شبَابّكْ تشَابّكْ - مجموعة شبابِيّة على الفيس بووك لدعم و مناصرة البشير في الإنتخابات القادِمة

Quote: ‎‎ ‎ ‎‎ ‎Sami Nugud كان البشير و نافع وقوش سقطوا البحوش قوات خليل و دبابات سلفا الحا يجوا دافرين منوووو؟ صدقونى رغم انى مابحب الحكومة، لكن رغم كده من الدغش حا اسوق ناس بيتنا وامشى اصوت لى عمر البشير، يا اخوانا انحنا الناس الغبش القاعدين فى السخانة والكتاحة هنا جووووة البلد دى... بنمرق الصباح ونجى المسا نايمين فى الحافلة وقابضين على كيس الملاح و حلاوتين لى مهند و علا، والحمد لله حامدين شاكرين اننا والله ما...رقين سرايرنا فى الحوش ونايمين فى امان الله بفضل عمر البشير وناس قوش المساهرين، يا اخوانا صدقونى الناس الشابكننا بى هناك اسقطوا المؤتمر الوطنى و يا رزاز الدم حبابك ديل، و افتح زنازينك ديل انا بعرف الكتير منهم ديل ناس قاعدين فى اوروبا وامريكا وضاربين السقط و الويلفر و زهور الاوركيدا و التيوليب و بجوا النت هنا يقزقزوا و يضيعوا زمنهم و كوبى بيست لاشعار محجوب شريف الحماسية، واقسم ليكم برب الكعبة انوا ياها حركاتهم من زمن الجامعة (وطلاب الجامعات فى اوائل التسعينات فاهمين كلامى دة كويس) ياهو بشبكونا فى اشعارهم دى وانحنا المساكين الممكونين تشيلنا الهاشمية ونمشى على الدواس وننقبض و يدقونا بالخرطوش الاسود للصباح والله مافى زول اسال فينا واجى المحامين و العمم والرتب يمرقوا الاولاد التابعين لسيدى محمد عثمان وسيدى الصادق وحتى الشيوعيين الجيفاريين مرة جاء عبد الباسط سبدرات و مرقهم الظاهر بذكريات سبدرات ما قبل الفتح، قال للضابط بتاع الامن عليك الله فكهم اهلهم اصحابى من زمااان والله كرهونى و بقوا بيتى (حائط مبكى)، وانحنا المساكين ندقا لحدى ما يزهجوا مننا افكونا، واسة دايرين اضيعونا تانى، كدى يا اخوانا اتخيلوا محمد عثمان الميرغنى فاز واستلم السلطة، فى ذمتكم دكتور خليل بيصبر يوم واحد ما حيجى دافر بى تاتشراتوا و داناتوا الطائشة الممكن تجى فى اولادنا، اها بس داير اسالكم سؤال واااااحد: باقى ليكم ولد محمد عثمان الميرغنى (أب جيقة) داك حيشيل كلاشوا زى ناس نافع وقوش وانزل الميدان و يدمر القوه العشوائية البربرية المتخلفة الجات دافرة ديك، ياخ واحد من نواب خليل ديل قال داير اعرس ندى القلعة ويقلع ليو بيت فى المنشية كعش للزوجية (كلمة يعرس دى طبعا كلمة لطيفة منى انا) هوى ياناس هوى البلد دى فيها تلتاشر جيش وفيها ناس جواها حقد بلا حدود واقسم بالله العظيم لو لقوا فينا فرقة و فرصة الا يعدمونا نفاخ النار، وللاسف الحقيقة المرة الزى الحنضل انوا مافى جهة بديلة غير ناس البشير ديل بيحلنا منهم ويخلينا ننوم مطمئنين فى بيوتنا ما انحنا بس حتى اهلنا فى دارفو ر (الله يقيل عثرتهم يااااربى يا سيدى) وفى كل مكان خلونا نعترف (انشاء الله بينا وبين نفسنا) انوا اذا ناس المؤتمر الوطنى ديل سقطوا والله العظيم الا تشوفوا المنظر المعهود فى دول افريقيا التعيسة حاصل فى مدنى وسنار وبورتسودان و الابيض والفاشر ونشوف اهلنا شايلين البقج فوق روسينهم و مهرولين نحو المجهول فى رحلة ضياع ستستمر الى الابد. بالمناسبة الجماعة الشابكننا يا رزاز الدم حبابك واسقطوا الكيزان ديل كلما الشغلانة تولع والواطة تجوط والناس يشيلوا البقج ويبقوا ا هاجين كلما كانت كويسة معاهم و الويلفر حيستمر لانو فى بعض الدول الاوروبية بدت تتململ من قعادهم عالة على دافع الضرائب مرطبين قدام النت وبصرفوا الالف وتممية دولار دى بااااردة خاصة بعد الازمة المالية العالمية. ايوة الكلام دة عارفوا بالنسبة لى ناس كدة صعب و محبط لكن انا متاكد انو فى ناس كتاااار متفقين معاى على جزء كبير منو باختصار البلد دى محتاجة فى الوكت دة لى حكومة قوية زى حكومة البشير اكتر ماهى محتاجة لى حكومة المنظراتية الجربناهم قبل كدة وبصرااااحة والله العظيم ناس نافع وقوش ديل احسن منهم مليون مرة . وكان بقت على انا شخصياً حا اكون اشجع منكم شوية واقولا بالواضح انا لو كشفت ليكم ضهرى بتشوفوا العجب لكن نسيتوا كلوا وماشى على بالطلاق من دغش الرحمن يوم الانتخابات وسايق معاى ناس بيتنا واى زول عزيز على كمان و بصوت لى عمر البشير وبجى راجع الحق امشى الشغل و اجى نايم نهاية اليوم فى الحافلة تعباااان منتهى لكن ولله الحمد والمنة شايل كيس ملاحى و قطعتين الحلاوة بتاعت مهند و علا وننوم فى سرايرنا فى الحوش بعيدا عن دانات خليل العشوائية و قذائف جيش سلفا الهمجى. وعليكم الله لو فى زول عندوا بديل للسيناريو دة بخش الراس ادينا ليو بس للاسف الشديد ماااافى، . رفعت الاقلام الصحف

واحِد من أعضاء المجموعة كتب الكلام الفوق دة
واللهِ و أنا بقراهو مرّة حسّيت إنو عايز
و مرّة