|
|
 حزب سياسي
|
الأيام دي طبعاً الدنيا قايمة ولم تقعد بعد عندنا والسبب أن هناك عدد كراسي أقل من عدد الناس الواقفين وسوف يقعد البعض بطريقة أو بأخري على الكراسي المحدودة وسوف يقعد البقية الباقية أرضاً إن أرادوا أما إذا أخذتهم العزة بالإثم فسوف يفضلو واقفين دون شماعه تدعم وقفتكم أو حيطه. ومع تقديري لكل الذين يعانون من وجع الركب أو كروشهم تمددت بالقدر الذي لا تسمح لهم بالجلوس أرضاً أو من يعانون من أى عيب خلقي آخر مكتسب أقول لهم أنا لا ناقة لي ولا بعير في هذا الأمر لأنني مررت بالكثير من الإنتخابات بدء من الجامعة مروراً بالمجالس البلدية والمحلية والقروية ورئاسة الجمهورية وحتى الجمعية الخيرية في حينا لم أقترع في الكثير من تلك اللجان أو أدلي بصوتي ومع ذلك كنت أجد أن نسبة فوز فلان بالمقعد الفلاني تجاوزت المائة في المائة بقليل تخيلوا أليس هناك من يمتنع عن التصويت أو يصوت للإتجاه الآخر ولا الحكاية شكلية بالقدر الذي أصبحت عايره وأدوها صوت.
دا كلو كلام خارم بارم في تقديري وأتحمل نتائج هذا التقدير البائس ، بس كنت داير أعرف شنو يعني حزب سياسي ، أها وحاتكم جريت جري على عمكم قوقل وقلت ليهو فضلاً حزب سياسي سيرش وبعدها إنتر أها ظهرت لي كمية بتاعت نتائج قلت أختصرها وأشوف ناس الويكيبيديا، الموسوعة الحرة أريتهم ناس السرور الخاتين قول لو كتبت ليهم حبل حلفا أو جردقه أصلو ما بقولو ليك ما بنعرف طوالي يرصو ليك المعاني لمن تتحير وما تعرف تختار شنو ، أها مره قلت أتحايل على قوقل وكتبت ليهو "شلعوها الخوالده" وقايل نفسي من جهلي إنتصرت عليهو ، قام قال لي يا عنزة يا وهم هذه قرية تقع في الجزيرة بالسودان وعيييييك ما فضل ليهو إلا يقول لي فيها كم بيت وكم دكان وآخر حفلة عرس تمت فيها متين. أها إتبومت وقلت أخير لي أعمل فلوستوب وسطر جديد. أها على ذمة الموسوعة الحرة فإن الحزب السياسي يعرّف كالتالي:
الحزب السياسي هو تنظيم سياسي يسعى إلى بلوغ السلطة السياسية داخل الحكومة، وعادة من خلال المشاركة في الحملات الانتخابية. والأحزاب السياسية تمارس الديمقراطية في داخلها من خلال انتخاب أعضائها في أمانات الحزب المختلفة و صولا إلى انتخاب رئيس الحزب، و ترشيح أعضاء ينتمون للحزب لخوض الانتخابات .
الأحزاب السياسية كثيراً ما تتبنى أيديولوجية معينة ورؤى، ولكن يمكن أيضا أن تمثل التحالف بين المصالح المتباينة.
في العلوم السياسية توجد عدة تعاريف للأحزاب السياسية. تقليديا ركز علماء السياسة على دور الأحزاب السياسية، باعتبارها أدوات للترويج ترشح في الانتخابات للمناصب العامة يعرف الأحزاب السياسية على النحو التالي : "حزب سياسي هو جماعة منظمة رسميا أن يؤدي وظائف وتثقيف الجمهور لقبول النظام فضلا عن الآثار المباشرة أكثر من اهتمامات السياسة العامة، ويشجع الأفراد لتولي المناصب العامة، والتي تشمل وظيفة الربط بين الجمهور ومتخذي القرارات الحكومية.
أها يا جماعه أحزابكم ينطبق عليها التعريف دا ولا شايتين ضفاري قبل أن ندلي بصوتنا ولا أقول ليكم كان ما غنيتو لي الأغنية بتاعت أى صوت ما حا أصوت ويمكنكم أخذ صوتي بالقوة زي الكثير من إنتخابات دول العالم الثالث صوتو بيهو ورجعوهو لأنني أجاركم الله أعاني من أعراض تشابه أعراض H2O أقصد h1n1 بس الكويسه دي بالإسمول ليترز يعني ما فيري كريتيكال
|
|
  
|
|
|
|
|
|
|
 Re: حزب سياسي (Re: Abureesh)
|
يا الملا عمر،،
ممكن نعلق على موضوع الكراسى الفاضية و المحجوزة،
و نخلى تعريف الحزب السياسى؟؟
أصلى ما ليش تئل على السياسة،،،
و فى كل الأحوالى بلقى نفسى .... طوالى معترضة،،،
فى موضوع الكراسى،
أنا كنت فاكرة إنو إذا أمتنعت عن التصويت،
و جات نتيجة الإنتخابات بفوز أحدهم بنسبة 99.999%،
فارق الـ 0.001 دة ح أكون أنا و معاى (بضعة) أشخاص،،
حسه بعد ما شرحت لى إنو الفوز بكون بنسبة أكثر من 100%،
أحبطتنى!!!!!!!!!!!
يعنى ما ح أقدر أقيف موقف!!!
دى يحلوها كيف؟؟؟؟
__________________________
إضافة للتعريف:
تعريفى للحزب هو مجموعـة من المستهبلين (حريصة على منافع أعضاؤها) تتعيش بإسـم الشعب.
| |
|
|
|
|
|
|
|
|
|
Re: حزب سياسي (Re: Hala Hassan)
|
العزيز ود بحري الغائب
أول هام مشتاقين
أضف إلى تعريف الحزب السياسي
أن تكون حريف وتعرف تهدف في الزوي ده بالنسبة لبعض الأحزاب
التي تحتاج لشطارة فن الممكن واغتيال اللات (جمع لا) ودراسة احتمالات تقبل الرئاسة
لعضو الحزب وتصعديده حتى يصل إلى المكاتب الفوق.. وذلك بعد انحسار الشخصية، التطبع
بشكل القائد هيئة وشكلاً.
أو
أن تكون ترس في آلة حركة كبيرة تقود حركتك إلى تحريك ترس آخر ثم آخر ثم أخر
لينتج فعل في خلاصته ابعد من رؤاك الأيديولوجيه أو قناعاتك الحزبية .. وتظل بفعل
الحركة الدائرية ما عارف رأسك من رجيلك.
أو
تكون أنتهازي وتعرف من وين شاولات السكر والدقيق وتصاديق الأسمنت
منو أوسع ذمة في الوزارة الفلانية .. ومن البحتاج لشكر حماد
وخيل الجماهير تجقلب
الحزب السياسي قدح كبير فيهو فتة ما تخلص بس اللمة عليهو كثيرة
لا هو عايز يخلص ولا المريدون شبعوا
أه تحلها كيفن
اللذيذة أنو الحزب علاقتو بالجماهير موسمية ذي الخريف عندنا
في انتخابات في جماهير
ما في انتخابات في فرطقة طير
نزار قباني قال
للقمح موسمين
القمح يزرع في الشتاء
القمح يحصد لانتخابات الرئاسة
سلام يا ملا عمر
| |
|
|
|
|
|
|
| |
almulaomar
Abureesh
فيس بوك
تويتر
انستقرام
يوتيوب
بنتيريست