|
|
 تلفزيون السودان الصيني
|
آخر تقاليع الحكومة الإنقاذية بيع تلفزيون السودان للصين وبدون الخوض في التفاصيل تخيل معي الحدوتة العجيبة انه المواد لا تخضع للرقابة الحكومية السودانية وممكن نلاقي معظم البرامج وقد تم تصيينها وكمثال برنامج أسماء في حياتنا السوداني سيتم تصيينه ويقدمه واحد صيني اسمه عمر شن يانغ جوزلي ويقوم بعمل حلقات عن ماو وشواين لاي والشاعر الصيني لي باي والفاصل الغنائي يقدم اغنيات للمغنية الصينية سا دينغ دونغ بجانب الراحلة فاطمة الحاج.
وعشان الحكاية شراكة فيفتي فيفتي ممكن نشرة الاخبار تكون مشتركة صينية سودانية خبر عن البشير وخبر عن الرئيس الصيني جين تاو وخبر لنافع وآخر لرصيفه الصيني أما المسلسلات فستكون صينية علي ان يتم دبلجتها بالسوداني وذلك لضآلة الانتاج الدرامي السوداني والتتر الخاص بالمسلسل يكون مشترك اعداد شن شان بينغ .. مونتاج عامر ابو الفتوح مساعد مخرج صيني واخراج شكر الله خلف الله.
وطالما الدوري الممتاز قد تم احتكاره بواسطة قناة النيلين فيمكن للقناة الفضائية السوداصينية ان تقوم ببث الدوري الصيني من شنغهاي يعني كلتشي لمن يحترف في الصين عادي تشوفوه في الدوري الصيني مبثوثا من قناة السودان الصينية!!
برنامج عالم الرياضة السوداني البايخ المكرر كل نهار جمعة يمكن تحليته بفقرات من الاكروبات الصينية ويمكن استضافة خبير تحكيم صيني بجانب الخبير السوداني لشرح قانون التحكيم ومحلل رياضي صيني للتعليق علي مباراة هلال بكين ضد مريخ قوانزو.
اما ناس معاهد تعليم اللغات فحيغنوا من دورات تعليم اللغة الصينية للناطقين بغيرها ولا نستبعد ادخال المنهج الصيني في مرحلة الأساس من العام القادم بس ياربي شفعنا حيتعلموا يكتبوا اللغة الصينية دي كيف؟!!
أما الدعايات التي تسيطر عليها شركات الإتصالات سوداني وخليك سوداني يمكن تحويلها الي سوداني وخليك صيني وبجانب دعاية اوشاعات يا عمدة اوشاعات 25ب قرش بث تتكلم 3 ساعات حيضاف ليها شن شان شن 10 ساعات بون ين!
برنامج صحتك الذي يقدمه البروف مامون حميدة يوم الجمعة حيستضيف دكتور سوداني وآخر صيني في حلقة عن علاج الأمراض المستعصية بإستخدام الإبر الصينية، المذيعة الصينية شنغ شينغ ستقدم سهرة منوعات مشتركة صينية سودانية محورها العلاقات الأزلية بين السودان والصين.
أما برامج المسابقات الرمضانية فستكون كل الجوائز المقدمة Made in China من السيارة للموبايل بس علي الفائزين ملء استمارة الإشتراك باللغة الصينية واللي يعيش كتير في عهد الإنقاذ يشوف أكتر!!
مقدمة البرامج الصينية شنغ شينغ
|
|
 
|
|
|
|
|
| العنوان |
الكاتب |
Date |
| تلفزيون السودان الصيني | عمر الفاروق عبد الله الشيخ | 02-10-13, 10:18 AM |
| Re: تلفزيون السودان الصيني | عمر الفاروق عبد الله الشيخ | 02-10-13, 11:15 AM |
| Re: تلفزيون السودان الصيني | عمر الفاروق عبد الله الشيخ | 02-10-13, 11:22 AM |
| Re: تلفزيون السودان الصيني | ياسر منصور عثمان | 02-10-13, 11:28 AM |
| Re: تلفزيون السودان الصيني | عمر الفاروق عبد الله الشيخ | 02-10-13, 11:46 AM |
| Re: تلفزيون السودان الصيني | Zakaria Fadel | 02-10-13, 12:06 PM |
| Re: تلفزيون السودان الصيني | ALZOLZATOO | 02-10-13, 12:26 PM |
| Re: تلفزيون السودان الصيني | عمر الفاروق عبد الله الشيخ | 02-11-13, 10:43 AM |
| Re: تلفزيون السودان الصيني | عمر الفاروق عبد الله الشيخ | 02-10-13, 12:31 PM |
| Re: تلفزيون السودان الصيني | مصطفى توفيق | 02-10-13, 12:58 PM |
| Re: تلفزيون السودان الصيني | عمر الفاروق عبد الله الشيخ | 02-10-13, 01:36 PM |
|
| |
عمر الفاروق عبد الله الشيخ
فيس بوك
تويتر
انستقرام
يوتيوب
بنتيريست