|
|
 رد جميل أمونة .. اليوم بمجمع شمبات
|
نتلاقي في أمونة .. بداية تعتقد انها احدي قاعات شمبات وسرعان ما تكتشف أنها امونة ست الشاي فمن من طلاب مجمع شمبات لا يذكر امونة ... جار بها الزمن ويتنادي طلاب شمبات للوقوف معها ،، هكذا تبدأ مبادرة من احدهم ثم تتكاتتف الايادي لترد بعض جميل هذه الجميلة ،، سألت هيثم عوض ( اب جاكومة ) : بعدين في حفلة صغيرة فيها محجوب شريف في شمبات ردا لجميل أمونة .. ح تجئ ؟؟؟ رد لي : لو محمد صالح رجع لي أمونة الديون العليه بتكون مشكلتها اتحلت ... تعالوا تعالوا السادسة مساء اليوم بالنافورة المين رود مجمع شمبات
|
|
 
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
رد الجميل .... امونة
هى دعوة لنتقاسم معا دفء الوطن .... او لنغسل الروح ذاك المساء ...
مبادرة رد الجميل ... اطلقها الاستاذ الشاعر محجوب شريف الذى وعلى حد تعبيره وجد نفسه وهو معلم الابتدائية المحال للصالح العام يتلقى علاجه فى انجلترا وفى اكثر مستشفياتها تكلفة فى وقت لم يكن يملك كلفه العلاج فى خاص مستشفى الشعب ... لم يكن ذلك على حساب جهة او فرد او على حساب موقف ( بين بين ) .. وجد المئات بل الالاف يقدمون له دون خاص معرفة او سابق ... كانت تلك النطفة التى بداءت تتخلق لمشروع رد الجميل ....
( بالمركون والمهمل والمجدوع من الخير فى افئدة الناس )
او كما قال ... كان شعار المبادرة مباشر سهل وممتنع وعميق فى منتهى البساطة .... تلقف العشرات المبادرة واصبحوا بين عشية وضحاها مئات يتحدثون عن رد الجميل فى اشكال عديدة
( دكان الحجة سعدية ) تم افتتاحه امسية الجمعة الفاتت فى الثورة الواحد وعشرين كانما كان يوم للاخيار او اجتماع الانبياء ( او ذلك ما كان بخاطري ) جلست نجلاء سيد احمد الشيخ ( ما حاقول مرة بخارى ) تجدع الزلابية وتبيع الشاى الكباية بالف واربعة لقيمات ( يقمن صلبه ) بالف جنية .. وتجول عثمان الهادى ( الجميل الاعتيادى ) يجمع الالاف دعما لدكان الحاجة سعدية العشرات حولو لينا رصيد ناس جابت رز وطابعة ليزر زيت لعب اطفال كتب بيض سكر مسجلات ودى فى دى ... شباب فى منتهى الفن لونو دكان الحاجة بجمالهم باقى سرير دبل قضى الدهر منه وطرا تحول للافتة انيقة كتب عليها دكان رد الجميل بالمهمل والمركون من الخير فى افئدة الناس .......
( مستوصف غرب الحارات ) فى امدرمان يسير العمل فيهو بهمه ونشاط وصل مراحل متقدمة تبرع العديد من الاطباء وشركات الادوية والمعامل ... سنشهد الافتتاح قريبا ....
مدرسة .. زول .. جمعية ... الاطفال المعاقين ... مكتبة ... نادى ... واشكال اخرى لا اعرف ولا احد يعرف ما هى
لان الاصل فى رد الجميل انها مباردة شخصية لقيمة تحملها انت فى قلبك ( اها انا اعرف كيف ) ...
يبدو انو انا مشيت مع هواى بعيدا عن ما اريد توصيله ...
امونة ... ست الشاى ..امونة قيمة ورمز لنساء بلادى المناضلات المكافحات تلك التى ( فتشتى جاى فتشتى جاى حبة عدس ما بسوى شى وينو الدقيق ينو الفحم ) .. هذة الابنوسة هى فرصتنا لرد جميل للوطن ... مباردة رد الجميل امونة بداءت فكرة قبل عشرة ايام فى احدى لمات رد الجميل تحمس لها محجوب الشريف ومضت مناقشات وحوارات ... تبلورت فى شكل تكريم امونة فى مجمع شمبات والذى سيكون يوم 22/8/ السادسه مساء بحضور الاستاذ محجوب والاستاذ عبد اللطيف عبد الغنى ( وردى الصغير ) والشروع بعد ذلك فى بناء بيت امونة فى الحارة ستين الثورة بس كده .... جماعة الهكر كانو اول المتبرعين بالتكفل بكل الابواب والشبابيك والعروشات ... اخرون ....ستمضى المباردة وستنجح ... غصبا عن عنت الايام والحالة الما دغرية ... تعالوا جميعا واخرون لنمتحن الانسان بداخلنا ونعطية فرصة ان يتحدث ونكتفى نحن بالصمت ... او اى زول عديل كده يدفع حق الشاى والقهوة والعصيدة الزمان ديك بسعر الليلة وهى بتبنى بيتا براها .....
بالمهمل والمركون والمجدوع من الخير فى افئدة الناس ... اظنه كثير يكفى امونة ...
| |
|
|
|
|
|
|
|
|
|
امووونة ست البسمة المابتكرر (Re: bukhary el amin)
|
طبعا نحن ناس السنتر ثقافة لمة امونة دى ما عندنا لكن انا كنت بمشى شمبات اسلم على فردتى ( وحاجات تانية حاميانى ) دا طبعا غير الماء والخضرة والوجه الحسن فى كلية الزراعة واتعرفت على لمة امونة وقهوة امونة وكان اهم حاجة بسمتها البتخش جوووه قلبك بدون اذن
معاااكم قلبا وقالبا وفاءا لامونه ست اللمة المابتكرر
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
رد الجميل اجمل جميل فى الدنيا دى
طربا ترى الاحساس يميل زاهى وندى
ارويه بالشكر الجزيل اسقيه ما تترددى
يا ايدى لو قصرت يوم فى حقو ماكى اذا يدى
كم بالتضامن والنفير الحاجة ابعد ما تكون تلقاها قدامك هدى
يا روحى فى ركن الضمير رد الجميل اتوسدى
..... بالله الكلام ده مش ساهل وبسيط ومباشر ... وجميل ...
الاربعاء 22/8 السادسة مساء النافورة مجمع شمبات ....
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
يا سـلااااااااام .....
أمـونة ... الزولة النبيلة....قاسمت وحـتى من يملكون قـوت عـيالها وهى التى ما إمتلكت سـوى نبلهـاوحبها للجمـيع...يا ريت كل النسـاء لو فيهم ولو قليل من العند أمـونة... أكيد ما كانت في يوم متوقعـة يجى يـوم يكرمـوها فيهـو...لأنو قمـة عطاءها كان فى وكت جـبن فيه الجمـيع وأنكسر الصناديد و لما الوطن بقى زي خرم الإبرة شجرة أمـونة كانت الوطن .... الناس كان تاكل وتشرب العندو والماعندو...وأمـونة تعـطى .. بى طيب خاطر ويقين الصالحين....ما خافت من يوم بكرة ولا الداسييهو ليها ولى عيالها.. ماشفناها يوم واحدعابسـة..وأى زول أو زولة لمست حياتهم مستحيل إنو ينسـوها أو يلاقو ناس بى مثل نبلها....ويا شباب والله إنتوالمحظوظين بى تكريمها لأنو مهماعملتو ما حاتقدروا على رد جمـيل لأنو أمـونة دى أقصى مايمكن تخيله من جمال الإنسان عموماوالسـودانى خاصة... فهنيئآ لكم..ولأمـونة التحية...
بالمناسبة ماعرفت منكم غير صـابر ووليد دا أظنو الفى بالى ولو دا إنت بالله أضرب ليناعشان نتشرف بالمشاركة معاكم....
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
كتبت الزمياة نسرين النمر بـ(السوداني) ليوم غدٍ الاربعاء تضامناً مع حملة شاعر الشعب محجوب شريف الآتي:
يواصل مشروع رد الجميل
محجوب شريف وطلاب شمبات يحشدون الطاقات لبناء منزل أمونة ست الشاي
امونة واحدة من بنات البلد الاصيلات اختارت ان توسم وتعرف بست الشاي حينما لم يكن لديها غير هذا الطريق خيار ..تتلفح نقاء سريرتها وهجير شمس السودان يوميا الي حيث موطأ (كانونها وكيس الفحم ) بمقر عملها بمجمع شمبات الزراعي بجامعة الخرطوم ...امونة ظلت تقدم مع كل رشفة شاي وقهوة درسا ينضح انسانية وصمود ..وحالها لايقل وصفا من حال صويحباتها ممن يجسدن معان العلاقات الانسانية الحقة ووفقا لاعرافهن الخاصة فهن يسهمن في احيانا كثيرة مع الطلاب في في اكمال مشوار الدراسة الصعب بقدر حيلتهن احيانا بـ(حق المواصلات وصناديق الدعم الاجتماعي لمساعدة من هو اضعف وهذه كانت رسالة امونة للاجيال المتعاقبة وكان هوحالها مع طلاب مجمع شمبات من الزراعيين ..وبالفعل لايعرف الفضل الا اولو الفضل ..فاليوم الاربعاء هو يوم الوفاء لامونة في حضرة الانسانية الذي يشهده مجمع الزراعة بجامعة الخرطوم بشمبات حيث تتواصل فعاليات مشروع( رد الجميل) المشروع الذي اطلقة شاعر الشعب محجوب شريف وفاء لوقفة الشعب السوداني معه في محنة المرض الاخيرة .و الاحتفال سيخصص لحشد الطاقات والدعوة موجه لكل من يستطع المساعدة في تشييد منزل امونة بائة الشاي بالحارة (ستين) وذلك وفاء لامونة وتقديرا لعطائها وفي شخصها ووفاء لكل ستات الشاي الصامدات ملح الارض ..وعبرهن لحواء السودان .
وستنشر تلك الكلمات غداً في عدد الاربعاء 22/8/2007م تزامناً مع إحتفال شاعر الشعب وطلاب شمبات مع (..أمونة)
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
يا شباب
يا شمباتة
يا الما بتقصروا
لكم تقديري
و محبتي
و لأمونة أجزل شكري
و لن أكفي
***
يا وقتها،
يا وقتذاكـــ، يا الهاهنا،
يا ألهـــا، هناااااكــــــــــــــــ
يا البعيـــــد البعيـــد البعيـــــــــــد
يا أقرب من حبل الوريد
***
خاضت عيناه في دمعة ما
....
دمعة قصيدة،
و الذي دمه قد صار عصيدة
في الهنـــــــــــــــاك،
حيثما و وقتما و على عبق قهوة ما،
إندلع بالغُنا
من وعي غيبوبته الحاضرة.
الشاعر الأديب المسرحي (أمين صدِّيق) الذي حضر يوماً ما شبابة البن فأحضرته نفسه التي يعرف، و شهد إندلاع الزنجبيل فأغمض علينا جفنيه ثم إندلع، و بالسر سرنم
(يا فرس كل القبيلة تلجِّموا
يكسر قناعاتا و يفر
يسكن مع البدو في الخلا
ما يرضى غير الريح تجادلو و تقنعوا)
يا سلاااااام
يا سلااااااممم
منو القال الكلام دا
يا ســـــلام يا سلام، على وجع الحروف ده و على برلمان الرياح ده.... و المجد للذي قال لا في وجه من قالوا نعم،،،، و ووووووووووووو..... و هكذا، و دواليك من كلام المثقفاتية الشمباتية الأحباب الرفاق الإخوة الزملا النشامى الأشقاء الأشقياء الشم المغاوير!
ما هماه، إتصل ولد بنفسه و قال، قولاً في السلك:
(اقترحتك لون أساسي........
يمنح اللوحة إذدواجية القرايي
و يفتح الضو بين خطوط الريشة،
والخط الإضافي الجايي
من شبكية الزول المشاهد)
صصصصصه صه، صه يا كنار و أسمع لفني
(و اكتشفنا،
الرسمك
و أنا
نفس التوارد في الخواطر
و برضو أرقام التذاكر
البيها سافرنا
و شهدنا
إنفجارك في الأرض
يا سمرا يا واضحة
ما غنيت يوم جَيًّتك صدفة
قبل أبداك كان غصنك بشّر
و يوم ما كان إحساسك مسرى
عرّج غيمك فيني و مطّر
و لحظة طار عصفور من صدرك
رتب فينا إحساس بالإلفة
و دوزن عصب الزمن الأشتر
إتوكلت عليكي و قلتا:
المارق منك داخل جرح الوردة
و راسم فوقا غناوي الطل
المارق منك
رجَّع للغابات
الزنج الهاربة
و للعتمور
العرب العاربة
و أدى الكون مفتاح الحل
و المارق منك شادد عصب الورقة، و حرفي
و راصد في اللاوعي سكونه
مواعيد صحوه .. حلمو .. و لونو
و شارِّي يقينك في ظني
و سارق لحظة إني أفكر.
المارق منك
مارق مني
أو، مني...!)
يا أمووووووووووووووووونااااااااااااااااااااااااااااااااااااااا
شي لله
إنجذب (أمين صديق) في ظهيرة قهوتها، قهوتنا، قهوتكم، و غاب عن الزنجبيل أو الزنجبيل غاب فيه، ثم انبثق تحت ظل من لبخة أمونة،
تلك الللبخة الصغرى
و إن شفاعتها لترجى
.......
و طفق يغني،
بالنص الخيري و من لحنه الخاص
كانت تلك أول مرّة أسمع فيها نص (عاطف خيري) ذاك
فسالت أمين عن كاتبه
قال: ههنا حضرة
و أنا مجذوب
ذاك عاطف خيري
و أنتم، يا أمونة، الطيوب
(أو كما قال في وقته، أمين المطيوب)
من منّا لم يك ذاك المجذوب في حضرة إنسانها، تلكم الأمونة الميمونة
بعبق قهوتها، في القلية الطازجة دوماً لمن تعرف باليقين أنهم من عاشقي القلوات الطازجات.
و بالشاي المستعجل للطارئين المستعجلين،
و بالمضبوط للساهمين الوالهين الواهمين
و بالسكّر الزيادة لمستنفدي الطاقات في المرسى أو بركوبهم/هن الكُدر من المظلات.
و بالمن و السلوى
و بالملاح و العصيدة
و بالونسة و المؤنسات
و بالدَين
و الدَين
ثم الدَين
و بالحاضر
و بالماضي
ثم بالماضي
و بالماضي أيضاً
مرفوعاً إلي مستقبل ما....
و بهذا، أشهد، أنا، هاشم أحمد هاشم الحسن أحمد زياد
المولود في كسلا
المدفونة سرتو في السودان
المخامر سلاف شمبات
نيلها و كلياتها
و ناديها و زراعتها،
و الحِلّة حتى أريج أرض الأراضي
ثم الكائن في حيث لا كينونة إلا لكرت الإئتمان و الفوكس و ال سي إن إن و الإيفانجليكانز و بعض حنين نتمو بالموية و التلج.
