|
|
|
 Re: الباترا .. التعلمجي الاشهر في تاريخ كلية الشرطة (طرائف وصور) (Re: محمد حامد جمعه)
|
| Quote: ويا ريت تمد نظرك وتوثيقك للرجل المهيب (عوض بوت ) هذا الجنرال الصانع للرجال |
ياسلالالالالالالالالالالام يامحمد حامد جمعة يااااخ
دائماً عند حسن ظني فيك ...
تحدثت مع عدد من الزملاء بالخدمة وبالمعاش في هذا الموضوع
والجميع ابدي ترحيب حار ومنقطع النظير وصراحة احتفظت بالفكرة
لان سعادتو عوض وداعة الله حسين الشهير بــ (عوض بوت) كان لايزال
في الخدمة وخفنا من اتهامنا بكسير التلج 
لكن الأن لاتثريب علينا ... سعادتو عوض وداعة اكاد اجزم بأنه
لم يرتبط بدفعة ولم ترتبط به دفعة زي دفعتنا الدفعة 56
علاقة ابوية واخوية وصداقة امتدت منذ لحظة دخولنا كلية الشرطة
يوم السبت الموافق 24 يناير 1987م وحتى يومنا هذا ...
ياااخ سعادتو عوض حفظ اسماء الدفعة الــ 187 في ادارة داخلية واحدة
ممكن تتخيل الادارة الداخلية دي كانت كم ساعة هههههههههههه
| |
  
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
طرفة الطالب فاروق المصري مع الباترا عندما كان الطالب فاروق جالساً خارج الطابور في الميدان فسأله الباترا «مالك قاعد برا؟».. فقال له المصري «أنا عيان يا سيادتك».. «مالك عندك شنو؟».. فقال له «عندي عرق نسا يا سيادتك».. فصفق الباترا يديه وصاح قائلاً «خلاص كملتو مرض الرجال وقبلتو على مرض النسوان».
عندما يقود التعلمجي طابور أي فصيلة أو سرية فانه يردد «شمال يمين شمال» لضبط ايقاع السير وبكثرة التكرار تتحول الى «ما..مي..ما» أو «مع.. ميع..مع» وبعضهم يقول «هل-هل-هل» والبعض لأنه ربما يقول «هع-هع- هع وهكذا وإذا ما رأى ضابطاً فإنه يصدر أمره للطابور «لليمين أنظر» أو «للشمال أنظر» حسب موقع الضابط بينما يقوم هو بأداء التحية العسكرية، وذات يوم كان أحد التعلمجية يقود فصيلته عائداً من طابور سير خارج الكلية «الباترا» ضابط الميدان واقفاً على الجروف في تلك العصرية، وهو يعدل من سرواله ويربط في تكته
والتعلمجي يردد «مع.. ميع..مع» ولما لمح الباترا هتف «لليمييين ..انظر» فأشاح الباترا بوجهه ولوح بيده وصاح فيه «لا يا غبييي»!!.
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
في واحدة من تدريبات البيادة اشتكى الطالب عبد الباقي البشري (الفريق شرطة حالياً) من ألم في ظهره ولم يستطع مع الألم أن يؤدي الحركات على الوجه المطلوب, فسأله الباترا: (مالك ياطالب؟) فقال له الطالب عبد الباقي (عندي غضروف يا سيادتك) حينهاالتفت الباترا لباقي الطابور قائلاً: - (الواحد يطعنو دبوس في ضهروا يقول ليك عندي غضروف! ليه؟! قرصك دبيب؟! ضربك لغم؟! ولا عفصتك دبابة !!! حِكَم والله!!!)
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: محمد عبد الماجد الصايم)
|
قد كان ضابط الميدان المهاب تاج السر الباترا.. مدرسة خاصة قائمة بذاتها في أصول التدريب الميداني وكان نظيفاً وظريفاً دون قصد منه ولكن لأنه كان يتحدث لغة خاصة به .. فيها مفردات غريبة لا هي عربي ولا هي أفرنجي.. وله أوصاف ومسميات يطلقها على الأشياء كيف شاء.. تثير ضحكاً كالبكاء كقوله تكاثرت أو تمادت بسمات الكبابي علي الشبابيك ومن الأنف فصاعباً .. الله قال بي قول من توجد في غرفته بسمة كباية!! وبعد نقاش مستفيض .. فهم الطلاب .. بأن بسمات الكبابي.. هي آثارها التي ترسمها إذا وضعت على الشباك وإن من الأنف فصاعبا.. هي من الآن فصاعداً..
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
وللمرحوم المقدم تاج السر الباترا طرائف عدة مع الكسر ثلث، وذات يوم جمع الطلاب للقيام بحصة (الطُلبة)، وهي حصة نظافة الكلية من الأساخ، وقال لهم (الثلث الأول عليهم منطقة الاصطبلات.. والثلث الثاني عليهم منطقة العنابر، والثلث الثالث عليهم منطقة المكاتب.. أما الثلث الرابع فعليهم الجنينة!!
من وصايا الباترا للطلبة (إذا ظلمتم) بين الناس فاعدلوا!!
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
كان الضابط عثمان حسين رستم رجلاً وسيماً.. (أبيض) اللون (حلبي يعني).. ذو بنية رياضية وقامة فارعة، وكان واحداً من أبرع لاعبي كرة السلة في السودان، وعندما كان طالباً بكلية الشرطة حدث له موقف طريف مع الضابط تاج السر الباترا.. ضابط الميدان.. وكانت العادة قد جرت في الكلية أن تكون أمسيات الأحد بلا (طابور عصر) وكانت تمثل أوقاتاً رياضية مفتوحة وذلك مراعاة للمسيحيين من الطلاب الذين كانوا يذهبون في ذلك الوقت من كل أحد إلى الكنيسة.. وذات أحد كان الطالب رستم (ينقز) (بالكورة) لوحده في ميدان الباسكت، وتصادف أن مر الباترا بملعب الباسكت، حيث توجه إلى الطالب رستم.. وفي (بالو) إنه حلبي ومن بحري واسمه رستم يعني أكيد (قبطي).. فقال له مداعباً (الليلة ما مشيت مع الجماعة) وفهم الطالب رستم أن الباترا يظن أنه مسيحي فجاراه في الأمر، وقال له (أيوه ياسيادتك) فصفق الباترا يديه وقال له (يا سبحان الله كافر وعاصي!!).
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
أول دفعة .. تخرَّجت من ضمنها .. فتاة واحدة .. هي الدفعة «29» عام 1971 أي في العهد المايوي .. وكانت هذه الفتاة الرائدة في هذا المجال .. هي السيدة/ محاسن التازي .. تقاعد بعض زملائها على رتبة الفريق شرطة !! ثم أعقب ذلك .. الدفعة 37 عام 1977 .. وكان من بين خريجيها مجموعة من الضابطات الفتيات .. وهن آسيا .. وآمنه سكوته وإخلاص الفاضل .. ومنى زكي !! وأحسب أنَّ ضابط الميدان الأسطورة تاج السر حامد الباترا .. لم يكن راضياً على استيعاب فتاة ضمن الدفعة «29» .. ومع الدفعة «37» أحسَّ بأعراض السكري وداهمه المرض، لأنَّه لم يستطع أن يهضم فكرة ولوج المرأة في هذا المجال «الضكوري».. ولم يتصوَّر أن يجد نفسه يجعر .. ويزعق في وجه فتاة مُتدرِّبة .. وكما نقل الرواة .. فإنَّ الباترا ظلَّ يضرب كفاً بكف ويحادث نفسه .. علامات الساعة ظهرت.. جنس النساء ظهر في كلية البوليس .. البنات يبقوا «ظباط» القيامة قربت .. وسعادتو وين؟! سعادتو في الكوافير ..وسعادتو راح وين ؟.. مشى الحنانة !! سعادتو في إجازة ..؟! أبداً سعادتو في الوضوع !! .. ويقهقه الباترا وهو يُردِّد.. يتربى في عزك يا سعادتو !!
