|
|
|
 Re: ***** كـوكـتـيـل مـن الـواتـس آب ***** (Re: ABUHUSSEIN)
|
وهسع اتا فرحان كدا قايل نفسك إخترعت الذرة يعني ..؟
الواتس آب على قفا من يشيل والوهمات العتلتها وجيت جاري بيها دي الناس شافتا
قبل ما أتا تعرف الموبايل ذاتو ..
يا هندسة خورن .
.................................................
يا مستنير شديد الزول دا شوف ليهو أي شغل إضافي ياخ .. عذبنا شديد .
| |
 
|
|
|
|
|
|
|
 Re: ***** كـوكـتـيـل مـن الـواتـس آب ***** (Re: ABUHUSSEIN)
|
Quote: Saidahmed Shami · الأكثر تعليقا
اطالب الشرفاء بتجاهل بوستات الامنجي ابوالحسين
البلد في حالة نفير وانت معي الواتس اب اختشــــــــي
رد · 2 · · 6 سبتمبر، الساعة 12:08 مساءً |
أبو أيمن إنت عارف الواتس آب شنو ...؟؟؟؟
أنا متأكد لغاية ألآن ما بتكون ضقتو بي لسانك يا وهم ...
قوم لف
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
Quote: Waleed Dawash
عادتكم يا الكيزان ما بتخلوها اصلو ... أي حاجة لازم تلغفو منها ... المرة كاتبه انها عذراء .. الباقي وينو ؟ حتى دي فيها لغف؟
رد · 1 · · 6 سبتمبر، الساعة 11:56 صباحاً |
عليك الله الكوزنة ما أخير من وهمتكم دي ...؟؟؟
قوم لف
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
Quote: Mohd Haider Elmusharaf · الأكثر تعليقا · The University of Khartoum
ههههههههههههههههههههههه قرقرقررررر هههههههه ..
رد · · منذ 22 ساعة |
ما خيبت ظني فيك ....
من أول يوم شفتك عارفك وهم متخفي في صورة مستنير شديد ...؟؟؟
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
Quote: Musab Sharf Aldin
استغفر الله العظيم ناس الفيس او المساطب العشعبيه بريئين من المدعو عماد ,, عماد صدقني انت عضو في سودانيزاونلاين ,, ومتخفي باسم مستعار ,, ياخ عليكم جبن
رد · · منذ 23 ساعة |
مصعب يا طيب شكلك متابع البورد كويس..
ما تشتغل بي أشباه الرجال ياها دي عادتهم اللي ما بقدروا إقولوه لي الرجال فيس تو فيس بلبسو ليهم طرحة و إتبلموا و إقولوه...
حا ترتاح منهم قريب
تحياتي و إحترامي
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: طلحة عبدالله)
|
ألو السلام عليكم يا شيخ .
أنا إنزلقت وضربت راسي بالتلاجة
واتفتح الباب ودخل في خشمي موية وعصير وزبادي وعنب
وشوية سلطة وشوربة خضار وعدس..
ما حكمها هل انا افطرت ؟؟
الشيخ:and#65275; and#65275; يا ولدي انت ما فطرت انت اتغديت..
جزاك الله خير يا شيخ..
الشيخ : ما جاتك سفة مدردمة ....؟!
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
واحد عجووووووز
محرج أولاده كل يوم الصباح يلقوه بايل في المرتبه
سألوه : انت يا أبوي حكاية البول في السرير دي شنو ..؟؟؟؟
والله يا أولادي قريب الصباح كدي بجي واحد بسالني
يا حاج بلت أقول ليه لا يقول لي طيب راجي شنو أقوم أبول
ولده الكبير قال ليه خلاص يا أبوي القصه محلوله
لما يجيك الراجل ده تاني ويقول ليك بلت قول ليه اااااي
عمك نايم جاه الراجل سأله ياحاج بلت
عمك قال ليه ااااااي
سأله تاني هريت قال ليه لا
الراجل: طيب راجي شنو ...؟؟؟؟
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
Quote: المنبر دا مافيهو زول رشيد يقول للوهم الكاتب البوست دا قوم لف :)
لو ما دنيا عجيبة الاستاذ عبد العزيز حسين يكتب بالشباك وبتاع الضهاري ابو حسين فاتح ليهو فصل كامل..!!
فعلا عالم ماشي بالمقولب.. |
يا عربي هو البورد لو فيه زول رشيد إنت كان أدوك باسوورد فيه ...؟؟؟
و خريج كوبر ياهو شبهك ....
