|
يصل الى يد الاخ/سفيان نابرى. يجده بخير
|
صاحبي سفيان.. استلمت جوابك الرسلتو لي. ما تتخيل فرحت قدر شنو. من زمن طويل ما جاني جواب. لاقيت سحر اون لاين و كنت بنطط .. حكيت ليها و انا سعيد جدا. قلت ليها سفيان رسل لي جواب. قالت لي سفيان زول جميل. ياخ ده كان اجمل تعليق ممكن يتقال لي على فرحة الجواب. شفت البت دي كيف اختصرت كل الحاجات في ضربة واحده ؟ سفيان زولج جميل عشان كده لازم يرسل جواب. الجوابات فيها طعم زمان. و انت عارف اني بحب طعم زمان. مرات بخاف اموت بتسمم ذوقي من شدة اعجابي بزمان. تفتكر ممكن الزول تعجبوا حاجه صلاحيتا منتهية تقوم تعمل ليو تسمم ؟
تعريف المثقف الرسلتو لي جميل .. "هو ذلك الانسان الذي يفقد طمأنينته من أجل طمأنينه الاخرين " .. لكن يا سوفي مرات بحس انو التعريفات دي بتحمل نرجسية صاحبا .. غالبا الناس في الحاجات دي بتكون بتعبر عن نفسها .. عشان كده في واحد بيعتبر المثقف مفروض يكون اناني و واحد بيشوفو مفروض يكون عايش للاخر .. و كل واحد بيحكم من حتتو. شخصيا بقيت اخاف من حتة المثقف الاصطلاحي المعروف للناس اليومين دي .. بقرب ارفع يدي و اقول اللهم احمني من الثقافة .. لكن برجع اقول احتمال اكون بدعي على روحي .. غايتو في الاخر اظني حاموت على دين العجائز .. لانو العبء تقيل يا سوفي.
ليه خايف من بكره يا سوفي ؟ ما تخاف.. ابشرك انو بكره اسوأ .. ده يقين .. عيش بيو .. اسوأ الاشياء لم يحدث بعد .. و الخبر السئ لم تسمعه حتى الان. انه عالم قذر هذا الذي نعيشه يا صاحبي. عشان كده حاولت ابعد من نهر النار البيخوضوهو الناس ده .. هل دي النرجسية القلتها لي في جوابك ؟ ما عارف. لكني زحيت من النهر .. قعدت تحت شجرة .. و ماسك ورقة و قلم .. عاوز احاول اوصف حال الناس .. العايم و المحروق و العاوز يبني كوبري و اليائس قاعد على جمبه و بيبكي. ده جبن ؟ ما عارف. انا بحيرتي دي لو قلت لي عرف المثقف حاقول ليك : هو المحتار الذي يطلب يقين في شئ لا يدريه. دم بخير يا صاحبي و تقبل شوقي.
حمور زيادة 24 فبراير 2009 الحلفايا
|
|
|
|
|
|
|
|
|