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
عمنا «تاج السر الباتِرا» رحمه الله.. الذي يُحفظ عنه إنه قال للمجموعة الأولى من الأطباء الذين التحقوا بخدمة الشرطة وأُدخلوا كلية الشرطة للتدريب العسكري.. ولم يعجب عملهم عمَّنا «الباتِرا» وهو معلم بيادة من طراز فريد كنَّا نسمع صوته بالنداء ونحن في منزل عمنا المرحوم عبا? عبد الرزاق معلم التربية بالكلية والمشهور بعباس الكنزي بجوار دار الشرطة الحالي.. ٭ قال الباترا للطلبة الأطباء.. «خَلِّي بالك هنا يا طلبة» إنتو الدكاترة ديل عارفين شنو وقارين شنو؟ غير كتابين واحد حق المرض والثاني حق الدوا؟.. نحنا هنا بنعلمكم.. المشي والحديث ولبس القميص.. وعندنا كل القوانين قانون العقوبات.. وقانون الإجراءات.. وقانون الجنايات.. وقانون الغابات.. وقانون الدفاع المدني.. وقانون الحياة البرية.. وقانون المرور وقانون الكلية دي.. بلاش موت معاكم.. معتدلاً مارش.
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
جنابو عمر تحياتي
بوست ممتع جدا و فعلا الراجل ده يستحق التوثيق ربنا يرحمه بقدر ما احب و اخلص لعمله
| Quote: قال الباترا للطلبة الأطباء.. «خَلِّي بالك هنا يا طلبة» إنتو الدكاترة ديل عارفين شنو وقارين شنو؟ غير كتابين واحد حق المرض والثاني حق الدوا؟.. نحنا هنا بنعلمكم.. المشي والحديث ولبس القميص.. وعندنا كل القوانين قانون العقوبات.. وقانون الإجراءات.. وقانون الجنايات.. وقانون الغابات.. وقانون الدفاع المدني.. وقانون الحياة البرية.. وقانون المرور وقانون الكلية دي.. بلاش موت معاكم.. معتدلاً مارش. |
و ماذا عن جنابو داؤود و المرحوم الفريق ابراهيم احمد عبدالكريم ( ودراوه ) هل من شيء في الذاكرة
هل ادريس احمد عوض السيد ( خور طقت ) دفعتك
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: مجدي عبدالله أبوحريبة)
|
Quote: جنابو عمر تحياتي
بوست ممتع جدا و فعلا الراجل ده يستحق التوثيق ربنا يرحمه بقدر ما احب و اخلص لعمله |
الف شكر يامجدي
| Quote: و ماذا عن جنابو داؤود و المرحوم الفريق ابراهيم احمد عبدالكريم ( ودراوه ) هل من شيء في الذاكرة |
والله يامجدي طرائف البوليس لاتعد ولاتحصي .. العتب على الذاكرة
| Quote: هل ادريس احمد عوض السيد ( خور طقت ) دفعتك |
ياسلالالالالالالام ياااخ
ادريس دفعتي وولد فصيلتي الفصيلة الخامسة/السرية الثانية
تحياتي ليهو
| |
|
|
|
|
|
|
|
|
 Re: الباترا .. التعلمجي الاشهر في تاريخ كلية الشرطة (طرائف وصور) (Re: حافظ انقابو)
|
| Quote: وكما نقل الرواة .. فإنَّ الباترا ظلَّ يضرب كفاً بكف ويحادث نفسه .. علامات الساعة ظهرت.. جنس النساء ظهر في كلية البوليس .. البنات يبقوا «ظباط» القيامة قربت .. وسعادتو وين؟! سعادتو في الكوافير ..وسعادتو راح وين ؟.. مشى الحنانة !! سعادتو في إجازة ..؟! أبداً سعادتو في الوضوع !! .. ويقهقه الباترا وهو يُردِّد.. يتربى في عزك يا سعادتو !! |
مبالغة .. مبالغة .. مبالغة يا جنابو والله ضحكت لمن دمعت ..
ياخ الزول دا تحفة عديل والله
اعتقد والله اعلم ان السيدة المقصودة هي التي في الصورة أدناه
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
العزيز عمر عثمان
نحن اول دفعة يدربها الباتره في كلية الشرطة ..
صنعنا وصنعناه
لم اطلع علي البوست المشار اليه في الفيس بوك .. فان لم يرد به شيء عن دفعتنا .. فساعود اليكم
بذخيرة من ادب التدريب وطرائف ذلك الرجل الخارق .. قد يكون عندكم الاحلي ولكننا نملك الاصل
والطبعة الاولي ..
اعطوني فرصة استجمع بها شتات صحة لا تساعد علي الاسهاب وساعود بما قد يسر ويوثق ..
عمر علي حسن
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عمر علي حسن)
|
Quote: العزيز عمر عثمان
نحن اول دفعة يدربها الباتره في كلية الشرطة ..
صنعنا وصنعناه
لم اطلع علي البوست المشار اليه في الفيس بوك .. فان لم يرد به شيء عن دفعتنا .. فساعود اليكم
بذخيرة من ادب التدريب وطرائف ذلك الرجل الخارق .. قد يكون عندكم الاحلي ولكننا نملك الاصل
والطبعة الاولي ..
اعطوني فرصة استجمع بها شتات صحة لا تساعد علي الاسهاب وساعود بما قد يسر ويوثق ..
عمر علي حسن |
بعد كده ياملكية اذا حضر الماء بطل التيمم ....
وطالما سيادتو عمر على حسن وصل اذن نرفع ليهو تمام البوست ونسلمو قيادة الطابور
تمام سيادتك : بوست الباترا .. التعلمجي الاشهر في تاريخ كلية الشرطة (طرائف وصور)
عدد المشاهدات = 589
عدد المتداخلين = 8
غياب = لايكن
راحة مرضية = لايكن
حجز مستشفي = لايكن
حبس كركون = 2 (ودالصايم ووهبة)
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
| Quote: راحة مرضية = لايكن |
راحه مرضيه = واحد
عمك بعيد عنك شاكي ياولدي .. وكان ذك ينقسم عند الباتره الي نوعين :
1- مرض صبّاحي وهو الذي يبلّغ به قبل الطابور ويرسل المريض به للمستشفي
2- تمُّرض وهو الذي يحدث اثناء اليوم الدراسي او بعد العصر للزوغان من النشاط
الرياضي او طوابير الذنب
وكان الباتره لا يكره شيئا مثل الطالب المتمرّض .....
نواصل بعد تجميع قليل من العافية
عمر علي حسن
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عمر علي حسن)
|
رحم الله استاذنا الباترة وأجزل له الثواب علي ما علمنا ورفع به قدرنا
جاء تاج السر محمد حامد الباترة الي الكلية عام 1957 مترقيا الي رتبة الصول (مساعد) بعد معاينات
وتمحيص دقيق لقوة الشخصية وعدم الهيبه من طالب سيتخرج ضابطا ويتخطاه في الرتبه .. وكان أن
وجه اليه سؤال حاسم في المعاينة يتعلق بفترة سابقه جاء فيها الي الكلية معارا خلال وجود دفعة سبقتنا
بسبعة دفعات .. وكان احد خريجي تلك الدفعة عضوا في لجنة المعاينة .. فسالوه عن اسوأ طالب في
الطابور في تلك الدفعه فنظر الي ذلك الضابط مليا وأشار اليه بيده قائلا : النور افندي حامد .. ده !!
