يا اولاد العيلفون ... تعالوا ورونا عيلفونكم دي سرها شنو ؟

Quote: الاديب الشفيف يحيى قباني لك عظيم الشكر على ما اتحفتنا به في هذا البوست الجميل ولك التحايا العطرات من كل اهل العيلفون الذين يبادلونك كل هذا الحب بكل الإحترام والتقدير وحقيقة عمنا ود الرضي في شعره لا يضاهيه كبار الشعراء العرب في الفصاحة والبلاغة والسجع والغزل العفيف فهو فعلا تنبيه الغافلين وذلك لتأثير النشئة الدينية التي ترعرع عليها شاعرنا ود الرضي رحمه الله ,,,, اما ست البت فهذه مدرسة نسوية عظيمة لكل نساء بلادي لو فهمن ووعن ما قاله ود الرضي في هذه القصيده الفريده فانا ايضا اشاطرك الراي في ما قلته وحسب فهمي الضئيل فست البيت مفروض تتدرس في مناهج مدارس البنات لكي ينفذن ما ورد فيها حتى تصبح كل حياتنا خالية من المشاكل وننعم بالاستقرار الاسري فكم من كتب في علم الاجتماع تعين الطلاب على كيفية الاستقرار الاسري ولكن احسب ان عمنا ود الرضي اوجز كل كتب علم الاجتماع في ست البيت دي ولا رايك شنو ؟؟ اما شاعرنا المرهف الشفاف احمد محمد الشيخ الجاغريو فهو غني عن التعريف وله مدرسة اخرى خاصة في الغزل والهيام والوجد والحب والشوق والحنين والسجع والطباق والجناس وبالله بس راجع قصيدة (المنديل) لعمنا الجاغريو وشوف كمية السجع والجناس والطباق الفيها ده وايضا (حمام الايك سجعه) وعرج على (سيدة شباب الكون ومدينة احلامي) وتعال لي (الرسموك في ضميري وين سميري ) يا سلاااااام يا استاذ يحيى في كلام كده يخليك تسرح بعييييييييييد وقدر ما تحاول تفسرو او توصفو ما تقدر .. رحم الله عمنا ود الرضي وعمنا الجاغريو ورحم الله عميد الفن السوداني احمد المصطفي ورحم الله عمنا خلف الله حمد ورحم الله عمنا سيد محمد الخليفة الامين ورحم الله عمنا محمد ود طه ورحم الله عمنا مبارك حسن بركات ....