|
|
|
 Re: أسامة الخواض الشاعر المجيد .. (Re: وليد محمد المبارك)
|
القراء الكرام والاخوة المتداخلون ،
وافر احترامي ،
الكلام التالي دا انا كنت كتبتو فوق لكن بدا لي مخل بالتسلسل الزمني للبوست فحامسحه من فوق وانزله هنا:
العزيز حمور
وافر الاحترام ....
Quote: فاعفي لي اني احاول انبهك لكم حته كده لو سمحت لي.
من أجل هذا نكتب هنا يا صديق .....
طيب :
Quote: كلامك بيدور على انو عجز المتلقي عن اكتشاف الجمال في النص/اللوحة سببو هو قلة بضاعتو المعرفية. و بتعمم المسألة دي شديد.
و ده ما اظنو صحيح يا وليد. لأنو ممكن يكون النص/اللوحة عاطلين عن الجمال و ما فيهم التكتح رغم انهم لقو احتفاء لاسباب عديدة من اخرين.
فعجز المتلقي ما مردو قلة معرفتو دايما بل قد يكون عجز المبدع (قاص/شاعر/رسام .. الخ) عن انو يعمل شي جميل.
باصر مرة تانية انو في مرات كتيرة عجز الاكتشاف هو ناتج قلة البضاعة المعرفية ، وأعترف بخطئي في التعميم ففعلا قد يكون النص عاطل عن
الجمال ايا كان مبدعه او كاتبه ...
Quote: و بصراحة يا وليد انا بشوف ناس كتيرة بتدافع عن الغموض او الحاجه الما فيها جمال استجابة للغموض او اجلالا للكاتب.
و ده ما اظنو صاح .
الغموض عمرو ما كان ميزة و لا كون اني ما فهمت النص معناها دايما انو انا الما بفهم
الناس الزي ديل هم نفسهم عندهم قلة معرفة ، مع تحفظي علي فكرة انو في ناس كتيرة بتدافع عن الغموض لأجل الغموض ،
أما مسألة انو الغموض عمرو ما كان ميزة فدي ليست صحيحة علي الاطلاق ، فالغموض قد يكون له دوره في سياق النص ،
Quote: لكن اول شي لازم انت تثبت انو القصيدة/القصة/اللوحة المختلف عليها دي تستحق الثناء ثم تحكم انو الجمهور حمار.
و عشان نكون محددين ..
اثبت لينا انو نص الخواض ده شعر .. و انو شعر جميل .. و انو معانيو لا غبار عليها.
بعدها ممكن تقول انو المعترضين عليها لم يفهموها و قصرت مداركهم.
من هو المطالب باثبات الثناء للوحة او القصيدة او العمل الفني عموما ، انا مثلا لا أملك الادوات المعرفية التي تمكنني من التنظير في
شأن التشكيل ، اللوحة المعنية دي في كتير من الأحيان بتمنحني احساس قد ما انجح في تفسيره لكنو مريح بالنسبة لي ،
عشان كده المسألة دي اكثر تعقيدا مما يبدو علي السطح ،
ح تظل في مدارس وجهات كتيرة تطالب بالبساطة في حدود امكانياتا واذا استجاب المبدع للطلب دا فالانحدار دا ح يستمر لأنو هو دايما ح
يكون مطالب بمزيد من التبسيط ، دا ما مبرر للاتجاه لمزيد من الغموض ،
لكن الثابت بالنسبة لي انو ما تصفو بالغموض دا في كتير من الاحيان هو نتاج تراكم معرفي لدي الزول دا ،
بالنسبة لنص الاستاذ اسامة الخواض فأنا لأول قرايتي ليهو عجبني النص ورأيت فيهو معاني جميلة تم تسفيهها من قبل الكثيرين بالركاكة
المتعمدة والاستهزاء المجاني ، ومسألة اثبات انو النص دا شعر او لا فانا ما ح أخوض فيها لأسباب أولها انو دا موضوع كبير وأهمها انو دي
مدرسة كاملة انت في الاصل يبدو لي انك غير معترف بيها وانا لست من الاساتذة فيها والملمين بدروبها ، أعني مدرسة الشعر الحديث المجدد
وقصيدة النثر ، فمن المنطلق دا نقاشي ما ح يكون ذو فائدة يعول عليها ، وارجو انو دا ما يعتبر او يصنف كهروب من الموضوع ،
ولاحظ انو انا في بداية كلامي في الموضوع دا حددت اتجاهي في المسألة وقلت انو :
Quote: قضيتي الأساسية في قصيدة اسامة الخواض او نصه مثار الغبار دا كلو ليست الدفاع عن النص في ذاتو ، لكن المسألة الأهم هنا والباعتقد
انو البوست دا مخصص ليها هي الدفاع عن فكرة انو من حقك انو النص ما يعجبك لكن احتفظ للكاتب بي حقو وبي اسهاماتو ،
ودي للأسف مسألة بتغيب عننا كتير كسودانيين ، الناس بتتجاوز النقد او ابداء الرأي الي التسفيه والتجريح ومحاولة اغتيال الشخصية
نجي للنقطة المهمة يا حمور :
Quote: ليه ما تكون حدودك و امكانياتك انت الفضلت نص عاطف هي الاعجزتك عن ادراك الجمال في نص التجاني عشان تعرف انو احسن من نص عاطف ؟
بياتو اليات حكمت انو نص عاطف هو درجة اعلى لا يلقاها الا الذين طوروا امكانياتهم و وسعوا حدودهم ؟
انا كمتلقي في الحالة دي معجب جدا بنص التجاني وشايف القصيدة دي من أجمل غنانا في الحنين ، لكن كذلك انا اهتميت بتطوير ذائقتي
وترقيتا ، ودي مسألة شخصية زي ما في واحد بيهتم انو يربي عضلاتو مثلا !
