أحلِف بالذي خلقني من تُراب ثم من نُطفة ثم سوَّاني رجُلا.. إنّو محمد ناصر هو وائل طه محي الدين

Quote: : اعلاه اقتباس من كلام ابوبكر ينفى فيه انتساب محامى الاتهام الاستاذ نبيل للحزب الشيوعى ، فى نفس الوقت جاءنا قبله الاخ عبدالله حسين ليؤكد انتماء نبيل للحزب الشيوعى ثم يدفع بعد ذلك بحيثيات حيدة الحزب الشيوعى على اعتبار انه لا يمانع فى ان يكون كلا من محامى الدفاع والاتهام اعضاء فى الحزب لان الحزب لاتهمه القضية باعتبار انها ذات طابع شخصى !!!!! فانظروا كم هو عظيم هذا الاضطراب !!!!!!! اذن محاولات (تاميم ) محامو القضية باءت بالفشل هذا اولا العزيز طلعت أنا ما عارف اصرارك على اعتبار كل ما يورد هنا هو صادر عن الحزب الشيوعي، وانو أعضاء الحزب الشيوعي يتداخلون هنا بتكليف، ما عارف الاصرار قايم على أي اساس، يعني اذا كانت رؤيتهم متوافقة دة معناه مؤامرة مدبرة، وربما توصيات من المؤتمر الخامس، واذا اختلفوا في الرأي دة ناتج من اضطراب عظيم، أو فشل في الخطة الكانت مرسومة و محاولة لتعديلها، يا طلعت يا أخوي الكلام البتقول فيهو دة بائس جداً طيب يا عزيزي المفضال أنا عضو في الحزب الشيوعي، شفت كيفن، وشاركت في المؤتمر الخامس الما عاجباك توصياتو، وشاركت مع البقية في اختيار هنادي فضل الما عاجبة أختك الفوق دي، لكن والله ما عارف الأستاذ نبيل دة شيوعي ولا ديمقراطي ولا صديق، وازيدك من الشعر بيت شفت الود النجاضة دة الأسمو ابوبكر صالح دة ، مع اني معجب بيهو شديد، غير البكتبوا هنا دة انا ما بعرف عنو اي شيئ، وما حصل حتى اتداخلت معاهو، يعني بوضوح اكتر انا ما عارف الشيوعي هنا من الديمقراطي من الصديق ساي، ببساطة لأنو الحزب ما عندوا هيئة اسمها سودانيس اونلاين عشا كدي ركًز شوية في مدرسة فرانكفورت ويورغان هابرماس ودع الاضطراب، وأفتح بيهم بوست وشايف في شيوعي فوق وعدك بانو يتناقش معاك فيهم، لأنو الأستاذة منال خوجلي، أظن أن ما يهمها هو قضيتها التي اؤكد عدالتها Quote: اما ثانيا فانه من المعروف ان المحاماة تلعب دورا فى اظهار الحقيقة بمعناها البراجماتى والفلسفى ولكنها تؤدى هذا الدور المهم فى المجتمع وتحقيق العدالة من خلال المحاججة بين محامى الاتهام والدفاع ، قالمحامى معنى فقط بالدفاع عن موكله وبذلك يكون قد خدم العدالة فى التحليل النهائى لان المحاججة هى التى تستطيع اظهار جانب لا بأس به من الحقيقة يمكن من خلالها للطرف المستقل (القضاء) اتخاذ قراره الله يسألك ده كلام ده، يعني لازم الكلام الصعب ده، ما ممكن الكلام دة يتقال في سطر واحد أنو تحقيق العدالة يتوجب وجود محاميي الدفاع والاتهام، وما في داعي لي تويرة النفس دي كلها ومعنى الحقيقة البرجماتي والفلسفي وما أدراك، والله لو ما الموضوع ما بيستحمل كان سألتك من المعنى البرجماتي والفلسفي للحقيقة البيظهرها غلات المحامين دي نجي للمهم أها وكت دة كلامك البعيب شنو انو كمال الجزولي يتنزع يترافع عن وائل طه، زي ما ساقوا بعض الاخوة فوق ليك كدة؟ Quote: ما حدث هو ان الاستاذ نبيل حينما طلب من طلال اعتلاء منصة الشهادة كان مقتنعا بأن شهادته سوف تأتى فى صالح موكلته ، وعادة ما يقابل المحامى الشاهد لكى يتأكد من ان شهادته (الطوعية) تصب فى صالح موكله او موكلته ، ولا ادرى هل حدث هذا السيناريو ام لم يجدث وهو امر بين الله والاستاذ نبيل وطلال ، ولكنى متأكد ان شهادة طلال جاءت مفاجئة لمحامى الشاكية هذا الاصرار العجيب لتبرئة المتهم والتحايل على اجراءات المحكمة وتقاليد مهنة المحاماة شىء مقزز ، ولكن الناس اجمعت على شىء مهم يتعلق بأن شخصية طلال عفيفى لا تنسجم مع مثل هذا التصرف الغادر وانه لو قرر حماية المتهم لعلافة تربطه به لاختار عدم الذهاب الى المجكمة واخطار المحامى بذلك ويترك للمحامى الخيار التفسير الذى قدمته لتوضيح هذا التناقض بين شخصية طلال وخصاله الجيدة وبين سلوكه المشين فى المحكمة ، هو ان الحزب الشيوعى قرر تطبيق اللائحة عليه والتى تنتصر للمبدأ البالى (انصر زميلك ظالما او مظلوما )وبالتالى فان شهادته تؤكد وجود ضغوط قوية فسرتها بالزامه حزبيا بها ، هذا ثانيا كدي ارجع لي رأي انا شخصياً، لأني زي ما قلت ليك ما بعرف الشيوعيين هنا منو، والكلام مكتوب في البوست دة، وشوف كان انتصرنا لأخانا ظالماً ومظلوماً، وبالمناسبة بكون في ناس غيري لكن ما بيكون في زول جاء ختاها ليك كدي انا عضو في الحزب الشيوعي، ولو انت مهموم شديد بي مواقف الشيوعيين في المنبر دة وبتعرفم بالله أرجع لكل مواقفي، وشوف اذا كنا فيها انحياز للانتماء ياخي هنادي فضل الشايلين حسها هنا ده، صديقة وأخت عزيزة، ولكن كل صراعاتها التي ادارتها لم نتدخل فيها، عارف ليه، لأنو هنا أي واحد بيكتب، بيمثل نفسو فقط وبينضبط بلائحة المنبر العام ما بلائحة الحزب المجازة في المؤتمر الخامس التي تبغضها Quote: اما ثالثا فان ابوبكر حاول ان يحاجج بأن اللائحة تلزم العضو فى الامور السياسية فقط باعتبار ان القضية لا تكتسب هذه الصفة وهو تضليل اخر ساقه الرجل خاصة اذا علمنا ان دفاع القيادة الشيوعية للمتهم اصبح هو النموذج المتكرر كما سوف اوضح ، هذا فيما يخص حرص قيادة الحزب الحالية على تبرئة المتهم كما فعلت هى وقيادة الجبهة الديمقراطية بجامعة الخرطوم من قبل والتغطية على مسلكه المسىء للقيم الاخلاقية المتعارف عليها فى العمل العام ، يا زول حتى قيادة الحزب داخلة في الموضوع يعني ما هيئة سودانيس اونلاين وهو بالله وائل دة برضو اتنكر قبل كدة في جامعة الخرطوم وشتم ليهو زولة، أو اتستر على زول شتم لي زولة وأبى يدلي بمعلومات عنو، يعني الراجل سوابق، وقيادة الحزب الحالية جارية وراهو في المحاكم Quote: اما من ناحية ما يخص الفكر الماركسى اللينينى الذى يتبناه الحزب الشيوعى ولا يفصح عنه ، اى لا يفصح عن حقيقة كونه يتبنى النسخة اللينينية من الماركيسة لان الشينة منكورة, لكن هذه الحقيقة تظهر وتفضحه لائحته وبرنامجه المجازان فى المؤتمر العام الخامس تلك اللائحة المسيئة لانسانية الانسان وللمجتمع وكل ما هو نبيل والتى تلزم العضو بالدفاع عن رأى الحزب ايا كان حتى ولو كان كذبا صراح او شهادة زور بينة !! والله أربأ بك أن تقول مثل هذا الكلام، والله لو ما عشانك عشان خاتر هابرماس، يعني هو كيفن يكون فكر ويكون شينة ينكروها، ويدسدوها ما يقدروا والفضيحة تطلع في برنامج الحزب ولائحته كدي خلينا من الماركسية، يعني كلام ماركس وانجلز ديل الأفنوا عمرهم بيدرسوا ويبحثوا ويكتبوا، والمافي زولاً معني بالفلسفة وعلم الاجتماع ممكن يتجاوزم ويغض الطرف عن الكلام بتاعم، أو يصفوا بالفضيحة أو الشينة، كدي خلينا النمسك في لينين دة، هو لينين دة زولاً ساهل حتى يبقى تبني أفكاروا فضيحة، يا راجل في مفردات لذيذة كدة زي مثلاً الفكر الماركسي اللينيني الذي اعتقد ان الحزب يتبناه والذي اختلف معه وحاجات زي كدة يعني، لكن كلام الشينة منكورة دة انصار مدرسة فرانكفورت ما بيقبلوا منك بعدين ياخي انت جردتنا من أي شيئ الا من عضوية الحزب، في حين انو انجن انتمينا للحزب دة من أجل وطن وواقع أفضل للبشرية، ونا انتمينا ليهو عشان يشكًلنا فنصبح كما تقول، ففي اي لحظة يتناقض الحزب مع قناعاتنا بنطلع منو زيك كدة، وهو طلال المهذب دة وكت الحزب بخليهو يشهد زور ما يسيبوا ويمشي، وما تقول خايف من اغتيال الشخصية، انت دة ما سبتوا هل تم اغتيال شخصيتك، طبعا دة على حسب مداخلات ابوبكر انك كنت شيوعي وانت ما نفيتها، ولا يكون طلوعك من الحزب دة دور مرسوم ليك وانت بتلعبوا، شفت الكلام البائس بوصل لي ياتو حتة Quote: ولان الافكار وحتى الخلجات فى منظور هذا الفكر تعبر عن الصراع الطبقى فان كل شىء سياسى بما فى ذلك محاكمة جنائية لزميل ، انه منظور سياسى يقوم بتاميم الانسان فى بعده السياسى بالرغم من ان للنفس البشرية مئات الابعاد الاخرى الثقافية والتربوية والنفسية الخ اذ لايوجد شىء غير سياسى ، وجود شىء يتعالى على الصراع الطبقى هو مجرد وهم فى منظور الفكر الماركسى اللينينى ولذلك فان محاولات الفصل التى يدعيها ابوبكر بين السياسى وغير السياسى محاولة محكوم عليها ايضا بالفشل بل قل انها محاولة تدعو للرثاء ! والله يا عزيزي طلعت انت الكلامك يدعو للرثاء، واعذرني في الكلام دة، لأني بالجد لا أقصد التقليل من شأنك، أو السخرية منك وحاشاي أن أفعل، فأنت تستحق مني كل الاحترام، لكن أظن انك اتورطت، ودخلت بذهنية المفكر، ومارست استاذية في موضوع ابسط من كل التعقيدات اللغوية والمقولات الفلسفية، وأظن ايضاً أنه لم يفت عليك اكتشاف الورطة التي وقعت فيها، ولكن الدخول للصراع الفكري بمبدأ النصر والهزيمة، أو مبدأ النصر أو الشهادة بمعنى أدق وأنا أرى أبوبكر بيجندل فيك، بيمنعك من التراجع، ولكني من أجل قضية الزولة دي أرجوك هنا ليس مجالاً لأستعراض عضلات فكرية، القضية الأساسية وائل طه مسئول حتى ولو برأته المحكمة ان كان هو محمد ناصر أو لم يكن مسئولية اخلاقية في الحد الأدنى، وأزيدك من الشعر بيت، ليس هنالك مبرر لأذية شخص تحت أي دعاوى ان كانت حزبية أو كما أشير من أجل منظمة مجتمع مدني،