زواج الخواجة احلي زواج

Quote: وأي اجنبية كان بقت (كوندوليزا رايس ) ولا (هيلاري كلنتون) ولا (جنيفر لوبيز) مابتخش في ذمتي ببصلة وحرم المرة كان مابقت من دارجعل ولا شايقية ولا دنقلاوية ولا من اي قبيلة في السودان مابشوفا مرة زاتو والكلام ده بقولوا ليك عن تجربة مع علاقات مع اجنبيات قربت ارتبط بيهم الا ربنا شافني , ومابغني الا مع ابوامنة حامد : بحب من بلدنا مابره البلد سودانية تهوى عاشق ودبلد يا رجاء السودانية غير , مهما ادعينا غير كده ورغم انو بالمناسبة بقية الجنسيات بشوفوا نسوانا شينات وبقرقوا عليهم , لكن والله انا بضحك عليهم وعلى نسوانهم , والمرة كان مابقت سودانية كده من الباب للطاق بشوفا شينة . وكان عاوزة تشوفي مميزات المرة السودانية تعالي اعزمك يوم تشوفي يوم في حياة مرة سودانية (بت بلد) , كان مشيتي اسي بيتنا تلقي امي اخر من ياكل واخر من ينوم و بتعامل ابوي زي الطفل من عرستو , وحياتا كلها لينا وليهو وكان مالقينا مرة زيها (الترابة في خشمنا) وتعالي شوفي نموذج تاني (خالتن لي في مقام أمي) زوجها عيان ليهو سنين , تحمي وتمارض وتشيل وتخت وحارساهو ليها سنين , مع انها جمال وشباب في عزو , ما مرقت حامت خلتو , ولا زهجت من ممارضتو , ولا زحت من جنبو , وشايلة شيلة الخواجة الراجل بتاعكم مايشيلا , وتضحك وتبتسم وشايلة سبحتا تصلي وتدعي ليهو , وسنين طويلة حياتا اتوقفت عند مرضو ده , تقولي لي مميزات الرومانية والمش عارف ايه ؟ و والله كان مامرة بت رجال جد كان ماصبرت على الهي فيهو شهرين مش سنين زي ماهي صابرة اسي , ولو كان عرس من الجنسيات الانتي ذكرتيها دي كلها كان اسي يامات مقهور بعد رمتو , يا رمتو في مصحة وشافت حياتا , وقالت انا مالي ومال كده . واسي دي عندي اصحابي كتار معرسين اجنبيات والله سافين التراب وبتضحكوا بي سنونهم ساكت . اي نعم في سودانيات سجمانات بس ديل بكونوا ماطلعوا بنات امهاتهم ديل ممكن يكونوا اسوأ من الاجنبيات ومانسوان شدايد بس ديل كمان مابقيسوا بيهم السودانيات لانهم طباعهم غير امهاتهم وممكن يكونوا موجودات في كل بيت بس بكونوا نسبة قليلة وظروف معينة متعلقة بتربيتهم خلتهم يشزوا عن قاعدة المرة السودانية وخصائصا الفوق دي وغالباً ديل بفشلوا في حياتهم وبكونوا باينات تايهات ومشوشات ودي نماذج كتيرة وما بتخفى من اول تعامل بتتفرز . والما عرس سودانية بت بلد ماعرس تشيل همك وهم اولادك واهلها يبقوا اهلك الحياة ما (انجويمنت ) وفسح وسهر ومتع بس , الحياة فيها صعاب وتحديات ومشاكل لازم تكون معاك مرة في مواجهتا مستعدة للتحديات دي زي ماهي مستعدة للمتع .. والسودانية الاصيلة هي المرأة الوحيدة الفي العالم البتدي اكتر من مابتاخد و امكن يارجاء نحنا المغتربين ديل اكتر ناس مفروض نكفر بالمراة السودانية , لأنو بنعاشر بنات اتولدو هنا واتربوا هنا وبقوا زي ماقال الطيب صالح (زي شجرة اتغرست في غير ارضها ) أو مامعناه وديل خياراتنا في الزواج , بس ديل برضو نسبة قليلة بنشوفهم من بار لي بار ومن مطعم لي مطعم ومن سوق لي سوق وبننظر ليهم بشفقة مش اعتراضا على شكل الحرية البلقوها زيهم زي غيرهم من بنات الجنسيات التانية المتأثرين بيهم هم , لا بس لأنو كل بني ادم ربنا خلقوا في ظروف اجتماعية مختلفة ومنظومة قيم مختلفة , لو شذا عنها بكون ادخل نفسو واهلو وتربيتهم ومنظومة قيمهم في مأزق أشبه بالفشل , وبالمقابل في بنات سودانيات ماشافوا السودان حتى ولا اتربوا وسط عائلاتهم الممتدة , لكن سودانيات في كل حاجة , ومابختلفوا عن امي وامك الا في التعليم العالي والمستوى الثقافي المالقوهو ديلك وفي المظهر الخارجي المودرن والاناقة حسب العصر . <<<<<<<<<<<<<<<<<<< عزيزي كمال علي الزين كلام عقل وكلام منطقي جدا جدا.. وياريت الناس كلهم بيفكروا زيك.. واذا اناما وجدت عريس ليه نفس افكارك حأتزوج اول خواجة مسلم يتقدم لي.. بس لازم يكون مسلم قبل ما يجي يتقدم لأنه اذا اسلم مخصوص عشان يتزوجني حيكون اسلامه قشرة ومسبب. والله يديك العافية ويكثر من امثالك..