إنو أمونة، نعم أمونة دي زاتا
طالباني شويّة قروش
و أطنان حنين
و كثير من ونسة
و كثيب من البن
و علي من إفضالها الما بتنقضي
ابتسامات آن صباحاتي مكفهرّة
وترطيبة أوان نهاراتي بالحرور ساطعة
و جبنات عندما قريفاتي ناطحة
و عصايد وقتما جوع الصائم كافر
و و يكة لا تشبه ويكتنا هنا و هي حلوى
و دمعة لا كدمعاتنا الآن و هي حرى
و فول، بالبيض و بالزيت
و بالشمار و الشطة
و الليمون
و بـ الدَين
و ثم بسمة، لا حزن بعدها
ثم جبنات
و قرنفل
و حبهان
و شاي
و ولعة من جمرتها
لسيجارة من نام،
فخرم
أو لصائم قام،
فهي في يومه الأولى
فما ندم.
و كمان طالباني حس بالأمان، لأنو لمّا (الموية تجيني حفيانة) كانت تأويني أمونة في ظلال لبخة فيحاء،
يا للبخة أمونة!
و في شمبات لبخ و لبخ،
و منه لبختان،
الكبرى، جنوب شرق الكفتيريا شمال غرب عمادة الزراعة، شرق الهندسة و غرب حدائق عدلان. فهذي للصلاة ظهراً و للغلاة و جمهرة المغالتاتيية و لأركان الدواس و وجع الراس إن غويته، و لربما قد كنّا في الغاوين، غفر الله لنا.
أما الصغرى، التي في شرق المكتبة جنوب البروتكشن شمال النخيل وغرب الصهيل، تلك لبخة أمونة، لبختنا، الكان يؤمها فيمن أمها
الخرمان الذي هو أنا، الممنون هاشم الحسن
و منهم الولد المجنون كمعتز الماهر و بدر الدين المساعد و ياسر السوسيو
و الولد المأمون حمزة موسى (أخدر الآجال، خدّر الله آباده)
و أيضاَ ذاك الولد المأفون
و الولد الميمون
و الولد القاهر
الولد الفاجر
و الولد الطاهر
(جيل الشمس
موكب حريق
واقف على باب الدخول
و بيناتو بينات الوصول
لحظة شهيق)
***
(يا كنا نبيعك، يا نسرق
و اخترنا النار الضلَّها يحرق)
***
يا أمونة ياخ ما تزيدي السكر دا شوية.... طالبها معتز ماهر
يا خي ما كملتو سكري يا خي و جننتوتي... ردت أمونة
شوية بس، شوية عليك الله... ألحَّ معتز
الجماعة ديل ما بقدروا على الجينة المرة دي، عندهم شوية تطلعات برجوازبة يا أمونة، زيدي ليهم سكر و نحنا حنكتشف ليك حنان برجوازيتم دي..... بهذا تعالت ضحكة أكثر من عشرين على تعليق أحمد الزبير الذي واصل تأليف نكاته عن الترابي و هو غير مكترث بتعليقه الاعتراضي ذاك ولا بالضحكات... لكم كانت تلكم التسعينات قاسيات على الناس (من كل جندي تفوح ضحية و دم مشتت في الأبد).
نميري سورج دنقر في ا########## و قال من شعر عاطف الخيري
(أنا ليه
تجيني الموية حفيانة
و أدنقر ألبسا في شبط أخضر
أبيت مبلول أصلح في رُباط
أنا ليه؟
شبابيك البيوت الواجمه
و الناس البساط
و ليه بيرجاني النخل في السكه
يفتح قلبي خماره و خلاوي
و بيت بكا
تعبت من المساسقة و الهتاف)
تعبتااااا... تعبتتتتتتتتتتتتتتتتتتتتتتا
و أمونة بعدها لم تتعب
من قلي البن
من دق البهار
الزنجبيل الجنزبيل البهار
من طحن البن
من نار البن
من غلي البن
من تصفية البن
من سُكَّر البن
من بن البن
من ناس البن
ومن ناس البن بن
و من قريفتها التخصها براها
للبن الذي يخصًّها براها
بنها السوداني
و ليس بن آخر
حبشي أو كيني
كولمبي أو برازيلي
يوغندي أو بوروندي
أو بن (ستار بكز)
ملعون أبو (تيوس النجوم)
و هي من بتين النجوم يقت غنم، كان ما العولمة دي؟
إنتو يا جماعة صحي ، أمونة عندها موبايل؟
و لّه بس
(وقعت من الهدهد بلد
نهبوها و أتقسًّموا الحدود)
أنا غايتو بتمناها
(ارجيني يا صالحة)
عشان ننزل (مسافة توجِعّك غابة)
ثم أشكر
( سبحانك الأديتنا
من ملكك سلاطين و إختفيت)
غايتو،
شوفوا يا شباب،
مر من تحت شجرة أمونة
أو من فوق أريج قوهتها
الآتية سيماؤهم الكالحات البينات المشتبهات
أنا دا، الكاتلني الحنين و رامياني القريفة و مبسوط تب من شغلكم في شان أمونة
و معتز ماهر و بدر الدين مساعد و محمد توم و يوسف مساعد و معتصم العربي الديونو أكتر من محمد صالح زاتو، و أبو اللول و باسطة و آدم داؤود و حسام جعفر و بت السنهوري و عز الدين و آدم أمين و عبد الرحمن و حقار و الصافي و السرة و حليمة و خالد اب دقن و أبوبكر بتاع الكمستري
و الزين بشير الذي برني بالعلم عن هذا البِر بالنفس
و عبد الرحمن السمين
و جلال العقاد و صحبه
و هند محمد سليمان السمراء فالخضراء فالعبادية فالسندسية
و التعيس الذي هو (Saif Mustafa) صاحب المداخلة الفوق دا زاتو رغم انو من حناكيش الكافتريا بالأساس و مصاحب الغول و مي و ميادة.
و ندى بت خيري الشاطرة الذكية ذات الضحكات المجلجلات على جنون صديقاتها المنتشيات بالقهوة و بالفنون.
و أكرم فاروق الذي انعقد أمره على إلهام حين رشفة من قهوة أمونة
و شذى الياسمين التي فاحت على حمدي متدثرة بفوح القهوة فتزمل بها لا يريم
و سلمى التي أسلمها بابكر قياده فتسمى بالخطيب منذ الأزل و هو العاشق في الأبد
و خالد عبدون، أستاذكم الذكي و صاحبنا الوفي
و عبمعنم و إقبال
و عبهادي
و أمل
و أمل عثمان الما ليها مثال
و نميري
و بقّة و علي يعقوب الذي تتبعه الحسان
و سناء خالد
و إنعام علي
و مصطفى
و محي الغول
و عاطف و مي
و صابر عبد الهادي
و د. فالكاو الشهير (بالأستاذ/ خالد حسن عثمان)
الذي غناني يوماً و كنا قافلين عن أمونة
(يا طير الوروار) فخلته فيروز... علي اللقيمات في صباحات أمونة، غناها أحسن من ما يغني حمد الريح (يا طير الرهو) أو وردي ذات نفسو (يا طير يا طاير).. تقول لي فالكاو هين؟ ما هين تب.
