استاذ - ابراهيم عبدالحليم مبالغة والله بالجد كده فزت 13 صفر لكن حاتعادل معاك بس خلي بكري يظبط لينا ادراج الغناء ده نزلنا هنا واحدة اشتغلت وبعد 10 دقائق جات معاها حروف عجيبة ووقفت الأغنية لكن لابد من الخرطوم وأن طال السفر.
،،،،
08-02-2012, 11:28 PM
الليندي الليندي
تاريخ التسجيل: 05-27-2002
مجموع المشاركات: 1188
تحيات يا شباب الليلة ما ح اكون حاضر لحلقة الجُلل عشان كدا قلنا رفع ليكم البوست فوق حبه .. الظاهر محمد خليل دا متابع حلقات البلي بس يا الليندي عشان يشووووف بس بيني شوفو تعباااا ن هاهاهاها و يامحمد خليل تقسيم المجموعات خلاص ثبت جُلل - بلي - و الاخيرة حسب شوفك هي شووووف لوووب لكن انا شايف تلاتك بس مركز فيها مع البلي و بس يعني حسين شندي و تمتام بهناك تعبانين سااااي ولا كيف شغلتك دي!!!؟ اعدلوا هو اقرب للتقوى ياخ!! بس عايز نصيحتي صباح دي ابعد منها احتمال تقع فيك شلوفه تعوقك ياخ و أنت لسه شاب و صغير قدر محمد ود ام بلينا و قدامك مستقبل.
يا الليندي شموس دي كائن عجيب سلطنة و مزاج و تطريب و بتحفظ الكلاوي الصعبه ديك و تسلمك ليها اجمل ما يكون بدون تقليد و بصوته و هواها هي و الله تديك الاغنية لا طق لا شق ماشاء الله عليها عيني بارده .
والله بركة في نومتك النمتها لانو المخاليق ديل انا اكاد اجزم انهم ما سمعوها عند العاقب نهائي و قطع شك سمعوها في حته بصوت ذي طريقتهم دي .
غايتو منتصر دا انا كيفني في الاغنية دي ليه ما عارف بس بسطني . بخصوص سيد خليفة شوف يا الليندي أنا اي فنان بمعني مغني و أنه انتهج بصوته الطريق لتوصيل الكلمات للناس يبقي عندي خلاص مفروض يوصل الكلمات عبر صوته فقط و بطل يأشر بيديه و يبطل يوصف الغناء وصيف و دا الكان بعمل فيهو سيد خليفة وانا بشكل خاص ما نافعه معاي الطريقة دي . طريقة سيد خليفة دي طريقة غناء مسرحي و هو ناجح فيها .
منار يا الليندي صوته كويس و حفظه كويس بس عمك قدور بيدي ناس افراح زمن غيرهم ناس افراح وصباح .. ياخ عمك قدور دا قبل يومين (ظهره عاااامله) غنت شموس و ريماز قام شكر افراح في صمة خشمه ... الراجل دا ماااا بخجل كلو كلو .
اسمع يا الليندي لو قعدته تباري في غلطان قدور حيجيك هارت اتاك اعمل حسابك ... الزول دا كل هدفه انو يسمع الغناء العاجبو هو و العايزو هو لا شغال بتوثيق ولا يحزنون ذاتو .
المحيرني جد انو ناس القناة ديل و الشفيع عبد العزيز تحديداً ليه راضين بي كدا!!! وهسي لو جوا ابناء الشعر الشقلب قدور شعرهم و نسبو لناس تانين و دي بقت مادة مسجلة و موثقة و قاموا الابناء ديل قاضو القناة و قاضو قدور هل بيلقوا حق!!؟ المهم الموضوع دا بقي خصم علي التوثيق .
عباسية يا حبيب شكراً للمتعة
08-03-2012, 04:10 PM
mohmed khalail mohmed khalail
تاريخ التسجيل: 06-14-2007
مجموع المشاركات: 4509
اها يا صاحبي أنا برضو الليلة اوف ما حضرت البرنامج افطار برة البيت وكده ومنها للشغل يعني يا لحقنا الأعادة يا انتظرنا عباسية ، غايتو أنا عاجبني ( عزالدين احمد المصطفى ) مهنطب ليك عمك ( قدور ) هنطبه شديدة اها حصل سمعتوا أغنية للعميد ( احمدالمصطفى ) هع عفيت منك يا عزالدين رغم أني بشمك شديد.
،،،
08-03-2012, 11:22 PM
عبير خيرى عبير خيرى
تاريخ التسجيل: 02-12-2004
مجموع المشاركات: 2440
الحلقة كانت عن عمنا عمر البنا غنى عاصم البناالأهيف ما بي نفس الإجادة الغناها بها قبل كده وغنى فضل ايوب انا صادق في حبك فوق الوسط حبتين يا حبيبي جفيت غنتها سميرة دنيا فأطربتني الحب الطاهر غناها حسين شندي وده سيدها طبعا طلع عينها أشوف في حسـنه غناها ياسر تمتام مافي كلام حن يا قمر غناها جمال فرفور لكن علاقتها شنو بي عمر البنا ما عرفت كلمات ابو صلاح وألحان علي الشايقي
08-03-2012, 11:27 PM
عبير خيرى عبير خيرى
تاريخ التسجيل: 02-12-2004
مجموع المشاركات: 2440
و ما زال عمنا السر قدور يواصل تخاريفه ففى حديثه عن عمر البنا افاد ان عمر البنا بقسم الاغنيه الى ثلاثة اجزاء بيت ونص من الكوبلى ثم بيت ونص ثم بيت ونص ثم يقفل بالنص ودلل بقصيدتين لعم عمر البنا الاولى فى الليل الهاجع ثم اه يا الاهيف ولكن غفل السر تماماً ان عم عمر البنا شاعر وملحن وفنان ومعظم شعر عم عمر مكسوراً وهو يعالج هذا الكسر فى اوزان الشعر بهذه الوقفات او المدات والامثلة لشعر عم عمر المكسور كثيرة ، زهرة الروض الظليل فيها كسر نسيم سحرك فيها كسر، جننى نغمات القمرى فيها كسر، فى الليل الهاجع فيها كسر فى الحسن محبوبى فيها كسر، ولكن هذا لاينفى ان عم عمر كتب شعراً جميلاً و اضاف صور جميلة للشعر ، لكن تخاريف عمكم السر اصبحت تفسد بعض الحلقات ، خصوصاً انها حلقات توثيقية ،،،
08-04-2012, 01:20 AM
عبير خيرى عبير خيرى
تاريخ التسجيل: 02-12-2004
مجموع المشاركات: 2440
الموج ازيك يعني في اغاني الحقيبة دي بالذات لو كل حلقة تحصل فيها خرمجة تجي توضح المعلومة الصاح الناس بتستفيد البوست ده متابع من ناس كتيرين وما اعضاء في المنبر فالتصحيح لازم
08-04-2012, 00:48 AM
الليندي الليندي
تاريخ التسجيل: 05-27-2002
مجموع المشاركات: 1188
Quote: الحلقة كانت عن عمنا عمر البنا غنى عاصم البناالأهيف ما بي نفس الإجادة الغناها بها قبل كده وغنى فضل ايوب انا صادق في حبك فوق الوسط حبتين يا حبيبي جفيت غنتها سميرة دنيا فأطربتني الحب الطاهر غناها حسين شندي وده سيدها طبعا طلع عينها أشوف في حسـنه غناها ياسر تمتام مافي كلام حن يا قمر غناها جمال فرفور لكن علاقتها شنو بي عمر البنا ما عرفت كلمات ابو صلاح وألحان علي الشايقي
شكراً كثيراً عبير حضرتينا الحلقة الليلة
غايتو البدية والنهاية باد شديد ( أنا صادق في حبك ) دي كتبا ( عمر البنا ) لوالد الشاعر الراحل ( خليفة الصادق ) أداء فضل بالنسبة لأداء عاصم وفروفور بروف عديل الجلة الاسمها سميرة دنيا مافيها كلام تطريب عالي بالبرتقالي معلمة مافي شك عذبت ليك ( يا حبيبي جفيت ) بصورة مذهلة حسين شندي قعد ليك ( الحب الطاهر ) اداء جمييييييييييل تمتام زول غناي تب فرفور شرب دم الناس كلهانط ووقف في الأغنية يعني لازم كل حلقة يعمل ليهو حاجة مشاترة صراخ شديد السر قدور بقى يجلي كتير وزي ما قال صاحبي سفيان لو تابعتو جلطاتو دي بتجيني جلطة
كسرة
عبير بالله ما توريني كيف الفيديو بتاع اليوتوب بنزل هنا بالطريقة دي اناقدر ما حاولت انزل فيديو بالطريقة دي يطلع رابط بس .
،،،،
08-04-2012, 01:16 AM
عبير خيرى عبير خيرى
تاريخ التسجيل: 02-12-2004
مجموع المشاركات: 2440
حلقة اليوم مع الفنان ( زكي عبدالكريم ) غايتو السر قدور قفلوا قفة شديد ما سمعنا بتكلم الا مرتين دايماً البداية غير موفقة بشريف ورغم سهولة الأغنية ( انت يا بسام ) وهي من كلمات ( الصادق الياس وألحان زكي ) إلا أن شريف بشتنها غايتو شريف يمشى يراجع الأغنية ويشوف ( عافية حسن ) بتغنيها كيف . الأغنية الثانية ( اميرة الشباب ) وهي من كلمات ( محمد صالح بركية ) صاحب الأغنية الجميلة التى رددها الراحل مصطفى سيد احمد( مهما أمري يهون عليك ) وكان بركية قد كتب ( مهما أمري يهون عليك ) ولحنها ( موسى محمد ابراهيم ) وغناها الراحل ( بهاءالدين أبوشلة )، عموماً ( حسين الصادق ) غنى ( اميرة الشباب ) بشكل جيد فقط نهّرالأغنية في ( يعجبني فيك لو قلت أنا مادايرة مال )
،،،،
08-04-2012, 07:09 PM
الليندي الليندي
تاريخ التسجيل: 05-27-2002
مجموع المشاركات: 1188
الأغنية الثالثة ( أسال نفسك ) وهي من كلمات ( محمد علي أبوقطاطي ) وألحان ( احمد زاهر ) يعني يا شباب لو سمحتوا افرغ غضبي بالحكي طبعاً ما بين ( محمد علي أبوقطاطي ) و( احمد زاهر ) والراحلين ( احمد الجابري وخليل اسماعيل ) قصة ففي بداية الستينات كان ابوقطاطي يسكن بامدرمان عذابي وكان من الفنانين الذين يترددون عليه ( خليل والجابري ) وصدفة في الأذاعة التقى ( خليل اسماعيل بأبوقطاطي ) فقال له أبوقطاطي في قصيدة انا كاتبا في ورقة في الديوان امشي شيلا ولحنا ) فذهب خليل ولم يجد الورقة فعاد إلي ( ابوقطاطي ) واخبره [انه لم يجد ورقة فأخذ ( ابوقطاطي ) ورقة وقلم ) وكتب القصيدة لخليل فذهب خليل وبدأ بوضع اللحن وكعادة الفنانين أنهم دوماً ما كانوا يستمعون للأذاعة فبعد اسبوع من اخذ القصيدة استمع خليل للمذيع وهو يذيع ( من كلمات محمد علي ابوقطاطي وألحان احمد زاهر نستمع الي أغنية ( درب المحبة) غناء أحمد الجابري ) وصدح أحمد الجابري
انت ياقلبي المتيم كنت خالي كنت نايم وما رأيت سهد الليالي
فغضب خليل وذهب لابوقطاطي وعاتبه [انه تعب في لحن الأغنية فكيف تديها للجابري فحلف ( ابوقطاطي ) بأنه لم يعطى ألغنية لأحد غير ( خليل ) وحتى يهدي من غضب خليل طلب منها أن يتغني له بالحن الذى لحنه لدرب المحبة فادى خليل ( أنت يا قلبي المتيم ) بلحن ( الأماني العذبة ) ومن لحن ( خليل ) كتب ( ابوقطاطي ) واحدة من أجمل الأغنيات ( الاماني العذبة تتراقص حيالي ) ،،،،
08-04-2012, 07:17 PM
الليندي الليندي
تاريخ التسجيل: 05-27-2002
مجموع المشاركات: 1188
( أسال نفسك ) ذبوحها من الوريد الي الوريد صباح اعوذ بالله بتمط الكلام بصورة غريبة وصوت فارق شديد ولبسة لبنية عبيطة شديد في النص مسكت ( بت قضيم ) الأغنية صوتا بروح ويجي والغريبة في ناس بقولوا ليك صوتا فيهو بحة عجيبة مع أنو البحة عيب في الصوت غايتو بهدلت الأغنية فهيمة انا اقتنعت أنو ما عندك فهم في الغناء منار مسكت الأغنية في النهاية واجتهدت لكن كان خلاص قيم اوفر . في لمحة غزل من كلمات الشاعر ( سيد أحمد ) باقي الاسم ما متذكروا أدتا( ريماز ) بصورة غير مقبولة من ريماز الأغنية في زولا أسمها ( رفيعة إبراهيم ) بصورة أحسن من كده .
،،،
08-04-2012, 07:31 PM
إبراهيم عبد الحليم إبراهيم عبد الحليم
تاريخ التسجيل: 10-31-2008
مجموع المشاركات: 3563
بالامس شاهدت حلقة برامج اغاني و اغاني نسبة لاننا كنا مدعوون علي الافطار
المهم ما لفت نظري في تلك الحلقة هو الاداء الركييك جدا للمدعوة صباح لاحد اجمل اغاني الفنان الجميل زكي عبدالكريم ... ولكن اداء فهيمة للكوبيله الثاني للاغنية ارجع الي نفسي المذنبة قليل من الرضاء ... خاصة الالتفاتة الايحائية من قائد الفرقة الجميل محمدية لصديق دربه الموسيقي(اسمه ايتر علي ما اعتقد) موحيا بارضاء علي اداء الاخيرة برغم ما سببه زعيق الاولي من مشاترةللأغنية
--------------- manubia
08-05-2012, 07:56 AM
مازن فيصل هلال مازن فيصل هلال
تاريخ التسجيل: 10-15-2009
مجموع المشاركات: 1003
كما اود ان اضيف بان وجود المدعو حسين الصادق خصم كبيييييير علي هذا البرنامج .... كان بالامكان و بكل حرفيه اجلاس الفنان نميري حسين في مكان المدعو حسين الصادق ... رأفتا بمحبي البرنامج.....(و الحمد لله الذي هدانا!)
08-05-2012, 08:15 AM
Emad Ahmed Emad Ahmed
تاريخ التسجيل: 08-12-2009
مجموع المشاركات: 12705
Quote: في لمحة غزل من كلمات الشاعر ( سيد أحمد ) باقي الاسم ما متذكروا أدتا( ريماز ) بصورة غير مقبولة من ريماز الأغنية في زولا أسمها ( رفيعة إبراهيم ) بصورة أحسن من كده .
الراحل بروفسير عبد العزيز سيد أحمد
الشاعر الراحل البروفسير عبد العزيز سيد احمد كان من قيادات الحزب الشيوعي السوداني
وهو شاعر وكاتب له عدة دواوين منها ( إتكاه على التأويل ) وله تحت الطبع كتاب عن
( التجاني يوسف بشير ) وله أيضا ( 21 ) مسرحية طبعت منها أربع ومثلت واحدة منها في
إفتتاح النادي النوبي وهي عن الملك النوبي الحكيم زكريا بن كرياكوس ومسرحية عن عثمان
دقنه مؤسس حركة المقاومة في افريقيا والاميرة ستنا امنتري كنداكة مروي ابان القرن الأول
الميلادي , وكتب العديد من الأغنيات منها (الى متى ياقلب) للفنان الكابلي, (سائق البوباي)
للفنان محمد حسنين, (حبابن جن) للفنان محمد ميرغني, (لازم الزعل) للفنان زكي عبد الكريم.
له الرحمة والمغفرة .
ـــــــــــــــــــــــــــــــــــــــــــــــــــــــــــــــــــــــــــــــــــــــــــ الفنانة الشابة والمظلومة رفيعة إبراهيم تغنت ايضا بأغنية أسال نفسك لزكي عبد الكريم وأبدعت فيها وبشهادة زكي عبد الكريم ذاته افضل من تغنى بأغنياته هي رفيعة إبراهيم.
Quote: كتب الليندي : ( أسال نفسك ) ذبوحها من الوريد الي الوريد صباح اعوذ بالله بتمط الكلام بصورة غريبة وصوت فارق شديد ولبسة لبنية عبيطة شديد
Quote: كتب مازن فيصل هلال : المهم ما لفت نظري في تلك الحلقة هو الاداء الركييك جدا للمدعوة صباح لاحد اجمل اغاني الفنان الجميل زكي عبدالكريم ... ولكن اداء فهيمة للكوبيله الثاني للاغنية ارجع الي نفسي المذنبة قليل من الرضاء ... خاصة الالتفاتة الايحائية من قائد الفرقة الجميل محمدية لصديق دربه الموسيقي(اسمه ايتر علي ما اعتقد) موحيا بارضاء علي اداء الاخيرة برغم ما سببه زعيق الاولي من مشاترة للأغنية
Quote: خاصة الالتفاتة الايحائية من قائد الفرقة الجميل محمدية لصديق دربه الموسيقي(اسمه ايتر علي ما اعتقد) موحيا بارضاء علي اداء الاخيرة برغم ما سببه زعيق الاولي من مشاترةللأغنية
ملاحظة زول فنان يا مازن
كثير ما يكرر محمديه هذه الالتفاتة حين يعجبه الاداء
وبعض الاحيان ببسمة فيها كثير من الطفوله
الله عليك يا محمديه فنان بحق وحقيه
مشكور اخي عما علي هذا المعلومه يا ملك التوثيق
وين سفيان الليله
08-05-2012, 08:47 PM
عبير خيرى عبير خيرى
تاريخ التسجيل: 02-12-2004
مجموع المشاركات: 2440
شنو يا اخونا نغيب لينا (ويك ان)د نجي نلقى البوست حاتل لكن جنس موبالغة
الليندي يا سلام على السرد ياخ
Quote: فغضب خليل وذهب لابوقطاطي وعاتبه [انه تعب في لحن الأغنية فكيف تديها للجابري فحلف ( ابوقطاطي ) بأنه لم يعطى ألغنية لأحد غير ( خليل ) وحتى يهدي من غضب خليل طلب منها أن يتغني له بالحن الذى لحنه لدرب المحبة فادى خليل ( أنت يا قلبي المتيم ) بلحن ( الأماني العذبة ) ومن لحن ( خليل ) كتب ( ابوقطاطي ) واحدة من أجمل الأغنيات ( الاماني العذبة تتراقص حيالي )
أخبرني الصديق العزيز الموصلي بانه بعد نجاح اغنية الاماني العزبه اتي شاعر لا اذكر اسمه للمرحوم خليل اسماعيل باغنية الاماني السندسية فرد عليه الفنان خليل اسماعيل بروحه المرحه بما يعني (كفانا اماني خلونا نعيش في الواقع شوية) واعطى الاغنية لزميله الموصلي فكانت من اجمل اغاني الصديق الموصلي..
08-06-2012, 04:43 PM
mohmed khalail mohmed khalail
تاريخ التسجيل: 06-14-2007
مجموع المشاركات: 4509
يا سلام عليك يا ابراهيم عبد الحليم ياخ..كانت هنالك ثنائية جميلة بين استاذنا الصادق الياس والراحل المقيم الجابري..وقد رايت هذا العود معلقا بمنزل الاستاذ الصادق حيث يحب ان يجلس ويروي ذكريات هذه الثنائية الفريده ونسائم بحر الجريف وجنائنه تحتضن ذلك المنزل الجميل فالتحية لاهله ولك يا فنان.
08-06-2012, 06:01 PM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
الحلقة اليوم مع ود الرميلة عثمان مصطفي ابتداء الحلقة هو نفسه ب(و الله مشتاقين) مافي اي شخشخه نهائي حصة كااااملة .
قدور اقنع عثمان يغني اغنية الفه هو زمااان غني منها عثمان المطلع بس و الله ما فهته منها شئ.
راح الميعاد (مزيكا و كلمات عجيبة) عثمان يا معللللللللللم (دي فيها جيركي زي الجيركي) شفتو بتاع الساكس مبسووووط و البيز ماسك زمن زي الزمن و الايقاع في السلك . شموس دي لا تموت لا تفوت مذاكره وحااافظة عوض احمودي و النقزات الحلوة طه الضرس ضارب خط سمح شديد و واضح عثمان مصطفي قرقر ينهي الاغنية فجاة كدا !
ـــــــــــــــــــــــــــــــــــــــــــــــــــــــــــــ يا ابراهيم عبد الحليم و محمد خليل بناسبة الجابري وخليل اسماعيل أنا سمعته انهم الاتنين اشتركو في تلحين اغنية (هات يا زمن) خليل لحن البداية و الجابري لحن من (الليل الليل الليل يهود بيّ) و عايز اعرف هل المعلومة دي سليمة!
08-06-2012, 06:33 PM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
اثرني يا مياس شريف و افراح الاتين فارقين من قولت تييييت شريف تعباااان افراح ميييييته عدييييل صوته دا اسمو فحيح عديييل كدا ود الرميلة خاف على الاغنية قام لحقهم هاهاهاها افراح دي و الله ترحم روحه و البحير فرحانه على ايه ما تعرف!! وشريف يضحك و مبتسم اكبر ابتسامه علي شنو برضو ما تعرف!! ود الرميلة وراهم بغنوها كييييف وهم ورهو الطفى النور منو !.
ماضي الزكريات كل الشباب زايد قدور لووووب صعب يا الضرس صعب شديد تغني في سلم ود الرميلة حتي لو ذات السلم صعب تغني معاهو هاهاهاها الليلة غايتو حصصصصصة و نهايته هسي . ايوة ون تو احتمال تغني معاهو بس الاتنين في وقت واحد صدقني دا اعدام . عثمان ود الرميلة يدي الضرس فرصة للغناء و الضرس يغني كويس بس لكن الاغنية كدا ماتت لانو المود بين الاتنين بعيد خالص . كان يكون افضل لو غنت معاهو شموس . طبعاً يوم الليلة دا لا حسين الصادق لا صباح ما بقدرو يقولو (بغِم) غايتو افراح لقت ليه فرصة و احرجت الفرصة ذاتو. شفتو الفرق بقي ظاهر كيف في الكسرة بتاعة الاغنية!!.
حلقة الليلة و الله سممممحه بس ماتت شديد حلقة فيها اغنيات و مزيكا و فيها فنان ذو صوت شجي و شخصية محترمة و محبوبة و طيبة .
08-06-2012, 06:37 PM
الليندي الليندي
تاريخ التسجيل: 05-27-2002
مجموع المشاركات: 1188
كلاااامك صح ود الرميلة مااابلعب في غناهو رغم اشادته بشموس . بس توزيع فرص الغنى اظنها حقت قدور و قدور دا طلع (مصهدب*) شغال على كيفو هاهاهاها حلقة الليلة يا الليندي حصة رسمممي صح ؟ شفته حسين و صباح لابدين كييييف ؟
ــــــــــــــــــــــــ * الصهدبه دي كلمة نجرنها زماااان زمن القراية أم دق لما تكون اشتغلته ركن طوووويل ونضم كتتتتتير بعد تنتهي بتجيك حالة كدا ما تعرفه شنو صح؟ ياها الصهدبة .
من المفترض من مطرب كبير كعثمان مصطفي ان يترك الفرصه كاملة للشباب ليرددوا
اغانيه دون تدخل منه وفرض لونيته والدليل انانيته في عدم اتاحة الفرصة كاملة لطه الضرس
وذلك واضح في تعامل البروف عثمان مع الاوركسترا اذ يصر ان يقودها بصوره اكاد اقول انها مذله
رغم انه كل اغانيه محفوظه عن ظهر قلب ولا جديد فيها اذ يرددها منذ الستينيات
دعني اقارن عثمان مصطفي بزيدان ابراهيم الذي ولو تغير الايقاع او الكوبليه
لا تراه ترمش له طرفة عين لثقته في عازفيه
العزيز طارق ميرغني
معذرة امبارح ما قدرت ادخل البوست لأنو كان عندي نفسيات نزلت لي يوتوب في بوست الاستاذ ( ابراهيم عبدالحليم ) بتاع ( ود الأمين ) فاتعسمت الصفحة ووقفت الصفحة في الرد بتاعي لافي في تعديل ولا حذف يعني البوست واقف من اول امبارح بالليل لحد ما اتحلت الليلة المساء اتفق معاك في كل ما ذكرته وبالمناسبة ( عثمان مصطفى ) تم تضخيموا أكثر من اللازم رغم ( ندرة وقوة صوته ) إلا أن أغنياتو قليلة وللمعلومية عثمان مصطفى يغني فقط لم يلحن إي أغنية وحتى الأغنية التي لحنها له ( وردي ) لم يضيف فيها شيئاً( يعني مع خت نفسو فيها ) فمن يسمع ( والله مشتاقين ) لايخاله أي شك في أنها من ألحان وردي
وبدت بي نظرة يا السمحة ام عجن كلمات سيد عبد العزيز
غناها فضل
ودي مش ذبحها بس دي فتفتها عديل ودشدشها وطلع عينها.
عبير أزيك
غايتو فضل أيوب داير واحد يمسكوا ويطلع امكانيات صوتو الولد صوتوا كان مليون في المية ( في نجوم الغد ) عموماًلحن الأغنية جميل يمكن لأنو بذكرني بأجمل نشيد في ثالثة ابتدائي كان ملحن بلحن الأغنية
قد كان عندي طائر في قفص من خشب جميل شكل ريشهو حلو طويل الذنب ولم أكن أمنعه من مأكل أو مشرب ففر عنب ومضي بدون أدنى سبب وقال لي حريتي لاتشترى بالذهب
يا ســـــــــــــــلام معاني جميلة وسهلة للاستعياب مش ناس ( في ايدنا رشاش في ايدنا خنجر )
08-06-2012, 11:28 PM
الليندي الليندي
تاريخ التسجيل: 05-27-2002
مجموع المشاركات: 1188
Quote: قدور جاب اغنيتين قال الفرق بينهم اللحن وقال تنافس في الآداء
وكان بيقصد مجاراة الشعراء
وهي الكانت بتخضع (النص التاني) للحن الأول
فترنا من تصحيح السر قدور !
السر قدور كل يوم بغلط المشكلة ( عاصم البنا ) عامل الحقيبة حقتهم ما بصححوا ليه ، قدور قال أن أغنية عبيد عبدالرحمن ( ليالي الخير جادن من المحبوب ) اغناها ( سرور ) مجاراة لأغنية ( مصطفى بطران ) الغناها ( كرومه ) وبتر المعلومة لأنو كده طوالي الناس بتفتكر أن سرور لحن ( ليالي الخير ) وكرومة لحن ( دمعة الشوق ) ولكن الأغنيتين من ألحان ( سرور ) وحتى ( دمعة الشوق ) تغنى بها ( كرومه ) بعد وفاة ( مصطفى بطران ) واداها ليهو سرور وقال ليهو خد منح بالأغنية دي يعني لو في مجاراة لحنية يكون سرور جاري نفسو . السر قدور لمن جاب سيرة المجاراة اتوقعتوا أن يتحدث عن أكثر أغنية تمت مجاراتا لحنياً وهي من ألحان ( الحاج محمد احمد سرور ) فأغنية ( العبادي ) ( برضي ليك المولى الموالي ) تمت مجاراتها لحنيا بأكثر من عشًرين أغنية منها ماهي مجاراة للأعجاب بالحن ومنها ما هو معارضة لشاعر القصيدة
فشيخنا ود الرضي جاراها بسبعة قصائد
1 - ( متي مزاري اوفي نذاري واجفو هذا البلد المصيف ) والبلد المصيف بالنسبة لودالرضي كان مدينة سنار 2 - البريق العاتم سماه 3 - يا حليل الطير الرحل 4 - احرموني و لا تحرموني 5 - نور جناني و قبلة حناني 6 – الغواني البارع جمالها 7 – السلام يا روح البدن قبل أن يعيد الفنان ابراهيم عبدالجليل تلحينها باللحن الحالي وهو ايضاً مجاراة لقصيدة العمري ( الشويدن روض الجنان )
وابوصلاح جاري بثلاث اغنيات هما :
1 - طال سهادي وكان نومي هادي – ادعيه ولاتسرفي 2 - النسيم المار بالخميلة - تميل فروع شمال ويمين 3 - من مناظر الحفلة الجميلة – ليلة ترجح بالف عام
ومحمد علي عبدالله الامي ايضاً جاري بأغنيتين هما :
1 - اسعفوني ولاتصرفوني 2 - ما بخاف من شيء برضو صابر ( قبل ان يغير بادي لحنها الي اللحن الحالي )
هرب استاذ عثمان من الاجابة عن تقييم الشباب بعد كلمة مجاملة بشباب واعد الى سلمنا بخير ولا ادري ان كان يقصد الخماسي ام هناك سلم اسمه ارب ايدل.
شموس حقاً هي شمس نهار واعد.
شريف وأفراح لم يكونوا في الوعد.
طه يؤدي ماضي الزكريات باحساسه ورومانتيكية وأستاذ عثمان يؤديها بمورثة الكلاسيكي الجميل. وكان الأجمل لو ترك استاذ عثمان الكوبليهات التى أداها طه لوحده لكى تتضح فوارق الأجيال.
انصح الشباب بدراسة علوم الصوت فكانت حلقة اليوم حصة مفيدة استعرض استاذ عثمان ملكاته الصوتية والنفس السليم وأداء الحليات (التطريب).
عبدالعزيز خطاب
08-07-2012, 01:28 AM
الليندي الليندي
تاريخ التسجيل: 05-27-2002
مجموع المشاركات: 1188
Quote: الغنية التانية كانت ليالي الخير جادن من كلمات ود الرضي
حسين شندي وتمتام.. وكان خلوها لي تمتام ده براهو كان اخير
حسين مرات بطلع برة الزمن ويطلع الزول من الجو ده لو دخلو اصلا
ودالرضي ده زول عجيب وكتاب وشعرو موغل في البداوة يعنى بالله شوفوا الكلام ده هسع كلام نصاح
بوبح جيدو وابصر ( واقل ) ظن مراقب صدق العاقل قلب المخضوب فوق ( الفاقل ) تلّ اليمنى ومشى متاقل
ده هسع ما وصف لرقيص الرقبة والله وصف مكمل الواحد هسه زي الشايف زولة بترقص رقبا قدامو طبعا كلمة ( واقّل ) يقصد بها النظر بتحدي وجبره ،أمّا كلمة ( فاقّل ) فتعنى المتهدل صاحب الارداف المكتنزة وهي مشتقة من كلمتي ( وقل - فقل )وقد وردت الكلمتين معاً في أكثر من قصيدة فقد اورد الكلمتان الوطن خليل فرح افندي في قصيدة ( قوم نادي عنان )
فى ربوعا الصيد إن ( وقّـل) وشــافن مجنــون يتعقل كفروع البان تتنقل رطب القــاماتن ( فقــّـل)
وكذلك اورد الكلمتين معاً الشاعر ( محمد بشير عتيق ) في قصيدتة ( جسمي المنحول )
الطرفو ( وقول) احور متناعس ولحظة صحىّ تشوف في قوامو المال ( مفقول)
بينما اورد الشاعر الشيخ ( احمد محمد الشيخ الجاغريو ) كلمة ( وقّل فقط ) في قصيدة ( السادة ألميني ) التى تغنى بها الفنان العميد ( احمد المصطفى )
يا سميري شوف صقلتا مع فدعتا ونقلتا في الوقفه شوف ( وقلتا) واحذر سهام مقلتا
عجيبين ياخي الجماعة ديل غايتو ( ليالي الخير جادن ) دي تدرس عديل طبعاً ( حسين شندي ) طلع تمتام برة الأغنية الأغنية يا تسمعا عن ( محمود عبدالعزيز ) يا عند ( تمتام ) براهو
،،،،،
(عدل بواسطة الليندي on 08-07-2012, 01:29 AM) (عدل بواسطة الليندي on 08-07-2012, 01:32 AM)
08-07-2012, 06:57 AM
Emad Ahmed Emad Ahmed
تاريخ التسجيل: 08-12-2009
مجموع المشاركات: 12705
أمبارح بالصدفة البحتة حضرت البحر الزاخر والصوت الوافر والآداء الآسر لي (من فاح طيب ريَّاهُ) وأحياني صوت الأستاذ/ عثمان مصطفى الكبير وذكرني بأنه ما زال هنالك أصوات كبيرة وجبارة عايشة في السودان الشقيق. وخرجب بعد ذلك مسرعاً لا ألوي على شئ للتراويح وبعد داك ما شفت حاجة.
ولازلت عائشاً على صدى ذلك الإستعراض المتمكن الذكي السريع من الأستاذ الكبير/ عثمان مصطفى لمدى صوته الكبير وغنائيته العذبه وآدائه الجميل.
08-07-2012, 04:42 PM
إبراهيم عبد الحليم إبراهيم عبد الحليم
تاريخ التسجيل: 10-31-2008
مجموع المشاركات: 3563
Quote: - أغنيات حقيبة تغنى بها عثمان مصطفى : من فاح طيب رياهـ, الشرف الباذخ, جسمي المنحول, كل ما تأملت حسنك يارشيق.
أخي عماد احمد من أغنيات الحقيبة أيضا عزة في هواك لخليل فرح - دمعة الشوق للشاعر مصطفى بطران
Quote: - أغنيات لزملائه الفنانين تغنى بها عثمان مصطفى : حبيب اكتب لي للكاشف, غضبك جميل لعبد الحميد يوسف, هل أنت معي لعبد العزيز محمد داؤود.
ايضاً تغنى لعبدالعزيز محمد داؤود من كلمات ( عبدالمنعم عبدالحي ) لوموه اللاهي وكذللك تغني للموسيقار الراحل وردي من كلمات ( صاوي عبدالكافي ( امير الحسن )
،،،،
08-07-2012, 11:33 PM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
سميرة دنيا كان متفق عليها من معظم المهتمين والمتذوقين لفن الغناء.
مشاركة سميرة دنيا في برنامج أغاني وأغاني خصماً على رصيدها الفني.
لا احساس لها وصوت فاتر وجلسة متململة.
ثم أدت اغنية اجلي النظر في سلم قتل الاغنية وادخل الكورس في حص بيص.
الحلقة تدور في فلك الإخفاق الذي رافق هذه المجموعة الغير موفقة.
استاذ عزيز خالص التحايا
البرنامج عموماً بقى فاتر وينوّم مافي تجانس في المجموعة المشاركة وحتى الفرقة اليوم تحس أنها جايطة وعاملا أزعاج وكل الأغاني الأتغنت أتغنى منها كوبليهين أو ثلاثة بالأكثر وعمنا السر قدور مازال يواصل في سرد معلومات خاطئة عموماً البرنامج بقى مكرر وكلو معلومات خاطئة وبوخ شديد
،،،،،
08-08-2012, 02:21 AM
الليندي الليندي
تاريخ التسجيل: 05-27-2002
مجموع المشاركات: 1188
الأغنية الأولي ( ليلى طال زى ديسك الهضلم نزل ) وهي الأغنية الوحيدة الغناها سرور في بداياته لأبوصلاح أدى منها ( عاصم البنا ) ثلاثة كوبليهات ) من 8 كوبليهات عموماً أداء متوسط والأغنية ذاتا منسية وما اترددت كتير . الأغنية الثتانية ( أفكر فيهو وأتأمل ) من كلمات ( عبيد عبدالرحمن ) من أجمل الأغنيات السودانية كتبها ( عبيد ) في عام 1930 م وكان ( عبيد ) قد أحب فتاة ( مسيحية ) من المسالمة ولما عرف أهلها بذلك الحب زوجوها مبكراً وفي ليلة العرس وتمت دعوة ( عبيد وسيد عبدالعز وخالد ادم ابن الخياط ) لحضور العرس في الكنيسة فكتب عبيد هذه القصيدة في تلك الليلة وقد ذكر أنه التقى بتلك في الفتاة في مناسبة إجتماعية في عام 1980 م وعلي رغم التغيرات التي احدثتها السنين إلا أن عينية أبت إلا أن تنظر لها بمنظار عام 1930 م غايتو خذلتني يا ( فضل أيوب ) اداء تعبان غايتو أرجع اسمع الأغنية من سرور أو احمد المصطفى أو الطيب عبدالله .
الأغنية التالتة( إجلي النظر يا صاحي ) ويقال أن ( سيد عبدالعزيز ) دخل إلي منزل عمه ووجد أبنة عمه نائمة وعيناها فاتحتان فكتب هذه الأغنية ، غايتو الليلة يوم الخذلان العالمي وزي ما قال العزيز ( عزيز ) أنو سميرة أدت الأغنية بفتور غريب التقول جايبنها بالقوة وغنت كويبلي واحد طبعاً أنا كنت قايل الكورس عامل حركة في شكل وردة اصوات وكده لكن اصحاب الفن الرفيع قالوا أنو سميرة أدت الأغنية في سلم قتل الاغنية وادخل الكورس في حص بيص . الأغنية الرابعة ( طال هجري يا مدر امان ) وهي أول تعامل بين الشاعر ( عبيدعبدالرحمن ) و( الحاج محمد احمد سرور ) في عام 1925 م الأغنية دي ( حسين شندي ) ذبحها من الوريد للوريد جرستوا عديك لمن بقى يقول أنو تعبان وحسن صداق أذا كان بسجل في اليوم 12 ساعة.
,,,
08-08-2012, 02:57 AM
الليندي الليندي
تاريخ التسجيل: 05-27-2002
مجموع المشاركات: 1188
الأغنية الخامسة ( زمن الربيع هلا وفتح الزهر بسام ) السر قدور انشطع فيها شظعه غريبة قال ألغنية كتبها الشاعر ( سيد عبدالعزيز ) مشجعاً لعرس ( الكورة ) ها .. ها .. ها ( كلام خارم بارم عرس كورة شنو وسيد عبدالعزيز متين كتب الأغنية دي ) أغنية ( زمن الربيع هلا ) كتبها الشاعر ( مصطفي افندي بطران ) في مناسبة زواج ( المحجوب المجمر ) بحلة خوجلي وواضح من المقطع البقول فيهو بطران
وقرانك ياالمحجوب حقق لهاالأحلام دمت النعيم يغشاك مع السرور في سلام
برضو ياسر تمتام أداها بفتور ألغنية يا تسمعا من سرور ولا مبارك حسن بركات ولا عوض الكريم عبدالله .
الأغنية السادسة ( يا عزة الفارق بي طال ) من كلمات ( العبادي ) أغنية جميلة ما بتشبه فرفور ولا محتاجة لي صريخ قدر ده فرفور ده ما سمع ودالامين بقعد الأغنية دي كيف وعليك الله يا السر قدور أختى سرور ده دي حلقات ما بتليق بخمس ما قدموا سرور
،،،،
08-08-2012, 06:33 PM
عزيز عزيز
تاريخ التسجيل: 04-12-2002
مجموع المشاركات: 3290
عتقنا الله وإياكم من النار في العشر الأواخر من رمضان
هذا العام فقد البرنامج بوصلته وإبداعه واصبح كسائر البرامج التى فقدت بريقها.
وكاد هذا البوست ان يغفل لولا دخولك بهذا الزخم المعلوماتي الهائل والذي يوثق لحقب مازال فيها جوانب غائبة عن المهتمين والمتخصصين. وكنت بصدد الاتصال بك بعد رمضان لاثقف ذاتي الباحثة عن المعلومة.
لك الشكر الجميل والود الجزيل لهذا الدفق الرائع.
عبدالعزيز خطاب
08-08-2012, 07:08 PM
Ahmed al Qurashi Ahmed al Qurashi
تاريخ التسجيل: 08-28-2006
مجموع المشاركات: 4263
Quote: الأغنية الوحيدة التي لحنها سرور لابوصلاح هي أغنية فريع البانه المن نسمة يتمايل حاكى المنقسمة
ولقد سجلها على الاسطوانات الفنان بشير الرباطابي سنة 1927
كما سجلها للإذاعة بابكر ود السافل واولاد المامون
ولقد تعنى بها ايضا الفنان بادي محمد الطيب
أما اغنية ليلي طال زي ديسك الهضلم نزل فهي من اغاني الفنان علي الشايقي ولم يلحنها او يتغنى بها سرور
ولقد سجلها للإذاعة الفنان بادي محمد الطيب
مودتي
العزيز الأستاذ ( احمد القرشي ) وأستاذ جادي فيها لأني نهلت منك الكثير أكاديمياً والأكثر في في مجال التوثيق وحقيقة أنا ما أتخيلت أنو السر قدور برضو يدينا معلومة خطأ وحسب معرفتي لما قبل البرنامج أنو ( سرور ) تغنى بأغنية واحدة ( لابوصلاح ) لكن هي شنو هذا ما لم أكن اعرفة فتخيلت أنو المعلومة صحيحة فشكراً تاني للتصويب ولك وافر الشكر والتقدير .
،،،
08-08-2012, 10:20 PM
الليندي الليندي
تاريخ التسجيل: 05-27-2002
مجموع المشاركات: 1188
عتقنا الله وإياكم من النار في العشر الأواخر من رمضان
هذا العام فقد البرنامج بوصلته وإبداعه واصبح كسائر البرامج التى فقدت بريقها.
وكاد هذا البوست ان يغفل لولا دخولك بهذا الزخم المعلوماتي الهائل والذي يوثق لحقب مازال فيها جوانب غائبة عن المهتمين والمتخصصين. وكنت بصدد الاتصال بك بعد رمضان لاثقف ذاتي الباحثة عن المعلومة.
لك الشكر الجميل والود الجزيل لهذا الدفق الرائع.
عبدالعزيز خطاب
العزيز - عزيز خطاب
خالص الشكر والتقدير
اخجلت تواضعي وهذه شهادة اعتز بها كثيراً ولك وافر الشكر وسلمت من كل شر
،،،،
08-09-2012, 01:01 AM
الليندي الليندي
تاريخ التسجيل: 05-27-2002
مجموع المشاركات: 1188
حلقة اليوم كانت عن الجن والله لمن خفت عديل اتخليت أنو افراج حتغني ( مجنونة )
الأغنية الأولى ( أول نظرة ) من أغاني 1942 كلمات ( محمد بشير عتيق ) وألحان ( كرومه ) ادوها فهيمة وصباح أداء أقل من الوسط في حتة في الأغنية لمن تتعاد ( من اول نظرة لم أخد حذرة ) بتعاد بطريقة فيها تطريب والصوت برتفع حبة الحتة دي فهيمة ما اشتغلت بيها غنتا تسميع فقط اوالغريبة أنو صباح عملتها لكن ضعف الأمكانيات الصوتية بتاع صباح ما خلانا نحس أنو في تطريب . الأغنية التانية : ( جنني نغمات القمري ) كلمات ( عمر البنا ) وألحان ( كرومه ) الأغنية معاد قبل كد أتغنت وغنوها ( عاصم وأسرار وعصام وفرفور الراحل نادر ) وما عارف الفكرة شنو في أغناي كتيرة فيها الجن يعني كان ممكن يغنوا أغنية ( فتحي الضو والكحلاوي ) قالوا علي شقي مجنون أو أغنية ( عبيد والكاشف ) ( جنني ياخي العيون يا حلاتن ) المهم ( حسين ) أدى الأغنية بصورة جيدة ما عمل فيها فابريشن كتير والود ممكن يمشى كويس لو اتوجه صاح
،،،
08-09-2012, 02:07 AM
الليندي الليندي
تاريخ التسجيل: 05-27-2002
مجموع المشاركات: 1188
الأغنية الثالثة ( الزول ده جنني يا أهل الله ) كلمات ( اسماعيل خورشيد ) والحان وغناء ( سيد خليفة ) طبعاً غناها ( شريف الفحيل ) والأغنية خفيفة فالاداء كان يعني ما بطال .
الأغنية الرابعة ( حبيبي جنني ) كلمات وألحان ( الطاهر ابراهيم ) ودي الأغنية الادخل فيها ( ابراهيم عوض ) الايقاع بنقز ( خميس جوهر ) وجيتار ( الفاتح الطاهر ) ورقص على انغاما ابراهيم عوض فكانت من اشهر الأغنيات الخفيفة في زمنا ، طبعاً ( شموس ) مافيها كلام ولو دخلت كانت ضعيفة حبة لكن ظبطت بعد دالك و( ريماز ) غنت مقطعا بصورة جميلة جداً وباحترافية اما صاحبتنا ( أفراح ) فشل ذريع ما قدرت تكمل وتمت لينا موية اه .. اه وكمان في النهاية عايزه تقفل الأغنية فطلعت الشباب برة الأغنية لكن لحقوها والله يا أفراح ضرستينا عديل .
،،،
08-09-2012, 02:19 AM
الليندي الليندي
تاريخ التسجيل: 05-27-2002
مجموع المشاركات: 1188
الأغنية الخامسة : ( انشودة الجن ) كلمات ( التيجاني يوسف بشير ) وعلي ما أعتقد أنو( التجاني ) لم يغنى له شعر سوى هذه الأغنية والأغنية الملك ( عثمان حسين ) ( في محراب النيل ) وبالجد ( سيد خليفة بالغ في اللحن ) ارفع قبعتي أجلالاً واحتراماً للاداء الراقي جداً القدوا ( طه سليمان ) أمكانيات مذهلة وتحكم في الصوت بصورة مدهشة حقيقة ( طه ) مشروع فنان قادم بقوة لاحتلال موقعه في خارطة الغناء السوداني فقط عليه أن يعرف أن الغناء رسالة وأن يبحث عن النصوص الجيدة وتب ما بتجيهو عوجة اطربتنا ياطه حتى الثمالة والجميل أنك تغنيت بالأغنية كاملة مكملة .
،،،
08-09-2012, 12:27 PM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
انتو لسه متابعين الغث الاليكترونى ده ؟ والله نفسكم طويل لكن!! ياخى البرنامج لم يعد يصلح عمكم قدور كيسه فاضى تاتى حسنات شذرا ،مرة من حسين وتمتام وعاصم وطه احياناً شموس غناية بس تختى عمها السر قدور ده ياخى ده طرطش عاصم البنا من يوم منظر شى بديع فهيمة بقت مره تختى ومره تصيب، منار تغنى للفلاتيه ومنى الخير ممكن.. خفيف السخيل والزول الاسمو فضل بدرى عليهم ريماز وافراح مقنعات جداً باعتبار اللعيبه كلهم ما بسجلوهم للكورة كما يقول بعض ادارى الفرق ذوى الضروس فى ناس للرحلات وكده اقول قول هذا واستغفر الله لى ولكم وللسر قدور،،،
ما زلت علي اصراري ان فضل ايوب زول غنااااااااي واكاد اجزم بانه اجمل صوت في الطاقم الرجالي المشارك اما شموس فكل يوم بتثبت بانها سلطانة طرب لا يشق لها غبار وطه الضرس فعلا فنان فنان فنان.... فهيمة صوت متميز جدا بس دايرة شغل علمي شديد وتدريبات مكثفة في عملية اخراج الحروف سليمة والجرات في الصوت علوه وانخفاضه فصوتها كما ذكرنا بانه صوت متميز تنقصه العلمية.... البقية الباقية بقت عبارة عن اصوات مستهلكة واداء جامد ما فيهو اي جديد..... عمنا السر قدور دا لو سمع كلامنا من زمااااااان وشال افراح الشعب دي برة وختى لينا بدلها نانسي عجاج وشال لينا شريف دا برة وجاب لينا لينا بدلو عمر جعفر وشال فرفور دا برة وختى لينا بدلو ابو بكر وسابنا من قصة تمام وحسين شندي والوهمات دي البرنامج دا كان حا يكون زي الورد.... بعدين يا ريت عمنا السر قدرو لو في كل حلقة بالزات حلقات الحقيبة دي لو جاب ناس متخصصين يتكلمو لينا بدلو فيها ولو عايز من المنبر دا بنديهو قرشي واللندي وود الموج ومعاهم عبير خيري بنجضو ليهو الشغل دا تمام.... لو في طريقة برضو يرجع لينا اسرار بابكر بكون ضبط المنقة.... الفرقة الموسيقية محتاااااااااجة لجيتار وبيز ودنب يجيب موسيقين حافظين الشغل دا واهم حاجة الناس تعمل بروفات قبل الحلقة لانو الشغل الارتجالي دا ما جايب حقو والفانين يا اما الواحد يحفظ حفظ سليم ومجود يا اما ما يقعد يتهابل لينا هنا ويفقع لينا حاجاتنا.... اقول قولي هذا واستغفر الله لي ولكم.... قوموا الي سلمى سيد لتبحر بكم في زورق الحان القامة ابو الامين يرحمكم الله.
Quote: وما هو براهو في كمين نفر كدا معاهو اتضح انو بضاعة اصواتهم دي مضروبة شديد والله
الانسان ممكن تفرض عليه اشياء كثيره حتى نوع الاكل ولكن لاتستطيع ان تفرض عليه السماع يعني الناس هنا مفروضه فرض على المستمع افراح .. اكتشافات الملحن احمد المك وزوجها وهو صديق المخرج المعروف الشفيع رماز .. بابكر صديق مقدم برامج نجوم الغد متزوج خالتها الفحيل .. استفاد من والده عازف الكمان منار .. قريبة العازف محمديه .. بس هي مافيها مشكله صوتها جميل في اغاني عائشة الفلاتيه فقط وباقي الفنانات مايحدث في التلفزيون يعتبر افه كبيره
08-11-2012, 10:07 AM
عزيز عزيز
تاريخ التسجيل: 04-12-2002
مجموع المشاركات: 3290
اول بي التبادي الحلقة قال عن اسهامات المرأة السودانية في الغناء السوداني الحديث
وبدى بي في الضواحي وطرف المداين واداها لي افراح زعمطتها طلعت عينها وبقت في الطواحين
الغنية التانية ادوها لي صبوحة وكانت الفاجعة انا ما اتغيرت وما اتنكرت ليك
لي ثنائي النغم والله انا مت وحييت وما عرفت اعمل شنو ياخي والله ضغطي طار السماء الاحمر
يعني هي ما سمعتها عند اسرار بابكر؟ انا لو منها احلف ما اغني لي يوم الدين
وجات كمان رماز تغني روح معاك عمر الهنا انا لو مكان البلابل
اقوم طوالي اقاضي النيل الازرق والسر قدور ومن لف لفهم .. معقولة بس
والليلة كمان جاتنا موضة يطلعوا برة الزمن في ال3 اغاني الاولى وجهجهوا باكات الفرقة
وجونا فهيمة وود الصادق ذبحوا لي حبيب شاغل بالي ذبح الشاة في عيد الضحية
حسين الصادق ده يرحم نفسوا شديد والله
وفهيمة عليك الله غني البيشبه صوتك
منار صديق فازت بي الحلقة وشالت سمسم القضارف ذهبيةالحلقة
وانتهت الحلقة كما انتهى رونق البرنامج
. (عدل بواسطة عبير خيرى on 11-08-2012, 00:09 AM)
شاعرتنا عبير
رمضان كريم
الى حلقة العيد كان ما اصابك شئ سوف انزل لك بوست اتحمد لك فيه السلامة
الغريب يا عبير هذه الحلقات مسجلة وليست مباشرة ويمكنهم معالجة الأخطاء بإعادة التسجيل او الحذف عند المنتاج ولكنهم اما لا يحترمون المشاهد وأما ليس مهنيون
والغريب أيضاً معهم في التنفيذ موسيقيين كبار مثل محمدية وسعد وإسماعيل وزرياب والموسيقي والمهندس الصوتي عمر القصاص. فلماذا لا يتدخلون لضبط هذه الفوضى لهؤلاء المغنيين!
في احدى اجازاتي كنت مع احد الزملاء والأصدقاء وهو موسيقي مخضرم ويحمل درجة الدكتوراه في الاستديو الخاص به فكان يعمل في مكساج لا لبوم لإحدى المغنيات من تنفيذه.
فقلت له هذا العمل غير نجيض ويحتاج لتسبيك كما يقول الطهاة. فكان رده بانه اذا ما طلب ذلك من المغنية ستعتقد بانه يريد منها مزيد من المال في حجز الاستديو وتكاليف التنفيذ!
فكان قولي له. ولكن سيخرج هذا الالبوم وهو يحمل اسمك في الاشراف والتنفيذ فقال لي يا عزيز انتوا عايشين في اوروبا .وهنا الناس عايزه تعيش فخرجت منه وانا حزين.
سؤال في حضرتك يا عبير. أنا متابع برنامج ريحة البن بالله الشباب ديل البجمعهم شنو؟؟ والمهتم بيهم منو؟؟؟ هل مازال هناك اتحاد ادباء؟ يا سلام عليهم جميلين جميلين الى حد الدهشة.
كل سنة وانت طيبة
08-13-2012, 00:19 AM
عبير خيرى عبير خيرى
تاريخ التسجيل: 02-12-2004
مجموع المشاركات: 2440
الى حلقة العيد كان ما اصابك شئ سوف انزل لك بوست اتحمد لك فيه السلامة
الغريب يا عبير هذه الحلقات مسجلة وليست مباشرة ويمكنهم معالجة الأخطاء بإعادة التسجيل او الحذف عند المنتاج ولكنهم اما لا يحترمون المشاهد وأما ليس مهنيون
والغريب أيضاً معهم في التنفيذ موسيقيين كبار مثل محمدية وسعد وإسماعيل وزرياب والموسيقي والمهندس الصوتي عمر القصاص. فلماذا لا يتدخلون لضبط هذه الفوضى لهؤلاء المغنيين!
في احدى اجازاتي كنت مع احد الزملاء والأصدقاء وهو موسيقي مخضرم ويحمل درجة الدكتوراه في الاستديو الخاص به فكان يعمل في مكساج لا لبوم لإحدى المغنيات من تنفيذه.
فقلت له هذا العمل غير نجيض ويحتاج لتسبيك كما يقول الطهاة. فكان رده بانه اذا ما طلب ذلك من المغنية ستعتقد بانه يريد منها مزيد من المال في حجز الاستديو وتكاليف التنفيذ!
فكان قولي له. ولكن سيخرج هذا الالبوم وهو يحمل اسمك في الاشراف والتنفيذ فقال لي يا عزيز انتوا عايشين في اوروبا .وهنا الناس عايزه تعيش فخرجت منه وانا حزين.
سؤال في حضرتك يا عبير. أنا متابع برنامج ريحة البن بالله الشباب ديل البجمعهم شنو؟؟ والمهتم بيهم منو؟؟؟ هل مازال هناك اتحاد ادباء؟ يا سلام عليهم جميلين جميلين الى حد الدهشة.
كل سنة وانت طيبة
أستاذ عزيز كل سنة وانت طيب
والله شكلك كده حتفتح بوست تحمد لي فيهو سلامة عملية القرحة المستشرئة بين القلب والكبد والمعدة
شفت دي كيف؟
الوضع في السودان مذري جدا قبل كده ناذر الخليفة علق على واحد من الالبومات نزل فيهو مشكلة في الصوت وما عارف الفنانين بيعانوا قدر شنو عشان يطلعوا البوم ما بين رسوم محلية وحجوزات استديوهات وتكاليف شركة الانتاج الغالباً بتلعب في كمية الاشرطة وتضيع الفنان وغيروا وغيروا والفنان ما بصدق يلقى ليهو فرقة يطلع بيها شريط ..
بي النسبة لي شعراء ريحة البن انا لأني برة السودان في الفترة الأخيرة ما شفتهم الا في التلفزيون ومرة في منتدى راشد دياب
وجيت متأخرة لذلك ما عندي عنهم معلومة لأفيدك ..
شكراً على المداخلة الجميلة
تحياتي
عبير
08-11-2012, 10:29 AM
عزيز عزيز
تاريخ التسجيل: 04-12-2002
مجموع المشاركات: 3290
أنا من المعجبين جداً بنظريتك ومتابع لكل ما تكتبه في فن الموسيقى والغناء من تحليل وآراء عبر هذا المنبر.
Quote: الفحيل .. استفاد من والده عازف الكمان
خالد الفحيل عازف بيانو وكيبورد واجزم لك بانه لا دخل له بوجود شريف في هذا البرنامج. فشريف ربنا حباه بقبول في السنوات الماضية. شريف لا يستطيع اداء كل لونيات الغناء وكنت وما زلت اعتقد بان والده يستطيع ان يسهم كثيراً في تطوير أدائه فخالد موسيقي مميز.
واسمح لي ان اكتب نداء عبر مداخلتي لك لمنفذين البرنامج.
البرنامج زمنه محدود وقصير وهناك أغاني تغنى تيمتها اللحنية جملة قصيرة ومتكررة حتى نهاية الاغنية (سمسم القضارف مثالاً) فلماذا تغنى كاملة ليصاب المستمع بالملل.
لك محبة صادقة يا وليد عبدالعزيز خطاب
08-11-2012, 12:35 PM
عبير خيرى عبير خيرى
تاريخ التسجيل: 02-12-2004
مجموع المشاركات: 2440
حولت في السابعة والربع بتوقيت أمستردام الرموت لقناة النيل الأزرق ووجدت عمنا السر قدور بقول سيغني لنا طه الضرس ابسمي يا أيامي
وأداها طه كعهدي به (جينات) وصوت سليم في كل درجات وأبعاد اللحن الموسيقي.
وقلت طه صعب الحلقة على بقية الشباب. لاعتقادي بانها الاغنية الاولى في الحلقة. واشفقت علي بقية الحلقة ولكن! قال عمنا السر وبهذه الاغنية بعد ان حيا طه وعمنا عبدالرحمن الريح وأستاذنا ابراهيم عوض تنتهي حلقة أغنيات البسمة. فتحمد السلامة ومازلت اترنم بالأغنية من روعة وقعها على نفسي حتى الان.
وكما قال اخي طارق لولا وجود طه هذا العام لما كان هناك حضور لاغاني وأغاني.
ما يقدم في هذا البوست اقيم بكثير من ارتجالية عمنا قدور
اداؤكم بدون فرز فاق حد الاعجاب ولكني عبر هؤلاء : طارق / الليندي / عبير / عزيز / قرشي وسيد البوست صديقي نابري انقل التهاني لللجميع والشكر على مواصلة تثقيفنا كما ينبغي
بوست بريحة البن والله !!! (توأمة)
مبروك لطه سليمان اجماع الاساتذة ولتكن هذي مشاركتك الاخيرة في هذا البرنامج،،
08-13-2012, 00:10 AM
عبير خيرى عبير خيرى
تاريخ التسجيل: 02-12-2004
مجموع المشاركات: 2440
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الليندي
mohmed khalail
ودالعباسية
سفيان بشير نابرى
عبير خيرى
صديق الموج
عزيز
إبراهيم عبد الحليم
Emad Ahmed
Azhari Nurelhuda
Ahmed al Qurashi
وليد عبد اللطيف
محمد الامين محمد
الخير محمد عوض
فيس بوك
تويتر
انستقرام
يوتيوب
بنتيريست