فصفقوا له جميعا واجمعوا علي اختياره
اذن فقد جاء تحوطه جسارة وصراحة وشجاعة ظلت سمة مميزة له
وحدثنا عند دخولنا الكلية اولاد القشلاق واولاد الضباط عباس مدني والسماني حسن سعد وعلي الطاهر
مخير باخباره فنشروا بيننا رهبة وهلعا من شخصيته الطاغية لم تزايلنا حتي بعد ان الفنا والفناه وصرنا
ابناءه واحبته واسرته ..
قال لنا في اول لقاء لنا به : النهاردة حنعلمكم البيادة (الطابور) والسلاح والتكتيك والضبط والربط
والرجاله ........ التعليم ده تلات اتلات يطلعوا رجال والتلت الرابع للمقابر ..
وسنعود بعد استراحة نحتاجها
عمرعلي حسن
| |
|
|
|
|
|
|
|
|
 Re: الباترا .. التعلمجي الاشهر في تاريخ كلية الشرطة (طرائف وصور) (Re: عمر علي حسن)
|
Quote: وكان ذك ينقسم عند الباتره الي نوعين :
1- مرض صبّاحي وهو الذي يبلّغ به قبل الطابور ويرسل المريض به للمستشفي
2- تمُّرض وهو الذي يحدث اثناء اليوم الدراسي او بعد العصر للزوغان من النشاط
الرياضي او طوابير الذنب |
تمام يا سعادتك ..
عمنا / سعادة النقيب حميدان بيقول الطالب الحربى ما بيمرض الطالب الحربى بيموت بــس ( فاهمين يا طلبة )
إبداع ياعمر عثمان ياخ ..
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: بدر الدين اسحاق احمد)
|
السر افندي الباتره
صارم القسمات كما في الصوره .. كث الشارب .. وقد كانت موضة الشوارب في ذلك الزمان
(شنب نص رباط) .. للافنديه والمثقفين .. عيناه كعيني الصقر يخرج منهما الشرر وفمه مزموم
لا تخرج منه البسمة ابدا ولا تخرج منه الضحكة الا سخرية او لسعادة فوق العادة .. مشلخ تي
(علامة رجالة اخري) .. جهير الصوت واضح مخارج الكلمات حتي اذا كان فيها خطأ او
لحن لم يستطع اخفاءه .. وكان وسيما وسامة تنطق برجولة زائده .. ممشوق القامة .. منتصب
الصدر ضامر الحشاء قوي السيقان والاقدام ولخطواته صدي ورجع ... انيق الملبس لاتري
فيه خطأ ولا تتكسر مكوته لا في اول النهار ولا آخر اليوم .. وكان شجاعا لا ترمش عينه
بخوف او خلعه
قال لنا في اول وقوفنا امامه : انا اسمي السر الباتره .. تاج السر اسمي ومحمد ابوي وحامد
جدي .. والباتره لغم (لقب)
واعود بعد استراحة ..
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: أسامه الكرور)
|
Quote: اسلام ياعمر ياخ .. بوست جميل .. وزاده ألقاً وجمالاً حضور سعادة اللواء عمر على حسن
لم نحضر الباترا فى الكليه للأسف .. ولكن ما سمعناه عنه وحكاويه تفوق ما سمعناه
عن كل بوليس الزمن الجميل .. رحمه الله رحمةً واسعه
نسجل حضوراً متواصلاً .. ومتابعين |
هلا سيادتو اسامة .......
عليك الله كشش لينا سيادتو النور يوسف قول ليهو يااااخ طلب خااااص
خليهو يجي يكتب لينا عن عمنا الباترا .... بلاشك لن يعجزه ذلك
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: Elawad)
|
جاء الي الخرطوم من الضهاري .. فلم تغير الخرطوم لغته ولا سجاياة ولا تعامله مع الحياة
والناس .. وظل كما هو حتي وهو يتدرج الي رتب عليا في الشرطه ..
لا يتحدث عن المرأة الا وهو (يقدم المؤاخذة) فيقول لك بتي لامواخذه وعمتي لا مؤاخذة بل ان
المؤاخذة يمكن ان تمتد الي اشياء وكائنات مؤنثة غير البشر ..
قال للطالبة محاسن التازي (وهي صنديدة وفارسة - لا تداري انوثتها) وقد وجدها تقف خارج
الطابور : مالك ؟ فقالت له عندي عذر ! فقال لها العذر ده كل يوم ؟ فردت لا ده عذر تاني !
فقال لها يعني شنو ؟ فقالت له انها حامل (وقد كانت متزوجه وهي طالبه) .. فضحك ملء
شدقيه وصفق بيديه قائلا : هاللااااااااااه االله . دي ماعرفناها مدرسة بوليس والله مدرسة
دايات لامؤاخذه !
وعندما اراد نصح احدنا بعد ان تخرجنا وتزوجنا وكانت زوجته تعاني من مرض شغله .. قال
له البلد دي احسن دكاترة النساء فيها الالماني ولا مؤاخذه داوود اسكندر ... وديها لي وحد فيهم .
ونعود بعد اخذ الحقنه (لا مؤاخذه).............
عمر علي حسن
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: Elawad)
|
شكراً يا جنابو عمر ..
بوست جميل و هو مثل نسمة في هجير هذا البورد ..
تستهويني حكاوي العساكر و خاصة ناس البوليس ..
و على فكرة ماعدا أنا بيتنا كله بوليس ..
و لا شك أن وجود سيادتو / عمر ـ متعه الله بالصحة و العافية ـ أضفى على هذا البوست رونقاً جميلاً ..
و أنتهزها فرصة لأعلن هنا أنني شغوف بمتابعة مداخلات سيادتو ـ على قلتها ـ و أجد فيهاالرزانة و الحكمة و الرصانة و الطرفة ..
فيا سيادنو الله يحفظك و يديك العافية و يديمك من الرائعين المحترمين حقاً في هذا المنبر ..
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: طارق جبريل)
|
| Quote: فقال له «عندي عرق نسا يا سيادتك».. فصفق الباترا يديه وصاح قائلاً «خلاص كملتو مرض الرجال وقبلتو على مرض النسوان». |
اخ عمر
والله ذكرتي طرفة جميلة لمنا كنا في الخدمة الوطنية الفاشر...المعسكر كان حار والتدريب كان شاق جدا...
واحد من الزملاء مشي للرقيب اول في زمن الراحة وقال ليه: سيادتك انا عندي نزيف!!!
الرقيب ولا رد ليهو بكلمة طوالي لبس كابو ومشي الميدان وضرب صفافير الجمعان!!!
اي زول بسأل اخوه الحاصل شنو!!!
ثم بدأ عمك الرقيب اول وقال لينا: والله يا مستجدين جيبتو لينا امراض ما عارفنها بتاعة نسوان ولا رجال!!!
اخوكم دا جاني وقال عنده نزيف...ياخي انا شايل لي شنطة!!!
بعدين الرجال عنده شنو غير البنكرياس عشان ينزف!!!
تحياتي
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: الهادي محمد ابراهيم)
|
سلام يا ععمر
بوست توثيقي جميل
سؤالي هل هو نفس الباترا الذي كان في سجن كوبر ؟
حكى لي صديقي وزميلي في الحزب عبدالوهاب بابكر
ايام الاعتقال في كوبر كان احد العسكريين اسمه الباترا
يامرهم بالخروج صباحا والجلوس اربعات اربعات !
بعد فترة تم اطلاق سراح معظم المعتقلين
وتبقى في القسم ثلاثة معتقلين
فجاءهم الباترا مبكرا ونظر اليهم ثم قال
اقعدو اربعات !
