|
|
|
 Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: حذيفة الحسن)
|
Quote: الاخ صديق الموج
دائماً حريص على اثبات حقوق الاخرين فقد شهدت تأبين الراحل المقيم الشاعر حميد واخراجكم لتلك الاحتفالية
والتي كانت اجمل ما حضرت مؤخراً فلك التحية والتقدير بقدر حجم انجازاتكم القيمة |
حذيفة ......كل سنه وانت طيب
شكراً للاطراء والله يشهد حضوركم كان اهم اسباب نجاح الليلة و دين حميد على السودان
لا اظن سوف توفيه ليلة نتمنى ان نحتفى بحميد كلما كان ذلك ممكناً..
نأمل ان نراك فى صفحة الشاعر الفخم الضخم ابو صلاح،،،
| |
  
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: حذيفة الحسن)
|
... و قال ضمن ما قال،
غضون تلك (الورديات) الطويلة لأشغال العُشق و الغرام و شعر النسيب،
حبك يمزج أعضاءي إجمالي .. لو كنت يمين يهواك شمالي
أظهر لا تبالي يا غزال الروض
شكرا يا موج لهذا النداء الوطني الصادق،
و لو والنا الزمان بسعة الوقت و هدؤ البال، فسوف اسجل بعض رواصد (السينتاكس)، أي ذلك النحو و التصريف الفذ عند هذا الصالح بن عبد السيد،
و اقول : إنه حتى الحين فإن مفردات على شاكلة : اُحيلاهو ، عسالي، عينانِك، إخضرا، إتحكرا، تظل تمثل إسهاما" خاصا" جليلا" حفظ لأهل السودان خروجهم المشروع
و تفردهم البائن وهم يقاربون المدرسة ( العربية ) لل خليل بن احمد الفراهيدي .. قصدي تلك المدرسة المضطلعة بأمر العروض و الاوزان و القوافي
يحي قباني : لك سلامي و تقديري . . و إن جاز ان اضيف ما تيسر، فقد لاحظت أن السينتاكس عند ابو صلاح هو من ضمير الشعر نفسه، من لحمه
و دمه، و ليس صنعة تابعة كما كان الامر عند قدامي ( النحويين) العرب من جماعة سيبوية و ابو الأسود الدوؤلي :
متى ( ليا ) يفيق عقلي و يصحالى : لا ادري موقع ( ليا ) هذه من الإعراب .. لكنها و بعد كل حال هي مفتاح الامر برمته، وهي سر
تلك المدرسة السودانية ذات النكهة الخاصة
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: صديق الموج)
|
البديع هواك سباني - كلمات ابو صلاح
يا البديع الهواك سباني يا أخا البدر يا مكمل
كل من طرفه فيك تأمل قلبو من الغرام تحمل
كم عقل في هواك مهمل مزوى بين خصرك المزمل
المضمر فريعه باني علاه بدر الصفا المجمل
يا جميل هجري طال تسلسل بين اياديك حبي ليك تمثل
يا رشيق عن قتيل هواك سل برقك المن سناك يرسل
نور عقيد درك الجمانى الضاوى بين فاطرك المعسل
لي سواك قلبي لا يرى محل ومستحيل عن فؤادي ترحل
وما بجد عن شروط هواك حل والسهم منه جسمي ينحل
كم سحب لحظه سيف ازانى من طرفه السقيم وأكحل
دول ايدك أم حرير مجدل والوريد ولا القامه اعدل؟
هل صباح بالمحى تبدل ودا الاسيس ولا ليل مسدل
والكتيف لي ضميره تاكى في أرائك الدروع مهدل
ركني ليه من هواك تزلزل والنفوس في رضاك تبذل
ياالرشيق الحشاك مهدل يا ملاك من علاك منزل
المريض في الهلاك يعانى يحي لو طرفه فيك تغزل
ياقمر في سماك مدلل شوقي زاد منامي قلل
الملك لي الغرام تذلل لي قلب برضاك تعلل
يا الهواك أضحى لي تهاني لابسه تاج بالدر مكلل
كيف هواك عن فؤادي ينقل دا المحال ما أظنه يعقل
يا رقيق الحشا المفقل يضوى سيف طرفك المصقل
لو سحب لحظه هندوانى للجبال الرواسي قلقل
قلبي بى ذكركم تأهل وشوقي كاد منه عقلي يذهل
والدموع من عيوني تبهل ما أظن بالعلي تجهل
في الخيال أحيا لو تراني والنجوم من وصالك أسهل
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: Abdlaziz Eisa)
|
لك التحية عزيزي ود الموج وكل سنة وانت طيب
ليلى طال
ليلى طال زى ديسك الهضلم نزل.....لضميرك يا فريهيدا انسبل
والجبين النورو يتلاصف لمع......ضوه لينا الحله بالاربع قبل
**************
فيكى حاجب زى هلال اسود غزر......والرمش من طوله فى طرفه انشبل
شابه النشاب والقوس والوتر..............قلبي من جوز غمضه برمشه اتنبل
*********
والعيون الواسعات بلحظهن..........قصرن لعاشقن طول الأجل
ناعسات أطراف عيونك يظهرن.....في خديداتك علامات الخجل
***********
يا أم سنونا من درر يتلاصفن.......زى بريق العينه فاطرك في المثل
حبكم يترب حبوب وسط الحشا........منها زرع الريده في قلبي انشتل
**********
ما بريق المبسم الفرّ وحفظ........لجواهر سنو ما نقا ونجل
المنيل ديمه فايح بالمسك.......لو يمر نسامه بسكر بعجل
************
يا أم رقيبتا شمعدان باهى اتنصب.....لرقاب عشاقه كم أحيا وقتل
والايدين الناعمات يتجدعن......يشبهن خيط الحرير الانفتل
********
والصدر البى النهد برز قلع........تقلو رجح بالضمير الانتحل
والكفل في المشيه يقلع ويتنتل....زى مشية المهره في الطين الوحل
*********
صادفتني وزودت ناري انضرام........أم لهيجا احلي من صافى النحل
فارقتني وفارقت عيني المنام.........قلبي من بين الضلوع فر ورحل
**********
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: صديق الموج)
|
اخي صديق
طبعا لازم انضم وبدون دعوه
بحكم الاهتمام بالمجال
