Quote: الأخ يحي قباني أبتداءً لك ودي المصحوب بمحبتي .. وأحب أن أؤكد لك أيضاً ابتداءً أنني من محبيك ومعجبيك وقارئيك .... واسمح لي صديقي أن أخاطب بنفس الكلمات أخي كبر .... مضيفاً مخاطبيتي له "يا Boss" إنت ماحضرت إنقلاب العقيد جعفر نميري؟ ولا حضرت الديموقراطية الأولى زمن ناس شيخ على عبدالرحمن والمحجوب ؟ ولا حتى ثورة أكتوبر ؟ وجبهة الهيئات؟ ولا سمعت نشيد " في 17 بعثت ثورة ثورتنا الشعبية لما أذيع لأول مرة من "هنا أم درمان"؟ الفريق ابراهيم باشا عبود طيب الله ثراه وثرى رفاقه .. طيب ولا أكلت حلاوة "ريا" .... أوعى تقول الزول برلوم دفعة د. عبدالله علي ابراهيم !!!! مودتي ومحبتي لكم جميعاً ....
بابكر..حبابك يا صديقي كتر خيرك على المطايبة السمحة الفارهة..
دكتور عبد الله على ابراهيم شنو؟.. ياخي البشوف كلامك ده يقول بابكر ده كان محرر في جريدة (الناس)...!!! وكتها ، يا صديقي ، كان الشعار (لابد من بيروت و ان طال السفر)...و الليلة بيروت تعج بناس عمك حسين نصر الله واليرموك..و الذي منو..و شرحبيل احمد..يكون نسى ليك حكاية ( و الشراب اسكوب ، كب يا علي بكبابي الشووب..)!!!!
عارف يا صديقي.. سنوات و سنوات..و انا اغالط في الشعب السوداني الفضل.. ياخي الزول ده في اول بيان ذاعو.. كان عقيد.. و رقا روح لرتبة عميد لمدة تلاتة ايام..و الشعب السوداني يشيل و يحلف ليك بدين امو و ابوهو.. الزول ده تووشك طفر في السودان و كان برتبة لواء..!!! (كتر خيرك يا بابكر.. على الأقل اثبت لينا انو الواحد لسه ما جنا و فقد المحنة..!!!)..
اها يا بابكر.. نحن ما نقول حاجة.. لكن شفت كيف المسافة كانت قصيرة خلاص بين (17 نوفمبر..و حارسنا و فارسنا و كنا زمن نفتش ليك)؟...و لو قلنا حاجة.. عينك ما تشوف الإ النور..!!!!..ياخي جخانين الثقافة السودانية دي مرات تخليك تشوطن عدييل..!!!
حلاوة (ريا ) حضرناها يا صديقي..و جضمناها ليك جنس تجضيم واحد..و برضك لمن كانت العطور طأئفية..اي و الله.. زي حكاية هلال مريخ اليومين ديل (و بالعدم سودان قديم و سودان جديد).. السودان كان فيهو عطرين: واحد السيد على الميرغني (اتحاديين لمن شايلين معاهم فتة كمان)..و التاني بت السودان (انصار لمن لابسين ليك جناح ام جكو)..!!!..و ده كلو هين ، يا بابكر ،..القاسي.. في كندا ، في الأيام الأولي.. لاقيت ليك صديقة من كينيا.. حلفت بدين ابوها انو عطر (بت السودان) صناعة كينية صرفة.. و أي واحدة سمحة في كينا عطرها المفضل يا هو (بت السودان)... ده غير بت ابا الصومالية ايمان.. الحلفت بالتقطعها.. انو غنية (عزة في هواك) غنية من التراث الصومالي؟.. صومالي بتاع عينك...!!..دي اول حاجة مرقت من لسان ..و معاها جريت (دي).. طويلة خلاس..!!!
جبهة الهيئات؟؟.. ايه يا باكر..ياخي نحن برالمة ساكت.. ناس نشرة الساعة تلاتة بتذيعها ليك محاسن سيف الدين..و يقوم يجيك المسلسل,, من اخراج صلاح الدين الفاضل..و تمثيل تحية زروق و مكي سنادة..زو بعد داك غنية لثنائي النغم لمن كانن تلاتة ( يا برالمة التالتة كانت منو؟).لكن النصيحة لله.. لمن جات (النص الحلو) و (الدهباية) الواحد كان بي شنبو..!!!..و الله صحي,,!!!
و برضك لو دقستو شوية.. بنقول لصديقتنا مها عبد المنعم.. خطي جنبك طوبة ياااااااااااخ..!!!
و عشان امير يضحك اكتر.. بنقول ليهو : على بالحلال يا امير..لو واحدة من مذيعات القنوات السودانية (ناس اليومين ديل) قامت عملت حوار مع بابكر ده..و قالت ليهو تحب تسمع شنو..و يقوم صاحبنا يخلف رجل على رجل...و يقول ليها داير اسمع قمر دورين..اكيد قريبتك المذيعة ح تقوم تجوعر و تملانا فقر و تقول لأخونا بابكر..و معاك نحي استاذنا عبد الكريم الكابلي..!!!..و ده لو ما حصل .. برضك اقوم احلق شنبي..!!!
نعتذر لصديقنا يحي عن هذه التخريمات... و دمتم جميعا.. كبر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست