|
|
 الفنان أنور عبدالرحمن(عقد الجلاد) في ونسة خفيفة الظل
|
الاستاذ الفنان انور عبدالرحمن صوت متميز داخل وخارج عقد الجلاد تمرد على جده الشيخ الورع ليلتحق بمعهد الموسيقى والمسرح.ومن شكيرة الى ايندهوفن في الجنوب الهولندي مرورا بتيخل ضواحي نايميخن وانور كعهده من الضواحي لطرف المدائن يروي بعفويته المعهودة تجربته في المعهد والحياة الفنية. ظل انور يشارك في كل الناسبات السودانيه دونما تردد. وترك بصماته هناك.
الى ونسته في جريدة الصحافة اليوم 30-11
للديمقراطية والسلام والوحدة
أسسها عبد الرحمن مختار في 1961م العدد رقم: 5192
2007-11-30
بحث في الأخبار
:: الصفحة الرئيسة
:: اخبار
:: رياضة
:: رأي
:: مع الاحداث
:: ملتقي الاقلام
:: الملف الساخر - ونسة
:: ثقافة
:: الأعمدة
:: الإرشيف
:: البحث
رئيس مجلس الإدارة:
طه علي البشير
المدير العام:
هاشم سهل
رئيس التحرير :
النور أحمد النور
مستشار التحرير:
حيدر المكاشفي
مستشار هيئة التحرير:
أمال عباس
مدير التحرير:
حسن البطري
ونســـة مع نجم عقـد الجلاد انور عبدالرحمن:
كتار من رموزنا ما بعرفوا يغنوا !!!
ابتدأنا الونسة فى مقرر جريدة الصحافة ثم واصلنا ما انقطع فى الاسكلا واختتمناه فى صالون الاستاذ على مهدى حيث كنا فى معية الفنان العراقى نصير شمة ...انور فنان يسكنه الفن او هو يسكن الفن تحب صوته ثم اذا اقتربت منه اكثر ينافس حبه ? كشخص - حب الصوت ..ينفعل عندما يتحدث عن الأغنية السودانية ولأنه متخصص اكاديميا فيها لابد من ان نولى حديثه عنها الاهتمام المستحق ..ولكن كما قلت له فإن ما عنده يستحق مساحة ضمن برامج الاذاعة والتلفزيون ..انور تخرج فى معهد الموسيقى والمسرح ? كلية الموسيقى والدراما حاليا- متخصصا فى الصوت ..بدأنا ونستنا بإسمه الذى قاله له كاملا :انا انور عبدالرحمن على المهل يوسف محمد العضيم
العضيم دى من عضم يعنى ؟
والله ما معروف لغاية الآن هل هى من العضم او العظمة
انتو من الجزيرة .؟
ايوة نحنا جعليين نفيعاب نحمد الله جدنا المهل جاء من المتمة بعد معركة القلابات وهو كان من كبار المحاربين لكن منطقتنا بقت الجزيرة قرية صغيرة كدة اسمها شكيرة الوادى ريفى المحيريبة
هل كان تصورك وانت فى المجتمع داك تطلع فنان ؟
ما كان فى اى تصور يا خليفة ..نحنا كوننا نلقى فرصة تعليم دى محمدة كبيرة جدا
كأنك بتتكلم عن زمن بعيد خلاص؟
لا ما بعيد ولا حاجة لكن نحنا ابونا عامل فى الزراعة ..و ناس البلد كان كتير جدا يقولوا لينا كفاكم امشوا ساعدوا ابوكم (القر الينفخكم) وكوننا نقرأ لغاية الثانوى العالى مع ظروفنا ديك فكان دة مستوى عالى جدا ..
لكن قطعا انت اول زول قرأ موسيقى فى قريتكم ؟
(يضحك) اول وآخر واحد ..لكن أفتكر معلمى الأول فى الغنا والموسيقى كانوا ناس بلدنا
بحبو الفن ؟
جدا ..كلهم فنانين ومن قريتنا دى طلع عوض الكريم عبدالله وهو قريبى شديد وبرضو عبدالله محمد
شعبيين يا انور ؟
يازول قصدك شنو انت؟(يضحك) طبعا غنا شعبى دلاليك وطبله وكدة لكن اى فنان يجى من الخرطوم عشان يغنى عندنا يندهش وقت يلقى البلد كلها بتشيل معاه
لكن قريت المعهد ؟
ايوة واتذكر مرة جا واحد من زملانا فى المعهد استاذ كبير ووصل قريتنا بالليل وقت وصل بيتنا اول حاجة سألنى انت يا انور الوصف ليك معهد الموسيقى والمسرح منو؟
فعلا انت الوصف ليك المعهد منو؟
انا عرفت انو فى معهد للموسيقى والمسرح وانا فى الثانوى العالى لكن كانت المشكلة انى كيف أقنع اهلى لأنو نماذج التعليم هناك محصورة وكلها موجودة فى بيتنا زى المدرس وبتاع أشعة وضابط فى الجيش وديل اخوانى فكان المردود لقرايتهم معروف لكن انا حأقرأ موسيقى أطلع شنو ؟ غناى عرس مثلا ؟
انت كنت فاهم وقت تتخرج حتبقى شنو؟
لا انا كانت رغبتى بس اتعلم الموسيقى دى بعد البحصل شنو دة ما فكرت فيه ..ابوى كان حيادى وقال لى شاور اخوانك الظاهر الحاج داير يطلع منها
والاخوان ؟
اكبر اخوانى وكان مدرس قال لى عبارة جميلة وحتى الآن انا بستعملها قال لى اى زول يمشى الحتة البحبها لأنه حيقدر ينتج فيها لكن طبعا قدم لى وصايا لأنو كان مجتمع الفن شبه فاسد وهو كان بقول لى أقرأ لكن أعمل بيهو البفيد ودى واحدة من العتبات الخلتنى اكون محترم ومسئول
امك كان رايها شنو؟
والله صمتت فترة طويلة خلاص يبدو لى انها كانت بتخاف من المجتمع يعنى ولدها دة حيتخرج شنو..وبعدين لأن بيتنا كان بيت دين عندنا خلوة وبنعلم القرآن وجدى عنده دراويش تعرف ديل هم الوحيدين الأخدوا موقف سالب منى ..اعتبرونى فاسد وممسوخ وزكاة البيت .
اتغير متين الاحساس السالب وحيرة امك؟
وقت جيت لى قدام وجبت ناس معهد الموسيقى عشان يغنوا فى حفلة نشترى بالدخل جنريتر لمدرسة المحيريبة هنا الوضع اختلف ..
انت دخلت سنة كم؟
فى داعى للكلام دة ..غايتوامرى لله انا دخلت سنة 1981م
واخترت صوت طوالى ؟
العملوا لى المعاينة كانوا د.مكى سيداحمد وانس العاقب والماحى سليمان ..وديل كنت بشعر بى رهبة شديدة منهم ..ياخى انا وقت اشوف د.انس العاقب دة كنت برجف عديل كدة ..واتمتم وحالتى تكون بالبلا ..دخلت المعاينة وانا منتهى لكن هم بخبرتهم امتصوا التوتر بتاعى بى اسئلة عن منطقتى والفنانين الفيها وكدة والغريبة قالوا لى غنى لينا لفنان ما من الجزيرة ..طبعا دى كانت مفاجأة لأنى كنت جاييهم جاهز بى غنا الرق
وغنيت لمنو؟
انس العاقب قال لى غنى لينا لعثمان الشفيع وغنيت الذكريات ودى كانت جواز مرورى لدخول معهد الموسيقى والمسرح
كيف كان المعهد وقتها؟
باختصار المعهد كان زى الضان فى الوقت داك وهسة كمونية ساكت
يعنى شنو ما فاهم؟
نحنا كنا محظوظين جدا كان فى خبراء من كوريا وفى نماذج جيدة وانضباط فى الدراسة بشكل قوى
لكن يا انور نفس الاساتذة ما زالوا موجودين ما عدا الخبراء
افتكر سهمهم فى الكلية ما بقى سهم اكاديمى بقدر ما هو سهم ادارى ..يعنى دكتور أنس يغيب فترة من الكلية ويجى راجع تانى ودكتور مكى سيد احمد نزل المعاش اما د.الماحى سليمان فأخدته الناحية الادارية بالاضافة لشغله فى لجان خارج الكلية ..
الطلبة ما عندهم دور ؟
طبعا الجو العام كان عندو دور كبير ..مثلا انحنا لقينا قدامنا ناس الفاتح حسين وعثمان النو وسعدالطيب وكمال ميرغنى وعلى السقيد وسمية حسن وتاور امال النور ..بالمناسبة انا واحد من الاصوات الكانت بتدهشنى جدا هى سمية حسن كانت بتمتلك تكنيك اداء مميز حتى الكوريين قالوا انو دى ممكن تكون مغنية الوطن العربى
شايفك رددت كتير كلمة (كانت) ..هل بتعنى فعلا انها كانت ؟
ايوة كانت ..سمية انا بحبها جدا لكنها مؤخرا اتجهت لشكل غنا ما قدر امكانياتها الصوتية ما عارفو هل دة تبع السوق او المنتجين ماعارف والله
يعنى أقل من صوتها؟
كتير جدا
هل دى مشكلة سمية حسن ولأ عدم وجود ناس منتبهين لأمكانياتها ؟
ممكن تكون كدة .:.وممكن تكون مشكلة المزاج العام ..ياخى لو سمعت سمية فى اغنية الاستاذ هاشم صديق (رسالة طويلة يا امى ) فيها اداء يختلف 360 درجة عن اداء سمية فى غنا السيرة البتعمل فيه هسة دة ..غايتو الهسة دة ما صوت سمية حسن
انت قريت على الكوريين ؟
ايوة قريت معاهم 4 سنوات وفى خامسة اتخرجت على يد عثمان مصطفى
معناها انت عاصرت ايام الهجمة عليهم وانهم (كورنوا)الاغنية السودانية؟
شوف يا خليفة الفنان اولا واخيرا مفروض تكون عنده فكرة ويعتز بثقافته اما الكوريين فجوا عشان ما كان عندنا نوتة مكتوبة ولا كنا بنعرف تكنيك اللآلآت ما علمونا موسيقى كورية ولا غنا كورى ولا فى حاجة اسمها صولفيج كورى ..يا خى نحنا الخبير الدرسنا صوت بروفيسور اسمه مستر كيم وكان مغنى اوبرا شهير جدا عندهم وجابو لينا كمكافأة ليهو فى نهاية خدمته يطلعوه على بلد منفتح شوية ..ياخى انا معجب جدا بالغنا التقليدى السودانى والمدائح لكن وقت كنت اغنى حفلة واحدة صوتى يروح بعد ما استفدت من الكوريين ممكن اغنى 30 يوم دون ما يتاثر صوتى ولا اتعب والحمدلله ما اتكورنت ولا حاجة .بعدين ياخى لأنهم قاموا وزعوا اغنيات خالدة فى المزاج السودانى زى يا سلام منك انا آه لوردى او عازة لخليل فرح عشان كدة ما قبلوها ناسنا ودى مشكلة .
..................................................؟
انحنا دايرين نحافظ على اغنيتنا زى ماهى دون النظر للتطوير مع الاحتفاظ بقيمة الاغنية وانحنا مثلا فى عقد الجلاد اشتغلنا اغنية (الاهلية كملت)لود الرضى ودى اتكتبت فى الاربعينات ما بوظناها بقدر ما عملنا ليها خطوط ومركبات وغنتها اصوات جماعية والان بطلبها مننا الجيل الجديد .هسة فى ناس ما بسمعوا حقيبة الفن لأنها بقت برنامج اسبوعى فى الاذاعة وفى وقت ما استراتيجى ناس بكونوا فطروا ودايرين يتمددوا شوية كدة وبقى محصور فى فئة عمرية محددة.
داير تقول شنو؟
داير اقول انو ما كل تاريخنا مقدس وما كل اصواتنا الكبار والرواد بلا عيوب
انا عارف انو مشروعك للماجستير فى الموضوع دة ؟.
هى دراسة انا شغال عليها اذا نلت بيها اللقب الاكاديمى الحمدلله واذابقت برنامج اذاعى او تلفزيونى برضو مفيدة
موضوعها شنو ؟
اساليب الأداء ..نحنا يا خليفة ما قاعدين ندى الحاجات اسماءها وما فى زول بتجرأ بقول اسلوب هذا الفنان غلط
فى الحقيبة فقط؟
لا ما الحقيبة براها الدراسة مستهدفة الفترة من العشرينات لغاية الألفية التالتة
الناس بقبلوا منك تقول انو الفنان الكبير فلان الفلانى ما بعرف يغنى ؟
شوف بالجد كدة كتار من البتقول عليهم كبار ديل طريقة نفسهم غلط وطريقة فتح الفم ونطق الكلام الملحن وغيرها فى اسلوب اداءه ما سليمة وحقو هم يسمعوا دة ويدوه اهتمام ويتعلموا الصاح .ياخى التخصص دة اسمو تربية صوتية والصوت آلة موسيقية داخل جسدك تحافظ عليها وعندها علاقة بى بدنك .
فى حاجات جميلة ؟
طبعا ودة عندو مكانتو فى الدراسة زى مثلا الدوبيت متنوع حسب المناطق ..اضافة لنوع فرضه السمع الرسمى ودة جانا من ثقافة تركية حتى الفنان ابو بدلة دة ما شكل سودانى دة جانا من ثقافة مصرية او من السينما وحقو نسأل ليه ما نشرنا ثقافتنا فى الزى وغيره..
لمن الدور الأكبر بالنظر للمؤسسات فى الجانب دة زى الوزارة او اتحاد الفنانين او كلية الموسيقى والدراما؟
اتحاد الفنانين ممكن يكون الى حد ما دور رقابى لكن الفترة الفاتت ما كان عندهم دور خلاف انو دار للفنانين افتكر لو نجحت حكاية نقابة الفنانين ممكن يكون عندها سلطة ودور فاعل ..قطعا الكلية مفروض يكون دة دورها الرئيسى يعنى وقت يتخرج منها طالب مفروض يكون مؤهل وواعى و جيد يمتلك الحرفية ..الضلع التالت هو الفنان نفسه على اى مستوى مغنى او عازف او مؤلف يجب انه يمتلك الاحترافية وحاجة تانية العالم متجه للأحترافية وممكن احكى ليك تجربة شخصية
اتفضل
حصل وانا فى اوربا قدمت للمشاركة فى مهرجان موسيقى تعرف طلبوا منى حاجات اكتشفت انى عشان اقدمها ليهم حتكون كتاب كبير جدا ..هسة لو مشيت لأى فنان هنا قلت ليه داير سيرتك الزاتية عشان نقدم ليك فى مهرجان عالمى ما بتلقى عندو ولا صفحة واحدة .
والوزارة اذا كانت ثقافة او اعلام غائبة ايضا؟
انا بفتكر انو الوزارتين ديل مجموعة من الموظفين الما بقدموا حاجة للثقافة والانتاج كله بتاع مؤسسات اهلية ..ياخليفة ياخى فى اى بلد الدولة عندها السلطة العليا فى التخطيط الثقافى ..دة عندنا شبه غائب ولو شفت النماذج الاخيرة لميلاد الأغنيات مثلا او سحر القوافى لأروقة او مهرجان البقعة للمسرح ..بالكتير المؤسسات الرسمية ترعى بس ..غائب عننا تماما التخطيط الاستراتيجى .
وين موقع قنواتنا الفضائية ؟
اذكر هنا مقولة قوية للبرف على شمو فى بداية التسعينات وقت الناس جايطين فى موضوع الاطباق الفضائية قال ليهم (البديل ولا العويل )ولو جيت هسة عملت جرد حساب ما بتلقى نتيجة ايجابية قناة النيل الزرق حتى ما بشاهدها كل السودان حكرا على المشتركين فقط
على ذكر النيل الأزرق ..انا شايف انو برنامج أغانى واغانى للاستاذ السر قدور بيأثر ايجابيا فى ربط اجيال اليوم بأغنيات عندها مكانتها فى الوجدان السودانى ..داير اسمع تعليقك؟
الفكرة فى مجملها جيدة جدا ..لكن اتكررت..يعنى للسنة التانية ما ممكن ..مقبولة فى السنة الأولى ..فيه حكى اكتر من العلومة ..الحاجة التانية اعتمد على فريق محصور والأغنية السودانية مساحاتها واسعة
تنوع الأصوات الموجودة فى البرنامج ما بتسمح بتناول الاغنيات فى مساحاتها المتنوعة والواسعة؟
شوف انا بفتكر فى مغنيين فى البرنامج دة اتطوروا
ديل منو؟
عصام محمد نور وأسرار بابكر ..ديل بتحس بيهم بغنوا بشكل تنافسى ..بغنوا عشان يظهروا بشكل جيد ..لكن عضم الفكرة بقى حكى عن قصص خاصة جدا بالمقدم الاستاذ السر قدور انا بفتكر البرنامج دة يعملوا ليه ورشة وليه ما يشاركوا فيه فنانين كبار
لو طلبنا منك ترشيح ناس يشاركوا فى الدورة الجاية ؟
ممكن ارشح ناس كتار ..مثلا سيف الجامعة وعثمان مصطفى عشان يغنى لأبو داؤد ارشح سمية حسن وآمال النور
وتبعد منو من المجموعة المشاركة الآن؟
انا فى ناس ممكن ابعدهم فى حلقات وفى حلقات تانية استعين بيهم ..يعنى ممكن ابعد نادر خضر وفرفور فى حلقات ..عاصم البنا بارع جدا فى الغناء الشعبى ببعده لحين .
مشكلة الاغنية السودانية عند الشباب شنو؟
فقدان الهوية السودانية يعنى وقت يخش بتاع الاورغن ويعزف لينا مقطوعة حبشية ويجى الفنان فى نفس الأغنية يغنى دمعة الشوق
بعض ناس الاورغن ديل خريجين الكلية؟
انت قايل الواحد بتخرج فكى ...ما بلقوا ليهم وظيفة عشان كدة بغنوا اى حاجة
مصطفى سيداحمد (عليه رحمة الله)ما كان موظف وحقق مشروعه الفنى
ما عشان كدة بقول ليك الفكرة ياخليفة ..ياخى شوف الثروة البجمعها صغار الفنانين والفنانات ديل دون ما تكون عندهم حفلات جماهيرية .
طيب خلينا ننتقل معاك ..من قرية شكيرة فى الجزيرة لآندهوفن فى هولندا ..كيف كانت؟
انا من قرية فيها 4000نسمة انا بعرفهم كلهم بالاسم وتفاصيلهم ..ولو كنت فى المدينة وهاجرت ما كان حتلاقينى مشكلة لأنى هسة ساكن فى الخرطوم سنتين يادوب قبل اسبوعين بس وبسبب مشكلة فى الموية فى العمارة اكتشفت انو عندى جارة تحتنا..وانا فى آندهوفن كنت بتذكر اهلى فى شكيرة واصلا ما بتذكر الخرطوم
واستوطنت عادى ؟
طبعا وربنا يحمينا من ناس الضرائب انا عندى بيت هناك ..اقصد انا وزوجتى عندنا بيت هناك لأنو القانون ما بسمح ليك تقول انا براى لازم زوجتك تكون معاك دى عشان السفير الهولندى لو قراها ما يعمل لى مشكلة (يضحك)
اهلك فرحو طبعا؟
كنا فرحانين فرح شديد انو اتنين اولاد زرق كدة يشتروا ليهم بيت فى اوربا ضربت بالفرحة دى لى ابوى ونقلت ليه الخبر بيت فيه حديقة وخمسة غرف نوم وقراش للعربية وعلى شارع رئيسى..تعرف ابوى نهرنى ليك نهرة تعمل ليك بيت فى بلد الكفار حاولت افهمه قيمة البيت وميزاته يازول كأنه ما قلت حاجة تانى قال لى ما عندو طعم تعال سوى ليك بيت هنا فى شكيرة دى يقولو دة بيت انور هسة هناك الجايب خبره منو..عشان كدة لازم ابنى لى بيت فى شكيرة اعزاز لى ابوى
زوجتك من نفس المنطقة بتاعتكم؟
لا زوجتى امدرمانية ما عندها اى علاقة بالجزيرة وما شافتها الا بعد العرس
طبعا ناس امدرمان بقبلوا الناس عادى لكن مجتمعكم صعب ..كيف سمحوا بالعرس دة ؟
لأنو نحنا ما عندنا عم ابوى وحيد والباقين عماتنا عشان كدة ما كان فى غطى قدحك..لكن فى الزواج أهلى أصروا تكون الدعوة فطور عشان اهلنا يرجعوا بدرى يلحقوا زراعتهم وقد كان بعد استغراب طبعا من ناس امدرمان .
