كتب الكاتب الفاتح جبرا المتوفرة بمعرض الدوحة
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: وضاحة)
|
يا منصور المفتاح لا ياخ . ملاح البربور هو سيد ملحات الافراح والاتراح في الزمن السمح . ملاح البربور بعد ما تحرق البصلة تكب عليه الفاصوليا المدروشة + شوية صلصة ناشفة وهاك يا فرك في الحله الكبيرة و بي كراع العنقريب . أنا يا المنصور حاضر مناسبة زوأج في المحمية بي الشرق أهل العرس قاموا بي كفاية قطار كامل مليان ناس بربور بس وشاي .
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: Osman Musa)
|
Quote: عندنا يا معاوية صاحب زمان جاب عمو زيارة لنيويورك في مطعم من مطاعم الحي الصيني طلبلو FRIED CHICKEN قالو ده شنو يا ولدي . قالو ده جداد . قالو يا ولد أمرقني من هنا هسع تي . والله يا معاوية الاكل الصيني أحسن منو ملاح التمليكة بدون بصل . بس بيني وبينك ملاح الرز أحسن منو تيت جعان وأنت مقطوع في وأدي العوتيب . |
يا عثمان يا اخي الصينيين ديل ايّ حاجة ترفع راسا من الوآطة بقشوها. تصدق لقيتُن مجدعين في مطعم الوآحة، والله قربت أكتِحُن بالوآطة. غايتو الحيكومة دخلتلها آفة في البلد. والله صحي...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: Shams Eldin Khalifa · يعمل لدى المجلس الأعلى للصحة - Supreme Council of Health يا جماعة شنو الحكاية البوست ده بتكلم عن ماذا تكره من انواع الاكل السوداني البيسوه ناس بيتكم مش الاكل بتاع الناس التانيين. مزح بين احباء ودالمدير واصدقائه " طوالي جريتو لبستوه عباية الدين!!!!!!!!!!!!!!!!!!!!!!!!!!!!!!!!!!!!!!!!!!! |
شمس الدين يديك العافية يا اخ، واعمل حسابك من ملآح الجمكسين، باقي إنت مع جلآل في التِحتانية...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: تمرق من أمدرمان لى الدبه شمالا الناس بتسويهو وهو من التمليكه أو لسان الطير |
صدق يا المنصور، علي اليمين ملآح لسان الطير دا نفر حلآتو عِلآ فيهو.
Quote: عزيزنا منصور المفتاح سلامات عليك الله هسع التختوخ ده بعد 30 سنة الذكرك ليهو شنو ؟ قالوا يا منصور هادا الملاح المشكوت من أكتر الملحات الطاردة للكلسترول والدبس ونتحان القلب . أي لقمتين منو بتعادل حبة ليبتور 80 MG . ياخ التختوخ ناجع . و HEALTHY جد . |
عاين كمان ود موسى سواهوعلاج. نان يا ود موسى وكت عارف كدي ما تقوم تصدروا للخواجات بتاعين اللعشاب الماليين بلدكم ديل، وحات الله دا بزنيس مقنطر عدييييل كدي...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: ود المديـر شــفت ملحاتك الكعبة دي جوعتنا بيها في الغربة وبقى اي ملاح بناباهو زمان نفتش عليهو الآن اي ملاح بالكسـرة وشـوية مويه و شـطة وملح و يار يت لو عليهو شــوية روب او ســلطة زمان كانت الوالدة عليها الرحمة لما تكون عاملة ملاح ما بندورو بتزيد عواســة الكســرة لأنها كلها معجونة بتتأكل و ترجع الصينية فاضية بعض الملحات كان ليها اسـماء البامبي....... و ســخ كرعي الاســود ........ ملاح البراطيش
غايتو كان علينا جنس افترا و قلة ادب عارف عما لينا كان لما ياكل الويكاب بالسـمن البلدي باقي اليوم ما بغســل يدو |
يا عبد الله أخوي إنت كاتلآك قريفة غربة ساكت، هسّع عليك الله ملآح اللسود والبامبي ديل بيتقابلن ؟؟؟.
بعدين عمك دا خباروا بيخلي إيدو بلا غسيل ؟؟؟...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: عندنا عم لينا غشى جماعة لينا في الخرطوم وست البيت بتعمل في الغداء.. قامت بظرافة سألتو لو في تبيــخ ما بياكلو عشان ما تعملوا او تجيبو في الغداء.. قالها إلا القش ..بس ختيني القش وتاني جيبي البتجيبيهو..
دحين أنا واحد من الناس إلا القش .. ولحمة الراس :) |
ههههههههههههههههه،
يا ود الزين يا اخي لحمة الباسم دي تجعل إبتسامتك ناصعة البياض طول اليوم. عمك دا عواف وبس، هسّع الصينيين في السودان بدوسوا البرسيم زي الترتيب...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: م . ك . ض
.. يموت في الطعام ، يحب الأكل ، وينسى .. يستمرى ... ويستمر ... صامتا .....توصيلة ... اللقمة ، وراء اللقمة ... لا يتحدث ابدا اثناء الاكل ، شفت التهذيب دا كيف... شهرين تلاتة الحلة مافيها كرامة ، ولا سماية ، تسأل الرجل وهو يتمطق ... ياجماعة مافي فتة بي قرب ... وجاءت سماية ... صافته ذات صينية ، وبدات المعركة ، سرعان ماجفت الصحون ، وبدات مراسيل الزيادة... ياولد دمعة ياخ ، بسرعة شباب كسلانين ، طه بالله فول ، وكتر الزيت.. طه طه جيب معاك رغيفات ، يا بتاع ام رقيقة كبلنا ؛ يا انت بتملح في شنو ؟ الكسرة وينا ؟ حسن اكسرنا يازول ...كسرة يا ابو علي شبعت .. سمعت زول جاءته صدمة سكري ، مشينا سريع بالبوكسي وصلناهو اهلو .. سريع سريع قزازتين بيبسي فاق صاحبنا ، رجعنا مكان السماية لسع ما شربنا الشاي ، وكمان امكن فيها كوتشينة ، المهم لقينا صاحبنا مازال يواصل الالتهام.... عيني باردة ؛ شربنا الشاي .. لعبنا كوتشينة ....العصر عدل على التمرين... المغرب النادي ، تاني الساعة عشرة مشيت البيت خليتو في النادي ، قابلني بكرة الصباح ... قال لي : تصدق اللكيلة بتاعت امس ديك ، لا هسع ما ذتها.... الرجل لطيف المعشر ، وحبوب وظريف ، ومن الناس المطلوبة في محيطنا ... يدخن بشراهة ... ويحب الكوتشينة ... امنيته في الحياة ، كما قال : لي ذات مرة ، الاكل متوفر ، والسجائر بالعلب ، واربعة حرفاء في الوست.... دنيا ............. اغترب صاحبنا ... واصبح اكله الدجاج الميت دا ، كما يسميه ، اكترش ، وانبرش ... والشوف ذاتو بقى ما زي زمان .. والكوتشينة بقى يسارقا مسارقة .. والكبسة كرهتنا ذاتو ! لديه كوم عيال .. وغربة حال .. ومازال سرا يتمنى ، جلسة طعام وسط احبابه وناسه ، ( والسفسفة دي اكان ما قدرنا عليها .... ان شاء الله نعاين فيها بس ) هكذا ختم لي اخر مكالمة قبل اعداد هذه المداخلة بلحظات ، افتقده الرهط في الحلة ، اخذته الغربة والمسؤوليات .. وان مازالت ذكرياته حاضرة بينهم ... يطول عمره .. الشهم النهم ... كما كنا نسميه ....... |
ودالمدير وضيوفه النوستالجيا سلام، تصدق البوست ما شفتا علا الليلة، اها شوف الزول بتاع السفسفة دا، وبالمناسبة الاقتباس من بوست لي بعنوان ( على الدرب ... ناس ... بوست تحليلي) اها قلت تقزقزوا بالزول الاكيل دا لحدت ما اجيك صاد، فالموضوع ذو شجون،
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: أما أسوأ ما أنتجه المطبخ السوداني حسب وجهة نظري فهي مايلي على التتالي .
1/ الكمونية 2/المرارة 3/الملوحة 4/الويكاب 5/البامبي 6/القرع 7/الفاصوليا بنوعيها البيضاء والخدراء 8/البامية المفروكة 9/في ملاحات تانية سمعت بيها ما شفتها لكن أتوقع نفس العينة زي حاجة كده إسمها ملاح الكول /المرس وغيره من الأكلات الغريبة
أما أفضل ما أنتجه المطبخ السوداني حسب وجهة نظري :
1/ملاح النعيمية 2/ملاح الروب الأبيض 3/طبيخ الملوخية 4/طبيخ البامية 5/ ملاح الشرموط بالعصيدة أو الكسرة أو القراصة . |
سلآمات يا ازهري. من القائمة بتاعتك دي أمرق لي البامية المفروكة من خانة الأعداء، والباقي إتفق معاك عليه بشقيه. المطبخ السوداني بخيرو وبشرو تب ما قصّر انتج منظومة فريدة في نوعها وأجمل ما فيها التنوع.
إنت يا اللزهري، الحلو مُر دا اللخترعو منو ؟؟؟...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: قالو ليهو ..ده ملاح ابو القدح وده ملاح لحمة القرد وده ملاح ابو القنفذ العندو الشوك داك وده ملح سواسيو صغار متفوفات في الفندك ولمن وصل لهنا في الشرح استاذنت منه باني عندي حلة ح تحرق اعتذر لاصحاب المعدات الخفيفة......ودمتم |
سلآمت يا نعمات، ومرحبتين حبابك في سودانيز.
غايتو مِلحاتك ديل أنا ما وقعن في عيني، لكن لحم ابو القدح محمر يسعلني الله احلى من لحم الضأن. أكلتو مرّة وآحدة في حياتي، وأكلت معاهو لحم تمساح وهو عكسو تماماً. لحم التمساح عبارة عن لحم فطيسة...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: اما بالنسبة لي ما بأكل اي ملاح مطبوخ بلحمة فيها عظام ، لو لاقاني عظم صغير في الأكل تاني يومين نفسي بتتسد ، مرتي الله يباركها بتصفي الشوربة اول حاجة حتي بعد كدة تضيف ليها البامية ولا الويكة ولا الملوخية حتي أكلها
تصحيح بسيط لبعض الاخوان ، الكول ليس ملاحا قائما بذاته وإنما يضاف للأكل كفاتح للشهية زي الشطة او الكاتشب مع إغلاق الأنف عند أكله لانه ريحته براحة ممكن ترمي الصقر من الجو |
أحمد التجاني، سلآمات.
نُص عُمرك ضايع، يا اخي كدكدة عضام المِلحات دي أحلى حاجة، خاسةً مُلآح الملوخية. معقولة حاجة ريحتا ترمي الصقر تكون فاتحة شهية !!! اريتا ما اتفتحت.
مشكور علي التصحيح، بس ابعد البتاع دا من الشطة والكاتشب...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: يوسف أبو صالح)
|
Quote: Hamid Sakin · مدرسة النهود الثانوية سلام يا معاوية ارجو أن تقبلوا مداخلتي والجابني ليكم ريحة الكشنة الطاقة في المنبر من منطقة من نواحينا هناك ملاح البديبب أو ( الأبديب) وهو زي أم رقيقة ولكن بدل الويكة الناشفة البديب وهو ورق شجيرات عندما تختلط بالماء تحولوا ألى سلسيون ولذلك يراعي وضعه بكميات بسيطة جدا وملاح القصير وهو ساق الثور يوضع في راس القطية حتى يحول عليه الحول ثم يكسر ويعمل بزيته ملاح العصيدة وهو من فصيلة ملاح المرس وأم سعيفة والمعنى واضح |
مرحبتين حبابك يا حامد، نقبل مداخلتك علي الرحب والسعة، وإنت فوق العين والراس.
كدي الكُشنة دي بنجيها كان الله هوّن. شكراً للشرح الوافي، بس المعني ما واضح بالنسبة لأُم سعيفة. يعني أُم سعيفة دي دايرالآ شرح منفرد، علي وزن عزف منفرد.
ذكرتني نكتة بمناسبة ملآح القصير. قالوا، في زمن مجاعة سنة ستة، الراجل ومرتو قاعدين والشافع يا زول داير ينفقع من البكا. الراجل قال لمرتو، يا ولية، العضم المغزوز في الراكوبة من عمن اول اديتيهو للجنا دا مصا ؟؟؟. قالت لو، ايِّ. قال لها، أكان كدي بكاهو دا قلة ادب ساااكت...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: دى كلها ملاحات ما سمعتا بيها قبل بوستك ده: ملآح الرز ملآح القاورما ام شعيفة ام كنين ام رضمة ملاح قِرِد ملاح فاصوليا بالباشميلا ملاح الفاصوليا المفروكة ملاح الرزوقة أُم بُلُط.. ألمي الضّرّابة الحواقه ملاح التمليكة التختوخ الكداد ملآح الشمار اللخدر ملاح الكجيك ملاح ابو القدح ملاح لحمة القرد ملاح ابو القنفذ العندو الشوك داك ملح سواسيو صغار متفوفات في الفندك
و دى ملاحات ما حصل شفتها: الويكاب الكول البصارة ملاح اللوبا الملوحة المرس الرشوشه
ودى ملاحات ما حصل اكلتها: ملاح البامبى ملاح القرع
|
سلآمات يا سمارت.
