يا مسافر ابقى فاكر إنو اشواقنا بتسافر لا محطات نبدا بيها لا انتظار لا تذاكر في جناح الغيمة نركب او نسيم بي حدانا عابر نوصلك في عز مكانك لا بنهديء ولا بنحاذر بي وراك ما عرفنا نفرح والنغم اصبح مُشاتر بقينا نتذكر ملامحك وشعرك المجدول ضفائر وابقى فاكر يا مسافر ايه نسيت قُبال تسافر ؟ نسيت عيون مليانة إلفة شوفا كيف بالريد تجاهر نسيت قليب حاضن غرامك شوفو كيف مجروح وصابر نسيتنا هسه ونسيتنا باكر نسيت جمال كل المناظر نسيت سمرنا نسيت قمرنا وليلنا كله معاك نساهر ويا مسافر ادينا من وقتك دقيقة اطفيء اشواقنا الحريقة والمشاعر الزاد لهيبا ولي لقاك كيف الطريقة ؟؟ ما مهم لو نشقى نحنا يا دُعاش نفحة بلدنا يا عسل عشرق شرقنا يا رذاذ بلل صبُرنا وابقى فاكر يا مسافر إنو اشواقنا بتسافر توصلك من غير تفكِر والمعاني السامية تجهِر والسماء بي سحابا تمطِر والارض بحقولا تبهِر والصحاري القاحلة تزهِر و يا مسافر ابقى فاكر إنو اشواقنا بتسافر لا محطات نبدا بيها لا انتظار .. لا تذاكر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة