قررت أمس أسوى الغداء :)))))))))))

وعشان نكون صارحيين مع بعضينا الغدى لحسى فى الثلاجه لو زول حابى ارسله له حبابه
:))))))
الموضوع بدا يوم قررت اختى تجيب نونو جديد اللى بالتالى بلزم امى ان تستعد للسفر من شهرين
وتدس كل الحلل والعده والاجهزه
والعفش لو قدرت كان دسته منى
وبرغم محاولاتهم لتطفيشى فى احدى شقق اخوانى فى الاعلى للاقامه
لكن رفضت واصريت على البقاء فى غرفتى فى الاسفل
وبعد مفاوضات اغلقت كل الغرف وما خليت لى الا باب الشارع والحمام للاستعمال
وحنفية المطبخ للامانه والثلاجه
نظريا امى بتشوفنى ليسه فى الروضه وما بقدر اسوط الشاى
لكن فعليا انا البقيت سايطه فى مجتمع الحريم بسبب نظرتها دى
لذلك انا بستغل سفرها لانتزاع فرصتى فى التعليم وتنمية مهاراتى المطبخيه والبيتيه
وعندى اخويه سمسم كتر خيره انتحارى يقول لى امشى جيبى اى شى وجربى
اخير نحنا اخوانك بنبلعها ليكى بعدين راجلك بيدفس وشك فى الصحن يا بيلصقك انتى وهو فى الحيطه
ومع هذا التشجيع الحار مشيت السوبر ماركت لفحت لى انواع مختلفه من الطبخات لتجربتها
غايتو لمن جبت له الفاتوره قرب يتراجع لكن تانى قال عليه العوض ومنو العوض ياها الضريبه البندفعها والتضحيه البيقولوا عليها
وبكل فصاحه قبال اليوم المشهود بيوم بخيره تحب ااكلك شنو
فراخ بالبطاطس ولا خضار بالحمه المفرومه ورز
قام قال الخضار
قومت من بليل مرقت الحاجات عشان تسيح
ومرقت دفتر ذكرياتى المطبخيه البكون جاريه اكتبها ورا امى لمن تعمل اكل بحبها عشان اسجل الطريقه
وراسى كان جاط ياتو وصفه قريبه للطبخه عشان اتبيعها بضبانتها
منها طلعت لى بخمس صفحات علقتهم فى حيطه المطبخ
وسرقت رز بسمتى من مرة اخويه التانى وقولت ليها بكره اصلوا ما تشيلى هم
العضه عليه كلها
غايتو نظرتها كانت مشفقه على حالهم ما على حالى وقالت بكل خضوع مهتز امرنا لله
والصباح لمن صبح فكرت الغى التجربه وادردم تانى اكمل الشخير
لكن تانى قولت الم اكتفى من سنين شخير فاتت الحد المسموح
لانتزع نفسى عنوة من السرير واستعد للمعركه
وبعد صليت وتشهدت وكفكفت الاكمام ورفعت رجلين البنطلون ولبست الكمام وقفت امام باب المطبخ
اعاين له شرزا شرزا وكلى رعععععععععععععععععععععب اهتزت له الجدران
لكن ما كان فى سبيل لتراجع
حفقد مصداقيتى المنزليه لو ما وفيت وعدى
ومنها دششششششششششششيت
وكانت دشت العمر

,,,,

فاصل ونواصل

(عدل بواسطة رانيه محمد الشيخ on 01-25-2013, 03:19 PM)
(عدل بواسطة رانيه محمد الشيخ on 01-25-2013, 03:32 PM)