ابـيـخ أنـواع الـمِـلـحـات،،، مـطـبـخ سـودانـي بـحـت ...

Quote: عندنا يا معاوية صاحب زمان جاب عمو زيارة لنيويورك في مطعم من مطاعم الحي الصيني طلبلو FRIED CHICKEN قالو ده شنو يا ولدي . قالو ده جداد . قالو يا ولد أمرقني من هنا هسع تي . والله يا معاوية الاكل الصيني أحسن منو ملاح التمليكة بدون بصل . بس بيني وبينك ملاح الرز أحسن منو تيت جعان وأنت مقطوع في وأدي العوتيب .

Quote: الملوحة

Quote: تحياتي لصاحب البوست و ضيوفه

Quote: Shams Eldin Khalifa · يعمل لدى ‏المجلس الأعلى للصحة - Supreme Council of Health‏ يا جماعة شنو الحكاية البوست ده بتكلم عن ماذا تكره من انواع الاكل السوداني البيسوه ناس بيتكم مش الاكل بتاع الناس التانيين. مزح بين احباء ودالمدير واصدقائه " طوالي جريتو لبستوه عباية الدين!!!!!!!!!!!!!!!!!!!!!!!!!!!!!!!!!!!!!!!!!!!

Quote: تمرق من أمدرمان لى الدبه شمالا الناس بتسويهو وهو من التمليكه أو لسان الطير

Quote: رباطابي زار اهلو وكت الغدا قالوا ليه نعمل ليك الغدا شنو؟ قال ليهم أي شئ بس اختو الورق والدلاقين!

Quote: مرحب يا ودالمدير.. الساعة إتنين نصة نهار.. هجيرة وسموم.. الواطه صاااانه والضبان ينوني فوق رأسك.. يختو صينية الغدا.. تلقاهو صحن قرع وكسرة مره تلوي الأضان.. ومعاها كوز مويه تغلي من الزير.. سمعنا وسلمنا :)

Quote: . قبل اسبوعين مشت معاي محل اللحم الحلال سالت الفلسطيني لو عنده كبدة ابل. قلت ليها كده كتير علي شديد.

Quote: ود المديـر شــفت ملحاتك الكعبة دي جوعتنا بيها في الغربة وبقى اي ملاح بناباهو زمان نفتش عليهو الآن اي ملاح بالكسـرة وشـوية مويه و شـطة وملح و يار يت لو عليهو شــوية روب او ســلطة زمان كانت الوالدة عليها الرحمة لما تكون عاملة ملاح ما بندورو بتزيد عواســة الكســرة لأنها كلها معجونة بتتأكل و ترجع الصينية فاضية بعض الملحات كان ليها اسـماء البامبي....... و ســخ كرعي الاســود ........ ملاح البراطيش غايتو كان علينا جنس افترا و قلة ادب عارف عما لينا كان لما ياكل الويكاب بالسـمن البلدي باقي اليوم ما بغســل يدو

Quote: عندنا عم لينا غشى جماعة لينا في الخرطوم وست البيت بتعمل في الغداء.. قامت بظرافة سألتو لو في تبيــخ ما بياكلو عشان ما تعملوا او تجيبو في الغداء.. قالها إلا القش ..بس ختيني القش وتاني جيبي البتجيبيهو.. دحين أنا واحد من الناس إلا القش .. ولحمة الراس :)

Quote: فـتـة الـفـول ، بـزيـت السمسم ، ومـوية الجـبـنـة ، والشطة بالليمون ، وتكون قاعـد ، فوق أمشاط رجليك ، ،،،

Quote: لكين علي اليمين كان معاي غفير في المشروع لمن كنت زارع في سمسم ، لو ظبط ليك تقلية كجيك ، تقطع صوابعك وراها ... ياخ أنا خليت الزراعة لي عشرين سنه لاكين لي هسع بتَّرع كجيك.

Quote: م . ك . ض .. يموت في الطعام ، يحب الأكل ، وينسى .. يستمرى ... ويستمر ... صامتا .....توصيلة ... اللقمة ، وراء اللقمة ... لا يتحدث ابدا اثناء الاكل ، شفت التهذيب دا كيف... شهرين تلاتة الحلة مافيها كرامة ، ولا سماية ، تسأل الرجل وهو يتمطق ... ياجماعة مافي فتة بي قرب ... وجاءت سماية ... صافته ذات صينية ، وبدات المعركة ، سرعان ماجفت الصحون ، وبدات مراسيل الزيادة... ياولد دمعة ياخ ، بسرعة شباب كسلانين ، طه بالله فول ، وكتر الزيت.. طه طه جيب معاك رغيفات ، يا بتاع ام رقيقة كبلنا ؛ يا انت بتملح في شنو ؟ الكسرة وينا ؟ حسن اكسرنا يازول ...كسرة يا ابو علي شبعت .. سمعت زول جاءته صدمة سكري ، مشينا سريع بالبوكسي وصلناهو اهلو .. سريع سريع قزازتين بيبسي فاق صاحبنا ، رجعنا مكان السماية لسع ما شربنا الشاي ، وكمان امكن فيها كوتشينة ، المهم لقينا صاحبنا مازال يواصل الالتهام.... عيني باردة ؛ شربنا الشاي .. لعبنا كوتشينة ....العصر عدل على التمرين... المغرب النادي ، تاني الساعة عشرة مشيت البيت خليتو في النادي ، قابلني بكرة الصباح ... قال لي : تصدق اللكيلة بتاعت امس ديك ، لا هسع ما ذتها.... الرجل لطيف المعشر ، وحبوب وظريف ، ومن الناس المطلوبة في محيطنا ... يدخن بشراهة ... ويحب الكوتشينة ... امنيته في الحياة ، كما قال : لي ذات مرة ، الاكل متوفر ، والسجائر بالعلب ، واربعة حرفاء في الوست.... دنيا ............. اغترب صاحبنا ... واصبح اكله الدجاج الميت دا ، كما يسميه ، اكترش ، وانبرش ... والشوف ذاتو بقى ما زي زمان .. والكوتشينة بقى يسارقا مسارقة .. والكبسة كرهتنا ذاتو ! لديه كوم عيال .. وغربة حال .. ومازال سرا يتمنى ، جلسة طعام وسط احبابه وناسه ، ( والسفسفة دي اكان ما قدرنا عليها .... ان شاء الله نعاين فيها بس ) هكذا ختم لي اخر مكالمة قبل اعداد هذه المداخلة بلحظات ، افتقده الرهط في الحلة ، اخذته الغربة والمسؤوليات .. وان مازالت ذكرياته حاضرة بينهم ... يطول عمره .. الشهم النهم ... كما كنا نسميه .......

Quote: الغريبة اليومين جاتني مرضة قرع وفول بقيت أحبهم حب شديد

Quote: أما أسوأ ما أنتجه المطبخ السوداني حسب وجهة نظري فهي مايلي على التتالي . 1/ الكمونية 2/المرارة 3/الملوحة 4/الويكاب 5/البامبي 6/القرع 7/الفاصوليا بنوعيها البيضاء والخدراء 8/البامية المفروكة 9/في ملاحات تانية سمعت بيها ما شفتها لكن أتوقع نفس العينة زي حاجة كده إسمها ملاح الكول /المرس وغيره من الأكلات الغريبة أما أفضل ما أنتجه المطبخ السوداني حسب وجهة نظري : 1/ملاح النعيمية 2/ملاح الروب الأبيض 3/طبيخ الملوخية 4/طبيخ البامية 5/ ملاح الشرموط بالعصيدة أو الكسرة أو القراصة .

Quote: ما تنسى ملاح الويكة الحمرة ، يعني بالصلصة وشرطة الويكة تكون دراشة يعني ما مسحونة بالقراصة يالطيييييييييف مش ما تدي الجنبك ما بتعاين ليهو زاتو ولا تحس بإنو في زول جنبك

Quote: قالو ليهو ..ده ملاح ابو القدح وده ملاح لحمة القرد وده ملاح ابو القنفذ العندو الشوك داك وده ملح سواسيو صغار متفوفات في الفندك ولمن وصل لهنا في الشرح استاذنت منه باني عندي حلة ح تحرق اعتذر لاصحاب المعدات الخفيفة......ودمتم

Quote: اما بالنسبة لي ما بأكل اي ملاح مطبوخ بلحمة فيها عظام ، لو لاقاني عظم صغير في الأكل تاني يومين نفسي بتتسد ، مرتي الله يباركها بتصفي الشوربة اول حاجة حتي بعد كدة تضيف ليها البامية ولا الويكة ولا الملوخية حتي أكلها تصحيح بسيط لبعض الاخوان ، الكول ليس ملاحا قائما بذاته وإنما يضاف للأكل كفاتح للشهية زي الشطة او الكاتشب مع إغلاق الأنف عند أكله لانه ريحته براحة ممكن ترمي الصقر من الجو

Quote: الله يجازي محنك يا ودالمدير.. حمدالله على السلامه، وقالو المسكين دقل..

