هل سيطول انتظاري لإعتذار من فتح الرحمن حمودي..قيقراوي سابقاً .. ام..!

Quote: لن اعيش في جلباب ابي .. او " اولادكم ليسوا لكم، اولادكم ابناء الحياة، والحياةُ لا تُقيم في منازل الأمس "* قريت عن انو في بعض ضهاري الصين، بضيفوا لاسم المولود حرف جديد كل سنة .. الفكرة مبدعة -ان صحت- لكن الدبايب البعيشوا كتير ديل اسمهم ببقى قطر غايتو .. مرة (فادي) ولدي قلب الدنيا وجاط البيت فوق تحت .. كيف نتجرأ ونسميه (فادي) على مزاجنا!؟ وبما اني المجرم تحملت مسئوليتي تماماً .. واعتذرت اعتذار تاريخي عن الخطأ الشنيع والجريمة المنكرة دي.. وطوالي انتقلت في العدالة الانتقالية لجبر الضرر، اها اسي ما فات حاجة، انت داير يسموك منو .. وليك علي اغير ليك كل الاوراق الرسمية قال عاوز (غسان) .. غسان غسان .. المافي شنو!؟ اظنو كان معجب بي قبيلة الغساسنة .. صاحبي وزميلي وحبيب ألبي (غسان وهبي) فتمت المصالحة .. وانتقلنا بالعدالة لصفحة جديدة فتح الرحمن .. فأل الوالد -رحيمو الله- اسم جميل، في الحقيقة عاااجبني جداً .. لكنو رسمي جداً اسم الوثائق الرسمية .. نادراً ما اتسميت بيو في (الحياة) الحقيقية خارج الاوراق الرسمية اسم بيروقراطي يعني، وقصة حياتي اتنازعتها ورقيتن، ورقة شجر نسب تنهتي عند العباس عم النبي الكريم محمد (ص) (ويا النبي نوح!!).. ودا برضو فال الوالد فهو حمودابي ينحدر (سامعني يا البطل!!- ينحدر من فخد العالياب .. كفرع مر (الحموداب ابان عشاياً قرض) كما تردد امي بت امنة بت السيمت -ربنا يديها العافية- في هجاءنا.. مع انها هي ذااااتا حمودابية .. والسيمت نزل السافل، واستوطن ادنى سهل البطانة ساي. والورقة التانية -كبدعة من بدع الانقاذ الما بتنتهي- هي (شهادة وطن) .. اي والله الوطن بقا يحتاج شهادة!! تشهد فيها حكومتنا السنية -شخصياً- اني مواطن سوداني مولود بجنوب السودان -اعالي النيل - القيقر.. تلك القرية الوادعة التي ترقد مطمئنة على الضفة الشرقية للنيل الابيض .. الراقد مطمئن في خنوع مريب هو ذاتو، مقارنة برفيقو الازرق الثوري/الشاب! او كما قال د.منصور خالد " اولادكم ليسوا لكم، اولادكم ابناء الحياة، والحياةُ لا تُقيم في منازل الأمس "*