مُشكلة حقيقية : زواج الأبناء والبنات .. في بلاد الشتات !

Quote: الاستاذ عاطف مكاوي هذه مساهمتي لبوستكم الهام بسودانيز وفيها ملخص سنوات طويلة وتجربة اسرة وجيلين والثالث في بدايته. انا سودانية امريكية عمري 32 سنة واهلي انتقلوا لأمريكا وانا عمري 10 سنوات واختي تكبرني بسنة واحدة.. اهلي اتوا لعلاج ولم يرجعوا للسودان في زيارات إلا بعد 10 سنوات كاملة منذ تاريخ دخولهم لأمريكا. قرار الاستقرار بامريكا ما كان سريع لكن مع الظروف اخدنا وقت عشان نعرف انه نحنا ما راجعين السودان قريب ودي بلدنا الجديدة بخيرها وبشرها. في البداية كانت تجربة شاقة واجهت والدي في التعامل مع الواقع الأمريكي وتوفير لقمة العش وسقف فوق راسنا. وانا واختي تعبنا شوية برضو في التأقلم على المدارس واللغة التي لم نكن نجيدها على الإطلاق دراستنا في السودان كانت في مدارس حكومية وان كنا انا واختي متفوقات اسرتي اسرة سودانية عادية لا متزمتة ولا متحررة. لكن ربانا والدينا على الثقة والأحترام. ما منعونا نزور اصدقانا من غير السودانيين ولا ضربونا في لبس ولا طلعة من البيت. لعبنا في الفرق الرياضية في المدرسة وشاركنا في انشطة الموسيقى والدراما. في حاجات ما وافقوا عليها وكانت كلمتهم واحدة وما فيها نقاش لكن شرحوا لينا ليه لا، ما كنا مبسوطين انه نتحرم منها لكن كنا فاهمين ليه (وهسه فهمنا اكتر). والدي ووالدتي دايما كانوا بيقولوا لينا انتو حصادنا في الدنيا دى وبنتمنى انكم تعيشوا حياتكم كناس محترمين وتصنعوا مستقبل لنفسكم وده ما بجي الا بالكد والاجتهاد. كانوا(ولسه) بيذكرونا باننا سودانيين اولا وأخيرا. اتكلموا معانا زمان بالعربى وشجعونا نرد بالعربي وكانت والدتي بتراجع لينا اللغة العربية لما تلقى وقت وكان في مكافأة اسبوعية لذلك. بعدما امي اشتغلت بقينا نمشي مدارس الجالية العربية لدروس العربي في عطلة نهاية الاسبوع. اهلي ما كانوا بينبزوا لينا الامريكان ولا قالوا عليهم كفار، بس كانوا بيقولوا انو نحنا سودانيين زي ما الامريكان امريكان. صاحبوهم بس ما تنسوا انتوا منو. ابوي وامي بيصلو ويصوموا وابوي قام بأداء فريضة الحج، لكنه هو ووالدتي عندهم اصدقاء من كل الاديان مشوا الكنائس لعدد من المناسبات من غير اي تردد. عندما سكننا بامريكا كانت هناك اسرتين فقط من السودان في مدينتنا لكن زادت الاعداد بمرور الوقت واصبحت جالية معقولة في عددها. انا واخني اكملنا جميع مراحل التعليم بنفس المدينة رغم انه والدي وافقوا لينا نقدم لجامعات خارج ولايتنا لكن قعادنا في البيت ساعد في تخفيف المصاريف. دايما والدي بيقول التربية الربيتكم ليها عايزها تكون جواكم ومقتنعين بيها. دايما بيقول عايزكم تحبوني مش بس تسمعوا كلامي. الكلام ده كان بيأثر فينا شديد انا وأختي وما كان في حاجة بكون عندها طعم لو بس لمحنا نظرة عدم رضا في عيونه. رغم انه احيانا بنختلف في نظرتنا للامور لكن ابوى ده بطل حقيقي في نظرى واعظم اب. انشالله اقدر اربي اولادي بنفس الطريقة. نجي لموضوع البوست.. الزواج.. انا متزوجة من سوداني جاء أمريكا للدراسات العليا