|
Re: يا سفيان زنقار ماكان فنان ومسرحي فقط بل كان ايضا لاعب كرة قدم ممتا (Re: محمد ميرغني شاطر)
|
البرنامج غشونا وكان شغااااال لانو قدور قال يا سلااام وطوالى فرفور غنى يا من طاب رياهو الحمد لله قدور قال دى بداية مختلفه و انو فرفور و عاصم قررو يبدو الحلقة كدا . طه الضرس يغنى لكابلى المرايا في مشكلة عظيمة في الساوند و واضحة شديد طه الضرس ما شاء الله ممتاز يا سلااام محمدية يردد مع طه واخر انبساااط وصولو من محمدية يكمل بيهو مزاجو طه مزاجو عالى جدا و يتجدع في الأغنية بارتياح صولو عود من احمودى متعة المتعه ذاتو معاهو النقزات المعرووووفه ديك طه حافظ ومزاكر الشغل بتاعو بامتياز . التقييم 9من10.
و الله غنو اغنية ما فهمته فيها حاجة غناها عصام .
ريماز تغني ما تهتم للأيام اجمل الكلمات التى احبها للراحل المجيد عوض جبريل نموذج صغير جداً كوبليه واحد ما عندى ليهو تقييم . (الحلقة دى ما عندها رأس من قعر نجر سااااكت وحنك من قدور)
نادر خضر و على قدر الشوق للمعلم الصديق الموصلى نادر متعود يغنى الأغنية دى من زمااااان آداء ممتاز من نادر و مسنكف صااااح فى الأغنية التقييم 9من10.
عاصم البنا يغني يا حبيب لا تهجرني آداء جيد من عاصم و اختيار موفق مع صوته التقييم8من10.
الحلقة دى بالجد فيها حنك من الناس الفى الاستديو ديل كلهم لانو هم قالو اى واحد حيغنى اغنية عايز يغنيها فهل معقول دا اختيارهم الحقيقي!!!؟
يا عباسية و يا شباب دا تعليقى كنت كاتبو ومجهزو عن الحلقة دى بس ما نزلتو نسبة لمشاغل كتيرة لكن بالجد البرنامج بقى ممل وغير مغري بالمتابعة .
حلقة آمس المكرره مع صديق سرحان ما حضرتها نسبة لظروف .
| |
|
|
|
|
|
|
Re: يا سفيان زنقار ماكان فنان ومسرحي فقط بل كان ايضا لاعب كرة قدم ممتا (Re: سفيان بشير نابرى)
|
الاخ ود العباسية
فعلا السنة هناك هبوط
واكيد بعض الدبرسة
الثوارت العربية ومناظر الدماء الشديدة اى قناة تفتحها اول شئ يقابلك دم نسال الله السلامة
الانفصال وموجة الغلاء الشديدة جدا حاليا
ثم والهجوم الشديد من قبل السلفيين بغير وجه حق على البرنامج مما غير مواعيد زمن البث
البرنامج للاسف ذو وتيرة واحدة مافى جديد ومثير. شوف شوية حركة البعيو وطوالى كانت اجمل حلقة
عدم الاحساس بكلمات ومعانى بعض الاغنيات اكرر بعض الاغنيات جعل الاداء لها باهت جدا كذللك تسرب شوية ممل للفنانين ما عارف ليه
عدم ثبات الاداء كمثال عصام محمد نور بالغ فى اغنية يا حاسدين غرامنا لمحمد الامين انا ذاتى كتبت صوت اشادة قوى
تانى يوم طوالى كان عصام اتعس ما يكون فى اغنية العطبراوى صابر معاك صبر طويل
اشيد بطه سليمان الاكثر ثبات فى الاداء حتى الان
| |
|
|
|
|
|
|
Re: يا سفيان زنقار ماكان فنان ومسرحي فقط بل كان ايضا لاعب كرة قدم ممتا (Re: ودالعباسية)
|
سلام يا ود العباسية و جميع من بالبوست البرنامج خلاص بقى ممل جداً كل مافيه ممل غير جاذب واذا استمر هكذا اوعدم السيزون الجاى مافى زول بحضرو تب .
بخصوص الحلقة :-
و الذكرات صدى السنىن الحادى هكذا قال أحمد شوقى وهكذا بدأ قدور الحلقة 27 من أغانى و أغانى و الحلقة عن اغنيات وحكايات وحكى عن افتتاح سنما عطبرة و تكلم بان فى الحفل كان لاول مرة تغنى الفلاتية البلال تزورنى مرة اول اغنية صباح تغنى يا البلال زورنى مرة صباح تغنى كعب عدييييييل صوت مهزوز ومرتج (يا صباح والله حرام البتسوى فيهو دا حرااااام رسمى و المصيبة لا بتسمعى رآي لا بتقري حاجة و تسوى في البتسوي فيهو و فوق دا ودا بتجى مجيهة و مزبطة نفسك على الأخر ومبتهجة تتلولحى و تتمايلى اااااخر طرب كمان!!! ياخ زبطى لينا صوتك والغناء و بعديها سوى العايزاهو) . التقييم اكبر صفر و المصيبة قدور بقول يا (صبوحه) ما شاء الله !!! صراحة لله مفروض كل الشباب المغنيين المشاركين في البرنامج دا يكون عندهم رآي و ااااااضح في قصة صباح دى . يواصل قدور حكايتو عن افتتاح سنما عطبرة و شريف يغنى الساعة كم شريف للأسف السنة دى مستواهو سئ رغم انو ادائيه في الاغنية دى متوسط التقييم4من10. حكى عن صاحبو صلاح حسن الفاضل و اغنية عشقتو من نظرة و ديتو عصام محمد نور و نادر خضر وعشقتو من نظرة ديتو غير موفق في الأغنية و عصام تراجع مرة اخرى في الآداء صباح صوته دا ناطى ومفندر قدام الكورال كالعادة نادر افضل حال من عصام لكن ليس كعادته في هذا الموسم
التقييم5من10. قدور يحكى عن مطرب اسمه صالح حسن و انو غنى فترة واشتهر واختفى و بسبب اغنيتين خاصم عوض جبريل و فاطمة الحاج . اغنية عوض جبريل لي حبيب شاغل بالي و ديتو ريماز ومنار البنات ديل يا سلام عليهن آداء في قمة الجمال و التجويد (يا جماعة صراحة لله منار دي فيها حاجة كدا بتقول للزول أنها بت بيتو أو بت حلتو أو صاحبتو قرت معاهو يعني زولة بتعرفه و محبوبه عندك محبة الخوة الواااحده دى). ريماز و منار و ديتو جميل و ممتاز التقييم 9من10. قدور يحكى عن حسن عطية طه الضرس يغنى يا جميل يا ساده يا اسمر آدا قمة في الجمال من طه و جيد جداً ( افراح دى المهججة ليهو شنو ؟؟؟!) التقييم 9من10 قدور يحكى عن العلاقة بين اهل الفن واهل الرياض وحكي عن قصة قديمة عندما انتصر المريخ على الهلال و جابو عوض وابراهيم شمبات و انو اولاد شمبات بدو الحفل ب :- كم نظرنا هلال فاعترض الحاج شاخور بسخريته وقال :- لا غنو يا نجوم الليل اشهدى . و عاصم البناء يغنى كم نظرنا هلال عصام الليلة البرنجي و دا ملعبو (زي ما بقول حبيبنا محمد المرتضى حامد) عصام ممتاز جداً قوة في الصوت (ما شاء الله) و آداء مكمل عوض احمودى مبسوووط ينقز سااااكت مع نومة على العود . التقييم 10من10.
| |
|
|
|
|
|
|
Re: يا سفيان زنقار ماكان فنان ومسرحي فقط بل كان ايضا لاعب كرة قدم ممتا (Re: سفيان بشير نابرى)
|
بدأت الحلقة وهى عن شخصية الفنان و اول فنان اتكلم عنو قدور هو الراحل صالح الضئ و قال له شخصية مميزة صالح الضي اجتهد في تحديد ملامحها .
و اول اغنية يا جميل يا حلو و عصام محمد نور حاجة جميلة من عصام و آداء منسق وممتاز الفرقة كالعادة امتياز والقصاص و الآلات المكملة عوض احمودى طرباااان الكورال من الشباب ممتاز بس من الشابات في مشكلة في الأغنية دى التقييم9من10
الاغنية التانية يا طير يا ماشى لى اهلنا ديتو نادر و ريماز بداية جماعية كويسه مع خط جميلة من عصام محمد نور ممتاز يا عصام خط فى السلك والله الآداء عند نادر ما عجبني و آداء (تقريري) بمعنى الكلمة ريماز جيدة جداً جداً
التقييم7من10.
| |
|
|
|
|
|
|
Re: يا سفيان زنقار ماكان فنان ومسرحي فقط بل كان ايضا لاعب كرة قدم ممتا (Re: سفيان بشير نابرى)
|
شيخ البوست سفيان : لي إسبوع جيت أعز الرسول (ص) وأرد على هجومك الكاسح على صبوحة الحلوة فمعذرة ما قدرت أرد عليك في الصفحة الخامسة يبدو إنها تقلت بكثرة الفيديوهات هسه من غير إقتباسات من الصفحة العارض، حا نقول راينا ثم نمضي .. لووول
Quote: دي عندها اربعة اصوات مش صوت وكلهن كعبات لانها هي ما عارفاهم ولا عندها استعداد تتعرف عليهم خليك من الاهتزاز !!!
البحينى فرحانه وطربانه على شنو !!!؟
|
Quote: صباح تغنى كعب عدييييييل صوت مهزوز ومرتج |
Quote: وصباح دي انا قنعته منها ظاهر وباطن. بس المحينى طربه دا. التقييم0من10. |
~ غايتو يا سفيان ضحكت لمن أديت صبوحة زيرو من عشرة .. ههه .. وبعدين ياخ والله بصراحة شايفاك شاني هجوم كاسح على صبوحة الحلوة (أريتها سماحة وجيهة البنيات لي حدهن الرزينة التقيلة الخجولة .. ههه) والله البنية صوتها ما بطال وبس دايرة ليها Vocal Coach يوريها الأغاني المفروض تنفع مع صوتها الناعم .. هي وأفراح. بعدين يا سفيان بنصحك لمن تمشي بلاد العم سام مع خلفيتك المعرفية دي تدخل كلية موسيقى وتبقى فوكال كوتش. جارتي مشت عملت ماستر في الحاجة دي .. بالله بقت حاجة كدا أصلو ما ممكن تتصورها..! أها بعد داك تمشي تدرب ناس صباح وأفراح ديل خاصة إنو أصواتهم فيها حبة رقشة ..!! وغايتو أهو أديناك أفكار كويسة وليتر حا ناخد الكوميشن .. أها وكمان تبقى لينا جدغ في: سودان قوط تالنت .. لووول
وشريف دا مالو مقهي ومهضلم كدا السنة دي؟!! شكلو كدا مكسر لي في واحدة من النجمات ديل بس ما عرفتها منو!!! .. لووول غايتو أغاني وأغاني السنة دي تألق فيها طه سليمان، وبدا مقبولآ عكس السنة الفاتت، السنة الجاية حا تتربع ليكم على عرش الحلقات صبوحة الصبوحة .. لووول
تحياتي ليكم أجمعين
| |
|
|
|
|
|
|
Re: يا سفيان زنقار ماكان فنان ومسرحي فقط بل كان ايضا لاعب كرة قدم ممتا (Re: ناصر احمد الامين)
|
Quote: حلقة اليوم غني فيها شريف و صباح دويتو .. اغنية عيش معاي الحب صراحة شريف عني بشكل محترف عديل كدا و استطاع انو يتعامل صوت صباح بشكل جيد ... و العكس كان حاصل.
اعتقد ان مشكلة صوت صباح يا سفيان تكمن في انو ما بقدر يحافظ علي الدرجةا الصوتية او السلم .. تحس انو في اهتزاز كدا. و الله اعلم. |
سلام يا ناصر
للأسف شريف المرة دي في البرنامج في اسوء حالاتو و الأغنية دي آداء اداء حذر سااكت و دي ما طبيعتو عشان كدا انا قلته هو كعب . اما صباح دى فصدقني لو غناء معاها زرياب بتبشتنو وصوته شنو يا ناصر !!! دي عندها اربعة اصوات مش صوت وكلهن كعبات لانها هي ما عارفاهم ولا عندها استعداد تتعرف عليهم خليك من الاهتزاز !!!
البحينى فرحانه وطربانه على شنو !!!؟
كن بخير يا صديقى
| |
|
|
|
|
|
|
Re: يا سفيان زنقار ماكان فنان ومسرحي فقط بل كان ايضا لاعب كرة قدم ممتا (Re: Luay Elhashimi)
|
السلام عليكم ،،،
اخونا محمد ودالبصير ،،،
Quote: ثالثاً - عدم نشر الأغنية فيه هضم للحق الأدبي لفنان يستحق منا كل تقدير وإحترام ، فسرحان أحد أفضل من غنوا الحقيبة في الساحة الأن
|
ليس هنالك اي هضم للحق الادبى للفنان الكبير صديق سرحان
ولكن كل مافى الامر هو مشاغل الحياة والنسيان وعدم دخول البوست والسبب التانى تنزيل الاغنية فى
اليوتيوب ،، بياخد وقت ،،
تعرف انا هسى لمن دخلته البوست اتفاجاءت انه انا ما نزلتها ،،
وشكرا ليك كتير لى تنزيل الاغنية فى البوست ،،
معذرة مره تانى للفنان الكبير صديق سرحان ولكل رواد البوست ،، ولك عزيزي
| |
|
|
|
|
|
|
Re: يا سفيان زنقار ماكان فنان ومسرحي فقط بل كان ايضا لاعب كرة قدم ممتا (Re: ودالعباسية)
|
الحلقة 28 وصراحة الواحد بقى يحضر بدون نفس خالص لانو الدعايات و طريقة الغناء بقت تعبانة جدا و الناس كلها وصلت للكلام دا .
الحلقة عن الحرمان وفى فرق بين التحريم والحرمان و اغنية ود الرضى أحرمونى ولا تحرمونى يغنيها ديتو نادر خضر و طه الضرس ابتدو الاغنية بفتر شديد نادر فى الكوبليه اتصلح شوية طه الضرس افضل آداء من نادر نموذج بسيط لاغنية جميلة التقييم 6من10 اغنية ابو صلاح اضيع في هواك يا مهفهف يغنيها عاصم البنا بشكل جيد جداً مافى كلام (عندى احساس انو الأستديو كلو حيلو ميت الليلة ومودو تعباااااان) النموذج برضو بسيط التقييم 8من10. و د القرشى وحرمونى الحب الحلال مع مجموعة البنات ما شاء الله رالحلقة عن الحرمان وفى فرق بين التحريم والحرمان و اغنية ود الرضى أحرمونى ولا تحرمونى يغنيها ديتو نادر خضر و طه الضرس ابتدو الاغنية بفتر شديد نادر فى الكوبليه اتصلح شوية طه الضرس افضل آداء من نادر نموذج بسيط لاغنية جميلة التقييم 6من10 اغنية ابو صلاح اضيع في هواك يا مهفهف يغنيها عاصم البنا بشكل جيد جداً مافى كلام (عندى احساس انو الأستديو كلو حيلو ميت الليلة ومودو تعباااااان) النموذج برضو بسيط التقييم 8من10.
ود القرشالحلقة عن الحرمان وفى فرق بين التحريم والحرمان و اغنية ود الرضى أحرمونى ولا تحرمونى يغنيها ديتو نادر خضر و طه الضرس ابتدو الاغنية بفتر شديد نادر فى الكوبليه اتصلح شوية طه الضرس افضل آداء من نادر نموذج بسيط لاغنية جميلة التقييم 6من10 اغنية ابو صلاح اضيع في هواك يا مهفهف يغنيها عاصم البنا بشكل جيد جداً مافى كلام (عندى احساس انو الأستديو كلو حيلو ميت الليلة ومودو تعباااااان) النموذج برضو بسيط التقييم 8من10.
ود القرشى وحرمونى الحب الحلال مع مجموعة البنات ما شاء الله بداية ممتازه من ريماز صباح دي ارخونى منها منار ممتازه التقييم7من10 أغنية حرمته الحب و الريده شريف الفحيل شريف كويس الليلة ما بطال بس الكورال ما تمام فى الأغنية دى التقييم7من10. كلمات اسماعيل حسن حارمنى ليه ديتو عصام محمد نور و جمال فرفور بداية تعبااانه من عصام فرفور برضو تعبان زي عصام بس بالجد الناس دي مالاااااااا كلها موده ميت غايتو جهجهو الأغنية ( والله بيسألكم يا ناسين حسابو بيسألكم و بيسأل صباح دى معاكم ذاتو) و الله حرام عليكم التقييم6من10.
اها ناس الأستديو ذاتو انتقلت ليهم بياخة الآداء بتاعهم و كلهم بقو تعبانين ونفسياتهم كعبه و ممكن عادى تحس بالكلام دا في و جه فرفور و عاصم البناء المرة دى الأتنين زهجانين و مودهم ما زى المواسم الفاتت .
و يا ود العباسية اعفى لي ياخ بس بطنى بقت طاااامه من البرنامج دا.
| |
|
|
|
|
|
|
Re: يا سفيان زنقار ماكان فنان ومسرحي فقط بل كان ايضا لاعب كرة قدم ممتا (Re: ودالعباسية)
|
Quote:
مرحب بيك كتير فى البوست ،،
تعرف ،، فتشته مداخلتك دي لحدي مالقيتها |
ود العباسية راعي البوست سلامات بالمناسبة أخوك وأخوي حيدر ما قاعد يجي بوستات الأغاني بتلقى حاييم بيغادي في بوستات المشاكل والعكلتة
بعدين يمكنك قراءة آخر مداخلة بكل سهولة من على اليسار أعلى البوست
الأخ سفيان: رديت عليك بأثر رجعي أعلى الصفحة دي مما أثار حنق أخونا راعي البوست .. لووول ، لأني فشلت في الرد عليك في الصفحة الخامسة ، كوس المداخلة ..
حضرت حلقة الأمس ، الشباب ديل باين عليهم تعبوا من كترة الغناء وملوا السر قدور كان مفروض يستضيف وجوه جديدة في حضورهم ..إن كان مصر على وجودهم الدائم ، ليجنبهم العناء ..!
يا سفيان أنا غايتو في رايي الشخصي ما شايفة أي تميز أو تمييز بين أصوات النجمات الأربعة (سجن سجن غرامة غرامة) كلهن في مستوى غنائي واحد وهو : وسط. بالله إتخصص لينا في الفوكال تكنيك دا وراجيك شغل كتير!