خالد حسن تبعته إلي فوافي دوحة أمونة بلابل صادحات و لن تفتر عن الغنا. شوف:
يشهد الله، في لبخة أمونة، على جرس قهوتها، سمعت و إنتشيت لأول مرة في حياتي بأغنية الهاوي (ما شقيتك، إنتا الشقيتني) و شرحها. و تثاقفت مع من مثل أبكر آدم إسماعيل و عثمان البشرى و محمد حسين بهنس و الصادق الرضي و خالد عمر و يوسف مساعد وذاك الذي غنانا (ما شقيتك).
كمل الكلام.
لم يبق سوى أن نصون الهوى و الغرام
يلغوا أمونة عني السلام
بلغوها عنا السلام و الحب و العرفان
و قولو ليها منّا (إقترحناك لون أساسي)
والتقدير كله لكم إذ تتكبدون عنّا عناء المحبة
ما أمضّكم في الحب من جيل!!!
وقال عاطف خيري:
(ياالله شفتك وين
قبل النظر يبلى
و قبال ما أبقى جنين
و عضامي تتبلًّ
وريني شفتك وين
قول لي عليك الله!)
يا معتز ماهر، لو عندك فكرة، قول لي، و خلي أمونة تنسى شرقرقا في النار و ترفع حواجبا و توسع عيونا و تنفض الهواء يإيدا و تبتسم ساخرة منك و هي تسحرني بالجمال الأبدي إذ يحل على القبح الفانٍي!!
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: هاشم الحسن)
|
( و منهم الولد المجنون كمعتز الماهر و بدر الدين المساعد و ياسر السوسيو )
انت يا هاشم متاكد انو دى كانت قعده فى امونة ولا فى ( جرده )
...........
اذنى معاى طبعتا كلامك الفوق ده وحاشيلوا معاى الليلة الكلية
والمشاركة لزوم رفع البوست .......
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: Elwaleed Ibrahim)
|
أمونة فضلها علي
كفضلها على أي زائر لشمبات
وأحي من شمبات سنة البرليم !!
إنتو يا شمباتة
الحركة بتاعت الناس تمشي العصر الداخلية
ويطلعوا المغرب يلاقوا البنات الطالعات من الداخلية
لسة شغالة ؟
دي أجمل حاجة في شمبات
أنا جاي الليلة
ممثلاً لإتنين من أصحابي الشمباتة
المتغربين خارج وداخل السودان
وعشان بكره أغيظهم بإيميل كارب!!
مساء الأربعاء 22-8-2007
لبخة أمونة
شمبات ست الإسم
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: Elwaleed Ibrahim)
|
طبعاَ إذنك معاك يا حضرة الناظر... و دي دايرالا كلام!Quote: ( و منهم الولد المجنون كمعتز الماهر و بدر الدين المساعد و ياسر السوسيو )
انت يا هاشم متاكد انو دى كانت قعده فى امونة ولا فى ( جرده ) |
هاهاها، هههـــــــــا 
تلك يا عزيزي كانت عصبة تجيد تقسيم الوقت و فوائض القيمة،
للنهار قهوة أمونة و للليل الصولة و (الجردة).
ثم كانوا، الملاعين، يجدون وقتاً للإنتحار بمشانق من هجرانات الخل الذي بعده العيش حرام، و التمر حلال....
مطاميس، لولا أن كان يهتدي سرهم بسر قهوة أمونة.
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: هاشم الحسن)
|
( تلك يا عزيزي كانت عصبة تجيد تقسيم الوقت و فوائض القيمة،)
والله يادكتور لقيتك كضاب جنس كضب فائض قمية شنو الكان عندهم عشان يجيدو تقسيمو يارجل ...
امبارح شايل الورق الاذنى معاى طبعتو لقت زولا سمرا وواضحة ماشا مع الزين بشير ( زى السترة والفضيحة
متباريات ) قالت لى الشباب ديل قالوا شايل ورق بتاع هاشم( زوجى ) حتين عرفتك ياك هاشم ال.....
بجيك واجيكم راجع اخر اليوم بتفاصيل ما حدث ...
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: Saber Abdelhadi)
|
هلا هلا هلا بي الشمباتة و بي أمونة و بيك يا أبو أمونة الذي سرب في صعيد الغرب سربة، وينك يا هندسة؟
يا خي تشكر إنتا دا، البترفع لينا في كتف الغنا الميّل.
و يشكروا ناس (رد الجميل)
و يسلم سيدنا أبو مي
و الشمباتة أولاد الروح و بنات الوكت.
الحمد لي الله يا صابر، أهو نقدر تقول لحقنالنا ركعة في مصلاية الروح الكانت مفوتة كم وكت.... و إنتا براك شايف و عارف إنو
(الوكت موهط في النزوح ــــ رهن الأصابع و منفلت) أو، كما أنشد به شيخك عاطف.
ــــــ
راعينا مرة يا ابا أمونة!
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
محجوب شريف
انت (وطن) وكفى
امونة خالتى (الله يوفقك)
المشاركون فى رد الجميل (هذا هو السودان)
طلاب كلية الزراعة بشمبات (الله يعلى مركزكم وينجحكم)
انا (كم كنت اتمنى لو عرفت من وقت لاشارك)
بس الجايات يا جماعة ابقوا كلمونا
انحنا برضو اولاد بلد
| |
|
|
|
|
|
|
|
|
|
Re: رد جميل أمونة .. يا دوت يا سمح (Re: دوت مجاك)
|
Quote: محجوب شريف
انت (وطن) وكفى
امونة خالتى (الله يوفقك)
المشاركون فى رد الجميل (هذا هو السودان)
طلاب كلية الزراعة بشمبات (الله يعلى مركزكم وينجحكم)
انا (كم كنت اتمنى لو عرفت من وقت لاشارك)
بس الجايات يا جماعة ابقوا كلمونا
انحنا برضو اولاد بلد |
ملحوقة يا دوت مجاك يا زول إنسان
إنتا بس راسل الوليد إبراهيم أو بخاري الأمين (مسنجرم).
بعدين تعال ياخ، إنتا مش بس ود بلد بس، إنتا سيد البلد يا زول و مالِك المعنى كلو و ما بتحتاج يكلموك بيها و لا بيهو.
إلا، عندي سؤال يا دوت ياخي! الزول شمباتي و لّا زينا كدا ضهبت بي هناك مرة فأسرتك في سحرها ملائكة ذاك (المكان الماركيزي) زي ما قال اخونا في محبة أمونة (خالد عويس) في مداخلتو التلقاها لي قدام؟
غايتو إن بقيت شمباتي أصيل، فلتستعن عليهم ب (عبد الله الخطيب) المذكور في مداخلة خالد، لأنو دا بقدرم ليك كتاحة ساي، و بكيل ليهم اللوم الماخمج.
تسلم يا زول يا سمح.
و يا أمونة (الله يوفقك)
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: حسن سنادة)
|
لأمونة عند الصباح، شاي "بي لبن" لم أتذوق أروع منه. تضفي عليه من "أمومتها" وحنانها الكثير. فهناك، تحت شجرتـ"ها" وقرب موقدها، تغدق هي على الجميع من "فيوض" حنانها الكوني. أمّ ساحرة، نتجاذب معها أطراف "الونسة" إلى حين موعد المحاضرات. ولها - أيضا- يد ماهرة في اعداد القهوة. أمونة، خازنة حكايات كثيرة عن شمبات، ذلك المجتمع الغريب، الذي قل أن تجد مثيلا له في الجامعات. من من طلاب وطالبات شمبات لم يغش أمونة، ولم يرتشف من "حنين" قهوتها؟!
أمونة "معلم" من معالم شمبات. وهي ركن ركين. أشبه بوردة أو شجرة راسخة من الأشجار الباسقة التي نبتت في ذلك المكان "الماركيزي" - نسبة إلى غابريل غارثيا ماركيز -.
آهـ ما أقسى الغربة. هاهم أبناؤك وبناتك يا أمونة يردون لك بعض الجميل، ونحن في الغربة، يقتلنا الحر مرة والبرد مرات.
و"عبدالله الخطيب" سـ"يتف" "سفته" ويصيح في وجهي: بالله شوف العواليق ديل، ناس معز وفول ومحمد صالح والعربي، مالم ما كلمونا. نحن ما بنعرف أمونة؟!
| |
|
|
|
|
|
|
|
|
|
بالله ... ما بتستاهل؟ و أكثر كمان! (Re: حسن سنادة)
|
| Quote: فمن من طلاب مجمع شمبات لا يذكر امونة |
Quote: كفتيرة تفك الحيرة يا بت احسن من غيرا
امونة النيمه تلمها فى ضلها كتر خيرا |
| Quote: وكان اهم حاجة بسمتها البتخش جوووه قلبك بدون اذن |
Quote: ياسلااااام
عارفين انو بنتي الفي الصورة دي اسمها امونة |
| Quote: الناس كان تاكل وتشرب العندو والماعندو...وأمـونة تعـطى .. بى طيب خاطر ويقين الصالحين |
| Quote: امونة ظلت تقدم مع كل رشفة شاي وقهوة درسا ينضح انسانية وصمود |
Quote: أمونة فضلها علي
كفضلها على أي زائر لشمبات |
| Quote: امونه يا امونه، كفتيترك تفك الحيره |
Quote: التحية ليك امونة و انتي بتعملي الفطور لأولاد و بنات الداخلية زي ما امهاتم بيعملوهم..
عصيدة و ملاح احمر.. بعديها كباية شاي بالنعناع..
ما عندك قروش.. ما مشكلة.. ما دي أمونة..
إيمان.. |
ـــQuote: وعدنا نتلاقى بعد شهر في بيت أمونه
العاوز يلحق و يبادر عنده 30 يوم
كل الشايف انو عليه دين عنده فرصة يرده!!!!! |
ياأبو السند، تشكر على الصور يا زول يا سمح
ـــــــــ
و هل يعدم المعروف جوازيه
ـــــــــ
تستاهل و زيادة
و فوقها كمان محمل محبة و شديد الإمتنان
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
أخـوناهاشـم..
Quote: Quote: بالمناسبة ماعرفت منكم غير صـابر ووليد
معقولة بس يا غربة، |
عليك الله بس أعـرفهم ليك كيف؟
يعنى شوف زى وليد البرلـوم دا يكتب ليك الوليد آبراهـيم.
تعـرف يا هاشم أنا ذاتى لما قريت البروفايل بتاعي ما عرفت نفسى،.. شـفت التنكر السـايبيري دا صـعب كيف؟
أسمع..فعـلا زى ما قلت أنا كنت مصاحب الغول …عشان بجيب لينا المش ومـرات كتيرة يجيب لينا ود حـلتهم ياسـر ود عمـك تمـام من قسم البروتكشن يسمعنا شـوية حـقيبة بعـيدأ عن آذان الضهب بتاع لبخة سـتنا آمــونة.
بجيك بى مـهلة بخصـوص الجمـاعة الزايغـين بى ديـون أمـونة ديـل.
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
جميل أن أري صديقي بخاري ود اللمين من هنا ..... وهو ينقل تلك الأخبار التي ترد الروح
إذا كان ذلك هو الحال في السودان إذن كل المستقبل المشرق للارا ويارا وأمين
لو لي بكباية شاي من حاجة أمونة؟؟ وقعدة هناك تحت اللبخة وتلك الإبتسامة التي فيها كل الجمال السوداني
والمجد للسودان بأبنائه
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
لا حول ولا قوة الا بالله عمر حسن صالح الشوية عديل كده شكراً أمونة اولاً شكرا بكري ابو بكر صحي دا سودان مصغر يلا يا عمر رسل انت وباقي الشباب الامريكي مساهاماتكم عشان ( التشطيب حار شوية ) .. ورد الجميل سيستمر ولارا ويارا وأمين بسلموا عليك ...
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
يا سلام علي شمبات و أولاد و بنات شمبات لما يعصفوا بيك.
و الله صدق "من قال" رضي الله عنه حين وصفكم:
"بالشمباته ... رجال ... الجامعة"
عفيت منكم ... بلغة حبوبتي "بررريتوها؟" عفارم عليكم
أحبكم و أحب أمونة و أدب أمونة و جمال أمونة و ذوق أمونة و شاي أمونة و قهوتاال بي كل لغات العالم
"المرة و مثقفة" و "الطاعمة و محنكشة"
منو الشمباتي الما قعد في أمونة؟ منو الماشرب قهوتا؟ منو الما "خلط" في أمونة؟
مافي أجمل من إنو تشوف الناس القاعدا في أمونة "أشكال و ألوان" ود مارنجان وبت الصافية . بت بورتسودان وود أبو جبيهة في حجرين جمب بعض و مرات متقاسمين نفس الحجر. قصص أتحكت .. حيوات إتشكلت و أسالوا أهل "امونة" إن كنتم لا تعلمون.
"جامعة الخرطوم - مجمع شمبات"
تعرف جامعة الخرطوم و منتسبيها (الشمباتي/ية) بانه-ها من درس-ت في احد كليات مجمع شمبات ولهذا كنت ود شمبات مع سبق الأصرار و الترصد و كان -أبرياء- مثلك يا وليد و علي جميل ود الكوتش و الطيب برير و خالد عويس و أب جاكومة و محمد فول -شمباته- و ان لم تثبت ادانتهم.
و شمبات في عرف جامعة الخرطوم هي - كليات الزراعة و البيطرة و الغابات و الانتاج الحيواني-
السحر في شمبات يتوهج ليلا .. عندما تجوبها بقصد استكشاف المكان أو بغيره ... يترأي لك ذلك جليا.
شيء ما يجعل همس عاشقين وجلسة لأصدقاء و غناء صادحة أو مغني أو قراءة شعر لضال طريقه لهذا المجمع وونسة زهج وعزابة في النافورة تخترقها ضحكة عالية و جريئة و مرات خجولة .. ياسلااام .. شيء ما يجعل كل هذه الأشياء مؤتلفة و يوحدها و يجعلك لست بقادر الا أن تكن حبا لتلك الشمبات .. حبا يدوم و يدغدغني الآن.
و أنا أحاول اكتساب الفة مع شمبات .. اتجهت من مبني نحو مبني بها .. لم اكترث لأن أقرأ ماكتب علي لافتته يومها .. فوقاية المحاصيل من انتاجها لم يكن ما نشدت ليلتها"بس كايس لي كباية شاي" .. و هناك وبجوار و جمب "الوقاية" حطيت الرحال (لخمسة أعوام).
... ست الشاي الجمب الوقاية ديك ... طيبة ... جميلة ...
"زي ألابنوسة" هكذا وصفتها رفيقتي ببعض إعجاب وإمتعاض.
و أذكر أن كل ما رأيت يومها هو إبتسامتها .... يا سلام لما تبتسم أمونة؟
... أراهن أسعدنا سيداتي و سادتي أن يبتسم جميلاً كما تفعل أمونة ....