بياتو آليات ؟ باليات انو انا قادر اتفاعل مع النص الجميل دا لعاطف اوأتأثر بيهو وادرك مكامن الجمال فيهو ، قادر اقراه القراية
الصاح البتتطابق مع فكرة الكاتب للنص او بتتقاطع معاهو علي الأقل ، قد ما يكون الكلام دا مقنع بالنسبة ليك لكنو مرضي بالنسبة لي ،
بالمقابل انا ممكن أسألك عن مكامن الجمال في نصوص انت بتعتبرا غاية في الجمال وح تلقي نفسك في معرض الرد بتقول كلام قريب من كلامي
دا ..
النص بتاع عاطف ونصوص محمود درويش هي نصوص الغموض الفيها ناتج عن تراكم معرفي وعن حكمة او سميها رؤية وان شئت سميها " الهبة " او "
الهبة الشقية " كما كتب محسن خالد ذات مرة ،
يعني النصوص بتاعت الناس ديل ما بتستدعي الغموض ان وجد لأجل الغموض ، شوف مثلا الكلام دا لعاطف :
ونحن سنبقي هنا
سوف نعلو بالذنوب الخفيفة فوق هذا العبث
او علي سبيل المثال :
شوف الناس قنديل !
انظر ياحمور للتكثيف الدلالي في العبارة الصغيرة دي ، اها دا لا يتأتي الا لزول ضليع وذو تراكم معرفي غزير ,
المقطع دا بالذات انا جبتو عشان كلامك بتاع الفكرة ، او بالاصح ردك علي كلامي بتاع الفكرة ،
Quote: لو اساسا ما حكمت على الجنس الادبي ما تقدر تفاضل بالطريقة دي و الا يكون من حقي اقول انو قصيدة بيروت لنزار قباني اجمل من رواية بيروت لصنع الله ابراهيم. بالذمة دي بتجي ؟
الخلاف يدور حول تصنيف الجنس الادبي يا الوليد اساسا .. فما تخليو و تقول نناقش الفكرة.
مش ممكن يكون عاطف ابدع في تصوير الفكرة نثرا ؟
اصراري علي الفكرة كان مقابل للاصرار او المناداة بالبساطة والوضوح والمباشرة ،
قصة انو نقارن بيروت نزار ببيروت صنع الله بالطريقة دي بتبدو زي احلي السكر والا اسرع الحصان !
لا ! باختلف معاك هنا ، عاطف ابدع في تصوير الفكرة شعرا ودي ما ح نتفق فيها ، قد يكون فاضلابي اوسع حيلة مني في اقناعك بيها وقد لا
يكون ،
الذائقة الادبية بالنسبة لي نتاج تراكم معرفي لم تؤثر فيه فقط القراءات بل حتي المجتمع المحيط وتعاملو مع قيم كحقوق المرأة
والديمقراطية واحترام الاخر علي سبيل المثال !
النصوص البسيطة والمباشرة لها جمهورها العريض الواسع ، ديل الناس بتاعين احلي منك قايلة بالقي ... والا غيرك انت ببقي ...
اها النص دا او المقطع دا انا اثر فيني في زمن معين وهو واشباهه من النصوص اثروا في تكويني الثقافي بطريقة او بأخري ،
كونو انا طورت ذائقتي بالمثابرة والاجتهاد دا ما بيدي الناس ديل حق انهم يطالبوني بالوقوف في محطتهم ، انا بالمقابل ما باطالبهم
بالوقوف معاي ، فالناس ديل بالتأكيد كانت عندهم اولويات تانية واهتمامات مختلفة قاموا بتطويرا : كرة القدم علي سبيل المثال : عشان
كده انا قلت ليهم قوموا الي كورتكم يرحمكم الله ، دا مع معرفتي لحدودي في مجال الكورة بتاعم دا فما ح اغالطهم فيه !
