|
|
 Re: الأستاذ محمود محمد طه: عم يتسآءلون؟؟!! الجزء الثانى (Re: عبدالله عثمان)
|
لقاء الأستاذ محمود محمد طه بمندوبي جريدة القبس الكويتية
قامت بالتنزيل من الشريط: مريم أحمد المصطفى الحسين
قام بالمراجعة والتصحيح: عمر هواري
الصحفي: القبس الكويتية ، أزهر الخفاجي ، بدنا يا أستاذنا نعرف فكرة عن الجمهوريين – متى أنشأت وفلسفة الأخوان الجمهوريين؟
الأستاذ: الفكرة الجمهورية بدأت في منتصف الأربعينات - في أكتوبر عام 1945، وده بأرخ برضه بداية الأحزاب السياسية في الحركة الوطنية عندنا .. وقتها بطبيعة الحال البلد مستعمر والإنجيليز والمصريين شركاء في لاستعمار .. والحركة الوطنية كانت قبل الأربعينات بتتحرك من داخل ما كان معروف بمؤتمر الخريجين العام ، نشأ في سنة 1938، واستمر لكن كانت الصراعات السياسية بتحتدم في داخل مؤتمر الخريجين العام أساساً حول قطبين: السيد عبد الرحمن المهدي والسيد علي المرغني، السيد علي المرغني زعيم الطائفة الختمية، والسيد عبد الرحمن المهدي زعيم الأنصار. فكان الصراع داخل مؤتمر الخريجين للكسب لكراسي المؤتمر بتدور حول القطبين ديل. بعدين ، لملابسات الإنجليز هم الحفزوها بسرعة، الإنجليز ما كانوا بيعترفوا بأنه الخريجين يمكن أن يتكلموا في مصير البلد سياسياً.. وكان في سنة 1942 نشأ بين الحلفاء الخمسة الكبار ما سُمّي بوثيقة الأطلنطي وكانت بتعد الناس اللي تعاونوا مع الحلفا في الحرب عندما تنتهي الحرب أن يكون عندهم حق تقرير مصيرهم .. فالسودانيين من داخل مؤتمر الخريجين طالبوا بالحق ده، والإنجليز رفضوا أن يسمعوا لمؤتمر الخريجين يتكلم في السياسة .. مؤتمر الخريجين مؤتمر موظفين دا ممكن يعمل في المسائل العامة، والسياسة - مصير البلد يتكلموا عنه الزعماء الطائفيين وزعماء العشائر .. فمن هنا نشأ الوضع السياسي خرجت الأحزاب من داخل المؤتمر وخلّوا المؤتمر ليكون للمسائل التعليمية والمسائل الإجتماعية زي ما كانوا الإنجليز عايزنه، لكن نشأت الأحزاب .. لما نشأت الأحزاب بس برزت من داخل مؤتمر الخريجين برضها حول القطبين ديل، وكان عندنا أحزاب إتحادية عديدة وأحزاب استقلالية .. طائفة الأنصار كانت بتطالب بأنه السودان يكون للسودانيين وطائفة الختمية بتطالب أن يكون في اتحاد مع مصر.. الاثنين مجمعين على أنه الاستقرار السياسي بجي عن طريق راس دستوري ملكي - يكون في ملك .. فالاتحادين عايزين تاج فاروق - السودان يكون عنده نوع من الاتحاد مع مصر تحت تاج الملك فاروق .. والاستقلالين كانوا بميلوا للانفصال من مصر لكن بيتهموا بأنهم عايزين يعملوا تاج محلّي زي تاج الأمير عبد الله في شرق الأردن تحت اشراف الإنجليز .. فكانوا اتحادين واستقلاليين بالصورة دي .. في الوقت داك نشأ الحزب الجمهوري يقول مافي داعي للملكية أصله، ما في داعي للتبعية لمصر ولا لبقاء الإنجليز وإنما المسألة ترجع إلى الشعب في حكم جمهوري عام، فنشأ الحزب الجمهوري .. وبعدين الحزب الجمهوري كانت برضه فلسفته تقوم على الإسلام، أنه الناس أمرهم ما بنصلح ولا في السودان ولا في الخارج إلا عن طريق الدين لأنه الأزمة العالمية أزمة أخلاق أزمة قيم، لكن على أن يُفهم الدين فهم يختلف عما يفهموه الأزهريين والرجال التقليديين.
الصحفي: ما الطريقة؟ طريقة هذا الفهم
الأستاذ: طريقة هذا الفهم هو الدخول في الدين بصورة تطبيقية موش دراسية .. الدين موش دين دراسة ، دين ممارسة .. الناس يعيشوه عبادة تنعكس في المعامله، بالصدق ده الإنسان بقدر يصل لجوهر الدين ، يقدر يتكلم عنه .. على أي حال في الوقت داك نحن قلنا أنه الحركة الوطنية مفتقرة لشيئين: مفتقرة للحماس الوطني في مواجهة الاستعمار ومفتقرة للفكر السياسي ، لأنه التكتلات دي لمّا مشت حول السيدين ما أصبحت بترفع مذاهب وفلسفات مدروسة إنما هو تكتل - تكتل الناس حول ... وتستعد للمعركة البتجي بالوزن البتحمله الكثرة العددية دي .. نحن قلنا في الوقت داك ، نحن ما بنملك تفاصيل الفكرة ، نحن شاعرين بأنه لابد من الدين ، على أن يكون دين غير النحن بنشوفوه عند الأزهر ولا الناس السلفيين من قضاة ومعلمين دين، وإنما دين يرجع إلى جوهر الفكر الإسلامي ويبعثه زي ما انبعث في مكة في أول النهضة وأول الثورة الدينية اللي جاء بيها النبي في مكّة .. "لا إله إلا الله" تعاش من جديد وترفع إلى مستوى، ده نحن قلنا ما بنملكوا في الوقت الحاضر لكننا بنملك نواجه الاستعمار بحماس .. وفعلا الحزب الجمهوري واجه الاستعمار بحماس شديد لغاية ما اعتقلوا بعضنا وسُجنّا .. نحن أول سجناء الحركة السياسية - ده سنة 1946.. بعدين الإنجليز كانوا بمشوا مع أصدقائهم من ناس حزب الأمة ليطوروا أجهزة ديموقراطية من داخل البلد ، ليرفعوها برضه في وجه المصريين - أنه السودانيين بيتولوا أمور أنفسهم ، فكان في حاجة إسمها "المجلس الاستشاري لشمال السودان" ، وقائم على أسس وعنده وزراء بيشاركوا فيها السودانيين الإنجليز .. وفعلا ناس حزب الأمة أو الاستقلاليين قدّموا وزرا في النظام ده .. الاتحاديين رفضوه .. بعدين الاتحاديين مشوا لمصر، وبقوا يكافحوا من هناك أوائل نشأة الأمم المتحدة، وكانوا ناس النقراشي بيتكلموا بإسم السودان، وقتها في ليك سكسيس Lake Success والسودانيين قاعدين معاهم في الفنادق المصرية ، وهنا ديل متعاونين مع الإنجليز.. المجلس الإستشاري زي أصبح ميّت، فقاموا الإنجليز عملوا حاجة إسمها "الجمعية التشريعية" برضها عندها وزراء وعندها كده، لكن المرّة دي ما ميّزوا شمال السودان عن جنوبه .. المجلس الإستشاري لشمال السودان كان متهم بأنه عايز يفصل الجنوب، وده من أكتر الأشياء القتلته .. وعملوا الجمعية التشريعية، عامة ، لكن برضه الإتحاديين مقاطعنّها ، لكن المصريين اقترحوا على الاتحاديين إنه يجوا راجعين للسودان ليواجهوا - المقاطعة تكون فعّالة موش سلبية .. وفعلا جاء وبدو السجناء منهم سنة 1948. نحن في السجن حاولنا أن نطوّر الفكرة .. بدا لينا أنه فراغ الحماس انملا لأنه أصبحوا في سجناء سياسيين كتيرين .. مشينا في الفكرة لي خمسة سنوات .. في الخمسة سنوات بدأ تقعيد وتبويب والتأليف في الفكرة الجمهورية ، وهي قائمة على أصول الدين .. على فهم جديد للقرآن ، يبعث الشريعة في مستوى يحل مشكلة الإنسان المعاصر، اللي هي مشكلة تختلف من جميع الوجوه عن مشكلة الإنسان في القرن السابع .. وده اقتضى أن يُقال أنه القرآن مستويين: مستوى نزل في مكة في بداية الأمر، 13 سنة، لم يُستجب له ، وأُمر النبي بالهجرة إلى المدينة .. بدا ينزل القرآن المدني ، نسخ القرآن المكي، وبدا العمل في التشريغ بالقرآن المدني .. فنحن ما بنعتقد أنه النسخ ده نهائي، لأنه القرآن المكي أرفع مافي القرآن هو قرآن أصول، قرآن مسؤلية، قرآن حرية، "وقل الحق من ربكم فمن شاء أن يؤمن ومن شاء فليكفر" في مقابلة "وقاتلوهم حتى لا تكون فتنة ويكون الدين لله" .. فده ما ممكن يُنسخ بدون حكمة .. الحكمة في نسخة أنه القرآن المدني بناسب المجتمع في القرن السابع ، وهو أفضل ليهو وعملي فقام عليه التشريع .. نحن هسع دعاة إلى بعث الإسلام على مستوى القرآن المكي.
