|
|
 Re: عايز أبقى شاعر حُر..تبقوا معاي؟ (Re: سناء الصباغ)
|
تلاتة كباري وشارعين وسد
قديتونـــــا قصــادهــــم قــــد
لو جينـا لكشف حساب وجرد
******
امسك واحد اول بدء
... ... سرقتو وطن واسع ممـــــتد
فكفـكتوهــــو
وزعزهتوهو
وارهقتوهــو
وبشتنتوهــو
وهديـــــــتوهو هــــدا هــــد
******
: وهاك التاني امرا أد
حكمتو شعب كان زي الورد
افقـرتوهـــــو
وشردتوهـــو
وجهجهتوهو
وعنصرتوهو
وقطعتو حبل كان واصل ود
******
آخد التالت لو ترتد
وجدتو مصانع لقيتو مزارع
وسكـــة حديـــد جد بالجــــد
عطلتوهـــا
وفرتقتوهـا
ووقفتوهــا
وشلعتوهـا
وقطعتو رزق عمـال من حد
******
: احسب رابع وتابع العد
وين تعليمنا ووين ترنـيمــنا؟
وين ادابنــا ووين كتــابنــــا؟
وين رياضتنا ووين ريادتنا ؟
مرمطوهـا
واخرتوها
وافشلتوها
وطيشتوها
وخلفـــتوها جهـــل عن قصد
******
: شوف الخامس اخذ ورد
كيف وحدتنا وكيف دولتـــنا ؟
كيف عيشتنا وكيف حالتــــنا؟
ووين ثرواتنا ووين اموالنا ؟
وين غيرتنا وكيف سمعتـــنا؟
خرمجتوهـا
وبشتنتوهـا
########توهـا
وبـددتوهــا
ولوثـتوهــا
وبي سمعتنا مسحتو الارض
******
هاك السادس ونفسك سد
رئيسا راقص رقصا شين
مسئول مزواج ركاب سرجين
وزارة تجارة وبياعين
ناسا عايشة ومبسوطين
جضوم منفوخة ملمعة زين
كروش ممدودة متر مترين
ايادي طرية نعومة ولين
طالعين ماكلين نازلين بالعين
مناشر تنشر مطحونين
بفقه السترة محمين
ومندسين ومدسوسين
بفقه ضرورة وقوة عين
نهابين ومغتصبين
فساد شفناهو راي العين
وشميناهو ابو العفين
وناس بهناك دايشين دايخين
بطونهم خاوية وما لاقين
وجوهم هايمة وفقرانين
!! وعينهم طالعة وكمان صابرين
وليه ساكتين ؟
ولي متين ساكتين ؟
باسم الدين الخداعين
خلو حياتنا زفت وطين
تجار الدين الافاكين
ملعونين ملعونين
ملعونين لي يوم الدين
غشيتونـــا
وبشتنتونـا
وعذبتونـــا
وجننتونـــا
وبكيتونا دمع ودم ولطخة خد
******
وتقولي كمان
تلاتة كباري وشارعين وسد
بس يــا ود
حيلك شـــد
ويد علي يد
كلنـــــا ضد
ضد العسكر وحكـــم الفرد
ضد الظلمــة ومــن افســد
نضال وارثـنو اب عـن جد
اكـتوبراولى لــنا بتشــــهد
وابريل التانية اعادت مجد
والتـالتة قريبة وما بتبــعد
خليك واثق واتأكــد
للاحلى حيكون الغد
للافضل راجنو الغد
للاجمل حنبني الغد
للاحلى حيكون الغد
للافضل راجنو الغد
للاجمل حنبني الغد
| |
 
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: وضاحة)
|
الصناجة وضاحة
القصيدة لابال عليها
لكن اعتقد ان ختمتيها بـ
حتى الفن الكان مليان
بدلوتو باغاني واغاني
ونجوم الغد
مع خالص التحايا للاستااااااااااااااااذ عاصم البنا
في تجربته العربية القحة المستمدة من مضارب ديار تغلب .. والتحية موصولة لعنتره
| |
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: وليد محمد المبارك)
|
وضاحة
هذه القصيدة من عيون الشعر الحر.
فقط اخشى عليك ليس من انصار المدرسة التقليدية وانما من اعداء انصار المدرسة التقليدية
دي على وزن معارضة المعارضة.
شفتو كلامي في معاوية المدير ما وقع واطة
وليد مبارك ماشي في تحسن بعد ما الاسهال وقف.
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سناء الصباغ)
|
محاولة حرة بعنوان :
شرف الإنتظار
و قنصت ليكِ
قبل جرس الإنصراف
أمني في النفس الرجا
و أرفض شرف الإعتراف
ختيت كرسي قرب الجدار
تحت ضل الشتا
الرامية فوقو بانا مفرهده
زي قامتك طويلة ممدده
و مولعة تحت ضلوعي نار
و قنصت ليك !!
الليلة ما جرس المدير
عصلج عديل
و جنبي زير
أغطس فيهو كوز
و راهو كوز
أشرب لمن بطني إشتكت
وصحابي المعاي
صابر حداي
و لمن خلاص أعصابنا إتلفت
و المثانة ذاتها كركبت
جريت عديل
لي بيت الادب
و هناك سمعت الجرس
أكذب في روحي اقول كضب
و لمن رجعت ليك
شفت البلوم يعوم
زي علب الفورموست
و صاحبي بالضحك إنشرط
قال لي خلاص
زولتك فرتقت
ده حظ شنو
كلو من صاحب السبيل
السوالو قدام بيتنا زير
لا ده كلو من جرس المدير
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: وليد محمد المبارك)
|
سف التراب
أسافر اخلي المكان القديم..
وأرجع قديم الطريق القفل..
قفل مسام الخواطر وهم..
فتح أبواب حكايتك وغنت عليك..
غنت صفافير القطار الهجد..
على صالة وصولك وهلل غمام..
وشدت ضفاير اللحون القديمة ..
وشالت رعافها وركت هناك..
وسفت تراب الحقيقة الأبت، تعود مرتين..
سكبت نهارك عليك وانتشيت
وقفت أقالد الشوارع المشت..
وأحضن حقائق الحروف والهزيمة.. وأكفكف شجر..
تليتُ عليك أوامر ذهابك، وأمرتك إياب..
طلبتك مواقف تسجل حضورك..
لقيتك بعيدة.. وعيونك سراب..
سرابات عيونك..
عيونك سراب..
سرابات عيونك..
عيونك سراب
سرابات سراب
سراب السراب
سراب..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: Salah Abdulla)
|
يا الفاروق لووول حجاب ما معانا ليش
ترفدوني .....خلاص شعر حداثي وتفه ملونة
اشتكيت لي حاكم الحقوق الفوق
ياناس حقوق الانسان دافعو عن حجابي
لو تفكفكت لدافعتموا عني ورسلتو لي تذكرة
لكنكم عن حجابي لا
شكيتكم على الله الواحد القهار
يا السمكرتو الوطن غلط
والسمكركي ضارب اخدر
واللحام ضارب
سمكرتوا القوانيين يا سمكرية وما نافعين
سمكرية وفنانين
في كي بورداتكم مكنكشين
حراشين
حداثين ما سوايين
نضامين ما فعالين
نوامين ما صحيانين
هراشين وبتتهرشو
كضابين للحال شيالين
نقناقين
نقناقين
نقناقين
سمكركية ما نافعين
ضاربين الهمبريب راقدين
سمكرجية فراجة
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: القلب النابض)
|
مهاتا
يا مشرقه وفيك نور
يا باقه من اندر زهور
و يانعه باسقه مونقه
يا بدور
من بين بساتين الحقول
سجلتي اذهى من الحضور
وذهلتي باسمات الثغور
يا آية الحسن المشاع
من مشاعر من شعور
غاده فارعه ومترعه
ونسمه من ارقى العطور
يا جايه من أخر الأماني
يا نابله من جوه الزمن
و باينه اجمل من قضيه
يا نص مكتوب من زمااااان
لافي دائر في البريه
مما قال :- كن
لعهود كانت هنية
لدهور نادية
وطريه
يا بنفسجه يا بنيه
يا شتيله دابه
نيه
تعالي نكلم القمره
و نحجيها
و نناجيها
بما عليكي
وما عليّ
يمكن أونا يحن
يهدينا لحظات شويه
ـــــــــــــــــــــــــــــــــــــ
يا جماعة سناء الصباغ دي من نقاد وين!!؟
أسم الصباغ دا باين أنها متبحره في ضروب
النقد صح؟
شكله كدا دفعة ناس لويس عوض و مين كدا
عابدين !!؟
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سفيان بشير نابرى)
|
شاعرنا المخضرم سفيان قلت سناء دي من نقاد وين؟ هاك المقتطف دا
(تعتبر سناء الصباغ و عبد الفتاح كليطو من أهم رواد النقد العربي الحديث إلى جانب عبد الكبير الخطيبي وموريس أبو ناضر وعبد السلام المسدي وكمال أبو ديب وعبد الله الغذامي وحسين الواد
وجمال الدين بن الشيخ ومحمد مفتاح وجميل شاكر وسمير المرزوقي وصلاح فضل وخالدة سعيد ومحمد بنيس وأدونيس. وقد تميز عبد الفتاح كليطو بدراسة الثقافة العربية الكلاسيكية بمناهج نقدية أكثر
حداثة وتجريبا وتأصيلا بسبب انفتاحه على الأدب الغربي ومناهجه النقدية واطلاعه العميق على التراث العربي القديم.)
