوع المحامي عن المتهمين توصلت الى ادانتهم وحكمت عليهم
بالسجن خمسة سنوات من تاريخ توقيفهم بحراسة الشرطة.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
اسدل بذلك الستار على جريمة خطيرة هزت الشرطة قبل ان تهز المجتمع ، بعد اقل من سنة توفي عم دانيال وفكرتي لا ادري ما حل بها
نقلت من قسم العمارات وبعد عدة سنوات توفي العم الطيب ابشر له الرحمة وتوفي العم جمال وتقاعد عمر الصعيدي ولايزال كمال وعمر
جلة في الخدمة التحية لهم ولكل الزملاء في الخدمة وبالمعاش.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: omer osman)
|
سعادة الاخ/ عمر عثمان
رمضان كريم وكل عام وانت بخير
اشكرك علي مشاركتك لنا هذه الواقعة ويا له من سرد جميل لوقائعها. مضي حوالي عشرون عاما لهذه الحادثة وانت لا زلت تذكر كل ما حدث وانا متاكد بلا شك انك تحوي الكثير ممثل هذه الوقائع. ارجو منك ان لاتبخل علينا من سردها هنا في هذا المنبر لنقراها ونتمتع بسردك الا نمنقطع التفكير والمتناسب مع بعضه البعض.
حتي يسهل علي القراء وجودها, اقترح عليك ان تسميها "ملف جنائي" او "ذكريات ضابط شرطي متقاعد".
اذا وافقت علي هذا الااقترح, سوف تجد مني ومتاكد ايضا من كل القراء كل الاقبال والتشوق لقرائتها.
اقتراح اخير: كيف تجد نفسك وانت تكتب كتبا عن هذه الذكريات? اليس من الافضل لك ان تكون كاتبا وتعرضها في المكتبات? في ظني... هذا افضل لك...بس ما تبخل علينا وعلي قراء المنبر بواحدة من هذه الوقائع مرة كل كم شهر كدة..
لك التحية واسال الله عز وجل ان يحفظنا واياكم.
| |
|
|
|
|
|
|
|
|
|
Re: نهب وشروع في القتل في العمارات في وضح النهار ؟! (Re: Oraby Muhammad)
|
Quote: سعادة الاخ/ عمر عثمان
رمضان كريم وكل عام وانت بخير
اشكرك علي مشاركتك لنا هذه الواقعة ويا له من سرد جميل لوقائعها. مضي حوالي عشرون عاما لهذه الحادثة وانت لا زلت تذكر كل ما حدث وانا متاكد بلا شك انك تحوي الكثير ممثل هذه الوقائع. ارجو منك ان لاتبخل علينا من سردها هنا في هذا المنبر لنقراها ونتمتع بسردك الا نمنقطع التفكير والمتناسب مع بعضه البعض.
حتي يسهل علي القراء وجودها, اقترح عليك ان تسميها "ملف جنائي" او "ذكريات ضابط شرطي متقاعد".
اذا وافقت علي هذا الااقترح, سوف تجد مني ومتاكد ايضا من كل القراء كل الاقبال والتشوق لقرائتها.
اقتراح اخير: كيف تجد نفسك وانت تكتب كتبا عن هذه الذكريات? اليس من الافضل لك ان تكون كاتبا وتعرضها في المكتبات? في ظني... هذا افضل لك...بس ما تبخل علينا وعلي قراء المنبر بواحدة من هذه الوقائع مرة كل كم شهر كدة..
لك التحية واسال الله عز وجل ان يحفظنا واياكم. |
الاخ عرابي رمضان كريم وكل عام وانت بخير
ياخي الف شكر ليك على حسن ظنك فيني لكن الكتابة دي صعبة خلاص والله الرأس فيهو قصص وحكاوي ماليها حد عن ايام الكلية والشغل
في الاقسام وكتبت قبل فترة بوست عن معايشتي للحظات الاولي لانقلاب الانقاذ يوم 30/6/1989م بحكم اني كنت الضابط النبطشي بالقسم
الشرقي في ذلك اليوم ، بحاول اجيب ليك الرابط هنا انشاء الله.
الشاهد ياعرابي المهمة دي ماساهلة ونحن ما محترفين لكن بنحاول نعمل خربشات كده نرجوا ان تجد القبول.
| |
|
|
|
|
|
|
|
omer osman
عمر عبد الخالق سعيد
Yousif A Abusinina
أحمد الصديق
حمزه بابكر الكوبي
محمد عمر جبريل
عبدالكريم أحمد الامين
mayada kamal
سامى عتبانى
حمد فتح الرحمن
أحمد ابراهيم عثمان
على محمد على بشير
السمؤال بدرالدين
willeim andrea
نوفل عبد الرحيم حسن
Abdelmuhsin Said
عمر عبد الله فضل المولى
أيمن الطيب
osama dahab
سيف الدين عوض
عبد الرحيم محمد عبد الرحيم
ناصر احمد الامين
فيس بوك
تويتر
انستقرام
يوتيوب
بنتيريست