الصحفي: نأخذ بالسور المكية فقط ونتبعها...
الأستاذ: القرآن كله موجود .. لأنه قبيلك لما كنا بنشرّع على مستوى القرآن المدني، القرآن المكي موجود يُتبعد بيهو ويُتعلم منه ويُقرأ للبركة ويُقرأ في الصلاة .. راح يظل المصحف زي ماهو المصحف، فالقرآن المكي موجود والقرآن المدني موجود بين دفّتي المصحف يُقرأ ويفسّر، ويدرس ويتعبد بيهو لكن الشريعة زي ما حصل في الأول مع وجود القرآن المكي، القرآن المكي أُعتبر ماهو معتمد في الشريعة، منسوخ في الشريعة.
الصحفي: كان عقيدة .. السور المكية كلها ..
الأستاذ: راح يظل، القرآن راح يظل كده، يعني المكي والمدني راح يظل عقيدة ويظل للدراسة، ويظل للتعبّد والتبرّك.. لكن الشريعة الكانت نسخت القرآن المكي ، لأنه أعلى من مستويات الناس وأكبر من حاجاتهم ، نسخته لتنزل لمستوى الناس .. في الوقت الحاضر القرآن المكي يكون هو العمدة بتاعت التقنين، تشريعنا يعتمد على القرآن المكي الكان قبيل منسوخ، مثلا ...
الصحفي: إذا اعترض مع المدني ؟
الأستاذ: ما بكون ناسخ .. يعني قبيلك لمن اعترض المكي مع المدني، المكي أصبح منسوخ، هسع بيعترض القرآن المكي مع المدني، المدني يصبح منسوخ، لأنه النسخ قبيل الحكمة فيهو أنه النزول لحاجة الناس وحل مشكلة الناس، فلمن جاء القرآن المكي جاء يقول "وقل الحق من ربكم فمن شاء فليؤمن ومن شاء فليكفر"، وجا ليقول "فذكر إنما أنت مذّكر، لست عليهم بمسيطر" ا.. لقرآن ده لما استمر 13 سنة ما أُستجيب ليهو جاء القرآن المدني .. القرآن المدني نسخ ده طوّالي ، متروك هو للعبادة وللتأمل وللعقيدة ولكل حاجة، لكنه منسوخ في حق الشريعة، فجاء "وقاتلوهم حتى لا تكون فتنة ويكون الدين لله، فإن انتهوا فلا عدوان إلا على الظالمين" .. بعد ما كان النبي منهي عن القتال أُمر بالقتال، أصبح في حق الشريعة القرآن المكي منسوخ .. الحاجة النحن عايزنها هسع في حق الشريعة ، القرآن المدني يصبح منسوخ.
الصحفي: عفواً، أنا أرجو أنك تقبل، لأنه نحن لازم نتحاور ...
الأستاذ: أيوه نعم..
الصحفي: النسخ الأول جاء من الله سبحانه وتعالى، كيف الآن، منو اللي يعطي لنفسه الحرية والصلاحية أنه يعتبر المدني منسوخ، ويرفع المكي؟
الأستاذ: ماهو، الأمور كلها بتجي من الله لو نحن استعدينا لاستقبال أمر الله .. القرآن ما كلام الله لينا، ما يمنعنا من فهمه إلا عدم استعدادنا .. فلو نحن دخلنا في التهيؤ ليهو ، لو نضّفنا مواعينا، قال فيه "واتقوا الله ويعلمكم الله"، يبقى الله هو البعلمنا ما نتكلم بيهو في أمر نسخ أمر كان منسوخ قبيل.
الصحفي: هذا هل معناه بأنه حضرتك عدت مستقبل شيء معيّن يمكنك بأنه تعمل هذا الشيء؟
الأستاذ: أي نعم، الليهو الفهم من القرآن ببساطة شديدة يعني، ربنا بكلمنا في القرآن .. بعدين أرسل لينا النبي يخط لينا الخطة اللي بيها نحضر معاه ونفهم عنّه .. نحن ما بمنعنا أن نفهم من الله في قرآنه إلا انشغالنا عنّه .. نحن منشغلين عنّه ، ما بنسمع ليهو، فإذا كان أتقنا السير خلف النبي - النبي هو مفتاح القرآن، معروف عنه، السيدة عائشة بتقول "كانت أخلاقه القرآن"، والنبي يقول "إنما أنا قاسم، والله يعطي، ومن يرد به الله خيراً، يفقّهه في الدين"، فالفقه في الدين هو البدينا السلطة لنتكلم .. نحن في الحالة دي بتكلم عن الله لأننا فهمنا عنّه ما جا بيهو في قرآنه.
الصحفي: زين، كيف نحن ممكن نعرف هذا من الله، قد يكون بيه وسوسه؟
الأستاذ: قد يكون به وسوسه .. وكل واحد من حقّه أن يقول أنه أنا فهمت عن الله كذا .. نحن ما بنقول ليهو كلامك ده وسوسه، نوريه الخطأ فيهو، أي واحد قابل لأنه يؤخذ منه ويُرد عليه. واضح عندنا إنه لا يمكن أن ينسخ القرآن المكي وهو أرفع مافي المصحف بالقرآن المدني، ثم يكون النسخ ده سرمدي، بالإضافة إلى أنه كأنه تغيير رأي.
الصحفي: آي بس اللي عرفناه أن النسخ لآيات، مو نسخ لمجموعة كاملة.
الأستاذ: ولا نحن بنقول كده، نحن بتكلم عن الشريعة، نحن بنقول منسوخ في حق الشريعة، ولعله الكلام ده وارد هنا هسع ده، منسوخ في حق الشريعة ، يعني ...
الصحفي: إذا شنو ليك شيء جديد اللآن ؟
الأستاذ: في ثلاثة مسائل، ثلاثة مسائل أساسية، هي السياسية، والاقتصاد والاجتماع .. في آيات مكّية تنظم المسائل الثلاثة ديل، وآيات مدنية تنظم المسائل الثلاثة دي .. في المال القرآن بقول "يسألونك ماذا ينفقون قل العفو" والقرآن يقول "خذ من أموالهم صدقة تطهرهم وتزكيهم بها وصلي عليهم إن صلاتك سكن لهم" .. الآية الأولانية مكية ، الآية الثانية مدنية .. على الآية المكية قامت شريعة النبي، النبي ما كان بزكي الزكاة ذات المقادير، هوفسر "يسألونك ماذا ينفقون قل العفو" بما زاد عن حاجته الحاضرة، هو ما بدّخر رزق اليوم لغد، ويرى أنه كل ما زاد عن حاجته ما هو له، وإنما هو لصاحبه المحتاج ليهو في الوقت الحاضر لذلك يصرفه عنه للمحتاج ليهو .. الأمة ما بتطيق العمل ده فنزل ليها في مستواها القرآن المدني "خذ من أموالهم صدقة.. " إلى آخر الآية، النبي قنن الشريعة، شريعة المال، الزكاة ذات المقادير على مستوى الآية دي وأُعتبرت ديك منسوخة في حق الأمة، قايمة في حقّه هو بس، قايمة في حقّه هو وحده .. نحن الآن دعاة لتطوير التشريع من مستوى الزكاة ذات المقادير اللي هي الصدقة اللي هي يكون إنت ليك في المال حق، ولي الله الصدقة، من المستوى ده لنرتفع إلى مستوى إنت تآخذ حاجتك من المال وما يزيد عن حاجتك يعطوه لمن يحتاجه في الوقت الحاضر.
الصحفي: الآن، نعم.
الأستاذ: ودي أدخل في النظام الإشتراكي من الأولى، الأولى رأسمالية .. ملطّفة .. نعم .. رأسمالية ملطّفة بمعني أنك إنت مقيّد في كسبك، في الإسلام إنت ما بتكسب ساكت، يعني ثمن الكلب وثمن الخمرة محرّمات عليك، لكن برضه إنت لمن تملك ممكن تملك وسيلة الإنتاج، ممكن تملك المصنع والورشة والأرض، ويمكنك أن تأجّر الآخرين، وشروط برضه أنه عليك أن تأجرهم بي سعرهم في السوق ما تظلمهم وأن تدّي الأجير أجره قبل أن يجف عرقه "ولا تنسوا الفضل بينكم برضه"، لكن في الآخر إنت راح تكون رأس مالي وأنا عامل بس حتى في نظام الزكاة، فهنا الدعوة إذن لتطوير الوضع ده من نظام رأس مالي إلى نظام اشتراكي العمدة فيهو الآية المكّية، نرتفع من الآية المدنية نحو الآية المكية .. برضه عمدتنا في العمل ده، عمل النبي ، وأحاديثه اللي حض فيها على الإشتراكية بصور ماها تطبيقية بطبيعة الحال لأنه وقت الإشتراكية ما جا، ، فكان يقول "كان الأشعريون إذا أملقوا وهم على سفر وكان عندهم زاد فرشوا ثوباً فوضعوا عليه ما عندهم من زاد فاقتسموه بالسوية أولئك قوم أنا منهم وهم منّي" وكان يحكي عنه أحد الأصحاب، أبو حذيفة بن اليمان "كنا مع رسول الله صلى الله عليه وسلم في سفرة فقال: من كان عنده فضل مال فليعد به على من لا مال له، ومن كان له فضل ظهر فليعد به على من لا ظهر له، ومن كان له فضل زاد فليعد به على من لا زاد له، قال: فذهب يعدد الفضول حتى ظننا أن ليس لأحد حق في فضل" وحتى من الكلام ده برضه يجي عمر بن الخطّاب يقول "لو استقبلت من أمري ما استدبرت لأخذت فضول أموال الأغنياء فرددتها على الفقراء" .. لكن بطبيعة الحال، ما كان بستطيع لأنه الشريعة قايمة في حقّه، لكن قالها بالصورة، فكأنه الطريق من الناحية النظرية مفتوح للارتفاع من الزكاة ذات المقادير نحو النظام الاشتراكي البكفل العدالة للناس، وكان النبي ينفر عن الزكاة "الصدقة أوساخ الناس، وهي لا تجوز لمحمد ولا لآل محمد" .. وبطبيعة الحال معلوم أنه هو وآل محمد والنبي ما عايزين يكونوا طبقة متميزة عن الأمة، لكن عايز يقول أنه حيث أمكن أن تعفّوا عن حل مشاكلكم بالصدقة عفّوا .. فالأمور ممهدة لأنه نتطّور نحن من الصورة ديك إلى الصورة، لننتقل من نص كان متناسب في القرن السابع وهو "خذ من أموالهم صدقة تطهرهم بها وتزكيهم وصلّي عليهم إن صلاتك سكن لهم" إلى نص كان منسوخ في القرن السابع اللي هو " يسألونك ماذا ينفقون قل العفو" نحن نداول النص، داك قبيلك كان ناسخ لأنه قدر حاجة الناس، لأنه النص المنسوخ أكبر من حاجة الناس، نحن اليوم ننسخ ده الكان ناسخ لأنه أقل من حاجة المجتمع البنادي بالإشتراكية من زمن طويل وجا بي الصراع بين الطبقات وبين العندهم وما عندهم، الاشتراكية أصبحت هي شعار اليوم دي الآية اللي أصبحت أقل من حاجة الناس ننسخها لنبعث الحاجة .. الآية الفي مستوى حاجة الناس، في مسألة المال هي دي الصورة تطوير التشريع من الزكاة ذات المقادير إلى الإشتراكية، واحد من وسائل تحريم ملكية وسائل الإنتاج على الفرد الواحد أو الأفراد القليلين. الناحية الثانية السياسة، وفي السياسة برضه العهد الأول في الآيات المدنية قام على الوصايا وكان الصورة أنه ربنا كلّم الناس بالمستوى الأصلي في الدين أنهم المسؤلين أحرار، فإذا عجزوا عن تحمّل مسؤلية الحرية يمكن أن تسحب منهم وده الأمر الحصل، لمن سحبت الآيات المكية وجات الآيات المدنية سحب مستوى من التعامل مع الناس في أمر السياسة الناس ظهروا أنهم قصر، أدوهم حريتهم ما استطاعوها فجعل النبي عليهم وصي، وجا حديث "أُمرت أن أخاطب الناس حتى يشهدوا ألا إله إلا الله وأن محمداً رسول الله" وأصبحت "فذكّر إنما أنت مذكر، لست عليهم بمسيطر" منسوخة "إلا من تولى وكفر فيعذبه الله العذاب الأكبر" كأنه فيها تعذبه إنت بالقتال العذاب الأصغر، فكأنه الآيات الكبيرة نسخت والأمة جُعل عليها وصي، النبي، المشركين الخارجين عن الدين قانونهم السيف "وقاتلوهم حتى لا تكون فتنة ويكون الدين لله" "يا أيها النبي قاتل الكفار والمنافقين واغلظ عليهم" "يا أيها الذين آمنوا جاهدوا الذين يلوونكم من الكفّار وليجدوا فيكم غلظة"، بالصورة ددي .. دي جا في حق المشركين، في حق المسلمين أنه هو يشاورهم "وشاورهم في الأمر فإذا عزمت فتوكّل على الله" جات الشورى، ما يتكلم عنها الناس كتير، الشورى ماها ديموقراطية، الشورى حكم الرشيد للقصّر، يشاورهم ويملك أن يخالفهم، لأنه بطبيعة الحال مشورة القاصر ماها ملزمة للرشيد، ولذلك تجد "فإذا عزمت فتوكل على الله" يعني كأنه إذا أشاروا عليهو بي رأي وافق رأيه يتوكل على الله وينفّذه، وإذا أشاروا عليهو بي رأي ما عنده رأي حاضر غيره يتوكل على الله وينفذه، إذا أشارا عليهوا بي رأي عنده رأي حاضر مخالف ليهو ينفذ رأيه، وتدخل فيهو "وتوكل على الله" ، فهنا تجي آية الديموقراطية موش آية الشورى، آية الديموقراطية واردة في "وذكر إنما أنت مذّكر لست عليهم بمسيطر" الحرية الواسعة في الصورة دي حتى النبي نُهي عن يكون مسيطر على الأمة، حتى على الكفّار، في أول الأمر نُهي أن يكون مسيطر "وقل الحق من ربّكم فمن شاء فليؤمن ومن شاء فليكفر" الآيات الديموقراطية في مكة كتيرة جداً كلها أصبحت منسوخة بما سميت بآية السيف، نحن نرى أنه في مستوى السياسة تبعث الآيات المكية ليكون الحكم ديموقراطي، ونحن نملك أن نولّي الإمام أو الحاكم أحسن نقول، رئيس الجمهورية ونملك أن نعزله، موش نقتله مثلما حصل في الفتنة الكبرى مثلاً، دايماً في طريق يخلي العنف ما ضروي.
الصحفي: الآن موقفكم من النظام كيف؟
الأستاذ: نظام نميري؟
الصحفي: نعم
الأستاذ: أوه، ده بيدخل في موضوع طويل، إنت لو كنت عايز نتم ليك النقط اللي بكون فيها التطوير، نتمها، .. يمكن أن نقول..
الصحفي: لا بأس بس احاول اقيف حتى أرجع القضايا الحديثة التي ممكن أطلع عندي موضوع
الأستاذ: آي ده كله يجيك، نمشي ليك في موقفنا من النظام ولا نتم ليك السؤال الأولاني؟
الصحفي: بكيفك، إذا كان إيجاز نمشي ..
الأستاذ: طيب، إنت برضه إذا عايز الإيجاز أنا بكون لي أسهل، لكن أنا كنت عايز أوفي ليك ..
الصحفي: لأن تعرف أنا حريص على أن أقدّم صورة أيضاً تكون مضغوطة ومهضومةى .. إذا كثّرت عليهم راح يكون على أساس ممل إلهم و.. لأنه في بعض القضايا اللي لازم أقدمها مثل رأيك إنت من الصلاة..
الأستاذ: كل حاجة ممكن نجي ليها.
الصحفي: نعم أحسن ولذلك نرجع لقضايا آنية
الأستاذ: هو بقى شوف، الموضوع ده جدلي إلى حد بعيد، يعني الرأي ده ما قيل بيهو عبر تاريخ الإسلام، ولذلك إذا كان في إيجاز مُخل ما مقعّد يجوز ما يمشي في اتجاهك الإنت عايزه، الشاهد، نحن نرجئ سؤالك عن النظام الحاضر، ونمشي في موضوعنا؟
الصحفي: أي نعم تفضّل.
الأستاذ: طيب .. نحن إذا دعاة لتطوير الشريعة من آية الوصاية إلى آية الحرية والديموقراطية البتمارس ومافي وصاية من أحد على أحد، الوصايا بالقانون على كل الناس ده فيما يخص السياسة، فيما يخص المرأة والاجتماع، نحن مع المساواة بين الرجال والرجال في الملل المختلفة، المسيحي والمسلم والبوذي الوثني الملحد كلهم في الحقوق الوطنية يجب أن يكونوا متساويين، المساواة بين الرجال والرجال، والمساواة بين الرجال والنساء، ودا عندنا برضو عتيد وحاضر في الإسلام، خصوصاً أمر المرأة، أمر المرأة جاي في القرآن المدني "الرجال قوّامون على النساء بما فضّل الله بعضهم على بعض، وبما أنفقوا من أموالهم، والصالحات قانتات حافظات للغيب بما حفظ الله واللاتي تخافون نشوذهن فعظوهن واهجروهن في المضاجع واضربوهن فإن أطعنكم فلا تبغوا عليهن سبيلا"، يمشي للحد ده، ده القرآن المدني وقامت عليهو الشريعة لكن القرآن المكي يقول "ولهن مثل الذي عليهن بالمعروف وللرجال عليهن درجة"، لهن مثل الذي عليهن بالمعروف كأنها مخاطبة في الحقيقة بلغة العصر الحاضر في مسألة الأجر المتساوي للعمل المتساوي، لهن من الحقوق مثلما عليهن من الواجبات، دي يجي تطوير برضه في الوضع الإجتماعي أنه النساء والرجال أمام القانون متساويين، مافيش وصاية من أحد على أحد ولا قوامة من أحد على أحد، ودي المسائل التلاتة اللي بتحتاج إلى تطوير في الأمر ده بصورة ظاهرة. يمكن ده يعيطيك صورة في دعوتنا، دعوة إلى تطوير التشريع، من الآيات المدنية إلى الآيات المكية، وفي المستويات دي بصورة خاصة، التشريع كله ما بيخضع للتطوير، مثلاً القصاص والحدود ما بدخل فيها التطوير إلا شي طفيف يجي من ملابسات العصر، زي مثلا السارق بتقطع يده، راح يظل بتقطع يده إذا قام عليه الركن، والركن أنه يسرق النصاب إذا سرق أقل من النصاب ما بتقطع يده، النصاب إذا سرقه أن يسرقه من الحرز، الحرز معناها المحل اللي هي مخفية فيهو، ومحفوظة فيه وبيشعر أنه إذا عاين يشيل منها يخشى أن يشوفوه الناس، ده حرز، فإذا أخذ النصاب من الحرز، برضه ينظر فيهو إذا هو جائع فإذا جائع لا تقطع يده، لأنه الركن ما قام، بعدين إذا ما جائع ينظر فيهو هل هو مجنون إذا مجنون ما بتقطع يده، يعالج، أها هنا يمكن التطوير البدخل في الحد ده هو مقدرتنا نحن على معرفة أنواع الجنون شنو، يجوز زمان ببساطة الما بمشي عريان والا يجدع الناس بالحجارة ما يكون مجنون، لكن في أنواع خفية من الجن تعتري الواحد في وقت معيّن، يعني في ناس إذا شافوا حاجة إنسان غيرهم ما يملكوا أن يعتصموا من أن يأخدوها، ده نوع من الجنون برضه.
الصحفي: عفواً من كلامك بعض اللي التقيت فيهم من الناس عن الجمهوريين، يصفوك بنفس هذا الشيء.
الأستاذ: بصفوني بإيه؟
الصحفي: بهذا، يقول أيضاً هو رجل متزن ولكن قد يكون فيه نوع من الجنون، أنا آسف أقول هذا الكلام طبعاً.
الأستاذ: لا ، أنا ما عندي أي اعتراض. .. يجوز في نوع من الجنون .. قالوا السيد أحمد البدوي – دا استطراد ما في ضرر منه ، السيد أحمد البدوي قال:
ولقد وصفوني بالجنـون جماعة فقلت لهم بيت لسامعه يحلو
مجانين إلا أن سر جنونهم عجيب على أعتابه يجسـد العـقل
ففي نوع من الجن زي ده ..
الصحفي: هذا حقيقة اللي .... (انتهى الجزء الأول من الشريط)
الأستاذ: ده يكون أحسن
الصحفي: شنو السر أستاذ ها الشكل، السلبية على دعوتك في أوساط السودانيين سوءاً تنظيميات، أخوان مسلمين ، أنصار سنة أو حتى بعض الناس العاديين، شنو سبب السلبية هذه؟
الأستاذ: السر أنو الدعوة دي جديدة بصورة ما سبق ليها مثيل في التاريخ، والناس الدرسوا الدين دراسة وظيفية ظنوا أنه ما درسوه هم ما في غيره .. إذا درست في الأزهر اثناعشر سنة وأخذت شهادة العالمية أو درست في المعهد العلمي أو في الجامعة الإسلامية أو في أي محلّة درست بتاخد شهادة العالمية وبتظن إنه ما في شي تاني .. فلما إنت تقرا لينا تقرا وإنت مقتنع بأنه الكلام البتقراه ده كلام باطل وبتفتش عن باطله وين، وتقوم تنشر آراء خطأ بصورة محرّفة مخرّجة غلط ومقتبسة غلط .. فبقى في تشويه كبير جداً أوقف الناس مننا موقف الإنسان الحذر والخايف .. لكن نحن باستمرار بنمشي وبنمسح في الأرض دي وبتبين للناس، باستمرار .. فالأمر ده قبيلك لمن كان في مستوى التوحيد، 13 سنة يكاد يكون ما أوجد إلا عدد يحسب في أصابع اليدين .. لما مشت الهجرة والدين قرّب لمألوف الناس أصبح الناس دخلوا فيهو بالإضافة طبعاً إلى الجهاد بالسيف وكده، فكونه الناس تكلمهم بي حاجة ما ألفوها من المؤكد أنه في الأول *** .. ودي السلبية بتجي من هنا، بعدين بتجي من معارضة فاجرة، معارضة بتكذب وتحرّف، وبعدين الناس الآخرين يقروا كتب المعارضين ما يقروا كتبنا نحن .. يمكن صدرت تسعة كتب - تسعة كتب في الرد علينا منها من يشوّيه أقوالنا ويبتر أقوالنا ويخرّجها غلط ...
الصحفي: منو بالضبط اللي كتبوا التسعة كتب؟
الأستاذ: مؤلفين مختلفين منهم الأمين داوود، منهم محمد علي يوسف، ومنهم واحد اسمه حسين زكي ومنهم النور محمد أحمد، عدد من الناس .. في البلد في الوقت الحاضر في كتب زي دي، لكن كلها ما بعارضنا نحن بعارض أفكار خطأ بينسبها لينا ويتكلم عنها .. يجوا ناس آخرين يقروا الكتاب ده ويمشوا معاه .. أها بالصورة دي، ده هو السبب الأساسي الغرابة السبب الأساسي بعدين التشويه ما ضرانا في الحقيقة بي حاجة لأنه أثار اهتمام ناس قد يكونوا سلبيين قبيلك كانوا في الفكرة ، وأثار اهتمامهم ومشوا، بدينا نحن بنوزع كتبنا بصورة واسعة جداً، نحن يمكن حسي موزعين في البلد ده أكثر من مليون كتاب .. وخرجت كتب عندنا بتقرب من الميتين (200) في شرح الفكرة وتبيسيطها لكن الكتب مرغوبة دايماً وموزعه دايماً، وطاقتنا نحن في أن ننتج أقل من طاقة المستهلكين في أن يشتروا .. المسألة دي جاية من التشويش ومن المبالغة والعداوة الحاصلة، ما كنت تسميه سلبيه، الموقف ده ما سلبي في الحقيقة، موقف ده فيهو الكثير من الإيجابية .. يعني نحن حسي المعارضين مشغولين بينا شغلة شديدة وبي عداواتهم هم الدعوة ماشه منتشرة أكتر ...