شفتوا ليكم زول ترميهوا جبنة أمونة (خمسة أعوام)؟
من خمستاشر سنة،احمد و شاذلي اعانو جوعي و بشير زين العابدين بفول لم أدفع حقو حتي اليوم .. لعنني أحمد قائلاً: أحي أنا تجري يا ود البروف؟ يالسذاجتي ... لم يكن يعرف من أنا فحسب، بل عرف "أبوي و أبو أهلي كمان. بشير الذي لم أره منذ سنين و كلما رأيته مازال يذكرني بديني لأحمدقائلاً: (تجري يا ود البروف؟)....... حتي ظننت أنه سيورثه......
كان ذلك في كافتيريا تعرف أحياناورسمياًبكافتيريا عدلان و يسميها - الكل - ب-عمي حسن- شأنها في ذلك شأن الفضا الرحب الفسيح اللي إسموا "أمونة".
الشمباتة حين يسمونك بأسم ماف "خم و صر" و أعلم إن تاريخاً لك قد بدأ بعد ذاك الأسم.
أنت تعلم أن قاعات بذلت إدارة كلية الزراعة ما بذلت لتسميها "اليوبيل ألفضي أو الذهبي" لست أدري .. أعلم أن هذه القاعة سيكون إسمها "و إلي الأبد" "قاعة البقر". أتذكر منقة؟ وين يا منقة؟ هل عرفت له أسماً غير منقة؟ قاعة الشارعة ما زالت قاعة الشارعة. كما ان أمونة ستظل إلي الأبد أمونة.
منذعام أو أكثر مات عمي حسن و قبل موته بأيام زرته بالمستشفي (وددت لو أن أكتب يومها) و أخبر الشمباتة و كل من يحب "عمي حسن" أن سيد الإسم قد رحل "في صمت".
"راشد راشد"
اسرعت الخطي الي قرب ذلك المبني .. وهنالك التقيته .. بورتسوداني الأصل .. الشرق يتنفس كلماتة قويا .. عندما نذهب لعلي مختار .. يكون ثلاثتنا في قاموسه .. تلاتة نفر ..
سبب لقاءنا كان واحد .. عبد الأله البيطري الغناي.. و .. سامي المهندس .. غنيا سويا ليلتها. وكنت انا و راشد هناك لنسمعهم.
راشد يبتسم .. لطيفا .. حين يهبشه جنون طرف .. "صوط" .. الغنا
يستمع للموسيقي بانصاط تلاميذ .. الكنبة الأولي .. أولئك الذين لا يقبلوا التخلي عن .. العشرة الأوائل بي أخوي وأخوك.
"نشيشيبه"
ياخ انت ما تجيني .. انا في نشيشيبه .. هكذا قالها ناسيا أو متناسيا -ال- التي نعرف بها الأشياء!!
خلاص تمام يازول .. بجيك والله.
وجيته
غرفته لم يميزها عن اخريات ينتمين ل-نشيشيبة- الا بجهاز تسجيل أحمر اللون .. تليد .. اظنه .. ينتمي للشرق ايضا .. لكن لشرق في جنوب القارة الصفراء.
يستعين مسجله علي أيواء الأشرطة بداخله .. ببضع حبال من البلاستيك .. مهترئة .. عملت لزمن في أحد سراير الغرفة الثمانية ثم أحيلت لصالح الموسيقي العام.
عمر .. اناداير اسمعك الشريط دا .. و يمد الي بشريط السمندل - الما بغباني - ثم نديره .. يوقفه راشد ..
الجهاز اللعين لا يرجع
.. فقط يقدم ..
يقلبه ..
يقدم ..
يقلبه ثانية ..
و يشغل ..
و ينصت ..
و يسألني .. عليك دينك سمعتهم هنا"و يشير إلي الجهاز" قالواشنو؟ و يردف -قبل أن أجيبه- لا حولااااا
نبش لي ميلودية سألتو عن فؤادي من عمق احد مقطوعاتهم .. ليته لم يفعل يومها!!!
التقيته بعد ذلك كثيرا "و غالباحول قهوة في أمونة"، عجيبة هي حكاية هذا الأدروب مع "دبنة أمونة"
وما ان كان هناك شريط .. الا و كان راشد يلمس مواطن جمال فيه .. لم تدركها اذني قبله.
سامع يا عمر التشيلو بتاع محمد سيف دا قال شنو؟ ياخ ياهي دي واااضحة ..
أقيس محاااااسنك بمن .. يادوررر الماليك تمن .. و الله نور عيني و نور الزمن ..
وعندها ... عندهافقط اسمعهاو أعرف كما أعرف اليوم
من هو الدر الما ليهو تمن؟.
يا سلام عليكم يا الشمباتة و إنتو بتعلموا و يا سلام عليكم و انتوا الدر الماليهو تمن
و يا سلااااام علي أمونة
عمر عبد العزيز (برلوم جديد لنج)
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: omer ibrahim)
|
أنا كنت وين يا ربي؟
أعتذر عن الحضور المتأخر جدا
ولكن
مهما بعدت
تظل شمبات
وتلك الشجرة أمونة
ونظل نحن ... نحن
يا هاشم في العيد
و يا سيف التعيس
ياصابر عبد الهادي الفنان
ويا فوزية حسن حسين
جد جد
بلغوا أمونة عني السلام
بلغوها عني الحب و العرفان
وبلغو شمبات عني الامتنان الصادق
وبلغوكم عني فرداً فرداً الحب الأكيد
شكراً علي اللفتة البارعة " رد الجميل .... امونة"
ويلا خلوني ألحق نفيركم
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
Inaam Saad
Quote: أنا كنت وين يا ربي؟
أعتذر عن الحضور المتأخر جدا |
ياهـاشـم... حصـل...
دى نعـومة ..متنكرة فى شكل Inaam Saad
قلتى لى ماعـارفة كنتى وين ؟ كنتى زائعة.. يلا إنتى حا تدفعى ديونك وديـون أصحـابك وأصحاب أصحـابك كللللهم... ما أصـلو إنتى الوريتيهم سـكة أمـونة وبعد داك هم ما قصروا لمو السـودان كلو وبعض دول الجـوار... واحـدين شـعراء واحدين كتاب واحـدين رسـاميين و نقـاد و..و....،بالمناسبة ياإنعـام إنتى البنيوية التركيبية دى يـعـنى شـنو؟ ماتقـولي لى أسه دى علاقتها شـنو؟ أيوة علاقتهاديـون أمـونة وأصحابك المجانين ديل.. أها من الليلةتمشى تفتشى الناس ديل وين وتلمى لينا ديون أمـونةدى منهم والمابتلقى حا تدفـعى حـقو... وحاأكلم هاشـم يتصل وماتمشى تغشـيهو .. سمـح؟؟؟
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: SAIF MUstafa)
|
| Quote: يلا إنتى حا تدفعى ديونك وديـون أصحـابك وأصحاب أصحـابك كللللهم... |
على عيني وعلى رأسي ومن عميق القلب يا سيف حقاً عليّ ديوني وديون أصدقائي وأصدقاء أصدقائي فحق أمونة عينا كبير
| Quote: "ما أصـلو إنتى الوريتيهم سـكة أمـونة وبعد داك هم ما قصروا لمو السـودان كلو وبعض دول الجـوار |
"
ما دول الجوار بس يا سيف ....اوعى تكون نسيت محمد خريشة وسمير فتحي
لن أنسى إفتتاننا بهدهد عاطف خيري
"نحن البلاد الشاكية جرحها للصديد"
جاتنا القوافل بالضجيج
جرتنا من حلبة رقيص
ورتنا كيف صلبوا المسيح
ورتنا كيف كتلوا الحسين
وبكينا أكتر منها
ساقتنا فى الآخر .. عبيد""
| Quote: واحدين كتاب واحـدين رسـاميين و نقـاد و..و |
هاشم كتر خيره ما نسى غير تونا المجنونة وواحدين كمان يا سيف مجانين وطن ذي الهادي بشرى بدر الدين موسى عمر خيري ورجاء القاضي
يااااااااااااااحليلهم كلهم يا سيف
| Quote: "بالمناسبة ياإنعـام إنتى البنيوية التركيبية دى يـعـنى شـنو؟ ماتقـولي لى أسه دى علاقتها شـنو؟" |
والله ما بسألك يا سيف بس إنت أسال لي عبدالرحمن السمين وين ودى كتاب عبد اللطيف اللعبي "مجنون الأمل" و كلمو بي كتابه الجديد الما لحقنا قريناه في محراب أمونة "تمارين في التسامح"
يا هاشم أخوي تلفوناتي – - في الماسينجر
و ليك برضو يا تعيس وباصيها لي عبدالرحمن وأكرم ولؤي وعفاف حثن وخالد عبدالله
تحية حب وإجلال لأمونة
لشمبات والشمباتة
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: Inaam Saad)
|
ازيكم ...
