عن حبيبتي ( أركويت ) بحكي ليكم ...

Quote: مربعات 61 و 63 طبعا يامزمل عرفت اخيرا انه الاخ سيف الدولة ابن الوالد كامل جارنا الله يرحمه بعرف اخوه الفاضل والاخت رجاء من الوالدة , بعدين الفاضل دا مع كل رحلة بجيب ليها هدية . فتحياتنا للاخ العزيز سيف الدولة وبرسل ليه صورة الوالدة هدية ،،،،، طبعا يا مان بيتنا الهسع كان ساكن فيه الاخ عباس ادريس الله يطراه بالخير اخو عبد الحميد ادريس ، نحن جينا اركويت من البلد (جزيرة بدين ) رطانة ساااااكت سنة 79 . وجينا 61 فى 87 تقريبا المهم اهلنا الرطانة ديل اغلبهم ساكنين الكلاكلات والحاج يوسف فى الزمن داك والى الان مناطق مغلقة بالرطانة (الله يديهم العافية )وكان هناك ثلاثة عثمانيون فى اركويت الحاج عمك عثمان هارون فى 43 وابو النسب عمك عثمان محمود (ابداب ) 63 والوالد عليه الرحمة عثمان ترجمان 61 . وبحكم قرابتى بمجدى ابداب طبعا (سنطاوى ) اللقب تم تسجيلنا فى التقدم ,,,, واذكر الريس عباس (ركس) دا طبعا شخصية ما ممكن تتنسى من الذاكرة لانو كان داهية فى الادارة وكسب الشكاوى ،، طبعا سبقونا فطاحلة فى فريق التقدم نذكر منهم الاخوان سيف عبد الغنى (ابدلنج ) الغريبة كنا بنقول ليهم زماان العجائز ونتمرن معاهم , هسع بقينا معاهم رسمى فى فريق العجائز . من بيتم كان فى مدفعجى وبشير. جارهم طوالى عقيل وطلال يس وحاتم قسم الله وكان ما شاء الله اخوانا الرشيد بابكر ومحمد بابكر وابو السيد والدكتور بيطلعو من بيتهم . ديل من الجهة الجنوبية للميدان اما من الناحية الشمالية عند الرائع عبود وايوب وعند المحسى اب قلبا حار خيرى الامين (يا مزمل خلى خيرى يتم ليك الباقى ) وكتااااااااار تانين . من 63 عند مولانا معتز عبد الله ومجدى عثمان والعزيز جمال الخضر (عرارة) وخالد جاكلين وقبيل نسيت سيماوى والباشمهندس معمر ساتى مهندس الوسط وعندك الدكتور رياض ومنو الما عجبو لعب رياض ؟ رياض دا كان لعبو ممتع عديل كدا . زى ما قلت ليك انا جيت المربع متاخر شوية عشان كدا خلى خيرى يفت الجماعة يا مزمل . ما تنسى مجدى الحلبى واخوانو ازهرى ومنتصر و(بريك ) العجيب . المهم يا مزمل ما ننسى اخونا الشهيد اللاعب اب قلب حار الله يرحمه فاروق . طبعا المرحوم عندنا معاه زكريات كتيرة منها كنا عندنا مباراة نهائية فى الرابطة مع ناس سانتوس وكنت بطرد دائما ، المهم عملو لينا معسكر وطول مدة المعسكر يقول لى الليلة طول البال ما تتكلم مع الحكم عشان ما تتطرد , المدرب كان كمال عبد الغنى وكان بيلعب بينا الاتنين مهاجمين ، المهم اول عشرة دقائق المرحوم كان مطرود فى المباراة . وانهزمنا 0/2 . طبعا يا مزمل من حلتكم لعب معانا المرحوم وياسر كجول قدامنا وتانى كمال خميس اما الاعزاء اسماعيل وهيثم خميس والعزيز الشاذلى وعندك عوض دوكة واحد تاى اسمه رنقو والخطير ايمن عبده وامجد عبده فديل كانو نجوم فريق الامل اياماتنا . طوال الفترة اللعب فيها نحن وكان منتخبنا يتكون من : ياسر كيس فى حراسة المرمى (اخو