تفويت الزمن واللحاق به وهذا الاداء غير مريح للمستمع العادي خاصه في حالة الاكثار منه
رغم جمال صوته لكن لو استمرأ او استمر علي هذه الطريقة سيكون اداءه نمطيا لا يستطيع الفكاك منه
طارق ميرغني ( ابو الفن ) انا بشزف طال ما مصطفى السني حاول يقلد صوت ابوداؤود مفروض ما كان يكتر من الاستاكتو زي مابتقول او كما يقولون اهل الفن ( الفلوستوب ) وهو الوقف اثناء الغناء ومواصلته مره اخرى اها على قول ممكن يدخل مصطفى السني في مطبات كثيره خلال الايام الماضية سمعنا لمصطفى السني كثيرا ويقترب من الفنان المخضرم عباس تلودي كثيرا في طريقة الغناء طبعا ياطارق عباس تلودي صديق شخصي لصاحبك ود موسى لذلك استمعنا له كثيرا ايام زماااان وبطريقته الممتعه في العناء مصطفى السني نتمنى ان يواصل في امتاعنا لانه الملاذ الوحيد الان في هذا البرنامج ...
07-11-2013, 00:25 AM
الليندي الليندي
تاريخ التسجيل: 05-27-2002
مجموع المشاركات: 1188
خالص الشكر لكل المشاركين باثرائهم للبوست وشكر خاص لسيد احمد الشامي وموقع مكتبة الأغنية السودانية لادراج الحلقة كاملة وشكر خالص ايضاً للفنان ابراهيم عبدالعظيم لادراجه بعض اغنيات البرامج وترحيب حار بعودة شاعرتنا عبير خيري
07-11-2013, 00:56 AM
الليندي الليندي
تاريخ التسجيل: 05-27-2002
مجموع المشاركات: 1188
االحلقة عبار عن ( سمك - لبن - تمر هندي ) توقعنا في بداية الحلقة أن يتحدث عمنا السر قدور عن احد الذين شاركوا في نسخة من نسخ البرنامح ورحل عن دنيانا وهو الفنان ( محود عبدالعزيز ) كوفاء للراحل حتى ولو كانت هناك حلقة ستقدم عنه كان الاجدر أن تكون حلقة اليوم اوكاضعف الايمان يذكر رحيل الفنان محمود عبدالعزيز ويترحم عليها مثل ما فعل عندما ذكر الملك ( عثمان حسين ) . - تحدث في البداية عن اول عمل مسرحي له تم تقديمه عبر الاذاعة وتحدث عن تقديم الراحل ( يس معني ) لعبدالحليم حافظ بأغنية ( علي قد الشوق ) في البرنامج الذى تم تقديمه قبل تقديم مسرحيته وربط بين شاعر أغنية ( قد الشوق ) الشاعر الاسكندراني ( محمد علي احمد ) وذكر أن عبدالعزيز داوؤد تغنى لمحمد علي احمد بأغنية ( انت معي ) وهي واحدة من اجمل الأغنيات ( نصاً ولحناً واداء ) وحقيقي توقعت أن يحدثنا عمن عن قصة الأغنية وهي أن الراحلين برعي محمد دفع الله وابوداؤود وهما يتمشيان في شوارع القاهرة وججدوا جريده ملقاة على الطريق فاخذاها ووجودوا نص الأغنية فاعجبهم وتم تلحينه وغناؤه وتوقعت أن يتغنى أحد المشاركين بأغنية ( أنت معي ) - حلقة اليوم عبارة عن مختارات من الاغاني رغم محاولة التغير بوضع نماذج لاغاني وصور لفنانين راحلين والحديث عن هذه الاغنيات لكن لم افهم هل الاغنيات هي الأغنيات التى قدمت الفنانين للمستمع كاول انتاج لهم ام هي الاغنيات التى شكلت علامات فارقة في مسيرتهم الغنائية وحنجي بالتفصيل لكل أغنية . - لم يتغير المحتوى ( من كل بستان زهرة ) حسب مزاج عمنا قدور لذا لاتشعر بوحدة موضوعية للحلقة واتوقع أن تستمر بقية الحلقات على هذه المنوال .
07-11-2013, 01:27 AM
الليندي الليندي
تاريخ التسجيل: 05-27-2002
مجموع المشاركات: 1188
الأغنية الاولي ( الحب والورود ) ( لاسماعيل حسن وخليل احمد ووردي ) والادتها ( زحل ادم ) هي وأغني ( اليليلة يا سمراء ) لنفس الثلاثي هما الاغنيتان اللتان ظهر بهما وردي في عام ( 1957 ) وتمت اذاعتهما قبل إذاعة نتائج المرحلة الثانوية بعشرة دقائق وكان هناك ترقب لسماع النتائج مما اتاح لجزء كبير من المستمعين لللاستماع لصوت وردي لاول مرة ودي نقطة مهمة ، والملاحظ أن أغنية ( الحب والورود ) من الأغنيات السهلة والتى رددت كثيراً باصوات أخرين وكان يمكن أن يتم أختيار الأغنية السابعة التى رفعت وردي من الدرجة الثالثة للدرجة الاولى مباشرة ( قصة حب ) ( للشاعر عازف الكمان علي ميرغني ومن الحان وردي ) والاغنية دي بعد أن تغنى بها وهو لم يخرج من الاذاعة وجد في انتظاره وزير المواصلات ( خضر حمد ) بعد أن استمع للأغنية في منزله فادار عربته واتى ليقابل وردي ويقول له ( انت فنان المستقبل للبلد دي حافظ علي نفسك ) حبي حبك شاغلني مخلص ووافي مخاصمني مع ملاحظة أنو اغنية ( قصة حب ) من الأغنيات المندثرة نوعاً ما أو كان ممكن أن يتم تقديم أغنية ( الوصية ) ( اسماعيل حسن وبرعي محمد دفع الله ) التى احدثت انقلابا في النص الغنائي في تلك الفترة ، عموماً أداء ( زحل ادم ) ما بطال لكن الأغنية ذات لحن ونص سهل وصوت زحل في شيء من اسرا ر بابكر .
Quote: االحلقة عبار عن ( سمك - لبن - تمر هندي ) توقعنا في بداية الحلقة أن يتحدث عمنا السر قدور عن احد الذين شاركوا في نسخة من نسخ البرنامح ورحل عن دنيانا وهو الفنان ( محود عبدالعزيز ) كوفاء للراحل حتى ولو كانت هناك حلقة ستقدم عنه كان الاجدر أن تكون حلقة اليوم اوكاضعف الايمان يذكر رحيل الفنان محمود عبدالعزيز ويترحم عليها مثل ما فعل عندما ذكر الملك ( عثمان حسين ) . - تحدث في البداية عن اول عمل مسرحي له تم تقديمه عبر الاذاعة وتحدث عن تقديم الراحل ( يس معني ) لعبدالحليم حافظ بأغنية ( علي قد الشوق ) في البرنامج الذى تم تقديمه قبل تقديم مسرحيته وربط بين شاعر أغنية ( قد الشوق ) الشاعر الاسكندراني ( محمد علي احمد ) وذكر أن عبدالعزيز داوؤد تغنى لمحمد علي احمد بأغنية ( انت معي ) وهي واحدة من اجمل الأغنيات ( نصاً ولحناً واداء ) وحقيقي توقعت أن يحدثنا عمن عن قصة الأغنية وهي أن الراحلين برعي محمد دفع الله وابوداؤود وهما يتمشيان في شوارع القاهرة وججدوا جريده ملقاة على الطريق فاخذاها ووجودوا نص الأغنية فاعجبهم وتم تلحينه وغناؤه وتوقعت أن يتغنى أحد المشاركين بأغنية ( أنت معي ) - حلقة اليوم عبارة عن مختارات من الاغاني رغم محاولة التغير بوضع نماذج لاغاني وصور لفنانين راحلين والحديث عن هذه الاغنيات لكن لم افهم هل الاغنيات هي الأغنيات التى قدمت الفنانين للمستمع كاول انتاج لهم ام هي الاغنيات التى شكلت علامات فارقة في مسيرتهم الغنائية وحنجي بالتفصيل لكل أغنية . - لم يتغير المحتوى ( من كل بستان زهرة ) حسب مزاج عمنا قدور لذا لاتشعر بوحدة موضوعية للحلقة واتوقع أن تستمر بقية الحلقات على هذه المنوال .
الأخ الكريم/ الليندي,
رمضان كريم وتصوم وتفطر على خير ... وتشكرات كتيييييرة كده على فتح بوست أغاني وأغاني 2013 وكلنا وراط بالمتابعة والمشاركات والآراء.... أذكر أنه آخر مرة شاركت فيها في سودانيز أونلاين كانت السنة الماضية في بوست أغاني وأغاني أيضا... (الظاهر تسجيل دخولي بقى زي ترخيص العربية كل سنة بس :)
تحياتي مرة أخرى وسلامي لجميع ضيوف خصوصا صديقي الجميل نابري... والباشا الكبير جدا والبحب دائما أتكلم معاهو في الأمور الفنية _خصوصا لمن تكون ليها علاقة بطه سليمان) صديقي عمر الفاروق.... ومنتظرين طارق جبريل يا ناس..
الحلقة الأولى في نظري كانت...... ييييعني...
لم يعجبني أداء فرفور في هذه الحلقة.. ما عارفو مالو... وكمان فرق نوتة في بعض الحتات...
فاطمة أنا لسة بتوقع منها أكتر وأكتر حسب الصخب الإعلامي الحواليها.... وفي رأيي لو كان نزلت السلم نص درجة كده في من أجل حبي كان حتقدر تغني وهي مرتاحة أكتر... (وجهة نظر بس). مصطفى السني... وكما قال الجميع... هو كرت السر قدور الرابح لهذه السنة.. ومشاركته إضافة حقيقية... والبعد الآخر من مشاركته كما أري أنه الفنان الوحيد (لو طلعنا فرفور) البيجمع كل الأجيال من المشاهدين باللونية الغنائية... وقد تغنى بـأغنية أبو داؤود.. أجمل من أبو داؤود نفسه (كما قال لي أحدهم)... نسرين... أتوقع منها المزيد...
طه... أنت فناني.... وفنانهم... وستظل...حأجي أتكلم عند بكللللللل إسترسال... لكن الكلام ده ما هسة..... الكلام ده لمن رمضان يدخل العضم... وصوتك يبقى مزاجنا... وهمبريب كيفنا...
تحاتي للجميع..
07-11-2013, 00:19 AM
علاء سيداحمد علاء سيداحمد
تاريخ التسجيل: 03-28-2013
مجموع المشاركات: 17162
الأغنية الثانية ( انفاس الزهر ) ( عبدالرحمن الريح وابراهيم ) سبق أن قدمت في النسخة السابعه ( 2011 ) من البرنامج وهي من الأغنيات التى لم يظهر بها ابراهيم عوض فابراهيم ظهر بثلاثة أغنيات في عام ( 1951 ) من كلمات والحان ( عبدالرحمن الريح ( هيجتني الذكري ـ أسرار العيون ـ علمتني الحب ) وانفاس الزهر من الأغنيات الجميلة لكنها لم تشكل علامة فارقة مثلما شكلت أغنية ( الطاهر ابراهيم ) ( حبيبي جنني ) فهي أول أغنية أدخلت فيها آلة الجيتار ( الفاتح الطاهر ) والايقاع الثلاثي ( خميس جوهر ) وكالعادة لم يخذلني ( جمال فرفور ) صريخ شديد ومحاولة استلاق صوت ابرهيم عوض ولم يشكل اي اضافة ولم يقدم الأغنية كما تغنت يعني بشتنة شديدة ياوليد عبداللطيف.
.