المصدر اذا كان مثلي يسأل عن ذلك وما اظن هو موقع ديوان العرب.
واحتياطيا كدا نقل بتصرف يعني نقاد كبار لكن ما بنغرق ذمتنا
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سناء الصباغ)
|
Quote:
(تعتبر سناء الصباغ و عبد الفتاح كليطو من أهم رواد النقد العربي الحديث إلى جانب عبد الكبير الخطيبي وموريس أبو ناضر وعبد السلام المسدي وكمال أبو ديب وعبد الله الغذامي وحسين الواد
وجمال الدين بن الشيخ ومحمد مفتاح وجميل شاكر وسمير المرزوقي وصلاح فضل وخالدة سعيد ومحمد بنيس وأدونيس. وقد تميز عبد الفتاح كليطو بدراسة الثقافة العربية الكلاسيكية بمناهج نقدية أكثر
حداثة وتجريبا وتأصيلا بسبب انفتاحه على الأدب الغربي ومناهجه النقدية واطلاعه العميق على التراث العربي القديم.)
المصدر اذا كان مثلي يسأل عن ذلك وما اظن هو موقع ديوان العرب.
واحتياطيا كدا نقل بتصرف يعني نقاد كبار لكن ما بنغرق ذمتنا |
و الله غرقان الذمه ما كويس
و بسم الله ما شاء الله أنا من شفته صورتك و قريت كتابتك النقديه هنا قلته ناس صلاح و فدياس
جاهم بلى و عرفته انو دا النقد الموسسي .
بعدين أنتي يا دكتوره و اضح تمام حرصك على عملك بدليل أنك حارسه كل شارده و وارده
و قطع شك حنستفيد منك .
فبلاااي شوفي لي نصي بتاع بالليل دا كيف ؟
بس اترفقي لانو كتابة الشعر بالليل دي عارفاها صعبه خصوصاً لما الدنيا تصن و صوت الركشات
يقل و ينط الزول الجواك داك و عايز تواجهو و يقعد يازاوغ جاي وجاي .
بس لو شفتي في النص حاجة كدا و لا كدا فبالله عليك ما تفينى في اسفير الله دا و تضيعي ملكتي
الشعرية منيّ:-
تماهي و ما هي
و لا خايف من الأيام
ولا هامم و لا حزنان
اخر هجائع الليل غشاني حلم
سكنى تمام
ساسق بين وريد الدم
وبين شرياني دا التاجي
بقي يناجي
لا احزاني كان تمرق
لي آمالي ما تتهيب
الفرصة
و أنا بين و سادة المرتبة
رجلي داقه في اخر السرير
عيوني غازه في السقف
خواطري مطموره بي جاوي
دائره و تلف
شديت عصب جسمى
اترخي
حاحيت خيالاتي
تك .. تتك
عقليّ انمحى
بقيت مهنضب منتظر
راقد ممدد منتشر
لا يد اجر
ولا كراع
سااااكت جسم
و اتنين
ضراع
يا ربي أيه حاليّ دا ؟
زول منزوع من جوه !!
ولا جواهو منزوع من سواه!!
و دار السوال منو جديد
رأسيّ اتقل من حجر
مافي ايد تقدر تشيلوا
فنن تفنو في البعيد
و أنا يا بعيد
لساااااني راقد منتظر
ولا خايف من الأ يام
ولا هامم و لا حزنان
ممدد بس
كاني إنسان
وما إنسان
| |
|
|
|
|
|
|
|
|
 Re: عايز أبقى شاعر حُر..تبقوا معاي؟ (Re: سناء الصباغ)
|
زواج عرفي بين الأرض والتفاحة..
أكل سيدنا آدم التفاحة فهبطنا إلى الأرض..
ولم يأكل نيوتن التفاحة فكانت جاذبية الأرض..
ولو لم يأكل آدم التفاحة لكنا في جنات بطول وعرض..
ولو أكل نيوتن التفاحة لصعدت أرواحنا إلى السماء..
ولكنا قد سبحنا في الهواء..
الجاذبية قانون زاوج بين الأرض والتفاحة..
كان في السر دونما شهود ولا خيام نصبت في الساحة..
زواج جلب لنا الشقاء حرمنا الراحة..
أنجب لنا جنينا في سبعة شهور بلا رئتين..
يتنفس أنينا..يبكي طحينا..بلا ساقين..
يتوكأ عصا القهر ويقهقه بلا إستحياء..
باهت اللون جمعناه كما الأشلاء..
هكذا هو زواج المتعة يدفع ثمنه الأبناء..
أنشأنا لهم دارا في المايقوما لنجمعهم..
ولكنا فرقناهم..
إحترنا كيف نسميهم ولمن ننسبهم..فأوهمناهم..
باهتانا أنتي عفراء اللمين..وأنت ياسر الحسين ..
طلب ياسر مصافحة حسين وسألت عفراء عن حضن اللمين..
ما نجحت الخطة فقلنا لهم أنتم مجهولو الأبوين..
دمعت عفراء مبتسمة فاجأنا ياسر بسؤال..
تبنى الأفعال على المجهول ..فهل يبنى الأباء؟؟
بالله عليكم من المسئول..مكتوب نحيا في شقاء..؟؟
الماضي يبنى على المجهول..حاضرنا لا تبنوه رجاء..
جاعت عفراء..وأشتهت تفاحة..
نعس ياسر فما وجدت غير الأرض فراشا..
أشتهت عفراء أمها.. ونام ياسر في حضن أبيه..
فالزواج عرفي بين الأرض والتفاحة..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
سفسف يا نابري
بعيدا عن النقد غايتو كان انت في السودان الله يستر عليك من ناس النظام العام.
راس تفيل ولا قادر تجر ايد لا كراع
دي ما ظنيتها حالة شعرية.
لو رجعنا للقصيدة
اعجبني جدا المدخل تماهي وما هي وان كنت اعيب عليك ادخال كلمة ماهي اشعر بانها دخيلة وزائدة على النص
وما دسيسة اذا ما قورنت بمفردة التماهي.
اجمل ما في النص هو عنصر المباغتة بالولوج لعوالم اخري بمتن النص ما ليها اي علاقة بمطلعه
وذلك واضح في صورة الكراع المارقة بيغادي للمرتبة.
اما بتاع التفاح العرفي دا اصبر ليه ساي بجيه بكرة الصباح اوريه النقد البلا بصل.
وانت بالله تاني ما تكتب بالليل.
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سناء الصباغ)
|
سناء الصباغ..يا أمرأة من يا قوت وقليل من باذنجان..
بكل بساطة..أنتي جدادة ضلت طريقها للإنسانية .
ياخ إنتي نقادة نقد شديد لكن..
مرحبا بك في مجموعة أصدقاء نادي الأحرار..
يصرف لها بطاقة عضوية وإتنين إسكيرت جينز ابو جيوب بدون طرحات..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سفيان بشير نابرى)
|
رديت عليك من غير سؤال
وجاوبت للهم الفرح
ختيت علي كل الاسي
وفرهدت بيك دنيا المحال
وانا انتظار.....
وانت السحابة الشايلة هم الدنيا فوق
ترسم ترقرق تدي للارض الذبول
في كل كون....ومع السكون
لاقيت سحابات الشجن
تنسج خيوط كل المحال
بي كل ارادة وارتحال
واتذكرك لحظات نغم
في نمة في شاي الصباح
بي رقة بي كل اندياح
واسرح بعييييييييييييييد
وانتي الخيال الخاطر الهم النزف
ياامسيات كل الاسف
مابين سؤالك والجواب
يتفتح الشارع حلم....
واناجي دربك يامحال
القاكي بين مليون ارض والف باب
اه.... ياعذاب
لامن الاقكي خطاكي تمرح في مسامي وتنتشي
والشهقة....نازلة وتنكفي
والطفلة حنة ونخلتين
والجنة ناره سعيره حي
يبداء السؤال.... من غير سؤال
وانا في انتظارك ياسهاد
راجي السؤال بعد السؤال
يتفتكت الخاطر يباب......
ارسل كمان كمين جواب
ارسل كمان كمين جواب
ارسل كمان كمين جواب........!!!!!
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
ســهـــر الجـــــــــــداد
هي الفوضى كيفن يااااا أخو!!
نظامك هنا، مشتت، مفرتق نظام
كتابك مُشّرط وراسك فِضى ..
عايز تخُت في اعتبارك شريط؟؟
غنجتَ، وشخرتَ ، ورميت الودع..
حرنت، وقفلت طبالي الهوا
أتاريك مبيت نوايا الحَلِق
تكورك تسب في الكلام الرجع..