له الرحمة والمغفرة
وقد كان معظم رجال الشرطة والسجانيين
يحترمون المعتقلين الشيوعيين جدا
ويثقون فيهم ثقة مطلقة
حتى ان احدهم قال بعد اطلاق سراح جميع الشيوعيين :
ان السجن بدون الشيوعيين غير محتمل ولا حياة فيه
وبالمناسبة كانت ادارة السجن في سجن شالا
تسمح للدكتور الشفيع خضر للذهاب الى المركز الصحي
ويمارس دكتور الشفيع مهنته في علاج المرضى من الصباح حتى نهاية اليوم
لله لله دون اجر ولا ينتظر شكر من احد
غير المحبة لهذا الشعب الجميل
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: heba Elmahi)
|
(إذا ظلمتم) بين الناس فاعدلوا!!
الباترا
ياعمر اضحكتني وابكيتني
ياخي ديل ناس مابتكرروا
وكمان جاء العم عمر الجميل صاحب الدم الازرق يالها من طله
عشان المسالة ماتكون كسير تلج وكده انا خالي هو الردار لغمو كده سعادة مدير البوليس الخال علي صديق
وقبل وفاته نشرت له مقال يتكلم فيه عن الفرق بين كلمتي شرطة وبوليس اها الناس عينة الباترا ديل بوليس ولمن تقول بوليس خشمك بتملي بالهيبة والخشية والتواضع والرجالة وصحبة الرفاق عليك الله شوف المقولة الفوق دي ملانة حكمة كيف !
نقول الكوميديا مربوطة بالعقل والتراجيديا بالعاطفة فاي كلمة في الكوميديا تحيلك الى عقلك راجع كل نكات الباترا لن تجد سوى انسان ساخر ولازع العبارة يعرف ويخبر الكون وما حوى بتجربة صادقة ومستنيرة
يعرف فنون الحياة ويختصر الطريق الى قلبك من ناحية عقلك بسخرية مريرة وتعجبني لازمة التصفيق عنده عندما يصفق يرمي بالأفيه ـ القفشة ـ وقتها بتكون مبهوط لكن بعد ان تستوعب الحدث تضحك حتى تسيل دموعك
تسلم يا جنابو وده بوست فيهو عمرين فكيف نمل اسعدكما الرحمن ومتعكما بالعافية والصحة ومحبتي ابدية
التقاليد التي وضعها الرواد في كليات البوليس كتبت بمداد من ذهب
لكل روادنا التقدير والاحترام وتعظيم سلام
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: محمد سنى دفع الله)
|
Quote: ياعمر اضحكتني وابكيتني
ياخي ديل ناس مابتكرروا
وكمان جاء العم عمر الجميل صاحب الدم الازرق يالها من طله
عشان المسالة ماتكون كسير تلج وكده انا خالي هو الردار لغمو كده سعادة مدير البوليس الخال علي صديق
وقبل وفاته نشرت له مقال يتكلم فيه عن الفرق بين كلمتي شرطة وبوليس اها الناس عينة الباترا ديل بوليس ولمن تقول بوليس خشمك بتملي بالهيبة والخشية والتواضع والرجالة وصحبة الرفاق عليك الله شوف المقولة الفوق دي ملانة حكمة كيف !
نقول الكوميديا مربوطة بالعقل والتراجيديا بالعاطفة فاي كلمة في الكوميديا تحيلك الى عقلك راجع كل نكات الباترا لن تجد سوى انسان ساخر ولازع العبارة يعرف ويخبر الكون وما حوى بتجربة صادقة ومستنيرة
يعرف فنون الحياة ويختصر الطريق الى قلبك من ناحية عقلك بسخرية مريرة وتعجبني لازمة التصفيق عنده عندما يصفق يرمي بالأفيه ـ القفشة ـ وقتها بتكون مبهوط لكن بعد ان تستوعب الحدث تضحك حتى تسيل دموعك
تسلم يا جنابو وده بوست فيهو عمرين فكيف نمل اسعدكما الرحمن ومتعكما بالعافية والصحة ومحبتي ابدية
التقاليد التي وضعها الرواد في كليات البوليس كتبت بمداد من ذهب
لكل روادنا التقدير والاحترام وتعظيم سلام |
استاذنا محمد السني لم تترك لنا مايقال فقط اقول يعجبني جداً نظرتك العميقة لمثل هذه الحكايات
ونفاذك لجوهر الشخوص لا ظاهراها ياااخ ربنا يحفظك ذخراً لهذا الوطن ......
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: مدثر صديق)
|
عمر وضيوفه سلام ومحبة , كانت الدفعة 46 آخر دفعة تخرجت من كلية الشرطة على أيدى
الراحل المقيم العم تاج السر الباترا , وكانت دفعتنا الدفعة 47 آخر دفعة تتلمذت
على أياديه , حيث اشتد به المرض عقب تخرج الدفعة 46 وبما انه كان يعمل بالمشاهرة
رأت رئاسة الشرطة أن يتوقف عن العمل لظروفه الصحية وتقدمه فى السن , وعندما علمنا
بذلك ونحن طلبة فى الكلية كنا نأمل أن نتخرج على أياديه الكريمة أصابنا حزن عميق
وأصبحنا كاليتامى خصوصا وان هناك شلال كاسح من العطاء المميز قد توقف ورغم قسوة العم
الباترا فى التدريب الا أنه كان بمثابة الأب وكنا نسمع منه كلمة يا ###### عندما يخطئ الواحد
منا ولكننا مطلقا لا نتضجر ونتفهم ثورته العارمة عند الخطأخصوصا وان الرجل وكما علمنا من
سيرته العطرة الحافلة بالعطاء المتقن أنه لا يقبل الخطأ ولا يجامل مقترفه , كان اول من يحضر
للكلية من المعلمين وآخر من يغادرها.
من طرف عمنا الباترا , كان أحد أبناء فصيلتنا يقود الفصلية الى أرض التمام فى الميدان الأحمر
وكان يسمى بالميدان الأحمر نسبة للتراب الحمراء التى كانت تكسو أرضيته , فعندما وصلت فصيلتنا
لمكانها المخصص أعطى زميلنا الادروبى النداء قائلا طابور قف ولم ينطق كلمة قف كما هو متعارف عليه
وتصبح كلمة قف كب او أى نطق من هذا القبيل , صاح أحد المعلمين فى زميلنا قائلا يا طالب قف دى شنو كمان
واردفها انت قاصد قف زى المكتوبة فى اليافطة بتاعت بوليس الحركة رد عليه زميلنا قائلا نعم يا فندم
انا قاصد قف زى المكتوبة فى اليافطة وبدأت الشمطة بين زميلنا والتعلمجى , حاولنا نحن كجلابة مستجدين
احتواء الموقف لأننا ندرك ما سيؤول اليه الحال , الا ان ادروب أصر على المغالطة , حينها حضر عمنا الباترا
وسأل التعلمجى فى أيه , اخبره التعلمجى بأن هذا الطالب يقول أن كلمة قب البنستعملها كنداء لايقاف الطابور
هى زى كلمة قف المكتوبة على اليافطة بتاعت بوليس الحركة , نظر عمنا الباترا الى ادروب نظرة فهمنا معناها
وسأله صحيح انت قلت الكلام ده للتعلمجى بتاعك رد أدرب نعم سيادتك حينها صرخ عمنا الباترا صرخة مدوية قائلا
انت أيش عرفك يا ###### , وتم درش ادروب درشة لن ينساها .
ترحيب كبير بسعادة اللواء عمر على حسن ربنا يمتعك بالصحة والعافية ويديمك تاج على رؤوسنا .
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: فيصل عثمان الحسن)
|
نعود بالشكر لكل من دعوا لنا بالصحة والعافية .. هذا والله دعاء نحتاجه ونستحقه
جاء الباتره الي الكلية اميا لا يقرأ ولا يكتب .. ولكن كانت لديه ثروة من المعلومات التي التقطها
من مشرب واحد هو مشرب الجندية .. وظلت هذه المعلومات تتقافز الي لسانه فتحدث المفارقات
من نطق خاطئ او استخدام غريب لمفرداتها .. ومن هنا جاءت طرافة المواقف والعبارات التي
تصدر عنه .. وعادة ما ارتبط عطاؤه التدريبي بالشهامة والبسالة والرجاله ويصر علي ان (الجاء
هنا ما بمرقنوا كرعيه !!!) و (تضرب ترمي .. تجلّي تقع!!)