07-11-2013, 01:57 AM
الليندي الليندي
تاريخ التسجيل: 05-27-2002
مجموع المشاركات: 1188
لأغنية الثالثة ( من اجل حبي ) ( بازرعة والملك عثمان حسين ) ايضاً ليست الأغنية التى قدمت ( عثمان حسين ) للمستمعين فعثمان ظهر في عام ( 1944 ) باغنية ( محمد بشير عتيق ) ( حارم وصلي مالك ) وهناك الكثير من الأغنيات التى شكلت علامات فارقة في مسيرة الراحل ( عثمان حسين حسين ) ولكن تبقى أغنية الشاعر ( قرشي محمد حسن ) ( الفراش الحائر ) كواحدة من الأغنيات التى شكلت علامة فارقة في مسيرة الغناء السوداني فالفراش من الاغنيات التى احدثت تحول موسيقي في خارطة الغناء السوداني فحررت الالآت من اقتفاء اثر اللحن واتاحات لبيكلو ( موسى محمد ابرهيم ) وكمنجة ( علاءالدين حمزة ) الظهور كصولو في مقدمة الاغنية وفي وسطها ، عموما أغنية ( من اجل حبي ) من الأغنيات الكبيرة وادتها ( فاطمة عمر ) باحساس عاي مع بعض المط الشديد لبعض الكلمات خصوصا كلمة ( هويت ) انا اصلو بعدك ما هويت . ا
07-11-2013, 02:18 AM
الليندي الليندي
تاريخ التسجيل: 05-27-2002
مجموع المشاركات: 1188
الأغنية الرابع ( اقتتان ) ( عبدالرحمن الريح ورمضان حسن ) طبعاً اتقدم الكوبلي الاول فقط وده واحده من الحاجات البايخة جداً البفرضا عمنا قدور والبتوري أنو البرنامج فيهو هرجلة شديدة فيا تقدم الأغنية كاملة كاملة أو لاتقدم وأغنية افتتان وظهور رمضان حسن في الاذاعة كان بسبب الاضراب القادوا الفنان ( ابراهيم الكاشف ) بتحريض من ( جورج مشرقى ) الذى سأل (الكاشف ) إنتوا لمن بتغنوا فى الإذاعة بدوكم كم فاجـابه الكاشف ( 50قرش ) فقال ليه طيب ماتغنوا فى الحفلات أحسن ، منها قاد الكاشف الاضراب الثاني في مسيرة الأغنية والجميل أنو الاضراب الأول القادوا ( عبدالغفار الماحي ومعه مجموعة من الطنابرة ) في عام ( 1920 )أدي لظهور أغنية الحقيبة وانهى عهد الطمبرة وكذلك ساهم الاضراب الثاني الذى قاده الكاشف ( 1950 ) مطالباً برفع أجر الفنان وتبنته رابطة الفنانين السودانيين وطالبت بتعديل أجور الحفلات وأجر تسجيل الأسطوانات وقد نشبت معركة بين الرابطة وبين مدير الإذاعة في ذلك الحين متولي عيد وصلت قمتها بإضراب الفنانين وأعلان أعضاء الرابطة جميعاً عدم الغناء في حفلات الإذاعة التي تقدم على الهواء مباشرة ، وقد رد متولي عيد على هذا الموقف بأن أوقف اسطوانات المطربين ومنع إذاعتها وفي نفس الوقت فتح الباب لعشرات الأصوات الجديدة لتملأ الفراغ الناجم عن الإضراب وكلف الشاعر والملحن ( عبدالرحمن الريح ) بتقديم أغنيات للأصوات الجديدة وكان نتاج ذلك ظهور ثلاثة فنانين وثلاث أغنيات كبيرة كبيرة فظهر الراحل ( رمضان حسن ) بأغنية ( افتتان ) من كلمات واحان ( عبدالرحمن الريح ) وظهر ابرهيم ادريس ودالمقرن بأغنية ( اسحار الجمال ( انافي شخصك بحترم اشخاص ) ) من كلمات والحان ( عبدالرحمن الريح ) وظهر محجوب عثمان بأغنية ( القلب المأسور ( مالو قلبي الاسروهو ) ) من كلمات ( علي محمود التنقاري ) والحان ( عبدالرحمن الريح ) ، عموما أدت ( نسرين هندي ) جزء من ( افتتان ) لم يتيح لنا الحكم علي ادائها .
07-11-2013, 02:39 AM
الليندي الليندي
تاريخ التسجيل: 05-27-2002
مجموع المشاركات: 1188
الأغنية الخامسة والاخيرة ( زرعوك في قلبي ) ( الامي وبرعي وابوداوؤد ) هي اول أغنية قدمت ابوداوؤد للمستمعين في عام ( 1948 ) تقريباً وهي أولى الأغنيات التى تقدم لشاعر الحقيبة ( محمد علي عبدالله ) الشهير بالامي عن طريق الآلات الحديثة فالامى قدم له الحاج ( محمد احمد سرور ) أول أغنياته ( استحيل عن حبك اميل ) عام ( 1928 م ) وتبعتها ( هواك وهواي بي جاروا - مابخاف من شيء برضو صابر - اسمعني نشيدك - عيون الصيد - أنت حكمة وغيرها ) وواصل الامي مع الآلات الحديثة مع حسن عطية ( سالتو عن فؤادي ) وتغنى له الفنان الشعبي ( محمود علي الحاج ) ( منتهى الآمال ) جبينك ولابدر كمال ده ايه يا منتهى الآمال ) ، الأغنية اداها مصطفى السني بطريقته المعهوده وسبق أن اداها كثيراً ويبدو أنو الأغنية فصلت له في هذه الحلقة ولم يخب ظننا فكانت اجمل اغنيات البرامج اداء فقط هناك بعض الكلمات في الأغنية لاتستطع أن تميزها ولا أدري هل هي طريقة يتبعها السنى كما اشار استاذنا طارق ميرغني ام أن الموسيقى ما ظابطة ولا المايك ما متحكم فيهو السني المهم في حاجة صغيرة كده بتخليك تحس انو في كلمات ما واضحة .
07-11-2013, 03:32 AM
Ehab Eltayeb Ehab Eltayeb
تاريخ التسجيل: 11-25-2003
مجموع المشاركات: 2850
علي بالطلاق دي فنيات ومهارات برازيلية عديل في السرد يا الليندي
معلومات وسلاسة وروعة ياخي .. مستوى مقالات تنشر او تجمع في كتاب بعد انتهاء البوست اذا واصلت بهذا الالق .. الف شكر
عدم البداية بذكر شيء عن الراحل محمود مشكلة مخرج ومعد برمامج ومنتج , ماممكن ياخي , عندك تاريخ احترمه !! ..
الاستديو يبدو ذات الاستديو , والديكور هزيل جدا ورفع ضغطي .. معقولة التقليدية دي .. قد يكون عدد المشاركين الضخم فرض هذا النوع من الكراسي وهي الاسوء مقارنة مع شكل السنوات الماضية ..
الحلقة عن البدايات , جميل دخلة فيديو مصور عن ما سيقدم اضافة نوعية جيدة وتنويع للخروج من الاستديو وجوهه فقط , كنا طالبنا بشيء من هذا من قبل , ويمكن اضافة تتر او تخصيص جزء من الشاشة لبث معلومات عن الاغنية و تاريخها وملحنيها اضافة على اضافة ..
التغني بمقطع من اغنية يا ليندي كما فعلت نسرين مفهوم !, اغاني اغاني يا ليندي ما اغنية اغنية ياخي :) افهم تعطشك للاغنية كاملة لمزيد من التشبع , والتوثيق والحكم ..
اعتقد في الاستديو مشكلة صوت فنية وكبيرة !, الالات عالية وتخفي اصوات الفنانين , وتكفي المقارنة بين تسجيلات الاذاعة في اول الحلقة التي تاتيك صافية واصوات قوية وواضحة وبين اغاني الحلقة ذاتها .. الفنان صباحي خطف طرفة هجمة مرتدة اخر الحلقة لمن علق الاستاذ قدور ان هذا غناء جديد رغم ان عمره 65 عام و صباحي قال عمر مصطفى ( يقصد مصطفى السني ) فجائت سخرية السر الشهيرة عمر الغنا ياصباحي خليك معانا والضحكة المن القلب .. وبسمة في الاستديو وعبر الاثير .. حميمية الجو رغم اسلوب البرنامج اسلوب عامود القدير قدور الشهير اساتذة وتلاميذ ! .. وذاك علم اخر ويا سلام
صباحي سيكون بصمة , وازياءه على طريقة الفنان كاريكا المصري اصلا مثيرة للجدل , وفنان باختلاف , وفي نظرة في عينية نحن عالم خبرة الجابنا مع المستجدين شنو !؟, شهرة اغاني اغاني وجمهورة يا صباحي ياخي ..
حلقة جدلية ومعكم هناك ياطير ياطاير , واضيف والفايل المصور عن مكنبة الاذاعة .. ولقطات من اصوات العمالقة ..
لقدام .. صيام
______________________________________________________ ليتهم يعلمون ان عمر اللحظـه في بعـدك يا خـرطـوم سنين طـوال د شهـاب الفاتح ـ كوالالمبـور
07-11-2013, 04:30 AM
شهاب الفاتح عثمان شهاب الفاتح عثمان
تاريخ التسجيل: 08-28-2006
مجموع المشاركات: 11937
اوسكار وملاحظة الرائع استاذ السر قدور عن عبدالعزيز ابو داؤود وجيل جديد من الغناء والمغنيين ( والانتقال من تلحين الشطرة و الجملة الي تلحين الكلمة ) ومثال منه بصوته الجش المحبب : زروعوك في قلبببببي يا من كاسني شجون ورووووك من دمي يا اللادن العرجون ... يالباسم تررر لا الهاااادي .. ( مبالغة )
رحم الله عبدالعزيز ابو داؤود والشاعر الامي والملحن برعي محمد دفع الله مبدعي الاغنية احلام الحب اعلاه وبعدها تغنى بها فنانا مصطفى السني ..
______________________________________________________ ليتهم يعلمون ان عمر اللحظـه في بعـدك يا خـرطـوم سنين طـوال د شهـاب الفاتح ـ كوالالمبـور
الليندي يا حبوب .. معليش ممكن أدلو بدلوي المشاتر ؟ في البدااااية كده عندي ملاحظة صغمبروتية عن فكرة تجديد الوجوه دي!! وأقييفوا معاي في كلمة وجوه جدييدة دي!!! فعلاً وللأسف بالرغم من إنو هو برنامج أغاني فكان من المفترض أن يكون المصطلح الصحيح أصوات جديدة إلا إنو البرنامج ما قدم أصوات جديدة قدم وجوه جديييدة .. لو جرّينا الشريط بتاع البرنامج ده ح نلاقي إنو معظم المشاركين بيتم إختيارهم بي نغمة صوتية مشابهة في حالة الإحلال والإبدال وبالتالي بتنعدم فكرة الصوت الجديد وتبقى قصة الوجه الجديد.. مثلاً البت فاطمة دي عبارة عن سميرة دنيا مع حبببة خلطة من عابدة الشيخ لكنها بتلعبنفس الدور والاداء الصوتي بتاع ريماز وبالتالي بتشعر إنو صوت ريماز حاضر بس بي وجه جديد.. ولد حياة طلسم من البرومو تشعر إنو نسخة مكررة من صوت ولد أحمد الطيب أخو عماد داك.. البت اللي غنت يا طير يا طاير محاولة لي نسخة مكررة من منار صديق بإفتراض إنو صوتا فيهو شي من صوت مغنيات زمان ديلك.. معاذ البادية نسخة مكررة من تجربة شريف الفحيل مع خبرة أكتر.. عشان كده انا بقول معتز صباحي إضافة حقيقية لأنو فعلاً صوت غنائي جديد في البرنامج وليس وجه جديد..