رجوعك عمايلك .. طريقة حِلاقتَك ، تبيت القوى..
وتاكل خشاش الرمق والزفير..
- - - - -
ح تعمل شنو في استقالة الحديقة ، ووصول الصفق؟؟
أخير ليك تشيل – لو بتقدر – دواَية
وتكتب – ندامتك – في يافطة هوا
راجع طريقك ، وأضهب بعيد
عطّل مداركك وزحمة حُجاك، كان بتقدر تنوم
تنوم وإنت سهران؟؟ تنوم السَهر ..
- - - - -
حكاويك جديدة ، وقديم السمع
أخير تمشي مني ، تفارق طريقي
أبيت رفقتك ، التجيب الهوا
أبيت القى منك طراوة اللهيب
ورقعة طلاسم تفِـك اللسان
لسانك حِصانك، حُصانك حرن
تشد في لِجامو ، ح تقطع عشم
تشل أيد فنادكَك، تدق الجرس
تقاوم، تساوم، تزيد في العناد
ح ترجع وراسك محل مشيتك..
بترجع خطاك، لحركة ورا
وخطوة خلافك تشاتر النشيد..
ح تفضل تلحّن تغيّر..تلحّن.. بداية الحكاية ، وصوتك شرد!!
تحاول تغيّر مسارات حظوظك ، تَسِب الزمن..
برئ هوّ منك ، ومن شوف سماعك ، ومن خِلقتك
أخير ليك تفارق المكان البيطيقك
ويكره حبايبك، ويرقد قفا..
تتربس منافذ سماك المُلبد ، وترجع تنوم ..
تنوم إنت تاني ، وتساهر تنوم؟؟
وتَكرِيو – إنت قَايلو – بيرجع يجيك؟؟
دومك – هو حالف – يخالف كلامك، يزيدك سهر..
دومة بتفّلق في راس حكمتك
تخاف إنت ربك ، تحاول تتوب
تتوب.. تاني ترتد.. يساهر الجداد..
تنوم إنت تاني ؟؟ تنوم السهر..
تنوم إنت تاني ؟؟
تنوم السهر
تنوم إنت تاني ؟؟
تنوم السهر
تنوم إنت تاني ؟؟
تنوم السهر
| |
|
|
|
|
|
|
|
|
 Re: عايز أبقى شاعر حُر..تبقوا معاي؟ (Re: Salah Abdulla)
|
Quote: معاوية بن المدير رغم عدم التزامه وتمرده على التقيد بما
توافق عليه الشعراء الاحرار اي الخروج عن الادوات القديمة مثل
اعتمار العمة واطلاق الشنب على عواهنه حتى لدواعى ندرة امواس
الناسيت او كما قال سيدنا تاج السر الملك صاحب المعلقات المعروف بكعبة
امامنا وحبيبنا بكري اب قرعة ( اب صلعة هذه عبارة مطروقة ونحن دائما
نأتي بالجديد) فهو اي بن المدير لديه ما يؤهله للاسهام في الشعر الحر والسمو
به الى مصاف العالمية. |
تشكيرات للدكتورة سناء الصباغ علي هذا الكلم الذي سيدفعني إلي أعماق
بحر الإبداع حتي أغرق أغرق. أحاول بعض كلمات للتشكيرات لكنها
تستعصي لتخرج قطرة عين في عمق محيط كلماتك يا دكتورة.
شكراً مصحوبة برائحة عطر القرنفل، وزهور الكارنيشن...
جِلد كديس و بعض طلآق:
من بين الصدفين
أحدثوا ثُقب
في جدار القِطر،
وهربوا فوق ظهور الدبابات
عند بذوغ الفجر
ليدوسوا مشاعر حُلمٍ
عابق في مخيّلة
حبل مدينتنا الإنسان
يأجوج و مأجوج
أتو من خلف الجُدران
دخلوا تخُوم مدينتنا الحُبلى
الخر
بقروا بطنها
أخرجوا طفلها
من جوف رحمها
صاح كبيرهم المخبول
هذا الطفل ديمقرآطية !!!
رِجسٌ من عمل الشيطان
مضغ الطفل بفكي
بؤرة حقدٍ جوعان
لكنه لم يسغ الطعم،
فلفظ الطفل
مُضغة أمشاجٍ
فوق رصيف الأحزان.
جعلوه رئيساً بعد المضغ
والعدل علي أبواب
مدينتنا مذبوح
صنعوا منبره
من بعض بقايا سفينة نوح،
فقام خطيباً في القوم
يحلف بطلآق
يتلوه طلآق
انّ جلد القط يصلح مركوب
يصنعه الإسكافي مِداس
ليدوس به هذا المعتوه
شعباً مغلوب،
فضحك كديس الجيران،
وهربت كلّ الجرزان،
دخلت في وادي التِيّه
بل دخلت في المِحنة
كل الفيران،
فصاح مؤذن فجراً في الحي
من فوق المِئذنة:
هاجمنا البعشوم
داهمنا البعشوم،
فجلسنا علي أرصفة
الصبر المصلوب فوق
جذوع النخل
مقطوعاً بخلآف
نشهق ألم الجوع،
ونذفره في اللآ شئ
منتظرين ذو القرنين،
وخيط الفجر
في جوف ظلآله
صارت كلّ الأشياء
عدم.
ود المدير...
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: وليد محمد المبارك)
|
البقجلي..
سهر الجداد نومو..
صحي بدري ولقا كومو..
تببض الدجاجة بيضة واحدة على الملأ..
فترهقنا بالمكاكاة والصياح..
وتبيض السمكة مليون بيضة..
دوون أن يراها أحد في هدوء وارتياح..
الوعاء الفارغ يصدر ضجيجا..وهذا يفسر وجود غطاء للحلة..
بيد أن ذلك قد يفاقم العلة..
والثعلب المكار لولح ضنبو..
والمكضبنا وما مصدقنا يشوف بيتو الرما عنبو..
وحمادة التش..ما زي زمان حش شنبو..
وهذا يؤكد حقيقة أخرى تغيرت الفصول..
فالأوزون مثقوب والنجم يرفض للأفول..
السماء أمطرت بترولا أسودا بفعل عوادم السيارات..
والأرض انشقت أنهارا بلون الدم شلالات..
بفعل تداخل التيارات..
هذا تيار سلفي..هذا تيار شيعي..وذاك تيار قبطي..
ورغم ذلك إنقطعت الكهرباء..وحلف التيار ستين يمين ما يمر عبر السلوك..
سألناهو مالك؟؟
سكت..
قلنالو رد..
ما نضم..
والرد في السد..
والسد ما رد..
ووصلنا الحد..
واتلمو الناس واتقلبت جد..
تتقفل جامعة..
والناس تلبد تعمل ما سامعة..
يترحلوا ناس..وحاجة السرة ممحنة ضمة وما بتحل العين الدامعة..
كللللو منك يا المناصير..
والمشتهي الحنيطير ح يطير..
ونحن في راسنا يرك الطير..
ولا بنهشو ولا بنشو..
فقط محض إشتهاء..ومجرد فكرة..ثم قليل من الدونات..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: وليد محمد المبارك)
|
ود المدير
لم تخيب ظن كبار النقاد البتة
قصيدتك الاخيرة تمور بالمعاني الجميلة والاخيلة التي فاقت خيالات متعاطي الفرح الكيماوي بشتى صنوفه
هذه التومة الحبلى والمتماهية في المدينة الحبلى فيها استدعاء جميل لعدس الوابل الما محتاج اي توابل......قدحة بس
ايها الشعراء الاحرار
كي تنهضوا بشعركم آن الاوان للاستفادة من التجربة الشعرية لابن المدير
وبالنسبة لينا نحن النقاد تاني يا قصايد زي دي يا بيت ابوي.
وليد يحتاج لطبيب وليس لناقد مرة اسال ومرة دوشة وكمان جابت ليها كاسات.
صلاح عبد الله قصيدتك الاحيرة فوق النقد.
خايفة انقد اب صلعة دا يقوم يرفدني اصلو ناس الصلع ديل متعسفين وانا لسة جديدة (بالقديم) لكن قصة التفاح العرفي دي ما عا########ي كله كله بس باكلها في حناني
وزي ما بيقول المثل النقاد ربى عياله (مثل مصري قبل الثورة)
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
Quote: يا ود المبارك..
غايتو قصيدتك الأخيرة دي إلا ينقدا ليك الفاتح الصباغ..:-) |
ما قلتو حُر !!؟
حي انا
_____________
اسمع اخوك قاشر بالجزمة في دبي الان
وماشي بيها راس السنة في برج خليقة
عليك الله ما قيمتها ليك ؟
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: وليد محمد المبارك)
|
إنت دحين يا الفاروق فاطيني مالك ؟؟
يفطك ود البنا ..... قول آمين ..
يعني ما عاجبك إندياحي في الظلامات المفرهدة في دهاليز ورطتك ..
وعطشانة للحزن المعاك جزلان وفي الوردة الكآبة والفجور السرمدي ....!
والله اقوم ليكم في الشعر الحر ده والله احيركم زاتو ...!