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
شماسية ترثي زوجها المتوفي :-
:-
الليلة ياعشا البايتات بدري علي الشتات
خليتني وراك عزبة يا اب سيجارتن قصبة
جريت الفرملة وخليتني ارملة
يا الشرط ماك شين ويا الصغير ماك جلكين
من بعدك البيت عدمان الشرتيت
يا العنقالي يا الساتر احوالي
يا البتريد البوش يا الماك حنكوش
يا الماكنت فارة يا الجهجهتة ناس الطارة
الليلة ياسيد الغرام بدري علي الانترام
احي يا فردة ..
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
واحد زهجان في السوق العربي جنب الجامع الكبير عايز يتوضى وماعارف حق الابريق بخمسمية جنيه
بعد اتوضى تماااام جاهو ولد ناطي قاليهو ياعمك وين الخمسميه؟
قال لي الوضوء بي خمسميه ؟
قال ليهو ااااي
الراجل قال ليهو موش وضوكم دا اهااا
طووووووووووووووط
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
ملاح قرع وباميه مفروكة وكسرة وصحن سلطة و(ملاحة) ... ده كان الأكل فى بيوت البكا قبل أن يصبح (البكاء ذاتو) مظهر إجتماعى ونوع من أنواع (الفشخرة) بعد أن إجتاحت البلد أعداداً مهولة من (المليارديرات الجدد) أصبحت تؤثر سلوكياً على بقية الطبقات الأخرى حتى صارت (الفاتحة) هى الفرق الوحيد بين الأتراح والأفراح !
عندما توفى رجل الأعمال (حسن يورو) قامت أسرته بفتح أبواب (الفيلا) الفاخرة لأفواج المعزين علاوة على (صيوان) ضخم نصب بطول الشارع العريض مزود بعدد مهول من مكيفات الهواء تغطى أرضيته (السجاد) لزوم (عدم الغبار وكده) !
عند موعد الغداء إنتشر أفرادا يرتدون زياً موحداً يحملون (صوانى الأكل) النيكل الناصعة التى ترتاح بداخها أطباق المشويات والمحمرات والمقبلات وقطع الرغيف الفاخر بينما وضعت امام كل صينية عددا من زجاجات المياه المعدنية الباااارده !
فى صالون النساء جلست سوسو (فى الأصل ست البنات قبل أن يصبح حسن يورو رجل عمال)
جلست على سرير خشبى مستورد عليه ملاية قطيفة تتلقى التعازى من جاراتها وصويحباتها اللواتى جئن وهن فى كامل زينتهن (ناقشات) الحنة الما خمج يرتدين ثياب (الشيفون) المطرزة والشباشب ذات الكعب (البلية) تمتلئ أياديهن ورقابهن بآخر صيحات سوق الدهب فى (دبى) وبقية العواصم الخليجية !
- كلمتى (عوضية ردحى) ؟
همست (سوسو) لجارتها وصديقتها (نوسة) والتى مالت قريبا منها وهى تجيبها :
- والله (عوضية ردحى) دى قالو عندها مناسبة بكاء فى (مدنى) سافرت مشت ليها، قمت مشيت لى (هاجر حى ووب) قالو ليا عندها إرتباط خارجى فى (دبى) فى واحد من ناس الجاليه مات هناك أها فى الأخير مشيت كلمت ليكى (حنان سكليب) لقينا ما عندها إرتباط ووقعت العقد مع مدير أعمالا ! وأديتو مليون عربون مقدم
- وشالت منك البيانات !
- أديتا ليها كووولها .. المرحوم كان شغال شنو ؟ وعندو كم عمارة ؟ وقاعد يتبرع لى ياتو (نادى) وإشترى ليهم كم (لاعب) ؟ وعربيتو الراكبا نوعا شنو؟ وموبايلو الشايلو موديلو كم؟
أنتهت مجموعات النساء من تناول طعام الغداء الفندقى (الما خمج) ثم جئن لهن بالتحلية (باسطة وبسبوسة وكنافة وعين جمل وأم على) شئ باللوز وشئ بالجوز وشئ يالما بعرفو شنو داااك وبعد أن (ضربن) بدأن فى زحزحة الكراسى (البامبو) والجلوس كيمان كيمان (للشمارات) وهن يمسكن بثرامس الشاى (المذهبة) المتشابهه (الكبيرة حقت الشاى والصغيره للجبنة) التى تفوح من (فناجينها) رائحة (المستكا) .
