الاخ/أبوذر علي الامين نائب رئيس تحرير(رأي الشعب)لغاية لحظة القبض عليه لايملك شهادة (قيد صُحفي)

Quote: كدي يا ميادة اعيد صياغة كلام عزاز ده ( لأنو فيو سؤال منطقي شايفك ما اهتميتي بيو ) فيمكن تقبلي الكلام مني و كت عزاز متوترة. عايني يا ميادة و الكلام ده ليك شخصيا ما مسألة رد بوست و اجابة لكلام .. لأ .. كلام حمور لميادة عشان تفكر فيو .. الصحفي ابوذر ما اتقبض براو .. اتقبضو معاو مجموعة من الناس .. لكنو اشتهر عنهم الأن لعرض صور التعذيب الاتعرض ليو .. يعني القضية بقت هسه قضية صحفي تم تعذيبو .. دي درجة اعلى من موضوع الاعتقال .. اها لمن تعذيب اباذر تردي لخالد ابو احمد بسطر ادانة سريع و بعد داك تناقشيو في انو ليه عمل ايقونة عاجل .. ده حقك العادي و لحدي هنا ممكن ما يكون مشكلة .. لكن البيلفت النظر انو اليهمك شديد لدرجة فتح بوستين عن انو ابو ذر عض الضابط و اباذر ما عندو قيد صحفي .. الكلام ده ممكن يكون صاح و حصل .. لكن السؤال هو هل ده الموضوع المهم عن اباذر هسه ؟ قضية اباذر انو اتعرض لتعذيب فكون انو الناس تعرف انو عض الضابط او ما عندو قيد او بيكتب بيدو الشمال او انو ما بيصلي او انو ماكل ليو زول قروش و زايغ دي كلها ما القضية .. القضية انو شخص تعرض لتعذيب .. طيب لمن نخلي التعذيب الاتعرض ليو و نقعد نفتح بوستات انو اباذر ما بيصل رحمو و ليو سنتين ما زار عمو في الكلاكلة ده هل ليو تفسير غير انو محاولة للتبرير و صرف انظار القراء عن قضية اباذر ؟ اتفقنا فوق ان قضية اباذر انو شخص تعرض لتعذيب .. انو بيعضي او ما عندو قيد او انو لمن يخش الحمام ما بيجر الموية دي كلها اشياء لا تقدح في السؤال المهم السألتوعزاز : هل لهذا تعرض للتعذيب ؟ يلا تجاوز قضية اباذر الاساسية و الاهتمام بانو ما عندو قيد و انو عضاض ده يا يكون انصرافية .. زي زول قالوا ليو ابوك غرق يقول هو المرقو من البيت بالجلابية شنو الليلة ؟ يعني كل الشاغل الناس في تعذيب اباذر ما مهم لكن مهم انوما عندو قيد ؟ طيب ما عندو .. اها برض هو اتعذب. اها لو ما انصرافية يكون الشي التاني للاسف سوء تقدير و عدم احساس بمصايب الناس. زول متعرض لتعذيب و مهان و حالتو حالة و الناس بتناقش اخطاء ثانوية او حتى اساسية ليو لكن ما ليها علاقة بمصيبتو .. تجريم لزول جراء جريمة وقعت عليو. تعرفي المثل البيقول تكون في البير و يقع فوقك الفيل ؟ زول في لحظة محتاج الناس تقيف معاو و تصبرو تطالب ليو بحقو عشان يحس على الاقل انو الخير ما انعدم في الدنيا و انو السودان ما هو بس الناس الطقوهو بالكهربا و ضربوهو ديل. فكرتي يا ميادة انو ده راجل ماسكنو مجموعة و مكتفنو و بيضبرو فيو و يقلعوهو هدومو و يكهربوهو. احساسو شنو ؟ الوجع الحس بيو قدر شنو ؟ لمن يكورك من الألم ضحكو فيو وله لأ ؟ شتموهو قالو ليو شنو لم الضرب كتر عليو و دمعة نزلت من عينو ؟ ده ما كان كفاية عليو .. لأ .. لمن نسمع انو ده حصل ليو نقعد نناقش انو هل عندو قيد صحفي وله لأ ؟ الزول ده لو كفر بالسودان و بالناس و بالدنيا مش ليو حق ؟ ياخ انا زول معذب و صوري نصف عاري قدامكم و انتو بتناقشو القيد الصحفي ؟ مش ده ياهو سوء التقدير و عدم الاحساس بمصاب الناس ؟ بالجد غريب يا ميادة انو في كل قضية ابوذر يكون الاستغربت ليو و هماك و شفتي انو خبر مهم للناس عشان يقروهو و يتاقشو فيو انو ابوذر عض بتاع الامن و انو ابوذر ما عندو قيد. ابوذر اتعذب يا ميادة .. اتعذب. ادق و اتصعق بالكهربا. تقولي لي ما عندو قيد ؟ لو طلع ما عندو شهادة ابتدائي زاتو يكون ليو حق. يعمل القيد لشنو في بلد المواطن فيها بيتعذب و ما بيلقى ناس تقيف معاو بل تقعد تضحك تقول عض بتاع الامن في نخرتو إخيي عليو ؟ يا ميادة سؤال عزاز منطقي و موضوعي شديد : هل اتعذب عشان ما عندو قيد ؟ لأنو الخلى ابوذر شخصية عامة الناس كلها تعرفا و تهتم بيها هو التعذيب ما شي تاني. حاولي فكري في اجابة السؤال ده .. ليه ابوذر يتعذب ؟ بياتوحق ؟ بياتو قانون ؟ بياتو شرع ؟ بياتو منطق ؟