|
|
 Re: الكافرة أمك دي ! (Re: عبدالحفيظ ابوسن)
|
يا سسسسسسسسسسسسسسسلام يا عبد الحفيظ ياخ الله يمتعك بالبهجه.. دى حكاوى طاعمه جدا
والله ذكرتنى حكاوى امى الله يعطيها عافيه الدين والجسد... نفس الطريقه .....
تعرف ..انا بتذكر القصص لكن بنسى التفاصيل
وهى دائما ما تحكى لنا القصص عن عالم الحيوانات القصه فى حد ذاتها بتعالج مشكله اجتماعيه او فيها حكمه وبطريقه ساخره ومضحكه
قالت مره الاسد ( ملك الغابه) عمل اجتماع للحيوانات وقال للثعلب تمشى توصل الغنمايه دى بيتهم عشان الدنيا ليل وكده...
قال الثعلب فرح فى سرو شديد للفرصه دي ...لكن عايز يظهر للاسد انو هو ما عندو رغبه فى المهمه دى عشان الاسد يصر عليه
طبعا الاسد ما بحب اى حيوان يعصى اوامره فقام الثعلب قال للاسد والله يا سيدى نعلينى مقطعات والحسكنيت كتير فوق الوادى
والثعلب فى سرو بيقول دى يسويها الله دى يسويها الله لكن فى الظاهر بيحاول يعمل فيها ما عندو الرغبه
طبعا زى حكايه يمتنعوا وهم راغبون ....طبعا القصه دى باختصار لانى نسيت معظم التفاصيل
وبرضو عندها القرد اسمو ابو حليمه... وابو حليمه دا الحيوانات بتلجأ ليه عشان يخارجها من الاسد وظلمه لانو ابو حليمه عندو سرعه البديهه
والحكمه
من حكاويها انو الاسد مشى للبقره وهى والده وشال جناها وقال دا ولد التور حقوا !!!
البقره المسكينه مشت حكت لى ابو حليمه قالت ليه اتخيل انو الاسد جاء وشال منى ولدى وقال للحيوانات التور حقوا ولد ( طبع مافى زول بقدر يقول للاسد بغم)
قام ابو حليمه قال ليها انتى امشى الاجنماع بعدينك وما تقولى اى حاجه
قال ليك الحيوانات كلها مشت الاجتماع والاسد قاعد بتكلم مع الحيوانات ....
جاء ابو حليمه ماشى سريع جنب مكان الاجتماع وقام الاسد شافو وبدأ ينادى يا ابو حليمه ..يا ابو حيمه مالك ماشى سريع كدا وما جيت الاجتماع انشا الله المانع خير
ابو حليمه قال للاسد والله انا ابوى ولد ماشى اودى ليه الاكل
قالم الاسد قال ليه انت مجنون الرجال بيولدو ابو حليمه قال ليه والتيران بيولدو
فقال ليك الاسد خجل ورجع للبقره طفلها
طبعا يا عبد الحفيظ هذا البوست شفع ليك عن بوستك بتاع لا تستحق أمراة دموع الرجال ولا بوست بهذا المعنى
تحياتى وواصل الحكى
| |
 
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
زينب فعلا بقولوا للقرد
ككو ابوحليمة
الثعلب ابوالحصين
الذئب المرفعين
قالو واحد قال للمرفعين داير اشغلك راعي للغنم واديك ماهية شهرية
قال ليهو
الماهية خليها ثبت لي السرحة
ما مشكلة ماهية الوزير ولا المدير كم ,, المهم صلاحيتو وبطلع ماهيتو براهو
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
القرادة قالت
انا واخوي الجمل جبنا العيش من القضارف
شوفو
قدمت نفسها عليه
وجعلته اخوها لتوهم الناس بتساوي مجهودها معه
وهي لم تبذل مجهودا بل كانت عبئا عليه ولم يشتركوا إلا في زمن الرحلة
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
في الزمن الزمين في ارض السودان
كان الزعيم الفلاني لا يطأ ارضا بقدمه الشريفه حتي تصبح ملكه
اها يوم جا جمب واطة واحد ,, واحد ماعندو غير ارضو دي بس ,, وقال كده سيد الواطه دنقر ورفع الزعيم في كتفو
طلق ما تمشي بي كرعينك ,, افو ! معقول كراعك الشريفه تدوس الواطه ال######انه دي
وكب شالو لامن مرقو بي هناك
الناس ضحكت عليهو
قال ليهو
خايفو يخت كراعو في واطاتي وتبقا حقتو
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
واحد بتو حملت سفاحا ,, قال ليها
يا بتي لا شرفا حفظتي ولا مالا جبتي
يعني فضيحة بس بدون عايد
ملحوظة
ليس للنكتة او الامثولة الشعبية دلالات سياسية لذا وجب التنوية , اه
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
حكوة حقيقة
شيخ العرب بنضف في كدوسة ساي ,, ومشغول شغلة شديدة ,, جاتو مرتو تبكي من جوة
مالك يا مرة بتبكي ?
ابوي قالو مات
فرد عليها دون ان يرفع رأسه
اتي في ابوك المات ولا في كدوسي الانكسرت فيهو القشة
فائدة
ملايين الباكين لموت عزيز
وعشرات من ينضفون كدوساتهم رغما عن مسؤوليتهم المباشرة في بكاء اولئك
تنوية لازم
الفائدة لا داع لها ولكنها ضرورية لفك الالتباس لنخرج من طق الحنك ساي
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
أبو سن
تحياتي يا شفيف
بحلف وبالحلقوم وبصيح أنك حريف
عاد كان كدا أعد البصر كرتين ربما ينقلب عشانك مرتين بين قوس وقوس لهجتين
دايماً في حياتنا بتحصل مفارقات عنيده يا الحبيب قدر ما تحاول تجبر رجلا تلقاها طاشه وشريده
واحياناً تنتكث الحاجات في ضوء حضوره وكثير من الناس في لحظات دفن بدس محافيرا حباً في زيادة البكا
تعال نطلع شوية
حال الناس نزوح وقعاد وفي القعاد ناساً عليهم ينزحو ويترابط
يوم انطق الثكلي في كوة الدويم سألنا السبب قالوا الراجل روحه طلعت
إنكالت المره بالرماد والتراب خياتا يسون وووووي
والثلكي يلامس السما ما بهدا يفور يطلع زي اللبن كان بجمر أو بدون جمر لهبات الثكلي
والجنازه لحين ما طلعت
الثكلي يحش كبدة الناس حش اللهبات دمعتم ما بتخر
الناس حناجرم تعبت والفجرية قربت تشاشي
الناس الجوه الحاضرين الغسل والعيون تبحلق يمين تبحلق زي عيون الحديه
تبترب طلع نفس صاح هوي يا ناس هاتو الولية
أطوطحت حتي ما وصلت الدمعه عبره والعبره ثكلياً يفج مسامع الميتين وااااااي علي
وسوسو بخجل في شحمة أضانه اليمين ( الراجل فيه باقي أمر ـ زبد رغبته ما خلص )
صاحت سجمي .. سجم حالي الباقي علي
لكن لابد من أمر
ما شاخت الحياة طلع الولد
ناس بقولو ود اللقية
وناس بقولو ود الفطيسه
لسع في الكوه طق حنك
| |
|
|
|
|
|
|
|
|
|
Re: الكافرة أمك دي ! (Re: عادل البراري)
|
البراري
سلام يا صاحب وكثير ود
ههههه
لكن عمك ده ما سبق فتوي مضاجعة الوداع
ود الفطيسة ! اسم ختير ضومة كدة
وبقولو يا عادل آ خوي
انت تبكي وهو يلحس في دموعك
وبقولو
يدك في خشمو واصبعو في عينك
و
تحفر ليهو في قبر ابوهو وهو يأجر ليك المحافير سوق اسود
قال حميد
يا ارزقي
يا مستفيد من بزة اطفال السواد
المانزل فوقم ملك
ونقول
غضبا لمن يسترزق من كوارثنا ويستفيد , الزول ما عاد طفبوعي كما قال بشري الفاضل
مع كامل الود
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
بالله أحاحى فوق البوست ده لى شهر .. أقول أدخلو .. أنط وأمش لغيرو
وعقلى يقول لى ما ياها النكته القدبمه ديك تاعب روحك مالك شوف غيروا .
