كتب الكاتب الفاتح جبرا المتوفرة بمعرض الدوحة
|
|
 Re: حزمة حكاوي ابن البلد (Re: درديري كباشي)
|
3- من ثقب الأوزون
دخل استاذ العلوم الشرير على تلاميذ الصف السادس بعيونه المحمرة الجاحظة المرعبة وبشاربه الكث وشعره المنكوش وكالعادة يحمل في يده
السوط الذي لا يفارقه ...
التلاميذ الذين يدخل عليهم هذا الاستاذ يقضون اسوأ خمسة واربعين دقيقة في حياتهم يمتنون ان تنقضي ولكنها لاتفعل الا بعد ان تتضاعف
ضربات قلوبهم عشرات المرات هذا ان نجو من جلدات سوط الجلد غير العقوبات الاخرى مثل التوجه ناحية الجدار ورفع اليدين الى اعلى ....
رغم عمل كل احتياطياتهم من مذاكرة وغيره استعدادا لحصته حتى يتجنبوا التعرض للجلد الا انه كان يفلح دائما في ايجاد سبب لجلدهم .. او هكذا
كانوا يظنون به كما كانوا يظنون بانه يستمتع بتعذيبهم اكثر من اي شئ آخر ..
لكن حصة اليوم ما هو موضوعها المرعب ؟؟ كل التلاميذ كالعادة يدور في اذهانهم هذا السؤال كل ما دخل عليهم هذا المعلم الشرير الشرث ..
دخل هو يحمل كتاب العلوم ليقابله الفصل بالتحية وقوفا كما يفعل التلاميذ عادة يشير لهم بالجلوس بيده دون ان يلقي التحية .. وهم اصلا لا
ينتظرون منه سلام .. وكيف ينتظرون سلاما لفظيا وهم يعلمون انه غير موجود في الواقع ..
توجه الاستاذ ناحية السبورة وكتب التاريخ في اقصى اليمين وكما كتب كلمة علوم في وسط السبورة والتفت على التلاميذ بدون اي مقدمة موجها
سؤالا عاما ..
من ثقب الاوزون ؟؟
عم الصمت الواجم كل الفصل
كررالسؤال بنفس صيغته : يا اخوان من ثقب الاوزون ..؟؟
لم يجب احد بل تكاد تسمع خفقان القلوب الصغيرة من بعيد وهم يتلفتون ..
واخيرا بدات عين الاستاذ تحمر وتناول الصوت وقال متقدما ناحيتهم : كل الفصل ما عارف؟؟ ,,وتوجه ناحية يده اليمين موجها السؤال نحو
اقصى تلميذ باليمين ..
الاستاذ محولا كلامه الى الدراجي : قوم انت يا فقر منو ثقب الاوزون ..
التلميذ : والله يا استاذ انا كنت غايب أمس وما حاضر
بدأت الهمسات بين التلاميذ ..
أحدهم للثاني : فيصل فيصل فيصل .. الاوزون دا شنو ؟؟؟
الثاني : انا عارفو ياخ الاستاذ دا كرهنا حياتنا ذاتو يمكن يكون قاصد الزير ..
الاول : طيب القد الزير منو ؟؟
الثاني : امس كان في جماعة بيلعبو جمب المزيرة يكون ضربوه بالكورة ..
الاول : والكورة بتقد ولا بتكسر ..
يدخل : ثالث ما تورونا يا فيصل الزول دا ماشي علينا الاوزون دا شنو؟؟
ورابع : يكون قاصد المكرفون بتاع الجامع لانه بيأذنو بيه ..
سمع الاستاذ منطقة الهمس وتحرك نحوهم فعلا
الاستاذ : قوموا انتوا كلكم بداية منك انت فيصل منو ثقب الاوزون ..؟؟
فيصل : والله يا استاذ ( من باب كتلوك ولا جوك جوك ) انا يا استاذ ..
