وضاحة المحيا.. معناها إنتي زاااتك بت خالتنا...قايلة روحك براااك المكوكية الفضائية؟.. جالسنا حسين شندي وعاشرنا وقاسمنا اللقمة وعاش معانا حلوها ومرها في دارنا العامرة ..أها أوووعا تتشوبري بعدين في التلفون تسأليهو لأنو ما بيعرف ليك عمر الفاروق دي..إلا أديك الشفرة .. بس للضمان وعشان تصدقيني أسأليهو عن الكريسيدا البنية حقتو الكانت موديل 83 ولا هي كم وتمنين دييك..
تخريمة : شايف القصة طلعت ما قصة لدغة ..طلعت قصة قرابة ..وشابكاني انتو يا السودانيين وانتو يا السودانيين والخطوط والقميص و و ..وطلعوا أولاد أهلك بيلبسو البدلة بي شماعاتا
08-15-2012, 11:32 AM
وضاحة وضاحة
تاريخ التسجيل: 01-16-2005
مجموع المشاركات: 9116
Quote: شايف القصة طلعت ما قصة لدغة ..طلعت قصة قرابة ..وشابكاني انتو يا السودانيين وانتو يا السودانيين والخطوط والقميص و و ..وطلعوا أولاد أهلك بيلبسو البدلة بي شماعاتا
غايتو يا الفاروق جنس شناف وشيل حال يا عمك أرفع قلمك عن مبدعي ومبدعات بلادي :)
نحن طبعاً الواحد أول ما يطلع من البلد أول حاجة يقول ليك والله السودانيين ديل فعلوا وتركوا ويقرّب يتفاخر ليك بأصله السامي ويعتبر نفسه من النخب وخلاصة خلق الله أجمعين وفي نفس الوقت تلقي الواحد دينو ما عندو .
المشكلة إنو بكون معجب لدرجة الهيستيريا بمايكل جاكسون مع بشتنة دلاقينو القاطعها من رأسو دي بغض النظر عن فنو وإبداعو وممكن يقلد نجوم الراب والهباب الداقين السيستم ويعتبر الموضوع نقلة كبيرة في مفهومو الحضاري . هسه لو دي ريحانة جات لابسة أخضر مع بمبي كان الموضوع مشي عاااادي زي السلام عليكم غايتو عالم دين حجر جداً والواحد ما تقدر ترد ليه إلا بالجملة البتتكرر في الأفلام الأمريكية ديك لكن عشان في شوية ناس صايمين الواحد يحترم حقوق ومشاعر الأقليات .
قال السر قدور عليه السلام ( من كان منكم بلا إبداع فليرمها بحجر )
فينيش
08-15-2012, 12:47 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
غايتو نورة دي الشافا رجعت بي جردل خبيزا مااا كضب .. يا عمك وضاحة دي انا صرفت ليها بلحة وجوغمة موية لمجرد القطيعة فدحين إنت الواحد إلا يصرف ليك واحة نخيل عديييل كده
Quote: والواحد ما تقدر ترد ليه إلا بالجملة البتتكرر في الأفلام الأمريكية ديك
دي ياتا دي؟ بتاعت دعنا نتناول بعض الشطائر؟ ولا بتاعت سأخرج في موعد مع الظهير الربعي ؟ غايتو ده حد ثقافتي وفهمي فيما يتعلق بي الأفلام الأجنبية ..نضمكم إنتو ماااا بعرفو ليكم ..
أها نجي لي الجد ... تعرف يا قريبك طيييلة تواجدي في هذه الغربة الظالم أهلها جني وجن جملة " إنتو يا السودانيين" ودوماً دوووماً بقول جملة " نحن السودانيين" وبدخل ليك روحي معاهم زييي الما حصل شي... لما تكون في ملمات فيها باقي الجاليات العربية أو الأجنبية وانت عارف عندنا وهمات ونفشات كده بيقوموا اصحابي السودانيين بيختاروا ليك احسسسن القصص عشان يطلعونا نحن شعب الله المختار.. أها انا حكاويني ليهم بتكون بدووون تجمييل بحكي اجمل وأكعب حاجاتنا وبوريهم عيوبنا ..ولو جات نكتة عن سوداني بحكيييها بدون ما اقوم ارميها في واحد مصري او سعودي..بدافع في الفعلا بنحتاج ندافع فيهو عننا وهو حاصل وبأييد البيتقال عننا وكعب لو هو فعلا حاصل فينا.. اكتر إختلافاتي مع اصحابنا السودانيين هنا الونسة الممجوووجة والباااايخة واللي بعتبرها مرات بتقرفني الجملة والونسة بتاعت بالله ما شوفت الشوامبيلبسوا كيييف؟؟؟؟ لكن نحن والله معانا سوداني بيجي بي الشبشب !!! أها لما اقوم أسأل صاحبي ده واقول ليهوا نت بتلبس كويس؟؟؟ بيقول لي أيوة.. طيب أصحابك الحولك وقروا معاك الجامعة وشغالين هنا بيلبسو كويس؟؟؟بيقول لي أيوة.. بسأل التاني نفس السؤال...بيجاوب لي بي أيوة.. والتالت ..أيوة.. الرابع أيوة .. الخامس أيوة.. اها كوووولهم بيطلعوا انهم بيلبسو كويس واصحابهم اللي هم مختارينهم بيلبسو كويس!!! أها بقوم أسألهم ليك طيييب انتو قاصدين منو المبشتنيييين؟؟؟ إذا كان لو عملنا إحصائية بي اصحابكم حا الاقي إنو ديل نص المغتربين...مش؟ يبقا معناها يا كلنا بنلبس كويس يا انا وانتو واصحابكم مبشتنين مش؟؟؟ ياخ الشوام ديل والله فيهم ناس مبشتنين بشتنة لمممن يحيروووك..و######انييييين .. القصة التانية بتاعت الذوق العام المتعلق بي فنانين برة والتأثر بيهم انا غايتو عن نفسي نجييييض في الفرز وما خاشي في الصدمة الحضارية بتاعت فرز اليكمان لمجرد إنهم مشاهير او من جنسيات تانية .. عارف يا عمك انا لو بعيب علينا في قصة الازياء دي وخصوووصا فيما يتعلق بي الازياء الرجالية فانا بعيب علينا الجرأة في إختيار الألوان !!!! نحن في السودان عندنا إستاندردز كده في اللبس والألوان الله قااال بي قولك لو مرقت منها أو حاولت تتمرد عليها.. وعندنا تطقيمات كده لو إتجاوزتها قد توصف بي الأشتر ... لكن ده ما بيمنع إنو في شترات ظااااهرة وما محتاجة شيل حال... عارف بي مناسبة رقي وأناقة ناس زمان انا حا أحكي ليك حاجة شبه مستحيلة وح تقول عمر ده وسسعا شوية .. كان عندنا خالنا الكبير يعتبر من البانكرز القديميين ووقتها في الستينات نظام في ريعان شبابه والود موظف بنك..صدق أو لا تصدق يا حبيبا لي نورا خالنا ده غشترى أكتر من كم تسعين بنطلون وكم وتسعين قميص وبقا بيبلسهم ديسبوسابل اللبسة تتلبس مرة واااحدة وتترمي في الشنطة .. المدهش إنو لاشنطة دي كانت ملمومة في بيتنا مننن السبعينات ..أها والله مرة أمي الله يديها العافية وصفتا لي قالت لي امشي شوف هدوم خالك دي كانت كيف..والله يا حبيب نورا خشيت لي في بنطولن منها ومشيت بيهو الجامعة والله ووالله الجامعة كلللها بتنضم عن البنطلون ده وما عارفين إنو ده مننننننن الستينات ياخ مرات الحناكيش ديل طيبييين خلاااس ..بيصدقو أييي حاجة
08-15-2012, 01:01 PM
حبيب نورة حبيب نورة
تاريخ التسجيل: 03-02-2004
مجموع المشاركات: 18581
Quote: عارف بي مناسبة رقي وأناقة ناس زمان انا حا أحكي ليك حاجة شبه مستحيلة وح تقول عمر ده وسسعا شوية .. كان عندنا خالنا الكبير يعتبر من البانكرز القديميين ووقتها في الستينات نظام في ريعان شبابه والود موظف بنك..صدق أو لا تصدق يا حبيبا لي نورا خالنا ده غشترى أكتر من كم تسعين بنطلون وكم وتسعين قميص وبقا بيبلسهم ديسبوسابل اللبسة تتلبس مرة واااحدة وتترمي في الشنطة .. المدهش إنو لاشنطة دي كانت ملمومة في بيتنا مننن السبعينات ..أها والله مرة أمي الله يديها العافية وصفتا لي قالت لي امشي شوف هدوم خالك دي كانت كيف..والله يا حبيب نورا خشيت لي في بنطولن منها ومشيت بيهو الجامعة والله ووالله الجامعة كلللها بتنضم عن البنطلون ده وما عارفين إنو ده مننننننن الستينات ياخ مرات الحناكيش ديل طيبييين خلاااس ..بيصدقو أييي حاجة
جبت النجيضة ويادوبك أتصلحت معانا :)
أشكر سعة صدرك يا جميل
لكن وحاتك للحول ما بخليك هههههههههه
08-15-2012, 01:10 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا عمر ...شفت محطة عابدين شرق وتلف اول شارع يمين زقاق طوييييل وتلقى خور ابوعنجه وتلقى بيت فاتح على الخور دا تلقى ناس رباطاب هناك ديل نحن ...وحبوبة عشة الفلاتية دي برضو الله يرحمها بكل ارثها العتيق من عندينا وسموره دي كانت لعهد قريب بتغني في الاعراس 0رقصة العروس .....بس وحاتك مبدعة من غير اي تنظير نحن بس كلامنا في حكاية الاحمر والزبرا والكحلي والذي منو ... ورمضان الكمل وما شبعنا منها شوف مديانا ضهرا وصفحتها احيانا
كل سنة وانتو طيبين ونلتقى
محبتي
08-18-2012, 06:30 PM
وضاحة وضاحة
تاريخ التسجيل: 01-16-2005
مجموع المشاركات: 9116
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
وضاحة
عمر الفاروق
حبيب نورة
نعمات حمود
فيس بوك
تويتر
انستقرام
يوتيوب
بنتيريست