جاء في احدي الامسيات ووجدنا متجمعين نناقش امرا .. فتحول الحديث بعد حضوره الي اللغة
الانجليزية .. فاستاء جدا .. وخرج حزينا ومكتئبا .. وعاد مساء اليوم التالي وفي يده كتاب (مفتاح
المعرفه) وهو الكتاب الاول لمحو الامية .. ومعه كراس وقلم رصاص وجريده .. ووجدنا انا
وحسين خير الله وطارق امير في البرنده الامامية للميز .. وهو يعلم ان حسين وطارق كانا
معلمين بالمدارس الوسطي فوجه الحديث اليهما .. فقال تعلمجي يعني شنو ؟ فقيل له يعني
معلم .. فقال مش عيب يعلمكم جاهل ؟ .. من الليله طارق يعلمني القراية وحسين يعلمني
الكتابه وانت يالرقيق تعلمني السجار ونشوف الانجليزي بتاعكم ده بعد كدي بنعرفه والله لا !!!!
وفعلا تعلم الكتابه والقراءه علي يدي طارق وحسين وفشلت في تعليمه السجائر فطلب ان
اعلمه الباسكت (بور) ....
ولنا عوده
عمر علي حسن
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عمر علي حسن)
|
وجدته جالسا في حوش الميز عند وصولي للكليه لاول مرة وكنت احمل شنطة حديد بها ملابسي
ومرتبه (مربّطه) بالحبال والبس بنطلون (كوردروي) بني وقميص وراسي ملئ بعجاج قطر كريمة
الذي جئت به من عطبرة .. فاستوقفني وسألني ماشي وين فقلت له انني قبلت هنا .. فقال ساخرا :
وجاييني شايل شنطة حديد ومرتبه .. انت قايل نفسك قبلوك في مدرسة (الدريسه) .. وهي فرقة من
عمال السكة الحديد .... وزجرني علي بنطلون (الشيوعيين) الذي البسه .. ثم عاد وقال من
(الانف صاعبا) نحن البنلبس .. امشي المخزن سلم الحاجات دي وما تسأل منها تاني .. وفعلا ذهبت
الي المحزن واستقبلني العم عيسي وافرغ محتويات الشنطه في مشمع ثم اضاف اليها صرفية الملابس
والمهمات العسكريه وحدد لي موقعي في العنبر ودولاب ملابسي.. وكان حضورا زميلنا الطالب محمد
عثمان هلال وهو من اولاد العاصمه فقال ساخرا : شنطه حديد وبنطلون كوردروي انتا ماشي وين يابا ...
وحفظها لي السر افندي عامين كاملين وهتف بي هاشا يوم التخريج وانا البس بدلة السهرة الانيقه فلما
رآني صاح مستبشرا الشافك يوم جيت الكليه بي شنطة الحديد وبنطلون الشيوعيه ما يشوف الباشا القدامي
ده .. صحيح يخلق الله ما يشاء (ويحتار) .. بالحاء..
نعود ان شاء الله
عمر علي حسن
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عمر علي حسن)
|
كان السر افندي تقليديا فيبدأ الدرس الجديد بقوله : النهارده نعلمكم كذا .. ثم يشرح الدرس ويختتم الشرح
قائلا (بص شوف البيان بالعمل) .. وبعد التطبيق يخرج احد الطلبه ليعيد الدرس للاخرين .. وكان أن اخرج
الطالب كمال حسن احمد في احدي المرات فشرح الدرس ومضي ينفذ الحركات فاوقفه قائلا .. علمتك كده ؟
لازم تقول النهارده نعلمكم كذا .. وتقول بص شوف البيان بالعمل .. فرد عليه كمال ضاحكا : بالله يالسر افندي
خلينا من الشكليات دي !! فغضب السر افندي وصرخ قائلا : شكليات ؟؟؟ انا بتاع شكليات .. يا ما متعلم!!
قايله دا انجليزي ييس ونو !! وعلقه في العقله بقية الحصة ..
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عمر علي حسن)
|
Quote: عندما يقود التعلمجي طابور أي فصيلة أو سرية فانه يردد «شمال يمين شمال» لضبط ايقاع السير وبكثرة التكرار تتحول الى «ما..مي..ما» أو «مع.. ميع..مع» وبعضهم يقول «هل-هل-هل» والبعض لأنه ربما يقول «هع-هع- هع وهكذا وإذا ما رأى ضابطاً فإنه يصدر أمره للطابور «لليمين أنظر» أو «للشمال أنظر» حسب موقع الضابط بينما يقوم هو بأداء التحية العسكرية، وذات يوم كان أحد التعلمجية يقود فصيلته عائداً من طابور سير خارج الكلية «الباترا» ضابط الميدان واقفاً على الجروف في تلك العصرية، وهو يعدل من سرواله ويربط في تكته
والتعلمجي يردد «مع.. ميع..مع» ولما لمح الباترا هتف «لليمييين ..انظر» فأشاح الباترا بوجهه ولوح بيده وصاح فيه «لا يا غبييي»!!. |
هههههههههههههههههههههههههههههههههههههه والله يا عمر اتخيلت المنظر وضحكت كما لم اضحك من قبل، رحمة الله عليه، بوست ممتع
------------------
تحية لجميع المشاركين وسلامات يا فيصل مشتاقين ياخ وين الحي بيك!
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: فيصل عثمان الحسن)
|
بوست عمرابي بوليسي..فماذا نتوقع منه ان يكون؟؟
غير..
مدهش ..دسم ..شيق وجميل..
شكرا يا عمر يا بوليس يا جميل ..ولكل بوليس الزمن الجميل.
إقتراح......
لماذا لا تخلد كلية الشرطة اسماء قممها السوامق امثال الباترا ؟؟؟
بأن تطلق اسمه على ميدان ,قاعة,بوابة رئيسية,شارع داخلي,ساحة او اي مرفق ..مع وضع صورته ومختصر سنوات خدمته بالكلية..
هذا لعمري لن يكلف شئ ولكنه سيترك اثرا عميقا بالوفاء لاهل الوفاء او الوفاء لاهل العطاء..
هل من مثني لهذا الاقتراح؟
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: mohmed khalail)
|
Quote: بأن تطلق اسمه على ميدان ,قاعة,بوابة رئيسية,شارع داخلي,ساحة او اي مرفق ..مع وضع صورته
ومختصر سنوات خدمته بالكلية..
|
اقتراح مبهر
احسنت .. واثني ..
والي متي نخجل من اظهار ابداعات وانجازات رجالاتنا الافذاذ الذين تركوا اثرا لا في الشرطة وحدها وانما في أمن
الوطن .. ليتهم يسمون باسمائهم القاعات والميادين والمختبرات والمستشفيات وغيرها من الاماكن الخاصة بالشرطة
كاقل تقدير لهم .
عمر علي حسن
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عمر علي حسن)
|
Quote:
وطالما سيادتو عمر على حسن وصل اذن نرفع ليهو تمام البوست ونسلمو قيادة الطابور
تمام سيادتك : بوست الباترا .. التعلمجي الاشهر في تاريخ كلية الشرطة (طرائف وصور)
عدد المشاهدات = 589
عدد المتداخلين = 8
غياب = لايكن
راحة مرضية = لايكن
حجز مستشفي = لايكن
حبس كركون = 2 (ودالصايم ووهبة) |
يا سسسسلام يا جنابو ياخ
يومي ممتعنا بدهشة عسكرية وكوبلي (غير) علي قولة اهل الخليج
والضابط الاقدم والاكبر عندما يحل بنقطة بها قوي عسكرية يتم رفع التمام له
والعسكرية ممتعة ياااخ وخاصة عندما يتم تدويرها علي حسب اصولها وفصولها وضبطه وربطها
والبوست ده خبرو جاني امس في جلسة تمت الاشارة فيها الي البوستات القليلة (الكاربة والممتعة) في سودانيز هذه الايام
لذا اتيت اليه اليوم باااااااكرا لكي متع نفسي بسيرة التعلمجي (الباترا) ...
وزاد المتعة دهشة هو حضور الاخوة الضباط بقيادة رئيسنا الهلالي العريق جنابو عمر
وواصلو ياااخ
وانا لكم من المتابعين والمتاوقين
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عبدالحفيظ حسن)
|
| Quote: وكما نقل الرواة .. فإنَّ الباترا ظلَّ يضرب كفاً بكف ويحادث نفسه .. علامات الساعة ظهرت.. جنس النساء ظهر في كلية البوليس .. البنات يبقوا «ظباط» القيامة قربت .. وسعادتو وين؟! سعادتو في الكوافير ..وسعادتو راح وين ؟.. مشى الحنانة !! سعادتو في إجازة ..؟! أبداً سعادتو في الوضوع !! .. ويقهقه الباترا وهو يُردِّد.. يتربى في عزك يا سعادتو !! |
بالجد دي مباااااالغة والله ضحكت لمن بكيت
بالجد بوست روعة زي صاحبه
ارشحه بوست الربع
تسلم يا جنابو
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: ساميه حامد)
|
سعيد جداً بهذا الاحتفاء الباذخ بالتعلمجي الاشهر في تاريخ كلية الشرطة عمنا الباترا ، حيث وضحت ملامح هذا الاحتفاء من مداخلاتكم ياصحاب ومن كم المشاهدات ورسائل الايميل والاتصالات الهاتفية التى وردتني .... فعمنا الباترا بقدر مايضحكنا بتعابيره الخاصة وسرعة بديهته بقدر ما نزداد إحتراماً لهذه القامة ولكل تلكم الاجيال التى اعطت وما استبقت شيئاً
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عبدالحفيظ حسن)
|
Quote: صورة الملازم أول على اليمين هى بالتأكيد للمرحوم فضل الله العبيد...
أما النقيب فهو على الأرجح النقيب محمد عثمان الأمين..وجارى التأكد!
هذه الصورة لاشك فى أنها التقطت حينما كنا فى كليةالبوليس(وليس الشرطة)
مابين عامى 1974 - 1976! |
سيادتو عبدالحفيظ تحياتي
الف شكر على تأكيد معلومة اسم المرحوم فضل عبيد
وطالما انك من شهود تلك الفترة فما تبخل علينا بما تجود به الذاكراة ...
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عبدالكريم الامين احمد)
|
| Quote: حبس كركون = 2 (ودالصايم ووهبة) |
لا ادري يا عمر عثمان ان كان ود الصائم ووهبه ما يزالان في الحبس ام تمت مجازاتهما ..
ولكن وضعهما يذكرني بان الباتره كان رجلا ابيض الضمير ولا يحمل ضغينة لاحد ولكنه
كان تربويا من الطراز الازل .. لا يتشدد فيما لا يجب التشدد فيه ولا يتسامح فيما لايجب
التسامح فيه .. ولعل حبسة الطالب حسين خير الله تفوق حبسة ود الصائم ووهبه .. بل انها
كانت الحبسة الاشهر في تاريخ دفعتنا بعد حبسة الطالب ابو الغيث البكري ابوحراز الذي
هرب لحضور حفلة زواج ولم يعد الي اليوم التالي
كان حسين خير الله طالبا نبطشيا وكنا مصطفين لتمام الساعة التاسعة والنصف عندما ظهر
السر افندي في البوابه فتم تنبيه حسين لذلك .. وكان سبعه من الطلبه قد شردوا الي سينما
بانت .. فما كان من حسين الا ان صاح انتباه .. نمره كامله من اليمين عد .. واحد .. نين ..
تلاته ..... انصراف ..... وانصرف الطابور قبل ان يلحق الباتره وينطق (كما كنت) ..
فقال لحسين كيف تصرف الطابور وانا جاي .. فقال له ما شفتك .. لا شفتني وصرفت
الطابور بالعانيه .. ما شفتك جنابك .. لا شفتني وحاوديك المكتب .. خلاص وديني لي الله !!
صمت الباتره وخرج مباشرة .. وجلسنا نحسب المصيبه التي اوقع فيها حسين نفسه
خاصة وأن ضابط الاداره (الملازم اول عوض زودي) مسيحي وسيضطر لتحويل المكتب الي
القومندان (العقيد عبد النور خليل منصور) وهو مسيحي ايضا .. يعني حسين مرفوت مرفوت ..
كان حسين اعز اصدقائي وكان الباتره يحبه جدا .. فقررت ابتداء ان اشهد معه وانفي انه
قال شيئا .. وكذلك قررت ان اتوسط له عند الصول فذهبت قبل الطابور الي مكتبه بالكليه
فحبسني لاني حضرت بدون الطابور .. وعندما وصل الطابور اخرج حسين كمحبوس
وطالب اخر كحرس فرفعت يدي طالبا ان اكون شاهد دفاع .. فاوقفني تاليا للحرس وقاد
الطابور لمكتب الضابط .. ويبدو ان الباتره وقتها ادرك خطورة هذ الاتهام امام الضابط
المسيحي .. فسرد القصه وقال في ختامها ان حسين قال له وديني السماء .. ومع ذلك
انتفض الضابط وهاج وقرر تحويل المكتب الي القومندان ..
عندما خرجنا وفي فترة الاستئذان لادخال المكتب طلب مني حسين ان اكسب الصول
لان المسأله بعد كده ما مضمونه بالنسبه له .. وعندما وزنتها وجدت ان السماء مش
بطال !!
فوجئنا عند ادخالنا لمكتب القومندان انه في مهمة وان الحكمدار(المقدم صيق ابراهيم مخير)
ينوب عنه .. فقدم الباتره المكتب .. ولما جاءني الدور قلت ان حسين قال للصول وديني
السماء (فتعفرت) الحكمدار ووبخ السر افندي قائلا :: انت يالسر افندي ما بتعرف تنظم
المكاتب ؟كيف توقف شاهد اتهام محل شهود الدفاع ؟ فرد عليه السر افندي بكل حزم :
جنابك انا وقفت المكتب زي ما الله خلقه ، لكن جنابك الطالب ده عنده (ذبذبه) في اقواله ..
جوزي حسين بسبعة ايام طابور ذنب .. وحكم عليّ باربعة عشر يوم طابور ذنب !!
وسنواصل
عمر علي حسن
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عبدالكريم الامين احمد)
|
Quote: يا سسسسلام يا جنابو ياخ
يومي ممتعنا بدهشة عسكرية وكوبلي (غير) علي قولة اهل الخليج
والضابط الاقدم والاكبر عندما يحل بنقطة بها قوي عسكرية يتم رفع التمام له
والعسكرية ممتعة ياااخ وخاصة عندما يتم تدويرها علي حسب اصولها وفصولها وضبطه وربطها
والبوست ده خبرو جاني امس في جلسة تمت الاشارة فيها الي البوستات القليلة (الكاربة والممتعة) في سودانيز هذه الايام
لذا اتيت اليه اليوم باااااااكرا لكي متع نفسي بسيرة التعلمجي (الباترا) ...
وزاد المتعة دهشة هو حضور الاخوة الضباط بقيادة رئيسنا الهلالي العريق جنابو عمر
وواصلو ياااخ
وانا لكم من المتابعين والمتاوقين |
كيكي ياهندسة تحياتي ............
العسكرية جرت في عروقنا مجري الدم لذا لم ولن ننساها ابداً ...
