|
|
 Re: الخميس 30 / 5 تخليد ذكري الراحل حميد بالنادي السوداني أبوظب (Re: saidahmed shami)
|
فى الجنه رب العالمين يديكا .. يا ...
وطن المداين الفاضـــــــــــــله
سكانو انبياء
ومامت يا الموتك حياه
لقمت عمرك للوطن
وآخر شئ لقمتو الحياه
أديته روحك للسحاب
يسقى الأراضى الميته
من قل المياه
وجسدك صبح جوزين حمام
يا تركة الصالحين والأولياء
.......................................
يا حسرة يا أحزان مدد
حميد عضم ضهر البلد
يا كلنا ويا أى زول يا زول بلد
والله يوم فقدك تقول
من أى بيت مفقود .. ولد
بيوضة الأحزان وراك
برسيمه فى جوفنا إتفرض
ضو الفريق ... البقضى للناس الغرض
البفتش للعلاج .. قبال نئن من المرض
ويوم بوشنا قبال ما نهوش
نلقاهو أول زول عرض
يا كبير ال الله ما اداهم كبير
أبو اليتامى وأبو البلد
قابض على جمر الوطن
أحد ... أحد
ما حدت عن هذا الطريق
لمن قبض ودّ اللحد
............................................
بسم الذين تحبهم
والفيكا مكتولين كمد
صابرين وأبدا ماب نقول
حميد رقد
منو العوض وليهو العوض
حميد رقد
ونضرب يدينا على بعض
حميد رقد
ما الخير بيمكث فى الأرض
ويطفح على السطح الزبد
لو غيّب الموت الجسد
جوانا عايش للأبد
...........................
يا امبراطور يارئيس كل الغلابه ويا زعيم
سوينا من إسمك حرز
لى عازتك من كل شيطان رجيم
مطموره المنى والامانى
يا خشم باب النسيم
نلقاكا وين نقعد معاك فوق عنقريب
تحت الضــــليل الرامى نيم
ورحــــــلت ودعت المنافى
رقـــــدت عــــافى
بين حنايا الارض والوطن الرحيم
وخليت أثر دربك ضياك
ذى الصراط المستقيم
وكل الرجال عبد الرحيم
كل الحريم السرة بت عوض الكريم
فاليبقى سفرك يا صميم
الرجعة للبيت القديم
خبرك تصيحبو الهبوب
ريح الشمال ريح الجنوب
وين الله ما رفع ـ القدم
حين ترفع الفاتحه القلوب
يملأ الدمع حتى الجيوب
رب العباد مولانا
أرحم من رحم
بنات نعش نجم الثريا
إتحت فى صيوان عزاك
ذى البرم
القرشى والماظ الهمام
واى فارس
عنوة فى التاريخ بصم
الكل حضور للهدهد الجاب النبأ
و لى حمامات ... الحرم
ترهاقا حالف باليمين
قدر مقامك يا علم
ليك يبنى فى نورى الجريف
ريقان طرابيل جم ... جم
شاويش معاهو المك صبير
لا حسرة فوقن .... لا ندم
ومهيره واقفى تعزى فيك
دوباى غناويك حافظه صم
كانت تنهّر فى حريم
كوم الرماد خمنّو .. خم
وكرجت سنونه على رجال
لطمو الخدود
والدمعه دم
ونقرت بشيشى على شتم
ويديها مليانات ... ختم
والموج يصفق والنخيل
بى عزه ماد ليك وإنقسم
حميدنا يا الحجر الأصم
غناك حاحايه ... الصقور
ما ركا .. فوق حيطك .. رخم
يا عشا الضيفان
و رواب العشـــــــم
البركل الشامخ يشابى
القومه ليك يا محترم
فكيت كتير ريقة الوطن
ودرت كم قرمه وخرم
يا حبلنا السرى الببخ
فى الجوف .......... نغم
حب الأرض عشق الأرض
يشفى يداوى من أى هم
................................................
يا حبنا ... ويا طبنا
يا دوح قلوبنا وبلسما
زرقاء يمامتنا التعاين
من بعيد حين أصاب
شوقنا ...... العمى
جبار خواطرنا ومشاعرنا
المجرحه .. ديمه
إياك برها
ياتو بحرا عرقو ... حامى
جزيرتو ما جيت حازمه
تربال زرعت قلوبنا حب
شتلك قبض والضل رمى
حميدنا يا حميدنا سى
وريتنا معنى الإنتمى
يغسلك الله من اى سئ
يا البيك قلوبنا متيمه
وطنا يكون ما زيو ذي
فى سبيلو روحك سايمه
يعرض صبيهو مع النقى
بدل الكلاش والراجمه
الضبعة سارحه مع الجدى
يرون صحارى بعد ظما
فرخ ا لقمارى مع الحدى
وفيض الأمانى الحالمه
العبره شقت عازة طق
أطرح وشيكا وناغمه
الابيض الازرق دموع
حرقت خدود العاصمة
يا غفيرا وكت تنوم
من أى هم ما ينهما
ما همت غير بى ها الوطن
حبك يفوق أرضو وسما
ورحلت قبال الأوان
يا دوبو عرق الحب نما
وقفت على طولا الارض
وأداكا تعظيم السما
وحبك صبح للناس فرض
والنيل فى حضنك ارتمى
................................
يا العشتا بينا ونحن فى
وما كنا فى
يوم قلت حى على الكفاح
شلال دماكا على الارض
باكر يفرهد ونحنا فى
ولسع نصاح
وافكارك أنت بلد .. بلد
مختوته فوق كتف الرياح
تجى طالع انت مع البذور
كون من سماح
توزن كمنجات الطيور
تعزفك غناك بى إرتياح
تفوح أريحيتك زهور
مودة ريد وحنان وحب
يشفى الجراح
وتظل حضور عزّ الغياب
شمسا تطل
فى كل صباح
إراده لى كل الشعوب
تهب متل
ريح الصلاح
ويهدل حمامك فى أمان
والكل يقول
... أرضا ســــــــلاح ... أرضا ســــلاح
(خليفه عثمان خليفه)
|
|
 
|
|
|
|
|
| العنوان |
الكاتب |
Date |
| الخميس 30 / 5 تخليد ذكري الراحل حميد بالنادي السوداني أبوظبي | saidahmed shami | 05-25-13, 06:23 AM |
| Re: الخميس 30 / 5 تخليد ذكري الراحل حميد بالنادي السوداني أبوظب | wadalzain | 05-25-13, 07:13 AM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-25-13, 07:33 AM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-25-13, 11:18 AM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-25-13, 12:57 PM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-26-13, 05:06 AM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-26-13, 10:23 AM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-26-13, 02:10 PM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-26-13, 05:38 PM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-27-13, 06:13 AM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-27-13, 05:14 PM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-28-13, 11:05 AM |
| Re: الخميس 30 / 5 تخليد ذكري الراحل حميد بالنادي السوداني أبوظب | الجنيد حمد | 05-28-13, 11:45 AM |
| Re: الخميس 30 / 5 تخليد ذكري الراحل حميد بالنادي السوداني أبوظب | الطيب عثمان يوسف | 05-28-13, 12:10 PM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-28-13, 01:01 PM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-28-13, 12:59 PM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-28-13, 01:02 PM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-29-13, 11:17 AM |
| Re: الخميس 30 / 5 تخليد ذكري الراحل حميد بالنادي السوداني أبوظب | saidahmed shami | 05-30-13, 05:16 AM |
|
| |
saidahmed shami
فيس بوك
تويتر
انستقرام
يوتيوب
بنتيريست