يعني يا عزيزي حمور دي حدود امكانياتهم ،
واحد من اروع ما كتب في القصيدة الحديثة في لغة العرب بالنسبة لي ديوان " احد عشر كوكبا " لمحمود درويش ، الزول الما شايف كدا من
حقو لكن انا باعترف بي عجزي عن اقناعو برأيي في المسألة دي .
معليش كترت الكلام وارجو انو دا ما يكون ادي لتشتيت الفكرة .
دم بخير وتقبل مودتي .
| |
 
|
|
|
|
|
|
|
 Re: أسامة الخواض الشاعر المجيد .. (Re: عزاز شامي)
|
| Quote: أنا مبسوط من القصيدة و برضو على كيفي |
غايتو يا فاضلابي
كلامكـ دا بنسف القاعد تعمل فيهو في البوست دا نوهائي!
وتيب..
ما الناس دي كلها على كيفا ياخ!
________
غايتو حمور دا عمرو ما خذلني ولا حيخذلني!
| |
|
|
|
|
|
|
|
|
|
Re: أسامة الخواض الشاعر المجيد .. (Re: محمد عبد الماجد الصايم)
|
Quote: غايتو يا فاضلابي
كلامكـ دا بنسف القاعد تعمل فيهو في البوست دا نوهائي!
وتيب..
ما الناس دي كلها على كيفا ياخ!
________
غايتو حمور دا عمرو ما خذلني ولا حيخذلني! ش |
حبيبنا ود الصايم
المداخلة دي خاصة جات طاشة في العام ساكت
دي مداخلة قرفة صاحب زهج من صاحبه شوية كده
ما تعممها على البوست كه
ولا ده اسلوب فاضلابي او طريقة في ادارة نقاش
تحياتي
| |
|
|
|
|
|
|
|
|
|
Re: أسامة الخواض الشاعر المجيد .. (Re: محمد عبد الماجد الصايم)
|
فاتني ان أشكر الأخ الازهري 2 علي كلماته الطيبة ،
اود أيضا ان اشكر الاخ حامد علي حسن ظنه بنا ،
أود أخيرا أن احيي الشاعر المجيد فاضلابي الذي طالما استمتعنا بمحاولاته وابداعاته أيام الجامعة ،
انا يافاضلابي متذكرك من زمن : مجوك يا ثوري الأرقط .
شفت كيف ؟
| |
|
|
|
|
|
|
|
|
 Re: أسامة الخواض الشاعر المجيد .. (Re: الوليد محمد الامين)
|
Quote: كل ما نقول خلصنا الليل
من كلمات المبدع/ محمد علي الفاضلابي
كل ما نقول خلصنا الليل يطلع باكر ليلاً أطول
كل ما نقول كملنا الشيل تطلع شيلة باكر أتقل
بس نتحمل ونصبر ونأمل انو الجاى صباحاً أجمل
لكن كيف وطعم الريد جوانا اتحول
مره تشيلك فوق الفوق
مرات تملاك فاقه وضيق
تلقى الدنيا تلم في همومك
تفتح جرحك وانتا تضوق
أنسى وأقول ما منها منى
دايماً بحلم وأنا ممحوق
قلنا كتير الشارع بيقصر و لمن نصبر نكون
ولما الزول في يوم يتعتر
بكره القاسي الشافي يهون
وبكره بنمشي الخطوة الأولى
التانية
التالتة
الرابعة
الخامسة
وفجأة..
نلقى الشارع قسى واتحجر نلقى الحلم الفينا اتكسر
ويبقى الزول مسجون مجنون مغبون بالهم مسكون
منحوس معفوص جواو محبوس
ويكوس ويكوس ويكوس
هسى الشارع ماشى لى وين
لينا عليهو سنين وسنين
نمشى كأننا ما ماشين
نفتح سكه تنسد اتنين
هوي يا شارع ماشي لي وين؟
|
| |
|
|
|
|
|
|
|
|
|
Re: أسامة الخواض الشاعر المجيد .. (Re: حامد محمد حامد)
|
الفاضل فاضلابي تحياتي لك ولكل المتداخلين بدون فرز وإن كان لابد من الفرز فأخص الأستاذ حمور الذي علمت من أخي هشام أنه جارنا ولكن يبدو حالنا كمن يبحث عن الكنز دون خارطة تؤهله لموقع الكنز .. فعذرا أخي حمور إن لم نعلم بهذا الجوار إلا قريبا ولكن إن بقي في العمر بقية فسوف ننسق لزيارتك قريبا بإذن الله .