عذرا على التاخير المبالغ فيهو ولكنه التعب والفرح وممساسكة الرزق ...
كان يوم من الامس الجميل الباهى الزاهى القشيب ( انتو القشيب دى يعنى شنو ) ....
على ضفة النافورة شمال المسرح جلست غادة الطيب وسلمى خالد وشوشو .. احتضنت امونة كل واحدة مساااااااااافة وبكت ... وسالت عن الصغار واحوال الدنيا والباقين المافى والبره السودان واللسه ينتظر .... وكلمتنا عن اطفالا و افاعيل الدهر معاهم وعن فرحتا وهى ما عارفا انها فرحتنا .....
حجز انقياء السريرة الضفة الاخرى ... العربى الزين بشير سليمان الرفاعى والكركدن ( طبعا انقياء السريرة دى مخارجات منى ساكت زى يقول ليك البت دى روحا حلوة ) ونستم كانت ظريفة ودمها خفيف عن الفقر الاتخارجو منو ( ودى فرضية خاضعة للنقاش ) وايام شمبات زمان والجوع والذى منو وذكريات وين ياخ اسمو منو داك ....
وبين الضفتين فى منتصف المسافة وقف اب جاكومة وعبد الوهاب بوب سهير واخرون يتابعون البرنامج ويوجهون دفته ... وناس تانى كتيرة لا تعلمونهم الله يعلمهم بحبو امونة .... فاضت نجيلة النافورة اليوم داك جمالا ودموع وابتسام ومرة مرة ضحكات مجلجلات ... وراء خالص جلس اولاد بابكر امير ودكتور محمد وجنبهم كده ناصر بر براهو طاشى او مطشش ويوسف مصطفى ...بمشاركة من السنتر وشباب اقتصاد الما خمج جاء فارس السر وامين بشرى وغاب بخارى لاصابة ملاعب .... انا كنت اتجول بين كل الضفاف ما داير اى فرحة ولا نص ضحكة تفوتنى .........
عبد الوهاب بداء البرنامج بتقديم الاستاذ معز عبد الوهاب من مبادرة رد الجميل والذى ما قدر يقول ولا حاجة بس قال شكرا ورجع محلو عبد الوهاب اضطر يقول الكلام كلو ابتدا من المبادرة لحدى حال كونو امونة طوالى بتلمنا .......
بداء الشريف البرنامج بتحية ستات الشاى كلهم وخص بالتحية امونة ودردش معاها فى كم موضوع كده ......
امونة اتكلمت بعفوية عن الحرب والسلام اى والله عن الحرب والسلام لمن محجوب قاطعا بعشه كلمينا ميرى ذكرينا اى سونكى احسن يبقى مسطرينا وسلمى خالد كانت اكتر زول مبسوط الوقت داك ....
غنا عبد اللطيف وردى ( ركوبه واسمها منزل ) و ( الشعب حبيبي وشريانى ) وادانا بطاقة شخصية برضو سلمى جات الاول فى الانبساط معاها انا الاول مشترك .....
اطلقنا مبادرة بناء بيت امونة بصحن مبادرة رد الجميل والكان لافى طوال الحفل وجمع سبعمية واربعين الف .....
نجى بعد كده للجد .......
التقديرات الاولية لتكلفة بناء غرفتين وبرنده وحمام ومطبخ بسور وادبخانة حسب المعلم فتحى ( وده مقاول متعاون مع رد الجميل ) هى ( اربعتاشر مليون جنية لاغير ) ...
المتوفر منها الان مليون واربعمية
شوفو الشكل الامثل لتجميع المساهمات .....
انا بقترح نحدد نقاط تجميع وبتخيلا كالاتى
اوروبا كلها يتابع ويجمع المساهمات ابى عبد الوهاب خليفة بشكل البشوفو مناسب ... الخليج بابكر وعبد الله الخطيب و خالد عويس .. السودان او الداخل ( من ذاكرة التجمع الوطنى ) معز عبد الوهاب حسن سنادة ... شوفو زول فى امريكا ( بابكر قال بيتصل بهاشم احمد هاشم لموضوع امريكا ) ... ودايرين زول فى السعودية ....
حنشرع طوالى فى شراء التراب ودق الطوب ... وتجميع الابواب والشبابيك بمعاونة جماعة هكر ...
فى مجموعة صور و ( سى دى ) ليوم التكريم ممكن الداير نشوف نوصلم ليهو كيف بابكر حيكون عندو نسخة وحاحاول اوصل لبيبو نسخة كيف ما عارف ....محجوب شريف حيكون بكره فى لندن ( الله يرجعو لينا سالم غانم بسرعه ) حيكون عندو نسخ من السى دى ....
بالمناسبة انا ما بعرف ارسل صور فى الايميل ولا فيديو ....
حاجى صاد بتفاصيل اوفر يمكن بكره ....
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
الوليد لو في طريقة حقو تنشر الورقة الفيها المواد الكتبها معلم فتحي .........
طبعا الشمباته كلهم بكونوا بسألوا بخاري الامين دا منو ؟؟؟ وكاتب البوست هو ... طيب أنا لم ادرس بشمبات ( والشمباته .......... السنتر ) لكن كان عندهم حارس مرمي كديسة بس وشالو مننا الكأس ، درست كلية الاقتصاد والعلوم السياسية ( ما بدور المزارعية .. بدور البقرأ سياسية ) حرضتنا شمبات علي ماهو ماثل الان ( لارا .. يارا ... أمين ) وبدوري اوصي اي عاشق ياخذ ليه خلطة في أمونة
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
لدواعى رفع البوست لاكمال التنسيق .....
حسن سنادة ذكرنى ( الرشيد بدوى عبيد ) طوال الحفل كان حاضن ( لاب توبو ) بكتب ... الترتيبات ماشه كويس ... محجوب جا خاشى ... واقصى الطرف اليمين عبد اللطيف وردى .... امونة يا سلالالالالالالالالام عليها وصلت ...
ما شاف فى الحلفة دى ولا حاجة حقو نديهو ( سى دى) مجانى بديل اتعاب نقل مباشر الله يديهو العافية فالح خلاص فى نزيل الصور ......
عذرا ان سقط سهوا المشاركة الفاعلة للاستاذ محمد لطيف من ( طيبة برس ) والصحفى الشاب خالد عبد العزيز من ( عافية دارفور ) لكن عادى هو انا نسيت الهادى ود اب سن ذاتو محل ما تتلفت فى الحفلة تلقاهو قاعد وهادى .....
