ثورة مايـــو .. ثورة شعـــب

Quote: في ناحية العز اللاقيناهو ونحن صغار في ظل ثورة مايو .. ياخ اقلاها يا اشرف كان الواحد بيضرب تلاتة وجبات بي الحليب بتاعم .. وبتتعالج كويس .. وبتقرا كويس .. وابوك لو كان موظف صغير .. كان القروش بتكون قاعده عندو لحدت آخر الشهر ويكون عندو وفر لي راس الشهر الجاي .. لكن حسع دي يا اشرف .. البيت كلو جاري .. جوه وبره .. وبعد دا .. العصر حاصل ..

كانت العبارة المكتوبة في بوكس العم أبيض ماجوك .... كتار كانو بتصوروها زي أى عبارة في بوكس مره واحد قال ربنا يصبروا ويرجعه ليهوا
ضحكته من التعليق , لكين للبعرفوا أبيض ده بعرفوا أنو كان قاصد مايو وأيامه بس الله ما أراد ......... وقصص كتيرة لو ما عندك خلفيته ما حتعرف
أصلها او مقصده , ما أى زول هنا بكتب عن الزمن داك بمحبة حيكون سادن ولا مايوي ... زمان كنت من الناس الفرحوا بالانتفاضة ولسه في البال أيامه
وسيول من الناس بتمنع كورة في رابطة أبو عنجة وهم بهتفوا ((( لا رياضة بدون حرية ))) وبعده بايام كان سوار الدهب صباح السبت بنزل بيانو الشهير
والناس طلعت ((( جيش وأحد شعب وأحد ))) ((( رأس نميري مطلب شعبي ))))فرحنا بزمن الانتفاضة وأحلامه العراض ... بس الاسياد الجو بعد نميري حسسونا أننا اتهاتر بينا شديد وفقدنا زمن الرئيس القائد , وفي بالى بعد سنوات قليلة برضوا في حفل زواج في بر مصر في نادي ضباط القوات الجوية كان الرئيس القائد منفعل مع غنية ترباس ما تهمك من الايام ظروف بتعدي طبيعت الدنيا زي الموج تجيب وتودي ويقوم ويهز بعصاه ...












---------------------------------------------
زمن جميل يمكن لانو ما جانا بعدو زمن جميل بقينا مكنكشين في ذكرياتو