ما تخلونا نتفرتك فيكم هنا ....!
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
ربــــاعــــيات الـــكـــلام (عل وزن الخيام وكده)
(1) : بــتاعـــت شمــــــــار
عرفتك نقشتك .. كلامك كتير ..
تحبي المشاكل .. تدوري الخصام..
تلفحي توبك .. تكوسي الشمار..
أخير ليك تروقي، وتسمعي الكلام..
يا سناء الصباغ ، طبعاً أنا باعتباري عضو مؤسس ، بكون زي الجلابية الأنصارية
تقلبيني كده تلقيني نقّاد نقيّد عجيب ، تقلبيني كده تلقيني شعّار شعيّر غريب.
هسي بالله شوفي زي الرباعيات دي ، مبالغة
كدي بس إنت أصبري شوية خليني أتمّ ليك
السلسلة الرباعية (المجموعة الكاملة)..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: وليد محمد المبارك)
|
اشارك :
تلتيق كلام والسلام :
تعبت من المساسقة والهتاف ياغيمة
أتبنى جبهة القمرة
السهر والحمى طول الليل تهضرب
ويا هدهد لقيت أمك
ترشرش فى السعف من عينها
وتجبر خاطرا المكسور عليك
ينكسر خاطر السعف فى إيدا
يا هدهد قيام
من السما الأول قيام
من السما السابع قيام
وأنزل مسافة تهبشك غيمة وأناولك كاس
تلتيق أول :
ومرت مراكب نوح محملة بالطيور
واقف مع نوح الغراب
ينضم ويأشر فى إتجاه
باقى الطيور يتوسوسوا
إلاّ الحمام إتوضا مارق للصلاة
القانقرد فى حزنو يغزل شاله من صوف
الطواويس شارّة قمصانا المزركشة فى الضحى
الزرازير بى عراريقا المغبشة جات على
أرجينى يا صالحة !
ومشيت فى الموج
يا النبى نوح أصل سالم
يا النبى نوح أصل
حجر الدُّغُش فى الموية يقلع ضُفرى
يادم !
ده وكت الرسم واللون !!
وجات المغارب حننت إيدا ومشت
سبحانك الأديتنا من حزنك فوانيس وانطفيت
وهكذا ..
( يا جماعة الكلام ده صعب .. والقصة ما ملاسي والسلام )
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
وطن هلامي
له محبوبة ذات ثلاث ارجل
غير انها عرجاء
البوم يبشر بالوعود
والغراب ينعق الحان مموسقة
نساء الضواحي جميلات
وذيول كلابها مستقيمة
غير انها لا تحبهن جميعا
الديدان في احتفاليتها الاخيرة
ترقب جثتي لتحيلها للعدم
غير انها لا تطاول روحي
امد لها لسان ساخرا
ذبابة اخرى جامحة
تحلق حول انفى تصادقني
الذباب كائن ودود
يحلم كما احلم
يفعل ما اود فعله
يجمع ما تبقى من نفايات
ويلقيها على ظهر محبوبته العرجاء
فالعرجاء لمراحها
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
| Quote: بالمناسبة يا دغيس إسمك ده فيهو حلاة إسم قصيدة حرة.. |
دغيس يا دغيس يا حرف الإن ؟؟؟
طيب ما ترشها طوالي ...
بس عليك الله كتر لينا من الإندياحات والدهشات والبوتقات والحاجات من النوعيات دي
ولو عملت لينا فيها شوية موتيفة وكده بتكون ما قصرت تب ..
نجاملك في سمح بوتقاتك زاته ...
أبو الحرية زاتو
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: حمد فتح الرحمن)
|
كريسماس..
لاح لي عبر الأفق..صوت سيارات النجدة رهاب رهاب..
واااا ويييي واااا وييييي..وااا..ثم غاب..
صوت ينبئ بالكارثة وتشابه علي البقر..
فربما هي سيارات إسعاف قادمة من شارع مدني..شريان الشما أو أي خط سفر..
خفق قلبي..دق دق ..طراخ ..تاح..ثم استراح..
مديت راسي أتاوق..
البيض على الطرقات..
وبت لابسة ضيييق شايلة موية صحة..
والناس تنطط جوة العربات..
واللابسة ضيق زولة سمحة.
الناس ترش زش في بعض..والضحكة ما تدي الدرب..
لا قادر أجوط لا قادر أحب لا قادرأفرزو ده جد او كان لعب..
غير أني كنت أرتدي حذاء رياضي ماركة أديداس..
وهناك شايف راجل أربعيني يسجر بالدس..
سمعت صوت الحفلة..عشاها فاخر..كوكتيل رياضي..
قليل من سمبوسة وشئ من مشاوي وصحن بلطي فاضي..
دفعت ثمن التذكرة لأسمع هذا الهراء..
شييييت..أوووووه ماي قود..
حبيبتي أرسلت لي ذات الليلة دب وردي اللون..
مكتوب في قدمه اليسرى أحبك ..
وكرت خمري اللون والتوقيع متيمتك فلانة..
أشفق كثيرا على عامنا الهجري..
كثيرون بل كلنا لا يدري..
في أي عام نحن ..من يدري؟؟
فقط المغتربين في السعودية لأسباب تتعلق بدفع إيجار الشقة..
وعم علي عامل من علبة نيفيا الحقة..
والناس محتفلة..
وصوت النجدة يكورك لسة..
ومن الخوف الناس مندسة..
أمرقو..مرق جلدكم..
وهاف أ نايس ويك إند..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
ولي ياخ خلي روحك شاعرية
فنحن نحاكم الشاعر من خلال نصوصه وقالوا ليك باخ الشعر دا حالة ابداعية
ودي ساحة ابداع تجي تقلبها لينا حوادث مستشفى ام درمان كلها اسهال وطراش وضبان
بعدين ياخ ما تهدد
ياها دي حركاتكم الأخرت حركة النقد في البلد وادت لهجرة العقول الناقدة.
لكن للامانة نصك الاخير ( تواشيح) يمثل نقطة فارقة في مسار حياتك الابداعية
وبيذكرنا بمدرسة التضاد بتاعة الفاروق اللي لاحظها صلاح عبدالله في نص سابق وانا من هنا بحييهم
وبتمنى لصلاح السنة الجاية البرمودا تكون ما شدة وتكون برتقالية عشان دلالات اللون وكدا.
موضوع التضاد بنلاحظه في ثنائية الرجل الابيض وسلطة الاسود.
ولنا عودة يا فتح الرحمن وعصمان دغيس ما تستعجلوا رزقكم جايي.
ود الصائم علمنا بما وراء النص انما الشعر بالنيات وانت نيتك الناس عارفينها فشكرا على خوفك على البوست من التخوير.
| |
|
|
|
|
|
|
|
|
 Re: عايز أبقى شاعر حُر..تبقوا معاي؟ (Re: سناء الصباغ)
|
يا سلآم يا ود الصايم علي الإبداع.
ما كنت قايلك نحرير.
والله صحي.
التحية لك وأنت تأتي من صوت رنّة قرش أبيض وقع
في الظلط لتعطر هذه المساحة بعطور الضوء المنسكبة
في بوتقة زرات الرمل عطراً، مجرات الرمل تعانق
قيزان الأنجم تسطع، خيط النيل أحاسيس...
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: معاوية المدير)
|
شايل قفة و طالع افتش
حلة رزقا ماهل
مادد قرعة و شادي ضراع
طالب لقمة و جغمة
مادي جنازير صبر الناسك
دارع فاس للزمن الاغبر
الا الزمن بي جد اتغبر
موية الجدول قطت
ما البابور مصرانو اتقطعت
الحيضان ما هي الحيضان
اتفتل التقنت
الطورية الايدا اتكسرت
جبرت ايديا و رقدت
المنجل عزا المحرات
في موت الاربل
والواسوق حبالو انقطعت
القفة انقدت
طلعة نملة تكوس السكة
الدرب الواضح
درب المنجل والطورية
درب الجد الرابع
زارع قمحو بدون بابور
وراوي الجدول بي شادوف
مالبابور هو الجازو
مطلع زيت الجيب
يا تدخلو لينا الكهرباء
يا ما حنزرع
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: معاوية المدير)
|
رباعيات الكلام
(2) : مبــــارية الجــــــداد
يا الداخلة بي شارع غلط ، وداك لي درب الجداد
هابشاني مالك يا وهم!! قايلاني جايي من البلد!!
هبشتي نار منقد عديل، ضيعني نفسك سمبلا
يا فارة لو جابِك خبر، بيرجعك شم الأتر..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: Salah Abdulla)
|
ريساجة وقية*
بطقطق أصابعي، وآكل الملف
وأغبر جليد الزلط ،،، وأنكفي
أكسر حِلل ناس نفيسة القُدام
ترتار غسيلكم وشجرة فسيخ
وبمبان طراوة وقدلة خميس
يغسل رغيف ناس عوض ،، ويتلحس..
زرزور مُتكّل في حيطة المقابر
مدردم نهارو مُؤجِّر عرِش
حفلة عفشكم حاشية القميص
مكيّس مخدات هواهم قطن
أظنك مشيت تاني للبيزنقوكم
مُلمِّع صلعتك وناسي الفرن
تعال عندي ركشة وريساجات سبيل
تجبّد تعربد مصيرك بحر
تهش في غنمكم ، وتعمل حِميل
تقرطع حليب المراعي ، وتقيف
يمكن تلاقي الراديتر بلع
شديدة الريساجة ، وقريب الوصول
تعمل حسابك نظامك بيسير
تفرط ، بتركب شارع السبيل
شفِّط شوية ، وحاول تميل
وأوعك تحاول تسهي وتغيب
بتلحس حنانك ، وتضرب يمين
لا بعشر بحلك ، لا بيفيدك سفر
ولا ماحي التجاني بيجيب ليك خبر
- - - - -
*: يا سناء لأغراض النقد، يرجى الاستعانة بصديق للترجمة.
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: Salah Abdulla)
|
ياصلاح ياخي راعي الذائقة بتاعة المتلقي.
المعاني موغلة في الغمود والراندوك دا ما موجود في ايتها مدرسة نقدية.
بعدين يا خوانا نحن مش اتفقنا انو ما في رول بكتب وهو تحت تأثير اي نوع من المكيفات ما عدا الشامبيون عشان
يساعد في شعر البطولات والحماسة.
بعد كدا الا نعمل ليكم زي ناس الكورة كشششف عديل.
انتوا النوع دا بتلقوهو وين في الدوحة؟
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سناء الصباغ)
|
| Quote: انتوا النوع دا بتلقوهو وين في الدوحة؟ |
يا سناء ياخ نوع شنو في الصقط ده، نحن شغالين (من الأمس) ياخ..
القصة ما فيها تحت ولا فوق أي تأثير
الموضوع كلو إنك تتقمص شخصية (الأمس) بكل مؤثراتها
وتطلق لنفسك عنان الكتابة (في حدود)
- وإلا - بعشر ما يحلك.
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: القلب النابض)
|
يا قلب..
انا كنت قايلك جوعت من ورق الشجر..
ومن مزازاة الشوارع ومن رقاد ناس الحفر..
يا قليب..ياما كتبنا..
مرة جينا..وألف زوغنا..
ومرة شاي عصرية في عش الحمامة..
ومرة في جمب الكوشة وفي باقي القمامة..
ومحلبية معاها حنة..
جاية تسألي في الدبارة..؟؟
والوطن باعة بخسارة..؟؟
يا قليب مافيش دبارة..
لا المراكب قادرة تبحر في الخريف..ولا نحن لاقين الحمارة..
إهحاء لقلبنا النابض بمناسبة عيد الأم..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
اللهو المباح..
جردل موية وطشتين غسيل..
زيرين كبار وكوز السبيل..
والظهرة ديك الما خمج..
سيفين وجرتق وسوط عنج..
وأمونة حالفا تصبحا..
قعدت تغسل والديك لساتو ما صحا..
والمكوة كانت دستتين..
ومعاها زادت بوقجتين..
فحم السجم ابا ما يولع..
وهي بتشيل فيهو وتدلع..
مرة تنفخو بالكضب..
ومرتين هب اللهب..
تبا ليك يا فحم وتب..
ولع ولعك بلا يخمك..
ولو ما ولعت الغدا يسمك..
نط القميص قال ليها كيف؟؟
انا ما تكويت والدنيا صيف..
والبنطلون حرد الأكل..والتوب يقرض في الرغيف..
امونة جرت بمبرا..ورافعا القميص حد الكفاف..
بالجمبة كانت قعدتا..ومكشوفة ساقينا الظراف..
مشروط وفي الكم اليمين..
والصدر بارز حبتين..
والرادي ردد غنيتين..
وانا عامل الدرب ساساق..أشيل واترسل ..
في شان أكشف لي امونة واتوسل..
التاية قالتلك ادينا ملح..
نفيسة عايزة حبببة طلح..
وجات سيرة الطلح ولقيتو مدخل..
وسألت امونة..هو شنو الطلح..وشن فايدتو..
أمونة خجلت مرتين..ونهرتني بي صوتا الحنين..
عيب يا ولد..ولا أقول ليك..نفيسة عايزاو للبخور..
وتهش بيو ضبان خريف..بييلف ويدوور..
امونة رجعت للغسيل..
و بروة الصابون تغازل في حنتا..
وباقي المكوة يسمع في كلامنا..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
يا طالعة من قُسيبة الليل الفسيح
داخلة قيساب صبحا اخضر
يا ست بنات كل الفريق
رحطتك جلد تمساح
منتعلة شبشب اب سيرين
ماشة تقدلي بي درب مامور
نازلة للتحتانية منجلك قلمك
طرحتك كراسك
درسك حروف زمن التحاريق
يا بت رجال ضل الفريق
شامبوك زيت كركار
و كريمك الودك المعطر
فاطرة روب بالسمنة
غداكي لايوق وحلاك تمرايتين
وعشاك من خير الجروف
يا حبيبة الولد الصنيديد
مهرك مراح
سد مالك القونجة و العاجات
وعرسك يجمع الفرقان
من حلة دويح لي قبلي
لي ابعد فريق
يا ام شبيل مستقبل
البلد الرفيق
قبل الطريق
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: حمد فتح الرحمن)
|
أخوانيات و حب للمدن و الناس
الديامة اخوان ناس
جمر منقد عدييييل
فراس
بعرفو الواجب صغار وكبار
بعدلو الرأس
اسياد شكره يوت
بينين
يضوا يلالو
زي الماس
ديل الدوام في جموع
يحضونك بالبسمه
يوادعوك دموع فى دموع
حنينييين
و شديدين بأس
حدودهم ما بنطوها
ادبهم فيهم اصلو ما محبوس
ما تقلب صفاهم اصلوووو يا منحوس
ديل ناس القنا
قدااااام و ضروس
لو جيت أب حشيش اسكت ساي
يا ما تلقى تروس
عاين بس محل شرقيه أو غربية
ناس جدعااان لو خاويتهم
تكون محظوظ
الديامه ناس راقين
فنانين
كتابين
رساممممين
لاعاااابين
كورنجيه
محترفين
عمال الحياة
اليوماتي
صناع الامل لبكرة
في كتاب
تلقى دروس
الديامة
فاتحين الحضن مشرع
لكل إنسان بالمجان
تسكن في القلوب و تجوس
طالما سمتك الاحسان
تقعد جووووه زي شريان
و تتوهط
لا فى رقابه
لا محروس
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: حمد فتح الرحمن)
|
ياقلب..
يا قلب يا نابض..أنبضي..أنبضي..أنبضي بالحياة
وعيشي يومك وانت واثقة إنو باكر يوم برا
وانسي هم الدنيا كلو، وفارقي حزنك والضنى
خلي قلبك دايماً ابيض ، وأوعي ترجعي لورا
بالله دي أحسبيها تبع الرباعيات..
- - - -
المهم في (المدرسة الحرة) دي - يا قلب - إنو قصايدها (مفروض ) تكون موحية..
هسي أنا قاطع شكي إني أوحيت لسيد المدرسة بقصيدة الغسيل دي ، بالترتار..
وأنا استوحيت من قصيدتو دي زي خمسة أفكار ..
ياخ دي مدرسة ح تكون فتح عديل كده ياخ..
وبعيدن بيني وبينك ، ملاسي قال الجماعة (المتشوعرين) لو لموا في البوست ده ح يغرفوا منو غرف تقيل
انا عااااارف إنو المتشوعرين أبان دواوين ،هسي بيكونوا شغالين متاوقة بي هنا
يلطشوا في الأفكار والمفردات (الحرة) حقتنا ، ويشتغلوا سمكرة ..
لكن على منو !!! والله إلا ينشروا شغلهم ده في الصين.. وهناك برضو بنلحقهم..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: Salah Abdulla)
|
دعاش..
صحتني مطرة ..نص الليل..
وانا لي اللحاف غالبني شيل..
طويت لحاف البهدلة ..
خليت سفنجة وعود ثقاب وناس بيتنا جارية مزهللة ..
ودخلت أوضة مضلمة ..أحاول إضاءة المصباح ..
أتحسس الحائط كي أجد المفتاح ..
وجدته غير أن مصباحي لم يضئ بفعل جمرة خبيثة ...
ياااا لها من ليلة تعيسة ..
ربما الكهربا قطعت عامة ..
هكذا بدا لي صوت أخي الكبير البطنو طامة ..
ما تبهت الجمرة ساي يا عمر ..
إمكن يكون غاب القمر..
صوت أختي الصغيرة تبرر تلك العتمة ..
أفتحو الشباك فكونا من يادي الكتمة ..
كان هذا صوت أمي ..
وهيدي إمي بتعتل همي..
منك إنت ملا إنت ..
والمطرة زي صنت كده ..
ورجعنا طلعنا المراتب ..
ويا الرعدة زي صوتك هدا ..
والسما وقفت الكراكب..
وضعت رأسي على الوسادة ..
>> ثم أممت وجهيا شرقاً في إتجاه القبلة ..
أفكر في حبيبتي وانا وهي حين غفلة ..
و كيف أنني طبعت على شفتيها قبلة ..
أها قومي تااااني يا المطرة صبي..
والمرة دي شووو ...
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
Quote: يا قلب..
انا كنت قايلك جوعت من ورق الشجر..
ومن مزازاة الشوارع ومن رقاد ناس الحفر..
يا قليب..ياما كتبنا..
مرة جينا..وألف زوغنا..
ومرة شاي عصرية في عش الحمامة..
ومرة في جمب الكوشة وفي باقي القمامة..
ومحلبية معاها حنة..
جاية تسألي في الدبارة..؟؟
والوطن باعة بخسارة..؟؟
يا قليب مافيش دبارة..
لا المراكب قادرة تبحر في الخريف..ولا نحن لاقين الحمارة..
إهحاء لقلبنا النابض بمناسبة عيد الأم |
هذا اجمل ما سمعت من وحي القصايد
نحن جايين بالدبارة
يا حليلك يافاروق
مشتهين موية المطر
والغسيل الفي الطشاطا
مشتهين طين البحر
نحن قاعدين في الطشاطا
وانتو في الكي بورد نقر
مرة غلست لي هدومنا
فرحت كل الحزانا
وفرغت كل الخزانة
مرة عملت شاي مقنن
لممت كل الخرامى
شربوا من شايا العمر
ضفروا لليل غناوي
كسروا ركب الفجر
نسجو من عيونا معني
تحتو عاشوا ناس حيارى
غنو عنيات العمر
ـــــــــــ
مرفق وردة بنمية
ـــــ
صلاح عبد الله خليني اذاكر كتاب نقد الشعر الحر في القرنين العشرين والي بعدو
لابن المستكفي المكتفي بالله الشهرستاني
| |
|
|
|
|
|
|
|
|
 Re: عايز أبقى شاعر حُر..تبقوا معاي؟ (Re: القلب النابض)
|
Quote: ود المدير
لم تخيب ظن كبار النقاد البتة
قصيدتك الاخيرة تمور بالمعاني الجميلة والاخيلة التي فاقت خيالات متعاطي الفرح الكيماوي بشتى صنوفه
هذه التومة الحبلى والمتماهية في المدينة الحبلى فيها استدعاء جميل لعدس الوابل الما محتاج اي توابل......قدحة بس
ايها الشعراء الاحرار
كي تنهضوا بشعركم آن الاوان للاستفادة من التجربة الشعرية لابن المدير
وبالنسبة لينا نحن النقاد تاني يا قصايد زي دي يا بيت ابوي. |
يا جماعة بصرآحة بعد كلآم كبار نحارير النقد هذا، انا قررت أطبع ديواني الأوّل
وداير مساعدتكم.
الديوان تحت عنوان (صبايا يستدفئن علي ثلوج نيرآن المجوس). إخترت لكم هذه
القصيدة من الديوان:
عشم لو تمطر السموآت فرح...
خرجت من جوف لفافة قطميرها
تزهو فوق جروف الأمل
الطلّ يتاوق للسمحين
في ناس شافوهو شوف العين
ضامي بحضن الشوق
الجاي يرفرف بجناح
الضوء الحطم قيدو من
سجن الظلمة بقالوا سنين
شتلة حاج الزين.
الشتلة القامت فوق القيف
فرحانة سنابل القمح
الليها زمن ما جاها خريف
الجرف الشابا للنخلآت،
وخدارو وريف
رقصت فوقوا فراشات
الحلم العسجدي طارت فوق
العشم الجاي معاهو
بشارة الفرح الداير
يحكي للنوار
حكاية شتلة حاج الزين.
تمر الشتلة وكت يتحتحت
فوق الناس الغلبانين
تمرات للزين، وهِين
هِينين للغلبانين
ونطمر منها كم تمرآت
يبقى تجور علينا سنين
وتاكل منها نملة صغيرة
وعصفورتين.
شالت فوق راسا الشتلة
صبيطاً تمرو كتير
الناس الرآبطة في
بطونا حجارة
في تمرة حاج الزين
عشمها كبير
الشتلة التعبت، وشالت
دار تتكسر
في صُبح الشوم
شالوها العسكر
والعشم الكان معقود
فات عشم إبليس في الجنّة
نقطة العرق وقعت علي
وجه الأرض
سلوكة والمحرات حزين
الطير والناس القبيل
منتظرة لحظات الحصاد،
وقمرية ما قدرت تطير
ما شالوا من الشتلة
فِشقة قطمير.
رحلت والدمعة مبارياها
حزينة
تغازل
في النجمات.
ود المدير...
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: معاوية المدير)
|
| Quote: أخوانيات و حب للمدن و الناس |
أيها الناس ...
ها قد أتاكم الشاعر الفطحل سفيان بن نابري بما لا قبل لكم به
قصيدة مدح من عيون الشعر العربي
قصيدة في مدح محبوبتي التي لا أطيق فراقها لأربعة أشهر
مدينتي ( الديم ) واهلها الطيبين..
ياخي كتر خيرك يا سفيان ، وشكلك من رواد الديم..
والله يكفيك شر ( النقّادين ).
غايتو ناس مالك أمين نابري (أظن) كانوا جيراننا.
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سارة علي)
|
فطور العريس ..
طباخ تمام ..
الكمشة في إيدو اليمين ويشيل ويردح بي الشمال ..
وتعالي يا بت يا سهام ..
خليكي قاعدة يا منال ..
ووصاف وصف !! لا حولة لا قولة ..
وشناف شنف !! يحلك منو الحلّ بلة ..
والساعة اليطب ليك جلابيتو ..
ويقوووم كده يرمي طعميتو ..
هيي يا يمة هيييي عجينكم ما سمح ..
أجي يا بنات أمي !! وينو القمح ..؟
قهقهات تشق صدر ذاك الليل ..
نساء حارتنا يجتمعن حوله غير ابهات ...
يضحكن غير مباليات ..
غير أن أكثر ما يؤرقني ذلك الثور المربوط في قارعة الطريق..
خصوووصاً لو قام فكّ الحبل وجرى ..
ترى كيف سنمسك به يا ترى ..
وكيف نسلم من لسان ذلك الطباخ الشرير..
بري..بري..بري.. منكم الرجالة تطير..
ناوليني المحشي ده النقضي شغلتي ..
والرسول فيك جيبي الصاج ده يا بتي ..
وصوت جدي وهو يحمل إبريقه لقطع الجمار..
واذان الفجر حي على الصلاة ..
وصوت نحنحات ..
عفواً هذا المرحاض مشغول الان ..
وشفع صحو بدري يلحقو شاي اللبن قبال يخلص..
وبت جيرانا في كامل أناقتها في طريقها إلى حبيبي مفلس..
طباخنا يا زول جميل..
يا الما خمج يا زول عديل ..
مني ليكا تحيتين ..
ووردتين ..
يا زول حلو ..ويا زول نضيف ..
يا روعة حد الإندهاش ..
عندك فكة خمسمية ؟
.
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: Salah Abdulla)
|
الشاعر صلاح بن عبد الله بن ديمويه بن دوحة المضري
تصدق دي دخلتي كان عندنا ليلة شعرية بنواحي دنديي الاسكتلندية التي تعج بفصحاء العرب
شايفة بن نابري قد بركم ايها الديامة بقصيدة اخوانية جذلة تستحقونها نسبة لفراسة جكسكم الذي يوصل اولاد العمارات بعد احتفلياتكم الرابة التي تسير
بكشفها ونبقها وقردها الركبان. الديم تلك البقعة التي انجبت النبق النبق والقرد والركشة وهبة الديم.
ياقلب اذنك معاك في النقد فالحكاية هنا كلها حرية في حرية
لكن ما تشكري طووالي النقد دا عشان يكون بناء لازم يكون في رش
بعدين الجماعر ديل بدوا يشتروا في قلمك الناقد بشوية قصايد شكير كدا لكن خليك يقظة وحكاية الكوشة دي ما تفويتيها.
فدياس دا رسلته ينوب عني في لجنة التحكيم في مهرجان الجناديرية ما اظنه يتاخر كتير.
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سناء الصباغ)
|
يا سنا ليك وحشة والبوست من غيرك وهم
حبينا نسد الفرقة في النقد لكن ما ظبتت
جاييك من زمنا سمح
فرش الطواقي تقول بحر
كتب الحروف وقت السحر
كتب الغمام كلام زعل
نزل المطر جوووووو
والدموع
ضحكت سنينات الفريق
واصبح غريق
في سكتك
بكت النجوم وكذا الشمس
طشت الغسيل
حبل الغسيل
والمكوجي
وطباخ عمر
تسمع صياح الحلة فوق
لولت نساوين الفريق لدمعتك
هاتن بنات اللعاب لي ضحكتك
هدرن كتير
سكك الحديد
طواحين السجم
سجم الرماد
والرماد كال حماد
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: القلب النابض)
|
ما تلك بيمينك يا عمر ..
قال هي عصاي أهش بها على الذين لا يتحررون
وأفلعهم بالحجر ..