07-11-2013, 09:33 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
أجي أديكم ملاحظاتي عن الحلقة .. في المجمل الحلقة إفتقرت لي فكرة الموضوع ..وده لأنو السر قدور فقد نكهة الحكي اللي قام عليها البرنامج أسااااساً في بدايته وعلى أساسها نال الشهرة .. السر قدور كمّل الحكاوي ذات الصلة..لكن لأنو السر قدور ذكي (دي تجميلة لي مستنكح بعد رمضان خش) وعااارف المستمع السوداني عندو حنين مع الماضي وكل حكاوي الماضي فحاول يلعب على الوتر ده خصوووصاً في محاولة ربط سيد خليفة بي عبد الحليم حافظ وإنو سيد خليفة هو من قدم عبد الحليم في قصة مكررة وباتت مملة إلا إنها بتعجبنا نحن كسودانيين في صراع الحضارات ده .. الملفت في الحلقة دي إنو ظهرت فوائد أن تقدم الشباب بدلاً عن الكوامر في طريقة تجويد الاغاني من خلال الحفظ المجمل للاغنية بغض النظر عن بعض الاخطاء في الكلمات ..ودي ميزة كانوا بيفتقدوها العاملين فيها بقو فنانين كبار الواحد فيهم بيجي ما حافظ الاغنية ويتمها من الورقة ..لكن ديل لأنو بيحاولوا يثبتو نفسهم فقاموا بي ترديد الأغنية من طقطق لي سلام عليكم بدون ما يتوقفوا ويلخبطوا.. وده بيأكد إنهم ذاكروا كويس.. الملفت والأهم الجانب النفسي للفنانين الجدد ديل..واااضح جداً إنو إشتغلوا فيهم نفسياً بي صورة كويسة وقعدوا معاهم وشحنوهم وملوهم كويييس عشان كده ما تهيبوا التجربة وكانت مسكة المايك عندهم تنم عن ثقة بالنفس .. البت فاطمة دي عندها ميزة طوولت ما شوفتها من زمن عافية حسن ..وهي التعبير الحركي مع الغنا ..تعبير ما مخل ولا شاذ ..تعبير حركي سغمبروووتي كدهلكن بيضفي روووح على الاغنية وبيكون مرييح عند المتلقي ..يعني عافية دي زمان عندها حركات كده بي عيونا ورقبتا ويدينا بتختها في حتت كده من الاغنية لمممن تحيييرك.. اها فاطمة دي عندها نفس الحاجات بتحرك رقبتا في لحظات وعيونا في لحظات وتحرك يدها فيلحظات فعلاً الاغنية بتكون محتاجة ليها ..لكن كصوت هي ما كعبة بس ما شاذة شديييد ..اللي ميزها إنها كانت بتخزل المستمع والمتلقي في كل طلعة بتعملا ..لأنو المتلقي كان بيحس في أي لحظة إنها ح تقطع وصوتا ح يخزلا بإفتراض إنها كانت بتغني في طبقات صوتية صعبة وسنيينة كده ..لكن هي كانت مجججرمة وفي كل مرة بتمشي للاحسن وباتالي ساقت المستمع سواااقة .. اضافة لي إنو نفعها حفظها للاغنية ..والأهم غنت أغنية ما تقليدية لي عثمان حسين من نوع لا وحبك ويا ربيع الدنيا اللي استهلكهم الفنانين .. عندي ملاحظة وملاحظة كبيييرة جداً عن اداء مصطفى السني اللي بحس إنو الناس كتبت عنو بي إحساس مصطفى السني الراسخ في الأذهان مش بتاع اغاني واغاني في اول تجربة .. لسة انا مصر إنو مصطفى السني عندو مشكلة ومشكلة كبيييرة جداً مع الفرقة الموسيقية وبيتعامل مع صوتو وكأنو بيتغنا بي العود..عشان كده صوتو بيكون واااطي جداً مقارنة بي صخب الموسيقى ..وعليه عندو واحد من حلين يا إما يرفع صوتو يا كامن يكلموا الفرقة الموسيقية تخفض صوتا (بعد إيييه).. بس الممتع في السني إنو حضورو جميييل وتحس بيهو وش مريييح بيتحب بي صورة عفوية كده لأنو زول راقي ..
07-11-2013, 09:42 AM
saidahmed shami saidahmed shami
تاريخ التسجيل: 01-08-2013
مجموع المشاركات: 2348
Quote: لسة انا مصر إنو مصطفى السني عندو مشكلة ومشكلة كبيييرة جداً مع الفرقة الموسيقية وبيتعامل مع صوتو وكأنو بيتغنا بي العود..عشان كده صوتو بيكون واااطي جداً مقارنة بي صخب الموسيقى ..وعليه عندو واحد من حلين يا إما يرفع صوتو يا كامن يكلموا الفرقة الموسيقية تخفض صوتا (بعد إيييه).. بس الممتع في السني إنو حضورو جميييل وتحس بيهو وش مريييح بيتحب بي صورة عفوية كده لأنو زول راقي ..
أحيك يا عمر الفاروق
فعلا السني بالاوكسترا كان فارق شويه
لسه عشمنا كبير انو يكون نجم اغاني اغاني موسم 2013
ورساله للسر قدور حرام ابوبكر سيداحمد او عمر جعفر ما يكونوا في البرنامج
07-11-2013, 10:59 AM
طارق ابراهيم ابوالفضل طارق ابراهيم ابوالفضل
تاريخ التسجيل: 01-28-2013
مجموع المشاركات: 461
Quote: البت فاطمة دي عندها ميزة طوولت ما شوفتها من زمن عافية حسن ..وهي التعبير الحركي مع الغنا ..تعبير ما مخل ولا شاذ ..تعبير حركي سغمبروووتي كدهلكن بيضفي روووح على الاغنية وبيكون مرييح عند المتلقي ..يعني عافية دي زمان عندها حركات كده بي عيونا ورقبتا ويدينا بتختها في حتت كده من الاغنية لمممن تحيييرك.. اها فاطمة دي عندها نفس الحاجات بتحرك رقبتا في لحظات وعيونا في لحظات وتحرك يدها فيلحظات فعلاً الاغنية بتكون محتاجة ليها ..لكن كصوت هي ما كعبة بس ما شاذة شديييد .
ده إسمو الإحساس يا استاذ يا مشاتر ..
بالجد عندك حق في ملاحظاتك الفاتت ..وأنا امبارح زهجت من الحلقة ,,وكانت أقل من توقعاتي ..من شان هيك حا أباصيها ..
من الحلقة بتاعت الليلة ..نبدأ بإذن الله ..
07-11-2013, 12:54 PM
نصر الدين عثمان نصر الدين عثمان
تاريخ التسجيل: 03-24-2008
مجموع المشاركات: 3920
أطربني هذا الأداء حد الامتلاء.. قد يقوم المختصون بتحليل هذا الأداء.. ويرون هنات هنا أو هناك .. طبعاً أؤمن بعلمهم وبأن لهم كل الحق فيما يرون دون جدال.. ولكن ذلك لن يغير من الأمر شيء.. أعني بالنسبة لي طبعاً..
أكيد (سيبماتكو) .. ماركة مسجلة .. فتسجيلاته لا يعلا عليها .. ولكن هذه المرة يوجد خلل التسجيل الذي أنزله للأغنية.. لذا أعيد إنزال تسجيل آخر .. عسى أو لعل..
07-11-2013, 01:02 PM
Salah Habib Salah Habib
تاريخ التسجيل: 02-11-2013
مجموع المشاركات: 451
تحية البت الاولى الغنت ياطير يا طاير : الصوت جميل لكن لأنه الاغنية لحنها عادى لم تظهر امكانات الصوت نسرين ادت بصورة جيدة وغطت على الضعف ال كان موجود فى صوتها سابقا وامل ان تستمر فى التحسن فاطمة صوت جميل واداء مقنع لأغنية لفنان كبير زى عثمان حسين . تعتبر اختبار بالنسبة لأى مطرب مبتدىء فرفور عادى ادى بصورة جيدة لكنه كان بيصرخ فى بعض الحتات اما مصطفى فأدى بتطريب عالى . لكنى اعيب عليه خفض الصوت فى حتات تحتاج انه يكون عالى والعكس وايضا تقطيع البيت والوقفات احيانا تربك الفرقة الموسيقية و تفرق معاهو .. لكنى اعتقد انه احسن واحد في المجموعة الديكور قاتم الارضية لون اسود ( وايضا قناة امدرمان والسودان) يبدو انهم صوروا فى استديو واحد!! مع اختلاف الديكور الذى كان برضه مش مناسب.
07-11-2013, 02:00 PM
ودالعباسية ودالعباسية
تاريخ التسجيل: 10-28-2002
مجموع المشاركات: 2442
تحية خاصة لى اخوانا اللندي لفتح هذا البوست السنوي لبرنامج ما يسمى بى اغانى واغانى والتحيه عبره لكل المحاربين القدام والجدد والمتابعين
بعد الفطور كدا لمن تجى تاخد ليك رقده وقدامك كبايه عصير ولا بتشرب ليك فى سجارة ولا سافى ومرخم ،، وبتسمع ليك فى منوعات من الاغانى بى اصوات شبابية مختلفة دا الاحساس بقى بى البرنامج دا
لانه مافيه اي نوع من التوثيق لانه كان فى المواسم الاولى من البرنامج ،،
فى البداية اقول انه السر قدور والشفيع ومجدي عوض صديق ،، ما عرفو يختارو حلقة استهلاليه للموسم الجديد ،،يفترض تكون الحلقة عن الحوووووت ،، حتى لو ما كانت عن الحوووت يفترض انه السر قدور
يرحب بى الاصوات الجديدة دي ،،، ما ممكن اول حلقة خاشى تووووش ،، وما تستبعد انه بعد كم يوم يجيبو ليكم الحلقة الاولى فى البرنامج البعرف فيها السر قدور عن الاصوات الجديدة المعاهو ،،
وكل سنة نحن كدا ،،
الشى التانى مصطفى السنى ومعتز صباحى اضافة حقيقية للبرنامج ،، واتمنى انه ما يخذلونا ،،
نحن مع التغيير ودي ثورة فى برنامج اغانى واغانى على بعض من الاصوات فى المواسم الفاتت ،،نرحب بيهم ونتمنى انه يقدمو شئ جديد ويمتعونا
الولد بتاع نجوم الغد فرحان شديد ما عارفه ماله ،،
الفرقة الموسيقية برضو فيها اعضاء جدد ،،، الناس دي قاعدة كيف فى استديو النيل الازرق البلنتى دا ( كميرات + ديكور + كراسى + ناس كتار خلاص )
اللهم إني كنت صايم بس الملفت في الحلقة دي وقبل ما نخوضفي التفاصيل بتاعت الغنا إنو في ملاحظة سغمبروتية كده .. الأولاد في الحلقة دي كانوا أشييك وأسمح من البنات .. :) :).. وده الخلاني الاقي العذر لي ود حياة طلسم لمن لقيتو مختوت بهناك .. لكن كانوا يتموها بي إنو يودو فهمية دي بهنااااك معاهم.. صف الفنانين كان أناقةمنقطعة النظير.. صف الفنانات كان بشتنة منقطعة النظيرين ..
07-11-2013, 08:58 PM
معتصم محمد عبدالرحمن معتصم محمد عبدالرحمن
تاريخ التسجيل: 04-14-2013
مجموع المشاركات: 120
وزيادة لكلام الناس الفوق ديل حول الاستوديو والزحمة الحاصلة فيهوو الطربيزة الفى النص دى تديك احساس انو الناس ديل قاعدين ليهم في دفار ابو كنبتين داك طويلة يااااااااخى ..
