عاد ده كلام ده يا اهلنا؟.. الواحد من قبيل متحنفش و مجهز ليهو شكلة لناس دينق و خالد كودي.. تجوا تقطعوها ليهو في راسو متل ده؟..!!
بارك الله في نفر منع حدوث شكلة بين اتنين (حكمة قاطعها من راسي الفاضي ده..!!).. المهم على قول شيخنا تبارك شيخ الدين..!
اول بالتبادي.. فيصل يا صديقي..نحن في الدلنج (تقرأ جبال نوبا).. لمن يموت زول..بنقوم نغني.. عارف ليه؟.. عشان نمجد معنى الحياة في الراحل.. و دي ياها البيقولوا عليها (اذكروا محاسن موتاكم)..بنقاوم الموت اللعين بالغنا..و الله صحي.. يعني حكاية نحزن و نكشر للدنيا دي.. تب ما عندها معنى عندنا.. هون عليك يا صديقي.. الذاهبون ، دوما هم اجملنا..
تاني التبادي..تحية خصوصية للشابة جميلة ابراهيم السيد..وكتين في زولة ، في زمن ثقافة الدوت كوم الهايفة ، بتنفعل بوليم اندريا قدر ده.. دي في ذات نفسها حاجة بتدي الذات رحمن.. شغل جميل يا جميلة..!..يحي قباني مافي شكرا ليهو تب.. لأنو الفراشات الأنيقة دايما بتهوي تقع في اللهب بطولها..و منها بتعلمنا انو اللهب ده حاجة سمحة خلاص..!!!
ثالث التبادي.. يا لؤي.. نحن زمان رفعنا الراية لصديقنا نادر الفضلي..و الواحد هسع قرب يشك انو نادر ده كان مع ناس وزارة المالية في الستينات من القرن المنصرم..يعني زول معتق عدييل..!!!
رابع التبادي.. نحن السودانيين (يعني بالدارجي الواحد ده.. عشان ما يجي واحد يشبكنا نحو و قواعد و الذي منو).. دايما عندنا اجمل اللحظات هي ما مضى..و اجمل الحاجات ما يأتي عابرا (مثل مفاكرتنا هنا)..اكتر ناس الواحد بيخاف منهم في المنبر ده.. زول بيكتب باسم (ود عزة)..وزول بيكتب باسم (وليم اندريا)..
و اول مرة افعلها في هذا المنبر..و اقولها للزول القاعد يكتب باسم وليم اندريا..ياريت تكتب لي في الماسنجر .. انت منو..و قاعد وين في الدنيا دي.. عشان نقول ليك بكل صدق و محنة..لست وحدك يا صديقي.. فنحن.. عيال الضهاري الساكت.. برضك بنعرف الزول الإسمو وليم اندريا.. كابتن كرة السلة.ز القام مشى بالسودان لمصافات بعيدة لم يأتيها السابقين أو اللاحقين..ده غير مغنى الجاز النادر..!!!
من ماساة الشاب وليم اندريا.. اتعلمنا الأ نثق في نخبة السودان:و هي النخبة التي تقتل بالمصادفة ، فراشات الجمال الأنيقة مثل وليم اندريا ، و بعد سنين ، و بالمصادفة برضك ، تقوم تقسم ليها بلد اسمو السودان لبلدين اتنين..!!!... يااااخ نحن نلقاها من منو ولا منو..!!!!!!!
يا فيصل.. اعفى لينا.. مزيكة الجاز دي عندنا..من خواص خاصة الخاصة يااااااااخ..مافي حدود بينها..ناس جاز العقارب.. ح يدوا ربهم العجب لمن يلقوا الناس بتنفعل بيهم قدر ده..!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست