حزب سياسي جديد/ حركة سياسية جديدة!

Quote: From: Khalid Ghaly <> To: [email protected] Sent: Tuesday, April 24, 2012 6:44 AM Subject: سلامات صباح الخير استاذ محمد بما انك مشيت لي قدام وبديت تضع تصور لاسم واهداف الحركة الجديدة احب ان اشركك والمتابعين هذه الافكار عن نفسي عندي اعتقاد راسخ انو آفة اي حزب في السودان على الاقل هي البرنامج الطويل المدى دائما تلقى البرامج والاهداف بتاعة الاحزاب انهم يعملو كذا وكذا وكذا وتلقى الاهداف دي عشان تتحقق ( وبيكون مابينفع تتحقق جزئيا لازم تتحقق كلها عشان تتضح رؤية الحزب ) بتكون محتاجة عشرات السنوات ! اصلا لو في ديمقراطية بالجد كيف حزب يمسك السلطة عشرات السنوات ؟! اها انا ازعم انو كل احزابنا السودانية تحمل في داخلها بزرة ديكتاتورية واقصاء للآخرين وبرنامج ( تمكين ) زي حق الكيزان ده، ده غير طبعا التقديس الغير مبرر للقيادات التأريخية لدرجة التوريث احيانا/ غالبا ممايجعل الحزب في شكلو اشبه بالنظام الملكي عدييييل . عليه اذا كنت حا اتكلم عن تصور لحركة جديدة فاهم حاجة حا افكر فيها هي تحرير الحركة من اي التزام طويل المدى حا اخت اهداف مهمة قصيرة المدى واعمل على تحقيقها وبعد ما تتحقق اعيد تقييم الوضع واخت خطط واهداف جديدة للمرحلة المقبلة. في الوضع الراهن ماحا اتعب نفسي في التفكير في اهداف كتيرة اذ ان الهدف المهم وااااضح زي الشمس نكنس السرطان ده عشان نعرف نتنفس ! وانا لسة مصر انو في حالة قدرت الحركة تستقطب الشارع السوداني ذو القوة المعروفة للجميع ممكن جدا يتم الامر بالتفاوض السياسي الحازق، بس لازم يكون في يدك قوة تهددهم بيها وفي كل الاحوال اقتلاعهم بواسطة ثورة شعبية هو الخيار الاكبر عن شكل التنظيم انت قلت انو شرط العضوية بتاعتو يكون الزول مامنظم في اي حزب آخر ... واسمح لي اخالفك الراي لانو الحركة ما اظنها في نيتها اقصاء الاخرين بالعكس هي مصممة خصيصا لتجمع الناس كلهم تحت لواء واحد وحاليا اظن حسب الهدف المرحلي كل الاحزاب السبعين القالتهم رمانة فوق ديل متفقين على الهدف ده كلامي ده ما اقصد بيهو الاستعانة بالاحزاب دي ابدا لاني اصلا شايفها ميتة لكن بقول انو مانمنع عضويتها الشابة النشطة المحتارة مابين الالتزام للتنظيم وتوجهو وبين الثورة المعتملة في الصدور .. خليهم يقومو بدورهم كشباب حر بدون قيد التنظيمات خليهم يشاركو في غد افضل لبلدهم ومستقبلهم اخيرا واعتذر على الاسهاب بعد قريت بوست الاخ كبر فكرت في الاسئلة الطرحها واكتشفت انو نحن طموحاتنا اساسا بسيطة جدا .. نحن ماقاعدين نفكر في محاربة الارهاب العالمي او حل مشكلة البيئة العالمية ... نحن ماقاعدين نفكر في دور طليعي للسودان في المنطقة والعالم .. نحن ماقاعدين نفكر في حل مشاكل الدول التانية ... نحن ماعندنا رئيس بيترشح للحكم ويكون اهم نقاطو البيستقطب بيها الناخبين انو حايحل مشكلة الفقر والمجاعة في الصومال ! ياخي نحن ماقاعدين نفكر في ده كوووولو نحن بس عايزين قانون ودستور يشملنا نحن السودانيين ديل كلنا وعايزين مؤسسات نزيهة نضيفة مستقلة تنفذ القانون ده ! دي اسي كتيرة علينا ؟ دي اسي مابديهيات ؟ دي اسي ماحاجة اساسا المفروض تكون متوفرة ؟ لو كنت حا اخت برنامج للحركة الجديدة فحا اخلي الهدف الاساسي هو ارساء ثقافة المؤسسات وحكم القانون ... الناس كلهم سواسية في الحقوق والواجبات .. وحا اموت في سبيل تأسيس مؤسسات مستقلة نزيهة مهنية تقوم بتطبيق القانون زي ماهو ولا علاقة لها بالنظام الحاكم على الاطلاق شكرا يامحمد والى الامام خالد غالي