السرقات الادبية فى المنبر ( تروتسكى ) نموذجــاً !!!

Quote: الأخ كمال .. ربما كانت لبدرالدين مشاحنة مع معتز .. وليست لي خلفية عنها ولا أعرف متي وأين بدأت .. وبدرالدين لقي معتز قايم بمجهود غيره وقبضه بالثابتة وهسه مديهو كربون خانق .. مافي طريقة للحناسة والمسنجرات .. دي معركة اسفيرية ولو معتز كان لقي فرصة في بدرالدين برضو ما كان حيخليه .. وإنت برضو مداخلتك دي حسب اعتقادي فيها فش غبينة وجيت تحاكم بدرالدين بالدين علي خلفية معارضتك للكيزان - صاح إنت ما عندك تار بايت مباشر مع بدر شخصياً، ولكنه عداء تنظيمي ولقيتها سانحة تدلي بدلوك ضده وإحراجه بالدين .. وتريد محاكمة الكيزان في شخصه .. لو كانت سرقة النص قائمة في مقالة منفردة لما عبأ بها أحد، لكين الحصل أن معتز جابها في شكل سرد حصل ليهو وتتمة لعبارة 'تعرف يا راني' .. فلما انكشفت بقت شينة شديد ياخ .. يعني كونه أبوه يسوقه جنينة الحيوانات واقفاص الثعابين الزجاجية وما ادراك ومن ثم يدلف علي الصين وفيها يحمل تلك الأفعي العملاقة علي كتفه وبين ذراعيه لعشر دقائق كاملة - الكلام ده كله طلع دليب ساي ؟؟ .. والبوست ده إتمطَّ لأنو رد معتز الأولاني قال فيهو إنه سيسفه بدرالدين ويتجاهله .. لكين في الحالة دي نظرية التجاهل التجاهل ودفن الرؤوس في رمال حلتنا ما بتنفع .. !! .. وكوستاوي عندما خاطب الناس بالمسنجر ما ظنيته عن حرص لعدم التشهير لأنك تعلم أنه كان مساكك عبدالرازق الطالب كحرامي قوقل - وكمان بكاريكاتيراتها - وانجلد في المنبر ده علي ضهره وبطنه لمن قال يا بوليس .. لغاية ما كرهه قوقل زاته وتاب توبة نصوحة .. يعني ودالطالب ما كان عنده مسنجر ؟؟ .. علي أي حال رغم شناة الاقتباس فإني أرجو من بدرالدين أن يرخي الكربون وينسي الموضوع فقد تجاوز الدرس زمنه والرسالة وصلت .. وعندي إحساس أن معتز أقتبس النص ببساطة ولم يقدر الموضوع حق قدره .. وإقتباس يفوت ولا حد يموت يا بدرالدين ..