ثانيا بحكم علاقتي المتجذره مع تلك الاسرة الكريمة
وبالذات اسرة كامل صالح عبد السيد
وبعد ان زودني اخي وصديقي دكتور وجدي كامل ابو صلاح بمعلومات ثره عن ابوصلاح
وكان من المفترض ان افتح بوست بهذا الموضوع لكن الانضمام للجمع
ربما يكون افيد وخاصة ان به فطاحلة المهتمين بالتوثيق للحقيبة علي وجه العموم
وابو صلاح علي الاخص
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: صديق الموج)
|
صديق ياموج
كل سنة وانت طيب
قعدت يوم اكتب عن اغنية الحقيبة
وما كملت الكتابة ربما انشغلت ربما انشدهت
وارجح هذه الاخيرة
لكنى مغرمة بهذا الفن الاسمو حقيبة الفن
وازعم انه كالنهر
كلما تدخله تخرج غير الكائن الذى دخل النهر
ومن بين هؤلاء الذين احبهم هذا الابو صلاح
اليس هو القائل
الشجراقلام جميع والنيل مداد
لو كتب اشواقى ليك ما عددا
ام انى مخطئة ؟
بفتش ليك الدراسة هسى ماشة الشغل الله يكرمك
اقعد عافية
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: جميلة ابراهيم السيد)
|
مرحب ب (جميلة)
و ليبقى بوست ابوصلاح عاليا" في خرطوم حُجب فيها منبر سودانيزاون لاين.. خرطوم بادوبات المطر الحبست الدرب، خرطوم البعوض الفانتوم ،
البعوض صناعة و حليف الحكومة : الشال منام عين اهل السودان وادمى أجسادهم
كان ابوصلاح طليعيا" جسورا" و هو يعلن خروجه الشرعي من وسط جماعة الرميات الاوائل و معه امير تلك المدرسة الجديدة (ابراهيم احمد بابكر العبادى)
.. كان صالح عبد السيد شاعرا" ضخما" واسع الإدراك الادبي و ذو ( جراب من المفردات ) لو نثرها عفوا" او إقتدارا"
لغطت صحراء العتمور خضرة و جمال و نظم أنيق
خذ مثلا" (فريع البانة المن نسمة يتمايل حاكى المُنقسمة)
http://www.youtube.com/watch?v=8rQLK3tKuOA
زُبرجد لونِك و إخضرا !
على المك حتى لحظة موته كان في عجب : من اين اتي اهل السودان بفكرة اللون الأخدر المنسوب لجينات البشر في ذلك التحشيد الإثني - الجمالي
قليبي فدايتك و ما (ضرا) .. لو كان يدقق و (يِضرا) ، و الثانية في عجز البيت هي من تضرية العيوش قبل أخذها للمحراكة القديمة
بديع ابوصلاح ( جناس و طباق) هو امر سوداني أصيل ( ما بعد همزاني) .. هي معارك و إشتباكات لمفردات مُنتجة للجمال
.. و بعض من حديث لاحق عن حسناء ابوصلاح : الفاقت أعرابا و أعجاما
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: جميلة ابراهيم السيد)
|
.. هو صاحب الإزميل ذو النكهة السودانية .. هو بالضبط ( فدياس ) النصف الاول من القرن العشرين السوداني
http://www.youtube.com/watch?v=_7OvCkEOpYE
( جمرو حرقني .. أفارق الروح لو يفارقني .. حبيبي هواك ) : سينتاكس Syntax امدرمان القديمة : تحولات المبتدأ و الخبر بطريقة اولاد الموردة
( هاهنا ينتصب القوس الموشّى لأهل السودان .. حيث الجملة الخبرية تسبق المبتدأ حفاظا على اوزان اهل البلد )
.. وهو راصد لكل عناصر الجمال الأصيل في تلك الحسناء السودانية التي فاقت ( أعرابا و أعجاما )
وقائلا" بل ( مستبسلا" ) في وصف خِضاب (حناء) نساء السودان :
محنن ب (دمي) كيف تجني .. دا ايه الفي إيديكا فرجني .. ? ! حبيبي هواك جمرو حرقني ..
ومع ذلك لم يكن أبوصلاح في ( حِسية ) عمر بن ابي ربيعة .. The non - Sensual Abu Sala'h
.. وهذا حديث آخر في فصل الخطاب الأدبي .. و سجال مُتكلمة السودان !
| |
|
|
|
|
|
|
|
|
 Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
يا الموج دا شعرا ما عندنا ليهو رقبه
لكن سنجلس جلوس الحيران على عرائك الشيوخ وسنقطع النفس
حتى يكرمنا الله بذرة من ذاك البحر الهلامى الصعيب ومن خلال
متابعات ضعيفه رصدت دكتور مهدى والد لنا مهدى من أهل
الإهتمام وكذلك الدكتور جعفر ميرغنى إلى جانب ضلوع على المك
عل الأستاذ كمال الجزولى يقول عنه حتى ولو سمسم القضارف أو
حجر الظلط. فيا موج شعراء الحقيبه أصلهم من وادى عبقر
بالربع الخالى وخالهم عمرو إبن يربوع ياخ سدد الله خطاكم
فأصنعوا لنا معرفة فى ذلك المضمار
والسلام والإحترام لكم أجمعين
منصور
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: munswor almophtah)
|
UP
فلتظل رواية صالح عبد السيد ( فوق للقوس و السِمّاك الاعزل )
- إستجابة لمناشدة و إهتمام مطبوع و مؤصل من أخي العزيز/صداح الحسن
- وفي تذكر و سيرة الراحل صلاح عثمان شمت (الزين كلس) حارس البوابة الشرقية لهذا النوع من الغناء السوداني
.. تلك المظان العظيمة ال Magnificent التى فرخت قولا" بديعا" على شاكلة :
- حِن يا قمر اوفي لي معادا ! (ابوصلاح)
- يا خُلاصة حُسن الغانيات في امدر .. ملكني هواك يا نفيسة الدر (البنا)
- و قلبي الما بعرف الوجل .. هابِك و خاف سيف النُجل .. يا موفورة النفل ( العبادي)
- اشكي ليك اياما" عدن .. الامان يا جنة عدن .. يا غُصين النقا يا لدن (ود الرضى)
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
كانت شأنا" سودانيا" جديدا" تلك المُدن المعروفة ب ( مدائن ابوصلاح )!