وبعد يا أخي فاضلابي أشعر بأنك كمن يحرث في الماء وخاصة بعد أن أرجعتني إلى أدونيس وما قاله وعلى العموم مع احترامي للجميع فالشعر العربي ليس لنا حاجة في أن نتعلمه من أدونيس أو غيره فهو مادة الأدب الأولى التي قتلت بحثا منذ عهد عنترة إذ يقول :
هل غادر الشعراء من متردم أم هل عرفت الدار بعد توهم
مع العلم بأن مادة الشعر كانت قليلة ومحفوظة ولا تتجاوز ما يتناوله الإعراب في البادية وماعلقوه في الكعبة أو حفظوه في سوق عكاظ ...
فالشعر يا أخي فاضلابي أولا يخاطب العاطفة ولا يستهدف العقل كثيرا ولذلك تركيبته أتت مخالفة تماما لتركيبة الكلام المنثور ـ و تجد الناثر يفند ويطيل ولا يميل إلى التكثيف كما يفعل الشعراء وعندما تسمع قول المتنبي :
كفي بجسمي نحولا أنني رجل لولا مخاطبتي إياك لم ترني
فالعقل لا يستسيغ هذا الكلام وإن بلغ مبالغ عالية في عالم النانوفيزكس ، ولكن النفس تشعر بأن فيه مبالغة في تصوير حالة النحول. ومن هنا أتى جمال الشعر في التصوير ، التشبيه التمثيل ، الإستعارة وغيرها من الأدوات التي يتفنن بها الشاعر في وصف موضوع ما.
وللشعر أيضا أركان معروفة تختلف من حيث جمالها وبنيانها بإختلاف البيئة التي يعيش فيها الشاعر وبإختلاف الملكة اللغوية للشاعر وقصة علي بن الجهم عند إنتقاله من البادية إلى الرصافة معروفة ولا تحتاج إلى تكرار .
ويمكن إجمال هذه الأركان في :
* أن يكون المعنى مولدا من خيال الشاعر .
وعندما تقرأ مثلا للشاعر جماع :
أنت السماء بدت لنا
واستعصمت بالبعد عنا
دنياي أنت وفرحتي
ومنى الفؤاد إذا تمنى
تجد أن الخيال عند جماع لا تحده حدود وهو الذي جعله يأتي ببيت لم يستطع أحد أن يجاريه فيه أو عندما تقرأ للأستاذ عبد القادر الكتيابي :
هل الفقراء إلا
نحن والطير
نصوغ لقمحة لحنا
ويأكل لحمنا الغير
تأتي إلى ذهنك أفكار كثيرة ومعاني تتولد بما استطاع أن يفرضه خيال الشاعر وربط الفقر بالطير "
-- تغدو خماصا وتعود بطانا---" ورحلة العمل اليومية التي يبدأها الشاعر بحثا عن رزقه من الصباح إلى المساء وتشبيه ذلك بحالة الطير الذي لا يملك سوى سعيه والصورة تبدو للجميع في تكثيف عال يصور حالة الفقر لكل العمال ولكل الكادحين ببيتين فقط من الشعر ... وهكذا يمكنني أن أسترسل وأذكر لك أمثلة كثيرة ...
* أن يتم إنتقاء الألفاظ والحروف بعناية شديدة يؤهلها لمخاطبة النفس وتهييج الوجدان .
كما قال الشاعر :
لم يطل ليلي ولكن لم أنم ونفى عني الكرى طيف ألم
* أن يكون التركيب الصوتي للكلام له وقع موسيقي سمه ما شئت . وهذا الوقع الموسيقي هو الذي سهل حفظ الشعر عن غيره من الكلام ..
ما عدا ذلك أخي فاضلابي فإن أي كلام لا تنطبق عليه الأركان السابقة لا يعتبر شعرا في العربية بل ربما في لغات آخرى وضعه مختلف وإن أطلق عليه قائلوه لفظ الشعر ...
مع خالص تقديري ..
تخريمة :
يوم لاقيتك
جنب البير
لابسة عقد من حرير
حبيت حمار أبوك الأغبش
" شاعر مجهول"
رأيك شنو في التحرر من القافية في البيت الآخير يا فاضلابي ...
| |
|
|
|
|
|
|
| |
محمد عبد الماجد الصايم
وليد محمد المبارك
حامد محمد حامد
انور الطيب
فيس بوك
تويتر
انستقرام
يوتيوب
بنتيريست