أها الليله كملت البوستات البتنقرى جت ,, وعاينت لى بوستيك ده ولقيتو
عمل أربعه صفحات ,, عقلى قال لى يازول الشئ ده ماهو نكته ساى كدى أدخل شوفو .
وماشاء الله بسم الله دخلت ولقيت حوا الولاده ما خذلتنا بعد شردة عماد عبد الله وآخرين
قليلين مبدعين من هنا ,, أها لقيت ليك خواء المره دى عوضتنا بزول يمكن بسد فرقة الناس
الكتابتهم طاعمه وكانو بهار البكان ده ,, عوضتنا بيك يا أب سن ,, والله ماك زول ساهل
من أول كلام كتبتو فى هذا الخيط خليتنى بدون ما أشعر سكيت القرايه حتى الصفحه الرابعه .
الشى الذى إستدعانى أن أذهب غدا وأشوف لى دكتور بواسير فى أيام العيد دى .
يأخ والله شغل جميل وحكى مفرح وأجمل مافيهو إنك بتستعمل كل لهجات السودان المتاحه
والغير متاحه ,, أها من يوم الليله حأشوف لى بنبر من بيت العرقى داك .. ودى القعده فى بوستاتك
كلها .. بس إن شاء الله العرقى يكون بكر .
Quote: زي النص الناقص
لا يسكرك ولا ينعنشك ولا يخليك صاحي |
أما دى فأثبتت لى إنك معلم كبير ,, فتك بعافيه .
| |
|
|
|
|
|
|
|
|
|
Re: الكافرة أمك دي ! (Re: كمال سالم)
|
مرحبا كمال سالم
اسعدني تقريظك واحزنني مفارقة من الذين يفترض بهم الحضور ,, ولا اقارن نفسي بمن ذكرت رغما عن عدم معرفتي بهم , فأنا أكابد الكتابة مكابدة ,, ولعلهم لو أتو سيتبين لك نشاز خطوي مع تناغم رقصهم
من هنا اناشد من ذكرت ومن لم تذكر
اناشدهم بقول الشاعر توفيق زياد
اناديكم
أشد على أياديكم..
أبوس الأرض تحت نعالكم
وأقول: أفديكم
وأهديكم ضيا عيني
ودفء القلب أعطيكم
فمأساتي التي أحيا
نصيبي من مآسيكم.
أناديكم
أشد على أياديكم..
أنا ما هنت في وطني ولا صغرت أكتافي
وقفت بوجه ظلامي
يتيما، عاريا، حافي
حملت دمي على كفي
وما نكست أعلامي
وصنت العشب الأخضر فوق قبور أسلافي
أناديكم... أشد على أياديكم!!
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
واحد شحد حمـــــــار جارو ,, فجارو اعتذر بأنو الحمار مافيش ,, وداك شايف الحمار ,, قال ليهو
تقول الحمار مافي وانا شايفو ياهون داك
قال ليهو
هو انت طالبنا حمار و لاعذر
لذا قيل
الما بفهم التلاويح لا يريح لا يستريح
!?
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
قالوا ابوالحصين جا للاسد وقال ليهو لقيت ليك مرتع سمح خلاس ,, صيد راقد هبطرش ,, اها ابوالحصين مشي قدامو والاسد ناكعو ,,, لقو طين ,, ابوالحصين خفيف فت مرق بي هناك ,, الاسد رفع كراعو اليمين ابت ,, جر الشمال غرقت للنص ,, داير يجر ضنبو لقاهو اتلكك ,, ناداهو
ابو الحصين انا ورطت
قال ليهو
هو انت شفت ورطة لسه ? خلي الشمش تفقع واهل البقر الاكلتهم يجوك بي حرابهم
الشمش تنشف الطيب ببقي اسمنت بس
لذا قيل مثلا سودانيا
لو شكرو ليك ارتع دون
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
ام رخم الله قالت انا اخير من تلاته
الشايل حمالتو وقاعد مع نسابتو
البمشي البحر ويجي بي جنابتو
القاعد في المجتمع وبسأل رفاقتو
ام رخم الله طيره غبيانه قال القدال
وام رخم الله مكسيكيه
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
سلام يا صديقي العزيز عبد الحفيظ. ومرحباً بك في المنبر.
قرأت خيطك هذا باستمتاع كواحد من أبناء السكة الحديد بكوستي.
ولم يسعفني الوقت للمشاركة فيه. فمثلك لا يدخل عليه بمداخلة عجلى.
ولكني اليوم مضطر لفعل ذلك لأن مصاب أهلنا من المهانة والجوع والذل
والطوفان مصاب كبير. يدك معنا هنا، يا عشا البايتات ومقنع الكاشفات.
** حملة سودانيز أون لاين للمنكوبيين من أهلنا فى السودان بسبب الامطار**
ومثلك لا ينام وأهله مشردون، هائمون على وجوههم مع الهوام في الطين!
هيا على الصلاة. هيا على الفلاح!!! ولا صلاة اليوم لمصل إن لم "ينقذ" أهله. وإلا فلننقذ
أنفسنا من "الإنقاذ!!!!!!"
أليس كذلك يا صاحبي؟
هيا على الفلاح!!!!!!!
| |
|
|
|
|
|
|
|
|
Re: الكافرة أمك دي ! (Re: Haydar Badawi Sadig)
|
مرحبا حيدر بدوي تحية لك ولعيالك
سررت بك وحين رأيت اسمك تذكرتك ونحن بمدرسة الاهلية وانا رئيس الجمعية الادبية اقدمك بصوتك الندي
شمس الخريف الباكية
في كل قيف متاكية
سأكتب عنك في بوست الناس التنضح سكر
عن الفرح وسط الحزن وكتابتي التي عاتبتني فيها هنا ,, لم اترك يوما مساعدة اهلي ومعي نفرا كريما من ابناء كوستي في جميع اصقاع الدنيا ,, ولمدة خمس سنوات لم يتوقفوا عن دعم
الفقراء
الايتام
مرضي الايدز
مرضي السكري
مرضي الكلي
المعوقين
وتوج ذلك بإنشاء مستشفي لحوادث الاطفال
وذلك عبر بوابة
منتدي كوستي سيتي
كامل دعمي لكم رغما عن انني اري رأيا مغايرا ,, فنحن نساهم في حل ازمة النظام ,
تحية لك ولاسرتك
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
الضيف اب ربابه ,,, والربابه آلة عزف وترية شعبية زي العود ,, يعني تعزمو ويفضحك ,, ينتك للناس ويبشع بيك
مرتو رفله ,, بيتو شين و######ان ,, ما بعرفو يطبخو ,, الكمونيه بي بعرها ,, ملاحهم مقطوع مويه
الضيف الوصف المفراكة , ده الضيف البتعزمو ويتلفت يعاين في بيتك ويدنقر ويصنقع ويتناطي
قالو الضيف عزموهو وجيعان والمره دايره تلايق الملاح فتشت المفراكه سما واطه ما لقتها ,, الضيف قال ليها مفراتك ياهون ديك مغزوزه في الراكوبه
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
قالو الجمالي شادي جملو , وفيهو خرجين ,, خرج مليان عيش والتاني رملة عشان يوازن الحمل
لاقاهو واحد ,, واعترض عليهو كيف يشيل خرج فيهو تراب ويتبع جملو ,, يدفق التراب ويقسم العيش
الراي عجب الجمالي , وقام سألو عندك شنو في السعية ؟
قال ليهو إلا حماري الراكبو ده
الجمالي قال ليهو بقولو
الزول رايو قدر مالو ,, وانت رايك تالف وما بعمل بيهو
مشي قدام لاقوهو الجهديه ,, شايل شنو ,, قال ليهم تراب ,, قدو الجراب دفق التراب
امشي جمالي مجنون ساي
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
الراجل ومرتو مسافرين , نزلو في بلد فيها اخو مرتو ,, وبتو المعرسها وداخوهو ,, المرة اصرت يمشو لي اخوها في الاول ,, وراجلها ما رضيان
اها الزول اكرمهم كرم زايد , وضبح ليهم ,, ختو الاكل ,, وبعزم لي عمك
صل علي النبي ,,, صل علي الرسول
والزول متضايق ,, قال ليهو
لا حرم ,, خلاس كفاي ,, نقوم نمشي علي ود اخوي ده ما بقبل لو عرف بي جيت واتأخرت منو
ود اخوي من ما شافو ساي ,,
عمي حرم تخش ,, حرم تقعد ,, حرم تنبطح ,,
جابو الاكل
عمك يدو في خشمو ,, حرم تدخل يدك ,, حرم تشيل العضم ده
اها عمك شبع تب
يقول له حرم تاكل ,, عمك يدق الصينيه بي اصبعو ,, حرم عدوك ,, حرم عدوك
مرق بعد داك هو ومرتو ,, وزعلان قال ليها
المتلي انا بستخصر فيني مرتو الشعيراتها ما فايتا راسها ,, ما شفتي ود اخوك ,, حرم مرتو تقش في الواطه وشعرها يقش معاها
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
ما كنت بشوف ناس الفيس , وبرضو ما كنت متوقع هذا التشجيع منهم
سعيد بكم ومتابعتكم
عبدالعظيم مكي كتر خيرك ياخ
صلاح الدين احمد والله فعلا حار ليهو , ودي بتذكرني إلا توريني الخلا دي كراع وديك رجل شنو
عباس عذالدين حليلها الاصبحت ذكري
طارق ابومحمد يكفي انني انتمي لكم
بابكر حسن وعيد سعيد
طارق عبدالله , الله يمتعك بالعافيه
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
تحفظ القصص الشعبية الحقيقية منها والخيالية كثيرا من القيم السودانية المبثوثة في ثنايا الواقع السوداني , ولكل منطقة في السودان حكايتها ولغتها , تتشابه بعض الحكايات لتشابه الواقع احيانا او للنقل من منطقة لأخري مع تلهيج ! الحكاية
وكواقع ماضويا محكيا فتجد فيها بعض المضامين التي تجاوزها الواقع , ومحاكمتها بقيم الحاضر فيه اجحافا كبيرا بها , وجاوزا للموضوعية
فالماضي محض ماضي وقراءته لا تعد اكثر من قراءة للتراث , ويخضع لنظريات التراث , ولا يعني البتة عندي ان نعود له ,, فالقيم الانسانية ابنة الواقع المحدد ومحاولة ادخاله قسرا في الواقع سيشوهه ويفسد الحاضر
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
واحد شحد ليهو جمل من صاحبو , والجمل آنذاك كعربة آخر موديل ,, فهو وسيلة الترحال الوحيدة,
المهم
اتلفح بي توبو و ركب جمل صاحبو وهج السوق ,, شاءت الاقدار يخلي توبو فوق الجمل وينسرق الجمل
اها جا راجع ,, ولاقاهو صاحبو ,, وين جملي ؟
قال ليهو
جملك راح وفوقك توب !
يعني تغرم لي توبي الروحو جملك
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
قالو الراجل نسيبتو ماتت ,, رفعها في حمار وربطها وماشي يدفنها ,, في السكة لاقا ناس بلعبو ضاله ,, وهي لعبة شعبية عند اهل البادية , تلعب بالعيدان وتسمي كلاب وبرسم مربعات في الارض تسمي بيوت
المهم ماعلينا
زولنا قال يطعن ليهو طعنة طعنتين ويمشي متخارج يدفن نسيبتو ,, واللعب جر ,,, الحمار عندو زمن عليقتو ثابت في البيت ,, جا وقتها ورجع الزريبه
الشمش طاحت وزولنا نسي الجنازة ومشي البيت
لاقتو مرتو ,, اها ان شا الله قبر امي لين ,, لي قناعه عندهم انو القبر اللين سعادة الآخرة ,, قال ليها ,,, طلق مندي موية بس ,, وطق الموضوع ضرب ليهو في راسو
انا اخو القبر ! ما نسيت الجنازة
مرتو فجأة شافت الحمار والجنازة المربوطة
هي يا فلان ماياهون دي امي جات راجعة
قال ليها
علي بالطلاق الخير اللقتو امك دي في البيت ده كان مشت الجنة تجي راجعه البيت
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
يقول المثل
اخوك كان رميتو قوم منو
ويقول
اكان حبيت خلي فرقة
واكان كرهت خلي فرقة
فرقة تعيد بيها اواصر الود , وفرقة قد تخسر فيها من تحب , ونحن لامن نحب بننبهل ساي ونتدفق ,, ونحكي
ومن الحكي بنظهر عيوبنا
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
الكلام ده ليه ؟ شايف الناس البتقبقب في بعض دي ,, الواحد يسك اخوهو محل محل ,, لو اتدسا ما يخليهو ,, ولو وقع ما يريحيو ,, ولو مات يشمت فيهو
مساحات التسامح بدت تضيق بالناس ,, وكلو زول مقهور داير يفضي قهرو وزهجو في اخوهو
| |
|
|
|
|
|
|
|
|
|
Re: الحوافز عدو المواطن والوطن (Re: عبدالحفيظ ابوسن)
|
من نكات وحكاوي الطفولة
في ملك عندو كوكا hydrocoele ( قلة مائية ) ,, والكوكا ظاهره للرائي ,, ومانع أي زول يقول اب كوكا جمبو ,, ولو قلتها بكتلك ,, واحدن مسخوت وشويطين راهن ليهو ناس انو يقولها في وشو
مشي للملك وقال ليهو
والله يا مولاي الناس دي بتحبك حب ولو مت يبكوك بكا ,, ناس الشرق يا اب كوكا ,,, وناس الصعيد يا اب كوكا ( يبكوك ) ,, وكل الناس يا اب كوكا يا اب كوكا
وفاز بالرهان
بالمناسبة الناس عندهم راي انو الكوكا لو دخلت الموية بتطلق صوت زي القعونجة , لذا يقول المثل
الكوك ببين عند المخاضة
| |
|
|
|
|
|
|
|
|
|
Re: الحوافز عدو المواطن والوطن (Re: عبدالحفيظ ابوسن)
|
الحبيب أبو سن ...
والله ضحكتنى ضحك ...
| Quote: بالمناسبة الناس عندهم راي انو الكوكا لو دخلت الموية بتطلق صوت |
يا أبو سن ... الكوكا ما بتعمل صوت إذا دخلت الموية ... نتعمل صوت أذا حرقت جنبها ريشة (جداد أو حمام).
| |
|
|
|
|
|
|
|
|
|
Re: الحوافز عدو المواطن والوطن (Re: عبدالحفيظ ابوسن)
|
الكوكا مرض ذكوري يصيب الخصية ويجعلها كبيرة الحجم جدا , وهو مرض معيب وسط الرجال
اها
الفهم الشعبي بتاع حكاية انو الكوكا بتصدر صوت عند ملامسة الموبة , طلعت المثل
الكوك ببين عند المخاضة
الكوك جمع ,, يعني الناس لامن تجي تخوض الموية بنعرف العندو كوكا ,, زي حكاية الفيهو بخور بنشم
يعني عيبك بمرق وقت الحارة
ياخ ده مثل ختيير عديل كدة
و
أنبليت
اختا الرملة ما تقع البكان الهش
| |
|
|
|
|
|
|
|
|
|
Re: الحوافز عدو المواطن والوطن (Re: عبدالحفيظ ابوسن)
|
قاضي شرعي
ماحصل انجز قضية طلاق بين متخاصمين زوجة و زوج
يجوهو للطلاق ,, يقبل علي الراجل
قادر الله ! كدي يا فلانة اصلي الباب وتعالي
قادر الله ! عليك الله عاين ليها بي وراء ,, والله تقعد الشافع وما يقع
شوف الكرعين ديل مصبوبات صب
السدر ,, ما شا الله تقول فتاة بكرة
ويواصل في الاوصاف الجسدية والحسية وكل مرة يزيد الجرعة
وفجأة
يقوم الزوج يجر يد مرتو ويتخارج
اما انك رجل قليل ادب ,, علي بالطلاق لو ما قاضي اضبحك جخخ هنا واقش سكيني فيك
اما انك زول مامحترم
| |
|
|
|
|
|
|
|
|
|
Re: الحوافز عدو المواطن والوطن (Re: عبدالحفيظ ابوسن)
|
اهلنا بقولو لي ابوهم يابا ,, ولي اعمامهم ابوي فلان ,, فبتعرف انو عمو ,, وبرضو امي فلانة ,,
قالوا طه ده ابوهو ميت ووحيد ,, امو ماتت وهو عايش مع خالاتو اربعة , يعني امهاتو ,,
مرة طلع وما جا راجع ,, خالاتو قالن هسه الناس يقولو نحن اهملنا فيهو وما فتشناهو عشان ما ولدنا ود بطنا
اها اتفقن اي واحدة تمسك جهة من الجهات الاربعة تكوس فيها ,, وما ترجع إلا وطه في يدها ,,,وفعلان مرقن ,, ولي الليلة ما جن راجعات وما معروف مكانهن يوم
وبقي مثل
يقولوا ليك
لحق امات طه
| |
|
|
|
|
|
|
|
|
|
Re: الحوافز عدو المواطن والوطن (Re: عبدالحفيظ ابوسن)
|
بالقالو حمد
حمد ده صاحب مركب يؤجرها للركاب لقطع النيل ,, مرة في نص البحر المركب دخلتها موية ,, وبدأ حمد في سد قدود المركب بما يتوفر له من قطع قماش قديمة مجهزة للطواري الزي دي ,, وكملت الهديمات ,, واحد كورك لي حمد
تعال بي هنا في قد
فرد عليهو حمد
مافي شئ اسد بيهو القد إلا ,,,,,, ذاكرا كلمة نابية دارجة لعضوه التناسلي
وبعد فترة كوركت مرة
الموية جاتنا بي هنا ,, تعالوا سدوها
رد ليها واحد
لكن نان مافي شي يسدو بيهو ,,يسدو بي شنو تاني
فردت عليه المرأة
بي القالو حمد
فصارت مثلا يستعمل في غير بذاءة مقصودة
| |
|
|
|
|
|
|
|
|
|
Re: الحوافز عدو المواطن والوطن (Re: بدرالدين بابكر مصطفى)
|
مرحب بدر الدين
وسعيد بمرورك
هههههه ده اسلوب الحكي السوداني القح ,, يحكي ليك عن حاجة حصلت قبل زمن طويل جدا ويقول ليك لي الليلة ما قعل و فعل , يعني دايرو يبيخ القصة ويقول ليك ماتو
طبعن دي مبالغة في الحكي
اها ساي كده يقول ليك
ياخ جيتك ألف مرة و لا مليون مرة ما لقيتك ,, وتكون دي اول مره
ولا
كلمتك ألف وخمسمية مرة
دي اكتر واحده عا########ي ,, شفت الدقة دي ألف وخمسمية مش ألفين ولا ألف
| |
|
|
|
|
|
|
|
|
|
Re: الحوافز عدو المواطن والوطن (Re: عبدالحفيظ ابوسن)
|
قالوا
واحد مسافر سفر بعيد ,, وودع مرتو ,, مرتو قالت ليهو مابقدر اصبر علي البعد ,, آذن لي لو تعبت اشوف لي راجل يطفي رغبتي
قال ليها ,, موافق لكن علي شرط ,, تشوفي الناس البمرقوا يتسيروا ويتجمروا في الخلا ( يخرجون للبول والغائط ) تشوفي ابعد زول بمرق فيهم
اها الراجل سافر وطول في سفرو ,, ومرتو تعبت ,, بقت تمرق المغرب تراقب الناس المارقين الخلا بأباريقهم ,, مافيهم زول مرق بعيد , طرف الحلة والعين تعاين يقعد
اها مرة شافت واحد مرق وهي بتعاين ليهو لامن غاب من عينها ,, رجتو لامن جا راجع ,, ومشت عليهو ,, وقالت ليهو انا راجلي مديني الأذن وحكت ليهو القصة ,, وهسه انا دايراك
قال ليها مافي مانع ومشي معاها البيت ,, وقال ليها كدي النضبح العمبلوك ده للعشا ,, وفعلا ضبح العمبلوك , وعلقو في الشعبه وقال ليها امشي البيت واجهز واجيك
مشي
وكـــــــــــلاب الحلة شمت الدم وجات علي العمبلوك المعلق ,, وهي شالت عكازها وقنبت تحاحي في الكـــــــــــلاب ,, للصباح ما جا ,, وهي ما نامت من الكـــــــــــلاب
الصباح جاها ,, وشاكلتو
كيف تغشني وتخليني للصباح مساهره مع الكـــــــــــلاب
قال ليها
لو وصلتك كان بقيتي زي العمبلوك ده ,, وناس الحلة فيك زي الكـــــــــــلاب
| |
|
|
|
|
|
|
|
|
|
Re: الحوافز عدو المواطن والوطن (Re: عبدالحفيظ ابوسن)
|
يكون الراجل بعرف الزول دا بالتحديد (الزول البمرق بعيد دا)
عارف رجالتو وعفتو وحكمتو
زمان في حلتنا في واحد مُصر يطلع الخلا رغم إنو ولادو حفرو ليه بير في البيت (يقضي فيها حاجته)
المهم الزول دا بيطلع بعيد خلاس
لمان سألوه قالوا ليه: لماذا لا تقضي حاجتك في بيتك
اتخيل طلع السبب شنو؟
إنو البتاعة دي مقسومة نصين، نص للرجال ونص للنسوان
وفي النهاية البير واحدة
فهو يرى إن لخبتة الكيمان دي عملية ما كريمة في حقو
هههههههههههه
تحياتي مثنى وثلاث ورباع
| |
|
|
|
|
|
|
|
|
|
Re: الحوافز عدو المواطن والوطن (Re: بدرالدين بابكر مصطفى)
|
مرحبا بدر وشرفت
ممكن يكون بعرفو حقيقة ,, وممكن يكون في تصور ان المستور ديمة مستور
ههههههه
لكن زولك طلع صعب خلاس ,, قلت لي عدم اختلاط حتي في العذرة !
عندي عمي ساكن معانا وبيتنا عشرتين من البحر , وعندنا مستراح معروش ومنور وبي بابو ,, لازمن يطلع الخلا المغرب ,, ونحن في وسط المدينه واعرق الاحياء
عندنا ناس في نواحي رفاعة ,, ناس البطانة فوق ,, لامن يجيهم خاطب لي بتهم بسو ليهو عصيدة ليننة ,, هي حارة وملاحها حار ,, ويشوفوهو ,, العصيدة اللينة بتلصق في اليدين ,, وحاره طبعا ,, لو قام بشر ونطط ما بدوهو ,,, ولو كرز ساي واتحملها ده زول سترة
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
قالو
وحكاها لي خالي مصطفي عبدالله مليك ذاكرا اسم صاحب القصة
واحد عندو غنماية منجضاهو نجاض شديد , يجي يحلبها تدقش حلة اللبن تدفق اللبن ,, يخت كراعها وسط كرعينو كعادة حلب الغنم ,, تتململ توقعو علي قفاهو ,, يجيها بي قدام تنطحو ,, مرة لقيتو مدنقر جاتو بي ورا نطحة واحدة درشتو علي قدومو وسعت لحتفها بقرنقها ! طقاها ضبحها ,, اكل لحمتها متلذدا ,, ودبغ جلدها عملو فروة لسرج حمارو
يوم خت السرج ورفع فيهو الفروة وتلب يركب في الحمار ,, الهوا وحركة كراعو رمت الفروة
نزل رفع الفروة وهم بالتبة ,, الهوا رمي الفروة ,, رفعها تاني ,, وجا يتلب وقعت في الواطة
مشي عليها بالفرار قددها كلها
وانبطح فوقها خنقها لامن زبد ويهرج
جننتينا حية وميته
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
تشتهر المرأة في بالاهتمام الشديد بالرجل وفي تقديرة أكثر النساء مهارة في الطبخ هن نساء الغرب
بتهتم بالرجل واهتمامها بزوجها أشد ,, لذا اتت مقولتهم
شايب دار صباح أكان لقيتو امسكو ,, لكن شايب دار غرب فكو ,, مافيهو سبب
يعني لو رجل كبير السن اتي ليتزوج إمرأة لو كان من الغرب ده ما تديدو ,, لكن لو من الشرق اديهو طوالي ,, ده بكون مهمل وجيعان بس
| |
|
|
|
|
|
|
|
|
|
Re: لماذا تكتب في سودانيز ? (Re: عبدالحفيظ ابوسن)
|
قالو ابليس اتشارك مع واحد , زرعوا بصل , ابليس شاف البصل اخضااااار وسمح , اها الزول قال ليهو اختار
داير الفوق ولا التحت
ابليس اختار الفوق
ودقس
بعد فترة زرعوا قمح
اها المرة دي دقس مرة وعرف اللعبة
اختار التحت
ودقس
بني آدم اكان قام ألعن من ابليس
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
ود أبوسن سلام يا ناظر
مفترع روعة رغم الغياب من المنبر عدنا ووجدنا المتعه في كتاباتكم فكان استفتتاح للعودة
تشكرات يا حبينا ليك والجماعه البجادعو فيك
مع خالص التقدير
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
Quote: بحيادية تامة ودون الولوج في خلافات
الضايق ركبوك من يشوفك يعيا
وبعضهم يقول
الضايق ركوبك من يشوفك يحيل
ويحيل لفظة عامية تطلق للرغبة في ممارسة الجنس
واحيانا يقولون
ضايق فيك ركوب الفزرة
والفزرة معروفة فالدابة الفزرا ركوبها سهل
ولكن يخرج المثل من دائرة الدلالة الجنسية ويصبح معناه وفق موقعه
فالذي يستغلك يجوز فيه ذلك
والذي يستفيد منك يجوز فيه ذلك
وعموما يضرب المثل للاستفادة و الاستغلال |
سلام يا ود أبسن ينصر دينك ويشرِّط دلاقينك ويديك دلاقين من ماركس آند سبنسر وسيلفردج وهارودس كمان.
عندما كتبت المثل – الضايق ركوبك مما يشوفك يعيا- في مداخلة سابقة في بوست إفترعته.. تصدى لي هجين الخرطوم ومعهم بل ساقهم بعض محترفي النضال الإليكتروني لإختلافي معهم في الرأي .. ولم يفهموا المثل كما تفهمه أنت وأمثالك من فصاحى السودانيين وفسروه على أنه وحي جنسي .. إلى آخر القائمة السياسية المغلفة بدسم الغتاتة المحشو بسم البلادة الثقافية الإثنية. وعندها قلنا لهم: وما علينا إن لم تفهم البقر، مع إعتزازنا بالبقر وما يمت لها بصلة، خاصة وأن أكبر سورة في القرآن هي سورة البقرة.
تحياتي
كبـّاشي الصـّـافي
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
| Quote: اقول ضربت ليك تلفون وتصك اذني دقيت ليك ,, يدقوك فوق رويسك ده |
أسمع دي يا ود أبسن... سوداني مقيم في ليبيا أيام القذافي .. عمل تأشيرة خروج وعودة. قال لصديقه الليبي: أنا ماشي البنك أدق القروش في الجواز. لم يفهم الليبي المقصود كيف يدق السوداني القروش في الجواز؟؟ - لا يتم التحويل من ليبيا إلا عن طريق البنك- طلب الليبي من السوداني أن يرجع له ضروري بعد ما يدق القروش في الجواز لأنه يحتاجه في موضوع مهم.
بعد أن قام السوداني بتحويل المبلغ الذي يريده، رجع الشركة ووجد الليبي في انتظاره. سأله الليبي: دقيت القروش في الجواز؟ أجاب السوداني بنعم. عندما شاهد الليبي ختم البنك في جواز السوداني مع المبلغ الذي تمّ تحويله، قال للسوداني: الله يخرب بيتك، مش كان تقول عاوز تمشي البنك تصرِّف عمله حرة؟ كنت عاوز أعرف كيف يدق السودانيون القروش في الجواز بواسطة البنك.
مش بالله اللهجة عندنا؟
تحياتي
كبـّاشي الصـّـافي
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
| Quote: ولا تلاقيك شوكة سدر مارقة من الحيطة تطعنك في نايطتك |
يا ود أب سن سلام مربع... الإقتباس أعلاه جعلني أستفسر هل ما قاله الإمام الصادق المهدي عن قبيلة أولاد حِميد في ابوجبيهة أنها من رفاعة وليس من قبائل البقارة! وجدت كلمات كثيرة تجمع بين لهجتنا في قبيلة اولاد حِميد ولهجة رفاعة عامة في شرق النيل الأزرق والبطانة، فهل لك في الإثنيات علم .. نلتقي مع المحبة.
هل يعرف الكثيرين هنا معنى: (فلان نايطا بوجعا)؟
تحياتي
كبـّاشي الصـّـافي
| |
|
|
|
|
|
|
|
|
|
Re: الكافرة أمك دي ! (Re: بكرى ابوبكر)
|
شكرا يا ريس بكري
اصدر نميري قوانين سبتمبر سنه 83 , والتي قال عنها الصادق وهو معارضا لا تساوي الحبر الذي كتبت به واتي رئيسا ولم يلغها وماطل فيها
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
قالوا ناس الخلا الرواعية المبارين بهايمهم ,, ومعاهم شيخ وامام ليعلمهم امور دينهم ويؤمهم
سألوا الامام
انت دحين شريعة نميري دي جنسها شنو?
قال ليهم
دي شريعة الله
اها يعني شنو ?
قال ليهم
توا البكتل زول يكتلو ,, والبقطع يد زول يقطعو يدو ,, والبقد عين زول يقدو عينو
نط واحد سألو
اها والبطلع مرة زول ?!
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
البطلع مرة زول يطلعو مرتو
ههههههه
تبدو كطرفة تدعو للضحك
ولكنها ليست كذلك من منظورهم ,, فالجزاء من جنس العمل ويتوافق مع اول الاحكام ,, العين بالعين والكراع بالكراع والطلوع بالطلوع !