هي ترميزات البديع، و ميتافور المد الإنساني - الفني لأهل البلاد .. وهي ليست كتلك المدن الدارجة :
مدن الساحل : مثل سواكن القديمة
مدن تجارة المسافات الطويلة : خذ بربر (ود الفراش) كمثال
مدن الإنتقال و التبدل : مثل مدني التي حلت مكان سنار القديمة .. سنارالمُبجلة عند محمد عبد الحي
مدن الإنقسام الإجتماعي السوداني الثالث الكبير للعمل : خذ عطبرة و الخرطوم ذات الورش و الفبارك، و هناقر قطاع الخدمات،
و مناطق صناعية كاملة حوت ما هو صغير و متوسط في ضروب الإنتاج القائم على فكرة إنتزاع فائض القيمة
مداين الجوف و الضرا : هي إختراق داوي منذ عهد مجموعة الشهيناب ، و قروسطية ماقبل حكم العبدلاب و الفونج، ثم سودان خورشيد، و إبتداءت ونجت و نهضة هاو
هالكا (صالح) كل ما ينظُرا ....
وفي مدينة الجوف ساكنا الضرا .. يا بدور القلعة و جوهرا !
ومن هي حسناء قلعة توفيق صالح جبريل التي أسكرت (وهبة محمد سعيد) صاحب الأكورديون ابوزراير ؟
تلك الحسناء التي جعلت ( ابو الحاج ) يسوق الغناء واحدة ورا واحدة .. سواقة عبد الله كابو للغناء في حلة عباس عهد يفاعة بادي محمد الطيب
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: عبد المنعم عمر عثمان)
|
Quote:
أحبابي الأفاضل سلام عريض ليكم ،،،،،
الا يوجد وزير تربية وتعليم رشيد
فيقرر مادة ( حقيبة الفن) في المدارس
الثانوية أو حتي في الجامعة !!!!
لكم ودي ،،،،،،،،، |
عبد المنعم عمر سلا يا هندسة
الامم الراشدة هى التى تحتفى بادبها ومبدعيها
اضم صوتى لصوتك
وان لم يقبلوا الامر هكذا فلتاتى الامثلة والنمازج فى البلاغة منها
لا زلت اذكر كيف اننا فى محمد حسين الثانوية وكان
استاذ جعفر سعد بججمه الصغير وعقله الكبير وهو بدرسنا
الاسماء الخمسه كيف انه باعد بين ساقيها وفتح ذراعيه
وقال:
بربك هل ضممت اليك ليلى قبيل الصبح او قبلت فاها
و قال: الشاهد هنا كلمة فاها
فبدل انت تأتى الامثلة من شعر شوقى فى المجنون فلماذا لاتأتى من مجانين السودان
الذين جننونا وذهبوا دون الاحتفاء بهم؟
عبد المنعم اتمنى ان اشوفك على صفحة ابو صلاح فى الفيسبوك والرابط تجده بعاليه..
بالجنبة:
د. طراوة لا اظننى محتاج ان استأذن منك كل مرة لانقل حلو بديعك للصفحة فانا افعل ذلك دائماً
ولا اظننى انسى ان احفظ لك حقك الادبى حتى تأتى الى هناك ويبقى الود،،،،
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: صديق الموج)
|
.. لكل المتداخلين و المتابعين تقديري .. بيننا مواثيق ابو صلاح الممهورة بعطر تلك المواجد السودانية
ذات الأثر الرفيع الباقي :
- إشتياقي وهجرِك حرام : عودة محمود عبد الكريم و عطا كوكو .. ذلك الضياع الجميل عند أعتاب (ساكن الموردة)
- لوتجازي لو تسمحي .. حنانة ريدك ما بتمحي : بشير الرباطابي نازلا" من حلال البجراوية و كبوشية في ربى امدر القديمة
.. يا موج عرج بي و ميل .. و ( افعل ما بدأ لك ) : هِن تلاتة عزن و قِسن .. ماء و خضرة، و وجها" حسن
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
.. واقعة (الخوجلاب) ! : حيث السيوف تتجرد من عيون واسعين
ورطة صالح عبد السيد : الكان رايق و ساكن في صفا و تأمين ... !
.. وجاء في محضر و مدونة ذلك الزمن الجميل : أنه تم رصد 15 قتيل، و 20 مطعونا" بسهام ريشها الهُدب تشق القلوب قبل الجلودِ،
فضلا" عن محنة وهبة محمد سعيد :
صاح وهبة فاقد عقلو ما بين جريح و طعين .. الناس جروحم تسعة و انا لي جروح (تسعين)
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: محمد عبد الماجد الصايم)
|
.. مرجبا بود الصايم
المنبر نور و إزدهي بجينات ابوصلاح المحمولة بأجنحة أبنائه
او كما قال البنا : زهر الروضة نور في فصل الربيع .. و النسام يقسم في الأرياح يبيع
وقال صالح في زواج صفيهو (ربيع) بحي السيد المكي الأمدرماني :
برخيم الصوت الجهور .. و إحتفال غاليات المهور
نجم سعدك بدأ في الظهور .. ساعة بينين توزن دهور ..
دام عليك الهنا و السرور .. يا ربيع في روض الزهور عيش مُنعم طول الدهور
تقديري للجميع و كذلك مواثيق و مُرسلات ابوصلاح ..