الصحفي: أظنه يعملوا دعاية ***....
الصحفي: أستاذ يمكن، الجمهوريين أيضاً الآن هو يعتبر حزب له تنظيم له خلايا أو فقط دعوة؟ يمكن، عفواً، تموت بموت صاحبها الله يعطيك العمر إن شاء الله ***
الأستاذ: هو قبيلك لمن كان حزب موش هي مسألة سجلات واشتراكات ولجان ، دي ما عندنا أصلا .. نحن ما عندنا سجل لعضويتنا، نحن دعاة لبعث الإسلام بانتهاج طريق النبي .. الناس البياخدوا النهج ده ما ضروري يجونا نحن هنا، يمكنك إنت أن تكون في مصر جمهوري لأنها هي في الحقيقة الجمهوري مطابقة للمسلم، بعث السنة كأنه حديث النبي قبيلك: "بدأ الإسلام غريباً وسيعود غريباً كما بدا فطوبي للغرباء، قالوا: من الغرباء يا رسول الله قال: الذين يحييون سنتي بعد اندثارها" .. فنحن دعاة لبعث السنة - السنة دي عشانك إنت، نحن ما بندخل الإنتخابات، بطبيعة وضعنا يعني، مافي مساومة في الأمر ده .. الفكرة دي ولاّ بتجي كلها ولاّ الناس ينتظموا في نشرها لغاية ما تجي، لكن ما بنحتال ليها بأي حيلة ونحن .. ما بنعتقد أن السلطة بتجيب الدين، نحن بنفتكر إنه الدين بيجيب السلطة فلذلك ما عندنا تنظيم بالصورة دي .. هسع في الوقت الحاضر كل جمهوري في مستوى معيّن من القيادات - في مستوى الأخوات ومستوى الإخوان - في المستوى ده كل جمهوري داعية للدعوة الجمهورية، فاهمها ومضحي في سبيلها وتعبان وبعيشها ما عنده أي حالة غيرها .. فنحن ما عندنا خوف من أي حاجة من الإعتبارات دي ...
الصحفي: *** في ذهابك يمكن الدعوة خلاص تكون مجرد دعوة، مجرد شي عابر ***
الأستاذ: هي المسألة ما كده، لأنه المسألة مركوزة على تربية في أصول الناس وهي موش بتاعتنا نحن، نحن مثلاً لمن داعيين ما داعين لطريقة زي الطرق فيها أوراد وفيها انتماء معين، نحن داعين لطريق محمد .. طريق محمد ده ما بتاخده إنت من عندنا، نحن أخدناه من البخاري وأخرجنا الطريق، كتاب يعتبر هو اللائحة الأساسية للجمهوريين اسمه طريق محمد .. فإنت ممكن أن تجد طريق محمد من المصادر بتاعة الأحاديث من السيرة وتاخده .. نحن قلنا إننا نحن في الكتاب ده أخرجنا صورة من صلاة النبي ومن وضوءه ومن صيامه ومن قيامه ومن معاملته للناس .. يمكنك إنت.. نحن أخرجناه من البخاري، يمكنك إنت أن ترجع إلى البخاري تزيد .. نحن قلنا ده بكفي المقتصد لكن المجتهد يمكن أن يرجع للمراجع وياخد .. يمكنك أنت أن ترجع إلى طريق محمد من أي جهة شئت ، ما ضروري تاخد كتابنا نحن، ياها دي دعوتنا، نحن عايزين الناس يرجعوا لطريق محمد .. يخلوا الطرق ويخلوا الإختلافات البتجيب الطائفية وبتجيب الطرق بعد ما اتخلّفت وماتت ويرجعوا للطريق الأصل اللي هو طريق النبي .. دعوتنا ، أساسها ياهو ده.
الصحفي: عند ما يحصل انتخابات النقابات أو الاتحاد الإشتراكي أو مجلس الشعب أنتو بتقاطوعها ولا كيف؟
الأستاذ: موش هي نقاطعها بقدر ما نحن ما هي، مرّت الإنتخابات في الأوقات كلها بينا ما اشتركنا فيها أصلاً
الصحفي: سلبيين تجاهها؟
الأستاذ: موش بالضبط سلبيين، لكن نحن بنفتكر أنو ما بنساوم في فكرتنا.. يعني لو نحن في البرلمان دخلّنا ثلاثة ، أربعة أعضاء، بعدين في البرلمان القرارات بتؤخذ بالأغلبية الميكانيكية .. إنت يمكنك أن تقول رأيك لكن ما بتأثر في مجربات الأحداث .. آ نحن إذا ساهمنا بالصورة دي نحن بنكون مسؤولين عما يجري في المجلس مهما كان نوعه ولذلك نحن إذا كان ما الفكرة كلها جات، ما بنجي للسلطة - ما بنساهم في السلطة.
الصحفي: أذاً اللي يجري في المجلس الآن ما ترضون عنه إنتو.
الأستاذ:ما في أقيسه، يمكن يجيبنا في مسألتك إنت في السؤال عن ...
الصحفي: نعم..
الأستاذ: في أقيسه للمسائل، إنت ما بتقيس بالصورة المثالية الإنت عايزه إنت ما بتلقى كل ما إنت عايزه في أي وقت من الأوقات .. بتسعى إنت بالتطور المختلف في أن تصل إلى نقطتك .. نحن مثلاً كنا دعاة للجمهورية ، كانوا الناس كلهم ضد الجمهورية وكانوا يقولوا أنه البلد ده بلد متأخر، والنظام الجمهوري ما ينفع مع شعب متخلف زي شعبنا ، أحسن أن يكون في نظام ملكي .. ونحن ماشين وبناقش في مسائلنا وبنقول إنه الشعب هو الحقو ترجع ليهو السلطة والشعب يوعى ويمسك مصيره في إيده .. وجاء الوقت اللي الناس سابوا الملكية هنا وهنا، بل الحقيقة في العالم الملكيات أصبحت تنزل، والجمهورية ترتفع، فجاء النظام الجمهوري .. والنظم النحن داعين ليها من وقت طويل ماشة بالوسائل المختلفة وبقوموا بيها ناس غيرنا نحن .. نحن بنأيد الإتجاه اللي ينمي اتجاهنا ويجي في الآخر ليصل ليهو وما بنقيف سلبيين منه .. نحن عندنا نظام نميري أحسن نظام وطني مرّ على البلد منذ أن تولى الوطنيين أمورهم من سنة 56 .. مرّت حكومات كتيرة جداً، الأحزاب القبيلك اتكلمنا عنها، أحزاب ما عندها برامج مدروسة إنما هي أحزاب متكتلة وهمها التجمّع .. الأحزاب دي فشلت بصورة ذريعة ونحن من الأول كنا بتكلم عنها، من عهد الإنجليز، بنقول أنه الإستعمار ، قد يكون بعدين في استعمار ببشرة سوداء موش بشرة بيضاء .. الاستعمار هو قيمة في الحكم، إذا كان المستعمر ده وطني هو قد يكون زي المستعمر الأجنبي أو أسوأ .. فنحن إذا كان ما عندنا دراسة لأوضاعنا وبنحل مشاكلنا قد يجلو الإنجليز ولا نجد أنفسنا أحرار ولا مستقلين .. فالصورة دي ماشة باستمرار لغاية ما جا نظام عبّود في فترة من فترات الفساد بتاع الأحزاب والصراعات الفارغة حول الكراسي والفساد والرشوة وشراء النواب .. جاء نظام عبود نظام عسكري استمر مدته الإستمراها، اتغيّر بنظام وطني تاني مرة شعبي بثورة اكتوبر .. تاني دخلت الأحزاب وسارت نفس السيرة وأفسدت وكانت ماشة - الطائفية - لتجيب حاجة إسمها الدستور الإسلامي وتجعل الحكم إسلامي ، ونحن ما شافين أنه الطائفية عندها دين لتجعل الحكم إسلامي ديني، لكنها عايزة تضع إيدها على السلطة الزمنية زي ما عندها السلطة الروحية.
الصحفي: هل من جائز قولك، مدحك لنظام نميري هو أنه وضعت هذا حتى يمكن يعطيك الحرية اللازمة لتنشر الدعوة وعندك الآن فعلا مو متعرضين إليك..
الأستاذ: موش النقطة هي دي، النقطة أنه البلد كان في خطر كبير جداً في أن تستولي عليهو الطائفية لأن الطائفية عندها السلطة الروحية ، مضللة الشعب تضليل تام .. والطائفية ما عندها أي مصلحة في أن يتنوّر الشعب، عكس ما نحن عايزين، وأنا بفتكر أنه الشعب البكون ديموقرلطي هو الشعب الواعي والشعب الواعي هو البوعى سياسياً ودينياً .. الطائفية بتخدر الناس يظلوا رهناء لإشارة رئيس الطائفة. الأمر ده كان ماشي ليحكم قبضته على البلد بصورة كبيرة جداً قبل مجيء نظام نميري .. في حاجة عندنا إسمها الجميعة التأسيسة لتضع الدستور الدائم للسودان، الطائفية داعية لأن يكون الدستور الدائم للسودان دستور إسلامي .. نحن بنعتفد أنها هي ما بتفهم الدستور الإسلامي ولا العلماء بفهموا الدستور الإسلامي .. في مستوى ما عندنا الآن من إسلام - في الشريعة الإسلامية - مافيش دستور .. في وصاية زي الكلام القلناه قبيل، والدستور بقوم على الحقوق الأساسية والمساواة أمام القانون.
الصحفي: هل تعتقد بأنه مافي أفضل من نظام نميري؟
الأستاذ: مافي أفضل فيما مضى؟
الصحفي: لا، فيما يأتي..
الأستاذ: كيف، وأنا بعمل لي شنو هسع!؟
الصحفي: بتبحث عن الأفضل .. مرحليا ..
الأستاذ: مرحليا هو أحسن النظم المرت على البلد وبخاصة لأنه قدر بقمع الطائفية ويفوت عليها الفرصة في أن تضلل الشعب لتجيب ليهو دستور إسلامي ، وما هو دستور إسلامي وإنما هو تضليل باسم الإسلام في مستوى السلطة ، وفي مستوى العقيدة .. فلمّن كان قريب أواخر سنة 69 كان السيد الهادي بقول "إذا كان لغاية أغسطس ما مر الدستور الإسلامي - الجمعية التأسيسية ما مررت الدستور الإسلامي سنمرره باستفتاء شعبي" .. ومعروف سلفاً أن الشعب بسيط مضلل باسم الدين وهو عنده أكثر من نصه ، فإذا الإستفتاء الشعبي أن يكون الدستور الإسلامي زي ما حاصل في إيران مثلاً .. في مايو جاء نظام نميري، ونحن من الأول أعلنا تأييدنا ليهو على أساس أنه قطع على الطائفية طريق الإستحواذ على السلطة في البلد.
الصحفي: طيب بتعتقد أنه في أفضل .. اللي تعملون من أجله؟
الأستاذ: قولاً واحداً .. قولاً واحداً .. نحن بنعتقد أنه العالم كله محتاج للإسلام ليعود من جديد ويديهو نظام أفضل .. الماركسية بتلقى أحسن منها والديموقراطية بتلقى أحسن منها في الغرب وفي الشرق والبلد هنا.
الصحفي: ينقلون عنك إنك عندك موقف إيجابي من قضية .. سلبي من قضية فلسطين وإيجابي من قضية إسرائيل، هل الكلام ده صحيح؟
الأستاذ: معرفش الصورة ياها كده.. موقف سلبي من قضية فلسطين وإيجابي من..
الصحفي: لا، أيام التقسيم.
الأستاذ: ده من سنة سبعة وستين وقبل هزيمة يوليو المشهورة ، نحن عندنا موقف أنه العالم في الوقت الحاضر بتتصارع عليهو كتلتين على السيطرة عليهو .. وأنه نحن المسلمين كتلة ثالثة ، لا نحن شيوعيين ولا نحن الديموقراطيين الغربيين على ما تمثله أمريكا مثلاً .. ما بنعتقد أنه الشيوعية ممكن تحل مشكلة الإنسان ولا الرأسمالية الغربية ممكن تحل مشكلة الإنسان وإنما تنشأ كتلة ثالثة زي عهدها الأولاني لما كان الإسلام نشأ بين الفرس والروم .. الفرس والروم كانوا بيتنازعوا عالم يومئذ، نشأ الإسلام كتلة ثالثة .. نحن قلنا أنه مشكلة العرب موش فلسطين، مشكلة العرب أنهم بيعشوا خارج التاريخ في منطقة كان بيصنع فيها التاريخ دايماً .. العرب بيعيشوا على قشور من الإسلام وقشور من المدنية الغربية .. إسرائيل جات زي الكرباج البسوق العالم الإسلامي العربي إلى الله، المسلمين حقهم يتفرغوا من قضية فلسطين ليرجعوا لربهم ليعيدوا تربية أنفسهم ليدخلوا التاريخ من جديد.
الصحفي: كيف يتفرغوا إلى العودة حتى يرجعوا...إسرائيل تكون مسيطرة على كل باقي الأراضي ...
الأستاذ: هو على أي حال مسألة إسرائيل ما مسألة بتحل بالسلاح، لذلك قلنا...
الصحفي: ما بتحل بالسلاح؟
الأستاذ: ما بتحل بالسلاح .. مافي أي مسألة من اليوم ده في العالم كله بتحل بالسلاح
الصحفي: كيف يكون حل قضية فلسطين؟
الأستاذ: حل قضية فلسطين إنه العرب يرجعوا ليكونوا مسلمين ويدّوا العالم كله بما فيهم اليهود
الإسلام.
الصحفي: اليهود نفوس مجبولة على العصيان، والله لعنهم ومافي من وراهم أي ...
الأستاذ: كل الناس...
الصحفي: فكيف ياخذوا الإسلام؟ إنت أستاذ قرأت القرآن، وفاهم القرآن أفضل مني، اليهود ملعونين من الله سبحانه وتعالى فمافي إنسان يعطيهم إسلام، كيف الآن ممكن نرجع فلسطين، رأيك أنه تقول إنه من غير السلاح..
الأستاذ: أولاً الإسلام موعود بأنه يجي للأرض كلها، ما للعرب .. دا موعود الإسلام .. دا موعود الإسلام تماما .. مافي قبيل من الناس هو أقرب لي الله من الآخرين، الا بما صنعه الله فيهم وضعه فيهم .. فإذا كان في معصية اليوم هي معصية مرحلية، النفوس البشرية دي حيث وجدت هي مفطورة على الخير، "كلا بل ران على قلوبهم ما كانوا يكسبون" ...
الصحفي: إلا اليهود.
الأستاذ: كل الناس، اليهود ما خلقم الله ..
الصحفي: القرآن .. عفواً، ذكر اليهود سواء بالمكية أو بالمدينة ***، الله لعنهم لعن رهيب عجيب...
الأستاذ: اللعن معناه شنو؟ اللعن ما الإبعاد المؤقت، ربنا لمن قال في القرآن "إن علينا للهدى وإن لنا للآخرة والأولى" .. يعني في ناس ربنا بيهديهم في الدنيا دي .. الما بيهديهم في الدنيا أطلق عليهم عبارة ملعونين بيهديهم في الآخرة .. ربنا عليه الهدى كتبه على نفسه والوجود كله بيسبح باسم الله، حتى اليهود "وإن من شيء لا يسبح بحمدي ولكن لا تفقهون تسبيحهم" ..
الصحفي: ذولا قتلت الأنبياء،
الأستاذ: ده كله حاصل ...
الصحفي: عملوا وما عملوا *** نحن بنحارب كيف مع فلسطين..
الأستاذ: في القرآن ربنا لما يقول "لقد جاءكم رسول من أنفسكم عزيز عليهم ما عنتم حريص عليكم بالمؤمنين رؤوف رحيم" لكن ربنا يقول "إن الله بالناس لرؤوف رحيم" " بما فيهم اليهود، كل المخلوقات، في الفهم الصحيح للدين كل مخلوق مرحوم.