الاستاذ : شنو انت ..انت عملت شنو ؟؟
فيصل : انا كنت ماشي وبعدين بدون ما اقصد شت لي حجر كدا قام الحجر طار وقد البتاع البتقول عليه انت دا ولكن والله ما قاصد يا استاذ ..
الاستاذ : البتاع شنو تقصد الاوزون ؟؟؟
فيصل : ايوا استاذ واعفي لي يا استاذ انا انشاء الله اكلم ابوي يشتري ليكم واحد بدلو ...
الاستاذ : يشتري لينا شنو ؟؟
فيصل : اوزون جديد يا استاذ ..
الاستاذ : جدع الله يخلي لينا ابوك ويخليك انت لابوك ..
فيصل متبسما لهذا الاطراء الجميل من الاستاذ وهو اول مرة يعملها ..
وسرت همهمات شكر بين التلاميذ يشكرون زميلهم فيصل الذي فداهم بنفسه ..
أحد التلاميذ : والله فيصل بطل شوف بالله مع انه ما هو القداها ديل ناس عمر كانوا يلعبوا كورة.. واحد تاني .. طيب ليه تسكت تخلوا فيصل
يشليها براه ما تكلموا الاستاذ ..
واحدهم يا استاذ يا استاذ :
الاستاذ : ايوا نعم يا خليفة
خليفة : القد اوزون انا عارفه ؟؟
الاستاذ : منو القد الاوزون
خليفة : ديل ناس عمر كانوا بيلعبوا كورة جمبو وشاتوه بالكورة ..
عمر مقاطعا يبدو انه من النوع المتجرس : ابدا يا استاذ والله دا ما انا كذاب ؟؟ والله ما انا .... وبدا يبكي ..
مع كل حملات الرعب والبكاء والعويل كان هنالك تلميذ واحد يقفل فمه بيديه الاثنين حتى لا ينفجر بالضحك ويراه الاستاذ
ويبدا يضحك بضحكه بعد ان فهم السبب ...
الاستاذ ايوا يا طارق انت عارف من ثقب الاوزون ؟؟
طارق : نعم يا استاذ
في هذه اللحظة كان كل التلاميذ ينظرون الى طارق بنظرة توعد حتى لا يرمي التهمة عليهم وبعضهم يتوعده بضم اصابعه
مع بعضهم البعض كاشارة للانتقام منه اذا فتن بهم ,اخرين يمررون السبابة على حلوقهم مهددين بالذبح اذا فتن بهم..
الاستاذ : يا طارق اول قل للاغبية ديل ما هو الاوزن ..
طارق الازون : هو الجزء من الغلاف الجوي لكوكب الأرض و الذي يحتوي بشكل مكثف غاز الأوزون. و هي
متمركزة بشكل كبير في الجزء السفلي من طبقة الستراتوسفير من الغلاف الجوي للأرض و هي ذات
لون أزرق.
يتحول فيها جزء من غاز الأوكسجين إلى غاز الأوزون بفعل الأشعة فوق البنفسجية القوية التي تصدرها
الشمس وتؤثر في هذا الجزء من الغلاف الجوي نظرا لعدم وجود طبقات سميكة من الهواء فوقه لوقايته.
ولهذه الطبقة أهمية حيوية بالنسبة لنا فهي تحول دون وصول الموجات فوق البنفسجية القصيرة بتركيز
كبير إلى سطح الأرض ...
الاستاذ : عرفتو يا بلدا انه الاوزون ما هو زير المدرسة ولا ابريق الغفير .. والكلام دا مكتوب عندكم في
كتاب العلوم .. يلا يا طارق قول لهم من ثقب الازون ..
طارق : الطفرة الصناعية الضخمة ونتيجة للغازات المتولدة من المصانع الغربية ادت الى ثقب طبقة
الاوزون وعملت ما عرف بظاهرة الاحتباس الحراري ..
الاستاذ : برافو عليك يا طارق : يلا بعد كدا احكم على زملاك البلدا ديل نجلدهم ولا نسيبهم .
طارق : خلاص يا استاذ هم تعلمو الدرس سيبهم .
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست