كتب الكاتب الفاتح جبرا المتوفرة بمعرض الدوحة
|
Re: برنامج بيتنـا... تلفزيون السودان (Re: ASHRAF MUSTAFA)
|
الأخ أشرف سلامات ..
Quote: برنامج بيتنـا... تلفزيون السودان |
أشاهد البرنامج كلما صادفت موعد تقديمه .. أعتقد أنه يحتاج لمطبخ بيتنا .. وبالأحري مفروض التلفزيون يكون عنده استديو مطبخ خاص يستعرض الطبيخ السوداني المتنوع .. وفقرة المطبخ هذه يمكن أن تكون تثقيفية جداَ للجمهور السوداني والأجنبي .. يعني مثلاً إذا كانت الفقرة عن الملوخية يسهب الطباخ/أو الطباخة في الكلام عن فوائد الملوخية ومحتوياتها و..و كما يمكن عرض طرق طبخها المتنوعة : ملوخية مفروكة- ملوخية طبيخ بقدحة التوم - ملوخية سليقة ، شوربة - .. أو قول حلقة عن البامية : بامية فرك - بامية طبيخ - بامية مع السلج - ويكة ناشفة، أم رقيقة، - ويكة ملاح شرموط - ويكة حمراء يعني مطبوخة مع بصلة محمرة وصلصة .. ويكة بالكسرة - ويكة بالقراصة - ويكة بالعصيدة .. ويكة ...... أو مثلاَ حلقة عن البقوليات وأمسك بس الفول .. فول بالجبنة - فول بالطماطم - فول مطبوخ - فول بالدكوة - فول بالطحينة - وعيييك .. ياخي أنا كنت ناوي أفتح بوست مخصوص عن تنوع الطعام السوداني لكين زمن مافي .. تمسك أي حاجة تلقي إنو السودانيين بيطبخوها بمية طريقة ... تمسك شعوب الشرق والغرب تلقي ما عندهم أي إبداع .. الإيطاليين غير المكرونة ما عندهم حاجة .. الاسكندناف بس أديهم البطاطس .. وكذا باقي أوروبا .. سمك وبطاطس .. ناس آسيا بس خلي ليهم الرز .. عرب الخليج بس كبسة في كبسة - عرب الشرق الأوسط شغالين زعتر وسلطة حمص وبقدونس .. المغرب العربي باتعين كسكس بس و..و.. المهم .. نلاحظ أن معظم برامج تلفزيونات العالم نصف برامجها طبيخ في طبيخ .. ياخي بعد الإعلانات تلقي إنو معظم وقت المشاهد ضايع في برامج الطبخ كبرامج رئيسية !!..
طيب قول فقرة المطبخ دي ممكن تكون فقرة رئيسية - هو البيت شنو غير مطبخ؟ - لكين طبعاً لو جابوا لينا مطبخ مش يجيبوا لينا مطبخ تعبان مع طباخ تعبان عرقه ينقط في الأكل ولابس أكياس نايلون في شكل جونتات وحلل مطقعة .. أو طباخة جاية تستعرض ثيابها ودهبها .. ثانياً مفروض تكون هناك فقرة إستطلاعات ميدانية ويدوا الوجوه الغبشاء دي فرص تظهر في التلفزيون في إستطلاعات في قضايا تهم الجماهير .. يعني مثلاً قول الكاميرا تمشي سوق الخضار وتستطلع آراء الخضرجية والزبائن عن مشاكل السوق ومواسم الخضار ومشاكل الإنتاج والتسويق .. كما يمكن عرض آراء المواطنين عن السوق والأسعار و..و.. المواضيع كتيرة ممكن تجعل التلفزيون شئ ممتع ومرتبط بالجمهور بدلاَعن أخبار مكررة مملة كلها كضب وتدليس وحشو .. زائد غناء في غناء و..و..
|
|
|
|
|
|
|
|
|