يا معشر الأحرار قد مضي عام مُر
والقادم أمر..
لا ربيع مر بنا ولا يحزنون ..
كنا ما زلنا للخشوم فاتحون..
و يا سنه ألفين وحداشر جاريه مالك مستعجله ..
الناس لساها مأمله ..
لو ما بكره أكيد بعدو أمورنا مسهله ..
عشمتينا وأكلتينا نيم بملعقه ..
يا مستهبله ..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سارة عيسى أحمد)
|
دلال يا دلال يا حرف الإن..
ياخ الشعراء الأحرار يتبعهم الجكس ..فمرحبا بك جكسوية حرة..
إستياء..
يا زولة من عشم الوجع..
يا طاشة ماكي مصدقة..
يا فارشة ياقوتك سلع..
والهبهان والجردقة..
أديني رطلين من حنان..جكين فرح..
ما الدنيا ياها مساسقة..
ووقية من هم الصباح نص كيلو من لحظات لقا..
ما فضل الشئ الكتير شوال هموم ياهو البقا..
وطنين كبار من حسكنيت فيهو الجراح مدردقة..
يا زولة سيبك من وجع وتعالي يلللا نجقجقة..
أجقجقجقجقجقجق...
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سارة علي)
|
فضل الظهر ..
شاغلني يوم داك في زقاق ..قال لية وينك يا عسل..
جاوبتو بي كل إحترام ..ممكن تحدد لو سمحت ؟ عسل أبو أسد ولا النحل؟
لسعة أخرى من الملكة وهي تنام مع ذكر الفراش ..
رغماً عن أنها لا تعرفه.. فقط شافتو في شارع عبيد ختم طشاش طشاش..
الخطة كانت تسألو عمو الفراش ماشي قدام ؟
وبالصدفة ترمي لطرحتا ..وبالإيد تلوّح هاي سلام ..
عوارض من شفع مدرسة أساس لغمو الجو ..
ومع كل فرملة عربية يجو جاريين فوووو ..
إنتبذت مكان قصي وأخرجت علبة المكياج ..
قررت أنها لن تهز جزع نخلة بعد اليوم منتظرة من يقلها إلى أمواج ..
ماشة وين يا أخت ؟ ذكر الفراش الهاشمية ساكت شالتو ..
لا خلاص وصلت ... شكراً كتييير ..ملكتنا حالاً جاوبتو ..
انا زاااتي وصلت ..تعالي أوصلك محل واصلين ..ونوصل سوا ..يلاكي لي درب الوصول..
طبعا الموضوع ده ما عندو علاقة بي واصل علي ..فقط كان هذا الحنك الأخير وأفضل الحلول..
وملكتنا عاد ما صدقت ..وفي الكرسي سرعة أتوهطت ..وللشنطة حالاً فتّحت..أحمرا شفايفا طلعت ..ولي عيونا أيضاً كحلت ..
والكلام ده كلللو هي بتعاين في مراية السواق ...
والفراش يشييل ويعشق..وياااا رباً توصلني نمرة خمسة بتييين ..وأبل الأشواق ..
شفقان عديل دوون ما يحس أداها خلف ..
حلج التروس قلب الجلب واللديتر سخانتو ألف..
هكذا قال أنشتاين في قانون النسبية ..
لا تستعجل فكل الأشياء تأتي بي الحنية ..
وقبله أرخميدس عندما عرف قانون الطفو ..
لم تكن الملكة تدري بأن إسكيرت الشامو بيشيل نفو ..
وإلا ما لبسته وكان عادي بدلو ممكن تلبس إسكيرت هزاز موورد ..
فالفراش يحب الورود ..
وده كلو كوم وصينية أزهري ديك كوم براهو ..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
في الحتة دي..
(في الحتة دي) أنا عندي راي..
نقدر نقول (زي) في اتفاق
(إنو المسائك زي) بقت أوضح كتير..
(نقوم) نخت نقطات هنا ، وخطين هناك..
(ما عادي) ما ممكن نفض الاجتماع..
أو ( يلا) نقدر بالتكهن ، نعرف البيحصل هناك..
ياخ قوم بلاش تخريف معاك
شابكني حتة وزي نقوم
عايز تقوم، أحسن تنوم
والـ(زي) بتاعتك (زي) ح ترجع تبلعها
والحتة (ديك) ح تجي الجدادة وتنقدها
جدادي يلقط الحبّ
ويجري يجيب تلج ورغيف
طلب فول خالي زيت وملح
وصندق بيبسي فاضي هناك
تعب وفلس ونوم مافي
تقول لي زي ، وحتة ،ودي
بخبتك –زي- يمين شيطان
أجيب خبرك واذيعوا براي
وأديك – تاح تراح كفين-
وأكلم ليك أبوك بعدين..
أبوك موجود
الدود فوق العود
مسعود ضبح الخروف
(من كتاب المطالعة الإبتدائية)
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: Salah Abdulla)
|
Quote:
في الحتة دي..
(في الحتة دي) أنا عندي راي..
نقدر نقول (زي) في اتفاق
(إنو المسائك زي) بقت أوضح كتير..
(نقوم) نخت نقطات هنا ، وخطين هناك..
(ما عادي) ما ممكن نفض الاجتماع..
|
صلاح انا زي بتحفظ وما برد عليك لكن بنادي ليك القدرك مولانا خدر وود جبر الله.
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سناء الصباغ)
|
| Quote: صلاح انا زي بتحفظ وما برد عليك لكن بنادي ليك القدرك مولانا خدر وود جبر الله. |
يا سناء ناس خِدِر وعصام ديل فردي بالله ، ما تعملي لينا مشاكل
لكن برضهم فارات سياسة ..
وبعدين مجال المصطلحات ده بتاعنا نحن المعلمين ياخ
ياخ نحن الراندوك أوريجينيترس ، ونحن الكرييترز
ح أكتب ليك قصيدة عصماء في هذا الشأن ، فترقبيها.
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: وليد محمد المبارك)
|
عمري فات الأرببعين..
وعمر الزهور في الموردة..
والبورة بس عاد لي بتين..
جنيت براي متوحدة..
قعدت راجياو بالسنين..
والريدة يا حنيين كده..
قدر ما حاولت ألفت إنتباه الرجال ديل غلبني...آآي والله..
لبست ضيق ما نفع..وسعت ما اضفت شي..بس باقي لي ألبس ردا..
وكده يا ابردا..كده فنتاستك تمشي وتجي بي ردا..كده؟
كده يا عصام تشرني؟؟
وتخلي أمي تزرني؟؟
ما قلتي ياهو البشبهك..
والليلة ح يجي يخطبك..
ونحن نشيل ونخبز..ونشيييل ونشحد في الكراسي من الجيران..
وقسمة شغالة في المسجل..نضفنا جمب باب الشارع وردمنا الخيران..
وعصام ما جا..
مشيتي لي أماني تنس تحننك..
وعصام ما جا..
قلتي إلا غادة شرفي تمكيجك..
قلنا لييي ك عيبي لينا إنتصار جحا دي مالا؟؟
وبرضو عصام جا..
ابوك يشيل ويضرب ليك في التلفونات..
يا بت تسعة جات..
وعصام ما جا..
وإنتي شابكانا..بجي بجي بجي..
كلمني بجي..أوعدني بجي..بجي بجي بجي..
مالو ما جا؟
أححييا منك أسوي ليك شنو اسة؟؟
أجضمك؟؟
ولا أقرصك في وركك؟؟
والله يمة حرام..وريني إيه ذنبي..
شان إنتي تقسي علي ما تقيفي بي جمبي..
مكسورة خاطر عاد مجروحة في قلبي..
خليني أفكها في روحي واقول عصام حبي..
والله يمة حرام..راح يسألك ربي..
مش العرس ده خليتو ليكم أها كمان قولوا لي ما تلدي..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: Dalal Ezzaldin)
|
الموظف
يا الجاري بدون فهم
وينو فهمك !!
تصحى من الصباح تكابس للرواح
مستعجل للمواعيد ,, بدقوك لو ماجيت
ولاقيت صحبك بتاع كل يوم
الكمبيوتر بانتيوم 4
قايلو بونسك يالموهوم
شوفته الايميلات ,, وبعدين شوفته باقي الشمارات
اتذكرته فجأةً انك جعاااااااان ,, كدا من الصباح
شربت الشاي بكل ظرافه وكان جمبك زميلك عباس
وفجأه الساعه 11 جات,, اجي دا وقت الفطور
الحكمه انك برضو جعان ,,,
فول .. فول .. فول ولا طعيه
لا الليله داير اكله هنيه
يا بيتزا يا اما بيرقر بالجبنه
وفتحته الجزلان ,, ولقيتها ورقه وااااااحده امت 10 ما ميه
وقلت في نفسك انا تعبان لي منو ؟؟ مديتها وقعد جزلانك خفيف
اكلت فرحان وكانك سويت معجزه
ورجعت للكمبيوتر تاني
خلص الدوام ,, ومرقت بدون نفس ,, الساعات ما كفنك
عشان باكر تجي في مواعيدك وتعيد الى كان
يا عزيزي بتضيع في وقتك لي
حسه لو كان دا بيزنيزك كان حصلت اسامه داؤؤد زاتو ...
