أستضافت الاستاذة كوثر بيومي في برنامجها الذي تبيثه القناة الفضائية السوداينه الشاعر جبر الله عوض السيد والشاعر عثمان مامان وودالشفيع ، فكان لابد من الخضوع لعمليات التلميع والمكياج قبل مواجهة الكاميرا والظهور على الشاشه فبعد تسجيل الحلقة ارسل لي عثمان مامان لجبرالله معاتباً فى خضوعهم للمكياج فكانت الحصيلة هذه الرباعيات
عثمان مامان:ـ بعد ماكنت شاد ديمة قارن الدير حاجات الميوعة مقطعة الفرفير انقلب الزمان صِحْ يا صباح الخيــر سوُّولك بُدَر ومسحوك بالفيــر
جبر الله عوض السيد سكت ود الشفيع الكان كلامو كتير قبل مايربي ريش كان عندو نيه يطير فرحان بالبقت بتردو تاني صغير في اشعار حماسنا جابلو نضماً غير
عثمان مامان : بعد ما كنت يا مامان مسمى الحاج من درب الميوعة يارفيق لجَّاج حاشوك الجماعة ودخلوك في سياج من بعد البُدَر رسـمولك المكياج
جبر الله عوض السيد خدعونا الجماعة ومالقينا مـلاج قالو وقاية من ساطع الإنارة علاج ناسي انزعجوا غاية وحسوا بالإحراج حكم أُم تكو نقبلو لا عفو لا إفراج
عثمان مامان : بعد ما كنت يا جبرالله مُر في اللوك خِلقولك جنينا من علوك دلوك جابولك مرايا وبالكِريم دهنـوك يا حليلك زمان وكتا بتاكل الشوك
جبر الله عوض السيد إنت معاي قدر فرفرت ما خلوك أنا اتقدمت شوف شيل ابكريق في اخوك ساعة الزرَّة أريت كان ناس حمد شافوك استسلمنا كلنا والجـــــــبار مفـكوك
عثمان مامان بعد الشيب هجم شال الشباب وخـتفلو سوولك فعل قلبك قبيل شنَّفـلو ما دام الكريم جسمك خلاص لطفلو يا جبر الله خايفك بكرة تتقريفلو
جبر الله عوض السيد حَرَص ود الحبيب ما فيش طريقة تجفلو موعودين عقب حلقة وأوعى تغفلو يامامان أخير خبـــر الكِريم ده تقــــفلو قبال ما يقولوا عليك بتشـــــــرفلو
عثمان مامان في آخر عمرنا ظهرت حكاية شينه للبدرة والمكياج مشينا بي كرعينا تقول خــــدرونا أصـلنا مـــا لاويــنا ربـك ستر من قـلم الحواجـب لينا
جبر الله عوض السيد عندنا هيبة وكتين في الرسبشن جينا شايلين السيوف بالقومي زينا زينة بي مسح الكريم كتلو الحماس الفينا إن بقى هادا حالنا ما بربح الراجينا
حسن احمد حسن مجبور مو خيار غصبوني للمسيح وقالو لية واجب شان هسي راكب الريح السبب الوجعني وخلاني ماني نصيح المسحني كان مصري ولسانو فصيح
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
moaz elsir
فيس بوك
تويتر
انستقرام
يوتيوب
بنتيريست