مابين البروف النعيم والأستاذ خالد الحاج. أين يقف الأخوان الجمهوريون ؟

Quote: سؤالي ليك يا أستاذ إبراهيم و للاخوان الجمهوريين ... إذا انتو كجمهوريين قبلتو و إستوعبتو إنو الأستاذ يجتهد فيما فيه نص - كلام الله و رسولو - و يطلع بفكر جديد يقول عنو ده الاسلام الذي لا إسلام غيره .... المانع شنو دكتور النعيم - أو أي أخ جمهوري اخر - يجتهد فيما فيه نص من كلام الأستاذ و يطلع بفكر جديد يقول إنو دي الفكرة الجمهورية التي لا فكرة جمهورية غيرها ؟ رغم إنو دكتور النعيم ما قال كده !! إعتراضات أستاذ إبراهيم أعلاه هي نفس إعتراضات معارضي الفكرة الجمهورية إنو الأستاذ فكر و قدر و إجتهد فيما فيه نص و طلع بفكر يراه مخالفيكم إنو فكر ما عندو علاقة بالاسلام .... و هو نفس ما يحدث الان من أستاذ الحاج و أستاذ إبراهيم و بعض الجمهوريين المعترضين علي اجتهادات دكتور النعيم و إنو مافي مجال للاضافة في الفكرة الجمهورية لانو العلم ده ( مأخوذ كفاحا عن الله) زي ما قال أستاذ إبراهيم فوق ... و إذا سلمنا بصحة إنو الفكرة الجمهورية مأخوذ كفاحا عنه تعالي ... لماذا لا نسقط هذا الاعتراض علي ما فعله الأستاذ نفسو في علم الرسول صلي الله عليه و سلم الماخوذ كفاحا منه تعالي حسب ايماننا كلنا جمهوريين أم غير جمهوريين ؟!! لماذا تحلو للاستاذ محمود إنو ياتي بفكر مجتهد فيما فيه نصوص من الله تعالي و من رسوله الكريم صلي الله عليه و سلم ثم تمنعو دكتور النعيم - أو أي جمهوري أخر - من إنو يجتهد في الفكرة الجمهورية بحجة انها ماخوذه كفاحا من الله تعالي ؟!! دي معضلة الاجتهاد في الفكرة الجمهورية .... ما بتقبلو إجتهاد دكتور النعيم .... من باب أولي ما تقبلو إجتهاد الأستاذ !! تقبلو إجتهاد دكتور النعيم ... الاسلام يبقي ياهو زي كلام دكتور النعيم ده : إسلام خاص و ذاتي كل زول عندو اسلامو براو، حقوق شواذ و مثليين و باقي النقاط الرد عليها أستاذ الحاج ... و يا ريت لو بتقيف هنا .... بكرة بجي جمهوري يجتهد لينا في الصيام و كيف إنو بضيع العمل و الحج و كيف إنو عبادة وثنية لا حاجة لنا به في القرن العشرين .... و شوية شوية يبقي الاسلام "كريم معتقدات" لا أكثر ولا أقل !!