وفجأة دخلت إلى الصالون شابه (آخر شياكة) ذات مظهر يطابق كثيرا مظهر مغنيات هذا الزمان يمشى خلفها ستة (شابات آخريات) من نفس الشاكلة يرتدين زياً موحداً وهن يرفعن أياديهن عاليا فى حركات متتابعه ويصحن بصوت كالجرس يشق عنان السماء :
ووووب ووووب ووووووووووووووووووووووووووووووووووووووووووووووووووب ...
ثم تبدأ (حنان سكليب) فى السكلى و(الوصف) وهن يرددن خلفها :
- ووووب عليا والله ليا يا حسن يوروو يا البتدى البتدورو والما بتدورو
ووووب عليا والله يا صغير وجاهل يا البتجيب القروش بالساهل
يا ود امي.. هيء يء يء يء ..
الكورس : وووب ... وووب ...ووووووووب
الليله يا حليلك يا زين الرجال ياملك الدولار يا البتستر الحال
الليله يا حليلك يا البتشيل من البنوك وتشتت قبال ما يلحقوك
يا ود امي.. هيء يء يء يء ..
الكورس : وووب ... وووب ...ووووووووب
الليلة وينك إنتا يا الإسبليت هبوبك والهمر ركوبك
الليله وينك إنتا يا البنيت المقصورة وركبت النافورة
الليله وينك إنتا يا أب جيوب منفخة وأب عربية مصفحة
يا ود امي.. هيء يء يء يء ..
الكورس : وووب ... وووب ...ووووووووب
يا حليلك الليله يا البتفك الصعيبة ويا البتسجل اللعيبة
يا حليلك الليله يا جوكى البنوك يا التهريبك بالسنبوك
يا ود امي.. هيء يء يء يء ..
الكورس : وووب ... وووب ...ووووووووب
ثم تعدل (حنان سكليب) توبا الشفون (الترانسبيرنت) الكان واقع وتنظر للكورس خلفها نظرة الفنان الذى يود أن (يختم) الأغنية فيبدأن فى (تحرير) البكاء ويرفعن أصواتهن ويضربن بأياديهن ليبدين زينتهن (دهب دبى وكده) ...ووووووووووووب وب وب وب ووووووووب ثم يتوقفن فى لحظة واحده بإشارة من (حنان سكليب) ! التى تجلس على أقرب كرسى وتتناول علبة مناديل الورق وتخرج منديلين تمسح بهما جبات العرق التى تساقطت بفعل المجهود رغم برودة التكييف ثم تلتفت إلى النسوة اللواتى كن فى الصالون يتابعون (فاصل السكليب) قائلة :
- قبلكن وحدكن ..جنس بخلن عليكن .. أول مرة أمشى ليا (بيت بكا) ما ينقطوا ليا فيهو !!
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
موجز أخبار السودان عام 2050
السودان يلوح بفرض عقوبات على بريطانيا، إن لم تتخذ الاخيرة إجراءت جادة في شأن النزاع القائم في غرب أوربا
الخرطوم ترسل تعزيزات أمنية لمنطقة شمال المسسبي والناقلة الحربية (اللعوتة) تصل المياه الاقليمية في البحر المتوسط لوقف حمام الدم بإيطاليا.
انهيار لناطحة سحاب بشرقي مدينة (حجرالطير) تؤدي بحياة المئات
فوز فريق هلال الحصاحيصا بأرضه على فريق برشلونة الإسباني 7/صفر
إكتشاف طبي جديد علاج مرض الايدز فى منطقة (نشارة الدوم)
سقوط القمر التجسسي السوداني في البحر الكاريبي ، والخرطوم تنفي امتلاكها له
مجلس بلـدى (الـشقلــة عوج الدرب) يمنـع إستيــراد أى ثلاجـة أو بوتوجـاز ليس لهـا أي بى أدرس، ولا يمكن توصيلهـا بالإنتـرنت
السودان يعلن عن إيقاف إصدار تأشيرات عمل جديدة للسعودين ضمن اطار جهود السودنة والاكتفاء الذاتي ، الجدير بالذكر ان العمالة السعودية بالسودان تشكل الاغلبية الساحقة وتلقى معاملة سيئة للغاية
رئيسة جمهورية السودان السيدة أم هاني بنت الخدر تجري مباحثات مع نظيرتها المصرية نانسي جمال مبارك حضر اللقاء من الجانب السوداني رئيسة الوزراء والسيدات : وزيرة الخارجية, وزيرة الاقتصاد, وزيرة الاعلام, وزيرة الصناعة والتعدين, وزيرة التكنولوجيا المعلوماتية واعتذر عن الحضور السيد وزير الشئون الاجتماعية لظروف طارئة
بطلة السباحة السودانية (اماني محمد عثمان) تحرز 10 ميداليات ذهبيات في اولمبياد مدغشقر
السودان يحث دول الخليج على الوفاء بسداد ما عليها من ديون مستحقة له
فوز الفلم السودانى (السخلة الزرقاء) فى مهرجان كان السينمائى
افتتاح مترو الانفاق الجديد بين الخرطوم وكاب الجداد وكوع الباعوضة وودمدنى
خفر السواحل السوداني يحتجز سفينة محملة بمهاجرين ألمان، وسلطات الهجرة ترفض ادخال المهاجرين و تقدم لهم العلاج في عرض البحر عبر حاملات الطائرات السودانية لانها لم تتأكد من هويتهم.