الجيلى مرسال ) فى الدفاع اللايوق المهذب خالد ابنعوف (جاكلين)وايوب الموهوب والكبكابة مدثر (قعر بابور ) معاه الحريف طاسين (طبعا طاسين عندو اخو الكبير عامر دا كان احرف واحد فى الحلة .) فى الوسط المتاخر خيرى الامين صمام الامان وعندك جمال عرارة ومعمر ساتى (هندسة ) عامر محمد احمد وناصر.. واخوه بيجو والباقى ما متذكر كويس .. المهم فى الموضوع طوال فترتنا ما انهزمنا من الامل يا مزمل .. غالبينكم طوااالى او متعادلين . مباراة الامل كوم والمباريات التانية كوم . وكانت هنالك مباراة خاصة بين الاخوين المرحوم فاروق واسماعيل . مع الفارق انو اسماعيل لعبو رايق والمرحوم بتاع جرى وقوة اداة . انا عاوز اعرف من خيرى الامين هو فى الاول كان فى النهضة مع ناس منتصر الحلبى ؟ بعدين كون انو الاخ كمال عبد الغنى فى الحلة ، لعبنا مع لاعبين افذاذ فى ميدانا فى التمارين او فى الدورات الودية ومن اللاعبين كابتن حامد بريمه وعيسى صباخ الخير منصور سبت وبدر الدين بخيت وحارس الهلال سليمان بمبى ومجدى مرجان اما الاخ العزيز فيصل ومحمد بابكر فديل الظاهر كانو فى المدرسة العالمية بيلعبونا مع الخواجاااات عديل كدا ومرة عملنا دورة فى ميدان التقدم ، الخواجات ديل لمن جو باللاندروفرات يمكن ملو الميدان وطبعا كانو منظمين التقول بنلعب مع مانشسستر الغريبة مرة من المرات نزلو لينا بت اى والله بنية تضرب الكورة اقوى من جاكلين . ومرة نزلو لينا كلب عديل كدا ،،،،،، بعدين بعد ما شطبونا من الرابطة او بالاصح اكملنا العمر عملنا فريق اسمه (كولمبيا ) يا مزمل كابتنا كان عبد المنعم رشوشة فريق بتاع ضحك لكن الغريبة كنا بنغلب طوالى . دى بعض الذكريات بتاعت الكورة ونجى نتكلم لاحقا فى مجالات تانية بالرغم نحن الزمن داك كنا مولعين بالكورة والفتة وما كان عندنا مواضيع تانية نهاااااائى . بس جاكلين ومجدى محى الدين كانوبزكو الحفلات (جاكلين كان بمشى عشان العضة ). بعد ما انتهينا من الابتدائى وزعونا فى حلويات سعد اتذكر كان معاى محمد محجوب وعوض الله ابراهيم من 63و61 وعثمان ساتى 46 وزهير عبد الفتاح عبد الحى 47(نفسى الاقى الزول دا ) والمرحوم عبد القادر وعندك الحبيب امجد حبيب الله عبد الله 54وكتااااار من الزملاء وحلويات سعد قضينا فيها اجمل السنين والما قرا المتوسطة فى سعد ما .......... عارف يا مزمل كانو بوزعوا لينا بسكويت كد ا اسمو بسكويت كوكو يمكن . وفى مولد النبى (ص) كانو بيوزعو لينا حلاوة مولد ولو من جيت شاكى الردة ولابس نضيف ومكوى ولابس الشارة المدرسية , الله معاك اما الخضرة فحدث ولا حرج , النجيلة والاشجارو الزهور , كمان الاختبارات بتكون فى الهواء الطلق . اما احلى شى فى سعد , الاساتذة الاجلاء ، الاستاذ تاج السر(ابو عبادة ) اللغة الانجليزية الاستاذ الشيخ اللغة العربية اما الرياضيات الاستاذ محمد على وعندك الاستاذ عابدين (ارفع الشادوف )والاستاذ عمر والمدير عمر (ساكن اركويت هو واستاذ عابدين فى كم وخمسين) لطفى ...