|
Re: ماذا حدث لنا ..؟؟ (Re: حمور زيادة)
|
مشهد ثاني
ليل داخلي الزمن : اول الالفينيات التوقيت : الواحدة صباحا
همس و تنهيدات نسائية تأتي من الخلفية .. ضحكات مكتومة تنبعث من اكثر من ركن .. صوت " ِشششش " منبه و حوار خافت حول الاستثمار في سندات تجارية
ابو بكر : هسه مفروض يحصل شنو ؟ لؤي : انا رسلت ولدي محمد يجيب كفن من واحد في ام درمان و حيجيبو معاو عشان الغسيل ابو بكر : الجماعة ديل ما فيهم زول بيغسل ؟ منصور : و الله ياخ ما سألناهم لكن بس قلنا ما نتعب الناس ساي .. في زول كويس بيغسل بخمسين الف ابو بكر : بالله زمان الناس براها كانت بتغسل امواتا هسه بالقروش ؟ حامد : هسه انت بتعرف تغسل ؟ ابو بكر ( ضاحكا ) : انا بغسل اموال ( يضحكون و يغيرون الموضوع ) حامد : ما شايف اخو المرحوم الكبير منصور : اسمو منو هو ؟ ابو بكر : كيف ياخ ما بتعرف اسمو ؟ ده حافظ سلطان مدير بنك اياكس الجديد منصور : بالله ؟ حافظ سلطان بتاع اياكس ده اخو المرحوم ؟ ابو بكر : امال انت قايل عبد الرحمن ود المرحوم اشتغل هناك كيف ؟ منصور : طيب هو وينو ؟ ابو بكر : و الله ما عارف كدي نسأل عبد الرحمن ( ينادي عبد الرحمن فيأتي في جلباب ابيض ناصح و الحزن يكمل مشهد وسامته مع اللحيه الخفيفة ) ابو بكر : عمك حافظ وين يا عبد الرحمن ؟ عبد الرحمن : و الله ضربنا ليو في موابيلو كم مره ما رد .. رسلت ليو مسج منصور : طيب كان تشوف زول تاني من ناس بيتو !! عبد الرحمن : ضربت لهشام ولدو لقيتو في اوفر نايت و ما سامعني كويس .. قلت ليو لما تمرق اضرب لي حامد :يا زول خلاص عملت العليك .. نحن اول ما الجنازه تجهز بنمشي المقابر .. اللحق لحق ابو بكر : فعلا .. تأخير الدفن ده ما صاح
يخفت صوتهم رويدا و يتعالي همس نسائي من الخلفيه " اهئ .. اهئ .. اهئ " " هويدااستغفر البكا ده ما كويس .. انتي عاوزه تضري نفسك ؟ خلاص " " منى !! عليك الله املي لي الكبايه دي مويه " " عايني ليها قاعده كيف .. ما بتخجل المره دي ؟ "
cut
|
|
|
|
|
|
|
العنوان |
الكاتب |
Date |
ماذا حدث لنا ..؟؟ | حمور زيادة | 11-01-08, 04:16 PM |
Re: ماذا حدث لنا ..؟؟ | حمور زيادة | 11-01-08, 04:18 PM |
Re: ماذا حدث لنا ..؟؟ | حمور زيادة | 11-01-08, 04:20 PM |
Re: ماذا حدث لنا ..؟؟ | حمور زيادة | 11-01-08, 04:21 PM |
Re: ماذا حدث لنا ..؟؟ | حمور زيادة | 11-01-08, 08:11 PM |
Re: ماذا حدث لنا ..؟؟ | Amira Elsheikh | 11-01-08, 09:34 PM |
Re: ماذا حدث لنا ..؟؟ | فوزى عبد الفتاح | 11-01-08, 10:18 PM |
Re: ماذا حدث لنا ..؟؟ | Amira Elsheikh | 11-01-08, 11:14 PM |
Re: ماذا حدث لنا ..؟؟ | حمور زيادة | 11-02-08, 01:23 PM |
Re: ماذا حدث لنا ..؟؟ | حمور زيادة | 11-02-08, 01:29 PM |
Re: ماذا حدث لنا ..؟؟ | Salahaldeen Nadir | 11-04-08, 08:59 PM |
Re: ماذا حدث لنا ..؟؟ | حمور زيادة | 11-05-08, 11:01 AM |
Re: ماذا حدث لنا ..؟؟ | Sana Khalid | 11-05-08, 02:52 AM |
Re: ماذا حدث لنا ..؟؟ | حمور زيادة | 11-05-08, 11:03 AM |
|
|
|