الصحفي: نحن نرجع على قضية فلسطين، كيف .. تتصور شنو الحل أمامهم، يتركوا إسرائيل في مكانهم؟
الأستاذ: يتركوا إسرائيل .. هسع هم عايزين يتركوا إسرائيل، إسرائيل ما عايزه تتركهم ... عايزين يتركوا إسرائيل في مكانها .. هسع إنت *** الحل شنو؟
الصحفي: لأ مو القصد إنت؟ *** شكل تصوّر جديد وعندك أراء أيضاً البعض يصفها بالغرابة، البعض يصفها بالجنون البعض يصفها بالفكر الحديث، يختلف فهمه .. الآن إنت في قضية فلسطين، شنو تتصور، يتركون اليهود يلعبون وكذا حتى يجوا ع السودان ويلطشوها أيضاً؟
الأستاذ: أيوا لكن *** مابجي بالصورة دي .. عيد العبارة القلتها ليك في الأول، مشكلتنا نحن موش اليهود، مشكلتنا أننا نحن خارجين من التاريخ نحن عالة على المدنية الغربية وبنعيش على قشورها،
الصحفي: هذا كلام إنشائي عفواً أستاذ.. هذا كلام، أنا أريد بالضبط إسرائيل كيف يمكن مواجهتها..
الأستاذ: كلام جميل .. إنت راح تملي عليّ الإجابة ولا بتخليني أجاوب ..
الصحفي: بالعكس، أنا أتمنى تجاوب إنت
الأستاذ: طيب هسع الكلام ده إنشائي كيف؟ هل نحن أخلاقنا أخلاق إسلام؟
الصحفي: لأ
الأستاذ: طيب أنا قلت إذا نحن بنعيش على قشور الإسلام
الصحفي: عفواً أتمنى إنك ما تكون من عندي كذا...*** هذا نتيجة الحوار بس
الأستاذ: ما إنت لامن تقول لي إنشاء
الصحفي: أنا جاي حتى أنقل صورة فقط
الأستاذ: على كيفيك .. إنت ممكن تقول ما شئت ما هم بسمعوك وبسمعوني على أي حال في شريطك دا.. لمن إنت تقول كلام إنشائي أنا لابد لي من تصحيحه لأن الكلام الإنشائي أنا أصلو ما بهتم ليهو ولا بدخل في اعتباري .. بل الحقيقة بفتكره إنه نوع من الحذلقة الما لايقة بالفكر، فلما أنا أقول إنه نحن بنعيش على قشور من الإسلام وقشور من المدنية الغربية، هل نحن أخلاقنا أخلاق إسلام؟
الصحفي: الآن لا
دي موش القشور؟ نحن ما بنعبد؟ ما بنحج؟ ما بنزكي؟ ما بنصلّي؟ ده معنى القشور .. بعدين هل نحن هل بنصنع الآلة الغربية؟ نحن بنصنع القنبلة الذرية؟ نحن الطائرات بنصنعها ولا بنستوردها؟ بنصنعها ولا بنستوردها الآلات الحديثة؟
الصحفي: متفق كله عليه بين الناس نحن تابعين ومحتاجين
الأستاذ: طيب، إذا أنا لمن أقول قشور من المدنية الغربية وعلى قشور من الإسلام ده ما كلام إنشائي.
الصحفي: أنا قصدي لأ .. أجي على الجواب مالت إسرائيل.
الأستاذ: الجواب ما لابد من مقدمة ليهو .. الجواب إنه مشكلتك موش إسرائيل الأخذت منك أرضك .. إنت لو كنت مالي منطقتك البصنع فيها التاريخ عبر القرون ما كان الإسرائليين أخدوا منطقتك .. إنت لأنك ضعيف ماك في مستوى العصر ماك داخل في التاريخ .. إنت مشكلتك ورا اليهود .. اليهود نتيجة .. اليهود عرض موش المرض .. إذا إنت عايز الحل السليم لازم يكون عندك عمق في النظر.. العمق في النظر إنو إنت مشكلتك أن ترجع إلى نفسك وتعيد تربية نفسك من جديد ، تدخل في الدين.. إذا لتدخل في الدين ما يجب أن تعادي الأمريكان حتى تحتاج للروس أو تعادي الروس حتى تحتاج للأمريكان ، وده الحاجة العملناها نحن مرتين، في أيام جمال عبد الناصر، عادينا الأمريكان ونحن ما بنستطيع أن ننهض ..
الصحفي: ... مع الروس
الأستاذ: نحن ما استطعنا أن ننهض بعداوة الأمريكان اللي صنعناها ، مشينا خطبنا ود الروس وطوينا *** تحت جناحهم ودخلنا في معترك الحرب الباردة في المنطقة دي .. لمن الروس آيسونا وقنعنا منهم جينا لنمشي للجانب الآخر مع الأمريكان ، زي ما هو الوقت الحاضر في أيام السادات، دا لأنه نحن تربيتنا ناقصة .. فكرنا موش دقيق .. دي مشكلتنا الأساسية .. سيب اليهود في الحدود الأخدوها وقسمتهم ليها الأمم المتحدة في التقسيم بتاع سنة 47 .. دي دعوتنا قايمة على الأساس ده .. سيبهم قبلهم وأطلب الضمانات الممكنه كلها .. أرجع لنفسك أبعث الدين فيك وفي شعوبك .. اتربى بيه وربي بيهو الناس الآخرين ، في الوقت داك انت يمكنك أن تجيب حضارة مدنية جديدة في العالم ، اليهود يدخلوا فيها، وغير اليهود محتاجين ليها ويدخلوا فيها.
الصحفي: عفواً أستاذ محمود، متى بدأت الدعوة الإتفضلت فيها، متي بدأت الدعوة؟ لأنه دعوة قائمة على شيء التقسيم.
الأستاذ: سنة سبعة وأربعين.
الصحفي: سنة سبعة وأربعين.
الأستاذ: نحن عندنا كتاب إسمه مشكلة الشرق الأوسط.
الصحفي: عندي مع الأخ *** موجود
الأستاذ: مشكلة الشرق الأوسط، كانت المحاضرات بمشكلة فلسطين قبل حرب حزيران .. بعدين الكتاب أُلّف وكان عندنا هنا القمة العربية في الخرطوم في سنة 67 في أغسطس .. في أغسطس وسبتمبر أو في سبتمبر وأكتوبر صدروا كتابين: "التحدي الذي يواجه العرب" و "مشكلة الشرق الأوسط"، بتدعو إلى أنه مشكلة السلاح ما بتحل مشكلة إسرائيل .. نحن ما بنحارب إسرائيل، بنحارب الغرب كله مع إسرائيل نحن بنحاربه، حتى الروس اعترفوا بي إسرائيل وإسرائيل دولة في النظام العالمي.
الصحفي: امريكا وروسيا
الأستاذ: خلاص، إنحن محاربتنا ليها ونحن معتمدين على أسلحة بتجينا من برّة خطأ، إذا حقوا بشي من كرامتنا نشتري الهدنة، ونسالم إسرائيل، لا نحتاج لأمريكا ولا نحتاج لروسيا ونكون نحن الكتلة الثالثة، ما منضوين جاي ولا منضوين جاي، لننهض بقضية التربية فينا وبعث الدين.
الصحفي: وبعدها؟
الأستاذ: بعدها العالم كله نحن بنديه مدنية جديدة .. العالم كله محتاج لينا، إذا كان الصورة دي نشأت بيها الكتلة الثالثة، اللي هي الكتلة المسلمة - الكتلة النظيفة البترتفع فوق الحدود الإقليمية والحدود الوطنية والضيق البنقول فيهو إنه اليهود ملعونين ، واليهود ما شعب الله ، واليهود الله ما عايزهم ، واليهود ما ببقوا مسلمين ، ده كله ببقى خطأ وده من جهالتنا نحن .. لكن إذا عرفنا العالم كله محتاج للإسلام ، والله موعوده أنو الإسلام يعود للناس كلهم: "هو الذي أرسل رسوله بالهدى ودين الحق ليظهره على الدين كله، وكفى بالله شهيدا" .. فإذا جينا نحن في المستوى ده اليهود ما هم أغراب علينا .. اليهود ناس .. نحن بالمستوى الإسلامي ده بنجيب الإسلام والسلام والمحبة والرخاء للعالم كله واليهود بستنفعوا بيهو والأرض ما بتبقى ضيقه علينا .. الحل هو في المستوى ده ولا يمكن أنه يكون في حل غيره، وكل ما نحن نمشي في عداوات زي الحكاية القايمين بيها هسي دول الرفض ، كلما سوفنا قضية فلسطين وضيعنا شعب فلسطين، وانشغلنا نحن بعداوة في غير معتركها ، وعملنا بي عمل ماليهو قيمة، ونكون نحن مع الأمريكان حين ويخيبوا أملنا ، ونبقى مع الروس حين وبالصورة دي .. وديل متصارعين علينا نحن.. نحن عظم النزاع ..
