|
بصراحة يا عثمان ميرغني الطاهر رقصك ترقيصا ..
|
طبعا الرقيص القاصدو أنا بلغة الكورة اللى هو المراوغة زي ما بعمل قلة وسكسك في المدافعين .. شىء بى تحت وشىء بالمقاس، وشىء وشويات لغاية ما المدافع تجيهو فلايت أو في أحسن الأحوال دوشة رأس .. أها دا بالضبط من وجهة نظري العملو الإعلامي المتألق الطاهر حسن التوم في الباشمهندس عثمان ميرغني في برنامج حتي تكتمل الصورة على قناة النيل الأزرق البقت ما عندها موضوع زيها وزي الكورة السودانية وهلال مريخ . عثمان ميرغني حسب ما جاء في البرنامج كتب انو وزارة الزراعة بتستورد تقاوي من شركة خاصة في حين انو وكيل الزراعة الكان متواجد في الحلقة كضيف نفي ذلك جملة وتفصيلا وأكد أن الوزارة قاعد تستورد التقاوي دي من وزارة الزراعة التركية مباشرة . الطاهر قال لعثمان ميرغني اتا بتتهم الوزارة بالتعامل مع شركة خاصة ودي فرصة تثبت الكلام دا على الهواء مباشرة زي ما وكيل الزراعة نفاه على الهواء مباشرة. عثمان ميرغني قعد يتلج لج ويتم تم وأنا ما عارف ما بكشف مصادري وأنا متأكد من المستحيل الممكن وأنا ملك المعلومات الأكيدة.. وأنا الذي لن أخون الثقة .. وكلام كتير ما فيهو جملة واحدة مفيدة .. الطاهر لما غلب حيلة في النهاية قال لعثمان ميرغني : نحن بنحملك وزر الشفافية القاعد تدعو ليها دي .. طبعا الطاهر قاصد يقول ليهو يا زول قوم لف كدا واللا كدا قاديني يوميا بالشفافية الشفافية واتا طلعت بتاع شف ساي .. والله أعلم . نصيحتي للباشمهندس عثمان ميرغني بعد الترقيصة دي : أخد إجازة مفتوحة لأنو بصراحة كدا فضحتنا وشرطت عين الشفافية .
|
|
|
|
|
|
|
|
|