كل سنة وإنتو طيبين وتامين ولامين
| |
|
|
|
|
|
|
Re: يا سفيان زنقار ماكان فنان ومسرحي فقط بل كان ايضا لاعب كرة قدم ممتا (Re: Hadeer Alzain)
|
Quote: ود العباسية راعي البوست سلامات بالمناسبة أخوك وأخوي حيدر ما قاعد يجي بوستات الأغاني بتلقى حاييم بيغادي في بوستات المشاكل والعكلتة |
طبعاً يا هدير يا الزين ود العباسية اصلاً ما غلطان عليك لو شاكلك واعتبرك حيدر اخوك لانو ذاتك جنك مشاكل زيك زيو بالضبط و اهو عكلتك ليها ضل اها:-
Quote: غايتو يا سفيان ضحكت لمن أديت صبوحة زيرو من عشرة .. ههه .. وبعدين ياخ والله بصراحة شايفاك شاني هجوم كاسح على صبوحة الحلوة (أريتها سماحة وجيهة البنيات لي حدهن الرزينة التقيلة الخجولة .. ههه) والله البنية صوتها ما بطال وبس دايرة ليها Vocal Coach يوريها الأغاني المفروض تنفع مع صوتها الناعم .. هي وأفراح. بعدين يا سفيان بنصحك لمن تمشي بلاد العم سام مع خلفيتك المعرفية دي تدخل كلية موسيقى وتبقى فوكال كوتش. جارتي مشت عملت ماستر في الحاجة دي .. بالله بقت حاجة كدا أصلو ما ممكن تتصورها..! أها بعد داك تمشي تدرب ناس صباح وأفراح ديل خاصة إنو أصواتهم فيها حبة رقشة ..!!
وغايتو أهو أديناك أفكار كويسة وليتر حا ناخد الكوميشن .. أها وكمان تبقى لينا جدغ في: سودان قوط تالنت .. لووول
وشريف دا مالو مقهي ومهضلم كدا السنة دي؟!! شكلو كدا مكسر لي في واحدة من النجمات ديل بس ما عرفتها منو!!! .. لووول
غايتو أغاني وأغاني السنة دي تألق فيها طه سليمان، وبدا مقبولآ عكس السنة الفاتت، السنة الجاية حا تتربع ليكم على عرش الحلقات صبوحة الصبوحة .. لووول
|
فى ضمتك يا بت الزين انتى بى صِحك!!!؟ أنا شانى هجوم كاااسح على صباح!!! طيب هي البتشنو علينا دا اسمو شنو!!!؟ ليه ياخ نحنا مابشر !!! ما ناس!!! ما عندنا ذوق !!!! بعدين يا بت الزين نحنا جبناها عشان حلاته و لا عشان هى غنايه!!!! سماحته و جماله دا بيشفع ليها فى حتات تانية يابت الزين ما بشفع ليها في الغناء وهي مدام سمحة وحلوة ومجيهة برضو التسمح لينا غناها و تجيهو لينا شوفينا كان نقول بِغم ، بعدين تقيلة و رزينة وخجولة دى اتنطر كان شفتهم ما يا هودا تتهوزز و تتلوح سااااااكت بدون صوت ذاتو عايزة تحنكنا بعدين اصلا فنان تقيل ورزين دا ذاتو ما ظريف و كونو الواحده تهجج و تبسط وتطرب دا ما معناهو ما رزينة اها زولتك دى لا لمت فى الرزانة والتقلة لا لمت فى الصوت السمح ! بعدين شايفك عايزه تحشرى افرح !!! ياهدير احسن ليك تعقلى و الله و عكلتت اخوك دى تخليها افرح شنو كمان !!!!؟. اها مقترحك بتاع الفوكل كوتش دا و الله فى رأسي ولو ربنا هون بنفذوا بمشية الله لكن داك الحين صدقينى مش صباح وافراح براها فى ناس كتااااار بقشهم ليكم قشة السنين و بريحكم تب من ناس زى (محمد سليمان - دنيا دبنقا- و دكتور محمد سيف و بابكر الصديق و عندكم ناس كدا عاملين فنانين بريحكم منهم تب و الله بريس ما يكون زيى فى سودان قوط تالنت (هسى عليك الله مغنية المترو دى مفروط يطلعوها!!!؟) اما قصة التدريب فلمعلوميه(اها) اخوك من زماااان اصحابو المغنين و اصحابو طلاب الصوت فى معهد الموسيقى و المسرح مقتنعين بى تصنيفو هههههههه للاصوات تجى تغالطينى انتى وفى منو فى صباح وافراح رقشة شنو العندهن والله ومن حلف بالله ما خلى شئ ديل كارو ما عندهن فى صوتن كارو شنو عجلة عجلة ما عندهن .
يا هدير ما عندك إى كومشن لانو الفكرة اساساً قاعده في كنكوجى من زماااان فما تختينى فى رأسك من هسى وتقعدى تحسبى فى قروش السراب اهو كلمتك !.