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
صديق الطيب الموج وضيوفه
رغم العشرة القديمة وما حا اقول ترجع لي سنة كم , لكن يا صديق كان تكشكر لي ساكت ووقت ابيت اها جيت براي , اها يا ود العم الدقشه شاهد علي العصر وقيل احيانا كان بيصلح صحن الفول في نواحي حي العرب والمظاهر ايام
الثانوي . دحين الزمن داك يا صديق ما كان عندك رق؟؟ غايتو التلب الله يطراهو بالخير كان مغني وصوته جميل وسمعت منه جافي المنام لاسعني حي وهي كلمات ابوصلاح والحان كرومة ,ومن الزمن داك ماسمعتها الا مؤخرا ورسلها لي ودالقرشي كتر خيروا بصوت اولاد الموردة , ويروي الرواة ان مجموعة من الفنانين السودانين ذهبوا الي مصر لتسجيل اسطوانات ومن ضمنهم كرومة وصادف أن كان أمير الشعراء احمد شوقي موجودا, وسمع الأغنية وسألهم من شاعر الأغنية ؟ أجابوا ابوصلاح . فا أتاهم بسخة من دايونه وكتب أهداء من أمير الشعراء الي أمير شعراء السودان وطلب منهم توصيل النسخة الي أبوصلاح , وعبقرية ابوصلاح في القافية العجيبة كلمة وفي البيت الذي يليها تصغير
وهاكذا حتي نهاية القصيدة والبرتكان ليك ولا لي ولا لمولانا
جافي المنام لاسعني حي
ام زاد غرام ضاوي المحي
قالب الدرع يقدل ضحي
طال جيدو فاق ظبي السحي
قال لي تطوف بي كل حي
كيف تبقي عاشق وانت حي
لو يا نسيم مريت عشي
قبل فويطرات الرشي
قوليه قط ما بي شي
الا الغرام شاويني شي
خليك حنين رايق بني
لاتتني قامة الدابو ني
املد خصر خاتي التني
حق صدرو يلعبو التني
عينيك متل عين الجدى
السارحة بي شويدن الربي
كم بالدعج هلكن صبي
جاهلابو زي ماجاهلة بي
يا الفى الردف خصرك تكي
انا من هواك دايماً شكي
فاطرك وقد بالبسمة كي
يشويني لا يكويني كي
نورتي يالخد الجلي
تخفي الجواهر و الحلي
خبرني يا اب صدراً عُلي
البرتكان ليك والا لي
قالت دا لا اتباع لا شُري
احسبلو فوق نجم التري
لسع رخيص ناعم طري
خمر الدلال باقيلو ري
سائل حميمات الودي
بالزمة يغشن للجدي
يردن ذلال فاهو الندي
عن نيلو قصرن ساعدي
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
عزيزي طراوة
وقت الموج عامل نايم وساكن الفيس بوك , النسكن ليهو في البوست , لحدي مالله يرد غربتو , الخرتوم بحري كان اسمها الحلفايا وسوق بحري كان اسمه الحلفايا السوق , محل الاملاك والسوق الحالي لكن الاماكن القديمة زي الصبابي وحلة حمد وحلة خوجلي وشمبات وحلفاية الملوك تحمل نفس الاسماء من زمن السلطنة الزرقاء , والعريس موضوع القصيدة هاجر جده من جهات بلاد الشام في ذلك الزمن ولم يكن اسمه عبدالحافظ ولكن لانه حفظ القرأن في فترة وجيزة سمي حفيظة بكسر الحاء , سكن ابوصلاح بحري فترة من حياته وكان عبدالحافظ {الحفيد} صديقه وقال هذه القصيدة عندما تزوج عبدالحافظ من احد سيدات الدواليب بحلفاية الملوك .والقمري المظلل طبعا من كلمات ابوصلاح والحان علي الشايقي ولمن التوم عبد الجليل سجلها اسطوانة شال معه شيخ عمر البنا وعلي الشايقي ومحمد الامين بادي.
القمري المظلل
القمري المظلل بى ورق الأراك
روح لي حبيبي وقولو متين أراك
يا الفى قوس حواجبك ناصب لي شراك
بيعك في المحاسن والأرواح شراك
يا الفارم فؤادي يا الضارب ضراك
شيل النوم ورجع قلبي الطاش وراك
الــدر المنظم عقــدك ولا فـــاك
والعناب مكنتل أم خضرة شفاك
عيد النظره داوى الجرح الما خفاك
الصد والتدلل والهجران كفاك
الظبي المروقل جـــافــل بى وداك
يسكر سمعي صوتك من راحة نداك
يا الكاتل عشوقك بهدل بى عداك
عندك جوز قنابل في صديرك هداك
الفرع المفرهد في روضة نداك
شعرك ليل وخدك ولع نور هداك
كيف ما تشيل قلوبنا روحي تروح فداك
والردف المرجرج يلعب بى فداك
الصدر المقبقب يا الضامر حشاك
من ميلة ضميرك فرع البانه شاك
بى سهم الرشارش جوّ ضلوعي شاك
أصلك لي ودار أعمارنا الله نشاك
تايه فكرى عايم في النور الملاك
من بهجة محاسنك كيف اتاملك
عبدالحـــافظ ابشر حــظك تملاك
هل تدرى أب عوارض إنسان أم ملاك
يا المن در مخلق كيف انظم صفاك
وين نومي المعلق يا أب طرفا غفاك
عبدالحافظ أصلك نجم الحظ لفاك
عيش بين سرور أتمتع في صفاك
يا جدي التمائم ظل الغيم رعاك
راتع في الخمائل قانص ما سعاك
كيف تصطاد قلوبنا وما الشئ الدعاك
ارجع من هزارك جيب قلبي المعاك
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: يحي قباني)
|
Quote: يا الفى قوس حواجبك ناصب لي شراك
بيعك في المحاسن والأرواح شراك |
اولاد قلبنا اتلميتو هنا الله يجزيكم خير لكن والله مغرودين فيكم فى الفيس بوك
صلاح النصرى شوف عمك ابو صلاح ما قال يا الفى جوز عيونك قال
يا الفى جوز حواجبك ناصب لى شراك مش فى واحدات كدى حواجبهم
زى القلوبيه نص دايرة عديل ، غايتو عمك ده قجاج قج ,,
انى امنت بابى صلاح من شاعر..
خسمتكم بالذى انشأكم كان ما جيتونا فى صفحة ابو صلاح فى الفيس بوك
والرابط موجود فوق عشان هنا البوست بتارشف ويضيع مجهودنا وعمرنا سدى
سوف انقل ماتكتبون الى هناك الى ان تأتونا ،،،
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: باسط المكي)
|
سلام يا عشاق ابوصلاح
ابوصلاح قال في القمري المظلل
الظبي المروقل سارح بي وداكا
وقال الفراش بتخازز تروقل في جريك
ابوصلاح شبه البنية بالظبي السارح في ودايه يجري ويلعب, شوف ياصديق الصورة العجيبة ومحمود عبدالكريم { اولاد الموردة} لمن سجلوا ارحم ياسمير / القمري المظلل بحسه الفني العالي خلط القصدتين وطلع منهم قصيدة واحدة والبيت بتاع الظبي المروقل اول بيت بدأ بيهو,وأضافه الي ارحم ياسمير ولما سئل محمود لماذا فعل ذلك؟ قال حوض ابوصلاح من أي جهة ترده يطفئ عطشك..