كفهم ساذج للعدالة ! وإن شئت تعكس نظرتهم للمرأة كشئ مملوك لزوجها او ابيها او شقيقها ,, فالفعل لا يسيئها بل يسئ لزوجها
ورغما عن سذاجة المفهوم واستنكارنا له , إلا اننا نمارسه الآن والآن مقصودة
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
رغما عن سذاجة المفهوم لأولئك الرعاة ######ريتنا منه , إلا اننا نعيد إنتاجه ونقع في ذات الفخ
لذا
ضروري التوعية والوعي
وضرورة ان نمتلك الادوات الفكرية اللازمة لنستطيع ان نر بشكل اوضح
حتي
نستطيع عرض قضيتنا وجعل الآخرين يلتفون حولها
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
سلام يا عبدالحفيظ
إنت وحامد بديتو نقاش جميل حول شعر الحردلو وأخوانه
وما تميتوه، يا ريت لو واصلتو فيه
وإن تعذر ذلك
واصل في مشهادك دا
كلو ستة
تحياتي مثنى وثلاث ورباع
| |
|
|
|
|
|
|
|
|
|
Re: الكافرة أمك دي ! (Re: بدرالدين بابكر مصطفى)
|
مرحب بيك بدر
وشاكر ليك متابعتك وتشجيعك
الحديث ذو شجون ويجر بعضه بعضا
انا بكتب والاسترسال بتم بواسطة الآخرين وبخليك تواصل
انا كاتب جديد وبعتل بوستاتي براي وبكتب ما يعن لي لحظتها
احاول قدر الامكان اكون مفيدا
بس
يا بدر
اخوك اصابه الخرف باكرا وبتذكر فجأة حاجه وتتداعي الذاكرة او تأبي
فيدك معانا
شوكران ياخ
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
قالو واحد لقي مرتو مع غريب في فراشه
فقال ليها
والله يا فلانة ما باقي ليك إلا تسفي الصعوط
وطبق الراجل ومرق سكينو ختاها ليهو في رقبتو وسألو
هاي جاباك عرم ولا حقارة
قال ليهو
جابني عرم
فكاهو
وقال ليهو
امشي ,,, عرم حارم انا ضقتو
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
ودي قصة حقيقية كنت شاهدا عليها
واحد زول خلا , خش كوستي وقدر ما فتش ما لقي محل ياكل فيهو
فسأل
قالو ليهو
ده رمضان
قال
رمضان ده فرضا فرضتو الحكومة ولا اقتصاد معيشة
| |
|
|
|
|
|
|
|
|
|
Re: الكافرة أمك دي ! (Re: الكيك)
|
وهذه مشاركتى الاولى هنا وكنت نشرتها ضمن مذكرات اروتى ونشرت ..على هذا المنبر
اتمنى ان تعجبكم لتبحثوا بعده عن مذكرات اروتى
تحياتى لكم جميعا
عندنا فى بلدنا بعض الاعراب يزرعون البطيخ فى الرمال او الترقس باللهجة النوبية وتوجد منطقة تحمل اسم ترقسى بالقرب من ابكر يزرع اهلها البطيخ والشمام ويسوقونه فى المنطقة بالحمير.. ويطلق عليهم اسم الترقاسة .. تجد الحمار يحمل قفتان وسطهما عود توضع على السرج وتجد الحمار يئن من الحمل الثقيل وحينما يصل سوق السبت يكون الحمار المسكين كله ماء من كثرة العرق ..
وفى اى قرية يسرق الصغار البطيخ فى اول الموسم وهى هواية اكثر من انها احتراف ..
زراعة الجروف هى ايضا من صميم عمل المزارع والجروف هى الاراضى المحاذية لضفة النيل والتى يغطيها فى فيضانه وبعد ان ينحسر منها او يشرد بلغة البلد تزرع بالسلوكة واهم ما يزرع فيها نوع من الذرة اسمه المقد وهو الاكبر فى قندوله من الذرة العادية وقصبته فى السمك تعادل خمسة اضعاف الذرة العادية ايضا يزرعون اللوبيا والفاصوليا والويكة والطماطم واجود نوع من الطماطم هى طماطم الجروف التى تشم رائحتها على بعد عشرة امتار اضافة لنكهتها المميزة ..
يقوم صمد الساقى بتوزيع طين الجروف على اهل الساقية ويتفاوت الناس فى المساحة وغالبا ما تحدث بعض المشادات بينهم عند التوزيعفى منطقتنا ظهرت جزيرة جديدة بعد الفيضان وهرع الناس للحيازة وكل واحديريد حوزة اكبر مساحة ممكنة.. واحتدم الجدل بين الاهالى واختلفوا وكان صوت الشجار يصل الى البيوت فاطلق عليها احد اعيان البلد اسم ام ديى.. والديى فى الرطانة الشجار والكلام الكثير..... يقولون لك لا تسويها ديى....
كنا نزرع بالسلوكة والثانى يرمى التيراب فى الحفرة ويغطيها بقليل من الطين خوفا من الكوليدا والكوليدا طائر صغير اكبر حجما من ودابرق على راسه تاج مثل الحداد او الهدهد له منقار طويل يدخله فى حفرة السلوكة وياكل التيراب .. وعندما يكون الطين لين يزرع سكاجم اى بسرعة ..
واذا تاخر المزارع فى الزراعة بالسلوكة... فى هذه الحال ربما تيبس قشرة الارض التى يراد زراعتها فى هذا لابد من البرقان والبرقان بالعربي هى الحفر بالطورية لازالة القشرة الناشفة ومن ثم غز السلوكة وتتم العملية بامان والبرقان عملية متعبة لذا تجد المزارع حريص على ان يزرع ارضه اولا باول خوفا من ان يدخل فى عملية البرقان المتعبة ..
هناك بعض النباتات التى تنمو بعد انحسار النيل اهمها السعدة او السعدى بلغتنا والعصبة وهو نوع من النباتات التى تفضلها الاغنام له رائحة ذكية والدفرة او الدفرى .....ا
فى اول الشتاء يجيىء الحلب او الغجر لمنطقتنا وفى هذه الايام نسبة للزراعة المكثفة فان اشغال الحديد من مناجل وطوارى تتطلب وجود عمالة من الحرفيين المهرة وكان الحلب او الغجر الذين ينزلون فى البيوت المهجورة او شجر النيم الظليل من الاشياء الموسمية فى البلد... والحلب عرفوا بتجارة الحمير واصلاح كافة اشغال الحديد والالمنيوم اذا عندك حلة مقدودة او منجل ميت او سكين وكنا نحن صغار نتفرج فيهم وننادى بعضنا البعض بان الحلب وصلوا واول وصولهم يغرسوا السندالة ويضربوا عليها بكل قوة ليعرف اهل الحى بانهم وصلوا ..
نساء الحلب يعملن فى بيع البخور وحب اللبان والودع وقراءة الكف والزار احيانا ..
واشتهر سالم الحلبى وزوجته عزيزة فى المنطقة الواقعة ما بين دنقلا وكريمة يزورون كل قرى هذه المنطقة قرية قرية يجلبون الحمير ويبيعونها وسالم هذا له زبائن متخصص فيهم فى كل قرية يعرفهم ويلعب معهم القمار فاذا اخذوا منه يظل فى البلد الى ان يتمكن من اخذ كل ما اخذوه منه ومضاعف وفى اليوم الثانى مباشرة او فى نفس اليوم يقلع السندالة ويهرب نحو المشرع... والمشرع هو مكان وجود المراكب التى تقطع النيل بين الشرق للغرب ..
مرة تفرجت على سالم وهو يخرت احد الاعراب واسمه على كان ممن يلاعبه القمار فاخذ كل قروشه وحماره ونعليه وقلع السندالة وحمل اطفاله وعزيزة على حميره وبسرعة الى المشرع ..
كما قلت الحلب بارعين فى شراء وبيع الحمير وعندهم مقدرة على تطويع اى حمار مهما كان على المشى بطريقة معينة وادخاله للمركب وهم لا يرحمون الحمار ويضربونه بشدة وقسوة غير معهودة عندنا فى البلد... وعندهم عصى و عكاكيز من القنا والسنط مضببة بجلد الثور وفيها مسمار صغير ينغز اى حمار مهما كان دراوى يمشى زى الخيط المستقيم ..