شريف كعب السنة دى كعب كلو كلو قصة حبو دى عكلته منك ساااكت برضو لانو البنات ديل كلهن راسيات ورزينات و خجولات و انتى عايزة ترمى فيهن النضم ساااكت .
فعلاً طه الضرس السنة دى هو البرنجى وحصد نتيجة ممتازة و طه دا فنان متمكن و خطواتو مترتبه جداً ولسه حيمشي لقدام بأذن واحد احد . و السنة دى أغانى و أغانى يحتضر حقيقية لكن لومات كلو كلو غااااااااااااااغ كدا دا صباح دى يستحيل تتربع على عرشو لو دا حاله !
اقول ليك حاجة يا هدير !!!! فكينا منك وقومى لفي حرقتي لي روحى الله يعفى عنك
هذا و السلام من قبل ومن بعد
| |
|
|
|
|
|
|
Re: يا سفيان الصيام دا باين فترك شديد ..! (Re: سفيان بشير نابرى)
|
يا سفيان نابري خليني أرجع ليك بالمهلة والتفحيص والتمحيص والهجوم المرتد ، طالما إعتبرتني عكليتة زي واحد أخونا كدا !!!!
بس لكن كمان دي مسألة عاجلة شوية مابتستحمل مهلة وتأجيل: قلت لي ما أحلم بأييي كوميشن؟ وأنا حتى عنوان الجامعة مشيت جبتو ليك؟ لا كان كدا حا أتغاتت عليك .. وبعرقل خطوتك بسبحتي .. لووول!
دمتم بخير
| |
|
|
|
|
|
|
Re: يا سفيان الصيام دا باين فترك شديد ..! (Re: Hadeer Alzain)
|
سلام شباب بنقترح تسوو تلخيص لجملة الآراء القدمتوها هنا وتنشر بمكان ما وحبذا لو وصلت لعمك قدور والشباب
كمان عندي فكرة تانية سوو مقارنات بين من تم الغناء لهم من الفنانين القدامى على امتداد سنوات البرنامج يعني إن تم الغناء لمحمد الأمين ثلاث مرات على امتداد البرنامج يتم عمل مقارنة فيما بينها
وكل عام وأنتم بخير وعقبال السنة الجاية أغاني وأغاني بديعة وجاذبة ومتجددة
| |
|
|
|
|
|
|
Re: يا سفيان الصيام دا باين فترك شديد ..! (Re: بله محمد الفاضل)
|
ياخى العتب على النظر ،،،
اسف جدا للخلط ،،بس لكن انتى واخوك كان تغيرو الاسامى دي شوية ،،
عشان ما يحصل لخبطه فى الاختصاص
الاخ بله محمد ،،،
تحياتى ،،
والله ياخى نحن بننضم لينا 6 سنيين ،، مافى اي شئ اتغير ،،
وكان معانا الفنان عاصم البنا نفسه بشاركنا البوست ،،
بس لا حياة لمن تنادي ،، او ممكن تقول ما بتعرف البحصل شنو داخل كواليس البرنامج دا
هى فكرة كويسة بس تصلهم كيف ،،
| |
|
|
|
|
|
|
Re: يا سفيان الصيام دا باين فترك شديد ..! (Re: ودالعباسية)
|
Quote: اسف جدا للخلط ،،بس لكن انتى واخوك كان تغيرو الاسامى دي شوية ،،
|
يا ود العباسية عيال عمك الزين ديل الاتنين كان شبكتهم اسف و اطاتك صبحت ببقة ليك فى خرزتك ، هسى انت ما شايف هدير دى عايزو تطلع منى كوميشن سااااكت كدا !!؟ اهو كلمتك !!
و ياهدير اهو حارسك ..
الليلة جاهزين من بدرى ان شاء الله ناس اغانى واغانى يكونو جاهزين.
| |
|
|
|
|
|
|
Re: يا سفيان الصيام دا باين فترك شديد ..! (Re: سفيان بشير نابرى)
|
بدأت الحلقة 29 من برنامج أغاني و أغاني قدور النهار ده حنمشى في درب تاني وحنغني في السجايا الحمدية ومكارم الاخلاق و انا بعرف الغناء تلاته انواع هى :- زجلى - حربي- وانشاد و السودانيين اضافو ليهو الكرامة والشجاعة و الشهامة و السودانيين غنو للسجايا الحميدة واول اغنية ديتو مع افرح (الفن) زي ما قال قدور تغنى عاجبنى الكريم صوت مخنوق و مزرور بطلع بالجنبات ساكت افراح غالبه تغنى لما عايزه تبكي رسمى طه يستلم و طه جيد جداً صوت واضح ولحن واضح ومخارج حروف وااااضحه افراح القعده دى غالباها وعايزه تحتو التقييم8من10 لطه الضرس افراح 0من10
قدور يتكلم عن ابو قطاطى باعتبار انه ساهم فى هذا الغناء مع انو اصلاً الغناء دا اسسوهو النساء اغنية خال فاطمة و صباح (واضح انو قدور عايز يبوظ البرنامج اكتر مما هو بايظ ببدايتو دي) صباح سئية وكعبة وصوت ما عندها (أمي قالت البت دى من جاء البرنامج دا تسريحته وااااحده وديك يومى مجيهات شعرن) و الله يا صباح بى طريقتك لا فاطنة لاخاله مابيسلمو . التقييم0من10.