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
.. لقاءات شواهد العصر .. لقاءات القمم الواصلة طيات السُحاب
مثل لقاء الطيب صالح مع العبادي في تلك الحلقات التلفزبونية ( بلاك آند وايت )
او قل، مثل لقاء المبارك ابراهيم مع ابوصلاح عند إذاعة امدرمان في ذلك العام 1962
http://www.youtube.com/watch?v=i7aEEsrZmU8&feature=relmfu
( تسجيل قديم جدير بالإستماع : ابوصلاح يؤكد بأن سهام العين هي الأقرب لوجدانه )
ابوصلاح : Towards a peculiar Sudanese Rhyme
مهندس المدرسة السودانية لربط القافية
.. قصة صراع طويل من اجل إنتزاع و ترسيخ قوافي سودانية خاصة و فريدة ( مُلتزما" لزوم ما لا يلزم ! )
أبو النصري : حيث أنه صار ليك مُعاهد .. الطرف الفي منامو ساهد .. نرجو تفضلكم بكتابة بروسودولوجي ( لو تجازى لو تسمحي)
كاملا" كما هو بصوت بشير الرباطابي . . و كما جاء في لقاء المبارك مع صالح
.. عيون فرّ منها ابوصلاح تائبا" ! و قائلا" بوكالة اولاد الموردة : يا زول مالي .. و مال سهام العين
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
طراوة
طلباتك اوامر ياصديق , والجناس ولزوم مالايلزم وربط القوافي كماقال ابوصلاح من لدن اب شريعة الي حاج الماحي الكبير, والقي السمع وأنت شهيد لي قصة الفريع في قلبي هام مالو وكما قال المبارك ذكر ابوصلاح اسمها بطريقة ظريفة يا فريع ياسمين متكي في رمالو ,ونرجع الي لوتجازي وابوصلاح بعد فتر من ضبح قلبو طلب من المحبوبة ان تكف عن ذبح قلبه وتأخذ نوم عينه قربانا
خــلى القـلب.البتضبحي...... وهاك نوم العين اضبحى
لو تجازى ولو تسمحي
لو تجازى لو تسمحي .............. منى ريدك ما تمحى
بى خيول الشوق ارمحي ............ واردي دمعي البطمحى
بس عشوقك لا تــقمــحى ............ بى طريف العين المحي
تمسى بهجة ونور تصبحي ........... وفى قلوب الناس تربحي
خــلى القـلب البتضبحي....... وهاك نوم العين اضبحى
مــن عيوني بتروحــى .............وفى قلبي بتســــوحــى
برضي فاهم سر الوحي .............الفى حـــواجبك يتلــوحى
من سهــامك تتراشحى............... وزاحمي كشحك اكشحي
خلقه عرقك مسك ارشحى..........والنســيم بالطيــب كشحي
كيف خصيمك بتمدحى.............. وكالحــمــائم بتصدحــى
كيف عزولك لا تردحى.............. وأنت جنة ونار تقدحي
بالمـــــبنة البترزحى .....فكـــرى مالك بتزحزحي
عن عزولك لا تفصحي...........وبى سهام الدغس الفحى
خلى دمعه يسيل طفحى ............وبالغرام غطى ولفحي
يازهيرة الروض فتحي ............والنسيم بالطيب كتحى
العزول المــا بســـتحى ..........بى سيوف العين نتحى
يا الحمامة البتصـيحى ........... وبى فروعك بتميحى
لا تحرقي الجوف ريحى ...........وشوفي دمعي البتسيحى
من غصونك ما بتبرحى ..........يوم تبـكى ويوم تفرحي
في المطيرق بترجحى ............وبالنســـائم تتمرجـــحى
لا تفرى ولا تسرحى ............هاك قليبي البتجـــــرحى
تابعي فن الحب تنجحي ...........كان صدقت وكان تبجحى
المـــــبكم بتنصحــى........وبى نغيــمتك بتفصحـــى
جيبى عقلى الطاش انصحى ...........كــان مغيب والان صحى
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
عالي صدرك ل (خصرك) برى ..... فيهو جوز رمان جلّ البرا ...
الخطيبة و (ردفك) منبرا .. الشعور البسطل عنبرا .. يا بدور القلعة و جوهرا
ياخ هذا الرجل أعشق من جميل وقيس وإبن الملوح ومفوه يمتلك أدوات التعبير
الساحره ويمتلك خيال إزميل الخيال النحات للصور المزهله ياخ دافنشى what
وموناليزا إيه دا مجنون وموحد أنظر لذلك الصدر الجامح وطامح فاير فوران
من ثمارو الفيه وفعل فى الخصر ذلك النحول وأنظر لبرى تلك برايه يا بعيد لا بل
أنظر لتأكيد الروعة لمافيه رومان يا طراوه!! وبعد ذلك وحد الخالق البارع
الخلاق على براءة ذلك الخلق الفريد ويقولون لك براءة إختراع!! ثم أنظر للخطيبه
ولذلك المنبر الذى تقف عليه يا (والعصر إن الإنسان لفى خسر) لا بل (لئلاف قريش)
وأنظر لتلك الشعور طالقة بخور العنبر السطال ياخ لغه وبلاغه وحسن تعليل
وكنايات كاويات فيا بدور القلعه ذلك الرجل رسمك بما لا يستطع الأولين والآخرين
أن يفعلو فيا طراوه والموج والنصرى إنتو مجانين وإهتمامكم مجنون وشعراء الحقيبه
عفاريت من الجن وتقولى (تربرابو تربرابو ومعناها بلغه الإنس نحن الجن أنجابو)ياخ
ديل أنجب من كدا يا واحد يا أحد.
ولكم السلام
منصور
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: صلاح النصري)
|
واصل يا ابو النصري،
فلازال نسيم ابو صلاح يتردد ( ما بين بحري و أمدرمان) عامل إستمحان .. و الإستمحان هو إشتقاق ( المحنة)
قليب قاسي Vs قليب حان .. و القلوب بأضدادها تُعرف كما يقول أهل علم الباطن ناس السهروردي و أخيه الجنيد
ثم ذلك الموت الباسل .. الموت الحلال : ما بين الرميش فوق ل ( الطريف) الكحيل
او ذلك الضرغام ( اسد بيشا المُكرمت) ال ما ليهو كاتل : غير مكحول ظبي النتيلة
http://www.youtube.com/watch?v=-mN2CwhIy2E
البت نانسي الآسرة / الإكسلانس : قالت روحي معاك إتلطفيلا و لم تقل ( إتلطفيبا) .. فنالت ثواب البقاء في
زمرة جماعة (صالح) .. صالح الذى كان غريبا" في ثمود
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
ابوجميد
جوهر صدر المحافل وأهلنا ناس الحقيبة القدام قالوا الاغنية دي بالذات ظهرت فيها تيمة كرومة في المطلع ياجوهر صدر المحافل وأي اغنية لحنها كرومة تجد التيمة دي في مطلعها وطبعا مافي موسيقي الزمن داك وكرومة ترك بصمته الصوتية في كل الحانه واسمع أي اغنية لكرومة تجد التيمة وعمنا مبارك المغربي في حلفة تكريم ذكري كرومة عام ١٩٧٦ بالمسرح القومي طلب بكل حياء وذوق وحس فني عالي ان يؤدي الفنانين هذه الاغنية بالذات بروايتها الاصلية وقال لو أراد ابوصلاح ان يجعل الفافية باء لفعل.
جوهر صدر المحافل
يا جوهر صدر المحافل ..........روحي معاك اتلطفيله
ما النور الفى حليه رافل.........في حق نهده قلوبنا قافل
كالظبي الفى مقيله غافل......تاره يميل والتانيه جافل
وجهه ينور والبدر آفل ......فوق للبدر يزيد نفيله
بالنور خدك لاح مقابل..........للشعر الطال ليله سابل
سهم ألحاظك لي نابل.........بى كل شئ دون هجري قابل
ينسب نوحي على البلابل.......وانتى القمره بتنسبيله
ليك جوز عينين نعسان وكاحل.......وخصرا يميل وصدر راحل
ولى وجدي اللي جسمي ناحل.......بحر الشوق ما ليه ساحل
بيني وبين النوم مراحـل.........وين للطيف أنا القى حيله
الفرع البتنى راتــل...........طيره ينوح في غصونه حاتل
بهوى نسيم لي فكرى شاتل.........والأسد الفى القيد يناتل
يتأكد ما ليهو قاتل ............غير مكحول ظبي النتيلا
ضاوى سناك لي بريقه راسل........لاح بين عنابتين عواسل
صدرا يرجح وكتفو خاتل...........رنا طرفك للسيف يماثل
ليه ما يجندل كل باسل ..........وساحبه دغس وخدود اسيله
المرنوع لي كتفو هادل.........في دروعه ولى معاصمه جادل
أنا ساهر والليل سادل ..........شرط الحاكم يبقى عادل
لا اقبل بهواك مبادل...........كيف اعشق وارضى البديلا
تمنع طيفك لي يغازل.........داخل قلبي أنا ليك منازل
يا لايم لا تبقى هازل..........أنا في الحب لروحي باذل
هل عاشق يسمح لعازل.........خلى نصيحتك عنى زيلا
يوقد جمري ودمعي باهل .............كيف نار تشعل في مناهل
ضاق بى الكون مع انه ماهل........نومي تصعب ووجدي ساهل
لو بى حالة سهري جاهل ..........دى الأنجم أسال سهيلا
لى طيفك ما لقيت وسائل................غير بسط النسمات رسائل
اغرب شئ وأعجب مسائل................حلم الصاحي ودمعه سائل
لو شكيت في امرى سائل................البدرين كونك مثيلا
زايد شوقي ودمعي هامل..........جمر الحب لي جسمي شامل
حتى الطيف لي لا يجامل............مع كلا ما كنت آمل
دمى تحنن بى الأنامل............وهل يرضيك كده ياجميله
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: صلاح النصري)
|
أحمد معليش كان الاول تجي من قليبها الجافي وقليبها حسب رواية الشيخ عمر البنا وشيخ عمر رواية مجيد لابوصلاح وسجل شيخ عمر
عشرة اسطوانات ووصلتنا منها اربعة من ضمنها من قليبها الجافي .
من قليبها الجافي ولى قليبي الحان....النسيم يتردد عامل استمحان
الغضون تتناول منه خمر الحان ....والطيور تتناشد رايق الألحان
والفروع تتمايل ميلة الفرحان......والزهور بتصفق ويرقص الريحان
يا نسيم ما بالك تتنى قامة البان ....انت رايق تلعب والعشوق تعبان
اكتشف ما دائي وما الدواء الصعبان...هل دا جرحا بالغ أم دا سم ثعبان
قال لي لازم جرحك مدة الأزمان.......لا روايحى تطبك لا ولا لقمان
البداوى جروحك إن شفتو يا سقمان....في عصير الند البنضحو الرمان
يا الغرامك حلّ ورحل السكان..........من مدائن جوفي تملك الأركان
ما ألذ النار السارجه بى لو كان....يبقى قلبي وقلبك في الغرام شركان
قلبي لا يسلاك ولا يطيق نكران.....بين شاهد جفني البى الدموع وكران
درعك البتقمز بالوضيب عكران............والضمير الميل صاحي أم سكران
صاحي سياف لحظك والطريف نعسان.....ليك رشرش قاطع جندل الفرسان
انت بدرا ساطع في قوام إنسان.........ليك حسن الدنيا ولى شعر حسان
الدوش افكارى وربّ لي جنان.........خمرة تمزج تينه وتسقى در أسنان
رق يسطل سمعي لهيجك الرنان.....انتو ناس في دنيا ولا حور في جنان
انت حسنك كامل والعشوق كملان........طش عقلو الهامل فارق الزملان
في المنام يتقدل طيفك العطلان..............والحجارة اتنت لو قليبك لان
واكتر بيت عجبني هذا البيت :- اكتشف ما دائي وما الدواء الصعبان...هل دا جرحا بالغ أم دا سم ثعبان ويبدو ان ابوصلاح فشل اطبائه في علاجه
وفي اشتياقي وهجرك حرم
الطبيب الكشف الألم
قالي مرضك عندي إتعلم
أماعمرك ضاع يا سلام
أنت عاشق ما فيش كلام
صار علاجك بين استلام
الفويطر الكشف الظلام
واللجينة المازجه الكلام
والنهيد الما شاف غـلام
وفي حن ياقمر
ليك لحاظ ماسكه في القيادا ...... ولى جروح ماشه في الزياده
أرجو من صاحب السياده ...... قليـــل مـــراهم من العــــياده
وياطروة انت من أهل الطب والطبابة فأكشف لنا الألم .وسلاما علي بقعة الامال من الموردة مسقط رأس ابوصلاح الي حي العرب سيد والعبيد ومكي ودعروسة موطن كرومة وودارو موطن الحاج
سرور وعرج وميل علي حوش البنا .
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
اخونا أحمد
وجه القمر سافر نسبت هذه القصيدة لابوصلاح وكتب كلام كثير حولها ولكن الثابت وبالتسجيل الرسمي في مكتبة الأذاعة أن هذه القصيدة لعمنا مسعد حنفي
وتلحين كرومة.
وجه القمر سافر يضوي شعاعو نور وافر
يا بدر ساءلك جاوب ليش أخوك نافر
من حيه السباع تنتر ومن رمشه السهم طافر
ريم يسحب لسيف لحظو وآخر بالسلاح غافر
يادمع أدفق ودع يا قلب سافر
شوقي لي ضافر
هل بي نظرتك أظفر يا من بالقلوب ظافر
كاحل طرفك الناعس والجيد بي الأثيث غامر
مجدولات إيديك ، صدرك رجح طبّق الضامر
زيدني في تهيك .. طايع ليك يا آمر
زهرة السامر ..
رفقاً بمجنونك يا ليلى بني عامر
إعلم لولا ما طرفك لي البيض الرقاق شاهر
إنسان عيني كاد يغرق في ماء خدك الزاهر
ونورك يتوقد ، لعيون الخلوق جاهر
ظلمي شي ظاهر
اشراق الفجر يشهد بي طرفي العليك ساهر
في دولة صباك تايه يا البي عشقي ماك فاكر
اصبح مسكنك قلبي الفي كل ثانية ليك ذاكر
لو رأيت محيك ، يا البي نظرتك ماكر
ليك أكون شاكر
وأم الأفق بيك تقنع ، لا تولد شمس باكر
ننظر بانه يتمايل ، قامة البنفدع خاتر
وننظر كيف صدير ، يقلع تفاحة وردف ناتر
وبين ناعساته يضوي الصارم الباتر
اللحاظ فاتر
لامعة سيوفه تتبارق من كسراته يا ساتر
عاشق محيك الضاوي وعاشق حسنك النادر
تقبل لحظك يمرضني وانت على شفاي قادر
في هواك قابل تنفيذ أمرك الصادر
ليّ ليه غادر
حلمك جود وانصف سارع بي لقاي بادر
وحياة طرفك الناعس وحياة حاجبك الداير
وحياة خدك المجلي ومنظوم ثغرك الناير
لي لقاك تسمح لو كان في المنام زاير
فكري فيك حاير
كل ساعة جيش حبك بهجوم في الصدير غاير
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: صلاح النصري)
|
يقول سيد في أمر ( الوهيبة ) : هل أتاك حديث الكوكب النضاح ؟ !
فيرد صالح في كتابه الواحد بعد المأئة ( كتاب الشراح ) : نعم، جئنا في شارع نجيب كباشي فوجدنا ذاك الذى قال عنه العبادي:
اللونو تِبر في صفاو ما غِبر .. يا الما بِتبر أنا جِني كِبر
http://www.youtube.com/watch?v=s0BdIE-Z4Ug
رفع صالح السلام و التحية : و إستشهد على نهج من خضبت دماءهم سفوح كررري
يا عيني يوم تشاهدي .. أغري السلام و إستشهدي
ولو عُمري شيئا" في يدي .. لوهبتو ليك يا سيدي ..
او كما قال سيد : ما أحلاك يا الجيدِك شدن .. يا العمري فيك ضايع سُدن
ناسك يا ود النصري : ميرغني المأمون .. واحمد حسن جمعة .. تذكر دائما ان ميرغني هو شقيق عبد العزيز المأمون
عبد العزيز المأمون الذى أسس لنهج النقرزان الجديد ماركة الشيخ التريبرادور ( مرجان سيد النقرزان) : عبد العزيز، و برهان ،
و علي الشايقي، و سرور، و أم الحسن الشايقية، تلك الماجِدة التي حياها الغمام
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: صلاح النصري)
|
Quote: اخونا بكري
ارجو شاكرا نقل هذا البوست للربع الجديد ولك الشكر ويا اخونا صديق انا ماعارف الطريقة البتم بيها نقل البوست كيف لكن قدمنا العرضحال والدمغة عليك
احمد طراوة
يحي قباني
صديق الموج
احمد القرشي
مرتضي حامد
صلاح النصري
وكل محبي الحقيبة الذين لم نتمكن من ذكر اسماءاهم. |
صلاح النصرى ......سلام
افتح صفحة البوست ده واطلع فوق اعمل للدومن (DOMAIN)كوبى
وامشى افتح بوست اعلان الارشفه واعمل بست لابو صلعه بس،،،
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
Quote: أرجو من صاحب السياده ...... قليـــل مـــراهم من العــــياده
وياطروة انت من أهل الطب والطبابة فأكشف لنا الألم .وسلاما علي بقعة الامال من الموردة مسقط رأس ابوصلاح الي حي العرب سيد والعبيد ومكي ودعروسة موطن كرومة |
النصرى وطراوة و اخرون .....الله يشفيكم
ثبت لى بما لايدع مجال للشك ان الذين يقولون ان ابوصلاح وقفت دراسته عند خلوة حسن حسين
مخطئون ..اذ ان الرجل امتدت دراسته الى احد كليات الطب ويعرف فى علومه كما يعرف فى الصيدلة
كما ورد فى المراهم المشار اليها بعاليه ولذا قال هذا الفحل:
من المنام ما معاى ولا ستة من ستين وعندى التلت من عقلى وعندك التلتين..
يحدثنا اهل الذكر فى الطب ان العقل ينقسم الى ثلاثة اجزاء رئيسة ( عا########ى رئيسة دى الحمد لله لقيت
ليها موضع) او رئيسية ، كما يقول الراسخون فى العلم من اهل البصريات ان اقل درجات الابصار
هى 6 من ستين واعلى درجاته هى ستة من ستة ، او ستة على سته كما يقول اهلنا بالعامية..
كان يمكن لابوصلاح لو لا تبحره فى الطب ان يقول تمانية من تمانين او تسعه من تسعين ويستقيم المعنى
والوزن ولكن لتأكده من المعلومة جاءت افادته كما اورد ..
انا بالجد بزعل ممن يصف هولاء بالاميين الا اذا ارادوا بها امية تشبه امية رسولنا الكريم صلى الله
عليه وسلم ، اى هى التى لم ينتظم فيها الناس فى المدارس النظامية .
صلاح وطراوة اوغلو فيها برفق والله الحقيبة تحتاج لمليون دارس ودارس وفيها من كيمياء الطرب
الكثير الخرافى،،،
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: يحي قباني)
|
اخونا احمد
شوف وانت كلك شوف العيون البتقلقل الجبال ووين اخونا صديق سيد
البوست , ياربي يكون قلقلتو عين , وفي ظني أن هذا البيت أجمل بيت قيل في وصف العيون في الشعر السوداني
لـو يـصادم شُـمّ الجبال بـاللِّـحاظ في الحـال قـلقلا
ولك يا احمد تبليغ الهلال لي اقوال ابوصلاح
بـلّـغ الاقـوال يـاهـلال شـبيـهك جـسمـي انـقلا
انت شـايف البها والجلال والـترف والـتـيه والـدلال
وبيّ لاحـظ الشوق والمِلال وطـبي صار ممزوج في خلال
العنـب والـدر والــزلال طِـبي يحـرم والمـوت حلال
ومـين يـمـيز دي ويـعـقـلا
طـرفي ساهر بين انسبال السـهـاد والـنوح والـوبال
وطـرفو سيف يتلامع قُبال الـوتـر و القـوس والنِّبـال
لـو يـصادم شُـمّ الجبال بـاللِّـحاظ في الحـال قـلقلا
يالنفورك زادني انتحال وانت ساكن في قلبي حال
اروي وصفك علي كل حال العيون واللما في اكتحال
مروي رسمك واسمك محال في قصايدي المتنقلا
الكتوف نازلات بي انهدال والقوام والجيد في اعتدال
الشعر كالليل في انسدال محيو ناير في الظلمة دال
في خدو تنظر صورتك بدال المراية المتصقلا
طرفي زايد في الانهمال اتفكر يمنا وشمال
مارأيت في الكون اجتمال من خلافك ياذو الجمال
غصنا اثمر بدر الكمال منو برق السحب انجلا
قول لي طيـفك عرِّج تعال شوف هواك اللـي جسمي عال
داوي نـاري الزايدة اشتعال ولـوتسـرَّك تـلك الفـعـال
كـل شـي يرضيك هو عال منِّـي هـاك الـروح سـجلا
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: صلاح النصري)
|
طِـبي يحـرم والمـوت حلال
ومـين يـمـيز دي ويـعـقـلا : يا ابو النصري، هو نفس الشخص القال عنو صالح
- الامرضني و ما طباني .. في خديدو يلوح نور رباني
- وفي رواية تانية : كيف الامة تهوي .. كيف تعشق بلاكا .. يا مراهم جروحو يا ملكا و ملاكا ( قاصدا" أمة السودان)
شوف صالح (مُتنقلا") و عابر للأجيال : مروي رسمك واسمك محال .. في قصايدي المتنقلا
صالح عبد السيد : The Timeless Abu' Salah : ابوصلاح .. بروسودولوجي صالحا" لكل زمان و مكان
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: يحي قباني)
|
اعزائي احمد ويحي
في دردشة مرة مع الأستاذ الكابلي , سألته عن قطعوله خط الأستوا واذكر أنه أجاب المقصود هنا ليس خط الأ ستواء الجغرافي , بل هو ثوب وسمته السيدات خط الاستوا. والأغنية من زمن التركية السابقة , والسيدات السودانيات يطلقن اسماء علي الثياب والعطور مثل الدلع وابوقجيجة ورسالة لند ن وبوليس النجدة وللعطور قديما بت القسيس , وارجح رواية الأستاذ الكابلي وهناك شواهد كثيرة من القصيدة تدل علي القصيدة مكتوبة لفتاة معينة وجاءات التورية بمخاطبتها احيانا بصيغة الجمع حسب العادات والتقاليد السائدة في ذلك الزمن بعدم ذكر المحبوبة صراحه لانو المسألة فيها رصارصة من البند قية المرتيل ولو مافي بندقية قطع رقبة بسكين ضراع ..
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: صلاح النصري)
|
سِيرة صالح : سِيرة حاملي مشاعل الغي .. عن تاريخ نشأة (الغي) في السودان !
منذ عهد إسمعيل الدقلاشي .. الدقلاشي صريع (تُهجة) جميلة العهد السناري
مرورا" بمحطة على ود محلق صريع فويطر العنجك الملح الرشيدي .. تاجوج الما إتلقت يا خميلة زيدي .. تاجوج فتنة قبيلة الحِمران
مرورا" بمحطة الحردلو ... الحردلو المن نشوهو للبنات هوايّ .. عاشق قصبة مدالق السيل .. و تلك الجميلة ( شتن ) : أقنع بيك و اتوب من البنات يا شتن
http://www.youtube.com/watch?v=vfOoN0SYeTk
وقِف تأمل : عند محطة الأحفاد الشرعيين لتاريخ الغي، النازلين على حكم العُلا ابدا"، من زينوا غنائية السودان خير تزيينِ
ناس العباسي الكبير عاشق بنت عشرين .. العباسي (مُلهم عتيق) .. و صالح عبد السيد ابوصلاح
.. رهط القائلين : الغي فِطرة .. الغي قِسمة و قلبي نشأبو .. غرز نشابو .. شايلا قليبي وين ماشابو
يحي قباني لك مودتي : نعود لغناء التركية و أثروا في دوباي ابوصلاح الاول ... سيِرة احمد ود بعشوم، و كمان ود المضوي القال : شن أسوّ .. حي انا الجنيت وقت هووّ ..
صلاح النصري : غرز نشابو .. أكتبا ايها الوراق الكبير .. مع حقيقة أنها لم ترد في ديوان ابوصلاح
| |
|
|
|
|
|
|
|
|
|
Re: د.القرشى، محمدالمرتضى، طراوة، اللندى، يحى القبانى، عثمان موسى، مطل (Re: أحمد طراوه)
|
قال :
الصدير أعطافك فترا
الصدير أعطافك فترا
النهيد باع فينا واشتري
يا بدور القلعة و...........
..
هسع عليك النبي يا طراوه أهو قاعد تتابع في منافسات الغناء الأمريكي و في الدعم وفي الاموال المدفقة والهيصة القايمة دي كلها . ياخ في معاني كلام بشدك
وببحر بيك في بحار عجيبة من المتعة زي كلام عمك أبوصلاح ده .؟
عليك الله يا طراوه حاول جيب لينا شهادة عمك البنا عنو . هههههههها . جيب لينا كلام صاحبو البنا عنو . وعن شطارتو وجنو عشان الناس تعرف .
هسع يا طراوه ناس ناس عمك ديل أتعلموا في الخلاوي ؟
ولا يمكن زمان كان ناس جامعة جورج ميسون عندهم جورج ميسون كلية للغة العربية فرع المسالمة ؟
الكلام ده يا طراوة ما كلام ساكت
الكلام ده كلام مدروس وخلاف اللغة العربية السالمة والجميلة برضو فيه علوم وفنون ومتعة .
..
يا شباب عيدكم مبارك
| |
|
|
|
|
|
|
| |
صديق الموج
يحي قباني
ALGARADABI
أحمد طراوه
Abdlaziz Eisa
Ahmed al Qurashi
سلمى الشيخ سلامة
جميلة ابراهيم السيد
الليندي
munswor almophtah
Mahmoud Mustafa Mahmoud
صلاح النصري
Asim Fageary
محمد عبد الماجد الصايم
باسط المكي
Osman Musa
محمد المرتضى حامد
فيس بوك
تويتر
انستقرام
يوتيوب
بنتيريست