07-11-2013, 09:34 PM
إبراهيم عبد الحليم إبراهيم عبد الحليم
تاريخ التسجيل: 10-31-2008
مجموع المشاركات: 3563
عندما رأيت اسم اغنية الفنان صلاح مصطفى -حبة شوق شعرت بتخوف ما فالاغنية على ايقاع الفالز Walzوهو ايقاع لو ما عرفت تتصرف فيهو كويس لحنا واداء ممكن يكون ايقاع مملل جدا ويجعل الاغنية غاية الملل. الاستاذ الموسيقار صلاح مصطفى استطاع ان يضع لحن متميز لاغنية صارت ناجحة واستطاع يحكى رواية الشاعر داخل اللحن طلوعا وهبوطا وبكل سلاسة وسحر آخاذ.
كذلك كانت امنيتى بل وحدسى منذ رؤية برومو الحلقات ان اشاهد الثلاثى منى وزحل ونادر فى كورال يجمعهم ولو ما خانتنى الذاكرة فهم اشتركوا سوية فى كورال كلية الموسيقى والدراما بقيادة الاساتذة النور حسن والصافى و مرات كده د. الفاتح حسين. الاستاذ النور حسن فى نظرى هو اميز اساتذة الصوت فى السودان حاليا ويتفوق فى نظرى على الفنان د. عثمان مصطفى فى اساليبه التعليمية وتواضع امام طلابه والجديد شديد. بالتالى كان امام الثلاثى المختار منى وزحل ونادر توزيع ادوارهم الغنائية على الاغنية والاستفادة من خبرتهم فى الصوتيات ومشاركاتهم السابقة فى الكورالات اهمها مراعاة الهارمونى فى اماكن اللقاء وعجبنى نادر وهو يعلى صوتوا فى منطقة البارتون عندما ما يلتقى فى لحظة ما مع سوبرانو البنات. كذلك عدم التشنج والغناء المريح ومراعاة مخارج الكلمات والتسليم الزمنى بل واعطاء الاخر الفرصة للتجلى عندما تجئ نقطة ثقله الصوتية ومركزه فطلعت الاغنية تيم ورك بدون استعراض عضلات وكان الرابح المستمع. ياريت لو وجدوا الفرصة لبروفة الاغنية دى مرتين تلاتة قبل ان يغنوها كان ستطلع كمان احسن هذا ينطبق كذلك على اغنية الامس لعثمان حسين التى تغنت بها منى عمر لو برفتها مرتين تلاتة كانت ستطلع احسن لانى كنت احسها فى مرات ستقطع ولجاءت لاظهار صوت سميرة دنيا لتخرج بالاغنية لبر الامان.
عموما هناك مشكلة اوديو Audio واضحة والميكات الويرليس دى زى بطارياتها ضعيفة وما مشحونة فصوت الفوكاليست ما واضح امام .
. حتى هذه اللحظة السنة دى اغانى واغانى المزاج عالى
الليندي يا انيق في كل شيئ ذوق ومتابعة وحصافة وسرد شيق دعني ارشحك لتقديم البرنامج الموسم القادم بجد سيكون حاجة غير .
كل عام وانتم بخير جميعكم تابعت جزء اليوم ولم ينل اعجابي مسألة ان الفنان قريب او والد او جد لا يعني انك تجيد اغانيه وكلامي واضح للود معاذ اللي جده صلاح بن البادية .
فهيمة مادحة جيدة فنانه بالذات لاغنيات عثمان حسين مستحيل.
البقية لسة سنتأخر في الحكم عليهم/ن .
@ السر قدور لحق امات طه من حيث السرد الجميل والجاذب.
كلامك صاح يا دينا وملاحظتك في مكانا .. خطفتيها مننن كيبورديني من أمبارح عايز قول حتة الإكسسوارات دي.. أضيفي ليها ملاحظة تانية ..إنو دي من المرات النااادرة اللي يظهرو فيها بنات بيغنو ولون يدينهم قريب جداً من لون وشهم ولو ما البودرة اللي بتتعمل عشان الإضاءة دي كان ح يكون اللون مطابق .. ودي شجاعة تحسب للبنات ديل ..
حلقة اليوم عن الشاعر محجوب سراج و سنشارك بادراج الحلقة والحديث عن الحلقة بعد الساعة الثانية صباحا لظروف العمل نرحب بعودة ود عباسية وبمشاركة الصديق الرفاعي حجر
07-11-2013, 10:31 PM
saidahmed shami saidahmed shami
تاريخ التسجيل: 01-08-2013
مجموع المشاركات: 2348
بعد اجمل صوت سودانى لمحمد وردى وابراهيم عوض يأتى صلاح بن البادية كاجمل صوت غنائى. بالرغم من ان صلاح بن البادية ملحن قدير وصاحب تجربة لحنية كبيرة اهلته ان يحتل المركز الثالث او الرابع من حيث عدد الاغانى الا ان الحانه جميعها لم تخرج جماليات صوته كما فعل له ذلك الموسيقار البارع ود الحاوى عندما لحن له اغنية ابو آمنة حامد سال من شعرها الذهب وخصوصا تلك الصرخات داخل الاغنية هى حينها من لفت آذان المستمعين بصلاح بن البادية . صوت صلاح التنور والمايل بهدوء للصرخات المحببة فى المنطقة الحادة زاده الله عليها بمنطقة ارتكاز غليظة وهى باريتون ملئ بالصول وصلاح ذاته ومتعته وتطريبه عندما يستقر فى اللحن بمنطقة البارتيون بتشعر بيهو كالمسطول او الحوارى القى سيده.
يعنى امريكا لمن تفك طائراتها الف ستة عشر دى وتضرب اهدافها مش لازم ترجع لقواعدها سالمة فى حاملات طائراتها والا تقطع بنزين او صدام يسقطها ليها وطيب.
هذا الارتكاز الباريتونى والتطريبى لم اسمعه اليوم من معاذ البادية بالرغم من محاولته الجادة للتسويق مثل شركة م ت ن
المرة الجاية يرسل طياراتو لعبد الرحيم حسين وضاربة كشافات دللللل ما بتجىهوا اى عوجة
تابعت بوست مدّور فى منتدى البركل وأدليت بدلوى هناك وشعرت بأن (مداخلتى فى القمة !!) لما جييت هنا (خجلت منها !!!) يا أخى لقيت فطاحله أبراهيم عبدالحليم (اللندى دى فلته فى التحليل ) وعمر الفاروق ما شاء الله تبارك الله ودنيا خالد برضو ما قصرت !! والله الماشف الحلقة يجىء يتابع التعليق الفى البوست ده والله ده مرات زى (بفوت الحلقة الاصل ذاته ) والله يا جماعة لازم زول يخلى السر قدور يطالع البكتبو ناس الليندى ديل ويديهم 3 دقائق فى كل حلقة !! ده بالميييت !! وأكان على أنا على الاقل اللندى يكون ضيف حلقة ثابت والباقين يتناوبو !! يا أخى كملتو الابداع (والحالة نحنا فى الحلقة التانية !!!(يعنى زى ما قال الجعلى الشكروهو فى صلاتو قال ليهم الحالة بلا وضو!!!!. على العموم تعليقى المفجخ الفى منتدى البركل برضو بجيبو لزياده الكوم فى هذا الصرح الرهيب !! والله سودانيز أون لاين الناس الفيها عاملين زى سينما النيل الازرق زمان مقارنة بباقى السينمات ناس كلوزيوم وحلفاية والوطنية وغيرها من دور السينما !! خاصه أن النيل الازرق كسينما تحمل إسم القناة المنقول أو التى تنقل وتسجل هذا البرنامج الرائع !! فقط تحفظى الذى ذكرته من قبل (هو فى التوقيت الرمضانى ) واصلو يا مبدعيين . فقط أردت أن أقول أن الفنانيين الزمان ما ساهين والدليل أن صلاح مصطفى ثلاثة (أتنين من البنات وشاب ) حتى قدرو يصلو لينا جزئية تصل الى 55% من ملكته الصوتية وتفرده اللحنى والصوتى وكذلك الموسيقى كانت زمان أكثر روعه .
على الرغم من أن التوثيق للغناء السودانى شىء مطلوب وآداء هؤلاء الرائعين لأغانى من سبقوهم الاحياء منهم والاموات جميييل ورغم تحفظى على التوقيت (فى بداية رمضان ) إلا أننى وبصراحة لابد من الاشادة بالدكتور السر أحمد قدور وهو يقدّم هذا البرنامج لسنين عددا ، وله إمكانيات وذاكرة وتأريخ للغناء السودانى لا يملكه غيره ، على الرغم من أننى أحسن من عوض جلاس شوية ما من المتابعين عن قرب لهذا البرنامج ولكن أستقطعت اليوم وقتاً ليس بالقصير مع نهارنا الطويل لكى أحكم على هذا البرنامج وبكل صراحة أقول أنه برنامج ممتاز وتوثيق للماضى الذى يقدمه مطربى الحاضر بصورة جميلة ومع مقدم برنامج صاحب حضور وقفشات وذكريات وسرد لا يمل ، التحية للأخ ود شامى على النقل وواصل فى التوثيق فالبركل ومنتداها مستفدين بكل تأكيد . (نقلاً من منتدى البركل مع الاذن من صاحب البوست الاخ شامى وهو عضو فى هذا المنتدى ).
07-12-2013, 02:08 AM
الليندي الليندي
تاريخ التسجيل: 05-27-2002
مجموع المشاركات: 1188
الحلقة التانية أحسن حالاً من الحلقة الاولي فالموضوع واضح أغنيات وحديث عن الشاعر ( محجوب سراج ) محجوب سراج من مواليد امدرمان ( حي العرب ) 1938 م ودرس مراحله التعليمية الأولية والوسطى بحي العرب ثم التحق بمدرسة المؤتمر الثانوية التي شهدت له نشاط كبير في الجمعيات الأدبية وظهرت موهبته في كتابة الشعر الفصيح حتى تخرج منها في عام 1957م ومنها التحق بشركة النور ( مصلحة المياه والكهرباء ) في عام 1958 م والتي تعرف فيها بالأستاذ السني الضوي الذي بدأ بدوره يتصفح الأعمال التي يكتبها ( محجوب سراج ) فوجد فيها الجانب الغنائي فادخل فيها ريشته لتتحول إلي لوحات فنية مضيئة في مسيرة الغناء السوداني ولكن قبل أن يختار السني الفنان الذي يناسبه اللحن كان الفنان صالح سعد جار الشاعر ( محجوب سراج ) بحي العرب قد تلقف أول أشعار محجوب سراج ( القطار ) ولحنها وغناها في عام 1960 م
القطار أنا دمعي سال يوم حبيبي ودعني
مشروع ( محجوب سراج ) الغنائي كان للملحن السني الضوي دوراً كبيراً في تقديمه للأضواء مثلما كانت لأشعار شاعرنا محجوب سراج دوراً كبير في تقديم السني كملحن بارع فالسني لم يكن قد بدأ الغناء في ذاك الوقت ولا التلحين بشكل جدي فقط كان يترنم بأغنيات التاج مصطفى ولكن اشعار محجوب سراج اشعلت قريحتة الابداعية فاختار
مين قساك مين قسى قلبك مين نساك ياناسي حبك
ووضع عليها اول لحن له وقد كان من حسن حظ شاعرنا أن تكون هذه الاغنية من نصيب الفنان الذري ابراهيم عوض الذي كان في قمة تألقه وقد كانت أغنية من قساك هي جواز المرور لشاعرنا محجوب سراج وللملحن السني الضوي وكانت من قساك بداية تعاون ثلاثي بين ( محجوب سراج والسني الضوي وابراهيم ) فبعد نجاح من قساك التقى الثلاثي في أغنية
قاصدني ما مخليني وراخصني ما مغليني يا قلبي يا معذبني في حبو ليه رميني
ثم التقى الثلاثي في أغنية كبيرة ليكن نصيب ابراهيم من اشعار محجوب ثلاثة قصايد
ليه بتسأل عني تاني بعد ماشلت الاماني
07-12-2013, 03:01 AM
الليندي الليندي
تاريخ التسجيل: 05-27-2002
مجموع المشاركات: 1188
االتعاون الثاني مع فنان اخر بين ( محجوب سراج والسني الضوى ) كان مع الفنان صلاح أبن البادية في ثلاثة قصائد اول حب واخر حب ثم أغنية من الأغنيات الكبيرة ( عواطف )
أمنتك عواطفي و خنت الأمانة حطمت في دقيقة أحلامنا و منانا
ثم كانت الأغنية الشهيرة ( الجرح الابيض )
أنا لونعيم الدنيا عندك احرميني او جحيم الآخرة ملك عذبيني
07-12-2013, 03:20 AM
الليندي الليندي
تاريخ التسجيل: 05-27-2002
مجموع المشاركات: 1188
بعد أن كون ( السنى الضوي وابراهيم ومحمد الحويج ) ثلاثي العاصمة الذى تحول الي ثنائي العاصمة بعد وفاة ( محمد الحويج ) تعاون معهما ( محجوب سراج ) في اربعة قصائد
مهما تصدي عني ومهما زعلتي مني برضي بحبك يا حياتي
وفي أغنية ( زي عيني )
زي عيني وغالية علي فيك عا########ي مشاعر حية
وايضاً في أغنية ( يا حبيبي وانت غايب )
يا حبيبي وانت غايب قلبي وراني العجايب مرة شاكي ومرة باكي وعمري ما حسيتو طايب
والعمل هو أغنية ( حيرت قلبي معاك )
حيرت قلبي معاك خليتو بيك مشغول
غايتو الحاجة المحيراني أنو الفنان ( السني الضوي ) رجل أمين حتى في ابداعه فكل الأغنيات التى وضع لحنها لفنانين أخرين كظانت اجمل من الحان ثنائي العاصمة ( ليه بتسأل - الجرح الابيض - عواطف - عاطفة وحنان - بلقى الدنيا فرحة ) ولا ممكن يكون بلقى مساحات في وضع الالحان للصوت الفردي كدي بالله ناس الموسيقى يفتونا .
07-12-2013, 03:40 AM
الليندي الليندي
تاريخ التسجيل: 05-27-2002
مجموع المشاركات: 1188
أكثر قصائد مغناة للشاعر ( محجوب سراج ) ستة أغنيات كانت من نصيب الفنان ( صلاح مصطفى ) وجميع الأغنيات التى تغني بها كانت من ألحانه فقد التقى محجوب مع صلاح في اول تعامل بينهما في أغنية (احسن أوادعك )
احسن أوادعك وتودعني ما دام حبك بيضيعني ثم استمر التعامل بينهما بأغنيات شكلت علامات فارقه للاثنين فأغنية ( طريق الجنة )
من ضمير خالص عايش اتمنى يا حبيبي نعود زي ما كنا لامانينا لتلاقينا في طريق جنة
ثم التقيا أيضاً في عمل غنائي أخر ( لمسة )
لو تعيبى على غرام عشت فيه زمان تكونى شلتى من أيامى لمسة أيقظت حبى و حنينى علمتنى أحب و أعشق وأحمل الشوق فى عيونى
ثم الثلاثة اغاني الشهيرة ( الماضي والحاضر )
الماضي والحاضر انت لوفكرت تتذكر غرامك تبكي ماضيك البعيد
وأغنية ( حبة شوق )
ما بغيرنى صدودك عنى ولا بحولنى غرورك يوم سيب نيران الشوق تحرقنى وتملأ ليلى على هموم
واغنية ( بعد الغياب )
بعد الغياب بعد الليالى المره فى حضن العذاب عاد الحبيب المنتظر عودا حميدا مستطاب
ايضاً التقى ( محجوب سراج ) مع الملك ( عثمان حسين ) في أغنية ( أحبك احبك ) وسنعود لهذه الأغنية عندما نستعرض أغنيات الحلقة الثانية
( محجوب سراج ) الشقيق الاصغر للممثل ( محمود سراج ) الشهير بابو قبورة وقد ادرجت العزيزة ( عبير خيري ) رابط يوضح معاناة ( محجوب سراج ) وكانت النداءات قد اطلقت لعلاجه بعد أن قل نظرة منذ فترة طويلة وبعد أن طالت معانته ومعاناة اسرته من شظف العيش وقد كللت المساعي بأ تم تسفيرة للاردن للعلاج قبل عام ونصف تقريباً ، متعه الله بولفر الصحة بقدر ما امتعنا من بدائع اقصائد المغناة .
07-12-2013, 03:37 AM
Abuzar Omer Abuzar Omer
تاريخ التسجيل: 07-26-2008
مجموع المشاركات: 2109
الأغنية الاولي ( حبة شوق ) ( محجوب سراج وصلاح مصطفى ) والاداها الثلاثي ( زحل عمر ومنيى مجدي ونادر عثمان جمال الدين ) أغنية كبيرة ولو امكنياتك الصوتية ما كبيرة ما بتتغنى بشكل جيد ومن وجهة نظري أنو الثلاثي غنوها بشكل جميل وبانسجام كبير غايتو الحتة الادتها ( زحل عمر ) ( في نظراتك حبة شوق رماها الحب في حقل شبابي ) جاني صوت حنان النيل لكن ادتها بشكل جميل جداً وبعدين كان في مجادعات في نهاية الأغنية جميلة بين ( نادر من جهه وزحل ومنى من جهه ) اداء جميل جداً
07-12-2013, 04:16 AM
الليندي الليندي
تاريخ التسجيل: 05-27-2002
مجموع المشاركات: 1188
الأغنية التانية ( احبك - احبك ) بقول عنها الشاعر ( محجوب سراج ) تصادف مرة لاقيت ( عثمان حسين ) في الاذاعة وقال لي انا عملت لحن جميل لي كلمات عوض احمد خليفة لكن اللجنة ما اجازت الكلام دايرك لو بتقدر تعمل لي كلمات لي اللحن ده وسمعنياللحن واللحن كان جميل وعجبني فكتبت ( احبك أحبك ) طبعاً الأغنية لو ماخاف الكضب دي ثلاثة مرة تتغني في البرنامج غايتو أن متذكر انو ( منار صديق ) غنتها في النسخة السابعة وغنت افضل من ( فخيمة ) غايتو راي يا باوذر انو غنتا بتكلف مرة تعمل زي ( حمد الريح ) تشيل يدها في دقيقه وتضربا في تختها في صدرها ومرة ترفع كتفها لمن طلعت من الزمن في حتة ( زرعنا المحنة ) حصلوها العازفين وفرقت تاني وأتأخرت في ( نتوج حياتنا ) وعمنا السر قدور بكسر ثلج شديد كالعادة ( فخيمة ) تصلح في أغاني السيرة وممكن زي ما قال حجر تمدح
07-12-2013, 04:34 AM
الليندي الليندي
تاريخ التسجيل: 05-27-2002
مجموع المشاركات: 1188
الأغنية الثالثة ( الجرح الابيض ) غايتو الزول البشيل اصبعو ويظبزا بيهو عينو ده حفيد أبن البادية ( معاذ ) ياخي الجرح الابيض دي أغنية كبيرة وصعبه وغير دائرية ومعاذ ده اي أغنية لحنها غير دائري حيكوجنا ، اول حاجة انا غايتو في بداية الأغنية ( انا لو نعيم الدنيا عندك احرميني ) نطقا كده اح رميني فصل الكلمة وبالجد ليهو حق لانها اح بالنسبة ليهو يعني لو اختار أغني ( اول حب واخر حب ) كان طلع نفسو من الورطة دي ورحمنا شوية وبعدين المقطع ( لاني قادر تاني ارجع ولا مشاعرك راضية تسمع ) لمن كررو نشز عديل في ( لاني قادر تاني ارجع ) و بعدين ( كان امنيات حبي ليك وغدرت بيهو ) تسميع بس ما غنى ومرة مرة يقابض في طه عشان يحصلو وقفلة الأغنية ( احزان عميقة بتعتريني ) غايتو بتعتريني برضو قسم الكلمة بتعت تريني نفسو قصير ، غايتو المفروض جدو يبطحو في السرير ويديهو خمسة جلدات بصوت العنج .
07-12-2013, 04:49 AM
الليندي الليندي
تاريخ التسجيل: 05-27-2002
مجموع المشاركات: 1188
الأغنية الأخيرة ( ليه بتسأل ) ادتا ( نسرين هندي ) باداء أكتر من رائع غايتو في همهمات عملتا اضافت بيها حلا للاغنية وبعدين بتسلم العازفين صاح ( كنت اجمل أغنياتي ) مط في مكانو الصاح وتاني الحتة ( كنت داري وكنت دوحي . كنت . كنت داري وكنت دوحي ) شوفتو ( كنت ) البين النقطتين دي خطفا مبالغة اضافة لأنها واثقة من امكانيتها وبعدين ما جعانة غنى زي ( فرفور ) مجرد ما الشباب شالو معاها بتخليهم يكملوا باقي المقطع حقيقي ( نسرين هندي ) اضافة للبرنامج واتطورت كتير . لي بعدين نشوف طه وصباحي واحمد المامون ديل اللحدي هسه ما سمعناهم في غناء فردي .
07-12-2013, 07:28 AM
شهاب الفاتح عثمان شهاب الفاتح عثمان
تاريخ التسجيل: 08-28-2006
مجموع المشاركات: 11937
حلقة قوية .. السودان ده ضخم وفخم وكل يوم اكتشف جهلي ! .. نمر في حي العرب مرور الكرام , وبها عمالقة , واعرف منهم الفنان الذري وشاعر امدرمان بها , وقمة تصنبفي الكروي لها مقر الخصوم الهلال و كده !. وشوية معارف ونسايب ...
ياخي الحلقة الثانية دخلت الواحد جامعة تدعى الشاعرمحجوب سراج , وللمرور في لحي العرب الان ذكرى واحترام جديد كلماته و الحان السني الضوي ثئاي العاصمة ياما عجبت ودندناها, ماعارفين وراها قامة بحجم ابداعي قياسي كدة ,
الراقية عبير خيري كما تفضلتي , لازم كانو يجيبو المعاناة وجزء عن المشاكل العاطفية دي نتثقف .. عموما ادونا طرف الخيط بنفتش, ولازم نجمع شعره ونعرفه ونحفظ ليه كم قصيدة لازم . القاء الشاعرمحجوب سراج بسيط والابداع يتدفق بسلاسة غريبة كيف ! ,
واشادة مرة ثانية بالفقرة التوثيقية من المادة القديمة رائعة وبتعمل نقلة وجو اضافي كانت تحتاجة رتابه الحلقات ,, والاصوات المعتقة الصافية القادمة من مكتبة الاذاعة حلو بلا مر يزيد البهاء والق الاصوات والتنوع , فهذا الرمضان الاغاني اغاني للتنوع !.. اعيب على الانتاج الاخراج اثناء الاستعانة بالاصوات الرجوع لصورة قرص متحرك قديم وتكرارها , هذا يعطي المعنى لكن انت برنامج مصور مشاهد صور ولقطات المبدعين تعطى العين معلومة ونقلة اكبر , فعندما تعطي الصوت تغطي حاسة السمع ( الاذاعة ) , و الصورة مهمة لتغطية العين و المشاهدة , وكدة تكون غطيت اثنين من ادوات التعليم وتوصيل المعلومة الثلاث والادوات الثلاث الاساسية هي : االبصر, والسمع والحركة , Visual, Auditory , and Kinesthetic learning ونطالب في المستقبل بمعلومات اضافية في شريط على مهل او المعلومات التوثيقية في جزء من الشاشة .. الحركة برانا بنعملها في البيت طرب ياخي ! , او نقرات على الكيبورد رد فعل طربي برضو ياخي :)
اخي بشرى مبارك ود السقاى الاشادة بالقامة الاستاذ السر قدور واجبة واجبة , الاغنيات كانت امام الجميع ومازالت عصير الصدق والذكريات المحببة والحضور والضحكة من القلب جعلت هناك فرق وفرق عملاق.. حفظك الله استاذي السر قدور.
وقفة القدور لزحل والانيقة منى و نادر اعطتهم شهادة نحو غناء جماعي ومزيد من الابداع .. عشقنا للاغاني السودانية ليس من فراغ هنا ابداع وعصارة سنوات وثقافة وعلم ورقي و معنى لمغنى يستحق ان نوثقه ونتناوله ونثبته !..
الليندي رمضان مختلف مختلف ياموثق يا راقي واكثر من رائع !.. والتانية ابداع , وحبابنا سوا
وتاني : ( ده فالس يا مليجي !؟..)
______________________________________________________ ليتهم يعلمون ان عمر اللحظـه في بعـدك يا خـرطـوم سنين طـوال د شهـاب الفاتح ـ كوالالمبـور
Quote: والله يا جماعة دا كلوم والزول بتاع الساكس في المقدمة بتاعة اغنية لما ترجع بالسلامة يااااااااااااااااه الزول دا ضرب صولة زي الصولة
سـلام يا الخـير.. عبدالهـادي محمد نـور أفضل عازف ساكس في السـودان وفنان يتمتع بتقنيات متطورة جداً.. ولاحظت إنو لو كرر نفس الجملة عشرة مرات بعملا ليك كل وحدة بطريقة مختلفة وأجمل من التانية.. بعـرف بعض كبااار الفنانين يا معاهم الهادي يا بدون ساكس!
Quote: Huzifa Hussien · Pune, Maharashtra جزاك الله خبر الاخ الليندي ..... بالنسبه لي اغاني واغاني , والناس الداقه جرس عشان اول حلقه ماكانت عن محمود ياجماعه خليكم واعيين شويه وشوفو العطاله بتاعين اغاني واغاني ديل فيهم زول ممكن يغني اغنيه للحاج ويؤديها بجوده الحاج لا والف طبعا دا الجواب طيب ليه نحن زعلانين محمود دا حقنا نحن اولادو وجمهورو بس ماحق زول تاني ونحن اصحاب الوجعه ونحن اليوماتي بنرثيهو جوه قلوبنا ولاعايزين من السر قدور ولا غيرو يرثي لينا ولا عايزين زول يزكرنا ليهو لانو اصلا نحن مانسيناهو وزكراهو جوانا مابتموت
رحمك الله محمود
رحمك الله محمود , اخي حذيفة حسين محمود عبدالعزيز فقد وطن , ومعك باختلاف الحرف انا غاضب ايضا ! .. عدم البداية بحلقة عن محمود وقد مر من ذات الاستديو من قبل سقطة و عدم ذكاء واكثر ! , و عدم احترام لمساحة حزننا نحن المتابعين للبرنامج .. ولولا اني لست من المغرمين بنظرية المؤامرة لقلت ان وراء الغيوم ما ورائها !! , هذا قرار مفجع بعدم البداية .. لانها كانت واضحة بعد حلقة الراحل نادر خضر العام الماضي ..
هؤلاء الانيقين في الاستديو يهدونا اجود ما يستطيعون و نحترمهم , لا للاساءة لهم , واعرف واثق تماما ان حلقة التوثيق للراحل محمود القادمة ستكون اسطورية ,, يبقى لنا مساحة الامل والترقب .. وعتاب عتاب ..
Quote: Mamoun Ahmed · يعمل لدى Dar Al-Hekma College الخساره الكبيره فقدان منار وعاصم
Quote: امبده امبدة الشباب رمضان كريم وكل سنة وإنتو بخير إن شاء الله . لا أعتقد بنجاح البرنامج هذا العام في غياب المبدعات ( رماز - شموس - منار صديق ، بهار برنامج أغاني وأغاني . ) مع كامل تقديري للتشكيلة الجديدة ، والله السر قدور بالغ في الحتة دي . على الاقل يوزن التشكيلة المايلة دي بسميرة دنيا يكون معقول شوية . تحياتي للمبدعات رماز وشموس ومنار وأكيد الجمهور سوف يشتاق إليكم خلال حلقات البرنامج .
Quote: Abuibrahim Tarig · النيلين تحياتي للأخ الليندي وهو يقدم لنا بوست دسم بهذا الشكل و المضمون الاكثر من رائع بالنسبة للمشاركين الغالبية تتمتع بأصوات مميزة و استمرارية فرفور بكل تأكيد ستكون حتمية نتيجة للتبديل الكبير الذي حدث و لا ننكر جماهيريته . وطه افضل المشاركين وريماز وافراح وجوه لا يمكن الاستغناء عنها
اخوتي مامون وامبدة وابوابراهيم والبقية حبابكم اراء وعلى عكسك يا امبدة اعتقد بنجاح البرنامج هذا العام اكثر , وهذا لا يعنى اننا لا نفتقد من ذكرت !, التجديد سنة حياة ..
رمضان كريم و حبابنا سوا ..
______________________________________________________ ليتهم يعلمون ان عمر اللحظـه في بعـدك يا خـرطـوم سنين طـوال د شهـاب الفاتح ـ كوالالمبـور
07-12-2013, 09:41 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
مبدئياً يا الليندي خليني أختلف معاك في قصة أغنية المجموعة دي الاداء فيها كان جميل.. سبب الإختلاف ما في إنها ما كانت جمييلة نووو سبب الإختلاف إنو نحن عموووما لمن نغني أغنية جماعية بنضاري الخلل الكبير في الاصوات وبيطغى صوت المجموعة فبيتولد عندنا إحساس إنو الاغنية جميلة.. إضافة لي إنو دااايماً في أغاني المجموعة بيكون في تنووع بيشق الرتابة بتاعت الاغنية لانو في البروفات بتاعت الاغنية بتكتر الإقتراحات فلان انت سووي كده لالالا فرتكانة انتي في الحتة دي قولي كده لالا انتي يا هناية اعملي في الحتة دي كده..اها سمكرة الاغنية الجماعية بتخليها اغنية جميلة ومتعوب عليها .. لكن لو جيت عاينت ليهم واحد واحد بتلقاهم اتعصروا شديييد في الاغنية دي واي واحد منهم تمسك صوتو على حدى في الاغنية دي بتلقاهو ضعييف جداً.. ود حياة طلسم في اي حتة بدا يغني براهو صوتو كان ضعيييف جداً بالمايك وبعد ده ما بتقدر تسمع منو بيقول في شنو وكلمات الاغنية شنو..انا ما عارف بدون مايك كان ح يعمل شنو؟؟ البتين استغلوا قصة الصوت النسائي في وجود صوت رجالي ضعيف فأكلوهو حنك ساي وضييعوهو ودددروهو لكن برضو فرديا كانن مرة يكونن كويسات ومرة مرة يجلطن ..
الغريبة يا الليندي معاذ ما كان بذاك السوء اللي انت يبدو فيهو لاحقني كده ولمن تخت ليك زول في راسك لو نطط تاني ما بتديهو حقو :):) من أهم مميزات معاذ بن البادية إنو بيغني مرتااااااح بعيداً عن قصة جماليات الصوت من عدمها دي..معاذ ما بيتشنج في الغنا وبيمرق صوتو بدون تكلف ودي ميزة تحسب ليهو ..العيب الوقع فيهو معاذ إنو إعتمد على إنو الاغنية دي حقت جدو وإنو سمعا كتييير فبالتالي ما بيحتاج يجهز ليها نفسو ومتى ما قالوا ليهو غنيها بيغنيها.. اها عشان كده كان واضح إنو ما حضر روحو للاغنية دي شديد وبدا يكتشف الكلام ده في النص كده وانو في حتت هو ما متذكر كيف بيتم الاداء اللحني فيها فزي راحت ليهو الاغنية ودرجاتا اللحنية لانها ملحنة بي صورة معقدة ..
أما فهيمة دي فكنت بتمنى اكتب الرد ده وانا فاطر ما صايم لكن اهو غايتو نكتبو ونجرح صيامنا.. فهيمة واااضح جداً التركيبة الإقليمية مأثرة فيها شديييد والقصة دي زي عاملة ليها عقدة كده فبتحاول تتمدن وتعي بي إحساس بنات العاصمة ..فهيمة بالجد بتذكرني ببعض بنات الأقاليم اللي للأسف بتحصل ليهم صدمة الاحتكاك ببنات الجامعات في العاصمة وبالتالي بيبدو يفقدو هويتهم..أمبارح في برنامج الملك مع صلاح بن البادية كدكي اتكلم كلام كويس عن النقطة دي تحديدا وانو مفروض بت البادية هي اللي تأثر في بت العاصمة وليس العكس.. فهيمة عايزة تتسلطن بالرجااالة كده وعايزة تدعي الإحساس غصصصباً عنها ..مستصحبة معاها مجاملات السر قدور اللي في غير موضعها ..فهيمة دي صوت نسائي لاااا يصلح للغناء في تقييمي..صوت ما ممكن تطرب ليهو وهو بيغني في اغاني كبيرة عاطفية حنينة ...صوتا ما بتقدر تستحملوا اكتر من دقيقة دقيقتين..أكتر من كده بتحس انك انضرست ..لانو زي صوت فهيمة ده صوت ما فيهو مفاجأت ..يعني الطريقة البتبدا بيها هي نفسها الطريقة البتغني بيها في النص هي ذااات الطريقة الفي نهاية الاغنية ..بيكون اداء رتيييب وممل.. الاحساس الحاولت فهيمة تعيش بيهو الاغنية كان احساس ماااسخ متكلف مصطنع باااهت..ياخ الاغنية زاااتا ما كانت اغنية بتاعت احساس ما عشان كلماتا نووو عشان لحنها..لحنها ما بيديك مساحة تعيش فيها بي احساسك بقدر ما بيديك مساحة للحركية والرقص ودي خاصية ما عند فهيمة لانو الرقيص بيديك احساس انها شترا شترا مع انو زمنا كويس لكن فكرة الرقيص ما لافقة معاها .. الأسوأ من كده ماف زول قال لي فهيمة دي انها ما تلبس بودي؟؟؟!!!! مشكلة كبيرة عن كتيير من الفنانات ما بيعرفو يلبسو شنو وبتين وكيف..يعني ما ممكن فهيمة امبارح تظهر بي عضلات وقوانص بي الصورة دي !!!
للأسف الاغنية الاخيرة دائماً ما بحضرا لأنها بتصادف بداية الصلاة عندنا وببقا مارق فغايتو الزول الغنا الاغنية الاخيرة الله حلاهو مني :):):) حا احاول اسمعا هنا وبعد داك اجي اشاتركم...
Quote: معاذ ما كان بذاك السوء اللي انت يبدو فيهو لاحقني كده ولمن تخت ليك زول في راسك لو نطط تاني ما بتديهو حقو
صحيح يا فاروق أتفق معاك.. وأنا سمعت التسجيل بعد قراية التعليق وبعد سمعتها قلت لللندي المفـروض جـدو يديهو حلاواية بدل الجلدة ويقـول ليه شاطـر كونك قدرت تغنيها للنهاية.. والفاروق إنت في بداية البوست قارنتو بالفحـيل مع شوية خبرة أكتر لمعـاذ، لكـن الفحيل حتى بعـد خبرة 50 سنة فلن يسمح له صوته بأداء أغنية صعبة كاملة زي الجرح الأبيض وبدرجة (مقبول) كما أداها معـاذ.. المشكلة يا الليندي عندك وعندنا كلنا إنك عايزو يغنيها زي صلاح أو أحسن كمان ودايماً نربط بين أداء صاحب الأغنية الفنان الكبير وبين الشباب ديل عشان كدة بكتر شنافنا للشباب.. عشان كدة برجع تاني بقـول ليكم ولمقبل الحلقات: ما تضعوا آمال كبيرة شديد لأداء رائع ومبدع إلا على السـني وطـه ومامون من وجهة نظـري.. أما تعليقك يا عمـر على فهيمة ف: خشششششمي وقادر عليه :) أو بلغة البندر: نو كومينت!
07-12-2013, 10:48 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
عيسى يا حبوب.. شكلك كده في حتة شريف دي ما فهمتني يا انا ما قلتها بي طريقة كويسة.. شريف ده مااا فنان ومااا عندو علاقة بالفن اللهم زول ابوهو عازف وعلاقاتو كويسة وهو في روحو دمو خفيف او بيحاول يخففو ..لكن مسألة الغنا دي ما عندو فيها التكتح.. المقارنة كانت فقط بنظام الاحلال والابدال ..بالنسبة للصوت ماااف اييي مقارنة ..معاذ ده انا متابعو مننن ايام ال البيت والاصائل ..كان ولد صوتو عجييب لكن ضراهو الاغتراب في السعودية ..زمان معاذ ده في ترتيب اصوات الفرقة كان الأول ثم بعدو طه ومحمد الختم.. طه قعد وطوور روحو محمد الخاتم اجتهد اكاديميا بينما ضاااع معاذ مع الاغتراب غير المبرر مع عدم التمارين والمواصلة بذات النفس.. شريف الفحيل ده ينفع تجيبو في تخريج روضة في احتفالات بتاعت كي جي لانو بتحس في ود بينو وبين الاطفال..غير كده الا تسمعو ليكم راوية العباسي دي :):):)
07-12-2013, 10:49 AM
سيف الدين محجوب سيف الدين محجوب
تاريخ التسجيل: 01-18-2013
مجموع المشاركات: 680
سـوري يا عمـر؛ المـرحوم طلع غلطـان.. لكـن إختلطت علي التعليقات.. و ردك خلاني أرجـع للصفحات الأولى ..كنت قاصد الكـلام دا وطلع كـلام الليندي وظاهـر إنو أصلاً إنطباعو الإبتدائي ما كان جميل عن معاذ.. بالعكس إنت بتعليقك على البرومو قلت كـلام كويس عن أداءو وثباتو.. وربما يكـون أداءه في الحلقات الجاية لأغاني أخرى أجمل بالنسبة للأخ ناصر..وعليه التعليق محـول ليك يا ليندي: الفحيل كان ربطوه 50 سنة بقدر يغني أغاني زي دي باي شكل؟.. طبعاً زي ما قلت قبيل كـلامك ممكن يكـون صحيح لو لم تقارن أداء معاذ بأداء الأستاذ صلاح (الذهب الذي لا يصدأ بحق).. طبعاً وزي ما ذكرت كلام عمـر رجعني لقراية بداية البوسـت وأتفق معاك بالمناسبة تماماً في رهانك على السني ومأمون بالإضافة لطه.. لكن لاحظت إنك كررت عدة مرات القول: ح يغنوا كويس لو عمك السـر خلاّهـم على راحتهم.. طبعاً نفس الكـلام دا برضـو ممكـن تقولوا عن معاذ، لكن فكـرة البرنامـج تقـوم على إختيار صاحب البرنامج للأغـاني لا لإختيار المغني لنفسه ولما يؤديه.. وعليه وزي ما قال أستاذ السـر عن الجـرح الأبيض؛ فالمـوضوع (إمتحان) والشاطر يورينا شطارتو، لأنو لو ترك الخيار للشباب ح تلقى كل الأغاني الكبيرة في إتنين أو تلاتة ممكن يؤدوها بإجادة معقولة والباقين ناس حقيبة ودلوكة وأغاني خفيفة ساكت.. تحياتي..
07-12-2013, 12:28 PM
ودالعباسية ودالعباسية
تاريخ التسجيل: 10-28-2002
مجموع المشاركات: 2442
ياخوانا انتو ما ملاحظين انه الاغانى بقت تاخد حقها كامل يعنى ما زي زمان كوبلى ولا اتنين وخلاص
حلقة امبارح ،، الاغنية الاولى للثلاثى من الوهله الاولى حسيت انهم اصواتهم ما متجانسه مع بعض لكن خلال الاغنية قدرو يسيطرو عليها
وما بنقدر نحكم الا نسمع كل زول على انفراد لحدي هسى البنات هم فى المقدمة بقيادة نسرين هندي لانها زوله راكزه فى الغناء
فهيمة انا اتفق مع عمر الفاروف ،،،عايزة تتمدن لو غنت بى طريق المعهودة احتمال كانت تجيد الاغنية وتتطرب اكتر بس نقول ما صرت برضو
معاذ الاغنية بعتبارها حقتو عديييييييل ،، وكان من المفترض يجيدها احسن من كدا لانه فى حتات كدا زي ما قال الليندي ما اطربنا فيها
زي جدوو ،،
Quote: شريف الفحيل ده ينفع تجيبو في تخريج روضة في احتفالات بتاعت كي جي لانو بتحس في ود بينو وبين الاطفال..غير كده الا تسمعو ليكم راوية العباسي دي :):):)
100 % ومعاها بصمه كمان
07-12-2013, 12:56 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
خلوني أكجكم شوية ..بس عندي إحساس إنو الحلقة بتاعت الليلة ح تكون علامة فارقة في البرنامج لأنو إحساسي بيقول إنو ح ينو فيها طه ومعتز صباحي و مصطفى السني ومأمون ..وهم فرسان ران الحلقات وبالتالي هم عمالقة القعدة .. انا براهن دوماً وأبداً على معتز صباحي لأنو صوت يونييك متفرد .. عندي أختي لذيييذة بتكاجرني في الغنا ده طواااالي وانا دوماً ما أثق في ذوقها ..أها بتقول لي مااا بحب معتز صباحي ده لأنو بيتمضمض وهو بيغني :) معتز صوت فخيم وحلووو ومختلف بالجد اتمنى انو يغني بي إحساسو ازمان ..الود ده مرهف ..
07-12-2013, 01:04 PM
أسامة عبد الجليل أسامة عبد الجليل
تاريخ التسجيل: 04-29-2009
مجموع المشاركات: 1975
سلام لصاحب البوست و السادة النقاد, غايتو البوست ده مدرسة بالفطاحلة الفيهو ديل و العجب عمر الفاروق غايتو اي كلمة قالها عمر هنا و بهناك محل "بلا و انجلا" انا متفق معاه فيها عمر الفاروق ده مفروض كلامه ينزل في صفحات النقد الفني في الصحف اليومية لكن تقول شنو بس !!
-- بالجنبة كده واحد قال معتز صباحي كل يوم جاي لافح راسو بي شال كده الزول ده جاي من الدهب وللا شنو !!
07-12-2013, 01:00 PM
أسامة عبد الجليل أسامة عبد الجليل
تاريخ التسجيل: 04-29-2009
مجموع المشاركات: 1975
والله يا عمر الفاروق ويا عيسى زول بقول أح رميني في أغنية جدو ، و جدو محافظ علي صوتو الزمن ده كلو وعلي نطق الكلمات بشكل سليم وبعدين هو الشلاقة الليهو شنو يعني شطح نطح ( الجرح الابيض ) غير أبن البادية ما اداها زول تاني إلا ( محمود عبدالعزيز ) وبعدين البرنامج مافيهو بروفات عشان ينساها عموماً ( معاذ ) غير مقنع بالنسبة لي حتى الآن وصوتو صوت عادي ما فيهو اي تطريب إلا أن يثبت العكس واللحظة ديك يا عمر بشيلوا من راسي ، لكن يا عيسى أح رميني الفصلا ( معاذ ) ما بستاهل أنو جدو يديهو 5 جلدات بعدين يا عيسى انا بنبح النسخة الفاتت كلها في شريف الفحيل يعني ما ممكن اختو في سرج واحد مع ( معاذ ) اقلاها ( معاذ ) عندو خبرة وغنى مع مجموعة لفترة طويلة و كان ممكن يكون في اختيار احسن من ( معاذ ) الصوتو اكتر من عادي .
07-12-2013, 03:02 PM
احمد التجانى احمد احمد التجانى احمد
تاريخ التسجيل: 11-11-2006
مجموع المشاركات: 3155
Quote: أما فهيمة دي فكنت بتمنى اكتب الرد ده وانا فاطر ما صايم لكن اهو غايتو نكتبو ونجرح صيامنا.. فهيمة واااضح جداً التركيبة الإقليمية مأثرة فيها شديييد والقصة دي زي عاملة ليها عقدة كده فبتحاول تتمدن وتعي بي إحساس بنات العاصمة ..فهيمة بالجد بتذكرني ببعض بنات الأقاليم اللي للأسف بتحصل ليهم صدمة الاحتكاك ببنات الجامعات في العاصمة وبالتالي بيبدو يفقدو هويتهم..أمبارح في برنامج الملك مع صلاح بن البادية كدكي اتكلم كلام كويس عن النقطة دي تحديدا وانو مفروض بت البادية هي اللي تأثر في بت العاصمة وليس العكس..
عمر الفاروق كلامك ده ما ليه أي علاقة بالنقد الفني ولا بأي نقد بل هو تعنصر للتركيبة الاقليميه كما تقول ، الفن عمره ما كان ليعترف بالجغرافيا وإلا كان ناس إبراهيم الكاشف ومحمد الامين ووردي ما عتبوا باب الإذاعة ، لا يعيب الفنان استصحابه لثقافته المحلية في تأديته للأغاني وهذا ما تفعله فهيمة بالضبط لا لها جمهور عريض يطربه هذا الأداء وحسب علمي أن إرسال النيل الأزرق ليس موجها فقط لناس حي العرب أو ناس الديوم أو ناس الأملاك ، بعدين الظاهر انك طولت من الخرطوم لانه الثقافة الإقليمية بقت هي الطاغية والمسيطرة
07-12-2013, 03:20 PM
إبراهيم عبد الحليم إبراهيم عبد الحليم
تاريخ التسجيل: 10-31-2008
مجموع المشاركات: 3563
Quote: الأغنية الأخيرة ( ليه بتسأل ) ادتا ( نسرين هندي ) باداء أكتر من رائع غايتو في همهمات عملتا اضافت بيها حلا للاغنية وبعدين بتسلم العازفين صاح ( كنت اجمل أغنياتي ) مط في مكانو الصاح وتاني الحتة ( كنت داري وكنت دوحي . كنت . كنت داري وكنت دوحي ) شوفتو ( كنت ) البين النقطتين دي خطفا مبالغة اضافة لأنها واثقة من امكانيتها وبعدين ما جعانة غنى زي ( فرفور ) مجرد ما الشباب شالو معاها بتخليهم يكملوا باقي المقطع حقيقي ( نسرين هندي ) اضافة للبرنامج واتطورت كتير . لي بعدين نشوف طه وصباحي واحمد المامون ديل اللحدي هسه ما سمعناهم في غناء فردي
شوفت يالليندى ماسكة ايقاعها كيف وطقطقة الاصابع المحننة ونقرشاتها اللطيفة على المايك انشاء الله تنزل بردا وسلاما على حبيبنا طارق ود جبرين ههههييييع.
07-12-2013, 03:28 PM
إبراهيم عبد الحليم إبراهيم عبد الحليم
تاريخ التسجيل: 10-31-2008
مجموع المشاركات: 3563
الاخوة فى الكمنجات سلطنة صاح واسماعيل عبد الجبار مبالغة اتقان للعزف وقيادة للفرقة باين عليه الاكثر الماما بغناء ابراهيم عوض وابن البادية. استاذ الاجيال محمدية رجل حقيقة تحفة باين علية مستريح ومستمخ ويبدو انه يجر شريط ذكرياته لهذه الاغانى مع اصحابها الرواد فترة الستينيات الخ. زرياب تشعر به ملئ بالفخر كلما جاءت اغنية من الحان ابوه برعى دفع الله
07-12-2013, 03:30 PM
saidahmed shami saidahmed shami
تاريخ التسجيل: 01-08-2013
مجموع المشاركات: 2348
Quote: للأسف الاغنية الاخيرة دائماً ما بحضرا لأنها بتصادف بداية الصلاة عندنا وببقا مارق فغايتو الزول الغنا الاغنية الاخيرة الله حلاهو مني :):):) حا احاول اسمعا هنا وبعد داك اجي اشاتركم...
المافي شنو؟
لا تأخذنك في غنى الفنان الذري رأفة بالله
--------
يا أمير عمك [اب قلنسوة] دا قايل نفسو مشارك في ياتو برنامج بالضبط!؟ اداء كوميك لمن غلط ذاتو!!
07-12-2013, 07:22 PM
حبيب نورة حبيب نورة
تاريخ التسجيل: 03-02-2004
مجموع المشاركات: 18581
حلقة الليلة طلعت محبطة لي أبعد الحدود .. بس مفروض الليلة النقد ما يكون لي الفنانين ..نووو النقد يكون للفرقة الموسيقية .. ياخ كميية من الكركبة والإزعاج مااا عادية .. بالجججد العازفين بتاعيننا ديل ناس جايطين سااااي... أييي زول عايز يظهر الآلة حقتو ..مليجي كررر كرر كرررو ..الطبلة كرو كرو ككرروو..اسماعيل ويك وااك وييك جنييط. الأورغنات ترم ترمرم ترررم .. م ممكن ياخ كده..بالجججد كتبو ليكم نوتة والتزمو بيها بيكون أجمل.. المحبط في حلقة اليوم مش اداء الفنانين لأ..المحبط اليوم اختيار اغاني الحقيبة .. بالجججد بااالغت يا السر قدور..حتتتى اختيارك لي اغاني الحقيبة كان اغاني رتيبة مملة مكررة .. في اغاني حقيبة كده لو اتغنت بتلاقي صدى أجمل في النفوس خصووصا الاغاني المدسووسة جووة وما اتسمعت .. دي اغاني بيكون فيها عنصر المفاجأة وبتدهش المستمع إنو كييف اغاني زي دي ما سمعا !!! ثبت بما لا يدع مجالاً للشك إنو الإختيارات من أغاني الجيل الأول من الرواد هو الأسلم لنجاح هذا البرنامج ..وهنا اقصد وردي وعثمان حسين وابو داوود والكاشف وابراهيم عوض والتاج مكي و و و و
ويا أحمد التيجاني خليني ارد ليك : انت شكلك قريتني غلط والغريبة انت قلت كلامي الانا قاااصدو زاااتو ..انا قلت فهيمة مرقت من جلدا عشان تتمدن وياريييت لو غنت بي اقليميتا القلتها انت دي.. فهيمة ما غنت بي طابعا القروي بتاع النيل الأبيض..فهيمة غنت بي إحساس بت الخرطوم البتحضر في حفلة .. ناس الكاشف وود اللمين جو بي اقليميتهم وهنا ما بقصد الاقليمية الانت فهمتها لكن جو بي الكاريزما حقتهم واجبببرو ناس العاصمة يمشو على هواهم وليس العكس.. أرجع البصر كرتين يا ود التيجاني وعسى تفهمني ..
07-12-2013, 08:37 PM
الليندي الليندي
تاريخ التسجيل: 05-27-2002
مجموع المشاركات: 1188
تحياتي لصاحب البوست و ضيوفه بقينا نحضر البرنامج و نجي جاريين للبوست الرائع دا زي ناس الكورة زمان يشاهدوا المبارة في التلفزيون وهو مغلق الصوت و التعليق في الاذاعة ---------------------------------------------------------------------------------------------- اعجبني في فهيمة ارتدائها في الحلقة الثالثة لثوب بالوان و شعار حملة (دعو كل بنت تنمو سليمة) اهو الفنان لازم يكون عندو رسالة عمر الفاروق تعليقاتك جميلة و كلها في مكانها بس خفف الابنص شوية على فهيمة ما قدر دا كمان....لسه الزولة بتطربنا ياخ
07-12-2013, 11:52 PM
شهاب الفاتح عثمان شهاب الفاتح عثمان
تاريخ التسجيل: 08-28-2006
مجموع المشاركات: 11937
Quote: الحلقة التانية أحسن حالاً من الحلقة الاولي فالموضوع واضح أغنيات وحديث عن الشاعر ( محجوب سراج )
موضوع الحلقة الاولى كان واضح من الريبورتاج البدت بيهو الحلقة ..
كتبت العزيزة (آيات) في سودانيات:
Quote: سلامات قيقا وضيوفه الريبورتاج جميل وملهم خصوصاً صور الفنانين القديمة بأصواتهم تعتبر إضافة جيدة أكثر ماألهب حماسي أغنية ياطير ياطاير و آداء فاطمة ..
وردي، ابراهيم عوض، عثمان حسين، عبد العزيز داؤد .. البدايات مع الاذاعة .. والجماهيرية
وتقريباً اغاني الحلقة اتبعت نفس النسق .. وان كان اداء اقل .. طبيعي
الحلقة التانية زي ما اوردت في مقتبسك كانت عن (محجوب سراج) .. التالتة زي اورد الشباب فوق (سيد عبد العزيز) .. وهكذا دا كلو كوم وتجدني مع المندهشين في تجاوز مس الحزن المقيم على رحيل درة الغنا السوداني .. وأحد فلتات زمانه ..
الجان .. الجان ملك السودان
يبقى تقدير جدلي جداً في الآخر!!
تحياتي
--------
ما عرفتو لي معتز قايل البرنامج دا اسمو شنو هو!؟ اللبس الغريب .. مشناهو على مضض .. الاداء العجيب دا شنو!؟ اجي!!
07-12-2013, 09:50 PM
عزالدين عباس الفحل عزالدين عباس الفحل
تاريخ التسجيل: 09-26-2009
مجموع المشاركات: 9024
سيد عبد العزيز ولـد بحي العرب بامدرمان عام 1900م وذلك الحي الذي كان يعج بالشعر والفن والأدب فقد كان به عبـيد عبدالرحمن وعـبدالرحمـن الريح وأحمــد عبدالرحيم العمري وهو صاحب مدرسة متميزة في الشعر والجزل الرقــيق فقد قال الشعر صبياً وأكمل تعليمه الأولي ثم عمل مع الأعراب في البيــــــع والشراء بزريبة البهائم ثم هجر الزريبة وسوق العرب ، وتعلم صنعة الحــديد حتى أصبح ميكانيكياً ماهراً وكان يستقل دراجته ليتعلم اللغة الانجـليزية في المساء مما أهله ليشق طريقه في مصلحة النقل الميكانيكي بنجاح وأقـــــتدار وكان يغشى مجالس العلم واللغة العربية في حلقات المعهد العـــــلمي وكان كثير الاطلاع وحاد الذكاء فجاء شعره لوحات بارعة من الإتقان اللفــــــظي والمعنوي .وبرغم أن سيد عبدالعزيز كان في الجناح المناوئ لصالح عبدالسيد عندما انقسم شعراء وفنانوا الحقيبة الى معسكرين إلا أن شعر سيد عبدالعزيز هو الأقرب الى شعر صالح غزارة في الإنتاج وجودة في الصنعة وروعة في التعبير . وقد أنتقل سيد إلى جوار ربه في اغسطس 1976م فسكت هزار صداح . (من ديوان الجمال والحب في بلادي) ، جمعت أشعاره وأغانيه في ديوانين هما (الجمال والحب في بلادي) و (أنّة المجروح) .
لا أدري إن أطلق عليه قبلاً شاعر الليالي أم لا ، فقد لاحظت أنه ذكر كلمة (الليالي ،ليلة) في غنائه كثيراً .
من أكثر الفنانين الذين تغنوا لسيد عبد العزيز هم: كرومة : كانت ليلة، بدري ودّيني، حور الجنّة ، دمع الشوق ، زهيرة روض الجنان ، ضناني هواك ، هب لي يا نسيم، الجوهرة، حبك حي ، فرحة الروح، ليلة الوصال ، الليالي الفوق الجنان ، السادة ، ملك الحمّى ، عمل الخير ، من خور الجنان ، ليلة كانت ليلة ، أسماء ، يا أماني ، سيدة وجمالها فريد، نغم فيه، ليلة كانت ، يا ام جمالاً يشفي السقيم، ما صيدة الوادي، يا بليبلة، سيبي لي شي في روحي، مكارم الأخلاق ، بهواك ، للعزة، ليلة هل فيك طيف، لياليك ، حبيبي جماله، المال بالزهور ، بدري حالي، هل لي وداد، حي حدايقها وأشجاني سجعيها ، جميعها لحنها وغناها كرومة.
سرور تغنى بعشرة أغنيات تقريباً ولحنها وهي : يا قائد الأسطول ،إستقبال ، قمرية قالت ، أنّة المجروح ، لي نيّة في قمر السما ، صباح النور ، مر يا نسيم ، الـ في دلاله ، ذات الخال ، أنت بديع.
تغنى له ايضاً الفنان رمضان حسن ، الكاشف ، أولاد المورده (يا مداعب الغصن الرطيب) ، الفاضل أحمد ، حكومة والطيب، عبد الله الماحي وغيرهم .
.
(عدل بواسطة عبير خيرى on 07-12-2013, 10:15 PM) (عدل بواسطة عبير خيرى on 07-13-2013, 05:54 PM)
07-12-2013, 10:37 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الحلقة برضو أثبتت بما لايدع مجالاً للشك إنو السر قدور ده بينضم سااااي ..ساااي شدييييد ..المهم أييي كلااام والسلااام .. بالجججد الليلة السر قدور اثبت لي نظرية الإستنكاح .. يعني قصة سرور بيغني في العالي وكرومة بيغني في الواطي وبرهان بيغني بين بين دي حشو ونضمي ساااي.. الأدهى والأمرر والمحبط إنو السر قدور استخف بي عقولنا كمشاهدين ومستمعين .. عشان يبرهن نظريتو قام غنى ليهو اغنية لي سرور وقعد يطلع بي يدينو لي فوووق ثم فووق ثم فووق وهو بيكورك لحدددي ما وقف يدو فووووق وقال شووفتو سرور وقف ويين ؟؟ شوفتوهو كان في العالي كييف؟؟ ما نزلوهو الا الشيالين ولو ما الكوورس كان وصل النجوم!!! يعني انا ممكن براااحة شديد اقوول نفس الكلام ده عن اغاني كرومة واجيب اغنية لي كرومة واكووورك في العااالي واطلع بي يديني فوووق لحدي ما أوصلهم عطارد واقول ليكم شوفتو شوفففتو كرومة ده بيقيف وين !!!؟؟ ياخ ده إستخفاااف والله ما بعدو إستخفاف ..
07-12-2013, 10:55 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
وليد عبد اللطيف
الليندي
علاء سيداحمد
Ehab Eltayeb
شهاب الفاتح عثمان
عمر الفاروق
saidahmed shami
طارق ابراهيم ابوالفضل
داليا حافظ
نصر الدين عثمان
ودالعباسية
معتصم محمد عبدالرحمن
إبراهيم عبد الحليم
الرفاعي عبدالعاطي حجر
abas
دينا خالد
معتز عبدالله
يحي قباني
طارق جبريل
الخير محمد عوض
د. ياسر عبد القادر
بشرى مبارك ود السقاى
عبير خيرى
Abuzar Omer
سيف الدين محجوب
أسامة عبد الجليل
حسبو عكاشة
احمد التجانى احمد
ALGARADABI
أمير محمد ادريس
حبيب نورة
Nazik Eltayeb
عزالدين عباس الفحل
ناذر محمد الخليفة
فيس بوك
تويتر
انستقرام
يوتيوب
بنتيريست