| |
|
|
|
|
|
|
Re: يا سفيان الصيام دا باين فترك شديد ..! (Re: سفيان بشير نابرى)
|
أما الشاعر الامي فالف اغنية لا متيل لها واتكلم فيها عن سجاياه الشخصية جمال فرفور يغنى مابخاف من شئ يا سلااااام فرفور زركرنى بداياتو زماااان زكرني حلاقات مع الراحل ابراهيم احمد عبد الكريم (بس النصيحة لى الله الأغنية قدر ما اسمعه بسمعه بصوت الشيخ طه -بادي- الله يرحمو) . فرفور عمل حركة بتاعة نسيان غريبة جداً لكن لحق نفسو سريع التقييم8من10.
قدور يقول طبعا فى اغنيات للناس البسافرو وبرجعو و ناخد نموذج العودة نادر خضر يغنى العوبه آداء فوق للمتوسط من نادر و القصاص و شغل جميل جداً جداً التقييم6من10.
| |
|
|
|
|
|
|
Re: يا سفيان الصيام دا باين فترك شديد ..! (Re: سفيان بشير نابرى)
|
قدور يواصل الحلقة و يقول وين البنات يغنوا لينا الليلة وين ياوين ديتو ريماز ومنار صراحة لله الليلة ما عجبونى و مستواهم جيد عموماً (شاعر انهم بتاكلو فى الأغنية دى اى واحده عايزه ترخيها للتانية وفي قطعة فى حته كدا) اجمل مافى الاغنية دى هو خط جميل ضاربو طه الضرس دا . التقييم7من10.
قدور قال عجبنى جدا عصام محمد نور لانو قال حيغنى اغنية في ذات السياق عصام يغني ياضئ القبيلة حاجة جميلة يا عصام و آداء ممتاز صوت و زمن ولحن حاجة جميلة 10من10.
قدور قال احيان بحصل تحوير فى اللفظ داخل الغناء الشعبي و نسمع من عاصم عرش دود او اغنية مراقد السار و هو مقصود بيها تمساح راقد فى الحجار . عاصم يقول قصة الأغنية و هى معمولة لمختار ود حمد عمدة العبيدية وانو غنته حميرا ههههههههههههههه قدور قال بتذكر سمعتها من حميرا سنة 45 و عاصم قال ليهو اى بس انا كنت فى السينما هههههههههههههههههه قدور يقول حميرا كانت اسطورة و ام كلتوم السودان و يقول الاغنية دى فيها ايقاعين تبدا بالتقيل الصقرية بعد داك تمشي للاخف الحربية . عاصم يغني بداية ممتازه من عاصم و ياهو كدا يا سلااام مع ارتفاع الايقاع حاجة جميلة جد عوض احمودى و النقزه المبسوطه اتحولت لوقفه وعرضه رسمممممي يا سلاااام الاستديو يقيف كلو وعوض احمودى وسط الناس واخر عرضه وعاصم حايم فى نص الفرقه الموسيقية وعصام فى قمة الآداء الممتاز . التقييم10من10 مافى كلام . عوض احمودي مليون رسمى عسل عسل عسل .
| |
|
|
|
|
|
|
Re: يا سفيان الصيام دا باين فترك شديد ..! (Re: ودالعباسية)
|
اخوانا ودالعباسيه وسفيان وكل البورداب كل عام وانتم واسركم بالف خير
ود العباسيه ربنا يسعدك شقيق ما تقبل كنت احد اسباب تخفيف غربتنا طوال شهر رمضان الكريم اعاده اللة عليك وانت بالف خير
اسعدتنا شديد والله ربنا يسعدك فى الدنيا والاخرة
كل عام وانتم بالف خير
| |
|
|
|
|
|
|
Re: يا سفيان الصيام دا باين فترك شديد ..! (Re: ودالعباسية)
|
يا ناس الحله دي
سلام عليكم وعيدكم مباركــــ
للتوقيت المخالف لزمن البرنامج الزمان ما تابعت آي حلقه الا مره كدا جيت غلط للتلفزيون ..
أول أخطاء البرنامج تغيير زمنو المعهود والخططنا ليهو قبل رمضان وكتير غيري طبعاً ...
طبعاً حلقة ود الامين هي أجمل حلقة في الشهر دا بدون منازع وبإجماع العلماء ...
تاني حلقه هي حلقة ميرغني البكري ففيها كان الكل مبسوط داخل وخارج الشاشه ..
السر قدور ورغم ما لقيت كتير من قصتصـو في البوست دا ورغم قلتها كان رائع ...
وبالنسبه للفرقه الموسيقيه فعلى رأسها سعد الدين ومحمدية في رائعه ككل عام وأحمودي ( برعي زمانه)
بالنسبه للفنانين ...
اولهم جمال فرفور فالرجل أبدع في كل لحن وتصدى ليهو بحنكه، ثبات صوته ومعرفته بمكان التدخل في أغنيات الآخرين أكسبه المركز الاول بنجاح ( في نظري المتواضع ) وإختياره لأغانيه صحيح
ثانيهم عصام محمد نور ولو في عتب عليهو في بعض الحلقات فيبدو إنو الجماعه النقاد هنا نسوا إنو تعرض لوعكه في أمريكا افقدتو النطق لمده ما قصيره مما يترتب عليها تحفظو في بعض الالحان وأداو وتساعده خبرته الطويله في ذلكـ
وثالثم نادر خضــر الرجل الذي تالق في بعض الحلقات ولكن اعيب عليه أداْه لبعض مقاطع الاغاني بلكنته وإصراره على إضافتها للأغاني وكانما نوثق له وليس للأغاني الخالده واعجبني كثيراً حين تكلم مع العملاق واثنى عليه ووصف شعوره وهو امامه، وذكر زملاءه ومشاركتهم معه الشعور الطيب تجاهه....
رابعهم طه سليمان وتغنى بأغنيات جميله خصوصاً رائعة الكابلي والتي لولاها لما إتعلى مركزاً في تعقيبي هذا ولا غيره ..
وخامسهم عاصـم البنا الذي أفل نجمه هذا العام ولم نرى منه غير بِدل شديده كدا أحضرها معه من الخليج وفي الحلقه 15 كملت عليه ورجع بنا لإعادتها ،، ما تغني ود البنا بأغاني كالتي عهدناهو بها في السابق
واما خامسهم شريف الفحيل والذي لا أرى فيه فناً ولا صوتا ولا حس فني إطلاقاص ويبدو كما قال احد المعقبين ان واسطته قوية في النيل الازرق والمنتج ..
فلا لون له ولا رائحه ولا هم يحزنون ... فنصيحتي له إن كان يتشبث بهذا المجال ان يباري محمدية والقصاص ليتعلم عزفاً ينفعه وإن كنت أيقن انه لن يفلح فيه برضو .... ( موت موت حياة حياة ) ولا تلوميني يا راويه فهذا رأئي الشخصي وكفى ....
نجي للمغنيات وديل :-
على راسهم كالعادة وبدون مجامله منار صاحبة الصوت الشجى والحنون والتي تملأك إحساس بتكم وبنت الحله وبنت الفريق وأخت الاخوان فهى ملانه عزيمه وإصرار مصحوب بي موهبة جميله لها فيها كل الحق فهي تعرف ان لها درباً هنا وتسعى له ... وحتاً ستصل ... وأبدعت هذا الموسم وتفردت ...
وتليها ريماز وهي واثقه من صوتها ومن ادائها الرائع للإغنيات وفي بعض الاحيان تختار أغاني لا تناسبها وكانما فُرضت عليها وتحاول فيها وتقارب النجاح ... ويشجعها شكلها الذي ينزل علينا قُصه شعر يوميه تُنزل علينا من شعرها عسى ولعل ان تُخفي بعضاُ من جبهتها الكبيره ...
وثالثتهم افراح التي اتمنى ان تكتفي بهذا القدر وان تلتفت الى أحمد المكي وبيتها فما نالته من الفن ( احمد المك) يكفيها ويجعلها في مدار هذا الفلك ... لم تقدم شيء سوى نحيب وأكل للاغانى والحروف .. فلها منا الوداع ...
اما أخرتهم فهي ( صباح ) التي لم تضيف للبرنامج شيء ولا أبدعت ولا غنت ولكن كانت موجوده شكلاً لا مضموناً ،، وكل المغالطات التمت في شكلها وجمالها .. واقول لمعجبيها ( شكلاً) البرنامج للتوثيق والاغاني ما للاشكال والكشاكش والبهار ..... واعتقد ان الرعاة المره القادمه والمنتج لن يرسلوا لها لتشاركهم لموسم القادم وهذا حقهم وحقنا كمشاهدين للبرنامج ...
شكراً لراعي البوست وكل من تعب بالكتابه والتنزيل والذي لولاه لتعبنا نحن في البحث عن البرنامج في اماكن اخرى ...
أقول ما قلت وأعتذر إن زاد البهار في الطبخه ..!!
مودتي وإحترامي للجميع ...
| |
|
|
|
|
|
|
|