مرّ المحارب من هنا-استقبال جون قرنق بعدسة وجدي كامل

Quote: ...شفت الباسم بعينى دى يده فى يد السلام...و شوف العين قاسى...ضبحتونا.. سلختونا برضه مبتسمين... اصلو الزول ما يمد رقبتو شويه كدى لى بره و يفك نفسه من التفاؤل الحذر المستمر من سنة حفروا المحادثات ... قلت هذه لحظه يجب ان تعيش... ما بعرف قدرت اسوق بالسرعه دى كيف ...اخيرا البيت يا اولاد امرقو امرقو بسرعه بسرعه يا ماما ياخ دقيقه ...مافى دقيقه و لا فى ثانيه... اركبوا بس يا ماما انا حفيان ...ياولد اركب ماشيين نشوف قرنق و يمكن يكون من الضمن شايل معاهو سفنجات... و جرى على نفس الشارع ...العربات المارقه منو ياشروا لى ارجع ...الشارع مقفول من الزحمه...ارجع ارجع قال.. كان ليكم... اتلفت على و ليداتى و هم مبهورين بالمشهد كله ...ياماما ده شنو؟.. ديل منو؟.. و جو من ين؟.. و عشان شنو؟... يا اولاد املو عيونكم كان بتنملى.. فجأه تقمصتنى شخصيه بت قضيم قلت لغدويه ...عشان بعدين تقولى لى وليداتك: والله فى شنة 2005 الوكت داكعلى ما اذكر اكان عندى 11 سنه و الله امى الله يرحمها جات داخله البيت تجرى ذى المجنونه و خمتنا عشان نمشى نشوف استقبال قرنق و قالت لينا دى لحظه تاريخيه... طبعا انفجروا من الضحك من طريقة الكلام...بعدين غاده قالت لى ياماما انا ما عايزاك تموتى..قلت ليها و انا كمان ما كنت عايزه اللحظه دى تموت.. انا شفت الغرب و الشمال و الشرق الا الجنوب و الله ينعل الكان السبب كان فى الشمال والا كان فى الجنوب...الناس البعترفوا بأنهم عنصريين و بمرقو رقبتهم و ينفضوا يدينهم بحجة (هذا ما جبلنا عليه) والناس البتهموا الناس البقولو نحن ما عنصريين بتهمة الادعاء و الناس الشايلين عصايات العنصريه رايات عينى عينك و الناس الداسنها بتحت.. والناس الامبارح قالو لى اها نحن كنا تبعنا المنطق ده و اجتهدنا نتخلص من العنصريه الماكنه جوه.. اها.. هم بخلوها و بنسوها .. ...اقول ليكم حاجه..... عليكم الله فكونا كده...