اكسب زمنك خلي الفصاحه
انت ما شجاع ولا عندك حصافه
قوي قلبك واعمل محلك او حتى اشتغل بي ضراعك
الوقت ماشي وانت ما لميت حق راحتك بعدين
امشي اهجر الوظيفه ال راجيك كبير
تبقى سيد نفسك واحسن مدير
وجنياتك من بعدك يدعو ليك كتير
انا كلمتك ,, ما تقول ما كلمتك
بعدين
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: وليد محمد المبارك)
|
قووود جوب وليد..
ركبت معاي الموجة في إرساء المدرسة الجديدة من الشعر الحر..
دي مدرسة لو مشت لي قدام حنكون مدير ووكيل المدرسة..
يا دلال مرحب بيك في نادي الأحرار متحولة من جكس النادي إلى عضو فاعل..
وحقو نمسكك أمين خزينة مع إني لاوزت من صرفك البزخي في البيرقر..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: زول ساكت)
|
Quote: الله يعلم شلتيها من خشمي
دا النقد ولا بلاش |
مش كدا بالله يازول ناضم
النقد دا مسئولية ونحن ما بنفتش ضمير المبدع لكن بنحاكم النص, بس شايفة
الشاعر اتحسس وقام يكتح متجاهلا عنصر الزمان لانو جيلنا كنقاد لما كنا بنركب ياعم
عبيد ختم زاتو ما اتولد خلي يستشهد.
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: سارة علي)
|
البؤساء ..
دخلت في الديانة الشيوعية ..
ليس إقتناعا بي الماركسية ..
لالالا لا والله ما كده ..
بس عشان ما كان عندي قروش..
بنطلون إدوين أبو تروس..جزمة تمبرجاك ..وقميصين ..أوضتين جالوص في نص الحوش..
كان هذا كل ما أملك ..إضافة لشعري المبرم ..
وكوني كنت في حلتنا ولد مقرم ..
وهمة البريم عملتها لما غسلت شعري بي قزازة بيبسي ..
والتقريم جا من كوني طرحت روحي ساحر عذارى وواهم جكسي..
أضف لي لستة الأسباب إني ما كنت لاقي نفسي ..
غير أن هنالك سبب أكثر وجاهة ..
ياخ قالوا بنات الشيوعيين ديل طيبات طيبة ..
وأي ونسات أي ألفاظ ما بتعيبة ..
ياخ ديل من شدة ما طيبات ما بلبسو طرحة ..
يقالدوك بي أقل شي كان في زعلة ولا فرحة ..
مالك ياخ مع مقالدة الشيوعيين ..مبااااالغة ..
وخشيت ليكم في الجماعة ..
ياخ ديل عندهم لعبة إسمها ثقافة ثقافة !!! ماااالك ياخ مع الثقافة ؟
أهم شروطها اللقافة ...
أعتقد أن البلاشفة سيرياليين ..جبريال قارسية ماركيز و .إيزابيل الليندي من الروائيين..
وانا والله ..وما طالبني حليفة أتقص كان فاهم شي...
حاولت أشارك في الموضوع ..
وطيت صوتي وبي حس موجوع ..
قلت ليهم إيزابيل دي مش كتبت الموضوع حق قتلوا طالباً اخر إذنـــــــــــ؟؟ بعرفا بتكتب معانا في سودانيز ..
وجبراييل ده مش عندو ولدو إسمو طارق قاعد في المغرب ؟؟ برضو معانا في سودانيز ..
بس النصيييحة وعشان ما أكضب عليكم البلاشفة ديل ما عرفتهم ليكم..
لكن والله ده ما بيمنع إني سعيد بيكم ..
مرتاح نفسياً وزي خلاص باقي عليكم ..
عقبة واحدة تبقت للعبور ..
لازم أحفظ أغنية والله نحن مع الطيور ..
حينها أدركت أنني جد جد طيرة ..
ومن اليوما ديك بقيت كوز ..
وعندي شريط لي قيقم بي العود..
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
الطرحة تجادل قانون الجاذبية
البنطال يجادل قانون الزمان والمكان
الطرحة في جادلها لا تقنع القانون
ومن يقنع البنطال
ان الزمان زمان ليل
والمكان ثكنة عسكرية
الليل يضرب خيامه عجل
ويبقى ممدد ساقيه
يمد لسانه للجميع
يرفض سريان قانون التعاقب
يخرج من خيامه فئران وعقارب
كلاب الليل تنبح ضاحكة
وكدايسه تقيم احتفالات تكاثرها
والبنطال لازال في انتظار الصباح
الطرحة فرزت عيشتها
وتعايشت مع قانون الجاذبية
والبنطال اتسع ثم استطال
ولازال الليل طفل يحبو
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: عمر الفاروق)
|
Quote: كان هذا كل ما أملك ..إضافة لشعري المبرم ..
وكوني كنت في حلتنا ولد مقرم ..
وهمة البريم عملتها لما غسلت شعري بي قزازة بيبسي .. |
وقديما صدق العرب عندما قالوا :
ان [B]اصدق الشعر اكذبه !
ـــــــــــــــــ
كدت ان اضيف للكود البيت الذى يليه
| Quote: والتقريم جا من كوني طرحت روحي ساحر عذارى وواهم جكسي.. |
بس قلت احسن ابقى على الكذب المتأكده منو ...
| |
|
|
|
|
|
|
|
|
|
Re: عايز أبقى شاعر حُر..تبقوا معاي؟ (Re: دينا خالد)
|
Quote: البؤساء ..
دخلت في الديانة الشيوعية ..
ليس إقتناعا بي الماركسية ..
لالالا لا والله ما كده ..
بس عشان ما كان عندي قروش..
بنطلون إدوين أبو تروس..جزمة تمبرجاك ..وقميصين ..أوضتين جالوص في نص الحوش..
كان هذا كل ما أملك ..إضافة لشعري المبرم ..
وكوني كنت في حلتنا ولد مقرم ..
وهمة البريم عملتها لما غسلت شعري بي قزازة بيبسي ..
والتقريم جا من كوني طرحت روحي ساحر عذارى وواهم جكسي..
أضف لي لستة الأسباب إني ما كنت لاقي نفسي ..
غير أن هنالك سبب أكثر وجاهة ..
ياخ قالوا بنات الشيوعيين ديل طيبات طيبة ..
وأي ونسات أي ألفاظ ما بتعيبة ..
ياخ ديل من شدة ما طيبات ما بلبسو طرحة ..
يقالدوك بي أقل شي كان في زعلة ولا فرحة ..
مالك ياخ مع مقالدة الشيوعيين ..مبااااالغة ..
وخشيت ليكم في الجماعة ..
ياخ ديل عندهم لعبة إسمها ثقافة ثقافة !!! ماااالك ياخ مع الثقافة ؟
أهم شروطها اللقافة ...
أعتقد أن البلاشفة سيرياليين ..جبريال قارسية ماركيز و .إيزابيل الليندي من الروائيين..
وانا والله ..وما طالبني حليفة أتقص كان فاهم شي...
حاولت أشارك في الموضوع ..
وطيت صوتي وبي حس موجوع ..
قلت ليهم إيزابيل دي مش كتبت الموضوع حق قتلوا طالباً اخر إذنـــــــــــ؟؟ بعرفا بتكتب معانا في سودانيز ..
وجبراييل ده مش عندو ولدو إسمو طارق قاعد في المغرب ؟؟ برضو معانا في سودانيز ..
بس النصيييحة وعشان ما أكضب عليكم البلاشفة ديل ما عرفتهم ليكم..
لكن والله ده ما بيمنع إني سعيد بيكم ..
مرتاح نفسياً وزي خلاص باقي عليكم ..
عقبة واحدة تبقت للعبور ..
لازم أحفظ أغنية والله نحن مع الطيور ..
حينها أدركت أنني جد جد طيرة ..
ومن اليوما ديك بقيت كوز ..
وعندي شريط لي قيقم بي العود.. |
الحكاية كبرت أوي
جخافل الظلام (صلاح عبدالله وعمر الفاروق) تتكالب عاى قوى الاستنارة
سريع يا عصام جبر الله وخدر تعالوا رشوا الناس دي
ممكن تجيبوا معاكم انو ساندرا ومحمد حيدر المشرف.
خالد عبيد وعاطف مكاوي خلوهم للجولة التانية.
| |
|
|
|
|
|
|
| |
وضاحة
وليد محمد المبارك
سناء الصباغ
عمار يس النور
القلب النابض
سفيان بشير نابرى
عمر الفاروق
khaleel
haroon diyab
معاوية المدير
Hussein Mallasi
محمد حيدر المشرف
حمد فتح الرحمن
محمد عبد الماجد الصايم
زول ساكت
وليد عبد اللطيف
Dalal Ezzaldin
سارة علي
سارة عيسى أحمد
دينا خالد
فيس بوك
تويتر
انستقرام
يوتيوب
بنتيريست