والحمد لله عملتوا اولاد ؟
الحمد لله وقت يجو شكيرة اهلنا بسموهم ناس الأمم المتحدة لأنهم بتكلموا هولندى وانجليزى وما تيسر من العربى
عندهم جنسية هولندية ؟
طبعا لأنهم اتولدوا هناك لكن برضو عملت ليهم الجنسية السودانية
سميتهم منو؟
بنتى الكبيرة اسمها غيداء ودى كنت داير اسميها بتول على أمى لكن المرا رفضت
بى منطق طبعا؟
والله يا خليفة ماعارف ..غايتوانا قلت ليها كان جات انتاية نسميها بتول ولو جا ضكر نسميه ياسين هى قالت لى ما ممكن يكون اسمك انور وأمها اسمها رامة والبت عندها جنسية هولندية ونسميها بتول ..كدة ح تتعقد ..المهم وصلنا لاتفاق انو البنات تسميها هى وانا اسمى الاولاد ..وقد كان رفضت ليها اسم لدن لأنو فيه مياعة كدةوانا جعلى ..
هسة عندك غيداء وياسين
والأخير يحيي..ديل من الزوجة الأولى والتانية لسة ما عرستها
لكن انت فى السودان وهم فى هولندا؟
انحنا بنتلاقى ستة مرات فى السنة انا بمشى ليهم تلاتة مرات وهم بجونى تلاتة مرات لأنو زوجتى طبيبة وبتحضر الآن فى علاج الادمان ودة فيه شق علم نفس ولسة عندها سنة ونص
واولادك كيف اتقبلوا السودان؟
شوف بجو من اندهوفن بنزلوا فى المطار بمشو بانت ومنها طوالى لشكيرة الوادى وهسة اتعلموا عربى وقرآن وماشين كويس
ما عندهم ميول فنية ؟
ياسين لاعب كورة ممتاز واحتمال كبير يمشى المدارس السنية فى نادى آندهوفن الهولندى بعد ما طالبوا بيهو فى المدرسة ..غيداء عمرها خمسة سنوات بتغنى كويس لكن بترسم احسن لأنه حبوبتها فنانة تشكيلية ودرست فنون فوزية يوسف المامور من دفعة د.احمد عبدالعال..اما يحيي فهو فى تلاتة سنوات الآن لكن ممكن يكون مغنى جيد لأنه بحفظ كويس والله بفتح المسجل ويغنى اغنية عطبرة بتاعة عقد الجلاد كاملة
كيف انطباعهم عن شكيرة؟
بحبوها جدا لكن قاعد أحس انهم بعتبروها منطقة سياحية او أثرية
وأمك بتتعامل معاهم كيف؟
اول مرة جو شكيرة قلت لى امى الاولاد ديل خلو ليهم اوضة براهم حسب تعويدتهم هناك ..المهم بعد ما رقدوا جات امى بالليل تتفقدهم لقتهم بتونسوا بالهولندى ..تعرف امى دى خافت وقعدت تتعوذ وتسبح وتتحوقل وتقول لى كر على يا انور اولادك مشاركين ..يعنى مخالطهم جان ..
انور فنانك المفضل منو؟
فى زول انا حبيتو وحبيت طريقة اداءه كتير جدا وهو بادى محمد الطيب فى المعهد كان بدهشنى الفنان الصومالى أحمد ربشة ودة كان احسن زول عندى بغنى سودانى وللأسف هو صومالى وكنت بتمنى أصل لمستواه
وأغنيتك المفضلة؟
اغنية انت حكمة ولأ آية لكن بى طريقة بادى عليه رحمة الله ..عنده حرفية اداء بعد ما مات حتى عرفنا انو زول عظيم
|
|
 
|
|
|
|
عبدالوهاب همت
فيس بوك
تويتر
انستقرام
يوتيوب
بنتيريست