جزء كبير من الملحات اعلآه أنا زيّك ما سمعت بيها إلا في بوستي دا، لكن الإبداع يا سمارت في التنوع الذي يعكس صورة وآضحة لبلد متعدد الثقافات لو وجدت من يوظفها ممكن تكون مصدر سياحي هام. يعني ممكن يكون عندنا مهرجان سنوي للوجبات السودانية. التعدد يعني إننا شعب خلآق ومبدع ليس في مجال الأكل فحسب، بل في مجالآت عديدة. هسّع شوفي ناس امريكا الشمالية ديل، ما بيعرفوا حاجة غير الإستيك والفرنش فرايز، لكن المهاجرين جلبوا لهم كم هائل من الوجبات.
Quote: وما كنت باكل فول نهايئ. |
الزول لآمن يقول، ما باكل فول كلآمو اصلوا ما بيقع لي. والله صحي...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: ملاح بت علوبة الفركتو وابتو ملاح ام ساجمي كلما تضوقو تزيدي مي ملاح ام شعيفة الكتل المرة الضيفة والتفاصيل لاحق من كعوبتا صارت مضرب مثل كما لايفوتني ان اكتب على باب هذا التكل المرة السريعة يدها طاعمة تحياتي يا ود المدير وضيوفك وضيفاتك لهم نفس التحية وزيادة |
حباب الزول السمح ود البوش.
بت علوبة دي بعد تعبت فيهو وفركتو، ما بياهو مالا ؟؟؟. بعدينك أُم سجامي دي يخربا كان بتعرف تتبُخ. المرا الضيفة دي كتلتا شرفة يا ود البوش. في إنظار التفاصيل.
المرا السريعة تجيب الكُج يا اخ...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: محمد فضل الله المكى)
|
Quote: ود المدير اب ملاحن كعب اشواقات كتااااار وحمد لله على السلامة مالك راجع من السودان بطنك طامة كده هههههه والله انا اى ملاح ما بحبوا بس بحب البامية الخدرة فقط ومعها شوية كسرة باكلها مرة مرة كده ولما يعملوا الملاحات ام دهن ديك بحرد الاكل عديييييل مرات بقعد مطرفة من الصفرة واكل سلطة بزيت الزيتون وبقول ليهم اعملوا لى مشاوى بحب المشاوى والاكل الفرن صحى وببعدك من الشحوم والحوم الزايدة ---------------------------------------------------------------- تخريمة كيف لقيت السودان والجكس ابو نجمة ههههههههههه |
وضاحة المطموسة، والله مشتاقين. الله يسلمك، والسودان الله يكون في عونو. غايتو حالتاً ما بتسر البال. هسّع اكان إنفجخت فوق بنبر في تُكُل والدوكة قدامك، والخمارة بيمينك، والقرقريبة في علبة لبن مبلولة عن شمالك وردمتيلك طبق كسرة، ما كان بتقولي كلآمك دا، عان ها المِلحات ما بحبها، مشاوي في عينك.
جكس بتاع ايه ؟؟؟، والله الناس كولها بطونا طامة ودايرين يتخارجوا بما فيهم الجكس زاتو...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: معاوية المدير)
|
Quote: عندي صاحبي الله يطراهو بالخير كان بموت في ملاح القرع من طرايفو مرة قال لي ( تعرف لما يكون عندنا ملاح قرع بالكسرة والشطة ،،، بدخُل بالصحن الأوضة وبقفل الباب ومن شدة معزتي ليها بملص ليها عريان ملط ) |
سلآمات يا سيف الدين.
عندي اخوي وود خالتي بيريدوا اللحمة شديد. أها، ود خالتنا دا مرّة مشى اكل لحمة في الدآمر، والدآمر مشهورة بأنها فيها أجود وأطعم لحمة، قام جا قال لأخوي، والله يا سيف الدين الدآمر فيها لحمة !!!، تدسها من جناك.
مودتي...
| |
|
|
|
|
|
|
Re: ابـيـخ أنـواع الـمِـلـحـات،،، مـطـبـخ سـودانـي بـحـت ... (Re: عزالدين عباس الفحل)
|
Quote: أبو أحمد أبو أحمد جماعة بتاعين مزاج مشو مع صاحبهم سماية في نجوع الجزيرة، جابوا ليهم الأكل، ستة صحانة، إلا ما بتعرف في الصحن شنو، الواعي فيهم رفع أيدي جلابيتو، ومسك ليك الصحانة واحد واحد وبدا يدخل يدو بقوة في الصحن لما الطبيخ يتطاير من الصحن ويرجع قواعده - صحنه - سالم، وشابكهم ليك: دينك يمين بامية، والتاني : دينك يمين قرع، دينك يمين فاصوليا.. |
ههههههههههههههههههه،
سلآمات يا ابو أحمد، من الحِلة التِحِت.
لمان تكون جيعان احسن حاجة تدوس ساااااكت، ما شفت جماعة القرد !!!؟؟؟...
| |
|
|
|
|
|
|
|