|
|
 متاعب الافراح من صالة نيلتون الى صالة الفروسية
|
بالامس حدث لي انا وصديقي العزيز/ محمد حمزة الحسين، طرفة من الطرف المضحكة وبالجد حاجة تحير العقول وتشيب الرأس، والمناسبة كانت دعوة من احد بورداب سودانييز اون لاين دوت كوم.
وطبعاً عندما يحدث اي مناسبة لبوردابي من سودانييز اون لاين يخبر صاحب الدعوة زميل يقوم بفتح هذه الدعوة في المنبر العام، وانا اطاوق في المنبر العام لقيت بوست بعنوان دعوة لبورداب الخرطوم بمناسبة زفاف عضو المنبر (عزان سعيد) في صالة الفروسية. وقلنا خير لانو عزان ما قصر في رمضان وصل البيت فطر مع مجموعة من البورداب.
على كل حال الحصل شلت التلفون واتصلت لود الحسين قلت ليه في بوردابي عرسو اليوم والراجل دا عزيز لدي لازم نشاركو على طول ود الحسين-استجاب للدعوة وقال لي الدعوة وين قلت ليه في جوار نادي التنس واسمها صالة نيلتون، قال لي تعال لي نمشي بعد المغرب قلت ليه خير، ركبت الهايس واتجهنا الى الخرطوم من الفتيحاب لفة سراج ومن جاكسون ركبنا مواصلات مايو نزلنا جوار الصالة، وقبل ما ندخل الصالة اتصل علي صديق والمكالمة جرت اكثر من 15دقيقة، ثم اعتذرت له قلت ليه داخلين عرس اخونا عزان من سودانييز اون لاين.
اخونا ود الحسين كان ماسك التلفون وبسمع في القران الكريم انتظرت لحد ما كمل السورة، ومنه اتجهنا لبوابة الصالة وسالنا شرطي المرور والحرس قلنا ليه دا عرس د.عزان سعيد، قالوا ما عارفين طيب نمش نسأل البواب فمشينا لبواب وسالنه قلنا ليه دا عرس د.عزان سعيد قال لينا نعم .
|
|
  
|
|
|
|
|
|
|
|
Re: متاعب الافراح من صالة نيلتون الى صالة الفروسية/اضحك معانا(ههههههه) (Re: ذواليد سليمان مصطفى)
|
الشفقة ما ترك لينا فكرة ومن البداية قلت لي ود الحسين احسن نقيف بره الصالة عشان نقابل البورداب لانهم بطبعهم بقيفوا بره ، او ندخل ونقعد في اول تربيزة جنب الباب عشان لمن يجو داخلين يعرفو ديل تربيزة البورداب وحتى العريس لمن يجي داخل نقوم نبارك ليه من الباب ونبقى مارقين، ود الحسين قال لي ما نقعد طرف الى نقعد في النص، قلت احسن احترم رأي لكن برضو نقعد في التربيزة رقم 2 ومشينا قعدنا جنب السماعات ونتأمل في جمال الصالة واهل العريس والعروس.والله ما طالبني حليفة الناس الشفتهم في الصالة كلهم حلب؟، فقال لي ود الحسين انت عارف الناس البسلموا من القداديم نسوان والرجال ديل ما ناس عزان، قلت خير كدا خليني اتاكد واثناء حديثي معه جاء شاب طويل لابس جلابية وعايز يقعد براه ناداه ود الحسين قال ليه اقعد معنا فسال من العريس هل اسمه عزان الشاب نعم طيب العروس دكتورة الشاب برضو قال نعم، فسالته عن علاقته مع العريس قال لي دا معرفة. طيب قلت يعني صحبك قال يكون كدا.
ومن هنا دخل الشكك فينا ، وكنت خائف من التصوير وان لايتجه صاحب الكاميرا علينا حتى يأخذ صور مننا فكنت حريص على ذلك.
| |
|
|
|
|
|
|
|
|
 Re: متاعب الافراح من صالة نيلتون الى صالة الفروسية/اضحك معانا(ههههههه) (Re: ذواليد سليمان مصطفى)
|
طبعا الجماعة كلهم حلب وعندهم مصوراتي كلمة شاذة زي وزي ود الحسين يعني من السواد الا الليل، واخونا المصوراتي يبدو بتاع استديو متخصص في التصوير ، في كل حمسة دقائق يصور النسوان وفي واحد طويل ابو صلعة واقف يستقبل في الناس اصلاً ما لفت عين لينا غير المرة الاولي.
الساعة كانت 9:25دقيقة مساءاً وفجاءت دخل شاب في عمر الثلاثيات يرتدي بدلة سماوي وسط زغاريد وعدسات كاميرا المصور الفتوغرافي والفيديو، ثم بدا الشاب يبشر يسلم بالقبلات والاحضان.فسالت الشاي هل دا عرس ولا حاجة تانية الشاب ابو جلابية كلو ما نسالو يقول لي دا حنة ومرة خطوبة، فقمت من التربيزة عملت نفسي عندي مكالمة فاتخارجت بزحمة الزغاريد والفرحة التي عمت الصالة.
فتركت محمد حمزة الحسين والشاب ابو جلابية يتناولون الحديث فقمت اتصلت على ود الحسين وقلت ليه الناس البرة ديل قالو لينا دا خطوبة قوم اتخارج بسرعة، فود الحسين كان حريص على الخروج بصورة فنية فاستقل ايضاً فرصة اطقاء لمبات الصالة وتشغيل اللمبات المبهرة والدخان واخونا ابو جلابية ايضاً كسب الفرصة ما اطفاء اللمبات اول طفية دخل ليك يدو توش في الباسطة وكوكتيل الفاكهة، فقال ما ممكن تخلوني براي. قلنا ليه خير انحن ماشين صالة الفروسية نحصل العريس عزان وانت خليك عائيش مع الخطوبة والدبلة.فاخونا ابو جلابية داير يورطنا لكن الله فتح بصيرتنا وسترنا من الفضيحة.فتحركنا الى صالة الفروسية فوجدنا المكان المقصود اصلاً الفروسية وباركنا للعريس د.عزان
| |
|
|
|
|
|
|
| |
ذواليد سليمان مصطفى
الصادق اسماعيل
أسامة البلال
فيس بوك
تويتر
انستقرام
يوتيوب
بنتيريست