المكان الماركيزى دى يا خالد عويس خلتنى الاحظ حاجة انو اغلب الشواكيش التمت فى شمبات دى كانت فى امونة
( عاين مافى اى امثلة وخلينى اتم كلامى ) لكن هسى دى لمن تتذكر الكلام ده ما ببقا ليك ذى قصة بت مائة عام من العزلة النفضت الملاية وطارت ... انت البت دى تكون مشت وين او البنات داك مشو وين ...
لو اتذكرتا حاجة بجى راجع او لو لقيت البوست ده نزل قبل ما نكمل التنسيق ......
..............
| |
|
|
|
|
|
|
|
|
|
Re: كفتيرة تفك الحيرة (Re: Elwaleed Ibrahim)
|
الريح بتهد من حيلا
بتقلل ليلا مطيرا
امك والصحة بتنزل بتمغرب قبل عصيرا
يا حليلا العرق اتصبب
فصد والله جبينا
اتدنى همقلوبينا
اخوانك شفع قصر
لسه ما بفشوا غبينة
والحيلة دليلا بليلة
مرات بموية كسيرة
روشتة تخلى الحتة اضيق من ثقب ابيرة
جيران والحال من بعضو
نيرانم نار الحمى
ضلمة الضل كرتون وحصيرة
والعين والنية بصيرة
وحبال النجدة قصيرة
كفتيرا تفك الحيره
يا بت احسن من غيرا
ولذلك انت هنالك
في ركن السوق الشعبي
بت امك ما بتكوسي
دروب الشك والذلة
مرات الكسرة تعوسي
ما بسمع حسك
الا النجمة وديك الحلة
وعجينك في البستلة
في ليل الصاج الداكن
ترميهو قميرا قميرا
كفتيرا تفك الحيرة
يا بت احسن من غيرا
حليمة النيمة تلمك
في ضلها كتر خيرا
النبر جنب البنبر
والمسك الفايح عنبر
نعناعك طينو قريرا
الشاى والبن دلاية
هبابة ترفرف طيرا
نجوم الضحى جمراتك
صحيها جميرا جميرا
غزلانك دستة كبابي
تتفنني في تميرا
فنجانك جنب فنجانك
شفع في زفة وسيرا
وتزازي برند برندا
العدة حرام كسيرا
كفتيرا تفك الحيرة
يا بت احسن من غيرا
حليمة النيمة تلمك
في ضلها كتر خيرا
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: حسن سنادة)
|
يا سنادة الله يديك العافية الناس حماسا ما فتر ولا مشت بعيد لكن مع الهلال والمريخ ده البوست
بنزل بسرعة خلاص تفتشو ما تلقاهو .....
على العموم الامور ماشه كويس فى مشكلة مع ( المساح ) كل يوم بقول بكره
و دكتور هاشم لحدى هسى ما اتصل ...
شباب الامارات اتصل منهم كذا زول ومرتبين امورم ....
برضوا المشاركة لزوم رفع البوست ....
لكن المشكلة بكرة الهلال ده غالب مدرن مغلوب البوست ده بنزل عشرومية صفحة ....
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: هاشم الحسن)
|
( لؤي خرج يطلبهم في حملة إلكترونية شعواء محمومة و مبتهجة كمان )
انت يا دكتور الزول ده مش تكاسى طيب لزوم الحملة الالكترونية شنو ما يمشى عليهم بالدرب
...............
طيب والامور بجاى برضو ماشا تمام ولو عندك زول جاى عليكم غادى انا برسل ليك معاهو ال( سى دى )
....
من غير مناسبة ود النضيف بسلم عليك وكذلك العربى ..........
برضو لزوم رفع البوست .......
| |
|
|
|
|
|
|
|
|
 Re: رد جميل أمونة .. اليوم بمجمع شمبات (Re: Elwaleed Ibrahim)
|
وليد البرلوم دكتور هاشم العزيز صابر وكل الشمباتة اسفين انو جئنا متاخرين ولكن والله ظروف سك المعايش فى هذه البلد وامونة ربت كل الشمباتة وسدت الفرقة بين العمادة والصندوق وخيرها عم ولسة يا اولاد الخطيب عندكم باقى ديون ومعتز ود ماهر ومعتصم العربى وعماد فرح بدر الدين مساعد ونسيبة عباس عمار الباقر انور وحسين مواهب عمر الاخرى وعاطف الرفاعى انتصار الامين ياسر النضيف وكارم عبد المنعم وعبد المنعم عمر سيف التعيس وخالد صالح سليمان الرفاعى هيثم عوض ود الباقر يا خالد عويس سارعوا بسداد ما عليكم من متاخرات دوما امونة دوما شمبات
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
يا رهف أمونة ربت كل الشمباتة وجزء من ناس السنتر و ( وحبيباتهم ) ... كانت اجمل مواعيد الغرام عند أمونة ... محسن قرافي حكي لي انه بعد سنوات طويلة رجع الجامعة لغرض قال لي ما هزاني فيها الا امونة وبكيت ياخ تتذكر نحن حبينا فيه كميات كيف ؟؟
| |
|
|
|
|
|
|
|
|
 Re: رد جميل أمونة .. اليوم بمجمع شمبات (Re: bukhary el amin)
|
الأحباء هُنا
أحسست بكثير من الراحة النفسية وأنا أرى
البوست يضجُ بريح النفوس الطيبة ،
فعرفت أن من هُم في سن أبنائي أكثر وفاء
وأن الدُنيا في الوطن لم تزل بكل خيرها .
وسأعود ليبقى الوفاء ومحبة الآخر
دون قيود وأن المحبة دون غرض
نسمة من نسمات جمال الدواخل
شكراً لكم
*
| |
|
|
|
|
|
|
|
|
|
Re: رد جميل أمونة .. اليوم بمجمع شمبات (Re: bukhary el amin)
|
الأخوة الشمباتة الأوفياء و الأخوة في مشروع (رد الجميل)
يبدو أم حملة أبو اللول الإكترونية من قاعدته (التكسوية) قد بدأت تثمر في التواصل والتوصيل ـ إنتا يا وليد يا معز قايل تكاسي شيكاغو زي تكاسي المرسى إياها و لّ شنو ليك كمان؟ـ تكنلوجيا يا زول ماتخرش ميّة.
و هاهي مسامهمة تصلني من الأخ فقيري، هي الأولى من خارج ولاية إقامتي (الشمباتة هنا كلهم وصلوا). و معها هذه الكلمات الصادقات التي أرى إنكم أولى بها و أنتم مستحقيها بالأصالة فكان لا بد أن أوصلها لكم و الشكر يذهب لمستحقيه.
و يا فقيري العزيز، شكراً جزيلاً يا خي . دام لك البصر و حسن النظر و إستطال بجودك المعروف وبعد عن نداك القصر.
و لتعذر أخاك في نشر هذي، و لكنها أريحيتك لها أريج أود أن يستفعمه أهل الفضل.
أمونة، إنسانة من ذوات الندى و الشذى الغير منقطع
فلا أروع من أن يتصل فينا نداها و يفوح علينا شذاها
سأحول لكم ما يتجمع عندي بعد أسبوعين من اليوم.. لا زلت أنتظر شيكات في البريد و إنجازات لوعود في التلفون.
| |
|
|
|
|
|
|
| |
bukhary el amin
Motaz Ahmed
Saber Abdelhadi
SAIF MUstafa
هاشم الحسن
اينانا
Rihab Khalifa
دوت مجاك
Inaam Saad
keiga2000
عبدالله الشقليني
رهف
فيس بوك
تويتر
انستقرام
يوتيوب
بنتيريست