طريقتهم فى شراء وبيع الحمير تتم كالتالى.... يقف الاعراب صف والحلب فى الصف المقابل سالم وعزيزة واولادهم وتبدا المساومة فيقول العربي الحمار دا بى 75 قرش فيرد الحلبى يفتح الله وتستمر المساومة الى ان يتفقا على حل وسط ويكون خمسين قرشا مثلا ..
عرف الحلب ايضا فى المنطقة بانهم لا يتحفظون فى الحديث وممكن الحلبى يفاجئك باى نوع من الحديث غير المالوف وتجد الحلبى يتحدث مع زوجته واطفاله بالفاظ نعدها بذيئة... والحلبيات من اجمل النساء وكانت عزيزة اية فى الجمال وعندما تدخل اى بيت تغازل الرجال امام نسائهم وهو امر غير متعارف عليه فى المجتمع القروى ولكن هذا معروف فى البلد يقولوا ليك.... دا حلبى يقول زى ما يقول اى لا يختشى ..وكانت عزيزة عندما تدخل اى بيت بسرعة يعطوها ما تريد خوفا من لسانها ..
واذا قدر لك و سمعت نقاش بين عزيزة وسالم تسمع العجب وكنا نحفظ مشاكلهم فى القروش وحصيلة اليوم والنقاش الحاد الذى يتطور الى شتائم بذيئة بينهما امامنا دون خجل عمن هو موجود ..
يعيشون على السليقة حياتهم قاسية غير مستقرة لا يعلمون ابناؤهم لا يملكون منازل او اراضى تعودوا على هذه الحياة منذ الازل .. وقد عبر صديقى الشاعر محمد الحسن سالم حميد عنهم فى قصيدته الرائعة التى تحكى عن حمو حلبى نورى المعروف
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
من الفيس
مرحبا عبدالله محمد عبدالله
وحبابك
قالت العرب
الحديث ذو شجون ويجر بعضه بعضا
فدحين الزول بدور الناس البفتحو نفاجات الكلام , والذاكرة ماكرة ,, ومزاجي أمكر منها ,, مراتن يواتيني الكلام وتغلبني الكتابة ,, ومراتن اعمل رد والراس القاهو قرعوبه ساي
المتاوقة شرك يا حبيب
شاكرا لك تشجيعك ياخي
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
حبابك الكيك
ولك الود اطنانا
وعذرا للتأخير فالبال مشغول وولا زال
اهلنا المحس والحلفاوين اصحاب حضارة راسخة وضاربة في القدم ,, يقول صديقي المهندس عاصم الشيخ ود كوستي ,, ان حضارتنا سابقة حضارة مصر , بملاحطة حجم الاهرامات , اهرامات مصر أكبر وإهراماتنا اصغر , والانسان يتعلم بالنموذج الاصغر اولا , او كما قال
واكاد اقول ان معظم اسماء ادوات الزراعة والمنزل ذات اصول نوبية , احتفظت بإسمها او حورها النطق
الغجر او الحلب كانوا يأتوننا حتي كوستي , واشتهروا بفحش الكلام وعدم الحياء والسلوك المتفلت , يأتون بكامل الاسرة ويستقرون في اطراف المدينة , وحسب ما قرأت فهم ينتشرون في كل بقاع العالم بذات السلوك ,, ولعلك تذكر الفلم الامريكي الغجر يصعدون للسماء
شاكرا لك مداخلتك الثرة واتمني ان اراك كثيرا هنا تأصيلا ! للثقافة السودانية
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
مرحبا رأفت ميلاد
وحبابك
والاخطر ليس ضياع لغتنا وتراثنا فقط , بل حتي اطفالنا يحفظون الاغاني العربية الموغلة في محليتها , ولا يعرفون الفن السوداني
وساهمت الحكومة تحت دعاوي التأصيل في محاربتهم للقنوات السودانية , فهي قنوات غير جاذبة , وهتافية ,, وغير قادرة علي مخاطبتهم
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
ود أبوسن سلام يا ناظر
مفترع روعة رغم الغياب من المنبر عدنا ووجدنا المتعه في كتاباتكم فكان استفتتاح للعودة
تشكرات يا حبينا ليك والجماعه البجادعو فيك
مع خالص التقدير
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
الأخ / عبد الحفيظ أبوسن
كل عام وأنتم بألف خير ، بالرغم من انني من غير الناطقين بها ( أي العربية) يعني بيئة رطانة وحلفاوي كده إلا يا أخوي نضمك سمح بالحيل .
والأجمل ناسبني واحد أخو من عرب الشكريه ، والسلالة معانا في حلفا وطفلهم ناشئ بيننا إلا أنني أرى في (إبن إختي) الصغير فصاحة العرب .
| |
|
|
|
|
|
|
|
|
|
Re: الكافرة أمك دي ! (Re: ولياب)
|
مرحبا ولياب
وحبابك ياخ
لاشك ان اللغة النوبية لغة اصيلة متجذرة في الثقافة والتراث السوداني , والنوبة يفتخرون بلغتهم ويحرصون علي تعليمها لأولادهم وان سكنوا بعيدا عن ديارهم
وهم اهل تراث وحضارة
سعيد بك , رغما عن صداقتي لكثير من اهلنا الرطانة إلا اني لا افقه شيئا عنها , سوي شذرات لا تسقني ماءا ولا تملأ معدتي ,بل كلمات وجمل متفرقة سرعان ما انساها
كامل الود
| |
|
|
|
|
|
|
|
|
|
Re: الكافرة أمك دي ! (Re: عبدالحفيظ ابوسن)
|
من الفيس
مرحبا عبدالله
وشاكرا لك تواصلك
والله يا عبدالله آ خوي الراس بقا جايط ,, هم المعيشة ,, هم الاولاد وتعليمهم ,, الواقع البائس والملخبت وجايط ,, والدوشة ما بين هذا و ذاك وتلك ,, وده حار وده ما بنكوي بيهو
نخش في دفسيبة الجماعة هنا ,, عاك وعيك وصفتك و نعتك , واتا قلت وانا ما قلت ,, الواحد يطلع دايش ,,
اها نضمينا بقا زي نم الاندايات ,, والانداية لامه الخلوق كلهم ,, تسمع شي دوبيت وشي جراري و شي جرداق ,, يخشن راسك وتبقا تنضم بره من راسك
| |
|
|
|
|
|
|
| |
زينب محمد عبدالله
عبدالحفيظ ابوسن
عادل البراري
كمال سالم
Haydar Badawi Sadig
بدرالدين بابكر مصطفى
عباس الدسيس
cantona_1
بكرى ابوبكر
الكيك
ولياب
فيس بوك
تويتر
انستقرام
يوتيوب
بنتيريست