Quote: Hamid Sakin · مدرسة النهود الثانوية سلام يا معاوية ارجو أن تقبلوا مداخلتي والجابني ليكم ريحة الكشنة الطاقة في المنبر من منطقة من نواحينا هناك ملاح البديبب أو ( الأبديب) وهو زي أم رقيقة ولكن بدل الويكة الناشفة البديب وهو ورق شجيرات عندما تختلط بالماء تحولوا ألى سلسيون ولذلك يراعي وضعه بكميات بسيطة جدا وملاح القصير وهو ساق الثور يوضع في راس القطية حتى يحول عليه الحول ثم يكسر ويعمل بزيته ملاح العصيدة وهو من فصيلة ملاح المرس وأم سعيفة والمعنى واضح

Quote: دى كلها ملاحات ما سمعتا بيها قبل بوستك ده: ملآح الرز ملآح القاورما ام شعيفة ام كنين ام رضمة ملاح قِرِد ملاح فاصوليا بالباشميلا ملاح الفاصوليا المفروكة ملاح الرزوقة أُم بُلُط.. ألمي الضّرّابة الحواقه ملاح التمليكة التختوخ الكداد ملآح الشمار اللخدر ملاح الكجيك ملاح ابو القدح ملاح لحمة القرد ملاح ابو القنفذ العندو الشوك داك ملح سواسيو صغار متفوفات في الفندك و دى ملاحات ما حصل شفتها: الويكاب الكول البصارة ملاح اللوبا الملوحة المرس الرشوشه ودى ملاحات ما حصل اكلتها: ملاح البامبى ملاح القرع

Quote: الربرابة

Quote: السلام عليكم جميعا موضوع جميل يا اخونا معاوية المدير

Quote: ملاح البربور يا معاويه ذلك فى الأدب الشعبى كقولهم البارح جيت مفلق لقيت عشاى بى ملاح بربور من الليدين إتزلق وأظنه كما يقولرالدكتور عبدالله الطيب ملاح اللبن الطاعم داك بصله بيضه واللبن والويكه لكن السكر دا شنو ما عارفو!!

Quote: ود المدير لو داير شـرح اضافي نجيب ليك عينة معاها سـمن بلدي و كســرة

Quote: ملاح بت علوبة الفركتو وابتو ملاح ام ساجمي كلما تضوقو تزيدي مي ملاح ام شعيفة الكتل المرة الضيفة والتفاصيل لاحق من كعوبتا صارت مضرب مثل كما لايفوتني ان اكتب على باب هذا التكل المرة السريعة يدها طاعمة تحياتي يا ود المدير وضيوفك وضيفاتك لهم نفس التحية وزيادة

Quote: ود المدير اب ملاحن كعب اشواقات كتااااار وحمد لله على السلامة مالك راجع من السودان بطنك طامة كده هههههه والله انا اى ملاح ما بحبوا بس بحب البامية الخدرة فقط ومعها شوية كسرة باكلها مرة مرة كده ولما يعملوا الملاحات ام دهن ديك بحرد الاكل عديييييل مرات بقعد مطرفة من الصفرة واكل سلطة بزيت الزيتون وبقول ليهم اعملوا لى مشاوى بحب المشاوى والاكل الفرن صحى وببعدك من الشحوم والحوم الزايدة ---------------------------------------------------------------- تخريمة كيف لقيت السودان والجكس ابو نجمة ههههههههههه

Quote: عندي صاحبي الله يطراهو بالخير كان بموت في ملاح القرع من طرايفو مرة قال لي ( تعرف لما يكون عندنا ملاح قرع بالكسرة والشطة ،،، بدخُل بالصحن الأوضة وبقفل الباب ومن شدة معزتي ليها بملص ليها عريان ملط )

Quote: أبو أحمد أبو أحمد جماعة بتاعين مزاج مشو مع صاحبهم سماية في نجوع الجزيرة، جابوا ليهم الأكل، ستة صحانة، إلا ما بتعرف في الصحن شنو، الواعي فيهم رفع أيدي جلابيتو، ومسك ليك الصحانة واحد واحد وبدا يدخل يدو بقوة في الصحن لما الطبيخ يتطاير من الصحن ويرجع قواعده - صحنه - سالم، وشابكهم ليك: دينك يمين بامية، والتاني : دينك يمين قرع، دينك يمين فاصوليا..

Quote: اها شوف الزول بتاع السفسفة دا، وبالمناسبة الاقتباس من بوست لي بعنوان ( على الدرب ... ناس ... بوست تحليلي) اها قلت تقزقزوا بالزول الاكيل دا لحدت ما اجيك صاد، فالموضوع ذو شجون،

Quote: سلام ، هاناس هوى نضميكن دا نضمى زولا بدين واهلنا قالوا الشبع بعمل بعبعة لكن كان طقتكن شعفوفة قبَل امات هشيمة واللورى اتوحل بيكن بتعرفوا حاجة ههههه

Quote: إنتو ناس بورسودان ديل نايمين ولا شنو؟ عندهم أكله وااااااااحده ( الصياديه ) والتحليه مُخبازه