الولايات المتحدة الامريكية تطلب من رئيسة جمهورية السودان ارسال معونة عاجلة لمجابهة الخسائر التي حدثت أثناء إعصار كاترينا والرئيسة رفضت وعلى حد قولها صرحت وقالت : والله نحن فترنا
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
ابليس وقصتو مع السودان
ابليس عزم يهج ويهرب من السودان عشان شنو شوف السبب ؟
ابليــــس يصـــف الوضـــع والحالـــة في البلاد
كان إبليس في غرفته , يلملم ملابسه في حقيبة إلى جانب باقي متعلّقاته ..
على المنضدة القريبة و كانت استقالته موقّعة ومختومة حسب الأصول , وبجوارها تقبع تذكرة سفر إلى جزر برمودا الديمقراطية ..
كانت ملامح وجهه في تلك اللحظات تنطق بالحزن, والكآبة , والإحباط , واليأس , وقلّة الحيلة ...
مع دهشة مزمنة ارتسمت عليه منذ فترة ليست بالقريبة, واعترافٍ بالعجز والفشل
إبليس راحلٌ عن بلادنا إلى غير رجعة...
الراجل : وين يامسهّل ؟؟ بتلم فى هدومك مالك !!
ابليس : يا راجل أقعد عندكم أسوى شنو
وقرّبت أموت من الجوع ..
ما حا أخلى فيكم لا وسواس ولا خنّاس !
كنت بوسوس للواحد ينسى يسمّي بالله قبل ما ياكل,
اسي الواحد ما لاقى شئ يأكله ! يا راجل ..
إذا أنا إبليس ... إتهريت من الفول .. أصبح عندى تلبك معوي مزمن !!
كنت بوسوس للشاب إنو يقول ليه كلمة للبت وهي ماشية في لشارع,
بقوا البنات يقولوا كلام أنا اخجل أقوله !!
واحد يسرق مليار عيني عينك .. يسجنو 3 سنين في فيلا على النيل
وإتنين يفتشوا رزقهم في الكوشة يمسكم البوليس !!
إنتو عايزين إبليس إنتو ؟؟؟؟
بقى عندكم فائض فساد يكفّي 30 سنة قدّام ,
بقيت أخاف على نفسي منكم يا راجل !!
بقيت مرّات أوسوس بالمقلوب .. أقول للمسؤول إرحم
وللحرامي كفاية سرقة .. خلّي شويّ للحراميّة اللي جايين بعدك ..
يعني إذا إنتو براكم ما شاء الله بتعملوا
البلاوى دى كلها ,
أنا إبليس أسوي شنو ؟ اشتغل شنو يعني ؟
أسوق ركشة ؟؟؟؟
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
وقفت حاجة السره.... جنب ولدها عبد العاطي....في يوم عرفة..شمش شديدة.... وسموم.... ترددت حاجه السره كم مرة في ان تسال سوعال خايفة يبوظ عليها حجتها.....في النهاية اتوكلت علي الله وقبلت علي عبد العاطي ( عبد العاطي كدي اديني اضانك).... دنقر عبد العاطي فوق امو وقالت ليهو( بدور اسعلك سوعال علا خايفة السوعال دا يخرب علي حجتي)... طمانها عبد العاطي وقال ليها في الحج يا... ... ... يمه تسالي اي حاجة.... قالت ل...يهو برااااحة( يا عبد العاطي يا ولدي... عرفة دي ما لقو حتة يدفنوها فيها علا الصقيعة دي؟....)...اتبهط عبد العاطي وما عرف يبكي واللا يضحك... قال لها( يا يمه.... مافي زول مدفون هنا... عرفة دا اسم الجبل دا.... ودا الجبل الاتعرف فيهو ابونا ادم علي امنا حواء...بعد ما نزلو من الجنة .... ) قبلت عليهو وقالت ليهو( اها...وقع لي النضم.... هم اكنهم امنا حواء وابونا ادم كل واحد نزل براهو**...؟...مالهم ما تقاودو ونزلو سوا؟)....قال لها(حكمة ربنا يا يمه.... كل واحد ينزل براهو.... عشان يتعبو ويفتشو لي بعض وكل زول فيهم يعرف قيمة التاني).....قالت ليهو( اللقى رفيقو منو باللوال...حواء واللا ادم؟).....قال لها( ادم لقى حواء...) ضحكت وقالت ليهو( صح...اصلهم الرجال قاعدين يكوسو للنسوان.... علا المسنوحة مرتك رباب.... جرت وراك لمن كرعيها حفن من الجري... عشان تعرسك)... اتلفت عليها وقال ليها( يمه...استغفري ربك انتي في الحج..... خليها رباب حسي).... احست بالخجل شوية وقعدت تطنطن( استغفر الله من حقك يا رباب يا بت زينب...لي عند الحج لاحقاني ودايرة تخربيهو علي؟).....حاجة السره مكجنة رباب مرة عبد العاطي ولدها... وشاماها شمة صح....اتذكرت يومهم المسافرين ورباب نادت عبد العاطي بعيد ونضمت معاهو ....وحاجه السره دايرة تعرف رباب قالت ليهو شنو...( ات يا عبد العاطي يومنا الفي الميطار .رباب دي كانت بتقول لك في شنو؟)...تضايق عبد العاطي واستغفر ربو وقال لها( يمه ..ما قلت لك انتي في الحج ... استغفري الله وخليكي معاهو)... استغفرت السره ربها وقبلت عليهو( خلاس...علا خسمتك بالرسول بعد الحج تحدسني رباب دي قالت لك شنو؟)....ثم برهة سكوت.... وسؤال من السره( علا يا عبد العاطي.... ناس ابونا ادم ديل...المرقهم من الجنة شنو؟؟...)....يرد عبد العاطي(.... اصلو يا يمه..قالو ربنا قال ليهم اكلو من شُدر الجنة دي زي ما دايرين علا الشدرة دي وحدد لهم شدرة معينة ربنا قال ليهم ما تاكلو من الشدرة دي... اها امنا حواء نبحت ادم لحدي ما اكلو منها ربنا زعل عليهم ومرقهم من الجنة).... سرحت السره شوية ورجعت(.أكنها امنا حواء حرشت ادم علي الاكل من الشدرة؟....شفتّ مضرة المرا دي وقوة راسا؟.. اها شفتّ؟... اصلو . البيباري النسوان بيمرق من الجنة وسقطا.....عشان انت تاني تسمع لي نضم رباب
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
مسطول بيغني في بص سياحي
لو امي حلوه وابوي حلو بطلع عسل.. ترن ترن *_^
لو امي لبوه وابوي اسد بطلع شبل.. ترن ترن *_^
لو امي فرسه وابوي حصان
بطلع مهر .. ترن ترن *_^
.
.
بتاع البص زهج منو زهج شديد
قال ليو : لو امك بت ###### وابوك حمار
بتطلع شنو؟؟؟
.
المسطول :
بطلع ( سواق بص ) ..ترن ترن
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
- قصة عزوز
( عذوذ الصغير )
- قصة واقعيه
وحقيقيه ( 100% )
كان في ولد صغير أسمه عزوز
وكــان له أخوين أحــدها أسـمه
موسـى والآخــر أسـمه إبراهيم
وكلهم يحبونه أبوه وأمه وأخوانه
بس كان في شي مضايق عزوز
اللي هو أنه أبوه كان يأخذ معه
إخوانه موسى وإبراهيم للمسجد
وما ياخذه معهم بحكم أنه صغير
المهم كان دايم يبكي ويشتكي
لأمه يقولها: بابا ما يحب عذوذ
بث يودي إبراهيم وموثى المثدد
وعذوذ مايلوح معهم للمثدد.
بعد فتره حــن قلب هــالأبـو على
عزوز وقرر يأخذه معاه للمسجد
ففرح عزوز وانبسط لأنه أخيراً
بيتحقق حلمه الذي كان يتمناه
وراح وكشخ ولبس أحسن لبس
عنده وراح مـــع أبـوه وأخــوانه
للمسجد ولما وصلو قرر الأب أنه
يوقف عزوز جمبه بالصف الأول
عشان مايتحرك يسوي فوضى
وخلى إبراهيم وموسى يوقفون
في الصف الثاني
المهم كانوا خلف الأمام ولما بدأ
يصلي بالناس وبعد سورة
الفاتحه قرأ سورة الأعلى
ولما وصل لآخر السوره وقال :
( إن هذا لفي الصحف الأولى
صــحف إبراهيم وموســـى )
وفجـأة إلا وهــم يسمعون
صوت صاحبنا وهو يقول :
.......و عذوووووووووووذ .......
^ ما أجمل برأة الأطفال ........
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
إرفع .. ارفع
إنت حاكمنا المدلّع ..
ما يهمك لو حريق السعر في أكبادنا ولّع ..
ارفع .. ارفع
يمكن البتسوي ينفع ..
أو يحرك ذرة فينا من المشاعر ..
أو يخلي الشعب يطلع ، ،
أو يؤذن في المقابر ..
أو يحرك شعرة في الممكون وصابر ، ،
إرفع .. ارفع
لما " ميتين زيتنا يطلع "
لما تاني نخيّط اللّبس المرقّع
لما عين الشعب .. دم .. تنزف وتدمع
لما تهدم فوقنا جدران بيتنا والباب المخلع
نحنا في عهدك شحدنا فتافت الفول والمشمّع
نحنا في عهدك شربنا الذل ..
لما ابليسنا كرّع ..
ارفع .. ارفع
يمكن المكتولة تسمع
انت حبك في قلوب الشعب .. اتحكّر .. تربع !!
نحنا نتسوّل حا ندفع ..
نحنا نتبهدل .. حندفع
نحنا نتوسل .. بندفع
لوصرخنا .. وقلنا وين يا رب نقبّل ؟
برضو ندفع
لو صبرنا وقلنا باكر ..
قلتو هسع ..
نحنا لسه أولادنا شُفّع
نحنا لسه ورانا رُضّع ..
ونحنا ندفع وانت ياريّس تمتّع ..
.......
ونحنا يوم الحظ تقسّم ..
ونحنا يوم الحق توزع ..
كنت إنت نصيبنا من دون الخلايق ..
جيتنا ولّعت البلد شرقا وغربا .. بالحرايق ..
جيتنا حوّلت البلد .. منكوب وضايق ..
جيتنا يا سجم الرماد .. ممحوق وحايق !!
كل زول ياخد مصيبتو
قسم الأرزاق ... ووزّع ..
أنت تأمر ونحنا ندفع ..
نحنا نطرح .. نحنا نطرح ..
نحنا نطرح ..
وانت تجمع ..
حتى من جيب المقطّع ..
.......
ارفع ارفع .. وخلّنا نسميك رافع
للضرايب
لي عدد ، عدد المصايب
في بلد أصبح موزّع ..
فيهو رمز الشر " نافع "
يا بلد منهوكة لامن صوتا رايح ..
ينخفض صوت الحقيقة
ويرتفع صوت المدايح ..
وفيها ترتفع الأراضي
وفيها ترتفع المقاضي
ويرتفع صوت المدافع !!..
ونحنا حا نكورك .. نكورك
يمكن المكتولة تسمع ..
ارفع .. ارفع
.........................
| |
|
|
|
|
|
|
|
|
|
Re: ***** كـوكـتـيـل مـن الـواتـس آب ***** (Re: ABUHUSSEIN)
|
مسطول داير يغير إسمو مشى السجل المدني ..
قال للموظف داير أغير إسمي ..
الموظف قال لي والله ديصعبه بس انت إسمك
منو ؟
المسطول قالي خالد الحـمار
الموظف قال لي لا نديك أذن طوالي
أمشي المدير
. صحبك مشى للمدير .
ادي المدير الورقه عاين لي كدا
قال لي خالد الحمار طوالي نغيرو ليك عايز تغيرو
بشنو؟
المسطول قال ليهو داير أغيرو بي
مازن الحـمار
| |
|
|
|
|
|
|
| |
ABUHUSSEIN
مهدي صلاح
طلحة عبدالله
محمد البشرى الخضر
سامى عبد المطلب
حمد عبد الغفار عمر
HAIDER ALZAIN
MOHAMMED ELSHEIKH
فيس بوك
تويتر
انستقرام
يوتيوب
بنتيريست