هل الشريعة الاسلامية أفيون الشعوب ؟؟؟؟

Quote: حينما جئت كندا اول مرة..كنت اقيم في مقاطعة سسكتشوان..و حكومة المقاطعة هي حكومة يسارية ( يعني بقايا شيوعية عدييل يا عبد الدين)..وجدت فيها العجب العجاب..الخمر لا تباع لمن هو اقل من ثمانية عشر..ومن هو دون تلك السن القانونية..لا يسمح له ليعمل بائع في اماكن بيع الخمور..و تدخين السجائر بمثل الفكرة..( و الله يا ول ابا البوليس من حرصوا على الصحة و السلامة العامة مر ات بيرسل ناس قاصرين ..و يشحدوك سجارة..عشان يختبروك بتعرف النظم و القوانين ولا لأ..و لو الله قدرك اديت ليك سيجارة لقاصر او قاصرة. الله قال بي قولك).. في الشارع العام تجد العاهرات ( الله يكرمك و يكرم السامعين و القارئين) واقفات في الشارع و مافي زول بيتجرأ و يسوق واحدة منهن في عربيتو.. لأن البوليس برضك واقف في الناصية التانية ..و لو قبضك شايل واحدة بيسحب منك رخصة القيادة..و دي اخير منها سجن تأبيدة.. حكومة الولاية عندها سياسة الرعاية لمحدودي الدخل.. اجار البيوت مدعوم..العلاج مدعوم.. التعليم مدعوم.. خدمة الإتصالات مدعومة.. الكهرباء مدعومة..الغاز (البلد نص السنة فيها جليد و بيحتاج تدفئة) مدعوم..التعليم متاح و مدعوم..لو مخدمك في العمل هفت عليهو ساكت وقفك من الشغل..الحكومة بتدعمك و بتوفر ليك حق السكن والمأكل و و خدمات الكهرباء و الغاز..و لمن يدوك شيك.. مش بيدوك ليهو ساكت و يفكوك عكس الهوا تمشي تعمل بيهو زي ما عاوز.. لأنو من شروطهم الآ تصرف هذا الشيك في خمر أو سجائر..و عندهم الإمكانية يتابعوا كل معاملاتك ( شراء و بيع) و لو اصريت انك تصرف القروش في الممنوعات الشهر الجاي ح يوقفوهو منك عقابا عن سفاهتك..!! قبول الآخر و احترام الثقافات و الديانات المختلفة امر واجب بنص القانون..و مجلس التنوع الثقافي في مقاطعة سسكتشوان.. اول ما حدثت احداث سبتمبر الشهيرة..عمل حلقات متعددة ليؤكد لأهل المقاطعة أن الإسلام ليس هو كما يصوره الإعلام الغربي..و انما هو دين المحبة و التسامح..و لأول مرة يا ولد ابوك اتيحت لي الفرصة اقعد مع يهود الكتف حذو الكتف و هم بيدافعوا عن الإسلام دفاعا عجزت الأمة الإسلامية عن تقديمه في تلك الآيام القاسية..و جنبي البوذي و الإسماعيلي و البهائي..و غيرهم من اهل الديانات..ووقفوا معاي و مع حقي في تعليم ديني و ثقافتي لأطفالي.. هل بتقدر كل المجتمعات الإسلامية تقيف معاي مثل تلك الوقفة؟.. في بيتك يجوك شهود يهوا و يدقوا ليك الباب عشان يبشروا بدينهم..و اول ما اقول ليهم اسمي محمد النور..يجاملوك بكلمتين عن الدين الإسلامي و يعتذروا ليك و يقولوا معليش التمرة خطأ..! المساجد قائمة ولا احد اعترض عليها..معابد البوذيين قاعدة..هياكل اليهود قاعدة.. كنائس النصاري قاعدة..و كل فرد ينام على الجنبة البتريحوا..طفلتي الأولى.. كان عمرها خمس سنين وديناها المدرسة.. اول انطباع قالت لي: مافي حجاب في المدرسة و ما دايرة امشي تاني..!!.. اها اسوي شنو (كوالد)..؟..جريت كبس على دليل التفلونات..و لقيت اسم مدرسة الهدي..و هي مدرسة بتدرس الإسلام و اللغة العربية..و طاخ وديت بتي للمدرسة..و اتكيفت هي لأنو وجدت مرامها..دايرة تمشي المدرسة الإسلامية على كيفها و المدرسة موجودة..و حكومة الولاية وفرت قطعة الأرض و عفتها من الضرائب ( دي حكومة زول يساري و بقايا شيوعية يا عبد الدين).. دايرة تتعلم عربي .. المدرسة موجودة..ياخي نحن لحقنا نطلب دار للجالية السودانية عشان الناس ترقص فيها كرنق..و درملي و نقارة..و برضك حكومة المدينة و بكل ثقة وفرت لينا دار..!! و هي الدار التي فشلنا في حيازتها في مدينة الدلنج السودانية لرابطة الدلنج الثقافية للآداب و الفنون.. لأنو في واحد متجهم اتحيت ليهو الفرصة عشان يكون ولي امرنا العام..و قال لينا الفنون حرام..و هو الذي يدعي ان الشريعة ممكن تحترم الآخر الثقافي و الجمالي و الديني ..الخ..!! اليوم اقيم في مقاطعة اخرى..و ناسها محافظين ( يعني زي ناس الجبهة الإسلامية في السودان)..الجوامع قاعدة..و يوم العيد يا عبد الدين..حكومة الولاية بتفرغ لينا اكبر ساحة رياضية في المدينة (ساحة مخصصة لكرة القدم الأمريكية)..و مش كده و بس ..وحاتك والي الوالاية حضر معانا صلاة عيد الأضحى الماضية ( و هو مسيحي)..!! في مدينة كالقري .. اليوم عندنا مقابر خاصة للمسلمين..و يوم التحدث جنازة ( لا قدر الله) حكومة المدينة بتوفر ليك عربية الجنازة ( و هي موضوع كبير خلاص)..مافي محمد عطا ولا جهاز امن بعتب عليك..و يسألك قاعد تسوي في شنو؟..!!! هذه التجربة يا عبد الدين كنت بقولها لأصحابي ناس الجبهة الإسلامية قبل غيرهم ..و كنت بقول ليهم..في السودان يوجد مسلمين بلا اسلام..و في سسكتشوان يوجد اسلام بلا مسلمين..و في كندا ( و اقولها بالفم المليان) يوجد اسلام بلا مسلمين..و هل الإسلام شيئا اخر غير الأخلاق الحميدة السمحاء؟.. تجربة كندا يا صديقي انا شخصيا منبهر بيها..