واتقابلنا في مناسبة من مناسبات السودانيين. انا بعتبر نفسي محظوظة شديد لانه هذا الرجل يجمع بين العالمين بتاعيني. هو سوداني اتولد وعاش طول عمره في السودان بيسمع الغنا السوداني ويحب الكورة والنكات السودانية وقريب من أهله لأنه اكبرهم ووالده متوفي. هو ايضا بيشبه الأمريكان في احترامه للمواعيد، لخصوصيتنا كأسرة صغيرة وفي جديته الشديدة في عمله. وجدت فيه ايضا بعض الأشياء من والدي بيثق فيني وبيحترم رأي. شخصيته قوية جدا وأحيانا عنيد لكنه ما بيتحكم فيني ولا بفرض علي قوانين ولا شروط في لبس ولا طلعة ولا عمل. بيساعد في البيت بس ما بعرف للطبيخ نهايي. والدتي طباخة ماهرة وعلمتنا انا واختي نطبخ معاها وزوجي مبسوط انه مرته بتعمل ملاح الفرك وكمان قراصة. انا ما منظمة شديد ونساية وهو عكسي تماما لذا أجد منه دعم ولوم احيانا عشان نسيت أعمل حاجة. من تجربتي العلاقة بين الأبناء وأولادهم في الخارج مهمة جدا وبتحدد اشياء كتيرة في مسار الأبناء وشخصياتهم. والدي ووالدتي ناس دايما كان عندهم أهداف ومبادي واضحة في الحياة رغم الصعوبات الواجهتم، لكنهم في نفس الوقت متسامحين جدا وبالهم طويل. برضو التوافق بين الأزواج (موضوع البوست) اهم أحيانا من الزول ده من وين واهله من ياتو بلد. أهم شيء انه يكون زول كويس ومن اسرة بتحترم رابط الزواج وبتعرف معناه. لو ديل مافي الزواج حيفشل حتى ولو كانو اولاد عم. أختي متزوجة من أمريكي بشتغل معاها في نفس المؤسسة. زواجهم كان تلقائي وما معقد. والدتي بالذات كانت متحفظة وخايفة شوية لكنها ارتاحت بعد قابلته وشافت اهله وتبادلوا الزيارات.هو من اسرة امريكية متوسطة ربت أولادها على قيم الأمانة والعمل الدؤوب. أختي اول زول مهاجر وما امريكي وما قوقازي يدخل اسرتهم الصغيرة والممتدة لكنها وجدت ترحيب منهم. زوجها عارف عاداتنا وتقاليدنا ومسئوليتنا تجاه والدينا وفهم دورزوجته في حياة والدينا وعلاقتنا بأهلنا في السودان. كان بيستغرب في الأول لبعض الأشياء لكنه اتعلم بعضها واتعود على البعض الآخر. مرة تاني التوافق مهم، اختي وزوجها الإتنين ناقشوا استعدادهم للتعامل والقبول بالحاجات المختلفة لكل منهم. رحلة ما ساهلة التقاء الثقافات ده لكن ممكن يحصل حتى بين ابناء البلد الواحد. امي وابوي بهظروا ويقولوا انه ربنا رزقهم بولدين على كبر. واحد لحاجات السودان (اللي هو زوجي) وزوج اختي لحاجات امريكا لكن الحقيقة انو امي وابوي الحمدلله بعملوا كل شيء بنفسهم. اختي ساكنة في مدينتهم لكن انا في ولاية قريبة. لما نمشي لأهلي بنقول ليهم عايزين نساعدكم في شنو بس البيحصل انهم هم البساعدونا. الحياة للاسر المهاجرة صعبة وما وردية، لكن الناس ما تستسلم. نحنا مرينا بظروف صحية ومالية صعبة شديد بالاضافة للغربة والبعد عن الاهل في وقت الاتصال فيه كان ما ساهل زي هسه، لكن بصورة ما قدر والدي ووالدتي انهم يكونوا معانا دايما في كل شيء بنعمله يوجهونا ويشجعونا. حبيت اقول ليكم قصتنا يمكن تجيب على بعض الاسئلة والدنيا بخير طالما في عزيمة. تمنياتي بالتوفيق لكل الاسر المهاجرة والفي السودان