نهلناها من منابعها صافية مورثة جيل بعد جيل واااضحة يا ابيض يا اسود
يعني بالعربي (بلادغمسة)
اسه شايف مرات بقت تجيب ليها (دخنة) و (ورجغة) زي مابتقول
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: mohmed khalail)
|
Quote: إقتراح......
لماذا لا تخلد كلية الشرطة اسماء قممها السوامق امثال الباترا ؟؟؟
بأن تطلق اسمه على ميدان ,قاعة,بوابة رئيسية,شارع داخلي,ساحة او اي مرفق ..مع وضع صورته ومختصر سنوات خدمته بالكلية..
هذا لعمري لن يكلف شئ ولكنه سيترك اثرا عميقا بالوفاء لاهل الوفاء او الوفاء لاهل العطاء..
هل من مثني لهذا الاقتراح؟ |
هلا يامحمد خليل ...........
اعتقد ان ميدان التدريب في الكلية اطلق عليه اسم الباترا ... ما متاكد من المعلومة
لكن في كل الاحوال اقتراحك ممتاز وهولاء الرجال يستحقون ان يكرموا وتخلد سيرتهم
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عمر علي حسن)
|
Quote: الطالب كمال حسن احمد في احدي المرات فشرح الدرس ومضي ينفذ الحركات فاوقفه قائلا .. علمتك كده ؟
لازم تقول النهارده نعلمكم كذا .. وتقول بص شوف البيان بالعمل .. فرد عليه كمال ضاحكا : بالله يالسر افندي
خلينا من الشكليات دي !! فغضب السر افندي وصرخ قائلا : شكليات ؟؟؟ انا بتاع شكليات .. يا ما متعلم!!
قايله دا انجليزي ييس ونو !! وعلقه في العقله بقية الحصة .. |
كمال حسن احمد ... قريبي وخالي المرحوم البروفسير (محمد احمد صديق) متزوج من شقيقته الفاضلة (مريم)
وصل الى رتبة اللواء وكان نائباً لمدير جهاز الأمن على ايام نميري
كما عينه نميري وزيراً للداخلية لفترة قصيرة جداً وهو ابن عم الانقلابي والسياسي الشهير (خالد الكد)
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: عمر علي حسن)
|
الاخوان الاعزاء أفيدكم أننى كنت على إتصال بسعادة الفريق شرطة دكتور عباس أبوشامة وزير الداخلية الاسبق ومتواجد الان بالرياض جامعة نايف العربية للعلوم الامنية مساعد المدير ,
عكست له بوست الباترا وقد أعجبه الموضوع وطلب منى أن أبلغ تحياتى لكل الزملاء المتواجدين والمشاركين فى بوست الباترا والضابط المناوب سودانيز أون لاين .
وقد أوصى سيادته بضرورة التوثيق لكل قامات الشرطة والتواصل وتبادل المعلومات والاخبار وكذلك الاتصال بقادة الشرطة الذين عرفوا بالكتابة عن تأريخ الشرطة منهم بالسودان اللواء شرطة معاش أحمد المرتضى البكرى أبوحراز وبالامارات الدكتور محمد الامين البشرى وأحييهم من هذا المنبر جميعاً .
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: فيصل عثمان الحسن)
|
Quote: عمر وضيوفه سلام ومحبة , كانت الدفعة 46 آخر دفعة تخرجت من كلية الشرطة على أيدى
الراحل المقيم العم تاج السر الباترا , وكانت دفعتنا الدفعة 47 آخر دفعة تتلمذت
على أياديه , حيث اشتد به المرض عقب تخرج الدفعة 46 وبما انه كان يعمل بالمشاهرة
رأت رئاسة الشرطة أن يتوقف عن العمل لظروفه الصحية وتقدمه فى السن , وعندما علمنا
بذلك ونحن طلبة فى الكلية كنا نأمل أن نتخرج على أياديه الكريمة أصابنا حزن عميق
وأصبحنا كاليتامى |
سيادتو فيصل حبابك ......
اقدر واحس بذلك الشعور لو لاحظت سيادتك انو التعلمجية
كانوا يمكثون معنا في الكلية اكثر مما يمكثونه في بيوتهم ومع
اولادهم ..... نستيقظ في الصباح الباكر جداً فنجدهم قد وصلوا
الكلية لا يغادرونها الا بعد إنتهاء النشاط المسائي .. لهم التحية والتجلة
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: فارس موسى)
|
Quote: كان الباترا مارا بزنك الخضار الشهير فى وسط الخرتوم عصرئذ وشاهد شكله بين إتنين من الشماسه او باعة
الأكياس وأخدم الإتنين لمكتب بلاغات القسم الشمالى (المديريه) وحكى للجاويش المناوب شغب الصبيه فأمر الجاويش كاتب البلاغات
بفتح 127 (مادة الشغب المشهوره) ولم يرض العدد عمنا الباترا وهو إلمامه بالقانون كان ضعيف جدا فأنتهر الجاويش قائلا
افتحلو 400 ولا 500 ايه 127 دى ولم يكن قانون العقوبات وقتها يصل ال500 ماده..فتأمل!!! |
هههههههههههههههههههههههههه ...........
فتأمل ياسيادتو فارس والا انا متخيل ليك منظر الشاويش النبطشي يااااخ ده ممكن يكون بضحك لي يوم الليلة .....
| Quote: على جنبه كده مغرود فى تلفونات عاصم أبوه ومعتز حيدر ..نشوفك لسه كمندان 56 ولا فكت؟ |
حاضر سيادتك وكان ما عندهم ارقام نصرف ليهم ارقام ونبلغك بيها ....
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: الهادي محمد ابراهيم)
|
Quote: اخ عمر
والله ذكرتي طرفة جميلة لمنا كنا في الخدمة الوطنية الفاشر...المعسكر كان حار والتدريب كان شاق جدا...
واحد من الزملاء مشي للرقيب اول في زمن الراحة وقال ليه: سيادتك انا عندي نزيف!!!
الرقيب ولا رد ليهو بكلمة طوالي لبس كابو ومشي الميدان وضرب صفافير الجمعان!!!
اي زول بسأل اخوه الحاصل شنو!!!
ثم بدأ عمك الرقيب اول وقال لينا: والله يا مستجدين جيبتو لينا امراض ما عارفنها بتاعة نسوان ولا رجال!!!
اخوكم دا جاني وقال عنده نزيف...ياخي انا شايل لي شنطة!!!
بعدين الرجال عنده شنو غير البنكرياس عشان ينزف!!!
|
ههههههههههههههههههههههههههه ..........
الله يبارك فيك يالهادي بالجد ضحكتني
يااااخ التعلميجة ديل عالم جمييييل ...
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: طارق جبريل)
|
Quote: عندي قريبي كدة كان في الكلية الحربية والزمن داك كان ماسكها ابو كدوك
اها لقى قريبي دة بيضحك في الطابور
قام ساقوا ومعاهو اتنين عساكر قعدو في نص الكوشة وقال ليه تم لعبك هنا
وخلى معاهو العساكر من الصباح للمغرب وهو يلعب بي كيزان الصلصة |
هههههههههههه ..........
يااطارق قريبك ده شوية كده كان ممكن يلقط ورق عاااادي ......
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: Adil Hamza)
|
Quote: سلام يا عمر و سلام لضيوفك
بوست جميل .. لم اضحك منذ فترة كما ضحكت اليوم
سمعنا كثيرا عن الباترا و عن تعليقاته المضحكة التى دائما
ما تذكرنى بعمنا محمد سلمى عطرون ربنا يرحمو
|
وووين يادفعة والله مشتاقين ......
كما تعلم لم نلتقي بعمنا الباترا ولم نال شرف التعلم على يديه ..
