|
يا نِيلْ أمانة عليك غُناي ......
|
يا نِيلْ أمانة عليك غُناي ......
إلى محمود عبد العزيز ........
..... وقَالْ لِلْحَياة: - جاييكْ أنا، مِنْ بابِكْ السِّرِّي الْهِناك ..... جاييكْ وآآآآهـ خلَّيتْ قفاي كمَّين حُزُنْ وجبال هموم وجسَدْ رهيف هدَّاهُو مُشوار التَّعَبْ عارفْ الشوارِعْ كَمْ بتحزنْ بَيْ واري عارف الْغَناوي بينْكَسِرْ خاطِرْ غُناها ..... وتنْكَسِرْ .... لكِنْ أهُو، داير أجرِّبْ إني أرحَلْ في غُناي زي الوترْ وقتين يقوم بيهو الْحَنين لَيْ رعشةْ النغَم البعييييد اللِّسَه في الغيب خاطرة، أو ريحةْ دُعاشْ داير أشوف الضِفة ديكْ جايزْ أراوِغْ مصيدةْ هذا الأسى وحظِّي المشتَتْ زي بَلَدْ أتقسَّم النِّيل مويتو .... أو حُزْنُو الطويل ..... جايزْ هِناك ما يعرِف الخوف سِكَّتي ويبْرا الضمير تِيه المشاوير / السراب والصَّمت ما يغشى الرَّباب ...... جايزْ هِناك ترتاح خُطاي زي التَّقول صفَّيتْ حِسابي مع الألَم ومرقتَ أسمَر زي نشيد ...... ولاقيتْ كمان أحباب غُنانا ونَمَّنا "وَردِي" الْجَميل ..... "جابري" ورسايلو .... و"خوجلي" ..... وداكْ "مصطفى"، النجمو لا نام لا أنطفأْ "عثمان حسين" رايق الْغُنا "نادِر خِضِرْ" يضحك مع سِيد "الأماني الْعَذبة" دِيكْ وكُلّ الْقماري العلَّمتْ نيلنا الْهَديل ...... سابحين هِناك بيغنُّوا لليل ..... والنجوم للعاشِقِين الْلِّسَه عاشْقِين السهَر ..... يمكن نسايم الليل تجيب ملكوت حبيب الرُّوح هِنا، قبلِ إرتاداد الطَرِف أوْ ..... ............... ............... .............. ..... وقَالْ للْحَياةْ: شُكراً على غيم الْمَحَبَّة البيسقي روحي غُنا المُحبِّين في الأرِضْ شكراً على دمع الْحَنينْ شكراً على النِّيلْ الْحَزينْ ويا نِيلْ أمانة عليك غُناي ...... ما تنحني قامة النخيل والْحُبْ يجالِدْ الْمستحيل ...... لامِنْ يبِين بلَدي الصباحْ لابِسْ وِشاح دوباي جميل ...... لامِنْ يبِين بلَدي الصباحْ لامِنْ يبِين بلَدي الصباحْ لامِنْ يبِين بلَدي الصباحْ ........
عصام عيسى رجب الجمعة 18 يناير 2013 م
s
|
|
|
|
|
|
|
|
|