الصحفي: طيب أستاذ رأيكم في اتفاقية كامب ديفيد شنو؟
الأستاذ: رأينا في اتفاقيات كامب ديفيد تمت في الإتجاه الصحيح، إذا كان في سلبيات برضها ما كان ممكن تفاديها، يعني إذا كان السادات ما استطاع أن يجمع العرب حول المسألة دي ليمشي هو لإسرائيل، دي نحن ما بنشوف إنه عنده فرصة كان يعمل غيرها .. لو كان هو شاور العرب ما كانوا رضوا ليهو .. بعدين هو بفتكر إنه عنصر المباغتة في الموضوع ده قد يكسب الناس العالم كله - العالم كله قد يباغت بالصورة دي ويستحسنوها و يكون في حركة إثارة تجيب مكاسب .. والحقيقة جابتها .. حركة المباغته خلّت عطف العالم كله يتحول ...
الصحفي: لفترة زمنية
الأستاذ: لغاية الآن لولا إنه نحن بمقاطعتنا للسادات أضعفناه .. نحن اللي قاطعنا السادات نحن ما حاربنا، لا العراقيين حاربوا لا السوريين حاربوا لا الحجازيين حاربوا لا الليبيين حاربوا لا التونسيين لا الجزائيريين.. الناس ديل كلهم كان بحارب *** .. ومصر جربت الحرب وانتهت إلى أنها ما بتجيب نتيجة، نحن هسع لما قاطعنا كان المنطق الطبيعي أنه نحارب .. ياتها من الدول حاربت إسرائيل في الوقت الحاضر؟ فهم بمقاطعتهم للسادات أضعفوا السادات وخلو اليهود برضه يفتكروا إنه هم لا يزالوا في خطر عايزين وسائل أمنية، فالمستوطنات دي هسع اليهود بدافعوا عنها أنها هي نقط للدفاع عن أمن إسرائيل ..
الصحفي: أستاذ من 73 وإسرائيل ما محتاجة إلى مبررات نعطيها، إسرائيل موجودة تنفيذا لقرارات وبروتوكولات حكماء صهيون والتلمود في أن إسرائيل من الفرات إلى النيل فهي مو محتاجة هي حجج فقط يبنون مستعمرات وأمنية وغير أمنية، الآن صواريخ حديثة أكو تضرب طائرة قبل تصل تل أبيب فالقضايا الأمنية مالها ورود هي مجرّد حجج ..
الأستاذ: لأ نحن عندنا الرأي العالمي .. ليها وجود في وزن الرأي العالمي إذا نحن العرب ما مأمنين إسرائيل، وإسرائيل جابت حججها بالصورة دي ، الرأي العام العالمي بيعذرها .. نحن عارفين إسرائيل قايمة على أساس من الفلسفة القديمة الراسمنها لكن إنت يمكنك أن تضع ليها الحدود بتاعتها إذا إنت كنت ذكي وتكسب الرأي العام من حولك، يعني نحن لمن قلنا لا.. مؤتمرنا الإنعقد هنا - مؤتمر القمة العربي كان قايم على ثلاثة لاءات: لا صُلح ولا اعتراف ولا سلام مع إسرائيل .. ثلاثة لاءات .. طيب إنت عايز من الأنظمة الدولية شنو لما إنت منطوي على تهديد إسرائيل لترميها في البحر؟ عايز الدول الضامناها والدول اللي هي معاها في منظمة الأمم المتحدة تمكنك منها؟ فإنت بديت من الأول بداية غلط، نحن الرأي العام العالمي هسع كسبوا أنور السادات في حركته الأخيره دي ، أكثر مما كُسب في أي وقت .. لكن برضه انثلم بعدم وقفة العرب صف واحد في تأييد السادات لو العرب مشوا في تأييد السادات كان يمكن العالم كله أن يكون معاهم وكان يمكن أن تكسب من إسرائيل مسائل كثيرة في مسائل ال...
الصحفي: الرأي العام العالمي اللي تقول عليه ما موجود في قاموس إسرائيل إذا جاي تلاحظ إدانات الأمم المتحدة إدانات أكثر من مئات الإدانات لإسرائيل وهي لا مهتمه فيه ... ***
الأستاذ: لا يمكن أن يكون كده .. أنا عارف كده، لكن لا يمكن أن تستمر دولة إسرائيل بعد اقتناع العالم كله بحاجة تعملها ومصرّة على أن لا تعملها .. تروح إدارة بيقن وتجي إدارة تانية، لكن الحاجة المهمة إنه نحن العرب نقنع الرأي العام العالمي بأنه إنحن يمكن أن نخلي إسرائيل هادئة في محلاتها .. ونحن الحقيقة مطالبين بي دي لكن لأننا مقسومين ما قدرنا نصل إلى نتيجة، أنا ما بفتكر على أي حال أنه نحن راح نهزم إسرائيل في ميدان الحرب .. ولا يمكن نحن أن نمشي لجوهر القضية وبالصورة دي، فنحن مضيعيين وقت ومضيعيين فرصنا تماماً.
الصحفي: طيب ، نحن نجي لموضوع آخر فيما بتعلق بـ
الأستاذ: ما عارف بقى أنا كنت بفتكر أنه .. نحن هسع جوا جماعتنا برة في الذكر برة ..
الصحفي: *** في يوم آخر
|
|
 
|
|
|
|
|
| العنوان |
الكاتب |
Date |
| الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 05:28 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 05:29 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 05:30 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 05:31 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 05:34 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 05:37 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 05:47 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 07:46 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 08:02 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 11:20 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 11:51 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 11:52 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 11:54 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 11:55 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 11:57 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 11:58 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-05-08, 11:59 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 00:00 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 00:04 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 00:08 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 00:10 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 00:48 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 00:50 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 00:51 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 00:52 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 01:21 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 01:23 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 01:24 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 01:25 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 01:26 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 09:00 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 09:03 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 11:58 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 11:59 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-06-08, 11:59 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-07-08, 00:00 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-07-08, 01:53 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-07-08, 02:15 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-09-08, 04:53 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-10-08, 03:08 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-10-08, 04:16 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-10-08, 04:27 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-10-08, 05:24 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-10-08, 05:32 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-11-08, 00:54 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-12-08, 01:45 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-12-08, 11:54 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-14-08, 05:34 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-14-08, 05:37 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-14-08, 05:43 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-14-08, 05:47 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-15-08, 01:56 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-15-08, 02:22 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-20-08, 06:41 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-23-08, 04:38 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-23-08, 04:41 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-25-08, 04:22 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-25-08, 04:25 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-25-08, 04:27 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-26-08, 02:49 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-26-08, 02:56 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-26-08, 03:34 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-27-08, 02:14 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-27-08, 02:38 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-27-08, 03:36 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-28-08, 10:23 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-28-08, 03:41 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-29-08, 01:38 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-29-08, 03:31 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-29-08, 03:33 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-29-08, 03:38 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-29-08, 03:11 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-29-08, 03:39 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-29-08, 04:34 PM |
| Re: الأستاذ محمود محمد طه: عم يتسآءلون؟؟!! الجزء الثانى | Magdi Ahmed Elsheikh | 10-29-08, 05:12 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-29-08, 09:52 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-30-08, 03:50 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 10-31-08, 03:17 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-02-08, 00:37 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-02-08, 02:46 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-02-08, 03:47 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-02-08, 07:29 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-02-08, 07:31 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-02-08, 07:36 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-02-08, 07:39 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-02-08, 08:24 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-03-08, 02:25 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-03-08, 02:35 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-03-08, 02:39 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-03-08, 02:41 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-05-08, 00:59 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-06-08, 04:14 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-06-08, 04:56 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-06-08, 04:57 AM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-08-08, 04:09 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-08-08, 10:32 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-08-08, 10:33 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-08-08, 10:36 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-09-08, 08:32 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-10-08, 03:15 PM |
| Re: الأستاذ محمود محمد طه: عم يتسآءلون؟؟!! الجزء الثانى | عبدالله عثمان | 11-10-08, 03:41 PM |
|
| |
عبدالله عثمان
فيس بوك
تويتر
انستقرام
يوتيوب
بنتيريست