لكن بلاشك كنا محظوظين بحضور عهد عمنا (محمد سلمي عطرون)
وهو كما اسماه الاخ والصديق والدفعة العقيد علاءالدين محمد الحسن سماه
(محمد سلمي عطرون تعلمجي خمسة نجوم) وهذا ان شاء الله عنوان البوست القادم
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
سلام جنابو ...
بوست محتاج الواحد يمر عليهو برواقة .... لكن قبل كده، عندي إفادة عايز أقولها:
أوّلاً، درست في مدرسة بري المحس الأوّلية، ومنزل عمك الباترا جار لهذه المدرسة .. ودرس معنا أبناؤه.
أما بيتنا، فيقع في بداية شارع النص. يعني يمكن أن تتخيل، كلية البوليس بعد النيل طوالي، وبيتنا في نهاية بري المحس، بعده الفسحة ثم إمتداد ناصر. رغم المسافة بين البيت والكليه، إلاّ أننا وبشكل يومي كنا نسمع (الندا) وتمام الصباح بصوت عمك الباترا الجهوري، خاصةً أيام الصيف وهدوء الصباح قبل أن يبدأ إزعاج ماكينات محطة توليد الكهرباء.
أديت عمّك الباترا حقو ...... ما تشوف لينا عمّك (دقنّا).
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
سعدت ايما سعادة بهذا التطواف
وقد كنت من قبل استمتع براوي عظيم من رواة وموثقي تاريخ الشرطة
عمنا وابونا اللواء م .احمد المرتضى البكري ابوحراز
فمنذ 12/2008 م وكل ثلاثاء من السابعه الى التاسعه مساء وحتى الان
سعدت بعملي مخرجا لبرنامج رائع اسمه (من ذاكرة الشرطة ) على اثير ساهرون اذاعة الشرطة السودانية
حيث جمعني البرنامج مع الرجل القامة اللواء م . ابوحراز والبروف عبد المحسن بدوي
وقد كانت للباترا حلقات ممتعه ورائعة جداً
وقد بدأنا انشاء موقع خاص بارشيف الشرطة وخاص بالبرنامج جمعنا فيه الاف الصور والوثائق
ووضعنا فيه كل حلقات البرنامج وافردنا حيز تفاعلي فيه للاضافة في الطرائف والتوثيق
ولكننا لم نستطيع ان نجعل الموقع على الشبكة لظروف
ونتمنى ان يرى النور
حقيقة مستمتع بهذا السرد الرائع من العمرين
تعظيم سلام
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
وودت فى هذا البوست ورغم أنه وبتوجيهات سعادة اللواء شرطة معاش عمر على حسن والتنسيق مع الزميل عمر عثمان تم قفله وفتح بوست محمد سلمى عطرون تعلمجى خمسة نجوم ، ولكن فرحاً بعضويتى اليوم بسودانيز أون لاين ودخولى المباشر رأيت أن أسجل حضورى وأعلن سرورى أننى كنت من المتابعين والمشاركين فى هذا البوست والذى كانت (بوست خارق للعادة ) من حيث المادة والموضوع والذكريات والتجدد اليومى والتنوّع .
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
ومساهمة اخري من الصديق طارق عمر
في واحدة من حصص(الطُلبة) وهي فترات نظافة الكلية جاء الرائد محمد حامد الباترا(عليه رحمة الله) ليقوم بتقسيم الدفعة إلى مجموعات تتولى كل منها نظافة جزء من الكلية، وطفق ينادي(ناس الشمالية بي هنا. وناس الشرق بي هنا... وناس الجنوب بي هنا.. وناس الجزيرة بي هنا.. وهكذا) وأخيراً تبقت لديه مجموعة من الطلاب فتوجه إليهم بسؤاله(وإنتوا الباقين ديل ناس وين) فردوا عليه (نحن ناس الخرطوم ياسيادتك) فقال لهم (أيوااا .. إنتو ناس أشرِّط وشك بالمنديل)!.
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
مساهمة من الاخ والصديق المقدم شرطة الصادق بنتا :
كانت كلية الشرطة السودانية تقوم بتدريب طلبة الشرطة من بعض دول الخليج حتى اواخر ايام جعفر نميري وحدث في احدي المرات ان كان هناك وفد زائر للكلية وتم تقسيم الطلبة لمجموعات كل مجموعة تقوم بعرض معين في السلاح او البيادة او الفروسية ووقع الاختيار على مجموعة من الطلبة الخليجيين لتقديم عروض الفروسية ، عمنا الباترا قرر الوقوف بنفسه على إستعداد (الطلبة العرب) كما كان يسميهم ، وعندما وصل الى اسطبلات الخيول وجد الخيول متمردة عليهم واغلبهم قصار القامة وفي حالة خوف وارتباك ولايستطيعون السيطرة على الخيول فما كان منه الا ان صفق بيديه صفته الشهيرة صائحاً باعلي صوته (الطلبة العرب والله عنتر ليهو حق يعمل عليكم عنتر)
في احدي المرات وقف عمنا الباترا امام الطابور وصاح منادياً (الطلبة العرب) خطوة للامام وهو يقصد (الخليجين) وكان هناك اثنان من الطلبة من (ابناء الجزيرة) قررا الخروج خطوة للامام مع (الطلبة العرب) لمشاغلة العم الباترا فما كان من الباترا عندما شاهدهما الا ان صاح قائلاًأنا قاصد (الطلبة العرب) بتاعين (البترول) مش (الطلبة العرب) بتاعين (الزراعة)
| |
|
|
|
|
|
|
|
|
|
Re: الباترا .. التعلمجي الاشهر في تاريخ كلية الشرطة (طرائف وصور) (Re: omer osman)
|
كان للكلية القديمة التي درسنا بها قبل الانتقال الي بري سور يطل علي كوبري امدرمان ومقرن النيلين
في منظر من اجمل مناظر الدنيا قاطبه .. وكان هذا السور الجنوبي من السلك الشائك و(الدرابزين) وهو
عبارة عن حديد متفرق بمسافات متساوية تجعل الرؤيا من خلاله واضحة تماما .. وكان الطريق بجانب
السور يؤدي الي ضريح الشيخ بر ابو البتول وله زيارة للنساء عصر ايام الاثنين والجمعه ..
وكنا مانزال مستجدين في ال confinement وقررنا في عصر يوم الجمعه الاستمتاع بمنظر البنات
العابرات لزيارة الشيخ بر .. فاحضرنا بعض السرائر وجلسنا في تجمع صاخب امام السور في ظل
العصاري ونسمات النيل ..
جاء السر افندي الينا وهو هائج .. انتو طرش (صمٌ بُكتُم) ... انا لي ساعه .. صفارة تضرب تيييييييييت
زول يجمع مافي .. اتاريكم قاعدين لي في (الهوي العذري) ده وما جايبين خبر .............
وسنعود
عمر علي حسن [/B
| |
|
|
|
|
|
|
| |
omer osman
محمد حامد جمعه
نيازي عبدالله مرحوم احمد
محمد عبد الماجد الصايم
مجدي عبدالله أبوحريبة
عبدالوهاب علي الحاج
حافظ انقابو
بدر الدين اسحاق احمد
سيف اليزل برعي البدوي
Elawad
أسامه الكرور
عصام دهب
طارق جبريل
الهادي محمد ابراهيم
خالد العبيد
على جويلى
Ali Sirelkhatim
معتصم محمد صالح
heba Elmahi
محمد سنى دفع الله
فارس موسى
مدثر صديق
mohmed khalail
عبدالكريم الامين احمد
عبدالحفيظ حسن
ساميه حامد
بشرى مبارك ود السقاى
Nader Abu Kadouk
Adil Hamza
محمد أبوالعزائم أبوالريش
محمد صديق الفكي
عاطف نورالهدى الطاهر
ماضي ابو العزائم
khaleel
فيس بوك
تويتر
انستقرام
يوتيوب
بنتيريست