الي هيئة علماء المسلمين : هل تسقط (البيعة) في حالة (حت القرض المختلط)؟

Quote: الأخ محمود ......مساء الخير ح اسألك بشكل محدد جداً ....وين المعارضة هنا ؟؟؟ ح انتظرك تجاوب السؤال ده وسألك ليهو اخوان قبلي ورحت من الاجابة ان كان بعضنا هنا منظم سياسياً لكن حد علمي لم يبلغه ان المعارضة عينت في سودانيس ناطق بإسمها لكن لنفترض جدلاً ان المعارضة محتفلة بالشريط ....وبشكل رسمي كمان ...وين المشكلة في الحفلة دي؟؟ ما من حقي كمعارضة احتفل بسقطة اخلاقية لرئيس قعد كم وعشرين سنة ينجز في برنامج قهر منظم بأسم الدين؟؟؟ ما من حقي أشكل وجدان شعبي برؤية مختلفة عن الكذب العاش معانا كم وعشرين سنة؟؟؟؟ ما من حقي ألفت انتباه شعبي والعالم لي انه البشير بيرقص والاطفال مالاقين سُكّر؟؟؟فرحان والبلد بتعيش ازمات مركبة؟؟؟ مامن حقي اقول ليهو وينك من بن الخطاب الكان بيتفقد رعيتو ليلاً؟؟؟داك سهران بيتفقد في الناس والمواطنين الجيعانين وبتاعكم ده سهران يحت في القرض وهو لابس جلابية فظيعة ومتشيك وماكل شارب محروس من دمنا وعرقنا؟؟؟ ما من حقي افرح بي سقطتو ومئات الالآف من ابناء شعبي تم جلدهم والتشهير بيهم من قضاة ومهاويس في الانقاذ بموجب قانون النظام العام اللي خرقو هو برقصو المختلط والعلني مع زوجته المحيطة بيها شُبهات الفساد هي واخوانو؟؟؟ الشريط وثيقة بتفضح نفاق الانقاذ...يسوقو اولاد الناس يكتلوهم في دارفور والنيل الازرق ويجو يرقصو لينا ويكشفو وينططو؟؟؟يسوقو الناس لمجازر وينبسطو ويخلطو ؟؟؟؟ الانقاذ منافقة جداً وخاينة لدم الناس الغشتهم وساقتهم الجنوب زمان وسايقاهم هسي للنيل الازرق والمحارق البتتفتح كل يوم انا ما ضد الرقص وبحب الرقص خالص .....لكن بكره البينافقو في الدين ويجلدو بيهو ويصفو بيهو خصومهم ولمن يجي الدين لعندهم بيخرقوهو ويمشو بكل برودة الدنيا يشترو صكوك غفران من الائمة والعلماء البيغمضو عيونهم عن سقطات السلطان وعن عدم انسجام السلطان نفسياً وذهنياً مع الهوووس اللي قعد تمنتاشر سنة ينتج فيهو بي آيدلوجية البشير رقصو حرام وغلط لانه اصلا مزمار الشيطان ما بيجوز ينسمع حسب هوس الكيزان والاسلاميين ناهيك عن عرضه البيكشف (حرمه المصون)والحسان المحيطين بيهو قطع شك ماكلهم محارمو يللا عايزين زول يقول لي راس الدولة والهتيفة بتوعو ليييييه ...تأمرون الناس بالبر وتنسون أنفسكم؟؟؟؟ نحن ما اكبر انجازنا الشريط ياسيدي بس لمن يقع في يدنا ح نقيف ونلفت نظر الناس لي انفصام الكيزان وازدواجيتهم وح نحشد ضدهم بيهو لانه دي معارك اخلاقية وسياسية ضخمة جدا اتمنى تكون فهمتا انه الناس لاقت الشريط بفرحة عارمة ليه........ الشريط سقطة اخلاقية مريعة شاء من شاء وأبى من أبى ....والشريط ماكل المعركة لكن ينبغي الاستفادة منو ومن كل المتاح .... مودتي للجميع وكل سنة والجميع بخير